މަޖާ

ފާތުމާ އަވިއްސެއް ހެން ދެކޮޅަށް ދުވަމުން ދިޔައީ އިރުއޮއްސުމުގެ ކުރިން ކުރަންހުރި ހުރިހާ މަސައްކަތެއް ކޮށް ނިންމާލެވޭތޯއެވެ. ނޭވާލާނެ ވަގުތުކޮޅެއް ނުހޯދާ ހަދަރިން އެކަނިމާއެކަނި ބަލަމުން އަންނަތާ ދެއަހަރު ވީއެވެ. ފާތުމާގެ ފިރިމީހާ ހަސަނު މަހަށް ގޮސް އުޅުމުގެ ތެރޭގައި ދިމާވި ހާދިސާއަކާ ގުޅިގެން ނިޔާވީ މީގެ ދެއަހަރު ކުރިން ފާތުމާ 6 ވަނަ ކުއްޖާއަށް ބަލިވެ އިންދައެވެ. އަދި އާއިލާ މީހުންގެ އެހީތެރިކަމެއް ފާތުމާއަށް ލިބެމުން ނުދާތީ ފާތުމާ ވެފައި ވަނީ ވަރަށް އެކަނިވެރި ދިރިއުޅުމެއް އުޅެމުންދާ މީހަކަށެވެ. ފާތުމާގެ އެންމެ ކުޑަކުއްޖާއަށް މިހާރު 2 އަހަރު ފުރިފައިވާއިރު އެންމެ ދޮށި ކުއްޖާ އަށް އަދި ވީ އެންމެ 13 އަހަރެވެ. އެހެންކަމުން ގޭގެ ކަންތައްތައް ކުރަންޖެހިފައިވަނީ ފާތުމާއަށް އެކަންޏެވެ. ދަރިންގެ ކަންތައްތައް ބަލަމުން ގޭގޭ މަސައްކަތްތަށް ނިންމުމުގައި އަވަދިނެތި އުޅެމުން އަންނަ ފާތުމާގެ މަސައްކަތް މިއަދު ލަސްވެގެން ދިޔައީ އެދުރުގޭގައި އޮތް ބައްދަލުވުމަަކަށް ދާން ޖެހިގެންނެވެ. ކޮންމެއަކަސް ތެޅެމުން ފޮޅެމުން އިރުއޮއްސުމުގެ ކުރިން ފާތުމާ ހުރިހާ ކަމެއް ކޮށް ނިންމައި ތަންޑުލައިފިއެވެ. މީހުން ދިރިއުޅެ ހިސާބާ ދުރުގައި ފާތުމާއަށް އުޅެން ޖެހުމުގެ ސަބަބުން ކޮންމެ ދުވަހަކުވެސް އިރުއޮއްސުމުގެ ކުރިން ކުރަން ހުރި ހުރިހާ ކަމެއްވެސްކޮށް ނިންމޭތޯ ބަލައެވެ. ކުދިންނަށް ކާންދީ އަކުރު ކިޔައިދީ ފެންވަރުވައި ނިންދެވުމަށްފަހު އަވަހަށް އޮށޯތީ މިރޭވެސް އަވަހަށް ނިދާލުމުގެ ނިޔަތުގައެވެ. ފާތުމާއަށް ނިދި ނިދި އޮއްވާ ކުއްލިއަކަށް ފުންމައިގެން ތެދުވަތީ ބިރުވެރި ހުވަފެނެއް ފެނިގެންވެސް މީހަކު ނުތެދުވާނެ ފަދަ ގޮތަކަށެވެ. ތެދުވުމާއެކު އަޅާއެތިކޮށް ދޮރާއި ދިމާއަށް ދުއްވައިގަތީ ކަމެއް ހަނދާން ވެގެންނެވެ. ކޮންމެ ދުވަހަކުވެސް ހުރިހާ މަސައްކަތެއް ކޮށް ނިންމާ ފާތުމާއަށް މިރޭ ނިދަން ވަދެވުނީ ކާއެއްޗެހި ޑަސްބިން އުކާނުލައެވެ. ޑަސްބިން އުކާނުލައިފިނަމަ މިރޭ ބުޅާ އަރައި މުޅިތަން ހަފުސްކުރާނެ ކަމުގެ ބިރަށްޓަކައި ފާތުމާއަށް ނިދާކަށް ނޯވެވުނެވެ. ދޮރުން ބޭރަށް ބޯދިއްކޮށްެން ކުޑަ ވަގުތު ކޮޅަކު މަޑުކޮށްލީ ކިރިޔާވެސް މީހެއްގެ ހިލަމެއް ވޭތޯ ބަލާލުމަށެވެ. މީހެއްގެ ހިލަމެއް ވާން ނެތުމުން މޭގައި އަތްޖައްސާލާއިގެން ހުރެ ދުލަށް އައިހައި ހެޔޮއެއްޗެއް ކިޔަމުން ޑަސްބިން ހިފައިގެން ފާތުމާ ދިޔައީ ގޮނޑުދޮށާ ދިމާއަށެވެ. މިނޫނީ ހަސަނު ނިޔާވިފަހުން ފާތުމާ ރޭގަނޑު ބޭރަކަށް ނުނިކުމެއެވެ. އަދި ހަސަނު އުޅުނު ޒަމާނުގައިވެސް ރޭގަނޑު ބޭރަށް ނިކުތުމަކީ ފާތުމާއަށް ބޮޑު ކަމެކެވެ. ކޮންމެއަކަސް މިކަންވެސް މިއޮތީ ކުރާން ޖެހިފައެވެ. ފާތުމާ އަވަސް ފިޔަވަޅުމަތީ ގޮސް ގޮނޑުދޮށަށް ފައިބައި ޑަސްބިން އުކާލުމަށްފަހު ބަލިދީ ރީއްޗަށް މުދުން ދޮވެލައިގެން އެއްގަމަށް އެރިއިރު ހުރީ މީހާ ބިރުން ގޮސް އެއްކޮށް ދާހިއްލާ ފޯވެފައެވެ. އަވަސް އަވަސް ކޮށްލައިގެން ގެޔަށް ދާން އުޅުމުގެ ތެރޭގައި ފާތުމާއަށް އަދި ވީ މާ ނުބައި ގޮތެކެވެ. މީހާ ބިރުން ހުރި ވަރުން ގެޔަށް ދާ މަގު އޮޅުނީއެވެ. މިހާރު ފާތުމާގެ ހިތެކޭ ދިރޭ މަހަކަށް ފެން ނުލިބުމުން މަރަށް ތެޅޭ އެއްޗެކޭ އެއްފަދައެވެ. ވަކި ހިސާބަކަށް ބާރަށް ހިނގައިފައި އައުމަށްފަހު ދުއްވައިގަތީ ދެބުޅާ ކޯޅެގަތް އަޑަށް ބިރުންނެވެ. ދުވެފައި ދަނިކޮށް އަނެއްކާވެސް ފާތުމާއަށް ދިމާވީ މާ ދެރަ ގޮތެކެވެ. ރުކަކުން ވެއްޓިފައި އޮތް ފަންގަނޑެއްގައި އަޅައިގަނެގެން ފާތުމާ ވެއްޓި އެތާ އޮތް ގާގަޑެއްގައި ބޯ ޖެހި ފާތުމާގެ ބޯ ފަޅައިގެން ދިޔައީ ބަސްބުނާހާ ކުޑަ ހިނދުކޮޅެއްގެ ތެރޭގައެވެ. ބައިވަރު ލޭތަށް ފެނުމާއެކު އެ އޮތް ތަނަށް ފާތުމާ ހޭ ނެތިއްޖެއެވެ. ފާތުމާއަށް ހޭވެރިކަންވީ އޭނާގެ އެންމެ ކުޑަ ދަރިފުޅު ރޯ އަޑަށެވެ. އޭރު އޭނާ ވަށައިގެން މީހުން އެއްވެފައި ތިއްބެވެ. ވީ ގޮތް ރޭކާލީ ހޭއެރިތާ އިރުގަނޑެއް ވީ ފަހުންނެވެ. އަޑުން އަޑުނަގާ ރޯން ފެށީ ރޭގައި އޭނާއަށް ދިމާވި ހާދިސާ ހިތަށް އެރުމުންނެވެ. ފާތުމާ ވަލު ތެރޭގައި ހޭނެތިފައި އޮއްވާ ފެނުނީ ފަތިސްނަމާދު ކޮށްލައިގެން ވަލަށް ވަދެ އުޅުނު ބަޔަކަށެވެ. ފެނުމުން އަވަހަށް އެމީހުން ފާތުމާ އޭނާގެ ގެޔަށް ގެނައީ އެވެ. އޭނާ އަށް މިހެން މި ދިމާވީ ގަންނާ ކުރައްވާ ބިރެއްގެ ސަބަބުންނެވެ. އަދި މިހާދިސާއަށް ފަހު ރަށު މީހުންވެސް މީހުން ދިރިއުޅޭ ހިސާބުން ފާތުމާއަށް ޖާގަދިނެވެ.   (ނިމުނީ)

އެއްދުވަހެއްގެ ހަވީރުގެ ވަގުތެވެ. ފުޅައްޓޭ (ފޫޅުދިގު ހަންޑި) ހިނގަމުން ދިޔައީ ރަށުގެ ބޮޑުމަގުންނެވެ. މިހާާރު ފުޅައްޓޭގެ ފޫޅުވަނީ ގަތާލެވިފައެވެ. ގަމީހާއި ޖިންސުގައި ބެގީކޮށްލާފައި ހުންނައިރު ނުހަނު ފުރިހަމައެވެ. މިހާރު ކަށް ބޮލުނާށީގެ ބަދަލުގައި ގެންގުޅެނީ މޯނޮސްޓާ ދަޅެކެވެ. ބޮލުގައިވެސް ހުންނަނީ ސްޕައިކް ޖައްސާލާފައެވެ. އަރާފައި ހުންނަނީ އޮފީސް ބޫޓަކަށްށެވެ. މިހެންދަނިކޮށް ހަސަންޓޭ އަށް ފުޅައްޓޭ ފެނުނެވެ. ހަސަންޓޭ ހިތައްއެރިއެވެ.”މިއީ ކޮންރަށަަކު ކުއްޖެއްބާއެވެ. ވަރަށް މުއްސަނދިވާނެހެން ހީވެއެވެ. އަވަހަށް ގެޔަށްގެންގޮސް ހަބަރު ދަބަރު ބަލާލަންވިއެވެ.” މިހެން ހިތަށްއަރާ ގޮސް ފުޅްްޓޭއާއި ސަލާމް ކޮށްލުމަށްފަހު ރައްޓެހިވިއެވެ. އަދި ފުޅަށްޓޭ ގެޔަށް ގެންދިޔައެވެެ. ********** އެއްދުވަހަކު ހެނދުނު ފުޅައްޓޭ އައިންތުއަށް ގަމީހެއްދިނުމަށްފަހު އިސްތިރި ކޮށް ދިނުމަށް ބުންޏެވެ. ދެން އައިންތު ގަމީސް އިސްތިރި  ކޮށްގެން ދިޔައިރު ފުޅައްޓޭއަށް އޮތީ ނިދިފައެވެ. ދެން އައިންތު ގޮވާލުމަށްޓަކައި، އެނދު ކައިރިޔަށް ދިޔަ ވަގުތު ފުޅައްޓޭގެ ފޫޅު ފެނުނެވެ. ވަގުތުން އައިންތުއަށް އެއީ ފޫޅުދިގު ހަންޑިކަން އިނގުނެވެ. އައިންތު ބިރުން މަޑުމަޑުންގޮސް ހަސަންޓޭ ކައިރީގައި މިވާހަކަ ބުނުމަސް ފަހު، ހަސަންޓޭ އަށް ފޫޅު ދައްކަާ، އަވަހަށް ފުޅައްޓޭ އެ ގެއިން ނެރުމަށް ބުންޏެވެ. އެދުވަހު ހަވީރު ހަސަންޓޭ ފުޅައްޓޭ ގާތުގައި އެގެއިން ދިޔުމަށް އެދުނެވެ. ނަމަވެށް ފުޅައްޓޭ ދާން އެއްބަހެއް ނުވިއެވެ.  އަދި ބުންޏެވެ.”ހައްހައްހާ، ޔޫ ގާއިޒް ނޯ މީ ރައިޓ،ް އާން އަހަރެން މިއީ ކުރީގެ ފޫޅުދިގު ހަންޑި. މިހާރުގެ ފުޅައްޓޭ އަހަރެން މިގެއިން ދާނެ އޮތީ ހަމަ އެންމެ ގޮތެއް. މަގެ ފޫޅު މަށަށް އަނބުރާ ދީ އޯރ އެލްސް އައި ވިލޮ ނެވާ ގޯ…”  ދެން ހަސަންޓޭ އަވަހަަށް ފޫޅު ދިނެވެ. ދެން ފުޅައްޓޭ ބުންޏެވެ. “އަހަރެން މިރަށަށް މި އައީ ވެސް މި ބެނުމުގައި، ދެން ދަނީ.. ދެނެއް އަހަރެން އައިންތު ހޯދާކަށް ވެސް ނާންނަނަން، އަހަރެންގެ ބައިވަރު ފްރެންޑުން ތިބޭ.. ސަންމޭރީ (ސަންތި މަރިޔަނބު)، ސަފަރެ (ސަފަރު ކަތްދަ)، މިހެން ގޮސް ކިޔާނެ ކަމެއް ނެތް… ޓާޓާާ، ބާއި، ސީޔޫ.” މިހެން ބުނުމަށް ފަހު ފުޅައްޓޭ ވަލުތެރެޔަށް ވަދެ ގޮސް ގެއްލިއްޖެއެވެ.