އިޙްނާ (1)

ދުނިޔެ މައްޗަށް އިރުގެ އަލިކަން ފާޅުވަނީއެވެ. ރޭގަނޑު ކުރި ވިއްސާރައިގެ އަސަރުތައް، ޖައްވުގައި އެބަހުއްޓެވެ. ޖައްވުގައި ނޫނަސް މުޅި ރަށަށް ނަޒަރު ހިންގާލި ކަމުގައި ވިޔަސް މަގުތަކުގައި ހެދިފައިވާ ފެންގަނޑުތައްވެސް ހެކި ދޭނެއެވެ.

“ދަރިފުޅާ އަވަސްކޮށްބަލަ! ކާރުގައި ދާން އުޅުނަސް ގަޑިއަށް ސަމާލުވާން ވާނެ އެއްނު…” މިލްނާ ގޮވާލިއެވެ.

“މަންމާ!!! އަދި މަޑުކޮށްބަލަ… ގަޑިއަށް ދެވޭނެޔޭ… އެބައަންނަން ޔޫން ގޮވާގެން…” އިޙްނާ ބުންޏެވެ.

“އަދިވެސް ވިއްސާރާގެ އަސަރު ހުރީމާ އަވަސްކުރާށޭ ގޮވީ… ހަނދާންކޮށް ސައިތަށި ބޮއިގެން އަންނާތި! މަންމަ މިދަނީ ތިރިއަށް…”

ސްޓަޑީ ޓޭބަލް މަތީގައި ހުރި ދަބަސް ކޮނޑުގައި އަޅުވަމުން އިޙްނާ ބަދިގެއަށް މިސްރާބު ޖެހިއެވެ. މޭޒުމަތީ ގިރާފަ ބަހައްޓާފައި ހުރި އައިސް މައިލޯ ތަށި ހުސްކޮށްލުމަށްފަހު އޭނާ އެތަށި ދޮވެ ބަންޑުން ޖެހިއެވެ. ހަލުވި ފިޔަވަޅުތަކެއްގައި އޭނާ ދެވަނަ ބުރިން އެއްވަނަ ބުރިއަށް ފޭބިއިރު އޭނާގެ އިންރިޒާރުގައި ޔޫން ހުއްޓެވެ.

“އެއްކަލަ ތަތްކަމަނައަށް އާދެވިއްޖެ ދޯ؟ ދުވަހަކުވެސް އަހަރެމެންނަށް ގަޑި ނުޖެހޭ ދުވަހެއް ނުދޭ ވިއްޔާ ތަތްކަމަނައާ ހެދި…” ޔޫން ބުންޏެވެ.

“ހަހް. އެހެން އިހޫއާ ދިމާއަށް ބުނާއިރު ކޮންމެ ދުވަހަކު ތުއްތަ ގޮވާއިރުވެސް ހޭލެވެނީ ތުއްތަ އަމިއްލަ މީހާގެ ބޮލަށް ފެންބާލިދީއެއް އޮއްސާލީމަ.” އިޙްނާ އެހެން ބުނެފަ ޔޫންގެ އަނގަ ބަންދުކޮއްލިއެވެ.

ކަޑަ ވީވަރުން ޔޫން އެންމެ ބަހެއްވެސް އަނގައިން ނުބުނެ ކާރަށް އެރިއެވެ. މަގުތަކުގައި ފެންގަނޑު ހެދިފައި ހުރުމުން ކާރު މަޑު ސްޕީޑްއެއްގައި ޑްރައިވަރު ދުއްވިއެވެ. ކުއްލިއަކަށް ހުއްޓުމެއްނެތި ވާރޭގެ ތިކިތައް ކާރުގެ ފުރާޅު މައްޗަށް އޮއްސާލިގޮތުން ވާރޭ ވެހެނީ ބޯކޮށްކަން އެނގެއެވެ. ވާރޭ ވެހެން ފެށުމާއި ދިގުކޮށް “ޕިސްޕިސް” އެއް ޔޫން ކިޔާލިއެވެ.

“ކިހިނެއްވެގެންތަ ތި ހޯނު އަޑު ލައްވަނީ މާވަރަކަށް؟ އަދި ރީއްޗަށް ‘ސ’ އަށް ދަމާލައިފިއޭ…”

“ހަމަ އަހަރެމެން ސްކޫލަށް ދާން ނިކުމެ ތަންކޮޅަކަށް ކާރު ދުއްވާލި ތަނާ ވާރޭ ވެހެން ފެށީ. މިއަދު ނެތް ކާރުގައި ކުޑައެއްވެސް.”

“މިހާރު ކޮންމެވެސް ވަރަކަށް ތުނިކޮށްފިއެއްނު، ދުވެލާފަ ދެވޭނެ އެއްނު ކްލާހަށް.”

“އާނ ތިހެން ހަދަމާ. ފުރަތަމަ އިހޫ ނިކުމެފާ ބަލަންވީނު. ވާރެ ތުނިކޮށްލާފިތޯ. އޭރުން އަހަރެން ނިކުންނާނަން. އިހޫ އަށް ވެސް އިނގޭނެ އަހަރެން ފިންޏަށް ބަލިކަން.”

“ތިވަރަށް ނުކިޔާދިނަސް އިހޫއަށް އެނގެޔޭ.(ކާރުން ނިކުތުމަށްފަހު ޗެކްކުރަމުން އަތްދިއްކޮށްލަމުން) މިހާރު ނުވެހޭ ވާރޭއެއް. މާސްކް ނޭޅިޔަސް އޯކޭވާނެ”

“ޔަޤީންތަ ހަމަ؟”

”  %50 ޔަޤީން!” އޭ ކިޔާފައި ހެމުން އިޙްނާ ޔޫންގެ އަތުގައި ހިފައިގެން މަޑު ދުވުމެއްގައި ކްލާހާއި ދިމާލަށް މިސްރާބު ޖެހި އެވެ.

އިޙްނާގެ ރީތިކަމަށް ހިތާއިހިތުން އާދައިގެ މަތިން ޔޫން ތައުރީފުކޮށްލިއެވެ. އިޙްނާގެ މަޖާ ހިތްހެޔޮ މިޒާޖުގެ ސަބަބުން އޭނާގެ ހިތް އިޙްނާއަށް ލެނބެމުން ދިޔައީ އޭނާއަށް ވެސް ނޭންގިއެވެ. އޭނާގެ ހިތުގައި މިވާ އިޙްސާސްތައް އިޙްނާއަށް އެނގޭ ދުވަހު އިޙްނާ އޭނާއަށް ދޭނީ ކޮން ޖަވާބެއްތޯ؟

*ނުނިމޭ*

އަޅުގަނޑުގެ ފުރަތަމަ ދިގުވާހަކަކަމުން ވަރަށް ގިނަ ކުށްތަކާއި ޕާޓްތައް ކިޔުންތެރިންނަށް ކުރުވެދާނެއެވެ. އެކަމަށްޓަކައި ނިހާޔަތަށް މާފަށް އެދެމެވެ. ވާހަކައިގައި ހުރި ކުށްތައް ކިޔާދިނުމަކީ ވާހަކަ ލިޔުމަށް ލިބޭ ކުރިއެރުމެކެވެ. ކިޔުންތެރިން އަޅުގަނޑަށް ކުރާ ސަޕޯޓަށް ޓަކާ ވަރަށް ބޮޑަށް ޝުކުރުވެރިވަމެވެ.