ސިއްރު ސިއްރުން ހިތޭ މިލްކު ކޮށްލީ ކަލާ… (ތިންވަނަ ބައި)

ކޮންމެ ދުވަހަކުވެސް ކަންތައްތައް ދާނީ މިގޮތައް ކަމަށްވަންޔާ އެންމެ ދުވަހަކުވެސް ޒެކަން ގެ މޫނު ފެނިނުލާނެކަން އެނގި ޔަލަކްގެ ހިތައް ތަދުވެއްޖެއެވެ. އެހެނަސް ހިޔާލުތަކުގައިހުރެ ކޮފީ ހަދާނިންމާލުމަށްފަހު ބަދިގެއިން ނިކުމެ ކޮނޑުގައި އަޅުވައިފައި އޮތް އަތްދަބަސް ރަނގަޅުކޮށްލަމުން ގެއިން ނިކުންނަން ހިގައިގަތެވެ. އެހެނަސް ދޮރާހަމަޔަށް ދިޔުމަށްފަހު ޔަލަކް ހުއްޓުނީ ކަމެއްފާހަގަވެގެން ކަހަލަގޮތަކަށެވެ.

ފަސްއެނބުރި ޔަލަކް ބަލާލިއިރު މަސައްކަތު މީހަކު ހުރީ ޔަލަކްއަށް ބަލަހައްޓައިންނެވެ. ސުވާލުގެ ނަޒަރަކުން ޔަލަކް އެމީހާއަށް ބަލާލުމުން ވަރަށް އަދަބުވެރިކަމާއެކު އެމީހާ ބުނެލީ ޒެކަން އެދިފައިއޮތީ ޒެކަންގެ ކޮޓަރިއަށް ކޮފީ ގެންދިޔުމަށްކަމަށެވެ. އެހާހިސާބުން ޔަލަކްއަށް ހަމަ ރަނގަޅަށްވެސް އޮޅިއްޖެއެވެ. ބަދިގޭގެ ކަންކަން ކިޔައިދޭން އައި މީހާ ބުނެފައިދިޔައީ ބަދިގޭ މޭޒުމަތީގައި ބެހެއްޓުމަށެވެ. ސުވާލުން ފުރިފައިވި މޫނަކާއިގެން ޔަލަކް އެމީހާއަށް ބަލަންފެށުމުން ކުށްރަނގަޅުކުރެވޭތޯ އެމީހާ މަސައްކަތްކުރިއެވެ. “މާފްކުރައްވާ. އަހުމަދު ކައިރީގައި ކުރިން ޒެކަން ބުނުއްވީ އެހެން. ފަހުންއައިސް އޭނާ ނުފެނިގެން އަޅުގަނޑު ކައިރީގައި ބުނުއްވީ މިގޮތައް. ޒެކަންގެ ކޮޓަރި ހުންނާނީ މަތީގައި.” މައްޗަށް އިޝަރާތްކޮށްލަމުން ޔަލަކްއަށް އޮޅުންފިލުވައިދިނުމަށްފަހު އެމީހާ ދާންހިނގައިގަތެވެ.

ޔަލަކްގެ ހިތް ނެގިނެގިފައި ޖެހެންފެށީ އެހިސާބުންނެވެ. ހާސްވީވަރުން ނިތްކުރިމަތިން ދާތިކިތައްވިދަންފެށީ ސިކުންތުކޮޅެއްގެތެރޭގައެވެ. ކޮފީ ހިފައިގެން ޒެކަންގެ ކޮޓަރިއަށްދާން ކެރޭނެހެއްޔެވެ؟ އަނެއްކާ ޒެކަން އެއުޅެނީ ކީއްކުރަންބާއެވެ! އެހިޔާލުން ޔަލަކް އިތުރަށް ބިރުގަނެއްޖެއެވެ. އެހެނަސް ހިތްވަރުގެ މައްޗަށް ހިތްވަރުކުރަމުން ދެފަޔަށް އެތައްބާރެއްލައިގެން ޔަލަކްއަށް ކުރިޔަށް ހިނގައިގަނެވުނީ ނުހަނު މަސައްކަތުންނެވެ.

ބަދިގެޔަށްވަދެ މޭޒުމަތީގައި ހުރި ކޮފީތަށީގައި އަތްޖައްސާލިއިރު އަދި އެވެސްހުރީ ފުދޭވަރަކަށް ހިހޫވެފައެވެ. ހާސްކަމުން ފުރުގެންވި ހިތަކާއެކު ކޮފީތަށި ސިންކަށް އަޅާލުމަށްފަހު ޔަލަކް އަލުން ކޮފީހަދައި އާޓްއަޅައިލިއެވެ. އެޔަށްފަހު ކޮފީތަށި ހިފައިގެން ޔަލަކްބަދިގެއިން ނިކުތެވެ. އެހެނަސް ކުޑަތަންކޮޅަކަށްދެވުމާއެކު ޖެހުނީ ހުއްޓިލާށެވެ. ޔަލަކްގެ އަތް ތުރުތުރު އަޅަނީއެވެ. ވަތުތަށީގައި ކޮފީތަށި ތެޅުވޭއަޑުން މުޅިތަނުގެ ހިމޭންކަން ނަގާލައިފައި ވިޔެވެ. އަދި ސިޑިންއަރާއިރު ކިހާވަރެއްވާނެބާއެވެ. ޔަލަކް އިރުކޮޅަކު ހަމަޖެހިލުމަށް މަސައްކަތްކޮށްލުމަށްފަހު އަނެއްކާވެސް ކުރިޔަށް ހިނގައިގަތީ ފުންނޭވާއެއް ފަޒާގެތެރެއަށް ދޫކޮށްލުމަށްފަހުގައެވެ.

ސިޑިން އަރަމުންދިޔައިރު ފަހަރަކަށްވުރެ ފަހަރެއް ޔަލަކްގެ ހިތުގެ ތެޅުންދިޔައީ ބާރުވަމުންނެވެ. ޒެކަންފެނުމުން އަދި ވާނީ ކިހާވަރެއްބާއެވެ. ޔަލަކް ހިތާހިތާ އަމިއްލަނަފްސައް އެއްޗެހި ގޮވަމުން ސިޑިންއަރައި ކުރިމަތިން ފެންނަންހުރި ތިން ދޮރާދިމާއަށް ބަލައިލީ ހައިރާންވެހުރެއެވެ. އަނެއްކާ މިޖެހުނީ އަނެއް ހަ ކަންތަކެވެ. ޔަލަކް ހާސްވެފައިހުރިވަރުން އެމީހާ ކުރެން މިތަނުން ކޮން ކޮޓަރިއެއްތޯވެސް އަހާނުލެވުނެވެ. ދެންމިޖެހުނީ އަނެއްކާ ކޮންފަދަކަމެއް ހެއްޔެވެ؟ ކޮންފަދަބަޔަކު އުޅޭ ކޮޓަރިތަކެއް ކަމެއްވެސް ނޭނގެއެވެ. އެކަމަކު އަނެއްކާ އަލުން އެމީހާ ހޯދައިގެން ސުވާލުކޮށްގެން އަންނައިރު ކޮފީވެސް ހިހޫވާނެއެވެ. ހިތާހިތުން އަމިއްލަނަފްސާ ވާހަކަދައްކަމުން ކޮންމެގޮތެއްވިޔަސް ހެޔޮކަމަށް ޔަލަކް ގޮސް ހުއްޓިލީ މެދަށް ހުރިކޮޓަރީގެ ދޮރުކައިރީގައެވެ. ދޮރުހުޅުވާލުމަށްޓަކައި ފިނިވެފައިވާ ޔަލަކްގެ އަތްތިލަ އުފުލާލުމަށްފަހު ތަޅުގައި ހިފާލަން އުޅެނިކޮށް އެތެރެއިން ބަޔަކު ވާހަކަ ދައްކާ އަޑުއިވުނުހެން ހީވިއެވެ. ބިރުން ތެޅިގަނެވުނު ގޮތަކުން ޔަލަކްއަތުން ކޮފީތަށި ބަންޑުންނުވީވެސް ހަމަކިރިޔާއެވެ. ހިތާދިމާއިން މޭގައި އަތްއަޅާލުމަށްފަހު ޔަލަކް އެތަނުން ދުރަށްޖެހިލައި ދެންހުރި ދެކޮޓަރިއަށް ބަލައިލީ ވިސްނާލާފަދަ ގޮތަކަށެވެ. އެހެނަސް އެހެން ކިތަންމެ އިރަކު ހުއްޓަސް އެތަނުން ޒެކަންގެ ކޮޓަރި ނޭނގޭނެތީ ހިތް ބުނެލި މިސްރާބަށް ފިޔަވަޅެއްއަޅައިލީ ބިރުންހުރެއެވެ. އަނެއްކޮޅުން ލަސްކޮށްފިނަމަ ކޮފީ ހިހޫވާނެއެވެ. އެހެން ހިތައް އެރުމާއެކު ޔަލަކްގެ ހަރަކާތްތައް ކުޑަކޮށް އަވަސްވިއެވެ. ޔަލަކް ހުއްޓުނީ ސިޑިން އެރިއިރު އެންމެ ފުރަތަމަޔަށް ހުރި ކޮޓަރީގެ ދޮރުކައިރީގައެވެ.

ތެޅިތެޅިއޮތް ހިތަކާއެކު ޔަލަކް ދޮރުފަތުގައި ކަންފަތް ޖަހައިލިއެވެ. އެތެރެއިން އެއްވެސް އަޑެއްނީވުމުން ހަމަޖެހުމުގެ ނޭވާއެއްލުމަށްފަހު ކޮޓަރީގެ ތަޅުގައިހިފާލިއިރު އަނެއްކާވެސް ހިތުގެ ތެޅުން ދެގުނައަށް އިތުރުވެއްޖެއެވެ. ހީވަނީ މޭކަށިގަނޑު ފަޅާލާފައި ނިކުންނަން އުޅޭހެންނެވެ. އަނެއްކާވެސް އަތުގައި މަޑުތުރުތުރެއް އުފެދިއްޖެއެވެ. މަޑުމަޑުން ކޮޓަރީގެ ދޮރުކުޑަކުޑަކޮށްހުޅުވާލިއިރު ޔަލަކްއެކޭ މަރުވެފައިހުރި މައްޔިތެކޭ ތަފާތެއްނެތެވެ.

ވަގުލޮލުން ކޮޓަރީގެ ތެރެއަށް ނަޒަރުހިންގާލިއިރު އެބޮޑު ކޮޓަރީގެ ތެރެއިން މީހަކު ފެންނަން ނެތުމުން އަވަހަށްކޮޓަރިތެރެއަށް ދެމިގަނެފައި ދޮރުފަތް ލައްޕާލައިފިއެވެ. އެޔަށްފަހު އެނބުރި ބަލާލާފައި ޔަލަކް އަވަދިނުވީ ކިރިޔާއެވެ. އަތުގައި ހުރިކޮފީތަށި ސަލާމަތްވީ ކާކުގެ ނަސީބަކުންކަމެއް ނޭނގެއެވެ. އަލުން އެނބުރި ކޮޓަރިން ނިކުންނަންވެސް ޔަލަކްގެ ހިތައް އަރައިފިއެވެ. ހާސްވީވަރުން ނޭވާތާށިވިހެން ޔަލަކްއަށް ހީވިއެވެ. އެހެންނުވާނީވެސް ކީއްވެހެއްޔެވެ؟ ކިންގްސައިޒް އެނދުގައި އަރާމުކޮށްނިދާލާފައި އެއޮތީ ޒެކަންއެވެ.

ވަރަށް ހިތްވަރުކޮށްފައި ޒެކަންހޭލުމުގެ ކުރިން އެތަނުން ސަލާމަތްވުމައްޓަކައި ޔަލަކް ފިޔަވަޅެއް ކުރިޔަށް އަޅައިލީ އެނދާ ދާދި ކައިރީގައިހުރި ސައިޑްޓޭބަލްއާއި ދިމާއަށެވެ. ޒެކަން ހޭލަފާނެތީ ޔަލަކްހުރީ ނޭވާ ހިފަހައްޓާލައިގެންނެވެ. އިނގިލިތަކުގެ ކުރިޖައްސައިގެން ވަގުވަގުން ހިނގާލައިފައިގޮސް ސައިޑްޓެބަލްމަތީގައި ކޮފީތަށި ބައިންދާލެވުމާއެކު ޔަލަކްއަށް ހީވީ ބޮލުން ބޮޑުބުރައެއް ނެތިގެންދިޔަހެންނެވެ. އެހެނަސް އަދިވެސް ހިތް ހަމަޔަކަށް ނޭޅެނީ ކޮޓަރިން ނުނިކުމެވެނިސް ޒެކަން ހޭލަފާނެތީއެވެ. އެހިޔާލުގައި އެނބުރިލާފައި އެއްލުނު ކަޅިއަކުން ޒެކަން ފެނުމާއެކު ޔަލަކް ހުއްޓުން އަރައިފިއެވެ. ހިނދުކޮޅަކަށް ނަމަވެސް ޔަލަކް އެކޭ ހިލައިގެ ބުދެކޭ އެއްފަދަވެއްޖެއެވެ. އެސްފިޔަ ޖަހާލަންވެސް ހަނދާންނެތިފައި ޔަލަކްއަށް ހުރެވުނީ ޒެކަންގެ ފުރިހަމަ ހަށިގަނޑު ހާމަޔަށް ފެނުމުންނެވެ. ބެޑްކަވަރާއި ގުޅޭގޮތައް އޮތް ފެހިކުލައިގެ ބޯ ރަޖާ ޒެކަންގެ އުނަގަނޑާހަމަޔަށް އޮތުމުން އެ ކަސްރަތީ ހަށިގަނޑު ވަނީ ހާމަޔަށެވެ. މޭމަތީގައި އެންމެރީތިކޮށް އެތުރިލާފައިވާ މަސްތަކުން ދޭހަކޮށްދެނީ ޒެކަން ކަސްރަތައް ބަހައްޓާ ފަރުވާތެރިކަމެވެ. ޔަލަކް ގެ މެޔަށް ފިނިވެގެންދިޔައީ އާދަޔާޚިލާފުގޮތަކަށެވެ. ހިތާހިތުން އެހަށިގަނޑަށް ތައުރީފުކޮށްލެވުނީ އިޚްތިޔާރުން ބޭރުގައެވެ. އެމޭގައި ބޯއަޅާލަން ޔަލަކްގެ ހިތައް އެރީ ކީއްވެކަމެއް ނޭނގެއެވެ. އެހެންހިތައްއެރުމާއެކު ޔަލަކްގެ ގައިގަ ހުރިއްޔާހުރި ލޯލިތައްކޮޅަށްޖެހިގެންދިޔައީ އެއީ މީގެކުރިން ދުވަހަކުވެސް ޔަލަކްގެ ހިތަށް އައިސްފައިވާފަދަ އެއްޗެއްނޫންވީމައެވެ. އެހެނަސް އެހެންދިމާއަކަށް ކަޅިހިންގާލަން ނޭނގިފައި ޔަލަކްއަށް ހުރެވުނީއެވެ. އެހެންހުއްޓާ ޔަލަކް ސިހިގެން ދިޔައީ ޒެކަން ހަރަކާތެއްކޮށްލަން އުޅޭހެންހީވުމުންނެވެ. އެބަރު އެސްފިޔަތައް ތަޅުވާލިގޮތުން ލޯހުޅުވާލަން އުޅެނީއޭ ހީވުމާއެކު ޔަލަކްއަށް އަމިއްލަ އިޚްތިޔާރުއައިސްގެން ކޮޓަރިން ނިކުންނަން ފާޑަކަށް ދުއްވައިގަނެވުނީއެވެ.

ހާސްވެފައިހުރިވަރުން ޔަލަކްއަށްގޮސް ޖެހިގަނެވުނީ ދޮރުކައިރީގައި އެއްފަރާތަކަށްވާގޮތައް ހުރި ބޮޑު ޕްލާސްޓިކް މާގަހުގައެވެ. އަރިއަޅާލި ޔަލަކްގެ ހަށިގަނޑު ބެލެންސް ނުކުރެވިގެންގޮސް ޖެހުނީ ޓައިލްސްތައްމަތީގައެވެ. އެހެނަސް އެޔަށްވުރެ އަވަހަށް ތެދުވެ އެކޮޓަރީގެ ދޮރު ލައްޕާލިއިރު އެހަނި ދާއިރާއިން ޒެކަން ބޯހިއްލާލިތަން ޔަލަކްއަށް ކިތަންމެ ރަނގަޅަކަށްވެސް ފެނުނެވެ. ދުވެފައި ކަހަލަގޮތަކަށް ސިޑިން ފައިބައި ހަމަޖެހިލަން މަސައްކަތްކުރީ ގޭތެރޭގައި އެތައް މީހަކު މަސައްކަތުގައި އުޅެމުންދާތަންފެނުނީމައެވެ. ޔަލަކް ބޭނުންވީ ފެންފޮދެއްބޯލާށެވެ. އެހެންހިތައި ބަދިގެޔަށްވަދެ ފްރިޖް ހުޅުވާލާފައި ފެންފުޅިއެއްނެގުމަށްފަހު މޭޒުމަތިން ބިއްލޫރިތައްޓަކަށް ފެންއަޅާފުރާލިއެވެ. ޔަލަކް ފެނަތަށި އެއްނޭވާއިން ހުސްކޮށްލުމަށްފަހު ތަށިބަހައްޓަފައި ފެންފުޅި އަނބުރާ ފްރިޖައް ލަމުން ވަށައިގެން ކަޅިހިންގައިލިއެވެ. އޭރު ބަދިގޭގައި ކެއްކުމުގައި ދެތިންމީހަކު މަސައްކަތްކުރަމުންދިޔައެވެ. ޔަލަކް ހައިރާންވިއެވެ. އޭނަ މިގެޔަށް އައިފަހުން އަދި މިގެއިން އަންހެނަކު ނުފެނެއެވެ. ގޭތެރޭގައި އެތައް މީހަކު އެތައް މަސައްކަތެއް ކުރަމުންދިޔައިރުވެސް އުޅެނީ ހުސް ފިރިހެނުންނެވެ. ނުވިތާކަށް ބަދިގޭގައި ކައްކަން އެއުޅެނީވެސް ހުސް ފިރިހެނުންނެވެ. ކީއްވެހެއްޔެވެ؟ ކިތަންމެ ނޯކަރުންގިނަ ގެޔަކަސް އޭގެތެރޭގައި އަންހެނަކު ނުހިމެނޭ ގެޔެއް ނުހުންނާނެކަން ޔަލަކްއަށް ޔަގީނެވެ. ވީއިރު މިގޭގައި އަންހެނެއްގެ ނިޝާނެއްވެސް ނެތީ ކީއްވެގެންހެއްޔެވެ؟

އެ އާދަޔާ ޚިލާފު ހިޔާލުގައިހުރެ ޔަލަކް ބާރުހިނގުމެއްގައި ގޮސް ގެއިން ނިކުމެފައި ފުންނޭވާއެއް ދޫކޮށްލީ މިހުރިހާއިރު ނޭވާ ނުލާހުރި މީހެއްފަދައިންނެވެ. ގޯތިން ނިކުންނަން ދޮރާށީގައި ބާރަށް ހިފާލުމާއެކު ޔަލަކްއަށް އިހުސާސްވީ އަތައް ތަދުވާކަމެވެ. ނޭފަތުގައި ފިރުމާލެވުނީ ނޭފަތްވެސް އައްސިވެފައިވާހެން ހީވެގެންނެވެ. ވެއްޓުނުއިރު ލިބުނު އަނިޔާކަން އެނގުމާއެކު ޔަލަކްއަށް ބޯހޫރާލެވުނެވެ. އޭނައަށް އެވަރުވީ އެތެރޭގައި ހުއްޓާ ހަމަ ޒެކަންއަށް ހޭލެވިދާނެތީހެއްޔެވެ؟ އެހެންނުވާނެގޮތެއްވެސް ނެތެވެ. އެގަޑީގައި ޒެކަން ހޭލިނަމަ ހީކުރާނީ ޔަލަކް ވައްކަންކުރަން އުޅެނީކަމަށެވެ. ޒެކަންއަށް ނުފެންނަކަމެއްވެސް ނޭނގެއެވެ. އޭނަ އެއައީ ގައިމު ވަރުގަދަ ބޮނޑިއެއް ބޮއެގެންނެވެ. އަޑުފަށްގަނޑުވެސް ގަދަވާނެތާއެވެ. އަނެއްކާ އެހުރިހާއިރު ޒެކަން އޮތީ ހޭލާކަމަށްވެސް ވެދާނެއެވެ. ޔަލަކް އުޅޭނޫޅޭގޮތްބަލަން ނިދާފައިކަމަށް ހެދިގެން އެތެރެއިން ހީލަހީލާވެސް އޮވެދާނެއެވެ. އެހިޔާލު އައުމާއެކު ޔަލަކް އަނެއްކާވެސް ހާސްވެއްޖެއެވެ. އެހުރިހާ ކަމެއް ޒެކަންއަށް އިނގޭނަމަ އޭނައަށް ދެން ޒެކަން ފެންނަ ހިސާބަށްވެސް ދާންނުކެރޭނެއެވެ. ލަދުން މަރުވާވަރުވެއްޖެއެވެ. މާތްކަލާކޯއެވެ. މިޖެހުނީ ކިހާބޮޑުކަމެއްހެއްޔެވެ؟ ދެފަރާތައް ބޯހޫރާލަމުން ޔަލަކް ނިކުމެ ޓެކްސީއެއް ހުއްޓުވާފައި އެޔަށްއަރައި ދާންވީތަން ޑްރައިވަރަށް ބުނެދީފިއެވެ.

-ނުނިމޭ-