ސިއްރު ސިއްރުން ހިތޭ މިލްކު ކޮށްލީ ކަލާ… (ހަތަރުވަނަ ބައި)

އެ އާދަޔާ ޚިލާފު ހިޔާލުގައިހުރެ ޔަލަކް ބާރުހިނގުމެއްގައި ގޮސް ގެއިން ނިކުމެފައި ފުންނޭވާއެއް ދޫކޮށްލީ މިހުރިހާއިރު ނޭވާ ނުލާހުރި މީހެއްފަދައިންނެވެ. ގޯތިން ނިކުންނަން ދޮރާށީގައި ބާރަށް ހިފާލުމާއެކު ޔަލަކްއަށް އިހުސާސްވީ އަތައް ތަދުވާކަމެވެ. ނޭފަތުގައި ފިރުމާލެވުނީ ނޭފަތްވެސް އައްސިވެފައިވާހެން ހީވެގެންނެވެ. ވެއްޓުނުއިރު ލިބުނު އަނިޔާކަން އެނގުމާއެކު ޔަލަކްއަށް ބޯހޫރާލެވުނެވެ. އޭނައަށް އެވަރުވީ އެތެރޭގައި ހުއްޓާ ހަމަ ޒެކަންއަށް ހޭލެވިދާނެތީހެއްޔެވެ؟ އެހެންނުވާނެގޮތެއްވެސް ނެތެވެ. އެގަޑީގައި ޒެކަން ހޭލިނަމަ ހީކުރާނީ ޔަލަކް ވައްކަންކުރަން އުޅެނީކަމަށެވެ. ޒެކަންއަށް ނުފެންނަކަމެއްވެސް ނޭނގެއެވެ. އޭނައެއައީ ގައިމު ވަރުގަދަ ބޮނޑިއެއް ބޮއެގެންނެވެ. އަޑުފަށްގަނޑުވެސް ގަދަވާނެތާއެވެ. އަނެއްކާ އެހުރިހާއިރު އޭނަ ކޮޓަރީގައި ޒެކަން އޮތީ ހޭލާކަމަށްވެސް ވެދާނެއެވެ. ޔަލަކް އުޅޭނޫޅޭގޮތްބަލަން ނިދާފައިކަމަށް ހެދިގެން އެތެރެއިން ހީލަހީލާވެސް އޮވެދާނެއެވެ. އެހިޔާލު އައުމާއެކު ޔަލަކް އަނެއްކާވެސް ހާސްވެއްޖެއެވެ. އެހުރިހާ ކަމެއް ޒެކަންއަށް އިނގޭނަމަ އޭނައަށް ދެން ޒެކަން ފެންނަ ހިސާބަށްވެސް ދާންނުކެރޭނެއެވެ. ލަދުން މަރުވާވަރުވެއްޖެއެވެ. މާތްކަލާކޯއެވެ. މިޖެހުނީ ކިހާބޮޑުކަމެއްހެއްޔެވެ؟ ދެފަރާތައް ބޯހޫރާލަމުން ޔަލަކް ނިކުމެ ޓެކްސީއެއް ހުއްޓުވާފައި އެޔަށްއަރައި ދާންވީތަން ޑްރައިވަރަށް ބުނެދީފިއެވެ.

ކޮފީޝޮޕަށް އައިސް މަސައްކަތުގައި އުޅުމަށްފަހު ޔަލަކް ގެޔަށްދާން ނިކުތްއިރު ތުނިކޮށްވާރޭ ވެހެމުންދެއެވެ. ޔަލަކް މަޑުކޮށްލައިގެން ހުންނަތާ އިރުކޮޅެއް ނުވެ ޓެކްސީ އައިސް މަޑުކޮށްލުމުން ދުވެލާފައި ގޮސް ޓެކްސީއަށް އަރައި ހަމަޖެހިލައިފިއެވެ. އަވަހަށް ގެޔަށްދާން ބޭނުންވެފައި އިން ޔަލަކް އެއްފަހަރު އަތުގައި އޮތް ފޯނަށް އަނެއްފަހަރު މަގުމައްޗަށް ބަލަމުން ގެންދިޔައީ ކެތްތެރިކަން ކުޑަވެފައިވާ މީހަކު ފަދައިންނެވެ. މާ ބޮޑަށް ވަރުބަލި ދުވަހެކެވެ. އަނެއްކޮޅުން މިއަދު ޒެކަންގެ ގޭގައިވި ކަންތައް ޔަލަކްގެ ސިކުނޑިކަމުން ދިޔައެވެ. ޔަލަކް އުޅެއުޅެ އެ ހިޔާލުން ދުރުވެވުނު ކަމަކަށް ނުވިއެވެ. ޔަލަކްއަތުކުރީގައި އޮތް ގަޑިޔަށް ބަލާލާފައި މަގުމައްޗަށް ސީދާކޮށްލި ނަޒަރުގެ ސަމާލުކަން ހޯދީ އެންމެ ކައިރިން މަޑުމަޑުން ދުއްވާފައި ދިޔަ ކާރުގައި އިން ޒެކަންއެވެ. ޔަލަކް އަވަސްއަވަހަށް އިސްޖަހައިލީ ޒެކަންއަށް ފެނިދާނެތީ ބިރުން އުޅޭ ކަހަލަ ގޮތަކަށެވެ. އެގޭގައި ކަންތައްވީ ގޮތުން ޔަލަކްގެ ހިތް ބިރުގަންނަންފެށީ ވަކި ގޮތެއް ބަލައިފައެއް ނޫނެވެ.

ހިޔާލުތަކަށްގެނބިފައިހުރެ ގެޔަށްވަންނަން ދިމާކުރި ޔަލަކް ދޮރުން ވަދެވަދެހުއްޓާ މީހެއްގެ ގައިގައި ލައިގަނެފައި ވެއްޓެންދަނިކޮށް މެރުނު ދެލޯ ހުޅުވާލެވުނީ އެމީހަކު ޔަލަކް ވެއްޓުނަނުދީ ހިފޭއްޓުމުންނެވެ. ” މިހާރު ދުނިޔޭގެ ކަމެއްވެސް މި މަންޖެގެ ނުހުންނަނީތަ އަޅެ؟” ބާރު ހިނިގަނޑަކާއެކު ކިޔާލް އެހެންބުނެލީ ޔަލަކްގެ ގައިގަ ހިފަހައްޓާލައިގެންހުރި ޒަޔާންގެ ކޮނޑުގައި ބާރަށް ޖަހާލަމުންނެވެ. ކިޔާލްގެ ހިނިގަނޑުގައި ބައިވެރިވެލަމުން ޒަޔާންވެސް ޔަލަކްއާއި ދުރަށްޖެހިލައިފިއެވެ. ޔަލަކް ރުޅިއައިސްގެން ދެމީހުންނަށް ވަކިވަކިން ލޯއަޅާލުމަށްފަހު އެތެރެއަށް ވަންނަންހިނގައިގަތެވެ.

ކިޔާލްގެ އެންމެ ގާތްއެކުވެރިޔާ ޒަޔާންއަކީވެސް ކިޔާލްއެކޭ އެއްފަދައިން އައިޖީއެމްއެޗްގައި މަސައްކަތްކުރަމުންދާ ޑޮކްޓަރެކެވެ. ކިޔާލްއާއިއެކު އަބަދުވެސް ޒަޔާން އެގެޔަށް އައިސްއުޅޭނެއެވެ. ކިޔާލްގެ މަންމައާއި ބައްޕަދެކެ އަމިއްލަ މައިންބަފައިން ފަދައިން ލޯބިވާނެއެވެ. އެމީހުންގެ ހިތުންވެސް ނުހަނު މަތީ ޖާގައެއް ޒަޔާންއަށް ލިބިފައިވަނީ ޒަޔާންގެ ރަނގަޅު އަޚްލާގާއި ހިތްހެޔޮކަމުގެ ސަބަބުންނެވެ.

ކޮޓަރިޔަށްވަދެވުމާއެކު ތާޒާވެލަން ބޭނުންވެފައިހުރިވަރުން ޔަލަކް ފެންވަރާލުމަށްފަހު އެނދުގައި ހަށިގަނޑު ދަމާލީ ވަރުބަލިވެފައި ހުރުމުންނެވެ. ޔަލަކްއަށް ހޭވެރިކަމެއްވީ މަންމަ އައިސް ގޮވަންފެށުމުންނެވެ. ޔަލަކް ފޯނު ހޯދާލާފައި ބަލާލުމާއެކު ފުންމައިގެން ތެދުވެވުނީ ފަހެއްޖަހާފައި ހުރުމުންނެވެ. މިއަދު މާ ވަރަކަށް ނިދުނު ދުވަހެކެވެ. ” ދަރިފުޅު ބަލީތަ؟” ޝެހެނާޒް އެހެންއަހައިލިއިރު އެ މޫނުމަތީގައިވި ކަންބޮޑުވުން ޔަލަކްއަށް ފެނުނެވެ. “ނޫން. މިއަދު އަޅުގަނޑު ތަންކޮޅެއް ބިޒީކޮށް އުޅެންޖެހުނު ދުވަހެއްވީމަ ވަރުބަލިވީ” ޔަލަކް މަންމައަށް ޖަވާބުދިނީ މަންމަގެ ގައިގަ ބައްދާލާފައެވެ. ފެންވަރަންގެން ސައިބޯން އައުމަށް ބުނުމަށްފަހު ޝެހެނާޒް ކޮޓަރިން ނުކުންނަން ހިނގައިގަތުމާއެކު ޔަލަކް ތެދުވެ އަލަމާރި ހުޅުވައިލިއެވެ.

ރޭގަނޑުގެ ކެއުން ނިންމާލުމަށްފަހު ކޮޓަރިޔަށްވަން ޔަލަކްގެ ސިކުނޑި ފުރިގެން ބަނޑުންވީ ޒެކަންގެ ހިޔާލުތަކުންނެވެ. ކަންބޮޑުވާން ފެށީ މާދަމާ ޒެކަންއާއި ކުރިމަތިލާން ޖެހޭނެތީއެވެ. އަނެއްކާ އެކަންތައް ޒެކަންއަށް އިނގުނުބާއެވެ؟ އެހެންވެއްޖެނަމަ ޒެކަން ބުނާނީ ކީކޭ ހެއްޔެވެ؟ އެތައް ސުވާލުތަކަކުން ޔަލަކްގެ ހިތްފުރި ބާރުވަމުން އައެވެ. އެހެނަސް އެނދުގައި ހަމަޖެހިލައި އެހާއަވަހަށް ދެލޯ މަރައިލީ އެކަންތައް ހަނދާންނައްތާލަން ބޭނުންވެފައިހުރިވަރުންނެވެ.

ކޮޑުގައި އޮތް އަތްދަބަސް ރަނގަޅުކޮށްލަމުން ޔަލަކް ގެއިން ނިކުންއިރު ކިޔާލްހުރީ އިންތިޒާރުގައެވެ. ސައިކަލަށްއަރާ ހަމަޖެހިލަމުން ދާންވީ އެޑްރެސް ކިޔާލްއަށް ބުނެދިނުމުން ކިޔާލް ޔަލަކްއަށް ބަލައިލި ޝައްކުގެ ނަޒަރުފެނިފައި ޔަލަކް ކިޔާލްގެ ކޮނޑުގައި ބޮނޑިއެއް އަޅައިފިއެވެ. ހީގެންފައި ސައިކަލް ދުއްވާލަމުން ކިޔާލް މަގުމައްޗަށް ސަމާލުކަންދެވޭތޯ މަސައްކަތްކުރިއެވެ.

ގޭގެ ދޮރުން ވަދެވުމާއެކުވެސް ޔަލަކް ފިނިވެއްޖެއެވެ. ނުހަނު ހާސްވެފައިހުރެ އެތެރެޔަށްވަދެ ވަށައިގެން ހޯދައިލީ ޒެކަން އުޅެދާނެކަމަށެވެ. އެހެނަސް ޒެކަން ފެންނަންނެތުމުން ސިޓިންރޫމު ސާފުކުރަން އުޅުނު މީހާއަށްބަލާލުމަށްފަހު އެމީހާއަށް ހިނިތުންވެލަމުން ޔަލަކް މަޑުމަޑުން ހިނގާލާފައިގޮސް ބަދިގެޔަށްވަނެވެ. ކޮފީ ހަދާ ނިންމާލުމަށްފަހު އެ ހިފައިގެން ޒެކަންގެ ކޮޓަރިއާ ހަމަޔަށްދިޔައިރު ޔަލަކްގެ ދޮން މޫނުގައި  ދާތިކިތައް ވިދަން ފަށައިފިއެވެ. ބިރުންހުރެ ޔަލަކް ދޮރުހުޅުވައިލީ ކޮންމެ ގޮތެއްވިޔަސް ޒެކަން އާއި ކުރިމަތިލާންޖެހޭނެކަން އިނގި މަޖުބޫރުވެގެންނެވެ.

އެތެރެޔަށްވަނުމާއެކު ޔަލަކްއަށް ދޫކޮށްލެވުނީ ފުންނޭވާއެކެވެ. ޒެކަން ފެންނާކަށްނެތެވެ. ލެއްވި ނަސީބެކޭ ހިތާ އަވަސްއަވަހަށް ސައިޑްޓޭބަލްމަތީގައި ކޮފީތަށި ބަހައްޓާފައި ދާން ހިނގައިގަތުމާއެކު ހުއްޓެވުނީ ފާހާނާއިން ފެންވަރާ އަޑުއިވޭތީއެވެ. ފުޅާ ހިނިތުންވުމަކާއެކު ޔަލަކް ކޮޓަރިން ނިކުންނަން ހިނގައިގަތީ ޒެކަންއާއި ކުރިމަތިލާން ނުޖެހުމުން އުފަލުން ހުރެއެވެ.

ސިޑިން ފޭބެވުމާއެކު ޔަލަކްއަށް ބަލާލެވުނީ ހުޅުވިގެންދިޔަ ގޭގެ މައި ދޮރާ ދިމާއަށެވެ. ސުވާލު އުފެދިފައި ހުއްޓާ އެތެރެއަށްވަނީ ގާތްގަނޑަކަށް ޔަލަކްގެ ބައްޕައާއި އެއް އުމުރުގެ ފިރިހެނެކެވެ. ޔަލަކް ހާސްވެއްޖެއެވެ. އެއީ އަނެއްކާ ކާކުބާއެވެ؟ ޒެކަންގެ ބައްޕަޔަށް ވެދާނެހެއްޔެވެ؟ ބިރުންހުރެ އިސްޖަހާލާފައި ޔަލަކް ކުރިޔަށް ހިނގައިގަތީ މަޑުފިޔަވަޅުތަކެއްގައެވެ. އެހެނަސް ވަކި ހިސާބަކުން ހުއްޓިލަން ޖެހުނީ އެމީހާ ޔަލަކްއަށް ސަލާމް ގޮވާލުމުންނެވެ. އަޖައިބެއް ފެނުނު ފަދައިން ޔަލަކް އިސްއުފުލާ ބަލާލުމާއެކު އިތުރަށް އެމޫނުން ހައިރާންކަން ފެނިގެން ދިޔައީ ކުރިމަތިން ފެންނަންހުރި މީހާގެ ހިތްހެޔޮ ހިނތުންވުން ފެނިފައެވެ. އެހެނަސް ދެވަނަ ސިކުންތުގައި ހޭވެރިކަން އައިސްގެން ސަލާމުގެ ޖަވާބުދިންއިރު ޔަލަކްގެ އަޑުގައި ތުރުތުރެއް އުފެދިއްޖެއެވެ.

ނާސިރުގެ ހިތުގައި ހަމްދަރުދީ އުފެދުނީ ކުރިމަތީގައި ހުރި ކުއްޖާގެ މޫނުމަތިން ފެންނަންހުރި އިންތިހާ ދަރަޖައިގެ ކަންބޮޑުވުމުގެ ސަބަބުންނެވެ. ކައިރީގައި ހުރި ސޯފާއާއި ދިމާއަށް އަތުން އިޝާރާތްކޮށްލީ އިށީންނާށޭ ބުނެލާ ފަދައިންނެވެ. ނާސިރުގެ ލޯބިވާ ދަރިފުޅު ޒެކަންގެ ގެއިން އަންހެންކުއްޖަކު މިގޮތައް ފެނުމުން ނާސިރުގެ ހިތުގައި އެތައް ސުވާލެއް އުފެދިއްޖެއެވެ. ސޯފާގައި މަޑުމަޑުން އިށީންދެލި އަންހެންކުއްޖާއަށް ނާސިރު ބަލައިލީ ހައިރާންކަމުން ފުރިގެންވި ނަޒަރަކުންނެވެ. މިގެޔަށް އެކުއްޖާ އައިބޭނުމެއް ސާފުކުރަން ނާސިރު ކެތްމަދުވީ މީގެ 4 އަހަރު ކުރިން ނާސިރުގެ ލޯބިވާ ދަރިފުޅު ޒެކަންގެ ދިރިއުޅުމަށްއައި ބޮޑު އިންގިލާބަށްފަހު ޒެކަން އަންހެނަކާވީ ފަރާތައް މޫނުވެސް ދިމާކޮށްލާފައި ނުވާތީއެވެ. މިވަނީ ކިހިނެއް ހެއްޔެވެ؟

ޔަލަކްއިނީ ހާސްވެގެން ނޭވާވެސް ނުލެވިފައެވެ. އެއީ ކާކުކަން ނޭނގުނަސް އެމީހާ އިށީނުމަށް އިޝާރާތްކުރުމުން ބަސްއަހާކުއްޖެއް ފަދައިން ޔަލަކް އިށީނީ އެމީހާއަށް އިޚްތިރާމްކުރުމުގެ ގޮތުންނެވެ. ޔަލަކްގެ ހިތައް ކުޑަހަމަޖެހުމެއްލިބުނީ ކުރިމަތީގައި ހުރި ސޯފާގައި އިށީންދެލި އެމީހާގެ ހިތަހެޔޮކަމުން ފުރިގެންވި ހިނިތުންވުމުންނެވެ. ޔަލަކް ހަމަޔަކަށް އެޅުމަށްޓަކައި އެހިނިތުންވުން ބޮޑު ރޯލެއް އަދާކޮށްދީފިއެވެ.

” ތިއީ ކޮންކުއްޖެއް؟” އިވިގެންދިޔަ އޯގާތެރިއަޑާއެކު ޔަލަކް އިސްއުފުލާ ބަލާލުމަށްފަހު ޖަވާބުދިނުމަށް ތައްޔާރުވެލިއެވެ. ” އަޅުގަނޑަށް ކިޔަނީ ޔަލަކް.” ޔަލަކް އެހެންބުނެ ނިންމާލުމާއެކު އެކޮޅުން ދެވަނަ ސުވާލުކޮށްލީ މައިންބަފައިންނާއި ބެހޭ ގޮތުންނެވެ. ޔަލަކް މަންމައާއި ބައްޕަގެ ނަން ބުނެލުމާއެކު އެ ތުންފަތައް ވެރިވެފައިހުރި ހިނިތުންވުން އިތުރަށް ފުންވެގެންދިޔަތަން ޔަލަކްއަށް ފެނުނެވެ. ނާސިރު އަމިއްލަޔަށް ޒެކަންގެ ބައްޕައޭބުނެ ތައާރަފްވެލަމުން ޔަލަކް ކުރެން ދެން އަހައިލީ މިގަޑީގައި މިގޭގައި ކުރާ ކަމަކާބެހޭގޮތުންނެވެ. އަދަބުވެރިކަމާއެކު ޔަލަކް ޒެކަންގެ ބައްޕައަށް ތެދުބަހުން ޖަވާބުދީފިއެވެ. ނަސީބަކުން އެހިސާބުން ގެޔަށްދިޔަސް އެންމެ ރަނގަޅުކަމުގައި ބުނެލަމުން ނާސިރު ސޯފާއިން ތެދުވުމާއެކު ޔަލަކްވެސް ތެދުވެ ހިނިތުންވެލާފައި ދާން ހިނގައިގެންފިއެވެ.

ޒެކަންގެ ކޮޓަރީގެ ދޮރު ހުޅުވާލުމަށްފަހު ނާސިރު އެތެރެއަށްވަނީ އޮފީހަށްދިޔުމަށް ތައްޔާރުވާން ހުރި ޒެކަންއަށް ގޮވާލަމުންނެވެ. ޒެކަން ބައްޕަޔަށް ބަލާލުމަށްފަހު އަދަބުވެރިކަމާއެކު ޖަވާބުދީފިއެވެ. ވަރަށްވެސް ފުން ބެލުމަކުން ނާސިރު އޭނާގެ ލޯބިވާ ދަރިފުޅަށްބަލައިލީ އެދަރިފުޅަށް ބަދަލެއް އައިސްފައިހުރިތަން ދެކިލާހިތުންނެވެ. އެހެނަސް ނާސިރު ޖެހުނީ މާޔޫސް ކަމާއެކު އިސްޖަހާލާށެވެ. އެ ލޯބިވާ ދަރުފުޅުގެ މޫނުމަތިން ނާސިރުއަށް މިއަދުވެސް ފެނުނީ އެ އެކަނިވެރިކަމެވެ. މިއަދާހަމަޔަށް އައިއިރުވެސް ބަދަލެއްނުވާ އެ ހިތްދަތި ކަމެވެ. 4 އަހަރުތެރޭގައިވެސް އުނިކަމެއްނައި އެ ފުން ހިތާމައެވެ. ނާސިރުގެ ހިތައް އެތައް އެތައް އަސަރެއް ކޮށްފިއެވެ. އެދަރިފުޅުގެ ދިރިއުޅުން ހާދަހާފަޅެވެ. ޒެކަންގެ ދިރިއުޅުން ބަދަލުކުރެވޭތޯ ނާސިރު ކުރި އެތައް މަސައްކަތެއްގެ ނަތީޖާވެސް ހަމަ ސުމެކެވެ. ޒުވާން ދަރިޔެއްގެ ދިރިއުޅުން އެގޮތައްހޭދަކުރާތަންދެކެން ދަރިޔަކު ދެކެ އިންތިހާޔަށް ލޯބިވާ ބައްޕައަކަށް ކެތްވާނީ ކިހިނެއްހެއްޔެވެ؟

ނާސިރުގެ ލޯބިވާ އާއިލާއާއިއެކު އުފާވެރި ދިރިއުޅުމެއް ވޭތުކުރަމުންދަނިކޮށް އެ އުފާވެރިހަޔާތް އެފުއްމިފުށަށް ޖެހުނީ ނާސިރުގެ އަންހެނުން ޝަހާނާ ދެވަނަ ދަރިފުޅަށްބަލިވެ އިނދެގެން ވިހެއުމުގެ ތެރޭގައި ދެމައިންވެސް ނިޔާވުމުންނެވެ. އޭރު ކުޑަކުޑަ ޒެކަންއަށް އެންމެ ތިން އަހަރެވެ. ނާސިރުގެ ހަޔާތައް އައި އެކުއްލި ބަދަލުގެ ސަބަބުން ނާސިރު ދިރިއުޅުންވެސް ބޮއްސުންލައިގެންދާންފެށީއެވެ. ވިޔަފާރިއާއި ދުރުވެވި އެކަނިވެރި ހަޔާތެއް ވޭތުކުރަމުން ހިތާމަކުރުމުގައި ދުވަސްތައް ދިޔައެވެ. އެހެނަސް އެދަނޑިވަޅު ނާސިރުއަށްލިބިފައިހުރީ ޖަވާހިރެއްފަދަ ރަހުމަތްތެރިއެކެވެ. އެތައްގޮތަކުން ނާސިރުއަށްވިސްނައިދީ ނަސޭހަތްތެރިވި ރަހުމަތްތެރިއެވެ. އެކުވެރިޔާގެ އެތައް މަސައްކަތަކުން ނާސިރު އަލުން ދިރިއުޅުން އާބާދުކުރެވޭތޯ މަސައްކަތްކުރީ ނެތްހިތްވަރު ކަށިން ނެރެގެން ހަމައެކަނި ޒެކަންއަށްޓަކައެވެ. އެދަރިފުޅުގެ މުސްތަގުބަލަށްޓަކައެވެ. ބަނގުރޫޓުވަމުން އައި ވިޔަފާރި އަލުން ކޮޅަށްޖަހާލެވުނީ އެކުވެރިޔާގެ ދީލަތި އެތައް އެހީއަކާއެކުގައެވެ. އެދުވަހުން ފެށިގެން ނާސިރު ފިޔަފާރީގެ މަސައްކަތުގައި ބުރަކޮށް އުޅެމުން ޒެކަންއަށް މަންމައެއްގެ ލޯބި އުނިނުވާނެހެން ލޯބިދެމުން އައީ އަމިއްލަހިތުގައި އަތްއަޅާލައިގެންހުރެ އެދަރިފުޅުގެ މުސްތަގުބަލު އުޖާލާކޮށްދިނުމަށްޓަކައެވެ. ނާސިރުގެ މިންނެތް މަސައްކަތުން ޒެކަން ހީވާގި ރަނގަޅު ޒުވާނަކަށްވިއެވެ. ނާސިރުފަދައިން ޒިންމާދާރު މީހަކަށްވިއެވެ. ޒެކަންވެސް އުޅެމުންއައީ އުފާވެރިދިރިއުޅުމެކެވެ. މަންމަގެ ހަނދާންވިނަމަވެސް އެމަންމަގެ އުނިކަން އިހުސާސް ނުވާވަރަށް ޒެކަންއަށް ބައްޕަގެ ފަރާތުން ލޯބިލިބެއެވެ. އެހެނަސް ޒެކަންގެ އެ އުފާވެރި ހަޔާތް ބަދަލުކޮށްލީ 4 އަހަރުކުރީގެ އެހިތްދަތި މާޒީއެވެ. ވަކިންގެޔެއްގައި އެކަނި އުޅެން ޒެކަން ލޯބިކުރީ އެހިތި މާޒީގެ ސަބަބުންނެވެ. މިއަދާ ހަމަޔަށްވެސް އެހިތާމަޔަށް ކުޑަކުޑަ ބަދަލެއް ނައީވެސް ޒެކަންގެ ހިތައް ލިބުނު އަނިޔާ ލައްކަބޮޑުވީމަތާއެވެ.

ޒެކަން ތައްޔާރުވެ ނިމުމާއެކު ދެބަފައިން އެއްކޮށް ގެއިން ނިކުތީ އޮފީހަށްދާށެވެ. އެގޮތައް ބައެއްދުވަސްދުވަހު ނާސިރުގެ ދުވަސްފަށަނީ ޒެކަންއާއި އެކީގައެވެ. ޒެކަންގެ ހިތާމަތައް ކުޑަވަގުތުކޮޅަކަށް ނަމަވެސް ދުރުކޮށްދެވޭތޯއެވެ.

އަނެއްދުވަހު ހެނދުނު ޔަލަކް ތެދުވެ ތައްޔާރުވާން ހުއްޓާ ޔަލަކް ސިއްސައިގެން ދިޔައީ ދޮރުފަތުގައި ޓަކިޖަހާލުމުންނެވެ. “ޔަލް އަދިވެސް ރެޑީ ނުވެވެނީތަ؟”  ދޮރުހުޅުވާލިއިރު ކުރިމަތީގައި ހުރި ޒަޔާން ރީތި ހިނިތުންވުމެއް ޔަލަކްއަށް ރައްދުކޮށްލާފައި އެހެން އަހައިލުމުން ޔަލަކް އެމޫނަށް ބަލައިލީ ސުވާލުގެ ނަޒަރަކުންނެވެ. “ކިޔާލް ބުނެގެން ޔަލް ތިދާން އުޅޭ ތަނަކަށް ލައިދޭން މިއައީ. އޭނަގެ ޕޭޝަންޓްއެއް ހާލުދެރަވެގެން ހޮސްޕިޓަލަށް ގޮސްވީ.” ޒަޔާން އޮޅުންފިލުވައިދިނުމުން ޔަލަކް ހަމަޖެހިލާފައި އެނބުރިގޮސް އެނދުމަތީގައި އޮތް އަތްދަބަސް ހިފައިގެން އައިސް ކޮޑުގައި އަޅުވާލަމުން ޒަޔާންއަށް ބަލާލިއެވެ.

ޒެކަންގެ ގެޔަށް އާދެވުމާއެކު ޔަލަކްއަށްވީ އެހެންދުވަސްދުވަހުވެސް ހަމަ ވާވަރެވެ. އެހެނަސް ހަމަޖެހެން މަސައްކަތްކުރަމުން ގެޔަށްވަދެ ދެކޮޅުހޯދާލުމަށްފަހު ބަދިގެޔަށްވަމް އިރު ހެނދުނުގެ ނާސްތާ ތައްޔާރުކުރުމުގައި އަވަދިނެތި ދެމީހަކު އުޅުނެވެ. ޔަލަކް އަތްމަތި އަވަސްކޮށްލައި ކޮފީހަދާނިންމާލުމަށްފަހު ޒެކަންގެ ކޮޓަރިއަށްދާން ހިނގައިގަތްއިރު ހިތުތެރޭގައި އޮތްހިޔާލަކުން ހިތް ބާރަށްތެޅެން ފެށިއެވެ. ޔަގީނުންވެސް މިއަދު ޒެކަންއާއި ކުރިމަތިލާން ޖެހޭނެއެވެ. ބިރުންހުރެ ޒެކަންގެ ކޮޓަރިޔަށްވަދެ ސައިޑްޓޭބަލްމަތީގައި ކޮފީތަށި ބަހައްޓަން ކައިރިވެލުމާއެކު ޔަލަކްއަށް ސިއްސައިގެންގޮސް ތެޅިގަނެވުނީ ފާޚާނާގެ ދޮރުހުޅުވާލި އަޑުއިވުމުންނެވެ. ކޮފީތަށި އަތުންދޫވުމާއެކު އެނދުމަތީގައި ބާއްވާފައިއޮތް ހުދުގަމީސްމަތީގައި ޖެހިފައި ތިރިއަށްގޮސް ޓައިލްސްތައް މައްޗަށް ވެއްޓި ތަޅައިގެންދިޔަ އަޑު މުޅިތަނުގެ ހިމޭންކަން މުގުރާލައިފިއެވެ. ޔަލަކްއަށް ކުރެވުނުކަމަކީ ބިރުން ފުރަގަސްދެވުނީއެވެ. ކަނާތުގެ ޝަހާދަތް އިނގިލި އަނގަޔަށްލައި ދަތްތަކުން ބާރަށް ފިއްތާލެވުނީ ހިތް ތެޅިގަތްލެއް ބާރުކަމުންނެވެ.

-ނުނިމޭ-