އިންތިޒާރު 42

“ޒަޔާން އަހަރެން މިތަނުން ގެންދޭ، މިހާރު މިވަގުތު އަހަރެން މިތަނުން ގެންދޭ ޕްލީޒް، އިތުރަކަށް އަހަންނަކަށް ކެތެއްނުވާނެ، ރާއިން….. ރާއިން ގާތު އަހަރެން އެދުނީ ހަމައެކަނި އަހަރެންދެކެ އެންމެ ފަހަރަކު ލޯބިވެޔޭ ބުނެދިނުމަށް، އެކަމް އޭނަ ނުބުނި، އައި ބެގްޑް ހިމް، ބަޓް ހީ ޑިޑިންޓް… އޯލް ހީސެޑްވޯޒް ހީއިޒް ގޮއިންގ ޓްމެރީހާ، ޒަޔާން ބުނީމެއްނު އޭނަ އަންނާނޭ، އޭނައަށް ނުބުނެވުނު އަހަރެންދެކެ ލޯބިވެޔޭވެސް…. ޕްލީޒް އަހަރެން މިތަނުން ގެންދޭ، އައި ބެގް ޔޫ، ޒަޔާން ބުނީމެއްނު އަހަރެން ބުނާ ކޮންމެ ކަމެއް ކޮށްދޭނަމޭ…” ޒަޔާންގެ ގައިގައި ބައްދައިގެން ހުރެ ޒާޔާ ވާހަކަ ދައްކަމުންދިޔައީ ރޮމުންނެވެ.

“ޒާ ހަމަޖެހިބަ، އެހަށް ހުއްޓާލަބަ…”ޒަޔާން ޒާޔާ ހމައަކަށް އެޅުވޭތޯ މަސައްކަތް ކުރަމުން ދިޔައެވެ. ޔާނާގާތުގައި ފެންތައްޓެއް ދޭށޭ އެދެމުން ޒާޔާ އެނދުގައި ބޭންދިއެވެ.

“ފެން ފޮދެއް ބޯލާފަ ހަމަޖެހިބަ” ޒާޔާއަތަށް ފެންތަށިދެމުން ޒަޔާން ބުނެލިއެވެ.

“އަހަރެން ބޭނުމީ މިތަނުން ދާން، ރާއިންގެ ކުރިމަތިންދާން، ދައްތަގެ ކުރިމަތިން، ރާއިން ދެންނާންނާނެ…. ހީއިޒް ގޯން” ޒަޔާންގެ އެދުމަށް ފެންފޮދެއް ބޯލުމަށްފަހު އަނެއްކާވެސް ޒާޔާ ކިޔަންފެށިއެވެ.

“ޒާ އަހަރެން ޕްރޮމިސް ކުރިންދޯ ޒާގެ ލޯބި ޒާއަށް ހޯދަދޭނަންކަން، ޕްލީޒް ޒަޔާންއަށް އެންމެ ފަހަރަކު ޓްރަސްޓްކޮށްފާނަންތަ…” ޒާޔާގެ މޫނުފޮހެދެމުން ޒަޔާން ވާހަކަ ދެއްކިއެވެ. ނަމަވެސް ޒާޔާ ތަކުރާރުކޮށް ބުނަމުން ދިޔައީ އެއްވާހަކައެކެވެ. އޭނަ އެވަގުތު އެގެއެއިން ދާން ބޭނުންވާހަކައެވެ. އަދި ވީއެންމެ އަވަހަކަށް ރާއްޖެ ދާން ބޭނުންވާހަކައެވެ.

“ޒާ މިވަގުތު ކިހިނެތްތަ ޓިކެޓާ ހުރިހާ އެއްޗެއް ހަމަޖައްސާނީ، އަންޑަސްޓޭންޑްވެބަ ޕްލީޒް” އެންމެފަހުން ހިތްހަމަނުޖެހިގެން ޒަޔާންއަށް ބުނެވުނެވެ. ޔާނާވެސް ހުރީ މިކަމާ ބޯގޮވާފައެވެ. ޒާޔާއަށް ވާނެވަރު އެދެމީހުންނަށްވެސް އެނގެއެވެ. ނަމަވެސް އެވަގުތު ޒާޔާ އެއެދޭ ގޮތަށް ކަންތައް ކުރާނީ ކިހިނެތް ހެއްޔެވެ؟

“އަހަރެން ބޭނުމެއްނޫން އަންޑަސްޓޭންޑްވާކަށް، ޒަޔާންއަށް އަހަރެން މިތަނުން މިހާރު ނުގެންދެވެންޏާ އަހަރެން އެކަނި ހިނގައިދާނަން….” ޒާޔާވެސް ވީ ރުޅީގަދައެވެ. ކޮޓަރިން ނުކުންނަން ހިނގައިގަތުމުން އަވަހަށް ކޮންމެވެސް އެއްޗެކޭ ކިޔައިގެން ޒަޔާން އޭނަ މަޑުކުރުވިއެވެ.

“ޒަޔާން ފްރެންޑެއްގެ ގޭގަ ނޫނީ ފެމެލީ މީހެއްގެ ގާތު ނުބެހެއްޓޭނެތަ، ދެން މާދަމާ ހަމަޖެހިގެން ބަލާނީ ޓިކެޓް ލިބޭތޯ، އަހަރެންގެ ފޮރެންޑެއްވެސް ހުންނާނެ މިކޮޅުގަ، އެގޭގަވެސް ބެހެއްޓިދާނެ، އޭރުން ސުވާލުކުރާނެ މީހަކުވެސް ނުހުންނާނެ،” ޔާނާ ހިޔާލެއް ހުށަހެޅިއެވެ. ޒަޔާން އެދުނީ ޔާނާގެ ރައްޓެއްސަކަށް ގުޅައިގެން އެގޭގައި ހުރުމުގެ އިންތިޒާމު ހަމަޖެއްސުމަށެވެ. އޭނަގެ އާއިލާ މީހެއްގެ ގޭގައި ބަހައްޓައިފިނަމަ ސުވާލުތައް ކުރިމަތިވާނެތީއެވެ. ޔާނާ ފޯނުނަގައިގެން ގުޅަން ފެށުމުން އޭނަ ޒާޔާގާތުގައި ތައްޔާރުވެލުމަށް ބުންޏެވެ.

“ޒަޔާންވެސް ދާން ވީނުން ޒާޔާއާއެކު، ހެލްޕެއްވެސް ބޭނުންވެދާނެ، އަހަރެންވެސް މިދަނީ ގުޅާފަ،” ޒާޔާ ނުކުމެގެންދިޔަތަން ބަލަންހުރެފައި ޔާނާބުނެލިއެވެ. ޒަޔާންއަށްވެސް އެއީ ރަނގަޅުގޮތެއްކަމަށް ވިސްނާ ޒާޔާގެ ކޮޓަރިއާދިމާއަށް ހިނގައިގަތެވެ. ޔާނާ ހުރީ ޒާޔާ ހީކޮސްގެން ހުންނާނެ އެއްޗަކާމެދު ވިސްނާށެވެ. ކޮންމެ ގޮތެއްވިޔަސް މިހާރު ޒާޔާއަށް ހީވެފައި އޮންނާނީ އަދިވެސް އޭނައާ ރާއިންގެ ކައިވެނި ކުރެވޭނެ ކަމަށެވެ. އެވާހަކަތައް ކިޔާދެވެނީވެސް ޒާޔާ ހަމަޖެހިގެންނޫންހެއްޔެވެ؟

ޒާޔާގެ ކޮޓަރިއަށްވަތް ޒަޔާންއަށް ލިބުނީ ހައިރާންކަމެކެވެ. ޒާޔާހުރީ މާކުރީއްސުރެ އެއްޗެހިވެސް ޕެކްކޮށްފައެވެ. ޒަޔާންއަށް މަޑުމަޑުން ޒާޔާގެ ނަން ކިޔާލެވުނެވެ.

“އަހަރެން ބޭނުމީ މިހާރު މިވަގުތުވެސް ދާން، އަހަރެން މިހުރީ ރެޑީވެގެން” ސޫޓްކޭސް ކައިރީގައި ހުއްޓި އަތްދަބަސް ކޮނޑުގައި އަޅާލަމުން ޒާޔާ ބުނެލިއެވެ.

“ޒާ ހަމަޖެހިބަ، މޫނު ދޮވެލާ ރީތިވެބަ، ޒާ ބޭނުންވޮގޮތަށް މިކަންތައް ކޮށްދެނީ، ޕްލީޒް، އަހަންނަށްޓަކާ ދެން އެވަރުގެ ކަމެއްވެސް ނުކުރެވޭނެތަ” ޒާޔާގެ އަތުން އަތްދަބަސް ނަގާފައި އެނދުގައި ބާއްވަމުން ޒާޔާގެ މޫނުގައި ހިފާލަމުން ޒަޔާން ބުނެލިއެވެ. ޒާޔާ ފާޙާނައަށް ވަނީވެސް ޒަޔާން ދެވަނަފަހަރަށް ބުނުމުންނެވެ. ދޮރުމަތީގައިހުރި ޔާނާއަށް މިމަންޒަރުފެނިފައި ހިތުގައި ރިއްސާލިއެވެ. ނަމަވެސް ހިތަށް ވިސްނަދިނީ ޒަޔާންގެ ދިރިއުޅުމަށް އަންނަން ނިންމީ ޒާޔާއަކީވެސް އެދިރިއުޅުމުގެ ހިއްސާއެއްކަން އެނގިހުރެންކަން ހަނދާންކޮށްދެމުންނެވެ. ޔާނާހުރިގޮތްފެނުމުން ޒަޔާންއަށް ވީގޮތް އެނގުނުނަމަވެސް އެއްޗެކޭ ނުބުނެއެވެ.

“ގެ ހަމަޖެހިއްޖެ، މިގަޑީގައި އަޔަސް އޯކޭއޯ، ދާންވީނުން” ކޮޓަރިތެރެއަށް ވަންނަމުން ޔާނާ ބުނެލިއެވެ.

“ތެންކްސް….” ތުންފަތްމައްޗަށް ހިނިތުންވުމެއް ވެރިކުރަމުން ޒަޔާން ބުނެލިއެވެ.

“ޝުކުރު އަދާކުރާވަރުގެ ކަމެއް ނޫނެއްނު އެއީ…” އިސްޖަހާލައިގެން ހުރެ ޔާނާވެސް އިއްވާލިއެވެ.

ޒާޔާ ފާޙާނައިން ނުކުތުމުން ގެހަމަޖެހުނު ވާހަކަ ބުނެފައި ތިންމީހުން އެކީ ކޮޓަރިން ނުކުތެވެ. ގޭތެރޭގައި އެވަގުތު މީހަކުވެސް ނޫޅޭކަން ނަސީބޭ ޒަޔާން ހިތާހިތުން ކިޔާލިއެވެ. ނޫންނަމަ އަނެއްކާ ކުރިމަތިވާނީ އަނެއް ކަންތަކެވެ. ޒާޔާ ކާރުގެ ފަހަތަށް އެރުމުން ޔާނާ ކުރީގައި އިށިއިނދެލިއެވެ. ގެހުންނަތަން ކިޔައިދޭންފެށުމުން ޒަޔާން ކާރުދުއްވާލިއެވެ. ބޭރުބަލަހައްޓައިގެން އިން ޒާޔާއިނީ އަދިވެސް ރޮވިފައެވެ. މިހާރު އޭނަ އެހުރީ ހުރިހާކަމަކުން އުންމީދު ކަނޑާލައިގެނެވެ. ދެން އިތުރަށް ރާއިންގެ ފަރާތުން އެއްވެސް ކަމަކަށް އޭނަ އުންމީދެއް ނުކުރާނެއެވެ. ބައިގަޑިއިރެއްހާއިރުގެ ދަތުރަކަށްފަހު އެމީހުންގެ މަންޒިލަށްއާދެވުނެވެ. އޭރު ޔާނާގެ ރަހުމަތްތެރިޔާ އަދި އޭނަގެ ފިރިމީހާއާއި ދެމީހުން ދޮރުމަތީގައި މަޑުކޮށްލައިގެން ތިއްބެވެ. ދެދުވަހެއްގެ ތެރޭގައި ޒާޔާ ބަލާއަންނާނެ ކަމަށްބުނެފައި ޝުކުރުއަދާކޮށްފައި އެދެމީހުން ގެއާދިމާއަށް މިޝްރާބުޖެހިއެވެ.

އައިގޮތެކޭ އެއްފަދައިން ދެންވެސް ކާރުތެރެއަށް ވެރިވެފައި އޮތީ ހަމަހިމޭންކަމެވެ. ނަމަވެސް ޒަޔާންއަށް އެގޮތް ބޭޏުމެއް ނުވިއެވެ. ކޮންމެގޮތެއްވިޔަސް އެދެމީހުން ދައްކަން ފަށާފައިއޮތްވާހަކަ އޮތީ ނުނިމިއެވެ. ޒަޔާން ބޭނުންވީ އެވާހަކަ ކުރިއަށް ގެންދާށެވެ. ނޫނީ އޭނައަށް ބޮޑަށް މުހިންމީ ޒާޔާއޭ ޔާނާއަށް ހީވެދާނެތީއެވެ. މަގުގެ އެއްފަރާތަކަށް ކާރު ދުއްވާލުމަށްފަހު އޭނަ ކާރުޕާކުކޮށްލިއެވެ. މީހުން މާގިނައިން ނޫޅޭ ހިސަބަކަށްވެފައި ދަންވަރުގެ ވަގުތުކަމުން މަދު ދުއްވާއެއްޗެއް ނޫނީ ނުދެއެވެ. އިސްޖަހައިގެން ފޯނާ ކުޅެންއިން ޔާނާ ބަލާލީވެސް ދެނެވެ. އޭރު ސީޓުގައި ހަށިގަނޑުދަމާލައިގެން ޔާނާއަށް ބަލަހައްޓައިގެން ޒަޔާން އިނެވެ. ޒަޔާން އެގޮތަށް ބަލަހައްޓައިގެން އިންތަން ފެނުމުން ޔާނާއަނެއްކާވެސް އިސްޖަހާލިއެވެ. މިވަގުތު އޭނަގެ ހިތުގައިވަނީ އެންމެ ސުވާލެކެވެ. ޒާޔާ އެނބުރި ޒަޔާންގެ ހަޔާތަށް އަންނަން ވިސްނައިފިނަމަ ދެން ޒަޔާން ކަންތައް ކުރާނީ ކިހިނެތް ހެއްޔެވެ؟

“ޔާނާގެ ހިތުގައި ތިއޮތްއެއްޗެއް އަހަންނާ ހިއްސާކޮށްބަ، އަހަރެން ރުޅިއެއް ނާންނާނަމޭ”އިންގޮތަށް އިނދެ ޒަޔާން ބުނެލިއެވެ.

“ޒާޔާ އެނބުރި ޒަޔާންގެ ލައިފްއަށް އަންނަން ބޭނުންވެއްޖެއްޔާ…..އޭރުން ކިހިނެތް ހަދާނީ…އޭރުން….” ޔާނާ ބުނަން އުޅުނު ޖުމްލަ ފުރިހަމަކުރެވުނީ ދެތިންފަހަރު ފަށައިގެންނެވެ. އެސުވާލުކޮށްލުމަށްފަހު ތުންފަތުގައި ދަތް އަޅާލުމަށްފަހު ބޭރުބަލައިލީ ކުރެވުނު ސުވާލަކީ މޮޔަ ސުވާލެކޭ ހިތާއެވެ. ނަމަވެސް އޭނައަށް ހައިރާންކަމެއް ގެނުވީ ޒަޔާންގެ މަޑުހުނުމުގެ އަޑެވެ. ޒަޔާންއާ ދިމާ ބަލަހައްޓައިގެން އިންދާ އޭނަ ވާހަކަ ދައްކަން ފެށިއެވެ.

“ޔާނާއަށް ހަމަ ހީވޭތަ އޭނަ އަންނާނެހެން، އައި ޑޯންޓް ތިންކްސޯ” ޒަޔާން ބުނެލީ މަޑުމަޑުންނެވެ.

“އަހަންނަށް މިހާރުވިސްނިއްޖެ، އެމް ނޮޓްދި ވަން ފޯރ ހާ” ޔާނާއާ ދިމާއަށް ބަލާލުމަށްފަހު މައުނަވީގޮތަކަށް ޒަޔާން ބުނެލިއެވެ. ޔާނާ ވިސްނާލިއެވެ. ވަގުތަކީ ޒަޔާންއަށް ޖަވާބުދޭން އެންމެ ފުރިހަމަ ވަގުތެވެ. އާއެކޭ ބުނާށޭ އޭނަގެ ހިތުން ގޮވާލިކަހަލައެވެ. ނަމަވެސް މިފަހަރުވެސް ހާލަތު އޭނައާ ދެކޮޅުވީއެވެ. އެވާހަކައަށް ހުއްޓުމެއް ގެންނަން ޖެހުނީ ޒަޔާންގެ ފޯނަށް އައި ކޯލަކުންނެވެ. ވާހަކަ ދެއްކިގޮތުން ކަމެއް ވަރަށް ގޯސްވިކަން ޔާނާއަށް ނަގައިގަނެވުނެވެ. ހިތުގައި ބުރަކަމެއް ނުބޭއްވޭތޯ މަސައްކަތް ކުރަމުން އޭނަ ދިޔައެވެ. ފޯނު ބޭއްވިގޮތަށް ޒަޔާން ކާރު ބާރު ސްޕީޑުގައި ދުއްވާލިއެވެ. ޔާނާއަށް އެއްޗެކޭ އަހަންވެސް ނުކެރުނީ ޒަޔާންވެސް އެއްވެސް އެއްޗެކޭ ނުބުނެ އިނުމުންނެވެ.