ނާއީ….. (1) ވަނަބައި

ޢުމުރުން އެންމެ ތޭރަ އަހަރުގައި އިންސާނެއްގެ ހިތުގައި ދައުރުވާނީ ކޮންކަހަލަ އިޙްޞާޞެއް ހެއްޔެވެ؟ އެއީ ކޮންކަހަލަ ޢުމުރެއް ހެއްޔެވެ؟ މީހުން ބުނާގޮތުން ނަމަ އެއީ އެންމެ ނާޒުކު އެއް ޢުމުރެވެ. ކުޑަ ކުއްޖެއްގެ ޢުމުރު ފަހަޅަނާ ގޮސް ބޮޑު މީހަކަށް ބަދަލުވުމުގެ މަރުޙަލާގެ ފެށުން އަންނަނީ މިހިސާބުން ކަން ނޭނގެއެވެ. ދުނިޔެއަށް ލޯހުޅުވަން ފަށަނީ ނުވަތަ ފެށެނީ މިހިސާބުންނެވެ. ދިރިއުޅުމުގެ ޙަޤީޤީ މާނައަކީ ކޮބައިކަން ދަސްކުރުމަށް އަޅާ ފުރަތަމަ ރޮނގު އަޅަން ފަށަނީ މިހިސާބުންނެވެ.

ތެދެކެވެ. ތަފާތު މީހުން ކަންކަމާއި ވިސްނާގޮތާއި ދެކޭގޮތް ވަރަށް ތަފާތުވާނެއެވެ. އެއްވެސް ދެ އިންސާނެއްގެ ޙިޔާލު ހުރިހާ ކަމެއްގައި އެއްގޮތެއް ނުވާނެއެވެ. ވާކަށް ނުވެސްޖެހޭނެއެވެ. ޙަޤީޤީ ދިރިއުޅުމުގައިވެސް މިކަން އޮންނާނީ މިހެންނެވެ.

އަހަރެންވެސް އެއް ބަހެވެ. ޢުމުރުން ތޭރަ އަހަރުގައި ހިތުގައި އިޝްޤީ ހުޅުކޮޅު ރޯކުރުމަކީ ހަމަ ވެދާނެ ކަމެކެވެ. އެކަން މިއަދު އަހަންނަށް އިޙްޞާޞް ކުރެވެއެވެ. އަދި ވެސް އަހަރެންގެ ކަންފަތުގައިވަނީ އެ އަޑެވެ. އޭނާ ބޭނުންކުރި މީރު ސެންޓް ވަސް އަދިވެސް ދުވާހެން ހީވެއެވެ. ޔަޤީނެވެ. ލޯތްބަކީ ފިނިފޮނި އިޙްސާސްއެކެވެ. ރިހުން އެކުލެވިފައިވާ ލޯބީގައި އަދި މާފޮނި އިޙްޞާޞެއް ވާހެން ބައެއް ފަހަރު ހީވެއެވެ.

އަހަރެންގެ ހަނދާނުގެ ވާފަށް ގޮސް ގުޅެނީ މީގެ އެތަކެއް އަހަރު ކުރިއާއިއެވެ. އެއީ މީގެ ވިހި އަހަރު ކުރިއެވެ. އެ ދެ އަކުރުގެ ނަން ހިތަކުން ނުފިލިއެވެ. އެ ހިނިތުންވުން މަތިން ހަނދާނެއް ނުނެތެއެވެ. ފަސް ސިކުންތައް ނަމަވެސް ސަލާމްކޮށްލެވުނު ކަމަށްޓަކައި، އަދި ވެސް އެ އަތުގެ މަޑުކަމާއި އޮމާންކަން ހިތަށް ގެނެވެއެވެ. ދޮގެއް ނޫނެވެ. މިދުނިޔެމަތީގައި ލައްވަވާފައިވާ އެެންމެ ފުރިހަމަ އެކައްޗަކީ އަބުުރުވެރި ރީތި އަންހެނުންނެވެ. ނާއީ އަކީ މިފަދަ ރިވެތި މިސާލެކެވެ. އެކަން އަހަންނަށް އެނގެއެވެ. މީހަކަށް ރީތި ނުވިއަސް އަހަންނަށް ރީތި އެއްޗެއް ރީއްޗޭ ބުނެވިދާނެ ނޫންހެއްޔެވެ؟

އެއީ ވެސް ދުވަހެކެވެ. އަހަރެން ފިހާރަޔަކަށް ވަނީ އެއްޗެއް ގަތުމަށެވެ. އަހަންނަށް ނާއީ ފެނުނީ އެ ފިހާރައިގެ ތެރެއިންނެވެ. އަހަރެން ހުރީ ނާއީގެ ފަހަތުގައެވެ. ނާއީ އަށް އަހަރެން ފެނުނީ ތަންކޮޅެއް ފަހުންނެވެ. އޭނާ އަހަރެން ބަލާފައި ހީނލިއެވެ. އެހިނިތުން ވުމުގައި ވަނީ ފިނިކަމާއި ފޮނިކަމެވެ. ނާއީ އަކީ ކިހާ ރީތި ކުއްޖެއްކަން އަހަންނަށް ވިސްނުނީ އެހިނިތުންވުމުގެ ފަހުންނެވެ. ކުރިންވެސް ވަރަށް ގިނައިން ނާއީ ފެނެއެވެ. ކުޑަކޮށް ވާހަކަވެސް ދެކެވެއެވެ. އެކަމަކު، އެދުވަހު ނާއީ ހިނިތުންވެލިގޮތުން އަހަރެންގެ ހިތުގައި ނާއީގެ އެހިނިތުންވުން ބިންވަޅު ނެގުނެވެ.

ނާއީ އަކީ ޤަދަރުވެރި އާއިލާއެއްގައި ހުރި ހަމަ އެކަނި އަންހެން ކުއްޖާއެވެ. މައިން ބަފައިންނާއި އާއިލާ މީހުންގެ ލޯތްބާއި އަޅާލުން އޭނާއަށް އިންތިހާޔަށް ލިބޭކަން އަހަންނަށް އެނގެއެވެ. އެހެންވެ އޭނާ ބޮޑުވަމުން އަންނަނީ ކިހާ ލޯބިންކަންވެސް އަހަންނަށް އެނގެއެވެ. ލޯތްބާއި އަޅާލުން ލިބިގެން ބޮޑުވުމުގެ ނަޞީބު ނާއީ ލިބުނުކަމަށްޓަކައި އަހަރެން އިންތިހާޔާށް ޝުކުރު ކުރަމެވެ. މިދުނިޔޭގައި މައިންބަފައިންނާއި ތިމާގެ މީހުންގެ ލޯތްބާއި އަޅާލުމަށް ސަލާން ޖަހަމުންދާ ކިތައް މީހުން އުޅޭކަން އެނގޭނީ އެކަމަށް ވިސްނާލި މީހަކަށެވެ.

އަހަންނަށް އެންމެ ފުރަތަމަ ނާއީ ފެނުނު ދުވަހަކީ ދައްތަ ބުނެގެން އެގެއަށް ހެދުމެއް ބަލާ ދިޔަ ދުވަހެވެ. ނާއީގެ މަންމަ އަކީ ކުޑަކޮށް ފަހާ މީހެކެވެ. ދައްތަގެ ހުރިހާ ހެނދުމެއް ކަހަލަ ގޮތަކަށް އޭރު ފަހަނީ ނާއީގެ މަންމަ އެެވެ. އަހަރެން ނާއީގެ ގެއަށް ވަދެގެން ދިޔައިރު ނާއީ އިނީ ސިޓިން ރޫމްގައި އިން ކުޑަކުޑަ އުނދޯލީގައި ވާހަކަ ފޮތެއް ހިފައިގެން ކިޔާށެވެ. މަޑުމަޑުން އުނދޯލި ހެއްލަމުން ވާހަކައަށް ގެއްލިފައި ނާއީ އިންގޮތުން މީހުން ވާހަކަ ކިޔުމަށް ޝައުޤުވެރިވާ ވަރު އަހަންނަށް ދޭހަވިއެވެ. އަހަރެން މަޑުމަޑުން ގޮސް ނާއީގެ ގާތުގައި އެ އުނދޯލީގައި އިށީނީމެވެ.

” އޯކޭތަ؟” އިށީނުމަށްފަހު އަހަރެން ބުނީމެވެ.

” ކޯއްޗެއް؟” މަޑުމަޑުން ނާއީ އަނހާލިއެވެ.

” މިއުނދޯލީގައި އިށީނަސް އޯކޭހޭ؟” އަހަރެން ކުރަން ޖެހޭ ސުވާލު ފަހުން ކޮށްލީމެވެ.

” އުނދޯލި ހުންނަނީ އިށީންނަށް. ކޮޅަށް އަރާކަށް ނޫންދޯ. އިށީނދެ ނިމުނީމަ ތިސުވާލުނުކޮށް

ކުރިން ކުރިނަމަ. އޭރުން ދޯ ރީތިވާނީ؟” ނާއީ މޫނު ހަދާލަމުން ބުނެލިއެވެ.

” މާރީތި އެއްޗެއް ފެނުނީމަ، ރީތިގޮތް ހަނދާން ނެތުނީ؟” އަހަރެން ބަހަކުން ޖަހާލީމެވެ.

” ކޮން އެއްޗެއް؟ މަށަށް ވެސް ދައްކަންވީނު؟” ނާއީ އަވަސް އަވަހަށް ބުނެލިއެވެ.

(ނުނިމޭ)