ބުނާށެ ލޯބި ނުވަނީހޭ……27

“ޑޫ ޔޫ ލަވް މީ؟” ހަމްޒާ ކޮށްލި ސުވާލުން ރައިހާނާ ސިއްސައިގެން ދިޔައެވެ. ލޯ ހުޅުވާލިއިރު ހަމްޒާ ހުރީ ސީދާ އޭނާގެ ލޮލަށް ބަލަހައްޓައިގެންނެވެ. އެ ސުވާލަށް ދޭނެ ޖަވާބެއް ރައިހާނާއަކަށް ނޭންގެއެވެ.
ހަމްޒާ އިންތިޒާރު ކުރަމުން ދިޔައީ ރައިހާނާގެ ޖަވާބަކަށެވެ. އެހެނަސް ޖަވާބު ނުދިންތާގައި ރައިހާނާ ގުޑިވެސް ނުލިއެވެ. ޗާބީ ދީފައި އިން ބުދެކޭޭ އެއްފަދައެވެ. ރައިހާނާާގެ ހިތުގެ ވިންދު ދުވަހަކުވެސް އެހާ އަވަސްވިހެންނެއް ހިޔެއްނުވެއެވެ. ހިތް ތެޅޭލެއް އަވަސްކަމުން މޭ ފަޅާފައި ނުކުމެ ދާނެހެންވެސް ހީވިއެވެ. އޭނާ ކިތަންމެ ބޭނުންވިއަސް އެސުވާލަށް ޖަވާބުދެވޭކަަށް ނެތެވެ. “ޔެސް އައި ލަވް ޔޫ. ހަމްޒާއަަށް އަންދާޒާ ކުރެވޭ ވަރަށްވުރެވެސް ލޯބިވޭ. އަބަދުހެން ހިތް އެދި ގޮވަނީ ތި ސޫރަ ބަލާލުމަށް. ބޭނުމީ ތި އަތުގެ ހިމާޔަތް. އެކަމަކު އަހަންނަކަށް ނެތް ތި ލޮތްބަށް އެދެވޭކަށް” އެއިން އެންމެ ލަފްޒެއްވެސް ދުލާ ހަމައަށް ގެންނާކަށް ރައިހާނާއަކަށް ނުކެރުނެވެ.
ރައިހާާނާގެ ހިމޭންކަމުން ހަމްޒާއަށް ސުވާލުގެ ޖަވާބު ލިބުނެވެ. އެހެނަސް އޭނާ ބޭނުންވީ ރައިހާނާގެ ދުލުން އެ ލަފްޒުތައް އަޑު އަހާލާށެވެ.
ރީހާން ކޮޓާރި ދޮރު ހުޅުވި އަޑު އިވުމާއެކު ރައިހާނާއަށް ތެޅިގަނެވުނެވެ. އަދި ކިރިޔާ ހަމްޒާއަށް އަޑު އިވޭވަރަށް ރީހާން އެބަ އާދެއޭ ބުންޏެވެ. “އައި ޑޯންޓް ކެއާ. ސުވާލަށް ޖަވާބު ނުލިބެނީސް ތި އަތުން ދުލެއް ނުކުރެވޭނެ” ހަމްޒާ އޭނާގެ ގޮތުގައި ހިފެހެއްޓިއެވެ. ރައިހާނާ ކަންބޮޑުވިއެވެ. ރީހާންއަށް ފެނިއްޖެނަމަ ހީކުރާނީ ކީކޭ ހެއްޔެވެ؟ ހަމްޒާ ގާތުން ސަލާމަތްވާން ދޮގު ހަދަން ބޭނުންވިއެވެ. އެހެނަސް ދޮގު ހަދާހައި ހިތްވަރެއް އޭނާ ގަޔަކު ނެތެވެ. ރައިހާނާ ދެލޯ މަރާލިއެވެ. ޖަވާބު ދޭން އަނގަ ހުޅުވާލިއެވެ. ޖަވާބު ދިނުމުގެ ކުރިން ހަމްޒާ އޭނާ އަތުން ދޫކޮށްލިއެވެ. ސިހިފައި ރައިހާނާ ދެލޯ ހުޅުވާލިއިރު ހަމްޒާ އިނީ ރީހާންއާ ކުރިމަތި ލައިގެންނެވެ. ހަމަޖެހުމުގެ ނޭވާއެއް ދޫކޮށްލަމުން ކުރަން އިން މަސައްކަތާގެން ރައިހާނާ މަޝްޣޫލްވިއެވެ.
ރައިހާނާ އަތް މަތި އަވަސްކޮށްފައި ރީހާންއަށާ ހަމްޒާއަށް ކާންހެދިއެވެ. ދެމީހުންނަށް ފެނާ ކޯކް އަޅާފައި ރައިހާނާވެސް ކާން އިށީނެވެ. އިސްޖަހައިގެން ކާންފެށިގޮތަށް އިސްއުފުލާ ބަލާވެސް ނުލާ ހިމޭން ކަންމަތީ އިނދެ ރައިހާނާ ކަމުން ދިޔައެވެ.
ރައިހާނާގެ ހަރަކާތްތައް ހުރި ގޮތުން ހަމްޒާ ގާތަށް ލާނެއް ހިންޏެއް އައެވެ. ރައިހާނާއަށް ނޭންގުނަސް ލަދުން ގޮސް ރައިހާނާގެ މުޅި މޫނު ވަނީ ރަތްވެފައެވެ. ގައިގައިވެސް މަޑު ތުރުތުރު ކަމެއް ހުއްޓެވެ. “ރީހާން. ވަރަށް މީރު. ހާދަ މޮޅޭދޯ ކައްކަން. ނިކަން ހަމްޒާބެއަށްވެސް ދަސްކޮށްދީބަ. އޭރުންނެއްނު އޭންޖަލްއާއެކީ ތަންކޮޅެއް ރޮމްކޮށް ކައްކާލެވޭނީ” ރައިހާނާ ދެރަކޮށްލަން ހަމްޒާ ބުންޏެވެ. އެހެނަސް ރައިހާނާގެ ބަދަލުގައި އެކަމުން އަސަރުކުރީ ރީހާންއަށެވެ. ވަގުތުން ކުށި އަރާގަތެވެ. ހަމްޒާއާ އަންޖަލް އެކީ އެގޮތަށް ސިފަކުރެވުމާއެކު ރީހާންގެ ހިތުގައި ރިހުމެއް އުފެދުނެވެ. ހަމްޒާގެ މަގާމުގައި އޭނާ ވުމަށް ހިތްއެދެވުނެވެ. “ރީއްކޮ އާ ޔޫ އޯކޭ؟” ރައިހާނާއާ ހަމްޒާއާ ދެމީހުންނަށް އެއްފަހަރާ އެހުނެވެ. ކުޑަކޮށް ހިނިއަސް ހުރެ ރީހާން އޭނާ ރަނގަޅު ކަމަށް ބުންޏެވެ. މިރުސްކޮޅެއް ކެވިގެން ކުޅިވީ ކަމަށް ބުންޏެެވެ.
ހަމްޒާގެ ހިތުގައި އެއް ފަހަރާ އެތައް ސުވާލެއް އުފެދުނެވެ. ރީހާންއާ އަންޖަލްއަށް ވެގެން އުޅެނީ ކީއްހެއްޔެވެ؟ އެކަކު އަނެކަކުގެ ނަން ބުނާއިރަށް އެވަނީ ކިހިނެއްހެއްޔެވެ؟ ސިކުނޑީގައި އެނބުރެމުން ދިޔަ ސުވާލުތަކުގެ ޖަވާބު ހޯދަން ހަމްޒާ ނިންމިއެވެ.
ރީހާންއަށް އަންޖަލްގެ ނަން ބުނުމާއެކު ވީގޮތް ފެނުމާއެކު ރައިހާނާ ގާތަށް ހިނިއައެވެ. އޭނާގެ ކޮއްކޮ އެހެރީ އެހާ ދީވާނާވެފަ ބާއޭ ހިތަށް އެރިއެވެ.

އަންޖަލް ބޮލުގައި އެހެންނާ ނުރިއްސާވަރަަށް ރިއްސަމުން ދިޔައެވެ. ބޮލުގައި ހީވަނީ މާރުތޭލަކުން ތަޅާހެންނެވެ. ބޯ ހަމަޖައްސާލަން ލޯ މަރާލާ ކޮންމެ ފަހަރަކު ރީހާން ފެނިގެން ދިޔައެވެ. އަންހެން ކުދިން ހިތްތައް ކަތިލާ ފަދަ ތޫނު ނަޒަރަކުން އޭނާއަށް ބަލަން ހުންނަ ތަނެވެ. އަންޖަލް ގޮސް އޭނާ ކުރަހާ ތަނަށް ވަނެވެ. ގަނޑަކާ ގަލަމަކާ ހިފައިގެން މޭޒުކައިރީ އިށީންދެ ހުރިހާ ވިސްނުންތައް އެއްފަރާތް ކުރުމަށްފަހު ހަމަޖެހިލައިގެން ރީތި ޑިޒައިންއެއް ގަނޑުގައި އަޅާލިއެވެ.

ރާނިޔާ ދޮރު ހުޅުވުމާއެކު ރައިހާނާ އެތެރެއަށް ވަނެވެ. ރާނިޔާއަށް ހިނިތުންވުމެއް ހަދިޔާ ކުރުމަށްފަހު އަންޖަލް ކޮބާތޯއެހިއެވެ. އަންޖަލްވީ ކޮޓަރީގައި ކަމަށް ރާނިޔާ ބުނުމުން ރައިހާނާ އަވަސް ފިޔަވަޅުތަކެއްގައި އަންޖަލްގެ ކޮޓަރިއަށް ދިޔައެވެ. ހެނދުނު ސްކޫލަށް ގޮއްސައި ބޮޑު ވާހަކައެއް ދައްކަން އޮތްކަމަށް އަންޖަލް ބުންޏެވެ. އެއީ ސްކޫލްގައި ދެއްްކޭ ވަރަށް ވުރެ ބޮޑު ވާހަކައެއް ކަމުން އެގެއަށް ހަވީރު އައުމަށް އަންޖަލް އެދުނެވެ.
ރައިހާނާ ގޮސް އަންޖަލް ކޮޓަރިއަށް ވަންއިރު ކޮޓަރި ތެރެއިން އަންޖަލްގެ ހިލަމެއް ނުވެއެވެ. ރައިހާނާ މަޑު މަޑުން ދޮރު ލައްޕާލާފައި ގޮސް އަންޖަލް ކުރާހާ ކޮަޓަރީ ދޮރު ހުޅުވާލިއެވެ. އޭރު ވިސްނުންތެރިކަމާއެކު އަންޖަލް ކޮންމެސް އެއްޗެއް ލިޔަމުން ދިޔައެވެ.

ހަމްޒާ ޓެސްޓް ޕޭޕަރުތައް ހެދުމުގައި ވަރަށް ބުރަކޮށް އުޅެނިކޮށް ޝިމާން ގުޅާފައި ކޮފީއަކަށް ދާން އެދުނެވެ. ހަދަން ހުރި ޕޭޕަރުތައް ބަހައްޓާފައި ހަމްޒާ ޝިމާން ބުނި ކެފޭއަށް ދިއުމަށް މިސްރާބް ޖެހިއެވެ.
ެއޭނާ ދިޔައިރު ޝިމާން ހުރީ ކެފޭ ކުރިމަތީ މަޑުކޮށްލައިގެންނެވެ. ދެމީހުން އެކީ އެތަނަށް ވަދެފައި އެއް ފަރާތެއްގައި ހުރި މޭޒެއްގައި އިށީނެވެ. އެއަށްފަހު ދެކަޅު ކޮފީއަށް އޯޑަރު ދިނެވެ. “އޭ ބްރޯ. އެއްކަލަ ލީމް މަށަށް ފޭސްބުކުން މެސެޖް ކުރަން ފަށައިފި. ކަލޭ ކޮބާހޯ! ހުވާ ބޮލަށް އުނދަގޫ ރިޕްލައި ނުކުރީމަވެސް ހަމަ ފުލުފުލުގަ މެސެޖް ކުރަނީ. ބަލާބަ” ޝިމާން ފޯނުނަގާ ލީމް ކޮށްފައި ހުރި މެސެޖްތައް ހަމްޒާއަށް ދެއްކިއެވެ. ކޮންމެ މެސެޖެއްގައިވެސް ހުންނަނީ ހަމްޒާ ކޮބާތޯ އަހާފައެވެ. އަދި އޭނާއާ ގުޅޭނެ ގޮތެއް ހޯދައިދިނުމަށް އެދިފައިވިއެވެ. ހަމްޒާ ދެފަރާތަަށް ބޯހޫރާލިއެވެ. އޭނާގެ މޫނު މަތިން މަލާމާތުގެ ހިނިތުންވުމެއް ފެންނަން ހުއްޓެވެ. “ލޯބި ނުވަނީސް ލޯބިވާކަމަށް ހެދިގެން ލީމް މަގޭ ހިތަށް އަނިޔާ ދިނީ. ރައިހާނާ މަދެކެ ލޯބިވެހުރެވެސް ލޯބިނުވާކަމަށް ބުނެ މަގޭ ހިތަށް އަނިޔާ ދެނީ” ހިތި ހިނިތުންވުމަކާއެކު ހަމްޒާ ބުންޏެވެ. ލޯބިވާކަމަށް ބުނެ ބެޓެއް ކާމިޔާބު ކުރަން ލީމް އެހިތް ހަލާކުކޮށްލިއެވެ. ލޯބިވާ ކަމަށް ބުނެ އޮޅުވާލިއެވެ. އެކަމުން އަރައިގަނެ ދެވަނަ ފަހަރަށް ހަމްޒާއަށް ލޯބިވެވުނީ ލޯބިވެ ހުރެ އެކަމަށް އިންކާރު ކުރާ ކުއްޖެއްދެކެއެވެ. ރައިހާނާ އޭނާ ދެކެ ލޯބިވާކަމަށް އިންކާރު ކުރަނީ ކީއްވެކަންވެސް ހަމްޒާއަށް އެނގެއެވެ. އޭނާ މިހާރު ބޭނުނީ ރައިހާނާ އަމިއްލައަށް އަންޖަލް އަދި އޭނާ ގާތުވެސް އެލޮތްބަށް އިއުތިރާފު ވާށެވެ.

އަންޖަލް ލިޔަނީ ކޯއްޗެއްތޯ ބަލަންވެގެން ރައިހާނާ ބޯދިއްކޮށްލިއެވެ. ރީތި ޑިޒައިންއަކަށް ލިޔެފައި އިން ރީހާންގެ ނަން ފެނުމާއެކު ރައިހާނާ ކުށިއެރިއެވެ. ރައިހާނާ ކެއްސަން ފެށުމުން ސިއްސައިގެން ގޮސް އަންޖަލްއަށް ކުރެހުމުގެ ދުނިޔެއިން ނުކުމެވުނެވެ. އަވަސް އަވަހަށް ގޮނޑިން ތެދުވެ ރައިހާނާ ބުރަކަށީގައި ދެތިން ފަހަރު ޖަހާލިއެވެ. “އަންކޮ ވަޓް އިޒް ދިސް؟” ރައިހާނާ ހަމަޖެހިލަމުން ގަނޑުކޮޅު އަތަށް ނެގިއެވެ. އަންޖަލްއަށް އެފެނުމާއެކު ދެލޯ ބޮޑުވެގެން ދިޔައެވެ. އޭނާ މިއޮށް ހުރިހާ އިރު އެލިޔުނީ ރީހާންގެ ނަން ހެއްޔެވެ. ވަގުތުން ރައިހާނާ އަތުން އެގަނޑު ޖަހާގަތެވެ. އަދި އިތުރަށް އެއަށް ބަލަން ނުހަދާ އެގަނޑު އިރާލިއެވެ. ގަނޑު ވީދާ ކުދި ކުރުމަށްފަހު އަންޖަލް އެހުރިހާ އެއްޗެއް ޑަސްޕިނަަށް އަޅާލިއެވެ. އެގާނޑު ވީދަމުން ދިޔައިރު އަންޖަލް މޫނަށް ޖައްސަމުން ދިޔަ ވައްތަރު ފެނިފައި ރައިހާާނާ އިނީ ބަނޑަށް ހޭށެވެ. “ރައި މަށަކަށް ނޭންގެ މަށަށް މިވާ ގޮތެއް. ބޯ ފަޅާގެން ދާން ކައިރިވެއްޖެ. އައި ތިންކް އައި އޭމް ގޮއިން ކްރޭޒީ!” އަންޖަލް ދެލޯ މަރާލަމުން ބުންޏެވެ. އޭރު އޭނާގެ އަޑުގައި މަޑު ތުރުތުރެއް އުފެދިފައި ހުއްޓެވެ. ލޮލަށް ޖަމާވި ކަރުނަތައް ލޯމަރާލުމާއެކު ކޯތާފަތުގައި ބޮސް ދިނެވެ. އަންޖަލްއަށް ވީގޮތް ފެނި ރައިހާނާ މޫނުގެ ކުލަވަރުވެސް ބަދަލުވިއެވެ.

ރައިހާނާއަށް ގެއަށް އާދެވުނު އިރު ރޭގަނޑު އަށްގަޑިބައިވެ ނުވައެއް ޖަހަނީއެވެ. އަންޖަލް ދެއްކި ވާހަކަތައް އޭނާގެ ސިކުނޑީގައި ދިޔައީ އެނބުރެމުންނެވެ. އަންޖަލް ދެއްކި އެއްވެސް ވާހަކައަކަށް ރައްދެއް ދޭކަށް އޭނާއަކަށް ނޭންގުނެވެ. އަންޖަލްއަށް ރީހާންދެކެ ލޯބިވެވިއްޖެޔާމުން އޭނާ ކިތަންމެހާވެސް އުފާވާނެއެވެ. އޭރުން ރައިހާނާ އަދި ރިހާންއަށްވެސް އެދެމީހުންގެ ލޯބި ކާމިޔާބުވާނެއެވެ. އެހެނަސް ވިޝާހް މަތިން ހަނދާންވެފައި ރައިހާނާ ދެރަވިއެވެ. ވިޝާހް އަދިވެސް ހުންނާނީ އަންޖަލްގެ އިންރިޒާރުގަބާއެވެ. ރައިހާނާ އަތް ދަބަހުން ފޯނު ނެގުމަށްފަހު ވިޝާހްއަށް މެސެޖެއް ކޮށްލިއެވެ.

ފޯނަށް މެސެޖެއް ލިބުމާއެކު ފުޅާ ހިނިތުންވުމަކާއެކު ވިޝާހް ފޯނު ބަލާލިއެވެ. ވިޝާހްއަށް ޗޮކެއް ކަނޑާލެވުނީ އޭނާ އިންތިޒާރު ކޮށްގެން ހުރި ފަރާތުގެ މެސެޖަކަށް ނުވުމުންނެވެ. މޮޅިވެރި ކަމާއެކު ރައިހާނާގެ މެސެޖް ހުޅުވާލިއެވެ. ވިޝާހް ކިހިނެއްތޯ އަހާފަ އޮތެވެ. ރަނގަޅުކަމަށް ބުނެ އޭނާ ޖަވާބު ދިނެވެ. ދެން އައި މެސެޖަކީ އޭނާ އަދިވެސް ހުރީ އަންޖަލްގެ އިންތިޒާރުގައި ތޯއެވެ. ވިޝާހް ނިކަން އަވަހަށް ނޫނެކޭ ޖަހާފައި ރިޕްލައި ކުރިއެވެ. އަދި ރައިހާނާވެސް ހަމްޒާއަށް އިންތިޒާރު ނުކޮަށް އާފެށުމަކުން ފަށަން ނަސޭހަތްތެރިވިއެވެ.

ވިޝާހްގެ މެސެޖް ލިބުމާއެކު ރައިހާނާ ތުންފަތްމަތީގައި ހިނިތުންވުމެއް ދުވެލިއެވެ. ވިޝާހް ހުރީ އަންޖަލްގެ އިންތިޒާރުގައި ނޫންކަން އެނގުމާއެކު ހިތްހަމަ ޖެހުނެވެ.

މަގުމަތިން އަޒްހަދްއާ ހަމްޒާއާ ދިމާވުން ގިނަވިއެވެ. ކޮންމެ ފަހަރަކުވެސް އަޒްހަދް ހަމްޒާގެ ހާލު ބަލާ ހަދައެވެ. ހަމްޒާވެސް އަޒްހަދްގެ ހާލުބަލައެވެ. އެއް ދުވަހަކު ދިމާވެގެން އޭނާގެ ގެއަށް ކެއުމަކަށް ދާން އަޒްހަދް ހަމްޒާއަށް ދައުވަތު ދިނެވެ. ދެކޮޅު ހަދަން ނުކެރުމުން ހަމްޒާ ދައުވަތު ގަބޫލުކުރިއެވެ.

އަންޖަލް ހަމްޒާއަށް މެސެޖް ކުރުން މަދުކުރިއެވެ. އޭނާގެ ބޯވަނީ ހާސްވެފައެވެ. ހަމްޒާއަށް މެސެޖްކުރާ ހިތް ނުވަނީއެވެ. އޭނާއާ ހަމްޒާ އުޅެނީ ރަށްޓެހިވެގެންކަންވެސް އަންޖަލް މިހާރު ހަނދާން ހުންނަނީ މަދު ފަހަރަކުއެވެ. އޭނާގެ ހިތާ ސިކުނޑީގައި ރަސްކަން ކުރަމުން ދަނީ ރީހާންއެވެ. “އާގްގއަގްހ ޑޭމް އިޓް އަންޖަލް. ރީހާން އެއީ ކުޑަކުއްޖެކޭ” ރީހާންއާ އަންޖަލްއާ ދެމެދު އެއް އަހަރާ އަށްމަހުގެ ތަފާތެއް ހުރެއެވެ. ރީހާންއަކީ އޭނާއަށްވުރެ ކުޑަކުއްްޖެއްކަން އަންޖަލް އަމިއްލަ ނަފްސަށް ހަނދާންކޮށްދިނެވެ.

ޒިވާން މަގުމަތިން ރައިހާނާއަށް ފާރަލާތާ ދެދުވަސް ވެއްޖެއެވެ. ރައިހާނާއާއެކި އަންޖަލް ނޫނީ ރީހާން އަބަދުވެސް ހުރެއެވެ. އެހެނަސް މިއަދު ރައިހާނާ ގެއިން ނުކުތީ އެކަންޏެވެ. އިސްލާާމީމަރްކަޒް މާބާލް ޖެހި ސަރަހައްދަށް ވަދެވުމާއެކު ޒިވާން ފަހަތުން ގޮސް ރައިހާނާ އަތުގައި ހިފިއެވެ.
މީހަކު ފަހަތުން އައިސް އަތުގައި ހިފުމުން ރައިހާނާ ހިތުގައި ބިރުވެރިކަމެއް އުފެދުނެވެ. ފުންނޭވާއެއް ދޫކޮށްލުމަށްފަހު ބިރުންހުރެ އަތުގައި ހިފީ ކާކުތޯ ބަލަން ފަހަތަށް އެނބުރުނެވެ. ޒިވާން ފެނުމާއެކު ރައިހާނާ މޫނު މައްޗަށް ރުޅިވެރިކަން ފާޅުވިއެވެ. ޒިވާންެގެ އަތުން އޭނާގެ އަތް ނައްޓަން ރައިހާނާ މަސައްކަތް ކުރިއެވެ. އޭރު އެތާ ތިބި މީހުންގެ ލޯތައް ވަނީ އެދެމީހުންނަަށް ހުއްޓިފައެވެ. “ޒިވާން ހަމަ މިހާރު ދޫކުރޭ!” ޒިވާން އޭނާ އަތުގައި ހިފައިގެން ހުރިލެއް ބާރުކަމުން ރައިހާނާ އަތަށް ތަދުވެސްވިއެވެ. “ނޫން. ނުކުރާނަން. ކިތަށް ފަހަރު ބުނީމަތަ ރައިހާނާއަށް އެނގޭނީ އަދިވެސް އަހަރެން ރައިހާނާ ދެކެ ލޯބިވާކަން. އައި މޭޑް އަ މިސްޓޭކް. އެންޑް އައި އޭމް ރިއަލީ ސޮރީ” ޒިވާންގެ މޫނަށް މޮޅުވެރިކަން ވެރިވިއެވެ. ހަގީގަތުގައިވެސް އޭނާ ކުރެވުނު ކަންތައްކަށް ދެރަވެއެވެ. “ލީވް މީ އެލޯން. ޒިވާން ކުރިކަންތަކަށް މާފުދިނުމަކީއެހާ ފަސޭހަކަމެއް ނޫން. އެންޑް މިހާރު ޒިވާންދެކެ ލޮތްބެއް ނުވޭ. ސޯ ޖަސްޓް ލީވް މި އެލޯން.” ރައިހާނާ ގަދަ ކަމުން އޭނާގެ އަތް ނައްޓާލިއެވެ. ހުއްޓުން އަރާފައި ކަރުނަވީ ދެލޮލުން ޒިވާން ރައިހާނާއަށް ބަލަހައްޓައިގެން އިނެވެ. އޭނާއަށް ކުރެވުނު އެންމެ ކުށެއްގެ ސަބަބުން މުޅި އުމުރަށް އެންމެ ލޯބިވާ އަންހެންކުއްޖާ ގެއްލުނީއެވެ. ރައިހާނާ ގޮސް ރަސްރަނި ބަގީޗާ ތެރެއަށް ވަންނަން ދެކަށް ޒިވާންއަށް ބަލަހައްޓައިގެން ހުރެވުނެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.