ތީއޭ މިހިތުގެ ވިންދަކީ…

ހެނދުނުގެ ހިތްގައިމު ވަގުތެވެ. އަރަމުން އައި އިރުން ދޯދިތައް ވަނީ ފަޒާގެ ތެރޭގައި ފަތުރާލާފައެވެ. ކޮވެއްޔާއި ކާޅު ފަދަ ދޫނި ސޫފާސޫފީގެ އަޑު ދޭތެރެ ދޭތެރެއިން ފަޒާގެ ހިމޭން ކަން މުގުރާލައެވެ. އެޔާއިއެކު އިރުއިރުކޮޅުން ހިތަށް ފިނިކަން ގެނުވާ ވައިރޯޅި ތަކުން ގަސްތަކުގެ ފަތްތައް އެއްފަތް އަނެއް ފަތާއި ތޮޅެލާ ހިތްގައިމު އަޑު އިވިއިވި ހުއްޓެވެ.

ޖޫހީ އަށް ހޭލެވުނީ އިރުގެ ދޯދިތައް އައިސް އެރީތި ލޮލަށް އުނދަގޫ ކުރަމުން ދާތީއެވެ. މޯޅިއަކަށް ދަމާލާފައި ގަޑި ބަލާލި އިރު ގަޑިން ހަ ގަޑި ފަނަރަ ވީއެވެ. ކަންނެތް ގޮތަކަށް ތެދުވެ އިށީންދެލާފައި ހޭވިފައިވާ ރަން ކުލައިގެ ދިގު އިސްތަށިގަނޑު ވޫލް ކޮޅަކުން އައްސާލުމަށް ފަހު ފާހަނަ އާއި ދިމާލަށް ހިނގައިގަތެވެ. ޖޫހީގެ ބައްޕައަކީ ކެނެޑާ މީހަކަށް ވުމުން ޖޫހީއަށްވެސް އެ ދޮން ކަމާއި، ނޫ ދެލޯ އަދި ރަން ކުލައިގެ ދިގު އިސްތަށިގަނޑު ލިބިފައިވެއެވެ.

ސްކޫލަށްދާން ތައްޔާރުވެގެން ނިކުތް އިރު ކާމޭޒު ކައިރީގައި މަންމަ އާއި ބައްޕަ ޖޫހީގެ އިންތިޒާރުގައި އިނެވެ. ޖޫހީގެ ބައްޕަ ޔުނީފޯރމް ލައިގެން އިންތަން ފެނުމުން ވަގުތުން ޖޫހީގެ މޫނު ބަނަވެގެން ދިޔައެވެ. “ޑޭޑް……. އަނެއްކާވެސް ދަނީތަ. އަދި އެންމެ ޓޫ ޑޭސް އެންނުވީ މި ރަށަށް އައިއްސަ..” ޖޫހީ ދުވެފަ އައިސް ބައްޕަގެ އުނގަށް އަރަމުން ދެރަވެލާފައި ބުންޏެވެ. “ދަރިފުޅު އަދިވެސް އުޅެނީ ކުޑަ ކުދިން އުޅޭ ވައްތަރަށް ދޯ..!! މިހާރު ގްރޭޑު ދިހައެއް ގަ އުޅޭއިރު ކުޑަކޮށް ހަރުދަނާވާން ވެއްޖެއެންނު.. އެހެން ނޫނަސް ބައްޕަ މީ ޕައިލެޓެއް.. އަބަދަކު ދަރިފުޅު ކައިރީގައެއް ނުހުރެވޭނެ އެންނު” ޒިޔާން ޖޫހީގެ ބޮލުގައި ފިރުމާލަމުން ބުނެލިއެވެ.. “އެހެންވިއްޔާ ބައްޕަ ޖެހޭނެ ސްކޫލަށް ލާދެންދާން..!!” “މައްސަލައެއް ނޯންނާނެ.. ބައްޕަ އާއެކު ކުއީން މިއަދު ދާނީ” ޖޫހީގެ އެދުމުގައި ކޮޅުފައިން ނުޖަހަން ވެގެން ޒިޔާން އެއްބަސްވިއެވެ… “މަންމިގެ މަފިން އަވަސް ކޮށްލާ… އެއޮށް ގަޑި ޖެހެނީ..!!” ދެބަފައިން ސައިނުބޮއެ އިންނާތީ ޒޯހާ ބުނެލިއެވެ..

ކާރުން ފައިބައިގެން ގޭޓާހަމައަށް ގޯސް ޖޫހީ ފަހަތް ބަލާލިއެވެ.. ކާރުގައި އިން ޒިޔާންއަށް ހަނާއަޅާާލުމަށްފަހު ގޭޓުން ވަދެގެން ޖޫހީ ހިނގައިގަތެވެ. އެހެން ދުވަސް ތަކެކޭވެސް އެއްފަދައިން މިއަދުވެސް ސްކޫލުގެ އެތަށްކުދިންގެ ލޯތަށް ގޭޓުން ވަދެގެންއައި ޖޫހީއަށް ހުއްޓެމުން ދިޔައެވެ.. އެއިން އެއްކަމަކަށްވެސް ސަމާލުކަމެއް ނުދީ ކުލާހަށް ހިނގަމުން ދިޔަ ޖޫހީގެ ކުރިމައްޗަށް އެރީ އޭނާގެ އެންމެ ގާތް ރަހުމަތްތެރިޔާ އައިރާއެވެ.. “ހެެ ޖޫ..!! ބިޒްނަސް ކްލާހުގަ އެބައިން ވަރަށް ސަޅި އާ ސްޓޫޑެންޓެއް…..” “ކާކުތަ…؟؟” އެކަމަށް އެހާ ބޮޑު ޝައުގުވެރިކަމެއް ނެތުމާއެކުވެސް ޖޫހީ އަހާލިއެވެ..