އެހެނަސް ހަމަ ލޯތްބޭ ވެވެނީ (ސޯޅަވަނަބައި)

ވަރަށް ފޯރިޔާއެކު ހަފްލާ ފެށިގެން ދިޔައެވެ. އައިޝާއާ ދާނިޝްގެ ހުށައަޅާދިނުމުގެ ހުނަރު ކިތަންމެހާވެސް ފުރިހަމައެވެ. ބެލުންތެރިން އިތުރަށް ޝައުގުވެރިވާނެ ފަދައިން އެކި ވާހަކަތަށް ދައްކައެވެ. ކޮންމެ އައިޓަމެއްވެސް ކިޔާދެނީ ފުރިހަމަކަމާއެކުގައެވެ. އެކިކަހަލަ ތަމްސީލުތަކާ ނެށުންތަށް ހުށައެޅިގެން ދިޔައެވެ. ބައެއް އައިޓަމްތަކުން މީހުންތަށް ރޮއްވާލާއިރު އަނެއް އައިޓަމްތަކުގެ ސަބަބުން ހީހީ ބަނޑުގަ ގޮށްލާވަރު ވާނެއެވެ. ޝޯވް ނިމޭކޮޅަށް ދިޔުމުން އައިޝާ ބާކީބައި ހުށައަޅައިދިނުމަށް އެހެން މުވައްޒަފަކާ ހަވާލުކުރިއެވެ. ޝޯވްގެ ބާކީބައި ހުށައަޅާދިނުމަށް ހަމަޖެހުނީ ރާއިންއާއެކު އެހެން އަންހެން ނަރުހަކަށެވެ. ކުރިޔަށްވުރެ ތަނުގެ ފޯރިގަދަވެގެން ދިޔައީ ދެއައިޓަމް ދެމެދުން ރާއިންމެން އަރާ ކިޔާދޭ ޖޯކްތަކުގެ ސަބަބުންނެވެ. އައިޝާވެސް މިމަންޒަރުތަށް ބަލަން ހެވިފައި ސްޓާފް އޭރިޔާގައި ހުއްޓިލައިގެން އެކަނިން ހުރީ ޒާމިން ތަންކޮޅެއްދުރުގައި ރެހާންއާ ކޮންމެވެސް ވާހަކައެއް ދައްކަން ހުރުމުންނެވެ. މިރޭ މަންހާއަށްވެސް އައިޝާ ގާތުގައި މަޑުކޮއްލާނެ ވަގުތެއް ނުލިބެނީ ނަރުހުން ހުށައަޅާ އައިޓަމްތަކުގައި އޭނަ ބައިވެރި ވާތީއެވެ.
” މިރޭ އެ ރެހާންއަށް ބޮނޑިއެއް ދޭނަމޭ. އަހަރުމެން އެންމެން ބައިވަރިވާން ޖެހޭ ގަވައިދު ހަދާފައި އެހުންނަނީނު ބޮޑުމީހާ ހެދިގެން. ބަލައްޗޭ އޭނަވެސް އަރުވާނަން” އައިޓަމެއް ހުށައަޅައިދޭން ފެށުމުން ސިޑިން ފައިބައިގެންއައި ރާއިން ޒާމިންކައިރީގައި ހުއްޓިލަމުން ބުންޏެވެ.
“މީ އެންމެ ފަހު އައިޓަމެއް ނޫންތަ. ދެން ކުރެވޭނެ ކަމެއް ނޯންނާނެއެއްނު. މޮޅު ވާހަކަ ނުދައްކަ. ތިކަމެއްނުވާނެ ރާއިންއަކަށް” ޒާމިން އެހެންބުނެލީ ދުރުގަ ބިދޭސީ ޑޮކްޓަރަކާ ވާހަކަދައްކަންހުރި ރެހާންއަށް ބަލާލާފައެވެ. އެކަމެއް ރާއިންއަކަށް ޔަގީނަށްވެސް ނުވާނެއެވެ.
” ލެޓްސް ސީ. އަހަރެން އެކަންކޮށްފިޔާ ޒާމިން ޖެހޭނެ އަހަރެން ބުނާ ކަމެއްކުރާން” ރާއިން ސްޓޭޖާ ދިމާއަށް ހިނގައިގަތީ އައިޓަމް ނިމުމަކާ ގާތްވެފަ ވާތީއެވެ. ޒާމިންވެސް މައްސަލައެއްނެތޭ ބުނެލީ އެކަން ވާނެހެން ހީނުވާތީއެވެ.
” މިރޭގެ ފޯރިގަދަ ޝޯވްއަށް ނިމުމެއްއަންނަނީ.. އެކަމު އަދި އެބައޮތް ވަރަށް ހާއްސަ އައިޓަމެއް. ސަަޕްރައިޒެއް ހޮސްޕިޓަލުގެ އެންމެހާ މުވައްޒަފުންނަށްވެސް. އަހަރުމެންގެ ބޮސް ރެހާންގެ ގެނެސްދޭނީ” ރާއިން އެހެން ބުނުމުން ހުރިހާމުވައްޒަފުންގެ ތަރުހީބުގެ އަޑުއިވިގެން ދިޔައެވެ. ރެހާން ވީގޮތް ނޭނގިފައި ރާއިންއާ ޒާމިންއާ ދިމާލަށް ބަލާލިއިރު އޭނާ ހަމަ ހެނީއެވެ. މިއީ ރާއިންގެ މޮޅު ރޭވުމަކަށް ނޫނީ ނުވާނެއެވެ.
“ބުރޯ ދެން އަވަހަށް ދޭބަލަ. މިހާރު އެންމެން އެތިބީ ކެއްމަދުވެފަ ތި ގެނެސްދެން އުޅޭ އައިޓަމެއް ބަލާހިތުން. ކުރީރޭގަ ކީލަވަ ކިޔާލަބަލަ. އެހުރީނު ގިޓާވެސް” ރެހާން ސްޓޭޖަށް އެރުވުމަށް ވާންޖެހޭ ތައްޔާރީތައް ރާއިން މާކުރިންހުރީ ކޮއްނިންމާފައެވެ. ކުރީރެޔެއްގަ ރެހާން ވަރަށް ފަރިތަކޮށް ގިޓާކުޅެން އިންދާ ރާއިންއަށް ވަނީ ފެނިފައެވެ.
އެންމެންގެ ތެރޭގައި އިއުލާނުކުރީމަ އެނޫންގޮތެއްވެސް ރެހާންއަށް ނެތެވެ. ކޮޑުގައި ގިޓާ އަޅުވާލުމަށްފަހު ސްޓެޖަށްއެރީ ޕޯޓަބަލް މައިކް ހެޔޮވަރުކޮއްލަމުންނެވެ. ގިޓާ ކަރަންޓާގުޅާލީ ތައްޔާރު ވުމުގެ ގޮތުންނެވެ. އަދި އެލަވަ ހަނދާންކޮއްލަމުން ގިޓާއިން ރާގެއް ކުޅިލިއެވެ. މިލަވަ އަޑުއިއްވަން ބޭނުން ކުއްޖާ އަޑުއަހާނެނަމަ ކޮންފަދަހޭ ރެހާން ހިތާހިތުން ކިޔާލިއެވެ.
“ދުނިޔެ މަށަށް އަނދިރިވީ ކުރެވުނުކަމަކުން.
އުފަލެއް ހިތަށް ނުލިބުނީ އުޅެވުނު ގޮތަކުން….. ލޯބިވާ
ރޯންވީހޭ. ގިސްލަގިސްލާ މިހެން
އާދޭސްކުރަން މާފު ދޭތޯ ކަލާ”
އިވެމުން ދިޔަ ރެހާންގެ ފިރިހެން ވަންތަ އަޑު މެދުކެނޑުނީ ގިޓާގެ ވާގަނޑު ލޫސް ވުމުންނެވެ. ރެހާން އެރަނގަޅުކުރުމަށް އަވަސްވެގަތީ ކުރިޔަށް ނުގޮސްފިނަމަ ލަދުގަންނަންޖެހޭނީ އޭނާކަން އެނގޭތީއެވެ.
“އާލާވާތީ އެ ހަނދާން ލޯބިދިން ރަންޒަމާން
ކޮއްދެވޭހޭ މަގޭ ހިތަށް ވާވަރު ބަޔާން
މަގޭ ހިތުގެ ރިހުން ފޮހެލެވޭނީ ހިތުން
މިހިތާމަތަކުން މިންޖުވީ ދުވަހަކުން..”
ތަނަށް ވެރިވި ހަމަހިމޭންކަމުގެ ތެރެއިން އިވިގެން ދިޔައީ އައިޝާގެ އަންހެންވަންތަ އަޑެވެ. ރެހާންއަށްވެސް ބަލާލެވުނީ ސްޓޭޖަށް އަރަމުން އަންނަ އައިޝާއާ ދިމާއަށެވެ. ލަވަޔާއެއްވަރަށް ހިނގަމުން އައި އައިޝާ ހުއްޓިލީ ރެހާންއާ ދާދިގާތުގައެވެ.
“އައުމެ އަލުން އެދެވެނީ އާދޭއޭ ލޯބިވާ
ނުނިދޭ ހަނދާންވާތީކަލާ ވޭތުވޭ ރޭދުވާ
ރެހާންވެސް މަޑުކޮއްލުމެއްނެތި ލަވަޔައިގެން ކުރިޔަށް ދިޔައީ ސްޕީކަރުން އެލަވައިގެ ޓްރެކް ޖަހަން ފެށުމުންނެވެ. ކިޔާލި އިބާރާތާ ގުޅެނެހެން އައިޝާގެ އަތަށް އިޝާރަށް ކުރަމުން އަތްދިއްކޮއްލީ އެއަތުގައި ހިފާލުމަށެވެ.
“ދޭނަންތޯ އުފާ މިހިތްރުހޭ ހާދަހާ ބޭނުމޭ
ނޫނިއްޔާ މިވޭނުގާ އިތުރު ވާނީ ރިހުން”
ރެހާން ދިއްކޮއްލި އަތުގައި ހިފާލަމުން ހިނިތުން ވެލުމަށްފަހު އައިޝާ ރެހާންއަށް ފުރަގަސްދިނެވެ. އެވަގުތު އައިޝާގެ ނަޒަރު ހުއްޓުނީ ރާއިން ހުރި ދިމާއަށެވެ. އެވަގުތު ރާއިންގެ މޫނުގެ ކުލަވަރުވެސް ބަދަލުވެގެން ދިޔައެވެ. މިމަންޒަރުތަށް ބަލަންހުރި ޒާމިންއަށް މިކަން ވަރަށް ރަނގަޅަށް ފާހަގަވިއެވެ. މިއީ ކޮން ކަންތައްގަނޑެއްބާއޭ ޒާމިން ހިތަށް އެރިއެވެ. ޒާމިންއަށް ނޭގުނަސް ކޮންމެސް ގުޅުމެއް އެމީހުންގެ މެދުގައި އެބަވެއެވެ. މިކަން އައިޝާގެ ލޮލުގައި ވިދަމުންދިޔަ ކަރުނަތަކުންވެސް އަންގަދެއެވެ.
އައިޝާއާ ރެހާން ލަވަ ވަރަށް ފުރިހަމަކާމާއެކު ނިންމާލިއިރު ދެމީހުންގެ ހިތުގައިވެސް ބޮޑު ހައިޖާނު ގަނޑެއް ހިނގަމުން ދިޔައެވެ. މިކަން އެކަކަށް ނޭނގުނަސް ދެމީހުންވެސް ވީ ބޮޑުނުތަނަވަސް ކަމެއްގެ ތެރޭގައެވެ. ލަވަ ނިމުމާއެކު މުޅިތަނަށް ތަރުހީބުގެ އަޑު ގުގުމިގެން ދިޔައެވެ. މިރޭގެ އެންމެ ފުރިހަަމަ އައިޓަމަކަށް ވެގެން ދިޔައީ ރެހާންމެންގެ އައިޓަމްކަން ޔަގީނެވެ.
ސްޓޭޖުން ފައިބައިގެން ދިޔަ އައިޝާގެ ފަހަތުން ރެހާންވެސް ދިޔައެވެ. ފަހަތް ބަލާވެސް ނުލާ އައިޝާ ހިނގުން އަވަސްކޮއްލީ ރެހާން ފަހަތުން އަންނަކަން އެނގުނީމައެވެ.
“އައިޝާ. ތޭންކްސް. އެގަޑިގަ އަހަރެންގެ ލަވަ ކުރިޔަށް ގެންދިޔައީތި.” ރެހާން އަށް އެނޫން އެއްޗެއް ބުނާކަށް ނޭނގުނެވެ.
“އެއީ އެވަރުކަމެއްނޫން. އެގޮތަށް ކަންތަށް ނުކުރިނަމަ މުޅިހޮސްޕިޓަލަށް ހުތުރު ނަމެއްނު ލިބޭނީ” މަޑުކޮއްލުމެއްނެތި އައިޝާދިޔައީ ލޮލުގައިވާ ކަރުނަތަށް އެހެން މީހަކަށް ފެނިދާނެތިއެވެ.
“އޭނަ ކިހިނެއްވެގެންތަ އެ ދިޔައީ. އަހަރެން ވަރަށް ގޮވިން އަޅާވެސް ނުލާ ނުކުމެގެން ހިނގައްޖެ. ގެޔަށްކަންނޭނގެ” ރާއިންވެސް ހުރީ އައިޝާ ކުއްލިޔަކަށް ބުނެވެސް ނުލާ ގެޔަށް ދިޔައިމާ ސަބަބު އެނގެނ ބޭނުންވެފައެވެ. މިތާގައި މާބޮޑުކަމެއްވެސް ވީކީ ނޫނެވެ.
” ރާއިންއަށް ބޮޑަށް އެނގޭނި” ކައިރީގައި ހުއްޓިލައިގެން ހުރި ރެހާންއަށް ބަލާލަމުން ޒާމިން އެހެންބުނީ ދޭނެ ޖަވާބެއް އޭނަޔަށްވެސް ނޭނގޭތީއެވެ. ޔަގީނަށްވެސް އައިޝާގެ މޫނުގެ ކުލަވަރު ބަދަލުވެގެން ދިޔައީ ރާއިންއަށް ބަލާލި ވަގުތުގައެވެ.
“އަހަރެން ބުނި ކަންތަށް މިކުރީއެއްނު. ބަދަލު އޮންނަންވާނެ އިނގޭ” ރާއިން އެހެން ބުނެލީ ތަނުގަވީ ހާސްކަން ފިލުވާލުމަށެވެ. އެޔާއެކު މީ ރާއިންގެ ކަންތަކޭކިޔާ ރެހާން އޭނަގައިގައި ބޮނޑިއެއްއަޅާލިއެވެ. ރާއިން ސަމާސާ ކުރަން ވެއްޖެނަމަ ހައްދެއް ނޯންނާނެއެވެ. އެތިންމީހުންވެސް ދެން އަވަސްވެގަތީ ޝޯވްނިމި ހުރިހާކަމެއް ހަމަޖެއްސުމަށްފަހު ގެޔަށް ދިޔުމަށެވެ.
“ދެންމެ އެއީ ކޮންކުއްޖެއްތަ. ރެއިންއާއެކުގަ ސްޓޭޖަށް އެރީ. އަދި ވަރަށް ތުއިވެފަ ރެއިންގެ އަތުގަވެސް ހިފިއޭ” މިރޭ ރެހާން ޖަނާންއާ ދިމާއަށް ބަލާނުލާތާ އެހެން އަންހެން ކުއްޖަކާ އެކުގަ ވަރަށް އުފަލުން ލަވަކިޔުމުން އޭނަހުރީ އިންތިހާއަށް ރުޅިގަދަވެފައެވެ.
“އެވާނީ މުވައްޒަފަކަށްނު. އެކަމަކު އަހަރެން މިވީ ދެތިންދުވަހު ހޮސްޕިޓަލަށް އައިސް އުޅުނުއިރުގަ އޭނާއެއް ނުދެކެން. ތި މަންޖެޔެއްގެ ހަބަރު ބަލަން ޖެހޭނެ” އާސިމާވެސް ހުރީ އެއީ ކޮން ކުއްޖެއްކަން އެނގެން ބޭނުންވެފައެވެ.
“މަންމާ. ދޮންބެޔަށް ގެޔަށް ލާކަށް ނުދެވޭނެޔޯ. ލަސްވަންޏާ ހިނގާލާފަ ދާށޯ” އާސިމާމެން ގާތުގައި ހުއްޓިލި ރީނާޒް ހުރީ ގެޔަށްދާާން ބޭނުންވެފައެވެ. މާދަން ހެދުނު މަންމަ ހޭލުމުގެ ކުރިޔަށް ބުރެއް އަޅާލެވޭނީ އަވަހާ ނިދީމައެވެ. އާސިމާމެންވެސް އައިޝާ ނުކުމެގެން ދާތަން ފެނުމުން އެއީ ކޮންކުއްޖެއްކަން ބެލުމުގެ ޝައުގުވެރިކަން އުފެދިފައިވުމުން އޭނާގެ ފަސްފަހަތުން ދާން ނިންމިއެވެ. ރީޏާޒްވެސް ހިތްއެދޭ ސޫރަ ފެނޭތޯ އެންމެ ފަހުފަހަރަށް ފަހަތަށް ބަލާލުމަށްފަހު މާޔޫސްކަމާއެކު އެމީހުންނާ އެއްވަރަށް ހިނގައިގެވެ.. އާސިމާމެން ހިނގަމުން ދިޔައީ އައިޝާގެ ފަސްފަހަތުންނެވެ.
“މަންމާ. ގެޔަށް އާދެވުނީއޭމި.” ގޭދޮރާހަމައަށް އެރުމުންވެސް މަޑުކޮއްނުލާ ހިނގަމުންދިޔަ އާސިމާފެނި ރީނާޒް ހަނދާން ކޮއްދިނެވެ. މަންމަ މިރޭ ކިހިނެއްވެފަ ހުރި ރެޔެއްބާއޭ ރީނާޒް ހިތަށް އެރިއެވެ.
“ދެންމެގަ ދިޔަ އަންހެންކުއްޖާ އެވަނީ ތިހިރަ ގެޔަށްދޯ” ޖަނާންއަށް ފެނުނެއްކަމަކު ރީނާޒް ކުރެން އަހާލީ ޔަގީން ކޮއްލުމަށެވެ.
“އާން. ކިހިނެއްވީ. އެއީ އެގޭގަ އުޅޭ ކުއްޖެކޭ. ދޮންބެ ރައްޓައްސެއްކަންނޭގެ. ދޮންބެމެން އެގެޔަށް ވަދެހަދާތީ މިހެން މިބުނީ” ރީނާޒްއަށްވަނީ ދެތިން ދުވަހަކު ރާއިންއާ ރެހާން އެގެޔަށް ވަތްތަން ފެނިފައެވެ. އަދި އެގޭގަ އުޅޭ ކުޑަކުއްޖާ ގޮވައިގެން ދެމީހުން އެކިތަންތަނަށް ދާކަން އިނގެނީ ރާއިންގެ ހަރަކާތްތަކަށް ނޭނގި ނަމަވެސް ފާރަލެވޭތީއެވެ. ރީނާޒްއަށް އެނގިފައިވާ މިންވަރަކަށް ކިޔާދިނުމަށްފަހު އެތެރެޔަށްވަނީ ނިދިއައިސްފައި ހުރީމައެވެ.
“މި ޖެހުނީ އެ މަންޖެޔަށް ވާރނިން ދޭކަށްނު. މާދަން އެގެޔަށް ވަދެލަންވާނެ. ބުނާނީ އަވައްޓެރިޔެއްވީމަ ހަމަ ވަދެލީއޭ. އެކުއްޖާއާ ރެއިންއާ ގުޅުމެއް އޮތިއްޔާ ޖެހޭނީ ވަގުތުން ކަނޑާލަން. އަހަރުމެން ދެމީހުން މިއޮއްހުރިހާ ދުވަހު ކުރި ބުރަ މަސައްކަތްތުގެ ފޮނި ނަތީޖާ ހާސިލްވާން މިހާ ކައިރިވެފަ އޮއްވާ އެކަކުވެސް އެޔަށް ހުރަށްއެޅިޔަކަ ނުދޭނަން” އާސިމާޔާ ޖަނާން އެތެރަށް ވަނީ މާދަމާގަ ކުރާނެ ކަންކަން ރާވާލަމުންނެވެ. ޖަނާންއަކީ އޭނާގެ ދައްތަ މަރުވިއިރު އެދައްތަގެ ހަނދާނެއްގެ ގޮތުން މިދުނިޔޭގައިވާ ހަމައެކަނި ފުރާނަ ކަމުން އޭނާޔާ ރެހާން ގުޅުވަން އާސިމާ ވަރަށް ބޭނުމެވެ. ރެހާން ޖަނާންއާާ ގުޅިއްޖެނަމަ އިމްރާންގެ މިލްކިއްޔާތުގައިވި ހުރިހާ މުދަލަކީވެސް އާސިމާގެ އެއްޗަކަށް ވެގެންދާނެއެވެ.
އައިޝާ މާބާރަކަށް ހިނގާފައި ގެޔަށްއައީ އޭނާގެފަހަތުގަ ބަޔަކު އަޅުވާލިހެންނެވެ. ގޭދޮރޯށިން އެތެރެޔަށް ވަދެވުމާއެކު ހަމަ ޖެހުމުގެ ނޭވާއެއް ދޫކޮއްލެވުނެވެ. ދެން އަނެއްކާވެސް ޝޯވްގަ ވެގެންދިޔަ ކަންތައްތަކުގެ ހިޔާލުން އޭނަގެ ސިކުނޑި ފުރިގެން ދިޔައެވެ. އެކަމާމެދު ވިސްނާ ކިތަންމެވަރަކަށް ރުޔަސް ވެނިމިފައޮތް ކަމެއް ބަދަލެއް ނުވާނެކަން އައިޝާއަށް އެނގެއެވެެ. މިރޭ ވަރަށް ރީއްޗައްވެސް ޒާމިންގެ ކުރިމަތީގައި އޭނާގެ އިހުސާސްތައް ބޭޒާރުވެއްޖެއެވެ. މިހިޔާލުތަކުން ދުރުވުމަށް އައިޝާ ދިޔައީ ހޫދު ކޮޓަރިއަށެވެ. ބާލީހުގައި ބައްދާލައިގެން އޮތް ހޫދުފެނުމުން އޭނާގެ ހިތަށް ފިނިކަމެއް ލިބުނެވެ. ހޫދުއެއީ އައިޝާވީ ތެދުވެރި ލޯބީގެ ހަމައެކަނި ނިޝާނެވެ. ހޫދުގެ ނިއްކުރީގައި މަޑުމަޑުން ބޮސްދިނިމަށްފަހު އައިޝާވެސް ނިދަން ދިޔައީ ލަސްވެފަ ހުރީމައެވެ.
******
“މަންމީ. މަންމީ.. ހިނގާ އިރުއަރާތަން ބަލަން. ކޮއްކޮ އިއްޔަގަ ބަސްއެހީމަ އޭގެ ޕްރެސެންޓަކަށްށޭ” ފަތިސްނަމާދު ބަންގިޔަށް ހޭނުލެވިފައޮތް އައިޝާއަށް ހޭވެރިކަމެއްވީ ހޫދު އޭނާގެ ކޮލުގައި މަޑުމަޑުން ކޮއްޓާލުމުންނެވެ. ރޭގަ ނިދިއިރުވެސް ހޫދުއަށް އައިޝާ ނުފެނުމުން ފަތިހުހޭލައިގެން ހޯދަފާނެތީ އައިޝާ ނިދީ އޭނާގެ ކޮޓަރީ ދޮރު ތަޅުނުލައެވެ. މިކަމުގެ އަދަބު އޭނަޔަށް މިލިބެނިއްޔޭ އައިޝާ ހިތަށް އެރިއެވެ. އައިޝާ ނުތެދުވަނިސް ހޫދު ކުރު ނުކުރާނެކަން އިނގުމުން ތެދުވެ ފާހަނަޔަށް ދިޔައީ ނަމާދުކުރަން ތައްޔާރުވުމަށެވެ.
ދެމައިން ނަމާދުކޮށްގެން މަގުމައްޗަށް ނުކުތްއިރު އިރުނޭރިނަމަވެސް ފަޖުރުގެ އަލިކަން ވަނީ ވެރިވެފައެވެ. ކާޅުގޮވާއަޑު މަދުމަދުން އިވެމުން ދެއެވެ. ފަތިހުގެ ތެއްފިނިވައި ގައިގައި ބީހިލުމުން އައިޝާބޭނުންވީ އަރާމު ތަންމަތީގައި އަނެއްކާވެސް ނިދާލާށެވެ. ނަމަވެސް މިއަދު އެކަމެއް ނުވާނެއެވެ.
“މަންމީ. ދެން އެކޮޅަށް ދާންވާއިރަށް އިރު ނުވެސް ފެންނާނެ. ހިނގާ މިކޮޅަށް ލޯބަނދެ ކުޅެން.” ގޭތެރެއިން ހޫދު ވަނުމަށްފަހު ނުކުމެގެން އައީ އައިޝާާގެ ޝޯލްއެއް އަތަށް ލައިގެންނެވެ. އައިޝާގެ އަތުގަ ހިފަމުން ތުނޑިޔާ ދިމާއަށް ހިނގައިގަތީ މިއައީ ޒާންބެޔަސްވެސް ގުޅާފައޭ ކިޔަމުންނެވެ. މިހާރު ހޫދު ހުންނާނީ ކުޅިވަރު ކުޅެން އެންމެންނަށް ދައުވަތު ދީފައޭ އައިޝާ ހިތަށްއެރިއެވެ.
“ހައި. މިގޭ ކުއްޖެއްދޯ. ދޮންބެގެ ރައްޓައްސެއްވީމަ މިގޮވާލީ” ރީނާޒްއަށް މަގުމަތިން އައިޝާފެނުމުން އޭނަކައިރީގައި މަޑުކޮއްލީ މަގުމަތީގައި އިތުރު މީހެއް ނެތުމުންނެވެ.
“ތީ ރެއިންބެގެ ކޮއްކޮ ދޯ. އެއީ ހޫދުގެ ބެސްޓް ފްރެންޑޭ. ހިނގާބަލަ ހޫދުމެންނާއެކުގަ ކުޅެން ” އައިޝާ އަނގަހުޅުވާލުމުކުރިޔަށް ޖަވާބުދިނީ ހޫދުއެވެ. ރެހާންގެ ކޮއްކޮ ރަށަށް އައިކަން ހޫދުއަށްވަނީ އެނގިފައެވެ. އައިޝާއަށް ހޫދުގެ އަނގަގަދަކަމުން ހެވުނެވެ. ރީނާޒްއަށް އަމިއްލައަށް ތައާރަފުވެލަމުން ތިންމީހުން އެއްކޮށް ހިނގައިގަތެވެ.
” ރޭ އެހާ އަވަހަށް އައީ ފަތިހު ވެލާނަގަންދާން ދޯ” މިސްކިތުން ގެޔަށްއައި ރާއިންއަށް އައިޝާމެން ފެނުމުން ދިމާކޮއްނުލާ ނުހުރެވުނެވެ. ރާއިން ގޭގަ ނަމާދުކުރަން އުޅެނިކޮށް މިސްކިތަށް ދާންޖެހުނީ ރެހާން ކުރުނުކުރީމައެވެ. ރޭގަ އެހާލަހުން ނިދުމުން ނަމާދުން އައިސް އަވަހަށް ނިދަންބެނުންވެފަހުރި ރާއިން އެމީހުން ފެނުމުން ނިދިފިލިއެވެ.
“ވެލާނަގަންވެސް ރާއިންއެށް ކަންނެއްކަމުން ނުތެދުވެއެއްނު.” އައިޝާވެސް ސަމާސާ ރާގަކަށް ބުނެލީ ރަނގަޅު މޫޑެއްގައި ހުރުމުންނެވެ. ރާއިން ބޯކަހާލީ އެއީ ތެދުކަމަށްވާތީއެވެ. ފަތިސްގަޑީގަ އޭނަވަރަށް ކަންނެއް ވާނެއެވެ.
” ހޫދު ތިދަނީ ބްލައިންޑް ފޯލްޑް ކުޅެންތަ. ކުޑަރެއިންބެވެސް ދާނަމޭ. އެބައަންނަން ގެޔަށް ވަދެލާފަ” ރާއިންވެސް ބޭނުންވީ ކޮންމެވެސް ބަހަނާއެއް ދައްކާލުމަށްފަހު އެމީހުންނާ އެކުގަ ދާށެވެ.
އައިޝާމެންނަށް އަތިރިޔަށް ނުކުމެވުނުއިރު ޒާމިންމެންނަށްވެސް އާދެވުނެވެ. މީހަކު ސުވާލެއް ކުރުމުގެކުރިން ހޫދު އެންމެނަށް ރީނާޒް ތައާރަފުކޮއްދިނެވެ. ރެހާންގެ ކޮއްކޮއަކަށްވުމުން އެންމެންވެސް ވަރަށް އަވަހަށް ރީނާޒްއާ އެކުވެރިވިއެވެ. އެންމެންވެގެން ހޫދުގެ އެދުމަށް ކުޅިވަރު ފެށިއިރު ފުރަތަމަ ލޯމަތީގަ ފޮތި ބަންނާނެ އެކަކުވެސް ނުވިއެވެ. އެންމެފަހުން ހޫދު އައިސް އައިޝާގާތު ފޮތި ބަނުމަށް ބުނުމުން އައިޝާ އެއްބަސްވިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.