ކަކުނި 8

ހައްމާދުއާއި އީތަންއަށް އެމަގުގެ ކޮޅާހަމައަށް އާދެވެނު ވަގުތު ފެނުނު މަންޒަރުން ހައިރާންވިއެވެ. ދާދި ދެންމެއަކާ ޖެހެންދެން ކައިޝާ ދޮރުމަތީގައި ހުރެގެން ކުރި ކަމެއް އީތަންމެންނަށް ފެނުނަސް އެހާ ދުރުން އެފިރިހެނެއް ވަކި ކުރާކަށް އީތަންއަށް ނޭނގުނެވެ. އަދިއެހެންމެ ކައިޝާ އެހެން ފިރިހެނަކާއެއްކޮށް އެފަދަ ގޮތަކަށް ފެނިދާނެ ކަމަށް އީތަން ހީކޮށްފައިނެތެވެ. މިރޭ ކައިޝާގެ ހިތުގައި ޖެއްސުމުން އެކަމުގެ ބަދަލު ދިނީ ހެއްޔެވެ؟ ކައިޝާއަކީ އެހާ ރަހުމު ކުޑަ ކުއްޖެއް ހެއްޔެވެ؟ އެވަގުތު އީތަންގެ ހިތުގައި އެމީހެއް ދެކިލުމުގެ ޝައުގުވެރިކަން އުފެދުނީ ކީއްވެކަމެއް ނޭނގެއެވެ. ހައްމާދުކައިރީގައި ގެއަށް ދާށޭ ބުނުމަށްފަހު އީތަން ހިނގައި ގަތީ ޒިއަދަންމެން ދިޔަ ގޯޅިއާ ދިމާއަށެވެ. އެގޯޅިއާ ހަމައަށް ދެވުނު އިރު އީތަންއަށް އެމީހުން ގެއްލިއްޖެއެވެ. މާޔޫސްވެ ހުރެ ގެއާ ދިމާއަށް ދިޔުމަށް އީތަން ހިނގައިގަތެވެ. ނަމަވެސް ފަހުން ޚިޔާލު ބަދަލުވެ އެހެން ދިމާއަކަށް މިސްރާބު ބަދަލު ކޮށްލިއެވެ. ދެވޭ ނުދެވޭ ދިމާއެއް ނޭނގި އީތަން ދިޔައީ ހިނގަމުންނެވެ. އެހިތުގައި އުފެދިފައިވާ އުދާސްކަމަށް ލުޔެއް ލިބޭތޯ މަންޒިލެއް ނެތް މުސާފިރެއްހެން އީތަން ކުރިއަށް ދިޔައެވެ. މީހުން ނޫޅޭ ހިސާބަކަށް ދެވުނުކަން އެނގުނީވެސް އަނދިރިކަން ވަށާލުމުންނެވެ. އީތަން ވަށައިގެން ބަލާލިއިރު ފެންނަން ހުރީ ބިޔަ ގަސްތަކެވެ. އީތަންއަށް މިހުރެވުނީ ބޮޑު ވަލެއްގެ މެދުގައިކަން ރޭކާލީދެނެވެ. މީހެއްގެ ހިލަމެއްވެސް ނުވެއެވެ. ހަނދުވަރުގެ ފަނޑު އަލިކަން ފިޔަވާ އިތުރު އަލިކަމެއް ނެތެވެ. ކުއްލިއަކަށް އީތަންއަށް ފަހަތަށް ބަލާލެވުނީ ގަސްތަކުތެރޭން އެއްޗެއް ތެޅޭކަހަލަ އަޑެއް އިވުމުންނެވެ. އެދިމާއަށް ބަލާލި ވަގުތު އީތަންއަށް ފެނުނީ ވިދުވަރެއްހެން ގަސްތަކުތެރޭން ނިކުމެގެންއައި މީހަކަށެވެ. އެމީހާއައިސް ހުއްޓުނީ އީތަން ކައިރީގައެވެ. އަނދިރިކަމުން އެހާސާފުކޮށް ނުފެންނާނީތެ އީތަން ދެލޯ ހަނިކޮށްލިއެވެ.

“ހެލޯ ބްރަދަރ..” އެއިވުނީ ބަރު އަޑެކެވެ. ނަމަވެސް އެއަޑުގައި އީތަންގެ އަޑާއި ވައްތަރު ގޮތެއް އެބަހުއްޓެވެ. އީތަން ހައިރާންވީނަމަވެސް އެއްޗެކޭ ނުބުނެއެވެ. އޭނައަށް އިނގޭހާވެސް އެއްޗަކީ ކުރިމަތީގައި މިހުރީ އިންސާނެއް ނޫން ކަމެވެ. އެމީހަކު އީތަންގެ މޫނުގެ ކުރިމަތީގައި ފުއްޓައްކެއް ޖަހާލުމާއެކު އެއަތުތެރޭން އަލިފާން ކަނިތަކެއް ބުރައިގެން ދިޔައެވެ. އިރުކޮޅަކުން އެއަތުން ދުން އަރާފައި އަލިފާންނުގެ ހުޅުފަޅައިގެން ދިޔައެވެ. އެމީހާގެ މޫނުގެ އެއްފަޅީގައިވެސް އަލިފާން ހުރި އިރު އަނެއްފަޅި ހުރީ ކަޅުކޮށެވެ. އެފަޅީގައި ލޮލެއްވެސް ނެތެވެ. އީތަން ކުޑަކޮށް ދުރައްޖެހިލީ ގަޔަށް ހޫނުވާތީވެއެވެ. މޫނާއެއްކޮށް ގައިގެ އެއްފަޅިން ހުޅުހިފާފައި އެހުރީ ކާކުހެއްޔެވެ؟ އީތަން ހިތުގައި އެނބުރެމުން ދިޔައީ އެސުވާލެވެ. އީތަންގެ މޫނުމަތިން ބިރުގެ ކަންފުޅެއްވެސް ނުފެންނައިރު ދެލޮލުން ފެންނަނީ ކޮންކަހަލަ އިހުސާސެއްކަން ބުނެދޭން ނޭނގެއެވެ.

“އިނގޭތަ އަހަރެން މީ ކާކުކަން؟ ލިޓްލް ބްރަދަރ..ހަހަ..އެކްޗުއަލީ ހާފް ބްރަދަރ..ކަލެއާ ކަލޭގެ މަންމައާއި ހެދި އަހަރެން ވަރަށް ބޮޑު ތަކުލީފެއް އުފުލަން ޖެހުނު..މިހާރު ކަލެއަށް ތިފެންނަނީ އޭގެ ކުޑަ ކުޑަ ޓްރެއިލަރ އެއް..ބޭނުންތަ ފުލް މޫވީ ބަލައިލަން؟ …ކެތްވާނެތަ އޭނ؟..އެފަދަ ވޭނެއް ކަލެއަށް ތަހައްމަލު ކުރެވޭނެތަ؟” އަނެއްކާވެސް އެބަރު އަޑު ފަޒާގައި ގުގުމާލިއެވެ. އީތަން ދެންވެސް އަގައިން ނުބުނެ ހުރީ އެވެ.

” އަހަންނަށް ކިޔަނީ ޒިއަދަން..ކަލޭގެ އެއްބަފާ ބޭބެ..އަހަންނަށް ޔަޤީން ކަލޭގެ ލޯބިވާ ބައްޕަ ހުރިހާއެއްޗެއް ކިޔާދީފަކަން ހުންނާނީ..އޭނަހިތުން އަހަރެން މީ އޭނަގެ ދަރިއެއް ނޫން..އެހެންވީމަދޯ މިއަދާހަމައަށް އޭނާގެ ފަރާތުން އަހަންނަށް ބައްޕައެއްގެ ލޯބި ނުލިބި މިހުރީ..އަހަރެންގެ އެހައްޤު ފޭރިގަނެގެން ކަލެއަށް ލައްކަ ދުވަހު ފިލާ ހުރެވިއްޖެއެއްނު..ދެން މަށަކަށް ނުފިލޭނެ..؟” ޒިއަދަންގެ ލޮލުން އާވި އަރަމުން ދިޔައެވެ. އީތަން އާއި ކައިރިއަށް ޖެހެމުން ދިޔަ ޒިއަދަންގެ ހިތުގަވި ނަފުރަތުގެ އަލިފާނުން އީތަން ފިއްސާލަން އުޅޭކަހަލައެވެ. އީތަން އާއި ހަމައަށް އައުމާއެކު ޒިއަދަންގެ މޭގައި އަޅާފައި ކޮށްޕާލިއެވެ. ނުވިސްނާ ހުރި ޒިއަދަން ދުރަވިއްސައިގެން ދިޔައެވެ. އެދިޔަ ބާރުމިނުގައި ޒިއަދަން ގޮސް ޖެހުނީ އެތަނާ ވިއްސަކަށް ފޫޓު ދުރުގައި ހުރި ރުކެއްގައެވެ. އޭރު ޒިއަދަންގެ ގައިގައި ރޯވެފައިހުރި އަލިފާންގަނޑު ވަނީ ނިވިފައެވެ. އޭގެ ކުޑައިރުކޮޅެއްފަހުން ރުވާފައި ދޫކޮށްލި ތީރެއްހެން ޒިއަދަން އައިސް ހުއްޓުނީ އީތަންގެ ފަހަތުގައެވެ. އޭރުވެސް އީތަން ހުރީ ޒިއަދަން ކޮށްޕާލި ދިމާއަށް ބަލަހައްޓައިގެންނެވެ.

“ސަޕްރައިޒް!” ފަހަތުގައި ހުރެގެން އީތަންގެ ކޮނޑުގައި ޖަހާލަމުން ޒިއަދަން ބުނެލިއެވެ. ސިހިފައި އީތަންއަށް އެނބުރިލެވުނެވެ. އެވަގުތު ފެނުނު މަންޒަރުން ހަމަހަޤީގަތުގައިވެސް އީތަންއަށް ޝޮކެއް ޖެހުނެވެ. ދެލޯ ބޮޑުކޮށްލަމުން ޒިއަދަންއަށް ކަޅިޖަހާނުލާ ބަލަހައްޓައިގެން ހުރެވުނެވެ. އީތަންއަށް ހީވީ އަމިއްލަ ސޫރަ ލޯގަނޑުން ފެނުނުހެންނެވެ. ޒިއަދަން ހީވަނީ އީތަންގެ ޓްވިންސްއެއް ހެންނެވެ. އެހާވެސް ވައްތަރެވެ. ތަފާތޭ ބުނާނެ ވަކި ކަމެއްނެތެވެ. ޒިއަދަންގެ ލޮލުގައި އެހުރި ކަޅުކަން ފިޔަވައެވެ. އަނދިރިކަމުން ހީވިގޮތެއްހެންވެސް ވެދާނެއެވެ. ދެމީހުންގެ އިސްކޮޅުވެސް ދާދި އެއްވަރެކެވެ. އީތަންހުރީ ބަސްހުއްޓި ބުނާނެ އެއްޗެއް ނޭނގިފައެވެ.

“އަސްލުވެސް ސަޕްރައިޒް ވި..މި ބުނީ އަހަރެންނަށް ކަލޭ ފެނުމުން ވަރަށް ސަޕްރައިޒްވިއޭ..އެވަގުތު އަހަރެންނަށް ވިސްނުނު ކަލޭގެ ބައްޕަ އެހާވަރަކަށް ސިއްރު މިކުރަނީ މިކަމޭ..އިއްތިފާޤުން ނަމަވެސް އަހަރެމެން މިހާ އެއްވައްތަރު ވެދާނެއޭ އަހަރެން ދުވަހަކުވެސް ހިތަކައް ނާރާ..” ޒިއަދަން ޒުއްނޫރުދެކެ އަރާ ރުޅިއެއްގެ ސަބަބުން ބައްޕަވެސް ކިޔަން ބޭނުން ނުވެއެވެ. ކިޔަސް ކިޔަނީ މަޖުބޫރުވެގެން ފަދަ ގޮތަކަށެވެ. މިރޭ އީތަން ފެނުނުކަން އެއީ ޒިއަދަންގެ ނަސީބެވެ. ކައިޝާމެންގޭ ދޮރުމަތީގައި ޒިއަދަން ހުރިއިރު އޭނައަށް އެމަގުގެކޮޅުން އީތަން ފެނުމުން ޒުއްނޫރު ސިއްރު ކުރާކަންތައް އެނގިގެންދިޔައެވެ. މިވީ އަހަރުތަކު ތެރޭގައި ޒިއަދަން ކުރަމުން އައި މަސައްކަތުގައި ކާމިޔާބު ނުވީ ޒުއްނޫރުގެ ސަބަބުންނެވެ. އެހެން ނޫންނަމަ އޭނަފަދަ މީހަކަށް އީތަން ހޯދުމަކީ ހީކުރާވަރަށް ވުރެވެސް ފަސޭހަކަމެކެވެ. ނަމަވެސް މިރޭ އީތަންއާއި ދިމާވުމުން ޒިއަދަންއަށް އިހުސާސް ކުރެވުނީ އީތަންއަކީވެސް އާދައިގެ އިންސާނެއް ނޫންކަމެވެ. އެހެން ނޫންނަމަ އެހާ ދުރަށް އޭނާ ވިއްސައިގެން ދާނެ ވަރަށް އީތަންއަށް ކޮއްޕައި ނުލެވުނީހެވެ.

“ވެލް ޒިއަދަން އަށް ހީކުރެވިފައި ތިވަނީ މުޅިއަކުން ރަނގަޅަކަށް ނޫން..ބައްޕަ އަހަރެމެން ދެމީހުންދެކެވެސް ލޯބިވޭ..ޒިއަދަން އެކަން ޤަބޫލުކުރަން ބޭނުން ނުވަނީ..ޒިއަދަން ބައްޕައާއި ދުރުވީވެސް އަމިއްލައަށް..ޒިއަދަން ކުރާ ގޯސްކަންތައްތަކަށް ފާޑު ކިޔުމަކީ ބައްޕަގެ ޒިންމާއެއް އެކަމާ ޒިއަދަންވެސް ނުޖެހޭނެ ބައްޕައަށް އިހުތިރާމް ކުޑަކުރަން..އޭގެ ބަދަލުގައި އެނަސޭހަތުގެ ބޭނުން ހިފިނަމަ ޒިއަދަންވެސް އުޅޭނީ އުފަލުގައި” އީތަން ބެލީ ޒިއަދަންއަށް ވިސްނައި ދެވޭތޯއެވެ. ޒިއަދަން އެދެބެއިންގެ ބައްޕައަށް ނަފުރަތު ކުރާކަން އީތަންއަށް އެނގެއެވެ. އީތަން ބައްޕަދެކެ އިންތިހާއަށް ލޯބިވެއެވެ. އެހެންކަމުން ބައްޕަގެ ކުށެއް ނެތްކަން ސާބިތުކޮށްދޭން ޒިއަދަންއަށް ވިސްނައިދެވޭތޯ އުޅުނެވެ. އީތަންގެ ވާހަކައިން އޭނަގެ ބައްޕައާއި އެދެމީހުންގެ މެދުގައި ތަފާތު އެތައް ކަމެއް ހިއްސާކުރެވިފައިވާކަން ޔަޤީންވެއެވެ. ޒިއަދަންގެ ރުޅި ހައްތަހާ ގަދަވީ އީތަން އޭނަގެ ބައްޕަގެ ދިފާޢުގައި ވާހަކަދެއްކުމުންނެވެ.

“ކާކު ބުނީ އަހަރެން މިއުޅޭނީ އުފަލުގައެއް ނޫނޭ..މިރޭ ކަލެއަށްވެސް ފެނިފައި ހުންނާނީ އަހަރެން އުފަލުގައި އުޅޭތަން…އަހަރެން ކައިޝާއާ އެއްކޮށް އުފާވެރި ދިރިއުޅުމެއް އުޅޭތަން ފެންނާނެ ވަރަށް އަވަހަށް” ތުންފަތުގައި އިނގިލިޖައްސާލަމުން ޒިއަދަން އެއްލޯމަރާލިއެވެ.

“ޔޫ ސަން އޮފް އަ ބި*… އިޓް ވޯޒް ޔޫ..ކައި އާ ދުރުގަ ހުރޭ އިނގޭ..އޭނަގައިގަ އިނގިލީ ކުރިވެސް ޖައްސާނުލާތި..އައި ވިލް ކިލް ޔޫ..” އީތަން ކައިރިއަށް އައީ އަމަށަކު ރުޅިއެއް ނޫނެވެ. ވީއިރު މިރޭ ކައިޝާ ހީކުރާނީ ޒިއަދަންއެއީ އީތަން ކަމަށެވެ. ޒިއަދަންގެވެސް ހުރި ނުބައި ކަމެއް ދެކެބަލާށެވެ. އެއީ އީތަންއެއް ނޫންކަން ކައިޝާއަށް އިނގޭނީ ކިހިނަކުން ހެއްޔެވެ؟ ޒިއަދަންއާ އީތަން ދެމީހުން ވަކިކުރަން ހުސްނާއަށް ވެސް ނޭނގޭނެއޭ އީތަންގެ ހިތް ބުނެލިއެވެ. އީތަންގެ ވާހަކައިން އޭނާގެ ހިތުގައި ކައިޝާއަށް ޚާއްސަ ޖާގައެއް ދެވިފައިވިކަން ޒިއަދަން އަށް ވިސްނުނެވެ. ޒިއަދަން ބޭނުންވީ އިތުރަށް އީތަން ރުޅިއަރުވާލުމަށެވެ. ” ޝީ ޓޭސްޓްސް ލައިކް އަ ސްޓޯބެރީ..އެހާވެސް ފޮނިވެފައި މީރު…ހިތަށްއަރާ އެއްކޮށް ކާލަން ލިބޭނެނަމައޭ…ސޮރީ ބްރަދަރ އެކަމަކު އަހަރެންގެ ހިތުގައި އެސޫރަ ފެވިއްޖެ..ދެން ހިޔެއް ނުވޭ އެހާފަސޭހައިން ދޫކޮށްލެވިދާނެހެން..ޔޫ ޕްލީޒް ސްޓޭ ކުއައިޓް އެން އެންޖޯއީ ދި ރެސްޓް..އަސްލު އަހަރެންނާއެއްކޮށް ހުއްޓަސް ހީކޮށްލާ އެއީ ހަމަ ކަލެއޭ..ކޯޒް ވީ އާރ ބްރަދަރޒް..ބައިދަވޭ ވީ ކޭން ޝެއަރ ހަރ…ސަޅި އައިޑިއާއެއްނު…” ހިނިގަނޑެއް ޖަހާލަމުން ޒިއަދަން ދެއަތް ޖަހަލީ އީތަން ރުޅިއަރުވާލެވުމުން އެކަމުގެ އުފަލުގައިއެވެ. ހެމުން ދިޔަ ޒިއަދަންގެ ކޯމައްޗަށް އަރައިގެން ދިޔަ ހޫނަކުން އީތަންއާއި ދިމާއަށް ބަލާލީ ރުޅިވެރި ނަޒަރަކުންނެވެ. އީތަންގެ ކަނާއަތް މުށްވެވިފައި ވީއިރު ދެބުމަވަނީ ގޮށްޖެހިފައެވެ.

“ޗީ..އަހަރެން ނޫޅެން ކަލޭ އުޅޭ ވައްތަރަށް އުޅޭކަށް…ތިކަހަލަ ޖާހިލެއް ހިނގި މަގަކުންވެސް އަހަރެން ނުހިނގާނަން..ކަލެއާ ސިފަ އެއްގޮތްވިޔަސް އުޑާ ބިމާހާ ތަފާތު ވާނެ..އަހަރެން ނޫޅެން އަންހެންކުދިން އެއީ ކުޅޭ ކުޅޭ ބަޔަކަށް ހަދައިގެން..ހިތުހުރި ގޮތަކަށް ކަންތައް ކުރަމުންވެސް ނުދަން..އަހަރެން މީ މައިންބަފައިންނަށް އިޚުތިރާމު ކުރަން އިނގޭ މީހެއް..ކައިޝާއަށް ކަލޭގެ އަސްލު އެނގުނީމަ ކިހިނެއްވާނެބާ؟ އެދުވަހަކުން ކަލޭގެ ނުބައިކަން ދައްކާލަމުން އޭނަގެ އިތްފަތްތެރިކަން ފޭރިގަންނާނީ ދޯ؟..ކަލޭ ގެންގުޅުނު އެހެން އަނހެން ކުދިންނަށްވެސް އެހެނެއްނު ހަދަނީ.. ކަލޭގެ މަންމަ އުޅުނު ވައްތަރަށް ކަލޭވެސް އުޅޭނީ ގަދަ ބާރުން ކަންކަން ހާސިލް ކުރަން..” އީތަންއަށް ދެން އިތުރަށް އެންމެ ލަފުޒެއް ނުބުނެވުނީ ޒިއަދަން ގޮށްމުށުން އީތަންގެ މޫނުގައި ޖެހުމުންނެވެ. އެއްފަހަރުއެއް ނޫނެވެ. ތިންހަތަރު ފަހަރު ޖަހައިފިއެވެ. އީތަންގެ ލޯކައިރި ދުޅަވެ ތުންފަތް ފަޅައިގެން ގޮސް ލޭފައިބަމުން ދިޔައެވެ. އެވަރުންވެސް ޒިއަދަންގެ ހިތަށް ހަމަޖެހުމެއް ނުލިބުނެވެ. އީތަން ރުޅިއަރުވާލަން އުޅުނު މީހާ ހީވަނީ ރުޅިން ފަޅައިގެންދާން އުޅޭހެންނެވެ. އެއައި ރުޅީގައި އީތަންގެ ކަރުގައި ހިފާ މައްޗަށް އުފުލާލިއެވެ. ބިމުން ފައިހިއްލުނު ވަގުތު އީތަންގެ ކަރަށް ވާންވެގެން ދިޔައެވެ. ދެފައި ތަޅުވަމުންދިޔައީ ނޭވާހާސް ވަމުންދާތީވެއެވެ. އީތަންގެ އަތަށް ބާރުލަމުން ކަރުބުޑުން ހަޅޭލަވާގަތެވެ. އެވަގުތު އަނގައިން ނިކުތް ބޮޑުއަލިފާންގަނޑާއި އެއްވަރަށް އީތަންގެ އަތުންވެސް ދުންއަރަމުން ދިޔައެވެ. އެގޮތުގައި ޒިއަދަންއަށް އީތަން ހިފަހައްޓާލެވުނީ ކުޑައިރުކޮޅަކަށެވެ. އަތަށް ވަމުން ދިޔަ ދިލަހޫނަށް ކެތްނުވުމުން ޒިއަދަން އަތުން އީތަން ދޫވެގެން ދިޔައެވެ. ނަމަވެސް އީތަން ބިމުންފެށިގެން ފޫޓެއްހާ މަތީގައި ހުރިގޮތަށް ހުއްޓެވެ. ދެލޯ ދިއްލިފައިވަނީ ގަދައޮރެންޖް ކުލައިގައެވެ. ގައިގާއި ރޯވެފައި ހުރި އަލިފާންގަނޑު އަދިވެސް އެގޮތުގައި ހުއްޓެވެ. ލައިގެން ހުރި ގަމީހާއި ޖީންސްގެ ބައިތަށް ވިރިގެން ފައިބަމުންދިޔައެވެ. އީތަން އެހުރިގޮތަށް ހުރެ ޒިއަދަންއާއި ދިމާއަށް ގުދުވެލިއެވެ.

” ހީކުރަން ދެން އަހަރެންނަށް އަދި އަހަރެންގެ ދިރިއުޅުމުގައި ހިއްސާވާ އެއްވެސް މީހަކަށް ގޯނާއެއް ދިނުމުގެ ކުރިން ދެވަނަ ވިސްނުމަކަށް ދާނެކަމަށް..އެހެން ނޫނީ އަހަރެން ހަނދާން ނައްތާލާނަށް ތީ އަހަރެންގެ ބޭބެކަމަށް..” އީތަން ވާހަކަދެއްކިއިރުވެސް އަނގައިން ދުން ނިކުންނަމުން ދިޔައެވެ. ޒިއަދަންގެ ބަހަކަށް މަޑުކުރުމެއްނެތި އީތަން އެހުރި ދިމާއިން މައްޗަށް އަރައިގެން ދިޔައީ ރޮއެކޮށްފާ ދުއްވާލި ރޮކެޓެއްހާ ހަލުވިމިނުގައެވެ. ވަކިހިސާބަކަށް މައްޗަށްގޮސް އީތަން ގެއްލުނުއިރު އެހިސާބުގަނޑުން ހީވީ ހޮނުގުގުރިއެއް ޖެހިހެންނެވެ. އެވަގުތުކޮޅުގެއަޑު އެހާވެސް ގަދަވިއެވެ.

މައްޗަށް ބަލަހައްޓައިގެންހުރި ޒިއަދަންގެ މޫނުމަތިން އިންތިހާދަރަޖައިގެ ރުޅިވެރިކަން ފާޅުވަމުން ދިޔައިރު އޭނާ އޮތީ ދެކަކުލު އަތް ވިދެލައިގެން ގުދަށެވެ. ޒިއަދަން ހަޅޭލަވާގަތެވެ. ހީވީ މީހަކު ގަދަފަދަ ރިހުމަކަށް ކެތް ނުވެގެން ހަޅޭލަވާގަތްހެންނެވެ. އެވަގުތު ޒިއަދަންގެ ބުރަކަށިން ކަށިތަކެއް ނިކުންނަމުން ދިޔައެވެ. ބުޑަށް ފަލަކޮށްހުރި އެކަށިތަށް ތިރިއަށް ފައިބައިގެން ދިޔައީ ކޮޅަށް ހިމަވަމުންނެވެ. ހަމައެފަދައިން އަތުގެ އުޅަނބޮއްޓާ ދިމާއިންވެސް ކަށިތަކެއްނިކުމެފައި ވީއިރު އަތްތިލަވެސް އާދަޔާޚިލާފަށް ބޮޑުވެފައި ނިޔަފަތިތައްވެސް ދިގެވެ. މޭމަތިން ފުޅާވެފައި އުނަގަނޑަށް ހިމަކޮށް ހުރިއިރު މޭކަށިތަށްވަނީ އަރާފައެވެ. ކޮނޑާ ދިމާއިން ހުރި ބޮޑެތި ކަށިތަށް މައްޗަށް ހިއްލިފައިވިއެވެ. އޭރު އޭނާގެ މޫނުގެ ސިފަވެސް ދިޔައީ ބަދަލުވަމުންނެވެ. ބޮލުގައި އިސްތައްޓެއް ނެތެވެ. އެއްލޯ ދިއްލިފައިވަނީ ރަތް ކުލައިގައެވެ. އަނެއް ފަރާތުގައި ލޮލެއް ނެތް އިރު އެތަނަށް ވަނީ މަސްއަރާފައެވެ. ގައިގެ ހަންގަނޑުކުރަކިވެފައި މުޅިހިސާބުގަނޑުގައި ފަރުހަކިވަސް ހިފާފައިވިއެވެ. ޒިއަދަން ތެދުވެލަމުން އޭނާގެ ބޯވާ ފައިތައް ފަތްތަކުގެ މަތީގައި ކާއްތަމުން ކުރިއަށް ދިޔައެވެ. ހިކިފައިވާ އެފަތްތައް ތެތްމަމުން ދިޔައީ ޒިއަދަންގެ ގައިން ފައިބަމުންދާ ލޮނދިންނެވެ. އެވަލުތެރޭން ޒިއަދަން ދިޔައިރު ގަސްތަކުގެ އޮފިތަށް މަގުދައްކަމުން އެއްކައިރިވަމުން ދިޔައެވެ. ޒިއަދަންގެ މިސްރާބު ހުރީ މޫދާ ދިމާއަށެވެ.

ސައިކަލުގައި އެހިސާބުން ހުރަސް ކޮށްލި ރައުލްގެ ފަހަތުގައި އިން ރަޤީބު ތުންތަޅުވާލަމުން މަތި ބަލާލިއެވެ. ތަރިތައް ފިޔަވާ އިތުރުއެއްޗެއް ފެންނަން ނެތަސް ރަޤީބުގެ ތޫނު ނަޒަރަށް ކަމެއް ފާހަގަ ކުރެވުނެވެ. ހަމަ އެވަގުތު ނޭފަތުގައި ޖެހުނު ވަހަކުން ރައުލްގެ ކޮނޑުގައި ބާރަށް ހިފަހައްޓާލިއެވެ. ރައުލްގެ ތުންފަތް ހަރަކާތް ކޮށްލި ގޮތުން ހީވީ އެއްޗެއް ކިޔަވާލިހެންނެވެ. ސައިކަލުގެ ސްޕީޑް ބާރުކޮށްލަމުން ގެއާދިމާއަށް ދިޔަ ރައުލް އާއި ރަޤީބުގެ ހިތަށް ވަނީ ބިރުވެރިކަން ވަދެފައެވެ. ކޮންމެވެސް މީހަކަށް ބޮޑު މުސީބާތެއް ކުރިމަތިވާން އުޅޭކަހަލައެވެ.

**
ދަންވަރުގެ ވަގުތެވެ. މޫދުގެ ލޮނުގަނޑު ކައްކާލަމުން ކަނޑުންއަރައިގެން އެއްގަމާ ދިމާއަށް އެއަންނަނީ އީތަންގެ ބައްޕަ ޒުއްނޫރުއެވެ. ރާޅުޖަހާފަށުގައި އީތަން ހުއްޓި ހުރިއިރު ލައިގެން ހުރި ޖީންސް ވިރިގެން ގޮސް ހުރީ ކަކުލާ ހަމައިގައެވެ. ހާމަޔަށް ހުރި އެހަށިގަނޑުގައި ބީހެމުންދާ ފިނި ވައިރޯޅިން އީތަންގެ ޖިސްމުގައިވާ ހޫނުކަމަކަށް ބަދަލެއް ނާދެއެވެ. ޒުއްނޫރު އެއްގަމަށް އަރައިގެން އައިއިރު އެމޫނުމަތިން ފެންނަމުން ދިޔައީ ހާސް ކަމެވެ. ބޮލުގައިވާ ބުޅިއިސްތަށިގަނޑުން ފެންތިކިތައް ތަޅަމުން ދިޔައިރު ތުނބުޅީގައިވެސް ހަރުލާފައިވަނީ ފެނެވެ. ލައިގެން ހުރި ނޫކުލައިގެ އަތްދިގު ގަމިހާ ހުދުކުލައިގެ އެމުންޑުވަނީ ގަޔާ ތަތްވެފައެވެ. ޒުއްނޫރު އަބަދުވެސް އީތަންއާ ބައްދަލު ކުރަނީ ހުސްނާއާއި ބައްދަލު ކުރި ސިފައިގައެވެ. ޒުއްނޫރުގއ އަސްލުސިފަ އީތަންއަށް އަދި ފެނިފައެއް ނުވެއެވެ. އީތަންވެސް އެކަމަށް ޝަޢުގުވެރިއެއް ނުވެއެވެ.

“ދަރިފުޅާ ކީއްކުރަން ބައްޕައަށް އެވަރަށްގޮވަނީ..؟ ކަންބޮޑުވެފައި ހުރި ޒުއްނޫރު ސުވާލު ކުރިއިރުވެސް ޖަވާބު އިނގެއެވެ. އީތަން އެއްފަހަރު ގޮވާލުމުން އަންނަ މީހާ މިރޭ އެއައީ އީތަން ތިންހަތަރު ފަހަރު ގޮވުމުންނެވެ. ހީވާގޮތުން އީތަން އާ ކުރިމަތިލާން ބޭނުން ނުވަނީއެވެ. އީތަންގެ ސުވާލުތަކަށްވެސް ޖަވާބު ދޭން ބޭނުން ނުވާކަހަލައެވެ. އީތަން ސީރިއަސް ނަޒަރަކުން ޒުއްނޫރާ ދިމާއަށް ބަލަހައްޓައިގެން ހުއްޓެވެ.

“ދަރިފުޅު ކައިރީ ކުރިންވެސް ބުނިން ބޭބެއަކު ހުންނަ ވާހަކަ..އަދި އޭނާގެ ކަންތައްތައް ހުންނަ ގޮތްވެސް ކިޔައިދިނިން..އެންމެ ކަމެއް ފިޔަވާ..އެކަންތައް މިހާރު ދަރިފުޅަށްވެސް އިނގޭނެ..ތިދެކުދިން ސިފަ އެއްގޮތްކަން ބައްޕައަށްވެސް އެނގުނީ މާމަގެ ފަރާތުން..އިނގެއްނު ދަރިފުޅުގެ އުމުރުން ދެއަހަރުން ފެށިގެން އަށާރަ އަހަރުވަންދެން ބައްޕައަށް ދަރިފުޅު ކައިރިއަށް ނާދެވުނުކަން..ދަރިފުޅާ ފަހުން ބައްދަލު ކުރި ދުވަހު ބައްޕަވެސް ހުރީ އަޖައިބުވެފަ..ޒިއަދަންއާ ވަރަށް ވައްތަރޭ މާމަ ބުނުމުންވެސް ބައްޕަ ހީނުކުރަން އެހާ ވައްތަރުވެދާނެކަމަށް..” އީތަންއާ ދިމާއަށް ބަލާލަމުން އިށީނުމަށް ޒުއްނޫރު އިށާރާތް ކޮށްލީ ވާހަކަ ދައްކަމުންނެވެ. ޒުއްނޫރު އެވާހަކަ އީތަންއަށް ސިއްރުކޮށްގެން ހުރީ ޒިއަދަންއާ ދެމީހުން ދިމާ ނުވާނެކަމަށް އުއްމީދު ކޮށްގެންނެއެވެ. އެކަމަށް މިއަދާ ޖެހެންދެންވެސް ޒުއްނޫރު ދިޔައީ މަސައްކަތް ކުރަމުންނެވެ. ނަމަވެސް މިހާރު އޭނާ ކުރާ ކަންތަކުގެ ބާރު ކެނޑެމުން ދިޔުމުގެ ސަބަބުން އީތަން އާއި ޒިއަދަން އެވަނި ދިމާވެފައެވެ. އެކަން ޒުއްނޫރަށް އެނގުމުން މިރޭ އީތަން އެވަރަށް ގޮވުމުންވެސް ނާންނަން ހުރެފަ އެންމެފަހުން އެއައީ އީތަންއަށް އެނގެންޖެހޭ އިތުރު ކަންތައް ތަކެއް ހުރުމުންނެވެ.

“ދަރިފުޅަށް އިނގޭތަ ޒިއަދަންގެ ކާފަ ޔައުކިއްޒާ މަރުވެގެން ދިޔައީ ޒިއަދަން ސަލާމަތް ކުރަންވެގެން..އެކަމުގެ ތެރޭގައި ޒިއަދަންގެ މޫނުން އެއްފަޅިފިހި ލޯވެސް އަނދާފައިވަނީ..ހުސޭންފުޅު އަހަރެންގެ ބައްޕަ ކައިރީގަ ވަޢުދުވީ ފަންޑިތަ ނަހަދާނެކަމަށް އެކަމަކު އޭނައަށް ނުހުރެވުނު އެކަން ނުކޮށެއް އަލިމަނިކު ބުނެގެން އޭނަ އުޅުނީ ދަރިފުޅު ނައްތާލަން އެކަމަކު އެވަގުތު އޭނާގެ ދަލުގައި ޖެހުނީ ޒިއަދަން އެއީ އޭރު ދަރިފުޅުގެ މަންމަ އަދި ނުވިހާނެ ޒިއަދަންއަށްވެސް މަހެއްވަރު ވާނީ އެކަމަކު ހުސޭންފުޅު ހީކުރީ ބައްޕައަށް ދަރިއެއް ލިބުމުން އެއީ ހުސްނާއާ ދެމީހުންނަށް ލިބުނު ދަރިއެއް ކަމަށް އެހެންވެ ދަރިފުޅު ނައްތާލަން އަވަސްއަރުވާލައިގެން އުޅުނީ.. ހެދި ފަންޑިތައިގައި އަޅިޔަށްވެދިޔައީ ހުސޭންފުޅާ ޔައުކިއްޒާ” ޒުއްނޫރުގެ އަޑުގައި ވަނީ ހިތާމައެވެ.މިއަދާ ހަމައަށްވެސް ޒިއަދަންއަށް އޭނާގެ ކާފަ މަރުވި ގޮތެއް ނޭނގޭނެއެވެ. ނަމަވެސް ހަޤީގަތް އިނގޭނެ ދުވަހަކުން ޒިއަދަން އެކަމުގެ ބަދަލު ހިފާނެކަން އެއީ ކަށަވަރު ކަމެކެވެ.

އީތަންއާ ޒުއްނޫރުގެ ފަހަތުން އެނބުރެމުން ދިޔަ ކަކުންޏަކުން ދުންއަރަމުން ދިޔައެވެ. އެދުންތަކުގެ ތެރެއިން ފާޅުވީ މީހެއްފެ މޫނުމަތިން ފެންނަމުން ދިޔައީ ރުޅިވެރިކަމެވެ.