ލޯބިވޭ (1)

ރޭގަނޑުގެ ހަމަ ހިމޭން ވަގުތެވެ. މުޅި ދުނިޔެވެސް ނިދާފަ ވާކަހަލައެވެ. ނަމަވެސް މަގު މަތިން ދުއްވާއެއްޗެހީގެ އަޑު އިވި އިވި ހުއްޓެވެ.  ދަންވަރުގެ އެ ހިތްގައިމު ވަގުތު ކޮޓިރީ ބެލްކަނީގަ ހުރި ގޮނޑިއެއްގަ އޮށޯވެލަިގެން އަލްޔާ އޮތީ އެފްބީގައެވެ. ނިއުސްފީޑް ސްކްރޯލް ކުރަމުން ދިޔައިރު ބައެއް އަންހެންކުދިންގެ ތުއި ފޮޓޯތަށް ފެނުމުން ހިނިވެސް އާދެެއެވެ. އަލްޔާ އަކީ އެއްވެސް އިރެއްގަ އެހާ ދެއްކުންތެރިކަން ބޮޑު ކުއްޖެއް ނޫނެވެ. އެހެން ކަމުން އެފްބީ އައްވެސް އަލްޔާގެ އެއްވެސް ފޮޓޯ އެއް ނުލައެވެ. މިހެނވެ ގިނަ މީހުން ހީ ކުރަނީ އަލްޔާ އަކީ ފޭކު އައިޑީ އެއް ކަމަށެވެ.

ފްރެންޑު ރިކުއެސްޓް ތައް ބަލާލި އިރު މާއިން ދި އަންލަކީ ކިޔާ ކުއްޖަކު ރިކުއެސްޓް ކޮއްލާފަ އިނެވެ. ވަރައް ހިތާމަވެރިކޮއް އުޅޭ ކުއްޖެއްކަން ޕްރޮފައިލް ބަލާލީމަވެސް އިނގުނެވެ. އެހެން ކަމުން އަލްޔާ އެޑް ކޮއްލިއެވެ. އެޑްކޮށްލިތާ މާގިނައިރެއްނުވެ އޭނަ ހާއި ޖަހާލިއެވެ. އަލްޔާވެސް މި ގޮތްނޭންގޭ ޒުވާނާގެ ހިތާމަތައް ދެނެގަތުމުގެ ޝައުގުގަ ވާހަކަ ދެއްކިއެވެ. އެހެން މީހުންހެން މާއިންވެސް އެހީ ފޭކް އައިޑީ އެއް ތޯއެވެ. ފޮޓޯ ލާހިތް ނުވަނީ ކަމުގަ އަލްޔާ ބުންޏެވެ. ދެމީހުންވެސް އެކި ކަހަލަ ވާހަކަ ދެއްކުމުގަ ތިއްބާ އިވެންފެށީ ފަތިސް ނަމާދައް ބަންގި ގޮވާ އަޑެވެ. މާއިން ނަމާދައް ދަނީ ކަމައް ބުނެފަ އޮފްލައިންވިއެވެ.

އަލްޔާވެސް ތެދުވެ ބެލްކަނިން ބޭރުބަލާލަން މަޑުކޮއްލައިގެން ހުއްޓެވެ. ފަތިހުގެ އެ ހިތްގައިމު ފިނި ވައިރޯޅިތައް އައިސް ގައިގަ ބީހިލުމުން ބުނަން  ނޭނގޭ ފަދަ އިހުސާސް ތަކެއް ކުރެވެމުން ދިޔައެވެ. ކުއްލިޔަކައް އަލްޔާގެ ނަޒަރު ހުއްޓުނީ ކުރިމަތީ ހުރި ގެއިންް ނިކުތް ޒުވާނާ އަށެވެ. އެ ފިރިހެންވަންތަކަމައް އަލްޔާއައްވެސް ތައުރީފްކޮއްލެވުނެވެ. ތުނބުޅިވެސް ރީތިވަރަކައް ދިގުކޮއްލެވިފަ ވެއެވެ.. އެ ވަގުތު އެ ޒުވާނާގެ ނަޒަރުވެސް އަލްޔާއައް އަމާޒު ވިއެވެ. އަލްޔާ ކުޑަކޮއް ލަދުވެސް ގަތެވެ. ލައިގެން ހުރި ކުރު ސޯޓު މަތިން ހަނދާން ވީ މައެވެ. އެހެނަސް އެ ތޫން ނަޒަރު އަލްޔާގެ ހިތުގެ އެންމެ ފުނައް އަސަރު ކުރިއެވެ.

” ޕްރިންސެސް އަދިވެސް ނުނިދަން ދޯ.. ދޭ އަވަހައް ނަމާދުކޮއްލައިގެން ނިދަން..” އަލްވިންގެ އަޑު އެހާ ގާތުން އިވުމުން އަލްޔާ ދިޔައީ ސިއްސައިގެންނެވެ.

” ދެން ދޮންބެއައްވެސް އިނގެއެންނު އަލްއައް ދަންވަރު ނުނިދޭކަން…” އަލްޔާވެސް ޅަގޮތަކައް ބުނެލިއެވެ.އެއީ ކޮންމެ ރެޔަކުވެސް އަލްވިންގެ އާދައެވެ. މިސްކިތައް ދިއުމުގެ ކުރިން އޭނާގެ ދެ ކޮއްކޮއަށް ނަމާދު ކުރަން ގޮވާނެއެވެ. މައިންބަފައިންގެ ފުރިހަމަ ތަރުބިއްޔަތާއެކު ބޮޑު ކުރެވިފަ ވުމުގެ ނަތީޖާއެވެ.

”  ދޮންބެއައް އެކަން އިނގޭތީއޭ މި ބުނީ އަވަހައް ނަމާދު ކޮއްގެން ނިދަން ދާށޭ… ދޮންބެވެސް މިދަނީ ނަމާދައް ދާން… ދެންދޭ އަވަހައް ނަމާދު ކުރަން…” މިހެން ބުނެފަ އަލްވިން ދިޔުމުން އަލްޔާވެސް ކޮޓްރިއަށް ވަންނަން އުޅެފަވެސް އެއްޗެއް ހީވެގެން ބެލްކަނިން ބޭރު ބަލާލިއެވެ. އޭރުވެސް އެޒުވާނާގެ ތޫނު ނަޒަރު ހުރީ އަލްޔާ އައް އަމާޒުވެފައެވެ. އަލްޔާ ކުޑަކޮށް ހައިރާންވިއެވެ. އެ ޒުވާނާ އަދިވެސް ބަލަން ހުރީމައެވެ. ނަމަވެސް ދެވަނަ ސިކުންތުގަ އެ ޒުވާނާ ގޮސް ވަނީ ކައިރީ ޖެހިގެން ހުރި މިސްކިތަށެވެ. ހާދަ މާތް ޒުވާނެކޭ އަލްޔާގެ ހިތް ބުނެލިއެވެ. ރޭގަނޑުގެ އަރާމު ނިދި ނަގާލާފަ މިސްކިތައްދަނީ މިހާރު މަދު ޒުވާނެކެވެ. މިހެންކަމުން އެޒުވާނާއައް މާތް ގަދަރެއްދެވުނެވެ.

ނުނިދާ ހުރުމުގެ ސަބަބުން ބޮލުގަ ރިއްސާފަދަ އިހުސާސްއެއްވާން ފެށުމުން އަލްޔާވެސް ގޮސް ނަމާދުކޮއްލައިގެން ނިދީއެވެ.

” އަލް ބޭބީ.. ދެން ތެދުވެބަ.. ކުޑަބެ ބްރޭކަށް މިއައީ..” އަލަމް އަލްޔާއަށް ތަފާތު ޖެއްސުން ކުރަމުން ދިޔައެވެ. މި މަންޒަރު ބަލަން ދޮރުމަތީ ހެވިފަ އާލިމާ ހުއްޓެވެ.

” ދަރިފުޅުދޭ ކާން ތައްޔާރުވެގެން އަންނަން.. މަންމަ އަލްޔާ ގޮވައިގެން މިދަނީ” އާލިމާ މިހެން ބުނުމުން ބަސް އަހާ ކުއްޖެއްހެން އަލަމް ނިކުމެގެން ހިނގައްޖެއެވެ. އެއީ ކޮންމެ ދުވަހެއްގެ ވެސް އަލަމް އާ އަލްވިންގެ އާދައެވެ. ހުރި ހަމައެކަނި އަންހެން ދަރިފުޅަށް ވުމުން އެންމެންވެސް އަލްޔާދެކެ އިންތިހާއަށް ލޯބިވެއެވެ. އަލްޔާއާ ވަކިން އަލަމް އާ އަލްވިންއަކަށް ނުވެސް ކެވޭނެއެވެ. ތިން ދަރިންވެސް އެކަކު އަނެކަކާވަކިން ނޫޅެވޭ ވަރަށް ލޯބިވާތީ އާލިމާ އާއި ޝިޔާމު ތިބެނީ ނުލާހިކު އުފަލުންނެވެ. އެދެމީހުންގެ ދަރިން ތަރުބިއްޔަތު ކުރެވިފައިފާ ފުރިހަމަ ކަމާމެދު ފަހުރުވެވިވެފައެވެ.

އާލިމާ ގޮވަންފެށީމަ އެންމެ ފަހުން އަލްޔާވެސް ތެދުވެ  މިދަނީ ކަމުގަ ބުނެ ފާހާނާއަށް ވަދެއްޖެއެވެ. އަލްޔާ ތިރިޔަށް ފޭބި އިރު ޝިޔާމް އާ އަލްވިން އަދި  އަލަމް ކާމޭޒު ދަށުގަ އަލްޔާގެ އިންތިޒާރުގަ ތިއްބެވެ.

“ދަރިފުޅު ހާދަ ކަންނެތް ވެއްޖެޔޭ ދޯ މިހާރު..” އަލްޔާ އައިސް އަލްވިން އާ އަލަމްގެ މެދުގަ އިން ގޮނޑީގަ އިށީންދެލުމުން ޝިޔާމް ބުންޏެވެ.

“އެހެންވެޔޭ އަހަރެން މިބުނަނީ އަލްކޮވެސް ބައްޕަގެ ބިޒްނަސްއަށް ޖޮއިންކުރުވަން.” އަލަމް ޝިޔާމްގެ ވާހަކައާ ގުޅުވާލައިގެން ބުނެލިއެވެ.

” އަލް އިހަށް ދުވަހު އެ ނިކުނީ ކިޔަވާ.. މިދުވަސް ކޮޅުގަ ދެން ހަމަ ރެސްޓް ކުރަންވީނު.. އެއީ ކަންނެތް ވުމެއް ނޫނޭ ދޯ ދަރިފުޅާ..” އާލިމާ ވާހަކަ ދެއްކީ އަލްޔާގެ ކޮޅަށްބުރަވާގޮތަށެވެ.

“މަމް އިޒް ރައިޓް.. އަލް ބޭނުމެއްނޫނޭ ޖޮއިންވާކަށް.. އަލް އަދި އޭލެވެލް މި ނިމުނީއެއްނު.. ދެން ކުޑަ ބްރޭކެއް ނަގާލާފަ އަލް ބޭނުމީ ބިޒްނަސް ދާއިރާއިން ޑިގްރީ ހަދަން.. އެޔަށްްފަހު ބައްޕަގެ ކޮމްޕެނީ އާ ޖޮއިންވާން” އަލްޔާ ޝިޔާމަށް ބަލާލަމުން ބުނެލިއެވެ.

“ދަރިފުޅައް ފެންނަ ގޮތެއް ހަދާ. ބައްޕައަށް އިނގޭ ދަރިފުޅު ކޮންމެ ކަމެއްވެސް ކުރާނީ ރަނގަޅަށް ވިސްނާފަކަން” ޝިޔާމް މިހެން ބުނެލުމުން އަލްޔާ އަލަމް އާ ދިމާލައް ދޫ ނެރެލިއެވެ. އެތަން ފެނިފަ އާލިމާ ގާތައް ހިނިވެސް އައެވެ. އެ ދެމަފިރިންގެ ދަރިން އެދެމީހުން ތަރުބިއްޔަތު ކޮއްފައިވަނީ އެންމެ ފުރިހަމައައްްށެވެ. އެކަމްގެ ފޮނި މީރުކަން މިއަދު އެދެމަފިރިންނަށް އިހްސާސް ކުރެވެމުންދެއެވެ.

އަލަމްމެން އޮފީހަށް ދިޔުމުން މަންމައާއެކު ބަދިގޭގަ ކުރަންޖެހޭ މަސައްކަތް ނިންމާލާފަ އަލްޔާ ދިޔައީ ކޮޓަރިއަށެވެ. ކޮޓްރީގަ ހޭދަ ކުރާ ގިނަ ވަގުތު އަލްޔާ ބެލްކަނީގަ ހޭދަ ކުރާތީ ޝިޔާމް ވަނީ އެތަން ހިތްފަސޭހަކޮށް ހަދާދީފައެވެ. ތަފާތު މާގަސްތަކުން އެ ބެލްކަނި އޭރިޔާ ފަޅުފިލުވާލާފަ ވާއިރު މާ ވެހެލިން ރެއިލިން ވަނީ ފަޅު ފިލުވާލާފައެވެ. އަލްޔާ އޮތީ ލެޕްޓޮޕް ހިފައިގެން ބެލްކަނީގަ ހުރި ގޮނޑީގައެވެ. ހިތްފަސޭހަ ލަވައެއްޖަހާލުމަށް ފަހު އެފްބީއަށް ވަދެލީ މާއިން އޮންލައިންގަ އިންނާނެ ކަމަކަށް ނޫނެވެ. ނަމަވެސް އޮންލައިންގަ އިންތަން ފެނި އަލްޔާ ވާހަކަ ދައްކާލާ ހިތްވިއެވެ. އަލްޔާ ވާހަކަ ދައްކަން ފެށުމުން މާއިން ބީޒީ ކަމުގަ ބުނެލިއެވެ. އެހެންކަމުން ފޫހިވެގެން އެކި ކަންކަމުގަ ވަގުތު ހޭދަ ކުރަމުން ދަނިކޮށް އިރުއޮއްސިއްޖެއެވެ.

އަލްޔާ ސިޓިންރޫމަށް ދިޔައިރު އަލްވިން ޓީވީއިން އަންނަ އިނގެރޭސި ފިލްމެއް ބަލަންއިނެވެ.

“ދޮންބޭ ހިނގާބަ އަލްއާ އެކު ސްކޫޕަށް. އަލް މިއުޅެނީ ފިނިއެއްޗެއް ބޯހިތުން.” އަލްޔާ އައިސް އަލްވިން ކައިރީ އިށީންދެލަމުން ބުނެލިއެވެ.

“ދޮންބެ އިޝާ ނަމާދު ކޮއްލައިގެން އަންނާނަން އަލްކޮދޭ އެހާއިރަށް ރެޑީ ވެލަން” އެހެން ބުނެ އަލްޔާގެ ބޮލުގަ ފިރުމާލާފަ އަލްވިން ދިޔާއީ މިސްކިތަށެވެ. އަލްޔާވެސް ކޮޓްރިއަށް ވަދެ ނަމާދުކޮށްލައިގެން، ނިކުމެ މަޑުކޮށްލައިގެން ހުރީ ބޭރު ދޮރުކައިރީގައެވެ. އަލްވިން އޭރު މިސްކިތުން ނިކުމެގެން އައިސް އަލްޔާއާ އަރާ ހަމަވަނީއެވެ. އަލްޔާއަށް ބަލާލެވުނީ އަލްވިން ކައިރީގަ ހުރި ޒުވާނާއަށެވެ. ރޭފަތިހު ފެނުނު ޒުވާނާއެވެ. މިހާރުވެސް އެއަންނަނީ މިސްކިތުންނެވެ. ހާދަ ރަނގަޅު މާތް ޒުވާނެކޭ އަލްޔާގެ ހިތް އަނެއްކާވެސް ބުނެލިއެވެ. ކަޅު ޓީޝާޓަކާ ޖިންސެއް ލައިގެން ހުރި އިރު އެޒުވާނާފެންނަލެއް ނުހަނު ރީއްޗެވެ. އެހާ ކައިރިން އެ ޒުވާނާ ފެނިލުމުން އަލްޔާއަށް ބުނެދެން ނޭންގޭ އިހުސާސް ތަކެއްވާންފެށިއެވެ. އެ ޒުވާނާގެ ތޫނު ނަޒަރުވެސް ހުރީ އަލްޔާއަށް އަމާޒުވެފައެވެ. އެ ޒުވާނާ އަލްޔާއަށް އެވަރަށް އެބަލަނީ ކީއްވެބާއޭ އަލްޔާގެ ހިތައް އެރިއެވެ.

 ނުނިމޭ