ހިތް އެކީ ދެވިއްޖޭ…46

އަޔާންއާއި ފަތުހީ ތިބީ ރެޝިޕްޝަން ކައިރީގައެވެ. ދެމީހުންވެސް ތިބީ ބިރުގަނެފައެވެ. ކުއްލިއަކަށް ލިފްޓް ހުއްޓި ނިކުމެގެން އައި ސައީދާ ފެނި ފަތުހީ އިތުރަށް ބިރުގަަތެވެ.. ކިއާރާ ނެތުމުން ކަމެއް ކުރީކަމަށް ހީވިއެވެ. “ކޮބާ ކިއާރާ؟” ފަތުހީ ސައީދާގެ ކުރިމައްޗަށް އަރާފާ ބުންޏެވެ. “ކިހާ ދެރަކަމެއް.. އޭނާ ނަމަކީ އާލިޔާ.. ކަލެއެއް ނޫނޭ އޭނާ ކުޑައިރު ބޮޑު ކެއްކުމެއް ކައްކާފައި އެންމެންނަށް ބަހާ ހަރަދުކުރީކީ އެ ނަން ބަދަލުކުރާކަށް.. ކޮން ކިއާރާއެއް ކިޔާކަށް… މަށަކަށް ނޭނގެ އޭނާ ވީތަނެއް.. ބުނާތި މިއަދު އެ ކުރި ކަމުގެ ބަދަލު ހިފާނަމޭ.. މިއަދު ފަސްއެނބުރި ދާންޖެހުނަސް އަދި އަންނާނަމޭ…”  ސައީދާ އެހެން ބުނެފައި ފަތުހީ ދުރަށްޖައްސާލުމަށްފަހު ހިނގައިގަތެވެ. “ސަރ އެ ކާކު؟ މޭމް…. ކޮބާ؟” ރެޝިޕްޝަނުގައި އިން ކުއްޖަކު އެހީ ކަންބޮޑުވެގެންނެވެ. ކިއާރާ އެމީހަކު ގޮވައިގެން ދިޔަގޮތްވެސް އޭނާއަށް ފެނުނެވެ. އޭނާ ބޭރުގައި ހަޅޭލެވިކަންވެސް އިނގެއެވެ. . “އޭނާއަށް ކިއާރާ އޭނާ ދަރިއެއްކަމަށް ހީކުރަނީ…. އެހެންވެ… ވަރަށް ނުބައި މީހެއް އެއީ… ހަށިވިއްކުމުގެ ވިޔަފާރީގައި އުޅޭ މީހެއް.. އެނާ ހީކުރަނީ ކިއާ އަކީ އޭނާ ދަރިކަމަށް އެހެންވެ ބަލައި އެ އަންނަނީ އަބަދު… ސެކިއުރިޓީ ގާޑް ކައިރި ބުނާތި އޭނާ ދެން އޮފީސް ދޮށުން ފެނިގެން ނުވާނޭ.. އެން ނުދަންނަ މީހަކު ސަރ އޯރ އެހެން މީހެއް ކައިރި ނާހާ އޮފީސްތެރެއަށް ނުވައްދައްޗޭ.. ހާއްސަކޮށް ކިއާ ހޯދާށޭ ބުނެފިއްޔާ…. އެޑްރެސް ދޭށޭ ބުންޏަސް… ސަރ ކައިރި އަހާފަ ނޫނީ އެކަން ނުކުރާތި..” ފަތުހީ ދޮގުހެދަން މަޖުބޫރުވީއެވެ. އެއަށްފަހު އަޔާން އާއި ފަތުހީ ހިނގައިގަތީ ލިފްޓާއި ދިމާލަށެވެ.

ފަތުހީ މެން 6 ވަނަ ފްލޯރއަށް ދިޔައިރު ލިފްޓް ކުރިމަތީ ރޯން އިން ކިއާރާ ފެނި ދެމީހުންގެވެސް ލޯބޮޑުވިއެވެ. ފަތުހި އައިގޮތަށް އައިސް ކިއާރާ ނެގިއެވެ. އަޔާން ލިފްޓް ކައިރި މަޑުކޮށްލައިގެން ހުރި އިރު  އޭނާ ހުރީ ރުޅިއައިސް ރަތްވެފައެވެ. “ކިހިނެއްވީ.. ކިއާ ހުއްޓާލާފަ ބުނެބަލަ… ކިހިނެއްވީ؟ އޭނާ ކަމެއް ކުރީތަ؟؟ ކިއާ… ހުއްޓާލާފައި ބުނެބަލަ..” ފަތުހީ ކިއާރާ ތަޅުވާލަމުން އެހެން ބުނިވަގުތު ކިއާރާ ވަރަށް ބާރަށް ފަތުހީގެ ހަށިގަނޑުގައި އޮޅުލައިގަތެވެ.. “ޑޭޑް…. އަޅުގަނޑު ބޭނުމެއް ނޫން އެ މީހަކަށް މަންމަ ކިޔާކަށް… އެއީ މުޑުދާރު އަންހެނެއް.. ނޫން އަންހެނެއްވެސް ނޫން…. ޑޭޑް… އިނގޭތަ މަންމަ ބުނި އެއްޗެއް..” ކިއާރާ އަށް އުނދަގުލަކުން ވާހަކަދެއްކުނެވެ. “ޑޭޑް… އަދު…އަދުނާން… ހީ އިޒް ނޮޓް މައި ޑޭޑް….. އަޅުގަނޑަކީ ނަހަލާލު ދަރިއެއް…. އޭނާ ބައްޕަގެ ބޮލަށްޖަހަން ބައްޕަ ދަރިއެކޭ ކިޔައިގެން ޑި އެން އޭ މެޗް ކުރުވީ އެކަމް އަޅުގަނޑަކީ އަދުނާން ދަރިއެއް ނޫނޭ.. އެ މީހާއަށް ނޭނގެޔޯ ކާކު ދަރިއެއްކަމެއްވެސް މީ..ޑޭޑް…. އަޅުގަނޑު މި ހުރިހާ އަހަރު ބައްޕައެއްގެ ގޮތުގައި ދެކުނު މީހަކީ ހިލޭ ފިރިހެނެއް.. އަނެއްކާ ބައްޕަ 13 އަހަރު އަޅުގަނޑަކީ ބައްޕަ ދަރިއެއްކަމަށް ދެކިގެން އުޅުނުއިރު އެ ބައްޕަ ނިޔާވީ ތެދު ނުވެސް އިނގި.. އެ ކޮންކަހަލަ އިންސާނެއްތަ؟ ފުރަތަމަ ފިރިމީހާއަށް ބޭވަފާތެރިވީ.. އެހެން މީހަކާއި އިނދެ އެ މީހާ އަށް އަމިއްލަ ދަރި ހަދިޔާކޮށް އެހެން މީހުންނަށް ވިއްކާ…….” ކިއާރާއަށް އިތުރަށް ނުބުނެވި އިތުރަށް ރޮއެގަނެވުނެވެ. ފަތުހީއަށްވެސް ލިބުނީ ސިހުމެކެވެ. ކިއާރާ އަދުނާންދެކެ ވާ ލޯބި އޭނާއަށްވެސް އިނގެއެވެ.

އަޔާންއަށް އަނގަމަތީ އަތް އަޅާލެވުނެވެ. ހަނދާނަށް އައީ ކިއާރާ ފަހުރުވެރިކަމާއި އެކު “އާލިޔާ އަދުނާން” އޭ ބުނާ ދުވަސްތަށް މަތިންނެވެ. . “އެލީނާން” މަތިންނެވެ. “މިހުރިހާ ދުވަހު އެ ހާ އުފާވާ ބައްޕަ އަކީ……….. ކުޑައިރުން ފަށައިގެން ވެސް ފަހުރުވެރިވާ އެ ބައްޕަ އެއީ ހިލޭ ފިރިހެނެއް…… ޑޭޑް އަޅުގަނޑު ކިހިނެއް ހަދާނީ؟ އަޅުގަނޑު އާއިލާ އެކަކުވެސް ނެތް…. ޑޭޑްއަކީ ބައްޕައެއް ކަމަކު ލޭގެ ގުޅުމެއްނެތް.. ހަޤީޤަތަކީ މި ދުނިޔޭގައި މިއަދަށްފަހު އަޅުގަނޑާއި ލޭގެ ގުޅުމެއް އޮތް އެކަކުވެސް ނެތްކަން… އެ އިންސާނާއަކީ އަޅުގަނޑު ބަނޑުއަޅާ ވިހޭ މީހެއްކަމަކު އަޅުގަނޑު އޭނާއަށް ނަފްރަތު ކުރަން…. މިއަދަށްފަހު އަޅުގަނޑު ފައިޓް ކުރާނަން… މި ހުރިހާ ދުވަހުވެސް ބިރުގަންނަނީ މަންމަވީމަ.. ހަނދާނަށް އަންނަނީ ބައް…ބައްޕަ….” ކިއާރާ އަނގަމަތީ އަތް އެޅިއެވެ.. “ކިއާ… ދެން ހުއްޓާލާ….. ހުއްޓާލާފައި ހިނގާ ގެއަށް ދާން….!” ފަތުހީ އެހެން ބުނެފައި ކިއާރާ ދުރަށްޖެއްސިއެވެ. އަދި އޭނާ ނެގިއެވެ.

އެވަގުތު ކިއާރާ ލޮލުގައި އަޅައިގަތީ އަޔާންއެވެ. އަޔާންވެސް ހުރީ ފެންކަޅިވެފައެވެ. ކިއާރާ މޫނު ފެނި އޭނާ އިތުރަށް ދެރަވިއެވެ. އެ މޫނުމަތީ ވަނީ ރަތްވެފައެވެ. ބޯވެސް ހުރީ ހޭވިފައެވެ. ދެލޯ ދުޅަވާންކައިރިވެފައެވެ. އަޔާން ދެކޮޅަށް ބޯ ހަރަކާތްކޮށްލީ ނުރޯށޭ ބުނާފަދަ ގޮތަކަށެވެ. ކިއާރާ ފަތުހީގެ ކޮނޑުގައި ބޯ އަޅާލިއެވެ. އަދި ހިނގައިގަތެވެ. އަޔާން ލިފްޓް ހުޅުވާލުމާއި އެކު ތިން މީހުން އެތެރެއަށް ވަނެވެ. އަޔާން ކިއާރާގެ ބޮލުގައި ފިރުމާލިއެވެ. ލިފްޓް ތިރިއަށް ފޭބުމުގެ ކުރިން ކިއާރާ އޭނާގެ އިސްތަށިތަށް ބޭލުމަށްފަހު ލޯ ފޮރުވާލައިގެންނެވެ. ލިފްޓް ހުޅުވުމާއި އެކު އެމީހުން ނިކުތެވެ. ރެޝިޕްޝަނުގައި ތިބި ކުދިން އެއްޗެއް ބުނަން އުޅުމުން ފަތުހީ ނޫނެކޭ ބުނެފައި ހިނގައިގަތެވެ. އަޔާންވެސް އެމީހުންނާއި އެއްވަރަށް ހިނގައިގަތެވެ. މަގުމަތީ ދިޔައިރުވެސް ކިއާރާ ހުރީ އެހެންނެވެ. އޭނާއަށް އޭރު ގިސްލެވެއެވެ. ކިއާރާ ގޮސް ކާރަށް އެރުވުމަށްފަހު ފަތުހީ ޑްރައިވިން ސީޓްގައި އިށީނެވެ.. “ކިއާ މިއަދު ދާނަން އިނގޭ ހަވީރު..” އަޔާން އެހެން ބުނެފައި ދޮރު ލެއްޕިއެވެ. އަދި އޭނާގެ ކާރަށް އަރަން ދިޔައެވެ.

“ޑޭޑް….. އަޅުގަނޑު މަމް ގެ މޫނުމަތީ ޖެހީ….” ކިއާރާ ބުނެލީ ވަރަށް މަޑުންނެވެ. އޭނާ އަށް ކުށެއްކުރެވުނުކަހަލަ އިހްސާސްއެއް ވާންފެށީއެވެ. ކާރު ދުއްވަން އިން ފަތުހީ އަށް ކުއްލިއަކަށް ބްރޭކް ޖަހާލެވުނެވެ. “ކީކޭ؟” ފަތުހީއަށް އަހާލެވުނީ ކުޑަކޮށް ސިހިފައެވެ.. “އަޅުގަނޑު ކައިރި އަދުނާން އަކީ ބައްޕައެއް ނޫނޭ ބުނެވުނު ވަގުތު އަޅުގަނޑަށް ޖެހުނީ…” ކިއާރާ ކަރުނަތަށް ފޮހެލަމުން ބުންޏެވެ.. “އަމް ޕްރައުޑް އޮފް ޔޫ.. އަސްލު އެހެން މީހެއްނަމަ އެ ޖެހުން ޖެހިތާ ކިތަށްމެ ދުވަހެއް އެކަމް ކިއާ ކެތްކޮށްލައިގެން ތި ހުރީނު…. ތިކުރީ ރަނގަޅަށް ހަމަ.. އެކަމް ދުވަހަކުވެސް ހިއެއް ނުކުރަން އަދުނާން ކިއާގެ ބައްޕައަށް ނުވެދާނެއެކޭ… ދެން ކާކުކަމެއްވެސް ތިބުނީ ނޭނގޭ… ކިހާ ދެރަ…؟” ފަތުހީ އެހެން ބުނެފައި އަނެއްކާވެސް ކާރު ސްޓާރޓް ކުރިއެވެ.. ކިއާރާ އިތުރަށް އެއްޗެއް ނުބުނެއެވެ.

…..

ފެންވަރައިގެން އައިސް ނަމާދުކޮށްލައިގެން ކިއާރާ އެނދުމަތީ އޮށޯތެވެ.. ކާކަށްވެސް އޭނާ ބޭނުމެއްނޫނެވެ. އަދިވެސް ކަންފަތަށް އިވެމުން ދިޔައީ އެ މަންމަގެ ހިތި ބަސްތަކެވެ. އަދުނާންއަކީ ކިއާރާގެ ބައްޕަ ނޫންކަމަށް ބުނި ވާހަކައެވެ. ކިއާރާ ތަންކޮޅެއް ބޮޑަށް ބާލިހުގައި ބައްދާލަމުން ތުންފަތުގައި ދަތް އަޅާލިއެވެ. އެވަގުތު ކަރުނަތަށް ފައިބައިގެން ދިޔައެވެ. “ކީއްވެތަ މިހެން މިވީ..؟ ކީއްވެތަ ބައްޕައަށް އޭނާ ނުވީ؟ ބައްޕައަށް އެ ހަޤީޤަތް ނޭނގި ބައްޕަ ނިޔާވީ؟ ބައްޕަ މި ނަހަލާލު ދަރިއަށް ނުކޮށްދެނީ ކޮންކަމެއް…؟ ކީއްވެތަ މަންމަ އެހާ އަނިޔާވެރިތިވީ. ކިތަށް މީހުންނަށް… އެ ބައްޕަގެ ކުށަކީ ކޮބާތަ… އެ ބައްޕަ މަންމަގެ ނަހަލާލު ދަރިއެއް ބެލުމުގެ ޒިންމާ ބޮލުގައި އަޅުވައިގެން އެ އުޅުނީ… މިއަދު މި ފައިޓް ކުރަނީކީ އަމިއްލަ ނަފްސަކަށް ނޫން.. އެ މަރުވި ބައްޕައަށް…. އެ ބައްޕައަށް ލިބުނު ބޭއިންސާފަށް……” ކިއާރާ އަމިއްލަ އަމިއްލައަށް އެހެން ކިޔަމުން ދިޔައިރުވެސް ކަރުނަތަށް ދެލޮލުން އައުމެއްނުހުއްޓެއެވެ.

ކިއާރާ އޭނާގެ ބައްޕަމަތިން ހަނދާންކޮށްފައި އިތުރަށް ރޮވުނެވެ. އެ ބައްޕަ ކޮށްދިންކަންތަށް ހަނދާންވިއެވެ. “އެލީނާން” އޭ ކިޔައިފައި ލޯބިން ގޮވާލާ ދުވަސްތަށް ހަނދާންވިއެވެ. ފަހުރުވެރިކަމާއި އެކު “އާލިޔާ އަދުނާން… އަދުނާންގެ ހުރި ހަމައެކަނި ދަރިފުޅު” އޭ ބުނާ ދުވަސް ހަނދާންވިއެވެ. ރަނގަޅު ނަތީޖާއެއް ލިބޭއިރު ސްޓޭޖް މަތިން “އާލިޔާ އަދުނާން” ގޮވާލާއިރު އެ ބައްޕަ ކިއާރާއަށް ބަލާލާ ފަހުރުވެރި ނަޒަރުމަތިން ކިއާރާ ހަނދާންވިއެވެ. އެ ގުޅިފައި އިން ނަމަކީ އެއްވެސް އެއްޗެއް ނޫންކަން ކިއާރާ އަށް އިނގުނެވެ. އެ ފަހުރުވެރި ކަމާއި އެކު ދަރިފުޅާ އޭ ގޮވާލާ ބައްޕައަކީ ހިލޭފިރިހެނެކެވެ. ކިއާރާއާއި އެއްވެސް ގުޅުމެއްހުރި މީހެއްނޫނެވެ. ކޮންމެ ހަނދާނެއް އާވާއިރު ދެލޮލުން ކަރުނަ ފައިބަނީ އެޔެއް މިއެއް ބަލާފައެއްނޫނެވެ.

ކިއާރާ ކުއްލިއަކަށް ސިހިފައި ބާލިސް މޫނާއި ދުރަށްލީ މީހަކު އެނދުގައި އިށީނދެލިހެން ހީވެގެންނެވެ. އޭނާއަށް ފެނުނީ އަޔާންއެވެ. ކިއާރާ އަނެއްކާވެސް މޫނު މަތީ ބާލިސް އަޅާލީ އަޔާންއަށް އޭނާ ރޯކަން އަންގަން ބޭނުންނުވާތީއެވެ. “ކިއާ!….ތެދުވެބަ” އަޔާން އެހެން ބުނެފައި ބާލިސް ނަގަންއުޅުނެވެ.. ނަމަވެސް ކިއާރާ އިތުރަށް ބާލިހުގައި ބައްދާލިއެވެ. “ދެން… މައި ބޭބީ ޑޯލް… ކަމޯން ގެޓް އަޕް…” އަޔާން އެހެން ބުނެފައި ކިއާރާގެ އިސްތަށިގަނޑާއި ކުޅުނެވެ.. ކިއާރާ ބާލިސް ދުރަށްލުމަށްފަހު އިށީނދެ އިން އަޔާންގެ ގައިގާ ބައްދާލިއެވެ. އަދި މަޑުން އިނދެ ކަރުނަތަށް އަޔާންގެ ޓީޝާޓަށް ބާލަމުންދިޔައެވެ. އަޔާން ކިއާރާގެ ބޮލުގައި ފިރުމާލަ ފިރުމާލަ އިނެވެ.

“އަދިވެސް ހިތް ނުފުރޭތަ؟” ކިއާރާ ކައިރި އަޔާން އަހާލީ އެތަށްއިރެއްވީއިރުވެސް ރުއިން ހުއްޓައިނުލުމުންނެވެ. ކިއާރާގެ ޖަވާބެއް ނައުމުން އަޔާން ގަދަކަމުން ކިއާރާ ދުރުކުރިއެެވެ. އަދި ރަނގަޅަށް އެ މޫނަށް ބަލައިލިއެވެ. “ބަލާބަލަ…. މިވަރަށް ރޯނެކަމަށް ނޫނޭ ޗާންސް ދިނީކީ…” ކިއާރާގެ ކަރުނަތަށް ފޮހެލަމުން އަޔާން އެހެން ބުންޏެވެ. ކިއާރާ އިސްޖަހާލިއެވެ. ނަމަވެސް އަޔާން އަނެއްކާވެސް ކިއާރާގެ މޫނުގައި ހިފަހައްޓާލަމުން އިސްއުފުލިއެވެ. އަޔާން މަޑު މަޑުން ކިއާރާގެ ނިތުގައި ބޮސްދިނެވެ. “ވާހަކައެއް ބުނަންތަ؟” އަޔާން ބުނެލުމުން ކިއާރާ ބޯޖަހާލިއެވެ. “ޕޮލިހުންނަށް ކިއާ މަންމަގެ ގޭންގް ގެ މައުލޫމާތި ލިބިއްޖެ.. ވަރަށް އަވަހަށް ކޯޓަށް ދާން ޖެހޭނެ..” އަޔާން ބުނީ ކިއާރާ އުފާކޮށްލަންވެގެންނެވެ. “އެއީ މަންމައެއް ނޫން..!” ކިއާރާ ބުންޏެވެ. “އެ މީހާއާއި އެމީހާގެ ފިރިމީހާއާއި ހެދި މުޅި ދިރިއުޅުން ބަރުބާދުވީ…. އުފާކޮށްލަން ހަނދާންކޮށްލާނެ އެންމެ އުފާވެރި ހަނދާނެއްވެސް ނެތް…. އުފާވެރި ހަނދާންތަކުގެ ބަދަލުގައި ސިފަވަނީ އެމީހާ ގަނޑު އެހެން މީހުންގެ ފައިބުނޑަށް އެއް….އެއްލާލާފައި ދާ ތަންތަން… އެމީހާގެ ފިރިމީހާއަށް މި ހަށިގަނ..ހަށިގަނޑު ދޭތަން….އެމީހުން … ގަދަކަމުން….” ކިއާރާ އަވަސް ނޭވާތަކެއް ލަމުންދިޔައެވެ. އިތުރަށް ފުރިހަމަނުކުރެވެނިސް އޭނާއަށް ރޮވުނީއެވެ. އަޔާން ކިއާރާ ގެނެސް މޭގައި ލައްކޮށްލިއެވެ.

ކިއާރާ ގިސްލާންފެށިއެވެ. “އަޔާން!… އެވަރު އަނިޔާވެސް އޯކޭ…. އެކަމް ކީއްވެތަ ބައްޕަ…. އަދުނާން.. އަދުނާންއަށް އެހާ އަނިޔާވެރިވީ.. އޭނާގެ ކުށަކީ ކޮބާތަ.. އެން ވަޓްސް މައި ފޯލްޓް؟ ބައްޕަ އިނގުމުގެ ހައްޤެއް ހަމަ ނެތީތަ.. މި ހުރިހާ ދުވަހު ހަޤީޤީ ބައްޕަކަމަށް ދެކުނު މީހަކީވެސް ހިލޭ ފިރިހެނެއް.. ލޭގެ ގުޅުމެއް އެހެން ގުޅުމެއް އޮތް މީހެއްނޫން…. ކުޑައިރުގެ ކުދި ކުދި އުފާވެރި ކަންތަށް ހަނދާންވާއިރު އެއިން ކޮންމެ ކަމެއްގައި ހުންނަނީ ބައްޕަ…. އެ ބައްޕަ އުފާވެރި ކުރީ އެހާ ހިތި ދިރިއުޅުމެއްވެސް… އެކަމް މިހާރު އެ ދުވަސްތަށް ހަނދާންވީމަ ވާ އުފަލަށްވުރެ ބޮޑަށް ދެރަވަނީ… އެ ބައްޕަ ނުކޮށްދެނީ ކޮންކަމެއް…. އެއްވެސް… އެއްވެސް ރަހުމެއް ހަމަ މަންމަގެ ނެތީތަ… އެ ބައްޕަ މަންމަ ކައިރިން މިނިވަން ވީއިރުވެސް ޖެހުނީ 13 އަހަރު އެ މަންމަގެ ނަހަލާލު ދަރިއެއް ބަލަން… ހަރަދުކުރަން… މަންމަ އަށް ނުދެވޭ ލޯބި ދޭން.. އެވަރުންވެސް އެ ބައްޕަ ޖެހެނީ އާދޭސްކޮށްގެން ބައްދަލުވެސް ކުރަން… ވަގުވަގަށް…  އެ ދުވަހު އަމިއްލައަށް މަރުވިނަމަވެސް…….” ކިއާރާ ގެ ވާހަކަ ހުއްޓުނީ އަޔާން ކުއްލިއަކަށް ކިއާރާ ދުރަށްލާފައި ތުންފަތުގައި އަތް އަޅާލުމުންނެވެ. “ކިއާ! މައި ބޭބީ ޑޯލް…. ހިތް ފުރޭވަރަށް ޝަކުވާކުރަން މި މަޑުން އިންނަނީ ތި ހިތަށް ހަމަޖެހުމެއް ލިބެންދެންނޭ.. މަރުވާ ވާހަކަ ދައްކާކަށްނޫނޭ…” އަޔާން މަޑު މަޑުން ބުންޏެވެ. ކިއާރާގެ އަނގައިން އެ ނިކުންނަ ކޮންމެ ބަހަކުންވެސް އެ ހިތަށް ތަދުވެއެވެ. އިތުރަށް ކިއާރާގެ ގައިގާ ބައްދާލެވެއެވެ. ކިއާރާއާއި އެއްވަރަށް އޭނާވެސް އިނީ ދެރަވެފައެވެ. ކިއާރާއަށް ވާނެވަރު އޭނާއަށް އިހްސާސްކުރެވެއެވެ.

“މަރުވާ ވާހަކައެއްނު ދެއްކޭނީ.. އަޔާން… އޭރު އެ އުމުރުގައި.. ކިތަށްފަހަރު ކިތަށް ދުވަހު އެތަށްމަރަކުން މަރުވީ… އެކަކަށްވެސް ނޭނގޭނެ.. ހިތަށް އެރި ހަމަ އެއްކޮށް މި ދުނިޔެއިންވެސް ސަލާމަތްވާންވީއޭ…..” ކިއާރާ އަޔާންގެ އަތް ދުރަށްލަމުން ތުންފަތުގައި ދަތްއަޅާލާފައި ބުންޏެވެ. ” ކިހިނެއް ދިރިއުޅޭނީ.. ދިރިއުޅުމުގެ ކޮންމެ ހިސާބެއްގައިވެސް އެ މަންމަ މަތިން ހަނދާންވާނެ.. މި ހިތި ތެދުމަތިން ހަނދާންވާނެ…. އަދުނާން… އާލިޔަ އަދުނާން އޭ ބުނާއިރު އެ ހިލޭ ފިރިހެނެއްކަން އިނގުނީމަ އަދި އިތުރަށް ދެރަވާނެ…. މަންމަ މިއަދު ހީވަނީ އެއްފަހަރާ ހުރިހާ މަރަކުން މަރާލިހެން… ހިތަށް އަރާ މިހާރުވެސް މަރުވާންވ………” ކިއާރާ ވާހަކަ އަނެއްކާވެސް ހުއްޓުނީ އަޔާން ކިއާރާގެ މޫނުމަތީ ހިފަހައްޓާލާފައި ކިއާރާގެ ތުންފަތަށް ބޮސްދިނުމާއި އެކުއެވެ. ކިއާރާގެ ކަރުނައިން ފުރިފައިވާ ލޯ މަރާލެވުނެވެ. އަދި އަޔާންގެ ގައިގާ އިތުރަށް ބައްދާލެވުނެވެ. ކިއާރާ ގެ ހިތުގައި އަޔާން ބޭސްއަޅައިދިންފަދައެވެ. ދުވަހަކުވެސް ލިބިފައި ނުވާ ހިތްހަމަޖެހުމެއް އެވަގުތު ކިއާރާއަށް ލިބެމުންދިޔައެވެ.

އިރުކޮޅަކަށް ދެމިގެންދިޔަ އެ ހިނދުކޮޅު މެދުކަނޑާލަމުން އަޔާން ކިއާރާ އާއި ދުރަށް ޖެހުނެވެ.. “ދެން ނުދައްކާތި މަރުވާވާހަކަ… ޕްލީސް… އޭންޖަލް…. ޔޫ އާރ މައި ލައިފް… އެން އިތުރަށް މައި ޑޯލް ގެއްލޭކަހަލަ ދުވަހެއް ދެކޭކަށް ބޭނުމެއްނޫން… ކުރިންވެސް ގެއްލުނީމަ އިނގޭ ވީ ވަރު… ސޯ ޕްލީސް… އިނގޭ..!” އަޔާން ބުނެލީ ކިއާރާގެ ދެލޮލާއި އޭނާގެ ދެލޯ ސީދާކޮށްލަމުންނެވެ. ކިއާރާ ލޯ މަރާލަމުން އާއެކޭ ބުންޏެވެ.

“ކައިފިންތަ؟” އަޔާން އެހިއެވެ.. ކިއާރާ ދެކޮޅަށް ބޯ ހަރަކާތްކޮށްލީ ނޫނެކޭ ބުނެފައެވެ. “ހިނގާ ކާން ދޯ..” ކިއާރާ ދެންވެސް ދެކޮޅަށް ބޯ ހަރަކާތްކޮށްލީއެވެ. “ނުކައި ނުވާނެ އިނގޭ އިންނާކަށް.. އެބަ އަންނަން ހިފައިގެން ކާ އެއްޗެއް… އޯކޭ…” އަޔާން ބުނެފައި ނުތެދުވަނިސް ކިއާރާ އޭނާ ހިފެހެއްޓިއެވެ. އަދި އޭނާއާއި އެއްވަރަށް އެނދުން ފޭބިއެވެ.. “ހިނގާ ދާން..” އެހެން ބުނެފައި ކިއާރާ ހިނގައިގަތީ ބޮލުގައި ޖަހާފައި ހުރި ދަތިތަށް ނައްޓުވާލަމުންނެވެ. ރީތިގޮތަކަށް އިސްތަށިތަށް ކިއާރާގެ ލޯމަތި ފޮރުވާލިއެވެ. “އުނދަގޫވާނޭނު…” އަޔާން ބުންޏެވެ. “ޑޭޑް އަށް ދައްކާކަށް ބޭނުމެއްނުވޭ ރޮއެފާ ކަމެއް..” ކިއާރާ އެހެން ބުނެފައި ދޮރު ހުޅުވިއެވެ. އަޔާން އާއި އެކު ތިރިއަށް ގޮސް ކިއާރާ ރަނގަޅަށް ކެއެވެ. ސިޓިންގް ރޫމްގައި އިން ފަތުހީއަށް އެ މަންޒަރު ފެނި ހިނިތުންވެވުނީ އަޔާން ކިއާރާ އަށް އަޅާލާވަރުންނެވެ.

……………

ކައި ނިންމާފައި ކިއާރާ އާއި އަޔާން އަނެއްކާވެސް ދިޔައީ ކޮޓަރިއަށެވެ. ކިއާރާ ހިތްހަމަޖެއްސުމަށްޓަކައި އަޔާން އެކި އެކި ވާހަކަތަށް ދައްކަންފެށިއެވެ. “ކޮންއިރަކުން ދެން މެރީ ކުރާނީ….؟” އަޔާން އެހިއެވެ.. “ހާދަ އަވަހަކަށް…” ކިއާރާ ބުނެލީ އެއްލޯމަރާލާފައެވެ. “ލަސްކުރުމުގެ ބޭނުމަކީ ކޮބާ؟ މިހާރުވެސް އެންމެން އުޅެނީ ކިއާ ގެއަށް ނުގެނެސްގެން…. މި ކަންތަށްގަނޑު ނިންމާލުމަށްފަހު އެކަމާ ދޯ އުޅޭނީ…” އަޔާން ކިއާރާގެ ރަތްވަމުންދިޔަ މޫނަށް ބަލަން އިނދެ ބުންޏެވެ.. ކިއާރާ އެއްޗެއް ނުބުނެ ހޭންފެށިއެވެ. ދެމީހުންވެސް ސިހުނީ ކުއްލިއަކަށް ދޮރުގައި ޓަކި ޖެހުމުންނެވެ. ކިއާރާ މަޑު މަޑުން ގޮސް ދޮރު ހުޅުވިއިރު ކުރިމަތީ ހުރީ ޒާއިން އާއި މައިޝާ އެވެ. ކިއާރާ ފުޅާ ހިނިތުންވުމަކާއި އެކު ދޮރު ބޮޑަށް ހުޅުވާލީ އެމީހުން ވެއްދުމުގެ ބޭނުމުގައެވެ.

ޒާއިން ވަންނަމުން ކިއާރާއަށް އޭނާ ގެނެސްދިން ގެލެކްސީ ޗޮކްލެޓް ދިނެވެ. “ތެންކިޔޫ..” ކިއާރާ އެހެން ބުނެފައި އައިސް އެނދުމަތީ އިށީނދެލީ މައިޝާއާއި ދާދި ކައިރީގައެވެ. “ދެން ސަރ ހޯދަންވިއްޔާ އަންނަން ޖެހޭނީ މިތަނަށް ދޯ.. އެހެންތާކުން ނުވެސް ފެނޭ…. އަބަދު މިތާ…” މައިޝާ މަޖާ ރާގަކަށް އެހެން ބުނުމާއި އެކު ކިއާރާ އޭނާގެ އަތުގައި ޖެހިއެވެ.. “ސަރ ނުކިޔާށޭ މައި ކައިރި ބުނީމެއްނު… އަޔާން ކިޔަސް އޯކޭ އޭ…” އަޔާން އެހެން ބުނެލުމުން މައިޝާ ހޭންފެށިއެވެ.

“މައި ވާހަކައެއް ބުނަންތަ..؟” ކިއާރާ މައިޝާގެ އަތުގައި ހިފަހައްޓާލާފައި ބުންޏެވެ.. އެވަގުތު ޒާއިންއާއި އަޔާން ސޯފާގައި އިށީނެވެ.. “އަދުނާން…. އެއީ އަސްލު ބައްޕައެއް ނޫން..” ކިއާރާ މައިޝާގެ މޫނަށް ބަލަން އިނދެ އެހެން ބުނެލުމާއި އެކު މައިޝާ ގެ އަނގަ ހުޅުވި ދެލޯ ބޮޑުވިއެވެ. މަޑުމަޑުން ކިއާރާގެ އަތުން އޭނާގެ އަތް ނައްޓުވާލާ އަނގަމަތީ އަތް އެޅިއެވެ.. “ތިބުނީ…… ދެން ކާކު އެއީ؟ އެން ކާކު ބުނީ؟” މައިޝާ ސިހިފައި އެހިއެވެ. “އެ މީހާ ބުނީ… ސައީދާ… އެން އޭނާއަށްވެސް ނޭނގެޔޯ މީ ކާކު ދަރިއެއް ކަމެއް… ހޫ ކެއަރސް…. މިހާރު އެމީހާގެ ބަދަލަށް އެ އުޅެނީ މަންމައެއްވެސް ލިބެން… ހެޔޮ ހަޤީޤީ ބައްޕަ ނޭނގުނަސް… ބޭނުމެއް ނޫން ހޯދަންވެސް… ބައްޕައެއް އެބަހުރި…” ކިއާރާ ތުން އަނބުރާލާފައި އެހެން ބުންޏެވެ.. ނަމަވެސް އޭނާ ހަޤީޤަތުގައި އިނީ ދެރަވެފައެވެ. ކޮންމެޔަކަސް މަންމަ ވާނީ މަންމައަކަށް ނޫންހެއްޔެވެ؟

“އަޔާން…! އެމީހުން ހައްޔަރުކޮށްފި…. ތަހުޤީޤު އަދިވެސް ކުރިއަށް އޮތީ.. ކޯޓަށް ހާޒިރުވާން އަންގާނެ…..” ޒާއިން ކިއާރާ އާއި ދިމާ ބަލައިލަމުން ބުނެލީ އެމީހުންނަށް ނީވޭވަރަށެވެ. “އެ އިން އެންމެ މީހަކަށްވެސް ކުޑަ އަދަބެއް ލިބިގެން ނުވާނެ.. ހާއްސަކޮށް އެ ކިއާގެ މަންމައޭ ކިޔާ މީހާއާއި އެމީހާގެ ފިރިމީހާ.. މިހާރުވެސް މެރުން އެއީ ހުއްދަކަމެއްނަމަ އެމީހުން މަރާލިސް….. މި ކިއާގެ މަންމައޭ މި ކިޔާ މީހަކީ ވަރަށް ނުބައި މީހެއް…. އިނގޭތަ ޒާއިން އަށް…” އަޔާން އެހެން ބުނެފައި ކުޑަކޮށް ހުއްޓުނެވެ.. އަދި ގޮށްމުއްކަވާލީ އައިއްސާހުރި ރުޅި ކޮންޓްރޯލްވޭތޯއެވެ. “އެމީހާ މިއަދު ބުންޏޯ ކިއާރާ އަކީ ނަހަލާލު ކުއްޖެކޭ… އަދުނާން.. މި ބުނީ ކިއާރާގެ އަސްލު ބައްޕަ ކަމަށް ހީކޮށްގެން އުޅުނު މީހާ އަކީ އޭނާ ބައްޕައެއް ނޫނޯ.. އެ އަންހެނާއަށްވެސް ނޭނގެ ކިއާރާ އެއީ ކާކު ކުއްޖެއް ކަމެއް… ކިއާ އެހެންވެ އެ އިންނަނީ…. މިއަދު އަދުނާންއަކީ އެއްވެސް މީހެއް ނޫންކަން އިނގުނީމަ ހަޤީޤަތުގައި ދެރަވާނެ.. ހައިރާންވޭ އެމީހާ ކަހަލަ މީހަކަށް ކިއާ ކަހަލަ ހެޔޮ އަހްލާގް ރަނގަޅު ކުއްޖެއް ލިބުނީތީވެސް…”އަޔާން އެހެން ބުނުމާއި އެކު ޒާއިންއަށްވެސް ވީ މައިޝާއަށް ވީވަރެވެ، “ތި މީހަކު ސައިޒް ކޮށްލަންޖެހޭނެ…. މިއަދު ދާންވީ ސްޓޭޝަންއަށް….މިކަން ވާނެގޮތް ބަލާލަންވެސް ޖެހޭނެއެއްނު..” ޒާއިން އެހެން ބުނެލީ ރުޅިއައިއްސައެވެ. މައިޝާ ކައިރި އިން ކިއާރާއަށް ޒާއިން ބަލައިލީ ހަމްދަރުދީއިން ފުރިގެންވާ ބެލުމަކުންނެވެ.