ފޭދޭ ކުލަތައް-3

އެރޭ ކޮފީ ނިންމާލާފައި ގެއަށް ދިޔަ މަގުމަތީގައި، ޒައިދާން އީލާއާ މާ ގިނަ ވާހަކައެއް ނުދައްކައެވެ. އީލާ ދައްކަމުން ދިޔަ ކައިވެނީގެ ވާހަކަތަކަށް އޭނާއަށް ދެވުނީ ފަރުވާކުޑަ ޖަވާބުތަކެކެވެ. ޒައިދާންގެ މުޅި ސިކުނޑީގައި އެނބުރެމުންދިޔައީ ރެސްޓޯރެންޓް ތެރޭގައި ޝައުރާއާއި ދާއިން އެކަކު އަނެކަކަށް ބަލާލި ލޯބިވެތި ނަޒަރެވެ. އަމިއްލައަށް އެހެން ކުއްޖަކާ އިންނަން ތައްޔާރުވަމުންދާއިރުވެސް، ޝައުރާ އެހެން ފިރިހެނެއްގެ ހައްގަކަށް ވާން އުޅޭކަމުގެ ޚިޔާލުން ޒައިދާންގެ ހިތް މިހާ ބޮޑަށް ނުތަނަވަސްވަނީ ކީއްވެ ހެއްޔެވެ؟ އެއީ ހަމައެކަނި އެކުވެރިކަމުގެ ހަސަދައެއް ހެއްޔެވެ؟ ނުވަތަ އޭނާއަށްވެސް ނޭނގި ޝައުރާދެކެ ލޯބިވެވިފައި އޮތީ ހެއްޔެވެ؟

3 ވަނަ ބައި…

ޖެހިގެން އައި ދުވަހުގެ ހެނދުނެވެ. ޝައުރާ އޮފީހަށް އައިސް އޭނާގެ މޭޒުކައިރީގައި އިށީނދެ ހަމަޖެހިލިތަނާހެން، އޭނާގެ ފޯނު ވައިބްރޭޓްވާން ފެށިއެވެ. ސްކްރީނަށް އަރާފައި އިން ނަން ފެނުމުން ޝައުރާގެ ހިތް މޭތެރޭގައި ތެޅެލިއެވެ. އެއީ ޒައިދާންއެވެ. އާދައިގެ މަތިން ހެނދުނު ގުޅާ ގަޑިއަށްވުރެ މާ އަވަހަށް އޭނާ އެ ގުޅީ ކީއްވެގެންކަން ޝައުރާއަށް ވަގުތުން ވިސްނުނެވެ. އިއްޔެގެ ކޮފީއަށްފަހު ޒައިދާން ހުރީ ހަމަޖެހިގެން ނޫންކަން ޝައުރާއަށް އޮތީ އިހުސާސް ކުރެވިފައެވެ.

“ހެލޯ، ޒައި…” ޝައުރާ ފޯނު ނަގަމުން މަޑުމަޑުން ބުންޏެވެ.

“ޝައު، ކޮންތާކު؟ އޮފީހުގަތަ؟” ޒައިދާންގެ އަޑުގައި ހުރީ އާދަޔާ ޚިލާފު އަވަސްކަމާއި ހާސްކަމެކެވެ. “އަހަރެން މިހުރީ ޝައުމެން އޮފީސް އިމާރާތުގެ ތިރީގައި ހުރި ކެފޭގަ. ވަރަށް މުހިންމު ވާހަކައެއް އެބައޮތް ދައްކަންވެފަ. ކުޑަ އިރުކޮޅަކަށް ތިރިއަށް ފައިބާލަދީފާނަންތަ؟”

ޝައުރާ އިރުކޮޅަކު ލަސްކޮށްލިއެވެ. އޭނާގެ ހިތް ބުނަމުންދިޔައީ އެތަނަށް ގޮސްފިނަމަ ކުރިމަތިލާންޖެހޭނީ އުނދަގޫ ސުވާލުތަކަކާ ކަމަށެވެ. ނަމަވެސް އިންކާރު ކުރާނެ ބަހަނާއެއް ނެތުމުން އެއްބަސްވިއެވެ. “އެންމެ ރަނގަޅު، މިދަނީ،” ޝައުރާ ފޯނު ބޭއްވުމަށްފަހު، ތިރިއަށް ދިއުމަށް ހިނގައިގަތެވެ.

ކެފޭގެ އެންމެ އެތެރޭގައި، މީހުންނަށް ނުފެންނާނެހެން ހުރި މޭޒެއްގެ ދޮށުގައި ޒައިދާން އިނީ މޫނުމަތިން ނުތަނަވަސްކަން ފާޅުވާ ހާލުގައެވެ. ކުރިމަތީގައި ހުރި ކޮފީތަށީގައި އޭނާ އަތްވެސް ނުލައެވެ. ޝައުރާ ގޮސް ކުރިމަތީގައި އިން ގޮނޑީގައި އިށީނުމާއެކު، ޒައިދާން ސީދާ ޝައުރާގެ ދެލޮލަށް ބަލާލިއެވެ. އޭނާގެ ލޮލުން ފެންނަމުންދިޔައީ ނުރުހުމާއި ހައިރާންކަމެވެ.

ޒައި… ކިހިނެއްވީ؟ ޝައުރާ އާދައިގެ ގޮތަކަށް އަހާލަން މަސައްކަތް ކުރިއެވެ.

“ޝައު! އަހަރެން ބޭނުމީ ތެދަށް ބުނަން. ދާއިންއާއި ޝައުރާއާ ދެމެދު ތިއޮތީ ކޮން ކަހަލަ ގުޅުމެއް؟” ޒައިދާންގެ އަޑުން ފާޅުކަން ބޮޑު ގޮތެއްގައި ރުޅިވެރިކަމާއި ހަސަދަވެރިކަން ފާޅުވިއެވެ. “އަހަރެންނަށް އެނގޭ ދާއިންއަކީ ޝައުމެންގެ ސީނިއަރ މެނޭޖަރުކަން. އެކަމަކު އިއްޔެ އޭނާ ޝައުރާއާ އެހާ ގާތްކޮށް އުޅޭތަން ފެނުމުން އަހަރެންނަށް ކެތެއް ނުވޭ. ޝައުރާ އޭނާދެކެ ހަމަ އަސްލަށްވެސް ލޯބިވޭތަ؟ ނޫނީ އެއީ ކުއްލިއަކަށް ދެއްކުންތެރިކަމެއްތަ؟”

“ޒައިދާން!” ޝައުރާގެ އަޑަށް ހަރުކަން އައެވެ. އޭނާގެ ހިތުގައި ރިއްސަމުންދިޔަ ނަމަވެސް، އޭނާގެ ދިފާއުގައި ތެދުވިއެވެ. “މިއީ އަހަރެންގެ އަމިއްލަ ދިރިއުޅުން. އަހަރެން ކާކާކަން ޑޭޓްކުރާނީ، ކާކުދެކެކަން ލޯބިވާނީ އެއީ އަހަރެން ނިންމާނެ ކަމެއް. ޒައިދާން އަމިއްލައަށް އީލާއާ އިނދެގެން އާ ދިރިއުޅުމެއް ފަށަން އުޅޭއިރު، އަހަރެންގެ ހަޔާތަށް މީހަކު އައުމުން ތިވަރަށް ރުޅިއަންނަންވީ ކީއްވެ؟ އަހަރެން ޒައިދާންއަށް ހުރިހާ ކަމެއް ކިޔައިދޭންޖެހޭތަ؟”

“އެއީ… އެއީ…” ޒައިދާންއަށް ބުނާނެ އެއްޗެއް ނޭނގުނެވެ. އޭނާގެ ހިތް ތެޅެމުންދިޔައީ ބާރަށެވެ. “އެއީ ޝައުރާއަކީ އަހަރެންގެ އެންމެ ގާތް އެކުވެރިޔާވީމާ. އަހަރެން ބޭނުމެއް ނޫން ޝައުރާއަށް ދެރައެއް ލިބޭކަށް. ދާއިންއަކީ ޝައުރާއަށް އެންމެ އެކަށީގެންވާ މީހާހެން އަހަރެންނަކަށް ހިއެއް ނުވޭ! އޭނާ އުޅޭ ގޮތް މަށަކަށް ކަމަކުނުދޭ.”

“އެއީ ޒައިދާން ނިންމަންޖެހޭ ކަމެއް ނޫން،” ޝައުރާ ކުއްލިއަކަށް ތެދުވިއެވެ. އޭނާގެ ހިތަށް ވަމުންދިޔަ ތަދާއެކުވެސް، އޭނާގެ ސިއްރު ފަޅާއަރައިފާނެތީ އެތަނުން ދާން ބޭނުންވިއެވެ. “އަހަރެންގެ މަސައްކަތް ފަށާ ގަޑި ޖެހެނީ. އަހަރެން ދަނީ.”

ޝައުރާ ހަލުވި ފިޔަވަޅުތަކެއްގައި ކެފޭއިން ނިކުމެގެން އޮފީހަށް ވަނެވެ. އޮފީހުގެ ލިފްޓަށް އެރި ތަނާހެން އޭނާގެ ލޮލުން ކަރުނަ ފާއްދާލިއެވެ. އޮފީހުގެ ކޮރިޑޯއިން ދަނިކޮށް، ކުރިމަތިން އައި ދާއިންއާ ދިމާވިއެވެ. ޝައުރާގެ ރަތްވެފައިވާ ދެލޮލާއި، މޫނުމަތިން ފެނުނު އަސަރުތަކުން ދާއިންއަށް ހުރިހާ ކަމެއް ވިސްނުނެވެ.

“ޝައުރާ… އަހަރެންގެ ކެބިންއަށް އާދެބަލަ،” ދާއިން މަޑުމައިތިރިކަމާއެކު ބުންޏެވެ.

ކެބިންއަށް ވަދެ ދޮރު ލެއްޕުމާއެކު، ޝައުރާއަށް ރޮއެގަނެވުނެވެ. އޭނާ މޫނުގައި ދެއަތް އަޅައިގެން އިނދެ ގިސްލަމުން ދިޔައެވެ. ދާއިން ވަގުތުން ޝައުރާގެ ގާތަށް އައިސް، އޭނާގެ ކޮނޑުގައި ހިފާލަމުން ގޮނޑީގައި އިށީންނަން އެހީވިއެވެ. އަދި މޭޒުމަތީގައި ހުރި ފެންތަށި ދިއްކޮށްލިއެވެ.

“ޒައިދާން ދިމާކުރީތަ؟” ދާއިން ހާސްވެފައި އަހާލިއެވެ.

“އާނ… އޭނާ އައިސް އަހަރެމެންގެ ގުޅުމާ ބެހޭގޮތުން ސުވާލުކުރީ. އޭނާ ހުރީ ވަރަށް ރުޅިއައިސްފަ،” ޝައުރާ ފެންފޮދެއް ބޯލަމުން ބުންޏެވެ. “އަހަރެންނަށް ނޭނގެ ދެން ހަދާނެ ގޮތެއް. އޭނާގެ ކުރިމަތީގައި އިތުރަށް އެކްޓް ކުރާނެ ހިތްވަރެއް ދެން އަހަރެންގެ ނެތް. އަހަރެންގެ ހިތް ކުދިކުދިވަނީ.”

ދާއިން ޝައުރާގެ މޫނަށް ބަލަހައްޓައިގެން އިނެވެ. އޭނާގެ ހިތުގައި ޝައުރާއަށްޓަކައި އޮތް ކެތްތެރިކަން ކޮޅުންލަމުން ދިޔައެވެ. ޝައުރާ އެހެން ފިރިހެނަކަށްޓަކައި މިހާ ދެރަވާތަން ބަލަން ހުރުން ދާއިންއަށްވީ ބޮޑު އިމްތިހާނަކަށެވެ.

“ޝައުރާ… ޒައިދާން އެހާ ބޮޑަށް ހާސްވެ، ރުޅިއަންނަނީ ކީއްވެގެންކަން އެނގޭތަ؟ އޭނާއަށް ޝައުރާ ގެއްލެން އުޅޭކަމުގެ އިހުސާސްވީމާ. އެކަމަކު…” ދާއިން ކުޑަކޮށް މަޑުކޮށްލުމަށްފަހު، ޝައުރާގެ ދެއަތުގައި ވަރަށް ބާރަށް ހިފާލިއެވެ. “އެކަމަކު ޝައުރާގެ ކަރުނަތައް ފޮހެދީ، ޝައުރާ އުފަލުގައި ބަހައްޓަން ބޭނުންވެފައި ހުރި އެހެން މީހަކު މިތާ، ޝައުރާގެ ހަމަ ކުރިމަތީގައި އެބަހުރިކަން ޝައުރާއަށް އިހުސާސް ނުވަނީ ކީއްވެ؟”

ޝައުރާ ގިސްލުން ހުއްޓާލަމުން، ސިހިފައި ދާއިންގެ މޫނަށް ބަލާލިއެވެ. ދާއިންގެ ދެލޮލުން ފެންނަމުންދިޔައީ ހަމައެކަނި އެހީތެރިކަމެއް ނޫނެވެ. އެއީ ފުން، ތެދުވެރި އަދި ސާފު ލޯތްބެކެވެ.

“ދާއިން… ތިއީ… ތިއީ ކޮން ވާހަކައެއް؟” ޝައުރާގެ އަޑު ބެދުނެވެ.

“އަހަރެން ޝައުރާދެކެ ލޯބިވޭ. މި ފޭކް ރިލޭޝަންޝިޕް ފެށުމުގެ މާ ކުރިންވެސް އަހަރެން ޝައުރާދެކެ ލޯބިވޭ. އޮފީހަށް ޝައުރާ އަންނަ ފުރަތަމަ ދުވަހުން ފެށިގެން އަހަރެންގެ ހިތް ވަނީ ޝައުރާއަށް ދެވިފައި. އަހަރެން ބޭނުމީ ޝައުރާގެ ހަގީގީ ބައިވެރިޔާއަށް ވާން. ޝައުރާގެ ހިތް ހަލާކުވިޔަނުދީ ހިމާޔަތްކުރަން،” ދާއިން އޭނާގެ ހިތުގެ ސިއްރު އެންމެ ފަހުން ހާމަކުރިއެވެ.

ޝައުރާގެ މުޅި ދުނިޔެ އެ ފިނި ކެބިން ތެރޭގައި އެނބުރިގަތް ކަހަލައެވެ. އެއްފަރާތުން އޭނާގ ފަސް އަހަރުވީ ލޯބި ޒައިދާން، ޝައުރާގެ އާ ގުޅުމުގެ ސަބަބުން ހަސަދަވެރިވެ، ދެރަވަމުން ދަނީއެވެ. އަނެއްފަރާތުން، އޭނާގެ ހިތްހަލާކުވެފައިވާ ވަގުތު، އޭނާއަށް ހިމާޔަތްދީ ހިތްވަރުދިން ދާއިން، އޭނާދެކެ ހަގީގީ ލޯބިވާކަން މި ހާމަކުރީއެވެ. ޝައުރާ އިނީ ދެކަފި މަގެއްގެ މެދުގައި ބާކީވެފައެވެ.

ނުނިމޭ!

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.