ޔާރު މިވަނީ ލޯތްބޭ ޙަޤީގީ 41 (އެކާޅީސްވަނަ ބައި)

ޔަލްވީމެންގެއަށް އާދެވުމުން މިޝްޔާ ހިނގައިގަތީ، އެތެރެއަށް ވަންނާށެވެ. އޭނާ އަންނަންދެން ސައިކަލް ކައިރީގައި ރާހިލް މަޑުކޮށްލައިގެން ހުއްޓެވެ. މިޝްޔާއަށް ގެއަށް ނުވަދެވި އުޅެނިކޮށް ހަޅޭލަވައިގަންނަމުން އައިކޮޅަށް ދުއްވައިގަތީ، ފާރުމަތީގައި އިން ބުޅާ ހޭރިގެންފައި، އޭނާގެ ކުރިމައްޗަށް ފުންމައިލުމުންނެވެ.

______________________________________

އެ އައި ގޮތަށް އައިސް މިޝްޔާ، ރާހިލްގެ ފުރަގަހަށްވަދެ، އޭނާގެ ޓީޝާޓުގައި ހިފަހައްޓައިގެންހުރެ ބޯދިއްކޮށްލީ އެ ބުޅާ ކޮބައިތޯއެވެ. މިޝްޔާ ހަޅޭއްލަވައިގަތްލެއް ބާރުކަމުން، އެ ބުޅާވެސް ބިރުން ގޮސް ޖެހިގެން ހުރި ގޯޅިއަށް ވަނެވެ. މިޝްޔާއަށް ހުރެވުނުގޮތްވެސް ވިސްނާލެވުނީ ދެނެވެ. އޭރު ރާހިލްވެސް ހުރީ އެއްއަރިއަކުން އޭނާއަށް ބަލަހައްޓައިގެންނެވެ. އަވަސް ޙަރަކާތަކާއިއެކު ރާހިލްގެ ޓީޝާޓުން، މިޝްޔާ ދޫކޮށްލީ އެހެންވެއެވެ. އޭނާ ރާހިލާއި ދުރުވެލަމުން ޝޯލް ރަނގަޅުކޮށްލީ، ކަންތައް ކުރެވުނު ގޮތުން ހާސްވީވަރުންނެވެ. އިރުކޮޅަކު، ހިމޭނުން ހުރެފައި އޭނާ އަނެއްކާވެސް ގެއަށް ވަންނަން ދިޔައެވެ.

ބޭސްކޮތަޅު ހިފައިގެން މިޝްޔާ ނުކުތްއިރު، ރާހިލް ހުރީ ޔަލްވީމެންގޭ ފާރުގައި އެއްފައި ވިއްދާލައިގެންނެވެ. ދެ އަތް ޖީންސްގެ ޖީބަށް ޖަހާލައިގެން ހުރިއިރު، ހީވަނީ މޮޑެލްކުރަން ހުއްޓިލައިގެން ހުރިހެންނެވެ. އެ މަންޒަރުން މިޝްޔާގެ ހިތަށް ގޮތްތަކެއްވީނަމަވެސް، މީހާ ހަމަޖެހިލަމުން އައިސް ސައިކަލް ކައިރީގައި މަޑުކޮށްލިއެވެ. އިތުރަށް ރާހިލާއި ދިމާއަށް ބަލަން ނުކެރުނީ އޭނާގެ ހިތް ބޭޒާރުވެދާނެކަމުގެ ބިރު އޮތީތީއެވެ. މިޝްޔާ އެ ގޮތަށް ދުރުބަލަހައްޓައިގެން، އަނގައިން ނުބުނެ ހުރުމުން ރާހިލަށް މާނަ ނެގުނީ ގޯސްކޮށެވެ. އޭނާއަށް ހީވީ އޭނާއާއި ވާހަކަދައްކަން ބޭނުން ނުވާތީ “ދާން ހިނގާށޭ” ބުނެލަންވެސް މިޝްޔާ ބޭނުން ނުވީ ކަމުގައެވެ. އަންނަމުންވެސް ޔަލްވީގާތުގައި މިޝްޔާދެއްކި ބަހަނާތަކުން، އޭނާއަށް މާނަ ނެގުނީ މިޝްޔާ، އޭނާއާއިއެކު އަންނަން ބޭނުން ނުވާކަމުގައެވެ. އޭނާއާއި އެހާ ދުރުން މިޝްޔާ އުޅޭތީ ރާހިލްގެ ހިތުގައި ޖެހުނެވެ. އެހެނަސް، އެކަން މޫނުމަތިން ނުދައްކަން އޭނާ މަސައްކަތް ކުރަމުންދިޔައެވެ.

********************

ބޭރުން ގެއަށް ވަދެގެން އައި މިޝަލަށް އޭނާގެ ކޮޓަރިއާއި ދިމާއަށް ދެވުނީ ކޮޓަރި ތެރެއިން އެއްޗެއް ވެއްޓުނު އަޑު އިވުމުންނެވެ. ކޮޓަރީގެ ދޮރު ހުޅުވާލުމާއިއެކު، ފެނުނު މަންޒަރުން، އޭނާގެ ދެ ލޯ ދިޔައީ ބޮޑުވެގެންނެވެ. ރީތިވާ މޭޒުދޮށުގައި އުޑުފައިން އިށީނދެލައިގެން އިން ޝިއުރީއަށްވެސް ކޮޓަރިއަށް ވަން މިޝަލް ފެނުމާއިއެކު، ދެ ލޯ ބޮޑުކޮށްލަމުން ކޮޅަށް ތެދުވިއެވެ. އެކަހަލަ ގޮތަކަށް އޭނާ އެ ކޮޓަރީގައި ހުއްޓާ، މިޝަލަށް ފެނުމުން ޝިއުރީ ހާސްވިއެވެ.

“އަހަރެންގެ ކޮޓަރީގައި ކީއްކުރަނީ…..؟؟؟؟” ކޮޓަރީގެ ދޮރު ލައްޕާލުމަށްފަހު، ދެ ލޯ ހަނިކޮށްލަމުން މިޝަލް  އަހައިލިއެވެ. މިޝަލްގެ މި ޢަމަލުން ޝިއުރީގެ އަޅިކުލައިގެ ދެ ލޯ އިތުރަށް ބޮޑުކޮށްލެވުނެވެ.

“ކީއްވެ ދޮރު ލެއްޕީ ތި…..” މިޝަލްގެ ސުވާލަށް ޖަވާބުދިނުމުގެ ބަދަލުގައި ޝިއުރީއަށް އަހައިލެވުނީ، ޖެހިލުންވެފައި ހުރެއެވެ. އޭނާގެ އަޑުންވެސް ހާސްވެފައިހުރިކަން އެނގުމުން، މިޝަލަށް މަޖާވިއެވެ.

“ކިހިނެއްވީ….؟؟؟؟ މީ އަހަރެންގެ ކޮޓަރި…. އަހަރެން ބޭނުން ވަގުތަކު ދޮރު ހުޅުވާފަ ލެއްޕުމުގެ އިޚްތިޔާރު އަހަންނަށް އޮންނާނެ….. އަހަރެންގެ ކޮޓަރީގައި ޝިއު ކީއްކުރަނީހޭ……” ޝިއުރީއާއި ދިމާއަށް ހިނގައިގަން މިޝަލަށް، ތަށިމުށިތަކާއި ދިމާއަށް ނަޒަރު ހިންގާލެވުނީ، ހާސްވެފައި ހުރި ޝިއުރީ އެ ދިމާއަށް ބަލައިލުމުންނެވެ. ފެނުނު މަންޒަރުން އޭނާގެ ފިޔަވަޅުތައް ހުއްޓުނުއިރު، ދެ ލޯ ބޮޑުކޮށްލަމުން ޝިއުރީއާއި ދިމާއަށް ބަލައިލެވުނެވެ.

“މިހާރު އަހަރެންގެ އެއްޗެހިވެސް ހަލާކު ކުރަންފެށީތަ….؟؟؟؟؟؟” މީ ކޮންކަމެއް…..؟؟؟؟؟” ތަށިމުށިތައްމަތީ ވިއްސައިގެން ގޮސްފައިވާ ޖެލްތަކަށާއި ޖެލްދަޅަށް އިޝާރާތްކޮށްލަމުން މިޝަލް އަހައިލިއެވެ.

“ހަލާކެއް ނުކުރަން….. އަހަރެން އުޅުނީ ފޯނު ޗާޖަށް ޖަހަން….. މިޝްގެ ޗާޖަރު ނުފެނިގެން އޭނައަށް ގުޅީމަ ބުނީ މި ކޮޓަރީގައޭ ވާނީ….. އެހެންވެ، މި ކޮޓަރިއަށް އައީ…. ނުކުންނަން ދަނިކޮށް އަތުން ޖެހިފައި ޖެލްދަޅު ވެއްޓުނީ….. އަހަރެން ގަސްތަކު ނޫން ވައްޓާލީ….. އެހެން ނޫނަސް އެއްޗެހި މަތިޖަހާފަ ތަރުތީބުން ބަހައްޓަންޏާ މިހެންނެއް ނުވާނެ ދޯ…..” އަމިއްލަ ދިފާޢުގައި ވާހަކަދައްކަމުން، ޝިއުރީ ކުށްވެރިކުރީ މިޝަލެވެ.

“ހަމަ ގައިމުވެސް، މަތި ނުޖަހައެއް އަހަންނެއް ނުބަހައްޓަން…. މިރޭވެސް ނުކުތީ މަތިޖަހާފަ….. ވަރަށް ރަނގަޅަށް އަހަރެން ހަނދާން އެބަހުރި….. މިތަނަށް ވަދެފަ ޝިއު ބޮލުގަ ޖެލްލީ ދޯ……” އެއީ އިޔާޒްގެ ކަމެއްކަން މިޝަލަށް އެނގުނުނަމަވެސް، ޝިއުރީ ރުޅިއަރުވާލުމަށްޓަކައި، ބުނެލިއެވެ. ކަންތައް ވީ ވެސް މިޝަލް ހީކުރި ގޮތަށެވެ. މިޝަލްގެ ބަސްތަކުން ޝިއުރީގެ ރުޅިގަނޑު ކެކިގަތެވެ. ދެ ލޯ އަޅައިލަމުން މިޝަލަށް ބަލައިލިއިރު، ހީވީ އެ ދެ ލޮލުން މިޝަލް އަންދާލަފާނެހެންނެވެ. މިޝަލްގެ ގާތަށް ހިނިއައި ނަމަވެސް ވަރަށް އުނދަގުލުން ހިނިގަނޑު މަތަކޮށްލައިގެން ހުރީއެވެ.

“ދެރަކަމެއްނު….. އަހަރެން މި އުޅެނީ ބޮލުގައި ލާނެ އެއްޗެއް ނުލިބިގެންތަ…..؟؟؟؟ އެއްޗެއް ނުލިބުނަސް، ތި މިޝަލް ގެންގުޅޭ އެއްޗެއްގައި، އަހަރެން އިނގިލި ކުރިވެސް ޖައްސާލާކަށް ބޭނުމެއް ނޫން…..” މިޝަލްގެ މޭގައި އަތްއަޅައި ކޮށްޕާލަމުން ރުޅިގަދަވެފައި ހުރި ޝިއުރީ ބުނެލިއެވެ. ޝިއުރީ ކޮށްޕާލުމުން، ނުވިސްނާ ހުރި މިޝަލަށް އެރުނީ ތަށިމުށިތައްމަތީ، ވިއްސައިގެން ގޮސްފައިވާ ޖެލްތަކަށެވެ. އެއާއިއެކު، ކައްސާލައިގެން އޭނާ ވެއްޓެން ދިޔައެވެ. ޝިއުރީއަށް މި މަންޒަރު ފެނުމުން އޭނާގެ ދެ ލޯ ބޮޑުވެގެން ދިޔައެވެ. އެންމެ ވަގުތުކޮޅެއްވެސް ބޭކާރު ނުކޮށް، އޭނާ އުޅުނީ މިޝަލްގެ ގައިގައި ހިފަހައްޓައިލާށެވެ. އެހެނަސް، ޖެލްތަކުގައި ފައި އެޅިގެން އޭނާވެސް ވެއްޓެން ދިޔައެވެ. ވެއްޓުމުގެ ކުރިން ޝިއުރީއަށް ބާރަށް ހަޅޭލަވައިގަނެވުނެވެ. ދެ މީހުން އެކީ ތަށިމުށިތައް މައްޗަށް ވެއްޓުންއިރު ޝިއުރީ އޮތީ މިޝަލްގެ ގައިމަތީގައެވެ. ނަސީބަކުން ވެއްޓެން ދިޔަގަޑީގައި، ސަމާލުވުމުގެ ސަބަބުން މިޝަލްގެ ބޯ މާ ބާރަކަށް ނުޖެހެއެވެ. އެހެނަސް، އޭނާގެ ގައިމައްޗަށް ވެއްޓުނު ޝިއުރީގެ ނިއްކުރިން އޭނާގެ ނޭފަތުގައި ޖެހުމުން، ތަދުވީވަރުން މިޝަލަށްވެސް ހަޅޭއްލަވައިގަނެވުނެވެ.

ގޭތެރޭގައި މާ އަޑު ގަދަވެގެން ކައްކަން ތިބި ޔަލްވީމެން ދުވެފައި އައިސް މިޝަލްގެ ކޮޓަރީގެ ދޮރު ހުޅުވާލީ، އެ ދިމާލުން އަޑު އައުމުންނެވެ. ފެނުނު މަންޒަރުން ދެ މީހުން، އެއްފަހަރާ ހޭންފެށީ ޝިއުރީމެން ތިބިގޮތް ފެނުމުންނެވެ. އަޔާނީމެންނަށް ގެއަށް އާދެވުނީ އެ ވަގުތުކަމުން، ޝިއުރީމެންގެ ހަޅޭކުގެ އަޑަށް އެ މީހުންވެސް އެ ކޮޓަރިއަށް ވަނެވެ. އިޔާޒަށް އެ މަންޒަރު ފެނުމުން އޭނާއަށް ހިނިގަނޑު މަތަކުރުން ވީ އުނދަގޫ ކަމަކަށެވެ. މަޖާވެފައި ހުރެ، ފޯނުން ފޮޓޯއެއް ނެގުމަށްފަހު، އެ މަންޒަރު ވީޑީއޯ ކުރަންފެށިއެވެ. އިޔާޒްމެން އެތާ ތިބުމުން ޝިއުރީ އޮތީ ލަދުން ތެދުވާން ނުކެރިފައެވެ. ހިތާހިތުން އޭނާ މިޝަލަށް ކުދިކިޔަމުންވެސް ދިޔައެވެ.

“އަދިވެސް ނުތެދުވެ އޮންނަނީތަ….؟؟؟؟ ގަސްދުގައި ދޯ އަހަރެން ގައިމައްޗަށް ވެއްޓިގަތީ….؟؟؟؟” ޝިއުރީ އެހެން އޮންނަން ފެށުމުން، އޭނާގެ ކަންފަތް ދޮށުގައި ސިއްރުން މިޝަލް ބުނެލިއެވެ. މިޝަލް އެހެން ބުނުމުން، އައި ރުޅީގައި ޝިއުރީ ތެދުވާން އުޅުނެވެ. އެހެނަސް، އެކަން ކާމިޔާބުވާ ގޮތް ނުވީ އޮވެވުނު ގޮތަކުން މިޝަލަށް އޭނާގެ ހެދުމަށް އެރިފައިވާތީ، ހެދުން ދަތިޖެހުމުންނެވެ. މިތަން ފެނިފައި، އެ މަންޒަރު ވީޑީއޯ ކުރަން ހުރި އިޔާޒް ހިނިގަނޑެއް ޖަހައިލިއެވެ. ޝިއުރީގެ ގާތަށް އައި ރުޅިން، ވެއްޓިފައި އޮތް ޖެލްދަޅަށް އަތްފޯރުވަމުން، އެ ނަގައި އިޔާޒާއި ދިމާއަށް އެއްލިއެވެ. އެއިން ރެކިގަންނަމުން އިޔާޒް، އަނެއްކާވެސް ހިނިގަނޑެއް ޖަހާލިއެވެ. ޔަލްވީ ބުނިބުނުމަށް އެންމެންވެސް އެ ތަނުން ނުކުމެގެން ދިޔައީ، ޝިއުރީ ލަދުގަންފައިވާކަން އެ މީހުންނަށްވެސް ވިސްނުމުންނެވެ.

ހެދުމަށް ދަމައިލަމުން މިޝަލްގެ ފައިދަށުވެފައި އޮތްބައި މިންޖުކުރުމަށްފަހު، ޝިއުރީ، މިޝަލްގެ ގައިމަތިން ތެދުވުމުން، މިޝަލްވެސް ތެދުވިއެވެ. ތެދުވެވުމާއިއެކު، ޝިއުރީ އުޅުނީ އަވަހަށް އެ ތަނުން  ނުކުންނާށެވެ. ދާން ހިނގައިގަތް ވަގުތު އަނެއްކާވެސް، ކައްސާލުމުން އޭނާއަށް ހިފުނީ މިޝަލްގެ ގަމީހުގައެވެ. މިޝަލްވެސް ހުށިޔާރުކަމާއިއެކު، ޝިއުރީގެ އަތުގައި ހިފަހައްޓައިލުމުން، ދެ މީހުންނަށް ތިބެވުނީ ނުހަނު ގާތުގައެވެ. އެހާ ގާތުގައި ތިބެވުމުން މިޝަލަށް އޭނާގެ އިޙްސާސްތައް މަތަކުރުން ވީ އުނދަގޫކަމަކަށެވެ. ދެންމެއަކާއި ޖެހެންދެން އެ މޫނުމައްޗަށް ވެރިވެފައިވާ ސަމާސާގޮތްގަނޑު ކެނޑުނެވެ. މިހާރު، އެ މޫނުމަތީގައިވަނީ، ތަފާތު އަސަރުތަކެކެވެ. މިޝަލްގެ ތޫނު ނަޒަރު އަމާޒުވެފައި ވުމުންނާއި، ހުރެވުނުލެއް ގާތްކަމުން ޝިއުރީއަށް އުނދަގޫވާންފެށިއެވެ. އިސްޖަހާލަން މަޖުބޫރުވީ، ކަޅިޖަހާނުލައި މިޝަލް، ބަލަން ހުރުމުންނެވެ. އޭނާގެ އަތުގައި ހިފަހައްޓައިގެން ހުރި މިޝަލްގެ އަތް ނައްޓުވަން ކުރިހާ މަސައްކަތެއް ވީ ބޭކާރެވެ. އޭނާގެ އަތުން މިޝަލް ދޫކޮށްނުލުމުން، ޝިއުރީގެ ރުޅިގަދަވުން ނޫންކަމެއް ނުވިއެވެ. އެންމެ ފަހުން، އޭނާގެ ވިސްނުމަށް އައި ގޮތަށް ކަންތައްކޮށްލީ، އެ ނޫން ގޮތެއް އެ ވަގުތު ނުވިސްނުމުންނެވެ. މިޝަލަށް ހަމަހޭވެރިކަންވީ، ކޮނޑުން ދިލަނަގަން ފެށުމުންނެވެ. ޝިއުރީގެ އަތުން ދޫކޮށްލަމުން ކޮނޑުގައި އަތް އަޅައިލެވުނީ، ތަދުވީވަރުންނެވެ. އޭރު ޝިއުރީގެ ތުންފަތަށް ވެރިވެފައިވަނީ ފަތަޙައިގެ ހިނިތުންވުމެކެވެ. މިޝަލް، އޭނާގެ އަތުން ދޫކޮށްލުމުން ލިބުނު ފުރުސަތުގައި، ޝިއުރީ އެތަނުން ދާން ހިނގައިގަތީ، މިޝަލާއި ދިމާއަށް ދޫނެރެ ވައްތަރު ޖައްސާލަމުންނެވެ. އަދި ވަރަށް ބަލައިގެން ފައި އަޅަމުން ކޮޓަރިން ނުކުތެވެ. ޝިއުރީ ދިއުމުން މިޝަލް ލައިގެން ހުރި ގަމީސް ބާލާފައި ލޯގަނޑުން ބަލައިލިއެވެ. ޝިއުރީގެ ދަތްއެޅިތަން ރަތްކުލައިން ގަދައަށް ފެވިފައިވާތަން ފެނުމުން ތަދުވީނަމަވެސް، އޭނާގެ ގާތަށް ހިނިއައީ، ޝިއުރީ އެފަދަ ކަމެއް ކުރުމުންނެވެ.

********************

ގެއަށް އާދެވުމާއިއެކު، ބޭސްކޮތަޅު ހިފައިގެން ގޭތެރެއަށް ވަންނަންދިޔަ މިޝްޔާއަށް ހުއްޓެވުނީ، ފަހަތުން އައި ރާހިލް، އޭނާގެ ކުރިމައްޗަށް އެރުމުންނެވެ. އޭރު އެމީހުންނަށް ތިބެވުނީ މިޝްޔާމެންގޭ ގޯތިތެރޭގައެވެ. ނުވިސްނާ ހުއްޓާ ރާހިލް އެފަދަކަމެއް ކުރުމުން، މިޝްޔާއަށް ހައިރާންވެފައި ބަލަން ހުރެވުނީއެވެ.

“މިޝީ ކީއްވެތަ އަހަންނަށް ތިހެން ތި ހަދަނީ….؟؟؟؟ އަހަންނަށް ޒީކްގެ ސިފަ ލިބިފައި ހުރީމަތަ އަހަންނާ އެހާ ދުރުން ތި އުޅެނީ….؟؟؟؟ އަހަރެމެން ވައްތަރުވުން އެއީ އިއްތިފާގެއް….. އަދި އަހަރެމެން ދެ މީހުންނަށް މިޝީދެކެ ލޯބިވެވުންވެސް، އެއީ އިއްތިފާގެއް…. އެ ކަމުގައި އަހަރެންގެ އޮތީ ކޮންކުށެއް….. އަހަންނާ ޒީކްއާއި ވައްތަރުވީއޭ ކިޔާފައި، އަހަންނަށް މިޝީ ނުލިބޭންވީ ކީއްވެގެންތަ….؟؟؟؟؟” ރާހިލް ވާހަކަދައްކަމުން ދިޔައިރު، އެ އަޑުގައިވާ، ހިތާމައިގެ އަސަރު މިޝްޔާއަށް ނަގައިގަނެވުނެވެ.

އެފަދަ ފިޔަވަޅެއް އެޅުމަށް ރާހިލަށް މަޖުބޫރު ކުރުވީ، އޭނާގެ ބަސްނާހާ ހިތެވެ. މިޝްޔާއާއި ދުރުން އުޅެން މަސައްކަތް ކުރިކަމުގައިވިޔަސް، އޭނާއަށް އެކަން ކުރުންވީ ބޮޑު ވޭނަކަށެވެ. އެ ހިތުގައިވާހާ އުދާހެއް މިޝްޔާގެ ކުރިމަތީ، ބަންޑުންކޮށްލެވުނީ، މިރޭ މިޝްޔާގެ ޢަމަލުތައް ހުރިގޮތުން، ހިތުގައި ޖެހުމުންނެވެ. ކުއްލިއަކަށް ހުރެފައި ރާހިލް، އެފަދަ ވާހަކަތަކެއް ދައްކަން ފެށުމުން، ބުނާނެ އެއްޗެއްވެސް ނޭނގިފައި މިޝްޔާއަށް ބަލަން ހުރެވުނީއެވެ.

“މީގެ ކުރިންވެސް އަހަންނަށް، ރީތި އެތައް އަންހެންކުދިންނެއް ފެނިފައިވޭ…. އެކަމަކު، މި ރަށަށް އައި ފުރަތަމަ ދުވަހު، މިޝީ ފެނުމުން، އަހަރެންގެ ހިތުގައި ތަފާތު ގޮތަކަށް ވިންދުޖަހައިލިހެން ހީވި…. ފުރަތަމަ ނަޒަރުން ލޯބިވެވޭކަންވެސް އަހަންނަށް ޤަބޫލުކުރެވުނީ އެ ދުވަހު މިޝީ ފެނުމުން، އަހަންނަށް އެ ވީ ގޮތްތަކުން…. މިޝީ އައިސް ބައްދާލުމުން، އަހަރެން ހީކުރީ އަހަރެންގެ ނަސީބު އައިސް އަތުގައި ހިފިއްޔޭ…. އެއްފަހަރުވެސް ހިތަކަށް ނާރަ، އަހަންނަށް ލިބިފައި މިވާ ސިފައެއްގެ ސަބަބުން، އަހަރެން އެންމެ ލޯބިވާ ކުއްޖާ އަހަންނަށް ނުލިބިދާނެއެކޭ…. އަހަރެން ކިހާ ނަސީބުދެރަ…..” އެންމެ ފަހު ޖުމްލަ، ރާހިލް ބުނެލީ އިސްޖަހާލައިގެން ހުރެއެވެ. އޭނާގެ ދެ ލޮލަށް ޖަމާވަމުން ދިޔަ ކަރުނަތައް މިޝްޔާއަށް ދައްކަން ބޭނުން ނުވާތީއެވެ.

އިސްޖަހައިލައިގެން ހުރި ރާހިލަށް ސިހުން ގެނުވީ، ގެނައި ކުއްލި ޙަރަކާތަކާއިއެކު މިޝްޔާ، އޭނާގެ އަތުގައި ހިފައިލުމުންނެވެ. އެފަދަ ކަމެއް މިޝްޔާ ކޮށްފާނެކަމަށް ޤަބޫލު ނުކުރެވިފައިހުރެ، އޭނާ އުޅުނީ އަތް ދަމައިގަންނާށެވެ. އެހެނަސް، ކުރިއަށްވުރެވެސް ބާރަށް މިޝްޔާ އެ އަތުގައި ހިފަހައްޓާލަމުން އިސްޖަހާލިއެވެ. މިޝްޔާގެ މި ޙަރަކާތުން ރާހިލްގެ ހައިރާންކަން އިތުރުވީނަމަވެސް، އޭނާގެ ހިތަށް ފޮނި އަސަރުތަކެއް ކުރުވިއެވެ. މިޝްޔާގެ އަތުގައި އަނެއް އަތުން ހިފަހައްޓައިލެވުނީ، އުފާވީވަރުންނެވެ. މިޝްޔާގެ ދެ ލޮލުން ފައިބައިގެން އައި ހޫނު ކަރުނަތައް ރާހިލްގެ އަތްތިލައިގައި ބޮސްދިނުމުން އޭނާއަށް ސިހިފައި ބަލައިލެވުނެވެ. އޭރުވެސް މިޝްޔާ ހުރީ އިސްޖަހައިލައިގެންނެވެ.

“މިޝީ…. ކީއްވެ ތި ރޮނީ…. ޕްލީޒް، ނުރޮއި ހުއްޓާލާ…. މިޝީ ދެރަވާވަރުގެ އެއްޗެއް އަހަންނަށް ބުނެވުނިއްޔާ، އަހަންނަށް މާފުކުރޭ…. އަހަރެން ބޭނުމެއް ނޫން މިޝީ ދެރަކުރާކަށް…. މާ ބޮޑަށް ހިތަށް އަސަރުކުރީމަ، އަހަންނަށް އެ ވާހަކަތައް ދެއްކުނީ…. އަހަރެން ފެނުނީމަ، މިޝީއަށް އުނދަގޫވަންޏާ، މި ރަށް ދޫކޮށް އެހެން ރަށަކަށްވެސް އަހަރެން ހިނގައިދާނަން…. މިޝީ ޕްލީޒް…. ނުރޮއެ ހުއްޓާލާ…. މިޝީ ރޯތަން ދެކޭކަށް އަހަރެންގެ ހިތަކަށް ކެތެއް ނުވެއޭ…..” މިޝްޔާ ރޯންފެށުމުން، ރާހިލް ކަންބޮޑުވިއެވެ. އޭނާގެ ދަތްދޮޅީގައި ހިފައި އުފުލާލަމުން، ލޯތްބާއިއެކު ރާހިލް ވާހަކަ ދެއްކީ، މިޝްޔާ ހައްލަކަށް އެޅުވޭތޯއެވެ.

“އަހަރެންދެކެ ލޯބިވަންޏާ ކީއްކުރަން މި ރަށުން ދާން ތި އުޅެނީ……” ރާހިލްދެއްކި ވާހަކަތަކުގެ ސަބަބުން، މިޝްޔާ ރާހިލްގެ ދެ އަތުން ދޫކޮށް އޭނާއާއި ދުރަށް ޖެހިލިއެވެ.

“މިޝީ ރޯތީއެއްނު….. ހުއްޓާލަބަ… ކީއްވެ ތި ރޮނީ….” މިޝްޔާގެ ދެ ލޮލުން އަންނަމުންދިޔަ ކަރުނަތައް ރާހިލް ފުހެލައިދިނީ ލޯތްބާއިއެކުއެވެ.

“ނޭނގެ….. އަހަންނަކަށް ނޭނގެ ރޮވުނީ ކީއްވެކަމެއް….. ނޭނގެ ވާ ގޮތެއް….. ހިތަށް އުނދަގޫވަނީ…. އެ ދުވަހު ރާހިލާއި ދިމާއަށް އެ ހުރިހާ އެއްޗެއް ކިޔުނީމަ، ދެރަވަނީ…. ރާހިލް ފެނުނީމަ ޒީކްމަތިން ހަނދާން ނުވެއެކޭ އަދިވެސް ނުބުނާނަން… އެކަމަކު، ރާހިލް އަހަންނާ ދުރުން އުޅޭތީ، ވަރަށް އުނދަގޫވޭ…. ވަރަށް ދެރަވޭ…… އަހަންނަކަށް ނޭނގެ އެހެންވަނީ ކީއްވެގެންކަމެއް….”  މިޝްޔާގެ ވާހަކަތައް އަޑު އިވިފައި ރާހިލްގެ ހިތް އުފަލުން ފޮޅުނެވެ. އެހެނަސް، ބޭރުފުށުން އެ އަސަރުތައް ނުދައްކާ އޭނާ ހިމޭނުން ހުރީއެވެ.

“މިޝީ ބޭނުންވަނީ ކޮންގޮތެއް….؟؟؟  އަހަރެން ކަންތައް ކުރާނީ މިޝީ ބުނާ ގޮތަކަށް…..” މިޝްޔާގެ މަޑުމަޑު ދެ އަތްތިލައިގައި ހިފައިލަމުން، ރާހިލް ބަލައިލީ ސީދާ މިޝްޔާގެ ދެ ލޮލަށެވެ.  ރާހިލަށް ބަލަން ހުރެފައި މިޝްޔާ އޭނާގެ ދެ އަތްތިލަ ރާހިލްގެ އަތުތެރެއިން މިންޖުކޮށްލިއެވެ. މިޝްޔާގެ މި ޙަރަކާތުން، ރާހިލްގެ ތުންފަތުގައިވި ހިނިތުންވުން ފަނޑުވެޑުވެ، ބާރު ބާރަށް ހިތްތެޅެން ފެށިއިރު މާޔޫސްވާ ގޮތްވިއެވެ.

“އަހަރެންގެ ދިރިއުޅުމުގެ ހުންގާނާ ޙަވާލުވެދީ…..” އިރުކޮޅަކު ރާހިލަށް ބަލަން ހުރުމަށްފަހު، ކުޑަކޮށް ހިނިތުންވެލަމުން މިޝްޔާ ބުނެލިއެވެ. ރާހިލްގެ ކަންފަތުގައި ތަކުރާރުކޮށް، އެ ބަސްތައް ގުގުމާލެވިފައިވާ ކަހަލައެވެ. މާޔޫސްވެފައިވާ، މޫނުގެ ކުލަވަރު އުޖާލާވެ، ތުންފަތަށް ފުޅާ ހިނިތުންވުމެއް ވެރިވީ ފަޅި ސިކުންތުކޮޅެއްގެ ތެރޭގައެވެ. އެ ރަށަށް އައީއްސުރެ، އޭނާ އިންތިޒާރުކުރަމުން އެ ދިޔައީ އެ ވަގުތަށެވެ. މިޝްޔާ އޭނާގެ ޙައްޤަކަށް ވާނެ ދުވަހަކަށެވެ. ކޮންމެއަކަސް، މިއަދު މިވަނީ އޭނާ ކުރި ދިގު އިންތިޒާރަށް ނިމުން އައިސްފައެވެ. އޭނާގެ އިންތިޒާރުގެ ނިމުން ވަރަށްވެސް ފޮންޏެވެ.

“އަހަރެން މިޝީ ދެކެ ވަރަށް ލޯބިވޭ…. މާތްﷲ އިރާދަކުރެއްވިއްޔާ އަހަރެން މިޝީ ގެންގުޅޭނީ ވަރަށް އުފަލުގައި…..” ރާހިލް މިޝްޔާއަށް ބަލައިލީ ލޯބިވެތިގޮތަކަށެވެ. އޭނާގެ މޫނުމަތީގައިވި ހިނިތުންވުންފެނި، މިޝްޔާގެ ހިތަށް ފިނިކަން ލިބުނެވެ. ރާހިލް، މިޝްޔާދެކެވާ މަތިވެރި ލޯބީގެ ހެއްކަކަށް އެ މޫނުމަތީގައިވާ އުފާވެރިކަންވެސް އޭނާއަށް ފުދެއެވެ.

********************

ޔަލްވީމެން ކެއީ ވިނަގަނޑުމަތީ ތިބެގެންނެވެ. ކައި ނިމިގެން، އެކި ވާހަކައިގައި ތިބި އެންމެން، އެ މީހެއްގެ ފޯނަށް ބަލައިލީ، ހުރިހާ ފޯނަކަށް އެއްފަހަރާ މެސެޖު އައުމުންނެވެ. އެންމެން ފޯނު ނެގުމުން ޝިއުރީވެސް ޔަލްވީގެ ގާތަށް ޖެހިލީ އޭނާގެ ފޯނު ޗާޖަށް ޖަހާފައި އޮތުމުން އެ އައި މެސެޖެއް ބަލައިލާ ހިތްވުމުންނެވެ. ލާނެއް ގޮތަކަށް ހީލައިގެން، މަޖާވެފައި އިޔާޒް އިނީ އެންމެންގެ ޙަރަކާތްތަކަށް ބަލާށެވެ.

“އިޔާ…. މީ ކޮންއިރަކު ކުރިކަމެއް…..” ދެ ލޯ ބޮޑުކޮށްލަމުން މިޝްޔާއަށް  މިހެން އަހައިލެވުނީ، އޭނާއާއި ރާހިލް، މީގެ ކުޑައިރުކޮޅެއް ކުރިން ދެއްކި ވާހަތައް ރައްކާކޮށްފައިވާ ވީޑިއޯއެއް އިޔާޒް، އެ މީހުންގެ ވައިބަރ ގްރޫޕަށް ފޮނުވުމުންނެވެ. މިޝްޔާ މިހެން ބުނުމާއިއެކު، އިޔާޒް، އޭނާ ލައިގެން އިން ގަމީހުގެ ގިރުވާން ކޮޅަށް ޖަހައިލީ، އޭނާއަށް މޮޅުކަމެއް ކޮށްލެވުމުން، އަބަދުވެސް އެ ގޮތަށް ކަންތައް ކުރާތީއެވެ. ދެ ލޯ އަޅާލަމުން، މިޝްޔާ އޭނާގެ ގައިގައި ބޮނޑިއެއް އަޅުވާލީ، އިޔާޒް ސިއްރުން އެ މީހުންގެ ވާހަކަތައް ވީޑިއޯ ކުރުމުންނެވެ. މިޝްޔާ އެ ގޮތަށް ކަންތައް ކުރުމުން މަޖާވީވަރުން އިޔާޒް ފެށީ ހޭށެވެ.

“އަސްލު ތި މީހުން ލަސްވެގެން، ކޮބައިތޯ ބަލައިލަން އަހަރެން ދިޔައީ…. ދެ މީހުން ވާހަކައިގައި ތިބިތަން ފެނުނީމަ، ހަމަ ވީޑިއޯ ކޮށްލާ ހިތްވީ……” ހިނިގަނޑު މަތަކޮށްލަމުން، އިޔާޒް ކިޔައިދިނެވެ.

ދިރިއުޅުމައިގެން ކުރިއަށް ދިއުމަށްޓަކައި މިޝްޔާ މި ނެގި ފިޔަވަޅުގެ ސަބަބުން، އެތާ ތިބި އެންމެންވެސް ތިބީ ވަރަށް ހިތްހަމަޖެހި، އަދި އެހާމެ، އުފާވެސްވެފައެވެ. ވާނީވެސް އެހެންތާއެވެ. އެންމެންވެސް ހީކޮށްގެން އެ ތިބީ، މިޝްޔާ ދެން އޭނާގެ ދިރިއުޅުމުން އެހެންމީހަކަށް ޖާގައެއް ނުދޭނެކަމަށެވެ. އޭނާ ރާހިލާއި ގުޅުމުން އެ މީހުން އެހާ އުފާވީ، އެހެންވެއެވެ.

“އަޅެ… އިޔާ ވީޑިއޯ ނުކުރިނަމަ، ތި ދެ މީހުން، އަހަރެމެންނަށް އަންގާވެސް ނުލާނެ ދޯ…..” ކުޑަކޮށް މިޝްޔާގެ ގައިގައި ބައްދާލަމުން ޝިއުރީ މިހެން ބުނުމުން މިޝްޔާ ދެ ފަރާތަށް ބޯ ހޫރާލިއެވެ. މިޝްޔާގެ ގާތަށް ގޮސް، މިޝަލް، އޭނާގެ ގައިގައި ބައްދާލިއެވެ. ޒިކާންގެ ވަކިވުމަށްފަހު، މިޝްޔާ ދިރިއުޅުމައިގެން ކުރިއަށްދާން ޚިޔާލުކުރީތީ، އެތާ ތިބި އެންމެންގެ ތެރެއިންވެސް އެންމެ އުފާވީ އޭނާއެވެ. ޒިކާންގެ ވަކިވުމުން މިޝްޔާ ކުރި ހިތާމަ އޭނާއަށް ވަރަށް ގާތުން ފެނިފައިވާތީއެވެ.

“ރާހިލް…. މިޝްއަށް ދެރައެއް ނުދެއްޗޭ…. އަހަރެން ރާހިލަށް ވަރަށް އިތުބާރުކުރަން…. ވަރަށް އުފާވެއްޖެ މިޝްގެ ޙަޔާތަށް ތި ފަދަ ބައިވެރިއަކު އައީތީ…..” ރާހިލްގެ ފައިމަތީ އަތްބާއްވާލަމުން މިޝަލް ބުނެލލިއެވެ. މިޝަލަށް ބަލައިލުމަށްފަހު، ބޯ ޖަހާލަމުން ރާހިލް ހިނިތުންވެލިއެވެ.

********************

ހަވީރުގެ ވަގުތެވެ. ޝޯލް ހަދައި ރީތިވެލައިގެން ޔަލްވީ ހުރީ ޝައުން އޭނާ ބަލައި އަންނަ ވާހަކަ ބުނުމުންނެވެ. ހާސްވެފައި ހުރުމުން އޭނާ ހުރީ ދެ ކޮޅަށް ހިނގާލަހިނގާލައެވެ. ޔަލްވީ އުޅޭގޮތުން ޖޯލީގައި އިން ނޫރައިންގެ ގާތަށް ހިނިއައެވެ.

“ދަރިފުޅާ ދެ ފަޔަށް ހިނިއަރައިގެންތަ ތި އުޅެނީ؟؟؟؟…. ޝައުން އަންނަންދެން ނިކަން މިތާ އިށީނދެބަލަ…. ތިހާ ވަރަށް ހާސްވަންޏާ ކިހިނެއްތަ އެ ގެއަށް ދާނީ….؟؟؟” ޔަލްވީއަށް ގޮވައިލަމުން، ނޫރައިން އިށީނދެގެން އިން ޖޯއްޔާއި ޖެހިގެން ހުރި ޖޯއްޔަށް އިޝާރާތް ކޮށްލަމުން، އޭނާ ބުނެލީ ހިނިއައިސްފައި އިނދެއެވެ.

“މަންމަ ބުންޏަސް ކިހިނެއްތަ ހާސްނުވެ ހުންނާނީ…. އަހަރެން ހާދަ ބިރުގަނެއޭ… އަދި އަލަށް އެ ގެއަށް ދާން މި އުޅެނީ…..” ޖޯލީގައި ކުޑަކޮށް ފޫކޮޅު ޖައްސާލަމުން ހާސްވެފައި އިނދެ ޔަލްވީ ބުނެލިއެވެ.

“ދަރިފުޅާ…. ދެ ލޯ މަރާލާފައި ނިކަން ފުންކޮށް ނޭވާއެއް ލާބަލަ….. ކޮންމެ ކަމެއްވެސް ފުރަތަމަ ކުރާނީ އަލަށް…. ކަންކަމާ ކުރިމަތިލާންވާނީ ނިކަން ކެރިގެން…. ދަރިފުޅު އެކަންޏެއްވެސް ނޫނެއްނު ދާން ތި އުޅެނީ…. ޝައުންވެސް ގާތުގައި ހުންނާނެ….. އެހެން ނޫނަސް، އަބަދުވެސް ވިސްނަންވާނީ އެންމެ ރަނގަޅު ގޮތަށް…..” ނޫރައިން މަސައްކަތްކުރަމުން ދިޔައީ ޔަލްވީގެ ހިތަށް ވެރިވެފައިވާ ހާސްކަން ފިލުވައިދޭށެވެ. ޝައުން އައީ ނޫރައިން އެ ގޮތަށް ވާހަކަ ދައްކަން އިންދައެވެ.

“އަހަންނަކަށް ހިއެއްނުވެ ޔާލްއަށް، ޝައުން މަންމަގެ ކުރިމައްޗަށް އަރަން ކެރޭނެހެންނެއް….. ނުފެންނައިރުވެސް މި ހުރީ ވާވަރު…. ދެން އަދި ފެނުނީމަ ކިހާވަރެއްވާނެ…..” ޝައުން އައިސް މަޑުކޮށްލުމާއިއެކު، ހިނިތުންވެލަމުން ނޫރައިން ބުނެލިއެވެ. ދެ އަތް ދެ އަތާއި މޮޑެމުންދިޔަ ޔަލްވީ، އެކަން ހުއްޓައިލުމަށްފަހު، ތުންކޮޅު ދަމައިލީ، ނޫރައި ން އެހެން ބުނުމުންނެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.