ޔާރު މިވަނީ ލޯތްބޭ ޙަޤީގީ (ފުރަތަމަ ބައި)

ކަޅުފޮއި އަނދިރި ރޭގަނޑެވެ. މަގުމަތިން އެއްވެސް މީހެއްގެ ހިލަމެއް ފެންނާކަށް ނެތެވެ. ބޯކޮށް ވެހެމުންދިޔަ ވާރޭތެރޭ، ކަނާތްފަރާތުން އޮތް ގޯޅިން ލަނބާލި އަޔާނީ، ދެފައިގައި ހުރި ބާރެއްލާފައި ދުވަމުން ދިޔައިރު، މައިނޭވާލެވެއެވެ. ވައިގަދަކަމުން މަގުގެ ދެފަރާތުގައިވާ ބޮޑެތި ގަސްތައް ހީވަނީ، ދެންމެ ދެންމެ މުލުން ލުހިގެން ހިނގައިދާނެހެންނެވެ. ގަސްގަހުގައިވާ ފަތްތައް އޮފިގަނޑުން ވަކިވެގެން އުދުހެމުންދާއިރު ހީވަނީ، ކުޑަވަރެއްގެ ތޫފާނެއް އައިސްގެން އުޅޭހެންނެވެ. ނަމަވެސް، މިއިން އެއްވެސްކަމަކަށް ފަރުވާލެއްނެތި ދުވަމުން ދިޔަ އަޔާނީގެ ދެލޮލުގައިވަނީ ބިރުވެރިކަމެވެ.

މަގުގެ ނިމޭހިސާބަށް ދެވުމުން އަޔާނީ ހުއްޓުނެވެ. ދެން ހަދަންވީ ގޮތެއް ނޭނގުމުންނެވެ. ކުރިމަތީގައި އޮތީ މާސިންގާ ކަނޑެވެ. މަގުގެ ދެފަރާތުގައިވަނީ ބޯގަސްތަކުން ފުރާލެވިފައިވާ ބޮޑު ޖަންގައްޔެވެ. މޫނުމަތީ ތަތްލާފައިހުރި އިސްތަށިތައް އެއްފަރާތްކޮށްލަމުން، އަޔާނީ ފަހަތަށް އެނބުރުނެވެ. ބިރުވެރިކަމުގެ އެއްވެސް ނިޝާނެއް ފެންނާކަށް ނެތެވެ. ފުން ނޭވާއެއް ފަޒާގެ ތެރެއަށް ދޫކޮށްލަމުން، އަޔާނީ ދެލޯމަރާލިއެވެ. ބޯކޮށްވެހެމުންދިޔަ ވާރޭގައި، އޭނާ ލައިގެންހުރި ގަމީސްއޮތީ، ގައިގައި ތަތްލަވާފައެވެ. ފަޒާގެ ފިނިކަން އަޔާނީއަށް އަދި ކިރިޔާ އިޙްސާސްވީ ކަހަލައެވެ. ފިނިވެގެންގޮސް ރޫރޫ އަޅަމުންދިޔަ ހަށިގަނޑަށް ޙިމާޔަތެއް ދިނުމަށްޓަކައި، މޭމަތީ ދެއަތް ހުރަސްކޮށްލިއެވެ.

ކުއްލިއަކަށް އިވިގެންދިޔަ ބާރު އަޑާއިއެކު، ސިހިފައި އަޔާނީއަށް ދެލޯ ހުޅުވާލެވުނެވެ. އަސްތާ ކަމަކުދާކަށްނެތެވެ. ކުރިމަތީގައި އެ ހުރީ ބިރުވެރި އަދި އެހާމެ ފަކުރު ސިފައެއްގައިހުރި މަޚުލޫޤެކެވެ. އޭގެ މުޅި ގައިގައިވަނީ ކަޅުކުލައިގެ ކެހެރިފަޅާފައެވެ. ކެހެރިތަކުގައި ފެހިކުލައިގެ ލޮނދިތަކެއް ހުއްޓެވެ. އަނގައިގެ ދެމިޔަކަނުން ދަވަ ބޭރުވަމުން ދިޔައިރު، ދަތްތައްހުރީ ރީނދޫކުލައިގައެވެ. ރަތްކަމުންގޮސް ދެލޯ ހީވަނީ އަނގުރު އަލިފާނުން ދިއްލާލާފައިވާހެންނެވެ. ބިމުގައި ހަމަޔަށް ފައިނުޖެހޭއިރު، އޭތީގެ އަނގައިން ބަރު އަދި އެހާމެ ބިރުވެރި އަޑެއް އިރުއިރުކޮޅާ އިވެމުން ދިޔައެވެ.

ފިނިވެގެން ރޫރޫ އަޅަމުންދިޔަ އަޔާނީގެ ހަށިގަނޑު އެއަށްވުރެ ބޮޑަށް ރޫރޫ އަޅައިގަތީ، ގަތްބިރެއްގެ ބޮޑުކަމުންނެވެ. ކުއްލިއަކަށް އެބިރުވެރި މަޚުލޫގު ކުރިޔަށްއެޅި ފިޔަވަޅާއިއެކު، ބިންގަނޑުވެސް ހީވީ ގުޑަގުޑައިގެން ދިޔަހެންނެވެ. އަޔާނީ ބިރުން ހުރެ ފަހަތަށް ޖެހެން ފެށިއެވެ. އޭނާ މަސައްކަތް ކުރަމުން ދިޔައީ ސަލާމަތަށް އެދި ގޮވުމަށެވެ. ނަމަވެސް، ކަރުގައި އަޑު ތާށިވެފައިވާކަހަލައެވެ. އަޑު ބޭރުވާގޮތެއް ނުވިއެވެ. އޭތި އަނެއްކާވެސް ފިޔަވަޅެއް އަޅާލިއެވެ. އޭރު ފަހަތަށް ޖެހެމުންގޮސް، އަޔާނީ ހުރީ ކަރުތާފެނަށް އެރިއެވެ. ހަދާނެ ގޮތެއް ނޭނގިފައިހުރި އަޔާނީ ދެންވެސް މަސައްކަތްކުރީ އަޑުބޭރުވޭތޯއެވެ. އެކަން ފިޔަވައި ދެން އޭނާއަށް މިވަގުތު ކުރެވޭނެ އިތުރު ކަމެއް ނެތީމައެވެ. އެ ކަޅުފޮއި އަނދިރީތެރޭ، އެހުރިވަރަށްވުރެ ބޭރަށްދާކަށް އޭނާއަށް ހަމަހިލާ ނުކެރޭނެއެވެ.

ބިރުވެރި ސިފައިގައިހުރި އެ މަޚުލޫގު ދެން ފުޅާކޮށްލީ އޭތީގެ ދެއަތެވެ. އަޔާނީ ޝިކާރަކޮށްލުމަށެވެ. އަޔާނީއަށް، ދެން އޭނާ ދިރިހުންނާނެކަމާއިމެދު، އެއްވެސް އުއްމީދެއްނެތި، ކަރުގެ ހުރިހާ ނާރުތަކަށް ލެވުންހާ ބާރެއްލާފައި، ސަލާމަތަށް އެދި ގޮވާލިއެވެ. ނަސީބަކުން މިފަހަރު އަޑު ބޭރުވިއެވެ.

“މަންމާ… މަންމާ… ސަލާމަތްކޮށްދީ…. އަހަރެން ސަލާމަތްކޮށްދީ…. އަހަރެން ކާލަނީ….” އަޑަށް ބާރުލާފައި އަޔާނީ ގޮވަމުން ދިޔައެވެ.

“އަޔާނީ…” އަޔާނީއަށް، އޭނާގެ މަންމަގެ އަޑު އިވުނެވެ. އެހެންކަމުން، އިތުރު ހިތްވަރާއިއެކު އަނެއްކާވެސް، މަންމާއޭ ކިޔާފައި ގޮވާލެވުނެވެ.

“އަޔާނީ… ބަލަ އަޔާނީ ދެލޯ ހުޅުވާބަލަ…” އަޔާނީއަށް ހޭވެރިކަންވީ ދެނެވެ. ދެލޯ ހުޅުވާލެވުމާއިއެކު، އެކި ފަރާތް ބަލާލެވުނެވެ. ހަމަޖެހުމުގެ ނޭވާއެއް ބޭރުކޮށްލެވުނީ ގާތުގައި އިން އޭނާގެ މަންމަ ފެނުމުންނެވެ. އަޔާނީ އޮތީ އޭނާގެ ކޮޓަރީގައެވެ. އޭނާއަށް ދިމާވި ބިރުވެރި ހާދިސާ އެއީ ފެނުނު ހުވަފެނެއްކަން ޔަޤީންވުމުން، ހިތަށް ބުނެދޭން ނޭނގޭ ތަސައްލީއެއް ލިބިގެން ދިޔައެވެ.

“ދަރިފުޅާ ކިހިނެއްވީ…؟؟؟ ބިރުވެރި ހުވަފެނެއް ފެނުނީތަ..؟؟” އަޔާނީގެ ޙަރަކާތްތަކަށް ބަލަން އިނދެފައި، އަޔާނީގެ މަންމަ އަމްހާ ސުވާލުކޮށްލިއެވެ. ބޯޖަހާލަމުން ތެދުވެ، އަޔާނީ އޭނާގެ ހޭވިފައިވާ އިސްތަށިގަނޑު އަތުން ރީތިކޮށްލުމަށްފަހު ހުޅިއެއް ޖަހާލިއެވެ. އެއަށްފަހު، ނިއްކުރީގައި ހުރި ދާތިކިތައް، އަތުގެ ނުފުށުން ފުހެލިއެވެ.

“ބިރުވެރި ހުވަފެނެއް ނުފެނުނިއްޔާ ދެރައޭ… ދަރިފުޅު ގާތުގައި މަންމަ ކިހާވަރަކަށް ބުނަންތަ ނަމާދު ނުކުރެވެއޭ ކިޔާފައި ދެނަމާދު ދޭތެރޭ ނުނިދާށޭ…. އެއީ އަންހެން ކުދިން ނިދަން އެހާ ރަނގަޅު ވަގުތެއް ނޫނޭ… ދެން އަނެއްކާ އަބަދުވެސް ތިބަލަނީ ބިރުވެރި ފިލްމުތައް….” އަމްހާ ބެލީ އަޔާނީއަށް ވިސްނައިދެވޭތޯއެވެ.

“ދެން ދެނަމާދު ދޭތެރޭ ނުނިދާނަމޭ މަންމާ…” އަޔާނީ، އަމްހާގެ ގައިގައި ކުޑަކޮށް ބައްދާލިއެވެ. އެއަށްފަހު، އެނދުމަތީގައި އޮތް ނަންބަރު އައިނު ނަގާ ލޮލުގައި އަޅާލަމުން، އަމްހާއަށް ބަލާލިއެވެ. އެހިނދުމެ، ކުށްވެރިއެއްފަދައިން، މަޑުމަޑުން ކަނާތުގެ ޝަހާދަ އިނގިލީގައި ދަތް އަޅާލިއެވެ. މިމަންޒަރު ފެނުމުން، އަމްހާ ދެފަރާތަށް ބޯހޫރާލިއެވެ.

“މިރޭވެސް އައިނު އަޅައިގެން ދޯ ނިދީ….؟؟” ކޮޅަށް ތެދުވުމަށްފަހު، އުނަގަނޑުގައި އެއް އަތް ވިއްދާލައިގެންހުރެ، އަމްހާ އަހާލީ ހިތްހަމަ ނުޖެހިފައެވެ.

“މާފްކުރޭ މަންމާ…. އަހަރެން ނިދީކީ ނޫނޭ… ފިލްމު ބަލަން އޮއްވާ އަހަރެންނަށް ނިދުނީއޭ…” އަޔާނީވެސް ކޮޅަށް ތެދުވަމުން ބުނެލިއެވެ. އެވަގުތު، ބަންގި ގޮވާ އަޑު އިވުމުން، އަތުކުރީގައި އޮތް ގަޑިއަށް ބަލާލިއެވެ. އެއާއިއެކު، ގަޑި ޖެހެނީއޭ ކިޔާ ދުވެފައިގޮސް، އަލަމާރިން ހެދުމެއް ނަގައިގެން ފާޚާނާއަށް ވަނެވެ.

އަޔާނީ ފާޚާނާއަށް ވަނުމުން އަމްހާ ދެފަރާތަށް ބޯހޫރާލިއެވެ. ކޮޓަރިތެރެއަށް ނަޒަރު ހިންގާލުމުން އޭނާގެ ބޮލުގައި ރިއްސާލިއެވެ. ކޮޓަރީގެ، ތަރުތީބުވަނީ ގެއްލިފައެވެ. ފިޔާތޮށިކުލައާއި، މަޑުދަނބުކުލައިން ކުލަލާ، ފަރުމާކޮށްފައިވާ އެ ބޮޑުކޮޓަރީގެ ހުރިހާ ފަރުނީޗަރެއްގައިވެސް ވަނީ އެ ދެކުލައެވެ. އަޔާނީ ހިތް އެދޭގޮތަށް، ހިތް އެދޭ ކުލަތަކުން، ފަރުމާ ކުރެވިފައެވެ. ބަލާލި ކޮންމެ ދިމާއަކުންވެސް ފެންނަމުންދަނީ މުއްސަނދިކަމެވެ. ކޮޓަރިން ނުކުމެވޭ ގޮތަށް ބެލްކަންޏެއް ހުރިނަމަވެސް، އޭސީ ޖައްސާފައިހުރުމުން، ބެލްކަނީގެ ދޮރުހުރީ ލައްޕާލާފައެވެ. ކޮޓަރި ކިތަންމެ ރީތިވެފައި ބޮޑުނަމަވެސް ކޮޓަރިއަށް ބަލާލުމުން، ހީވަނީ ގޮނޑެއްހެންނެވެ. މިއިންދުވަހަކު، ސާފުކުރި ވައްތަރެއްނުޖަހައެވެ.

“އަހަރެން ހިތަށްއަރާ މިކުއްޖާގެ އުޅުން ރަނގަޅުވާނީ ކޮންދުވަހަކުންބާއޭ… ކިތަންމެވަރަކަށް ކިޔައިދިނަސް އަދިވެސް އެއުޅެނީ ކުޑަކުއްޖެއްހެން…. ކިޔައިދީދީ ބޯހަލާކުވާވަރުވޭ….” ކޮޓަރީގެ މެދުގައި ހުރި އެނދުގައި އަޅާފައި އޮތް މަޑުދަނބުކުލައިގެ ކަފަރަޖާ ރަނގަޅުކޮށްލުމަށްފަހު، ބިންމަތީގައި އޮތް ބާލީސް ނަގާ އެނދުމައްޗަށް ލަމުން، އަމްހާ ކުދި ކިޔާލިއެވެ. އަދި އެނދުމަތީގައި ހުޅުވާފައި ހުރި ލެޕްޓޮޕް ލައްޕާލުމަށްފަހު، ގެންގޮސް ފޮތްހަރާ ގުޅިފައި ހުރި ކިޔަވާ މޭޒުމަތީ ބޭއްވިއެވެ. އެއަށްފަހު، ކޮޓަރީގައި ބޮނޑިކޮށް އުކާފައިވާ ކަރުދާސްތައް ހޮވާލިއެވެ. ރީތިކޮށް ކޮޓަރި ކުނިކަހާލަމުން ހިންދެމިލިވަގުތު، ފާޚާނާގެ ދޮރު ކަހާލުމަށްފަހު ޢަޔާނީ ނުކުތެވެ.

“ދަރިފުޅާ މިއަދުވެސް ކޮޓަރި ސާފުކުރަން މިޖެހުނީ މަންމައަށް…. މީ ދަރިފުޅު އަމިއްލައަށް ކުރަންޖެހޭ ކަންތައްތަކޭ… މީހަކު ނުބުންޏަސް އަބަދުވެސް ކޮޓަރި ބާއްވަން ޖެހޭނީ ރީތިކޮށް، ސާފުކޮށް…” ރަތްކުލައިގެ ގަމީހެއް ލައިގެން ތުވާލި އަނދެލައިގެން ނުކުތް އަޔާނީ ފެނުމުން، އެނދުގައި އިށީންނަމުން އަމްހާ ބުނެލިއެވެ. ސްކިނީ ލަމުން އަމްހާގެ ވާހަކައަށް މާބޮޑު ސަމާލުކަމެއް ނުދީ އަޔާނީ “އާނހޫމް” ކިޔާލިއެވެ. އޭނާގެ ޙަރަކާތްތައް އަވަސްވެފައިވަނީ ޓިއުޝަނަށް ދާން ވަގުތު ކުޑަތަންވަމުން ދާތީއެވެ. އެވަގުތު، ދޮރުގައި ޓަކިޖަހާލުމުން އަމްހާ ތެދުވެގެންގޮސް ދޮރު ހުޅުވާލިއެވެ. ދޮރުމަތީގައި ހުރި ޝިއުރީ ފެނުމުން، އަމްހާ ހިނިތުންވެލިއެވެ. ބަދަލުގައި، ޝިއުރީވެސް ހިނިތުންވެލިއެވެ. ޝިއުރީ ވަނުމަށް ތަންދެމުން، އަމްހާ ކޮޓަރިން ނުކުމެގެން ދިޔައެވެ.

ހަލުވިކޮށް ހިނގާލާފައި އައި ޝިއުރީ އިށީނީ ބެލްކަނިދޮރުގެ އެއްފަރާތުގައި ހުރި ސޯފާގައެވެ. އަދި ދެލޯމަރާލަމުން ފުން ނޭވާއެއް ދޫކޮށްލިއެވެ. ލޮލުގައި މަސްކަރާ އަޅާލަމުން ރީތިވާ މޭޒުގެ ލޯގަނޑުން އަޔާނީ ޝިއުރީއަށް ބަލާލިއެވެ.

“ކޮންކަމަކާ މޫޑު ގޯސްވެފަ…؟؟؟” ތުންފަތުގައި ލިޕްގްލޯސް ހާކާލުމަށްފަހު އަޔާނީ ޝިއުރީއާއިވީ ދިމާއަށް އެނބުރުނެވެ.

“އަނެއްކާ މިރޭވެސް އަހަރެންދެކެ ރުޅިއައިސްގެން މަންމަ އަހަރެންނާ ދިމާއަށް އެއްޗެހިކީ….. އަހަރެންގެ ކުށެއް ނެތަސް، އަބަދުވެސް މަންމައަށް ގޯސްވާނީ އަހަރެން…. ކަމުގެ ދެކޮޅު ބަލާނުލާ، އަހަރެންނާ ދިމާއަށް އެއްޗެހި ގޮވައިގަންނާނީ…. ކިތަންމެ ރުޅިއަޔަސް މަންމަވީމަ ޖެހޭނީ އަނގައިން ނުބުނެ މަޑުން ހުންނަން….” އިސްޖަހާލައިގެން އިނދެ،  ލައިގެންއިން ކަޅުކުލައިގެ ޖެކެޓްގައިހުރި، ހުދުކުލައިގެ ގޮށްތަކާ ކުޅެލަމުން ޝިއުރީ ބުނެލިއެވެ. އޭނާގެ އަޑުންނާއި، ރާގުންވެސް މަންމަދެކެ ހިތްހަމަ ނުޖެހިފައިހުރިވަރު ދޭހަވެއެވެ.

“އައްދޭ މިމަންޖެ މީނީ ވަރަށް ރުޅިއައިއްސަ….. ތިހާ ރުޅިގަދަނުވެބަލަ…. ނޫނީ މުސްކުޅިން އެބުނަނީ ތެދެއްތަ…؟؟؟ ބޯބުޅިކުދިން ހަމައަސްލުވެސް އެހާ ރުޅިގަދައީތަ..؟؟؟” ގަޔަށް ސެންޓު ބުރުވާލަމުން އައިސް، ޝިއުރީގެ ދިގު އިސްތަށިގަނޑާ ކުޅެލަމުން، އަޔާނީ، ޝިއުރީއާއި ސަމާސާކޮށްލިއެވެ.

“ކޮންމެހެން އަހަރެންނާ ދިމާކުރާނެކަމެއް ނެތް… ނިމިއްޖެއްޔާ ދެންވެސް ހިނގާބަލަ ނުކުމެވޭތޯ ބަލަން… މިހާރު ގަޑިޖެހެނީއޭ….” ސޯފާއިން ތެދުވަމުން ޝިއުރީ، ކޮނޑުގައި އަޅުވާފައި އޮތް ދަބަސް ރަނގަޅުކޮށްލަމުން ހިނގައިގަތެވެ. އަޔާނީވެސް ކިޔަވާމޭޒާއި ގުޅިފައިހުރި ފޮތްހަރުގެ ބިއްލޫރި ދޮރެއް ހުޅުވާލުމަށްފަހު، އޭނާގެ ފޮތްތައް ހިފައިގެން ޝިއުރީގެ ފަހަތުން ދިޔައެވެ.

********************

އަޔާނީމެން، ގެއިން ނުކުތްތަނާ، ސައިކަލެއް އައިސް އެގޭ ދޮރުމަތީ މަޑުކޮށްލިއެވެ. ސައިކަލުގެ ފަހަތުގައި އިން މިޝްޔާ، އަޔާނީމެންނަށް ބަލާލަމުން ހިނިތުންވެލިއެވެ. އަދި ސައިކަލް ދުއްވަން އިން އޭނާގެ ބޭބެ މިޝަލްގެ ކޮނޑުގައި ހިފަހައްޓާލަމުން ސައިކަލުން ފޭބިއެވެ.

“ނުވަގަޑި ބައިގަ އަންނާނަން ބަލާ…؟؟؟” މިޝްޔާ، އަޔާނީމެންނާ ދިމާއަށް އެނބުރުނުވަގުތު، އޭނާގެ ކަރުގައި އޮޅާފައި އޮތް އަޅިކުލައިގެ ދޯޕައްޓާއަށް ދަމާލަމުން މިޝަލް ބުނެލިއެވެ.

“ދެން ދޮންބޭ….” މިޝަލްގެ އަތުތެރޭއޮތް އޮތް ދޯޕައްޓާއަށް ދަމާލަމުން، މިޝްޔާ މިޝަލަށް ލޯއަޅާލިއެވެ. މިޝްޔާ އިތުރަށް ރުޅިއަރުވާލުމަށްޓަކައި، މިޝަލް، މިޝްޔާގެ އިސްތަށިގަނޑަށް ދަމާލިއެވެ. އައި ރުޅިން މިޝްޔާ، މިޝަލްގެ އަތުގައި ބޮނޑިއެއް އަޅާލުމުން، އޭނާ ފެށީ ހޭށެވެ. އޭރު މަޖާވެފައި މިމަންޒަރު ބަލަން އަޔާނީ ހުރިއިރު، ޝިއުރީގެ މޫނުމަތީގައިވަނީ ތަފާތު އަސަރުތަކެކެވެ. އޭނާގެވެސް އެޢުމުރުގެ ބޭބެއެއް ހުރެއެވެ. ނަމަވެސް، މިޝްޔާއާއި، މިޝަލްގެ އެ އޮންނަކަހަލަ އެއްބަނޑު އެއްބަފާކަމުގެ ގާތްގުޅުމެއް، އޭނާއާއި، އޭނާގެ ބޭބެގެ ދެމެދަކު ނުވެއެވެ.

ޝިއުރީއަށް ސިއްރުން ބަލާލުމަށްފަހު، މިޝްޔާގާތު “ދަނީ”އޭ ބުނެފައި، މިޝަލް ސައިކަލް ދުއްވާލިއެވެ.

********************

މިޝަލް ދިޔުމުން، އެކިއެކި މަޖާ ވާހަކަ ދައްކަމުން ތިންކުދިން ދިޔައީ ހަނިމަގަކުންނެވެ. އެކުދިން، މިސްރާބު ޖަހާފައިވަނީ ޓިއުޝަންދޭ ގެއާއި ދިމާއަށެވެ. އެވަގުތު، މަގުމަތިން އެތިންކުދިން ފިޔަވާ އިތުރު މީހަކު ފެންނާކަށް ނެތެވެ. ފަޅުގެއަކާއި އަރާ ހަމަވިވަގުތު، އެގޭތެރެއިން ނުކުމެގެން އައި ބުޅަލެއް، އައިގޮތަށް އައިސް ޖެހުނީ އެގެއާއި އެންމެ ކައިރިއަށް ހުރި އަޔާނީގެ ފައިގައެވެ. އަޔާނީ ހަޅޭލަވައިގަތުމުން، ގާތުގައި ތިބި ދެކުދިންވެސް ބާރަށް ހަޅޭލަވައިގަތެވެ. ރުޅިއައިސްގެންކަމެއް ނޫނީ ބިރުންކަމެއް ނޭނގެއެވެ. ބުޅާވެސް، އޭގެ ބަހުރުވައިން ހަޅޭލަވަންފެށުމުން، އަޔާނީ ގަތީ އަމަށަކު ބިރެއްނޫނެވެ. އޭނާ ބަލާކަށް ނުހުރެ، ފުންމައިގެންފައި، އައިކޮޅަށް ދުއްވައިގަތީ، ބިރުގަތްވަރުންނެވެ. އޭރު، މިޝްޔާވެސް ހުރީ ބިރުން، ޝިއުރީގެ ފުރަގަހަށް ވަދެއެވެ. އަޔާނީ ދުވެފައި ދިޔަ ގޮތް ފެނި މަޖާވެގެން ޝިއުރީ ހޭންފެށިއެވެ. އޭރު އެބުޅާވެސް، ދުވެފައިގޮސް ޖެހިގެން އޮތްމަގަށް ލަނބާލައިފިއެވެ.

ދުވަމުން ދިޔަ އަޔާނީގޮސް ލައިގަތީ، މަގުގެ ވާތްފަރާތުގައިހުރި ފިހާރައިން ނުކުތް އަންހެންކުއްޖާގެ ގައިގައެވެ. ދެކުދިން ބިންމައްޗަށް ވެއްޓުންއިރު، އެކުއްޖާ އޮތީ، މިއަދު ވެހުނު ވާރޭގައި ހެދިފައިއޮތް ޗަކަފެންގަނޑުގައެވެ. އަތުގައި އޮތް ކޮތަޅުވެސް ވިއްސައިގެންގޮސް އޮތީ މާ ދުރުގައެވެ. އޭރު، މިޝްޔާމެންވެސް އެ ހިސާބަށް އަރާ ހަމަވަނީއެވެ. ޝިއުރީ، އަޔާނީއަށް ތެދުވަން އެހީވެދިންއިރު، މިޝްޔާ، އެ އަންހެންކުއްޖާއަށް ތެދުވުމުގައި އެހީވެދިނެވެ. ތެދުވިއިރު، އެކުއްޖާ ލައިގެންހުރި އަޅިކުލައިގެ ޓީޝާޓުގެ އެއްބައި އޮތީ ތެމިފައެވެ. ގަތާފައިވާ ދިގު އިސްތަށިގަނޑުގެ ކޮޅުވެސް އޮތީ ތެމިފައެވެ. މޫނުމައްޗަށް ވެއްޓިފައިއޮތް ކުރު އިސްތަށިކޮޅު އެއްފަރާތްކޮށްލުމަށްފަހު، އެ ކުއްޖާ ޓީޝާޓު ތެމިފައި އޮތް ދިމާލުން ގަޔާ ދުރުކޮށްލިއެވެ. އެކުއްޖާ ހުރި ހާލުފެނުމުން އަޔާނީ ދެރަވެލާފައި މަޢާފަށް އެދުނެވެ.

“ޔަނާލް….” އެވަގުތު ފިހާރައިގެ ކުރިމައްޗަށްހުރި ގެއާއި އިންވެގެން ހުރިގެއިން ނުކުތް އަންހެނަކު ގޮވާލިއެވެ.

“މިދަނީ” ޔަނާލް އެމިހާއަށް ބަލާލަމުން ބުނެލިއެވެ.

“އެއީ އެވަރުކަމެއް ނޫން” އަޔާނީއަށް ހިނިތުންވެލަމުން ޔަނާލް ބުނެލިއެވެ. ވިއްސައިގެން ގޮސްފައިއޮތް ޔަނާލްގެ ކޮތަޅު، ޝިއުރީ ގެނެސްދިނުމުން، އެ ހިފައިގެންގޮސް އެ އަންހެންމީހާއާއިއެކު އޭނާ ގެއަށް ވަނެވެ.

“އެއީ ކޮންކުއްޖެއް….؟؟؟” ޔަނާލްގޮސް ގެއަށްވަނުމުން މިޝްޔާ އަހާލިއެވެ.

“މީގެ ކުރިން އަހަރެން ނުދެކެން އެކުއްޖާއެއް…. މިރަށު ކުއްޖެއް ނޫންކަންނޭގެ…..” ލައިގެންހުރި ގަމީހުގެ ކަނުން، އައިނުގެ ލޯކޮޅު ސާފުކޮށްލަމުން މިޝްޔާގެ ސުވާލަށް އަޔާނީ ޖަވާބުދިނެވެ.

“އެކުއްޖާއަކީ ކާކުތޯ ބަލާނީ ފަހުން… ގަޑިޖެހެން ފަސްމިނެޓަށްވެއްޖެ…. ދެންވެސް ހިނގާބަލަ ދާން….” ދަބަހުގައި އޮތް ފޯނުން، ގަޑި ބަލާލުމަށްފަހު، މިޝްޔާއާއި، އަޔާނީގެ އަތުގައި ހިފައިގެން ހިނގައިގަންނަމުން ޝިއުރީ ބުނެލިއެވެ.

ނުނިމޭ