އެހެނަސް 1

“އޯމައިގޯޑް… އަޅޭ… އަލްޙަމްދުލިﷲ….”
އޭލެވެލް ޓެސްޓު ތަކުގެ މާކްސް ޝީޓު ފެނުމުން ނިކްހާ އަށް އުޅެފައި ނޫޅެވުނު ގޮތެއްވެސް ނޭނގުނެވެ. ކުޑަކުއްޖެއްހެން ހަޅޭއްލަވައި ގަނެފައި ފުންމައި ގަތެވެ. ކައިރީގައި ހުރި ޔަނާލް އުޅަނބޯށިން ޖަހާލުމާ އެކު ވަށައިގެން ނަޒަރު ހިންގާލާފައި ރަކިވެގެން އިސްދަށަށް ޖެހީ އެތާތިބި އެންމެންގެ ނަޒަރު އޭނާ އަށް އަމާޒު ވެފައިހުރިކަން އެނގުމުންނެވެ. ތިން މާއްދާއިން އޭ ސްޓާރ ލިބިފައި ވާއިރު ދެން ހުރި މާއްދާ ތަކުން ނިކްހާ އަށް އޭލިބިފައި ވެއެވެ. ޔަނާލް އަށް ވެސް ނިކްހާއެކޭ އެއްފަދައިން ރަނގަޅު ނަތީޖާ އެއް ލިބިފައި ވެއެވެ. ޔަނާލް ހޭންފެށުމުން ނިކްހާ ދުވެފައި އެތަނުން ނިކުތެވެ. ހެނދުނުގެ ވަގުތު ކަމުން މަގުތަކުގައި މީހުން ފުދޭވަރަކަށް މަދެވެ.
ގެހުންނަ މަގަށް އެޅުމުން ނިކްހާ ދުއްވައިގަތީ އަވަހަށް ދައްތައަށް މާކްސް ޝީޓު ދައްކަން ވެގެންނެވެ. ޔަނާލް ވެސް ނިކްހާ އުޅޭގޮތުން ކުދިކިޔަމުން އާދެއެވެ. ގޭގެ ދޮރާހަމައަށް ގޮސްފައި ނިކްހާ ހުއްޓިލީ ކަމަކަށް ތައްޔާރުވާ ފަދައަކުންނެވެ. ނިކްހާ އަކީ ހިމަ ތޮޅިކޮށް ހުންނަ މަޖާ މިޒާޖެއްގެ ކުއްޖެކެވެ. އޭނާގެ އުނަގަނޑާ ހަމައަށް އަންނަ ދިހުންކުލަ އަރާ ފަން އިސްތަށިގަނޑާއި އަޅިކުލައިގެ ދެލޮލަކީ ނިކްހާގެ ރީތިކަން އިތުރަށް ފުރިހަމަ ކޮށްދޭކަމެކެވެ. އެބޮޑު ދެލޮލުގެ ވަށައިގެން ހުރި ދިގު އެސްފިޔަތަކުން އެދެލޮލަށް ހިޔާ އަޅާލާފައި ވާއިރު ފިޔާތޮށިކުލައިގެ ތުނި ތުންފަތުގައި ވަނީ ލުއިހިނިތުން ވުމެކެވެ. ހަންގަނޑުގެ ދޮންކަމާއި ހެދުން އެޅުމުގެ ސްޓައިލުން ނިކްހާ ބޮޑަށް ވައްތަރީ ބޭރުގެ މޮޑެލް އަކާއެވެ.
“އެކަމަކުވާ ދޯ!… ނިކާ… ދެންވެސް ދާންވީ…” ނިކްހާ ގެއަށް ނުވަދެ ހުރުމުން ޔަނާލް ބުނެލިއެވެ.
“ނިޝްތާ… ނިކާ މިއޮށްއައީ…. އެކަށްޗަކުންވެސް ފާހެއް ނުވޭ… ޔަނާލް އަޑުގެ ނެތްތަނަށް ގޮވާލުމާއެކު ނިކްހާ ޔަނާލްގެ ގައިގައި ބޮނޑިއެއް އަޅާލިއެވެ. އެއާއެކު ޔަނާލް ނިކްހާއާ ދިމާއަށް ދޫނެރެލާފައި ދުއްވައިގަތެވެ. ގޭތެރެއިން ނިޝާފެންނަން ނެތުމުން ނިކްހާ ދިއައީ ނިޝާގެ ކޮޓަރިއާ ދިމައަށެވެ.
“ދޮންތާ.. ބަލްލްލލ….”
ދޮރުހުޅުވާލުމާއެކު ފެނުނު މަންޒަރުން ނިކްހާގެ ފައިދަށުން ބިންގަނޑު ދެމިގެންދިޔަ ފަދައެވެ.
އަތުގައި އޮތް ފޯމު އަތުން ދޫވެގެން ދިޔައިރު ދެލޮލަށް ތާޒާ ކަރުނަތައް ޖަމާވާން ފެށިއެވެ. އޭގެ ކުޑަ ހިނދުކޮޅެއް ކުރިން މޫނުމަތީގައި ވީ ހިނިތުންވުން ފޭދި އެމޫނަށް ބިރާ ސިހުމުގެ އެތައް ކުލަވަރެއް ވެރިވެގެންފިއެވެ. ހުރިތަނަށް ނިކްހާ ގަނޑުވެފައި ހުރިއިރު ލޮލަށް ފެނުނު މަންޒަރު ގަބޫލުނުކުރެވިގެން އުޅޭފަދައަކުން ދެއަތަށް ބޯހޫރަމުން ގެންދިޔައެވެ. ދުވަހަކުވެސް ހަމަލޮލަށް އެފަދަ މަންޒަރެއް ފެނިފައި ނުވާ ނިކްހާއަށް ތަންތަން އަނދިރިވަމުން ދިޔަފަދަ އިހްސާސެއް ކުރެވެމުން ދިޔައެވެ.
ބޮލަށް އެނބުރުންއަރާ ނިކްހާ އަރިއަޅާލިއިރު ޔަނާލްއަށް ނިކްހާ ހިފަހައްޓައެއް ނުލެވުނެވެ. ދޮރުކައިރީ ހުރި ގުޅީގައި ނިކްހާގެ ބޯ ބާރަކަށް ގޮސް ޖެހިފައި ވެއްޓުނެވެ. ޔަނާލް ދެލޯމަރާލުމަށްފަހު ނިޝާގެ ކޮޓަރި ދޮރު ލައްޕާލިއިރު އޭނާވެސް ހުރީ ޝޮކެއްގެ ތެރޭގައެވެ. ނަމަވެސް އެންމެ ގާތް އެކުވެރިޔާގެ ހާލު ފެނިފައި ހިތްވަރުކޮށް ނިކްހާއަށް އެހީތެރިވާން އަވަސްވެގަތެވެ. ޔަނާލް އޭނާގެ ފޯނުނަގާ ނަންބަރަކަށް ގުޅާލުމަށްފަހު ވާހަކަދެއްކި އިރު އޭނާގެ އަތުގައި މަޑު ތުރުތުރެއް އުފެދިފައި ވިއެވެ. ނިކްހާއަށް ބަލަންހުރެ ފޯނުބޭއްވުމަށް ފަހު ގޮސް އޭނާގެ ގާތުގައި އިށީނެވެ. އެއިރު ނިކްހާގެ ބޮލުން ފައިބަމުން ދިޔަލެއިން ސިޓިންރޫމްގެ ހުދު މާބްލްސްތައް ރަތްވަމުން ދިޔައެވެ. ޔަނާލް ނިކްހާގެ އަތްތިލައިގައި ހިފާ ބާރުކޮށްލިއިރު އަޑުންއަޑުނަގައި ރޯންފެށުނެވެ.

**ނުނިމޭ**

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.