ޔޫމީ

އަހަރެން އިނީ އޮފީހުގައެވެ. ކުރަން ހުރި މަސައްކަތްތައް ބައިވަރެވެ. އެހެނަސް، އެއްވެސްކަމެއް ކުރާ ހިތެއް ނެތެވެ. ވަގުތަކީ ހެނދުނުގެ ވަގުތެވެ. ކަމެއް ނުކުރެވި މޫޑު ކަޓާފަައި އިންނަތާ ގަޑިއިރެއް ވަނީއެވެ.

ވާނީވެސް އެހެންތާއެވެ. ގެއިން ނުކުތީ ކޮއްކޮ ކުރިކަމަކުން ހިތްހަމަނުޖެހި ހުރެއެވެ. އޮފީހަށް އައި މަގުމަތީގައި، ޓްރެފިކުގެ ބަލާވެރިކަން ޖެހުނެވެ. އަނެއްކޮޅުން ހޭލި ގޮތަށް އަހަރެން މިހުރީ ހުސް ބަނޑާއެވެ. އެހެން އިންދާ ފޯނަށް މެސެޖެއް އައި އަޑު އިވިގެން، ޖީބުން ފޯނު ނަގައި ބަލާލީމެވެ.

މެސެޖު ކިޔާލުމުން އިތުރައް މޫޑުވީ ގޯހެވެ. “ޑޯންޓް ވެއިޓް ފޯ މީ.. ޔޫ ގޮނަ ރުއިން ޔުވާ ލައިފް” އެއީ ޔޫމީ ގެ މެސެޖެކެވެ.

ޔޫމީއަކީ މީގެ މަހެއްވަރު ކުރިން އަހަންނަށް ފެނުނު ފަތްމިންޏެކެވެ. އޭނާ ފުރަތަމަ ފެނުނީ އަހަރެންގެ އެކުވެރިއަކާ އެކީ ހުއްޓައެވެ. އެކުވެރިޔާގެ ފަރާތުން އަހަރެން އޭނާއާ ރަހުމަތްތެރި ވީމެވެ. ޔޫމީ ފުރަތަމަ ފެނުނު ވަގުތުވެސް އަހަރެންގެ ހިތުގައި ނުޖަހާ ވިންދެއް ޖަހާލިއެވެ. އަހަންނަށް މަޑުމަޑުން ގަޔާވެވުނެވެ.

ކޮންމެ އަކަސް ޔޫމީއާ ދިމާވިތާ ވިއްސަކަށް ދުވަސް ފަހުން އަހަރެން ޔޫމީ ދެކެ ލޯބިވާ ވާހަކަ ބުނަން ގަސްތުކުރީމެވެ. މަހެއްވެސް ނުވެ ލޯބިވެވުން މިއީ ހައިރާން ވާންޖެހޭ ސަބަބެއް ނޫނެވެ. ﷲ ގެ ކުޅަދުންވަތަކަމުން ފުރަތަމަ ނަޒަރުން ވެސް ލޯބިވެވިދާނެ އެވެ.

އަހަރެން ޔޫމީއަށް ލޯބި ހުށައެޅީ ދިމާވިތާ ބަރާބަރު ބާވީސްވަނަ އަށް ވީ ދުވަހުގެ ރެއެވެ. އަހަރެން ކުރީ މެސެޖެކެވެ. ޖަވާބެއްގެ އިންތިޒާރުގައި ކެތްތެރިކަމާއެކު ހުއްޓާ، އައި ޖަވާބު ނިކަން ދެކިބަލާށެވެ. އޭނާގެ ޖަވާބަކަށް ދިހަ ދުވަހު އެއްޗެކޭ ނުބުނެ އަހަރެން ކެތްކުރީ ވާ ލޯތްބެއްގެ ބޮޑުކަމުންނެވެ.

ޔޫމީއަކީ މަޑުމަތިރި މިޒާޖެއްގެ ކުއްޖެކެވެ. އިންތިހާއަށް ލަދުރަކި ވާނެއެވެ. އާންމުކޮށް ލައި އުޅެނީ ދިގުހެދުމެވެ. ގޮތްގޮތަށް ބުރުގާ އެޅުމަކީ އޭނާ މާގަޔާވާކަމެއް ނޫނެވެ. އާދައިގެ ރީތި ގޮތަކަށް ބުރުގާ އަޅާލުމުން އޭނާއަށް ފުދެއެވެ. ހަމަ އެގޮތަށް މާގަދަޔަށް މޭކްއަޕް ކުރުމަކީ އޭނާ ކުރާ ކަމެއް ނޫނެވެ. ތުންފަތުގައި މަޑު ލިޕްސްޓިކް އެއް ނުޖައްސަ އެކޭ ނުބުނާނަމެވެ.

ބޭ އިހްތިޔާރުގައި އިސްކޫރު އަނބުރާލެވުމާއެކު، ފެން މާގަނޑުން އޮހެންފެށި ހިމަފޮދު ފެން ހަށިގަނޑުގައި ބީހިލިއެވެ. އެހިނދު އަހަރެންގެ ހިޔާލީ ދުނިޔޭން ނުކުމެވުނެވެ.