ދޭނަން ހިތާ ޖާނާ (27)

އެ ބޮޑު ބާލިސް ގެނެސް އައިފާގެ މޫނުގައި އަޅައި ފިއްތާލުމާއި އެކީ އޭނާ ނޭވާ ނުލެވިގެން ތެޅެން ފެށިއެވެ. އެތެރެ ހަށީގައި ނޭވާ ބެދި ހީވީ ފުއްޕާމޭ ފަޅައިގެން ހިނގައިދާނެ ހެންނެވެ. މުޅި މޫނު ބާލީހުން ފޮރުވިފައި ވީއިރު އެތެރެހަށި ބާރުވަމުން ދިޔަ އިހުސާސެއް އޭނާއަށް ވިއެވެ. ދެލޯ ރަތްވެ އަތް މުށްކެވުނު އިރު ބާލިސް ދުރުކޮށްލަން ވެސް އެއަތް ހަރާތެއް ނުކުރިއެވެ. ކަރުތެރެ އެއްކޮން ހިކި ހިންދިރުވައި ނުލެވުނެ އިރު ކަރުގެ ނާރުތަށް ވަނީ ނޭވާ ތާށިވުމުން ފުއްޕާފައެވެ. އައިފާއަށް ހީވީ އޭނާގެ އެންމެ ފަހުވަގުތު އައިސް ޖެހުނީ ހެންނެވެ. ސިކުނޑިއަށް ލޭ ދައުރުވުން ހުއްޓުނު އިރު މޭ ފަޅައިގެން ދިޔަ ކަހަލަ އިހުސާސެއް އޭނާއަށް ވިއެވެ.

“އައިފާ!” ލޫތްގެ އަޑަށް އައިފާ ސިހިފައި ދެލޯ ހުޅުވާލިއިރު ފެނުނީ ކަނު އަނދިރި ކަމެވެ. ހާސްވެފައި ހުރެ އެނދުގައި އިނދެ ތެޅި ފޮޅެމުން ދިޔައިރު ނޭވާ ވަނީ ކުރުވެފައެވެ. “ހޭއި.. ހުވަފެނެއް ފެނުނީތަ؟ އިޓްސް އޯކޭ.” އައިފާގެ މޫނުގައި ހިފައި ނިއްކުރީގައި ހުރި ދާތިކިތަށް ފޮހެދެމުން ލޫތް ބުނެލިއެވެ.

“ހުވަފެނެއް؟” އައިފާ މައިނޭވާ ލަމުން ބުނެލިއެވެ. “އާނ.. ފެންފޮދެއް ބޯލަބަލަ.” ލޫތް މިހެން ބުނެ ފެންތަށި އައިފާ ތުމުގައި ޖެހުމުން އޭނާ އޭގައި ހިފައި އެއް ނޭވާއިން ހުސްކޮށްލިއެވެ. އެނދުގައި ލެނގިލަމުން އައިފާ ދެލޯ މަރާލިއެވެ. އަދިވެސް އެ ހުވަފެން ހީވަނީ ކުރިމަތިން ފެންނަ ހެންނެވެ. ނޭވާ ނުލެވިގެން އުޅުނު އިހުސާސް ވުމުން ގައިން ހީބހި ނަގުވާލިއެވެ.

“އައިފާ ނިދިފައި އޮތީމަ ޑިސްޓާބް ނުކުރީ.. ޑޮކްޓަރ އަންނާނެ އިރުކޮޅުން ބޭސްގަނޑު ނަގަން. އޭގެ ފަހުން ދޯ ކާނީ.” ލޫތް އޯގާތެރި ކަމާއިއެކު ބުނެލިއެވެ. ނަމަވެސް އައިފާ ފަރާތުން އެއްވެސް ޖަވާބެއް ނުލިބުމުން ލޫތް އޭނާއަށް ނަޒަރު ހުއްޓާލިއެވެ. އިސްޖެހިފައި އިން އިރު އައިފާ އިނީ ފުން ޚިޔާލަކަށް ގެއްލިފައެވެ.

“ބޭބް.. އޭތް.” އައިފާ އަތުގައި ހިފާލަމުން ލޫތް ގޮވާލިއެވެ. އެއަޑަށް އައިފާ އިސްނެގި އިރު އެ ލޮލުގައި ކަރުނަ ބަބުޅަމުން ދިޔައެވެ. ކުރީގައި އައިފާއަކީ ހިތްވަރުގަދަ އެހައި ފަސޭހައިން ރޮއެ ހިތުގައި ޖެހޭ ކުއްޖެއް ނޫނެވެ. ނަމަވެސް އެކްސިޑެންޓަށްފަހު ކުދިކުދި ކަންތައްތަކުން ވެސް ހިތުގައިޖެހި ރޮވޭގޮތް ވެއެވެ.

ލޫތް އެއްޗެކޭ ބުނުމުގެ ބަދަލުގައި އައިފާ ގެނެސް މޭގައި ފޮރުވާލިއެވެ. އޭނާ ހިތްފުރެއްދެން ގިސްލަ ގިސްލާފައި ރޮމުން ދިޔައިރު ލޫތް އައިގައިން ވެސް ނުބުނެ އަތުގައި ފިރުމައި ދޭން އިނެވެ. މިވަގުތު އެންމެ ރަނގަޅު ވާނީ އައިފާ ހިތަށް ލުއިކަމެއް ދޭން ރުއިން ނުހުއްޓުވިއްޔާކަން އޭނާއަށް ވިސްނުނެވެ.

ބައެއްފަހަރަށް ވާހަކަ ދައްކައިގެން ކަންތައް ހައްލު ކުރުމުގެ ބަދަލުގައި ހިމޭންކަން އިޚުތިޔާރުން މާ ބުއްދިވެރިއެވެ. އިރުކޮޅެއްފަހުން އައިފާގެ ގިސްލު ހުއްޓި އޭނާ ތެދުވެ ނޭފަތް ދަމާލިއެވެ. ދެއަތުން ކަރުނަތަށް ފޮހެލަމުން ފުންނޭވާއެއް ލިއެވެ. “ތޭންކްސް.” އައިފާ މިހެން ބުނުމުން ލޫތް ހިނިތުންވެލިއެވެ.

“ހިނގާ މޫނު ދޮވެލައިގެން ޑޮކްޓަރ އަންނަން ވާއިރަށް ފްރެޝް ވެލައިގެން އަންނަން.” ލޫތް މިހެން ބުނެ އައިފާ އެނދުން ފޭބުމުގައި އެހީތެރިވެދިނެވެ. އިރުކޮޅެއްފަހުން އައިފާ ފާޚާނާއިން ނިކުއިން އިރު އަޒުރާ އެތެރެއަށް ވަންނަނީއެވެ. “ދަރިފުޅާ.. ކިހިނެތް މިހާރު؟ ބޮލުގައި ރިއްސާތަ؟” އަޒުރާ އައިސް އައިފާ އެނދުގައި ބައިންދަމުން ވާހަކަ ދެއްކިއެވެ. ޖަވާބުގައި އައިފާ ނޫނޭކޭ ބުނެ އެނދަށް އަރައި ރަޖާގަނޑު ގައިގައި އަޅާލިއެވެ.

އޭރު ޑޮކްޓަރ ނަރުސް ކުއްޖަކާއި އެކު އައިސް އެތަނަށް ވަނުމުން އަޒުރާ ދުރަށް ޖެހިލިއެވެ. “ޑޮކްޓަރ.” ލޫތް ހިނިތުން ވެލަމުން އައިފާ ކައިރިއަށް ޖެހިލިއެވެ. “ހެލޯ. އައިފާ ކިހިނެތް މިއަދު..” ޑޮކްޓަރ މިހެން ބުނެ އަތުގައި އޮތް ކުޑަ ޓޯޗުން އައިފާގެ ލޮލަށް އަލި ކުރުމަށްފަހު ބޭސްގަނޑު ނެގުމަށް ތައްޔާރު ވިއެވެ.

ބޭސްގަނޑު ނަގައި ނިމެންދެން އައިފާ އިނީ ނޭވާ ހިފައްޓާލައިގެންނެވެ. ދުރުގައި ހުރި ލޫތަށް އައިފާގެ ބޯ ފެނުމުން ހިތަށް ތޫނު ކަށިތަކެއް ހެރުނު ކަހަލައެވެ. ބޮލުގައި ފަހާފައި އިން ބޮޑު ތަންގަނޑު ފެނި ހިންދިރުވާލެވުނެވެ. އެމަންޒަރު އައިފާއަށް ނުފެނުން ކަމީ ނަސީބެކޭ އެވަގުތު އޭނާ ހިތަށްއެރިއެވެ.

“ދެ ދުވަސްފަހުން ރޮދި ކޮށަން ޖެހޭނެ. ސޯ ވީ ވިލް ޑިސްޗާޖް ޔޫ އާފްޓާ ދެޓް. އެއްވެސް އިންފެކްޝަންއެއް ވެފައެއް ނެތް. އޯލް ލުކްސް ނޯމަލް.” ޑޮކްޓަރ މިހެން ބުނެފައި ލޫތްއާއި ދެތިން ވާހަކައެއް ދައްކާލުމަށްފަހު އެތަނުން ދިޔައެވެ. ހިމޭނުން އިން އައިފާ މަޑުމަޑުން އެއްއަތުން ފަހާފައި އިންތަނުގައި އިނގިލިތަށް ހާކާލިއެވެ.

މި މަންޒަރު ފެނި ލޫތް ކައިރިއަށް ޖެހިލަމުން އައިފާގެ އަތުގައި ހިފިއެވެ. “އަތް ނުލައި.. ތަދުވެދާނެ.” ލޫތް މިހެން ބުނުމުން އައިފާ ހީލިއެވެ. “ވަރަށް ހަޑި ދޯ މިހާރު.. އަހަރެން އެހައި ދޮނެއް ނޫން އަދި ބޮލުގައި އިސްތައްޓެއް ވެސް ނެތް. އަނެއްކައި މިހާރު މިއިނީ ބޮޑު ލަކުނެއް.. އަހަންނަށް ނުފެނުނަސް އައި ނޯ އައި ލުކް އަގްލީ.” އައިފާ ދެރަވެފައި އިނދެ ބުނެލިއެވެ.

އޭރު ދުރުގައި ހުރި އަޒުރާ ވެސް ދަރިފުޅުގެ ސިފަ ފެނި ހިތުގައި ޖެހުނެވެ. “ނޫން.. އަހަރެންނަށް ހަޑިއެއް ނޫން.. ޔޫ އާ ސޯ ޕްރްޓީ.. އައިފާ ކޮންމެ ގޮތަކަށް ހުއްޓަސް ހަމަ އެހައި ހިތްގައިމު.. ދެން ނުބުނައްޗޭ ހަޑިއޭ އިނގޭ..” އައިފާ ކޮލުގައި ފިރުމާލަމުން ލޫތް ބުނެލިއެވެ. “ބަޓް ސްޓިލް.. މިހެން ހުއްޓައި އެހެން މީހުންނަށް ފެންނާކަށް ބޭނުމެއް ނޫން.” އައިފާ ދެރަވެފައި އިނދެ ބުނެލިއެވެ.

“މަންމަ މާދަން އަންނަ އިރުން ބޮލުގައި އަޅަން ސްކާފެއް ގެންނާނަށް.. އޭރުން ނުފެންނާނުން ދޯ.” އަޒުރާ މިހެން ބުނުމުން އައިފާ އެކަމާއި އެއްބަސްވިއެވެ. ލޫތް އެކަމާއި ދެކޮޅު ނުހެދީ އައިފާ ހިތްހަމަ ޖައްސައި ދިނުމަށްށެވެ.

****

ކޮޓަރީގައި ދެކޮޅަށް ހިނގާލަ ހިނގާލަ ހުރި އާޒިމާ ހުރީ ލުތުފީ ގެއަށް ނައިސް ލަސްވެފައެވެ. ކާން ހަދައިގެން ގުޅީމައި ޒުލޭހާ ގެއިން ކާ ވާހަކަ ބުނީން ސުރެ އާޒިމާ ހުންނަނީ މޫނު ހަދާފައެވެ. އެންމެފަހުން ކޮޓަރިން ނިކުމެ ގޮސް ބޮޑު ސޯފާގައި އިށީނދެލިއެވެ. އޭރު ލައިޝާ އާއި އާލާ ޓީވީން ފިލްމެއް ބަލަން ޝައުޤުވެރި ކަމާއިއެކު އިނެވެ.

އާޒިމާ އައިސް ސޯފާގައި ޖެހިގަތުމުން ލައިޝާ ސިހިފައި އޭނާގެ މަންމައަށް ނަޒަރު ހުއްޓާލި އިރު މޫނު ކުނިކޮށްގެން އިންގޮތުން އެއިނީ ކަމަކާއި ރުޅިއައިސްފައި ކަން އިނގުނެވެ. “މަންމާ ކިހިނެތްވީ؟” ލައިޝާ އަހާލިއެވެ. “ނޭނގެ.. މިހާރު ބައްޕައަށް މިގެއިން ކެވޭ ކަމަކަށް ނުވޭ. އެހައި މީރުކޮން މަސް ފިހުނީމަ ވެސް ނައެއްނުން.” އާޒިމާ އައިނު މައްޗަށް ޖައްސާލަމުން ބުނެލިއެވެ.

އެވަގުތު ގޭގެ ދޮރު ހުޅުވާލާފައި އެތެރެއަށް ވައިން ލުތުފީ ފެނި އާޒިމާ ތުން އަނބުރާލަމުން އަނެއް ފަރާތަށް އެނބުރުނެވެ. ލުތުފީ ލައިޝާއަށް ނަޒަރު ހުއްޓާލިއިރު އޭނާ ދެފަރާތަށް ބޯ ހޫރުވާލަމުން އާޒިމާ އެއިނީ ރުޅި އައިސްފައި ކަން އަންގާލިއެވެ.

ލުތުފީ ނިތްކުރީގައި އަތް ހާކާލިއިރު ކަންތަކާއި ޖެހުނިއްޔޭ ހިތަށްއެރިއެވެ. “އާޒިމާ..” ލުތުފީ ގޮވާލުމުން ވެސް އާޒިމާ ޖަވާބެއް ނުދިނެވެ. އޭރު އާލާ އިނީ މަންމަގެ ހަރަކާތްތަކުން ހެވިފައެވެ. “އާޒީ..” ލުތުފީ ނިކަން ލޯބިން ގޮވާލުމުން ލައިޝާ ހިނިގަނޑު މަތަކުރެވުނީ ކިރިޔާއެވެ.

“ރުޅި އައީތަ؟ ހިނގާދޯ މާދަން ބޭރަށް ކާން ގޮސްލަން. ދޯ ދޮން ދޫނީ..” ލުތުފީ އައިސް ކައިރީގައި އިށީނދެ އާޒިމާގެ ކޮނޑުގައި އަތްލަމުން ބުނެލިއެވެ. “ކޮން ދޮން ދޫންޏެއް ކިރު ދޫންނެއް ކިޔާކަށް..” އާޒިމާ އަތް ފޮޅުވާލުމުން ލައިޝާމެން ހިނިގަނޑު ފަޅައިގެން ދިޔައެވެ. ލުތުފީ ހޭން މަސައްކަތް ނުކުރި ނަމަވެސް ކާމިޔާބެއް ނުވިއެވެ.

“މަޖައެއް ނޫނޭ.. އަބަދު އެގޭން ކާންވަނީ.. އެވަރުން މަސް ގެނެސްގެން މަސްފިހެދިނީމަ ވެސް. ދެން ނުފިހެދޭނަށް. މިބުނީ ނުފިހަދޭނަމޭ.” އާޒިމާ އައި ރުޅިގައި ތެދުވެ ބާލިސް ސޯފާ މައްޗަށް ޖަހާފައި ކާމޭޒުގައި ހުރި ތަށިތައް ނަގަން ފެށިއެވެ. “މިރޭ ދުވަސް ދިޔައީ މި.” ލުތުފީ މިހެން ބުނުމުން ލައިޝާ ހިނިތުންވެލިއެވެ. “ބައްޕަ ދޭ ދެން ވެސް އިތިކޮޅެއް ކާލަން.. އެހެން ނޫނީ މިއިން ދުވަހަކު ދެން މިގޭގައި މަހެއް ނުފިހޭނެ.” ލައިޝާ ސިއްރު ސިއްރުން ބުނެލިއެވެ.

“ކޮބާތަ ނުކެވިފައި އަދި.. ހިނގާބަލަ ކާލަން.” ލުތުފީ ތެދުވެ ކާމެޒާއި ދިމާއަށް ދަމުން ބުނެލިއެވެ. އޭރު ވެސް އާޒިމާ ހުރީ މޫނު ހަދާފައެވެ. “ދެން ހިނގާބަލަ.” އާޒިމާ އެއްޗެކޭ ނުބުނެ ހުރުމުން ލުތުފީ ނިކަން ލޯބިން ބުނެލިއެވެ. “ހޫމް. އިށީނދެ.” އާޒިމާ މިހެން ބުނެ ފިހުނު މަހާއި ރޮއްޓާ ގެނެސްދިނެވެ.

ޒުލޭހާ ގެއިން އެހައި ބައިވަރު ކައިގެން އައިސް އަނެއްކާ މި ކެވޭނެ ބާއެ ލުތުފީ ހިތަށް އެރިއެވެ. ނަމަވެސް އާޒިމާގެ ހިތްހަމަ ޖެހުމަށް މިކަން ވެސް ކުރުމަށް ނިންމިއެވެ. ގަދަކަމުން ކެއުން ކުރިއަށް ގެންދިޔައިރު އާޒިމާ އިނީ ހެވިފައެވެ. އެކި ވާހަކަތައް ދައްކަމުން ދިޔައިރު މި މަންޒަރު ބަލަން ދުރުގައި ތިބި ލައިޝާ އާއި އާލާ ތިބީ ބައްޕަގެ ހާލުފެނި ހެވިފައެވެ.

****

މެންދުރުގެ ހޫނު އަވިން ޖައްވު އާވި ކުރުވާފައި ވީއިރު އާޒިމާ ހޮސްޕިޓަލް ތެރެއަށް ވަދެގެން އައީ އައިފާއާއި ބައްދަލު ކޮށްލުމަށްށެވެ. ލިފްޓަށް އަރައި އޭނާގެ މަންޒިލަށް ދެވުމުން އާޒިމާ މިސްރާބުޖެހީ އައިފާގެ ކޮޓަރިއާއި ދިމާއަށްށެވެ. ދޮރުގައި ޓަކި ޖަހާލުމަށްފަހު އެތެރެއަށް ވައިން އިރު ލީނާ ހެވިފައި އައިފާއާއި ވާހަކަ ދައްކަން އިން މަންޒަރު ފެނި އޭނާ ހައިރާން ވިއެވެ.

ލީނާ އެތަނަށް އަންނަކަން އާޒިމާއަކަށް އަދި ނޭނގެއެވެ. “އައިފާ..” އާޒިމާގެ އަޑަށް ލީނާ އެދިމާއަށް ނަޒަރު ހުއްޓާލިއެވެ. އޭނާ ހިނިތުން ވެލަމުން ތެދުވެ އާޒިމާއަށް ގޮވާލިއެވެ. އޭރު އައިފާ އިނީ ބޮލުގައި ފެހި ކުލައިގެ ބޮޑު ރުމަލެއް އައްސައިގެންނެވެ. “ބޭސްގަނޑު ނެގީތަ މިހާރު؟” އައިފާ ކައިރި މަޑުކޮށްލަމުން އާޒިމާ ބުނެލިއެވެ.

ލީނާ ކައިރީގައި ސުވާލުކުރަން އުޅެފައި ވެސް އަޅާނުލީ އޭނާ ލީނާއަށް އެއްވެސް ވަރަކަށް އިތުބާރު ނުކުރާތީއެވެ. “އައިފާ ދަނީ އިނގޭ ދެން.. އައިފާ މޮމް އަންނާނުން އިރުކޮޅަކުން.. އެންޑް ޝީ އިޒް ހިއާ ޓޫ.. ބައި އިނގޭ. ސީޔޫ މާދަން..” ލީނާ ހިނިތުންވެލާފައި ދަބަސް ހިފައިގެން އެތަނުން ނިކުތެވެ.

އޭރުވެސް އާޒިމާ ހުރީ ދެބުމަ ގޮށްޖަހިއިގެން ލީނާ ދާތަން ބަލާށެވެ. އައިފާގެ މޫނުމަތިން މާޔޫސްކަން ފާޅުވުމުން އާޒިމާ އެނދުގައި އިށީނދެ އޭނާގެ ބޮލުގައި ފިރުމާލިއެވެ. “ކީއްވެ މާ ދެރަވެފައި ތިއިނީ؟ ތަދުވަނީތަ؟” އާޒިމާ އޯގާތެރި ކަމާއިއެކު އަހާލިއެވެ. “ނޫން.. ކަމެއް ނުވޭ.” އައިފާ ހަޤީޤަތް ސިއްރު ކުރަމުން ބުނެލިއެވެ.

“ނޫނޭ.. ކޮންމެ ވެސް ކަމެއް ވެއްޖެ. ލީނާ މިގަޑީގައި މިތަނަށް އެއައީ ކީއްވެ؟” އާޒިމާ އަހާލިއެވެ. ކުރީދުވަހު ލީނާ އައިސް ދެއްކި ވާހަކަތައް އައިފާ ކިޔައި ދިނުމުން އާޒިމާއަށް ވެގެން އުޅޭގޮތް އޮޅުން ފިލިއެވެ. “މަންމާ.. މަންމަ ޤަބޫލުތަ އަޅުގަނޑު ލޫތްއާއި އިންނަން؟ މިބުނީ މިހާލަތުގައި ލޫތްއާއި އިނދެގެން އުޅެން” އައިފާ ފާރަށް ނަޒަރު ހުއްޓާލައިގެން އިނދެ ބުނެލިއެވެ.

އައިފާ މިހާރު ކުރިއަށް ވުރެ ރަނގަޅެވެ. މޫނުމަތިން ވަރުބަލިކަން ފިލައިގޮސް ކުޑަކޮން މީހާ ފަލަ ވެއްޖެއެވެ. އެހެންނޫނީ ވޭތުވެ ދިޔަ ހަފްތާތަކު ތެރޭގައި ހިތާމަ ކުރުމާއި ރުއިމުގެ ސަބަބުން މުޅި މިހާވަނީ ހިކި ގައިން ވަރު ދޫވެފައެވެ. “އާނ. މަންމަ ޤަބޫލު. އައިފާ ކޮންމެ ހާލަތެއްގައި ހުއްޓަސް އެއްވެސް ޝަކުވާއެއް ނެތް. ކިހިނެތްވީ؟ މީހަކު އެއްޗެކޭ ބުނީތަ؟” އާޒިމާ އިނީ އައިފާގެ ވާހަކަތަކުން ވެގެން އުޅޭގޮތް އޮޅުން ނުފިލާފައެވެ.

“އަޅުގަނޑު ޖެހިލުންވަނީ މިހާލަތުގައި ހުރެ ލޫތްއާއި އިންނަން.. ކިހިނެތް ލޮލަށް ނުފެންނަންޏާ އެކީގައި އުޅޭނީ.. އަނެއްކާ ލޫތްއަށް ވެސް އުނދަގޫ ވާނެ.. އިނގޭ ލޫތް ކައިވެނި ކުރަން ބޭނުންވާކަން. އަޅުގަނޑު ވެސް އެގޮތް ބޭނުން. އެކަމަކު މިކަމާއި ހެދި ލޫތްއަށް ބުރައެއް ޖައްސާކަށް ނޭދެން.. ލޫތް ކުރިން ލީނާއާއި އެކީ އުޅުން އިރު..” އައިފާ މިހެން ބުނެފައި ވާހަކަ މެދު ކަނޑާލިއެވެ.

ލީނާގެ ނަން އިވުމުން އާޒިމާއަށް ވަގުތުން މިވެގެން އުޅޭގޮތް ޔަޤީންވިއެވެ. ލީނާ އެއުޅެނީ އައިފާގެ ބޮލަށް އެރިގެން އޭނާއަކީ ލޫތްއާއި ގުޅެން އެންމެ އެކަށިގެންވާ ހާލަތުގައި ހުރި މީހެއް ނޫންކަން އަންގައިދޭށެވެ. އެކަން ކޮށްގެން އައިފާގެ ހިތުގައި ކައިވެންޏާއި މެދު ޝައްކު އުފައްދާ އަލުން ލީނާއަށް ލޫތްއާއި ގުޅުމުގެ ފުރުސަތެއް ލިބޭތޯ އުޅެންށެވެ.

“ތިކަމާއި ކަންބޮޑު ނުވޭ.. ލޫތްއަށް އެއްވެސް އުނދަގުލެއް ނުވާނެ އައިފާއާއި އެކީ އުޅޭކަށް. މީހުން ދައްކާހައި ވާހަކައަކަށް ހެއްލުމުގެ ބޭނުމެއްނެތް..” އާޒިމާ މިހެން ބުނުމުން އައިފާ ކުޑަކޮން ހިނިތުންވެލިއެވެ. އާޒިމާ ހުރީ ލީނާގެ އަމަލުތަކުން އިންތިހާއަށް ރުޅި އައިސްފައެވެ. ލީނާ ހަމައަކަށް އެޅުވޭނީ ރަނގަޅު ލަނޑެއް ދީގެންކަން އާޒިމާ ނިންމިއެވެ. ލީނާ ހިތުން ކިތަންމެ މޮޅު ކުޅިގަނޑެއް ކުޅުނަސް އާޒިމާއަކީ މިކަމަށް އާ މީހެއް ނޫނެވެ.

****

ކޮޓަރީގައި ލެޕްޓޮޕް ހުޅުވައިގެން އިން ލީނާ އިނީ ލޫތްއާއި އޭނާގެ ފޮޓޯތަށް ބަލާށެވެ. ދުބާއިގައި އުޅުން އިރު ނަގާފައި ހުރި ފޮޓޯތައް ފެނި އެ ތުންފަތަށް ލުއި ހިނިތުން ވުމެއް ވެރިވިއެވެ. އެވަގުތު އެނދުމަތީގައި ޗާޖަށް ޖަހާފައި އޮތް ފޯނު ރިނގުވި އަޑަށް އޭނާ ލެޕްޓޮޕް ލައްޕާލުމަށްފަހު ފޯނު ނެގިއެވެ.

“ހަލޯ؟” ގުޅީ ނުދަންނަ ނަމްބަރަކުން ކަމުން އެއީ ކާކު ކަމެއް ލީނާއަކަށް ނޭނގުނެވެ. “ލީނާ. މިއީ އާޒިމާ.” އެކޮޅުން އާޒިމާގެ އަޑު އިވުމުން ލީނާ ހައިރާން ވިއެވެ. ކުއްލިއަކަށް އާޒިމާ އޭނާއަށް ގުޅަން ވީ ސަބަބެއް ނުވިސްނުނެވެ. “ކިހިނެތްވީ؟” ލީނާ ދެޚިޔާލެއްގައި ހުރެފައި އަހާލިއެވެ.

“އަހަރެން ބޭނުން ލީނާއާއި ބައްދަލު ކޮށްލަން.” އާޒިމާ މިހެން ބުނުމުން ލީނާ އެދުން ތެދުވެ ހުޅުވާފައި ހުރި ކުޑަދޮރު ކައިރީގައި މަޑުކޮށްލިއެވެ. އޭރު ހަވީރުގެ ފިނި ވައިރޯޅިތަކުން ދޮރު ފޮތިގަނޑު ވިހުރެމުން ދިޔައެވެ. “އެ ކީއްކުރަން؟” ލީނާ ހުރީ ވާނުވައި ނޭނގި ހާސްވެފައެވެ. އަނެއްކާ އޭނާ އަލުން ލޫތްގެ ހަޔާތަށް ދިޔަ މަޤްސަދު އިނގުނީ ބާއޭ ހިތައި ޖެހިލުންވިއެވެ.

“ބުނަން. ލީނާ ވެސް އަދި އަހަރެން ވެސް ބޭނުންވަނީ އެއްކަމެއް. އެހެންނުން. އިނގެއެއްނުން މިބުނި ވާހަކަ. އެހެންވީމަ ހިނގާ ބައްދަލު ކޮށްލަން.” އާޒިމާ މިހެން ބުނުމުން ލީނާ ވިހަ ގޮތަކަށް ހީލިއެވެ. އާޒިމާ އެހައި ސީދާކޮން އެހެން ބުނާނެ ކަމަކަށް އޭނާ ފަހަރެއްގައި ވެސް ހިއެއް ނުކުރެއެވެ. މިހާރު މިކަން މާ ފަސޭހަ ވީއޭ ހިތަށް އެރުމުން އޭނާ ބައްދަލު ވާން އެއްބަސް ވިއެވެ.

ލީނާ ފޯނު ބޭއްވުމަށްފަހު ދޮރު ކަނީގައި އަތް އަޅުވާލަމުން މޫނު މައްޗަށް ވެއްޓިފައި އޮތް ބުޅި އިސްތަށިކޮޅާއި ކުޅެލިއެވެ. ލީނާ ހިތުން އޭނާގެ ބޭނުން ފުރިހަމަ ވުމުގައި އާޒިމާގެ އެހީތެރިކަން ލިބި ލޫތްގެ ހަޔާތުން އައިފާ ނިކަން ފަސޭހައިން ދުރުކޮށްލެވިދާނެއެވެ. ނަމަވެސް ލީނާ މިބެދުނީ އޭނާ އަމިއްލައަށް ރޭވި ކުޅިގަނޑުގައި ކަމެއް ނޭގުނެވެ.

-ނުނިމޭ-