ނަޖާ (ހަތްވަނަ ބައި)

ފަޔާޒް ހުރީ އިންތިހާއަށް ދެރަވެފައެވެ. އޭނަ ހޯދަން ޝިޔާނާ އެއަރޕޯޓަށް އަންނާނެ ކަމަކަށް ފަޔާޒް އުންމީދެއް ނުކުރެއެވެ. “ނާއިފް، ވަރަށް ބޮޑަށް ސޮރީ… އަހަރެން އެކޮޅަށް ދިޔައިރު މަންމަގެ ހާލު ވަރަށް ސީރިއަސް… އަނެއްކޮޅުން ޔުނިވަރސިޓީއަށް ވަނުމަށް ފޯމު ފުރުމާއި އިންޓަރވިއުތަކުގައި އަވަދިނެތި އުޅެން ޖެހުނީ….. ދެތިން މަސް ފަހުން މެއިލް ޗެކް ކުރަން ބެލިއިރު އަހަރެންގެ އީމެއިލް އައިޑީ އިނީ ހެކްކޮށްފައި… ސޯ.. އާ އައިޑީއެއް ހެދީ… ޝިޔާނާގެ ނަންބަރަށް ގުޅިއިރު ފޯނު ނިވާލާފަ އޮތީ….” ފަޔާޒް އޭނާއަށް ކަންތައް ދިމާވިގޮތް ނާއިފަށް ކިޔައިދިނެވެ.

ކާރު ސްޓަރޓްކޮށްލި އިރުވެސް މެދުކެނޑުމެއް ނެތި ވާރޭ ވެހެމުން ދިޔައެވެ. ކާރުގެ ވިންޑް ސްކްރީން ވައިޕާރ ޖައްސާލުމަށްފަހު ކާރު ދުއްވާލީ ނާއިފް އޭނާގެ ގެއަށް ލުމަށްފަހު ގެއަށް ދިޔުމަށެވެ. މާދަމާ ޝިޔާނާއާއި ބައްދަލު ކުރުމަށްފަހު ކަންތައް ވީގޮތުގެ މަޢުލޫމާތު ހޯދާނީއޭ ހިތާ، ނުތަނަސްވެފައިވާ އޭނާގެ ބަލިކަށި ހިތަށް ވިސްނައިދެމުންނެވެ.

ޝިޔާނާގެ ޙާލަތު

އާދުވަހަކަށް އިރު އެރީއެވެ. ފަޔާޒް ލޯ ހުޅުވާލުމަށްފަހު ގަޑިއަށް ބަލާލިއެވެ. އަސްތާ! ކަމުކުދާކަށްނެތެވެ. މިހާރު އެއޮށް 9:30 ވަނީއެވެ. ކޮޓަރީގެ ފާރުގައި ހަރުކޮށްފައިވާ 45 އިންޗީގެ ބޮޑު ޓީވީ ހުޅުވާލުމަށް ފަހު ފަޔާޒް ފާހާނައަށް ވަނީ އަވަހަށް ފެންވަރާލާށެވެ. ފެންވަރައިގެން ނިކުތް އިރު ޓީވީން ދައްކަމުން ދިޔައީ، ހުޅުމާލޭ ޗައިނާ ޓައުންގައި މީހަކު މަރާލައިގެން އުޅޭ ޚަބަރެވެ.

“ކުށްވެރިޔާގެ އެއްވެސް މަޢުލޫމާތެއް ފުލުހުން ދީފައެއް ނުވޭ…. ތަޙްޤީޤު ކުރުމުގެ މަރުހަލާއަށް ފަހު ވަކި ޖަވާބެއް ދެވޭނެ ކަމަށް ފުލުހުންގެ މީޑިޔާ އޮފިޝަލް ވަނީ ބުނެފަ…. މިކަމާއި ބެހޭގޮތުން އިތުރު ތަފްޞީލް ލިބުނު އެންމެ އަވަހަކަށް ތިޔަ ބޭފުޅުންނާ ހިއްސާ ކުރަމުން ދާނެ ވާހަކަ ބުނެލަމުން އަވަސް ޚަބަރު، އަޅުގަނޑު އާމިނަތު ޝީޒާ، މި މެދުކަނޑާލަނީ…” ރީތި ވުމަށްފަހު ޓީވީ ނިއްވާލައި ކޮޓަރިން ފަޔާޒް ނުކުތީ އޮފީހަށް ދިޔުމަށެވެ. ސޯޝަލް މީޑިޔާގައިވެސް ހޫނުކޮށް ދެކެވެމުން މިދަނީ މި މަރުގެ މައްސަލައިގެ ވާހަކައެވެ.

*** *** *** *** *** ***

ފައިލަށް ބަލަހައްޓައިގެންނެވެ. އޮފިސަރ އައިންތު ޝިޔާނާގެ ބަޔާން ގެނެސްދިނެވެ. އައިންތު ގާތު މަޑުކޮށްލުމަށް ފަޔާޒް އެދުނެވެ. އަދި ކެބިންގައި އައިންތު އިށީނީ ފަޔާޒްގެ އެދުމުގެ މަތިންނެވެ.

“ޝިޔާނާގެ ކޭސް އަދި ވަރަށް ރަގަޅަށް ބަލަން އަހަރެން ބޭނުން…. ތަޙުޤީޤު ކުރަން ފޮނުވި ތަކެތީގެ ތެރެއިން ޔޫރިން އަދި ބްލަޑް ރިޕޯޓުގައި މަސްތުވާތަކެތީގެ އެއްވެސް ނިޝާނެއް ނެތް…. ކުށުގެ ވެށިން ފެނުނު ވަޅީގަޔާއި ފޯނުގައި ތިން މީހެއްގެ އިނގިލީގެ ނިޝާން ފެންނަން އެބަހުރި… ޝިޔާނާގެ ބަޔާނުގައި މި ހާދިޡާ ހިނގިގޮތް ހާމަކޮށްފައިވާ އިރު އެމަންޒަރު ދުށް އެހެން މީހަކު ނުވާކަމަށް ބުނެފައިވޭ…. އަދި ޝިޔާނާ މިކަން ކޮށްފައިވަނީ އޭނާ އެކަނިކަމަށް ބުނާ ބުނުން، އެއީ ހަޤީޤަތެއް ކަމަށް ބަލައިގަންނަން ވަރަށް އުނދަގޫ….” ފަޔާޒް ޝިޔާނާގެ މައްސަލައާއި ބެހޭ ގޮތުން ޚިޔާލު ފާޅުކުރަމުން ދިޔައެވެ.

ދެން ކަންކުރަންވީ ގޮތް އައިންތުއަށް އޮޅުން ނުފިލާތީ ފަޔާޒް އާއި ސުވާކޮށްލިއެވެ. “ދެން މިކަމުގައި އަޅުގަނޑުމެން ކިހިނެއްތޯ ހަދާނީ؟”
ފަޔާޒް ވަރަށް ވިސްނާލުމަށްފަހު ޖަވާބު ދިނެވެ. “މިކޭސް އަދި އިތުރަށް އިންވެސްޓިގޭޓް ކުރަން އެބަ ޖެހޭ…. ހެކިތަކުން ދައްކާގޮތުގައި ފޮރުވިފައިވާ ސިއްރުތަކެއް މީގައި ހުރުމުން….. މިމަސައްކަތުގައި އަހަރެމެންނާ އެކު އެހީތެރިވާން ޑިޓެކްޓިވް ނާއިފް މަސައްކަތް ކުރަން ފެނޭ” ފަޔާޒް އޭނާ ބޭނުންވާ ޕޮއިންޓަށް ދިޔައެވެ. އަދި އައިންތު ގާތު ނާއިފަށް ގޮވާލުމަށް އެދުނެވެ.

އައިންތު އެ ކެބިންއިން ނިކުމެގެން ދިޔަތާ ކުޑަ ވަގުތުކޮޅެއްގެ ތެރޭގައި ފަޔާޒްގެ ކެބިންއަށް ނާއިފް އަތުވެއްޖެއެވެ. ދެމީހުން އެކީގައި ތިބީ ތަޙުޤީޤު ކުރުމަށް ހަދަންޖެހޭ ޕްލޭން ރޭވުމުގައެވެ. ކުއްލިއަކަށް ފަޔާޒްގެ ކެބިންގެ ދޮރު ހުޅުވާލުމަށް ފަހު އައިންތު ބޯދިއްކޮށްލިއެވެ. އައިންތުގެ މޫނުމަތިން ފާޅުވަމުން ދިޔައީ ހާސްކަމެވެ. ލޯވަނީ ބޮޑުވެފައެވެ. ފަޔާޒާއި ނާއިފްގެ މޫނަށް ވަކިވަކިން ބާލާލުމަށްފަހު އައިންތު ވާހަކަ ދެއްކިއެވެ.
“ޝިޔާނާއަށް މެޑިކަލް ފަރުވާ ބޭނުންވެއްޖެ… އޭނަގެ ހާލް ވަރަށް ސީރިއަސް…” އައިންތުގެ ބަސްތަކުން ފަޔާޒަށް ހީވީ ހަށިގަނޑުގައި ކަރަންޓު ޖެހުނުހެންނެވެ. އަތުގައި ހުރި ޝިޔާނާގެ ބަޔާނުގެ ގަނޑުތައް މޭޒުމަތީގައި ބެހެއްޓުމަށްފަހު ކެބިން ތެރެއިން ނިކުމެ ދުއްވައިގަތީ ޝިޔާނާ ހައްޔަރުކޮށްފައި ހުރި ކުށްވެރިންގެ ކޮޓަރިއާއި ދިމާލަށެވެ.

ކޮޓަރީގެ ދޮރު ހުޅުވާލި އިރު ދެ އަންހެން ފުލުހުން ޝިޔާނާގެ އަތުގައި ހިފަހައްޓައިގެން މައިތިރި ކުރެވޭތޯ މަސައްކަތް ކުރަނީއެވެ. މުޅިމީހާގެ ގަޔަށް ވަނީ ފާޑެއްގެ ގަދަ ބާރެއް އަރާފައެވެ. ރޯ މަހެއްހެން ޝިޔާނާ ތެޅި ފޮޅެނީއެވެ. ދެ ފުލުހުންނަށް އޭނާ ހިފަހައްޓާލެވެނީ ހަމަ ކިރިޔާއެވެ. ދެލޯވަނީ ބޮޑުވެފައެވެ. ކަޅިވަނީ މައްޗަށް އަރާފައެވެ. ދެތުންފަތް ދެމެދުން ފޮނުތަކެއް ފައިބަނީއެވެ. ފަޔާޒަށް ހުރެވުނީ ހަދާނޭ ގޮތެއް ނޭނގިފައެވެ. ފަޔާޒްގެ ފަހަތުން އައިސް އެ ކޮޓަރިއަށް ނާއިފް ވަނީ މެޑިކަލް ހެލްޕް ގެނައުމަށް ރިސެޕްޝަންއަށް ގުޅާފަ އެދެމުންނެވެ. އިރުކޮޅަކުން ޝިޔާނާގެ ގައިން ބާރު ދޫވާން ފެށިއެވެ. އަދި ހަރަކާތް ހުއްޓި އޭނާގެ ލޯމެރިއްޖެއެވެ.

ފަޔާޒް ޝިޔާނާއާއި ކައިރިވާން އެޅި ފިޔަވަޅު ހުއްޓުވީ ނާއިފެވެ. އެވަގުތު އެ ކޮޓަރީގެ ދޮރި ހުޅުވާލުމަށްފަހު އެތެރެއަށް ވަނީ ފުލުހުންގެ މެޑިކަލް އޮފިސަރ ޑރ.އަމީލިޔާއެވެ. ޑރ.އަމީލިޔާ އަކީ ހުޅުމާލޭގެ ފުލުހުންގެ ހެޑްކުއާރޓާސަށް ގެނެވޭ އަންހެން ކުށްވެރިންގެ މެޑިކަލް ކަންތަކުގައި އިސްވެ އުޅޭ ޑޮކްޓަރެވެ.

“ހުރިހާ ބޭފުޅުން ބޭރުގައި މަޑުކޮށްލެއްވުން އެދެން….” ޑރ.އަމީލިޔާ ޝިޔާނާ ކައިރިއަށް ޖެހިލަމުން ކޮޓަރީގައި ތިބި ހުރިހާ ފުލުހުންނަށް އިޝާރާތްކޮށްލާފައި ބުންޏެވެ.
ފަޔާޒްވެސް އެހެން ފުލުހުންނާއި އެކު އެ ކޮޓަރިން ބޭރުގައި މަޑުކޮށްލިއެވެ. ވިއްސަކަށް މިނެޓަށްފަހު އަމީލިޔާ އެ ކޮޓަރިން ނުކުމެ ފަޔާޒާއި މުޚާތަބުކޮށް ވާހަކަ ދެއްކިއެވެ. “ޝިޔާނާއަށް އެވަނީ ސްޓްރޯކެއް ޖެހިފައި… އަސްލު ބުނެވޭނީ އޭނާގެ ހަށިގަނޑު ވަރަށް ވީކޭ… ލިބިފައިހުރި ގެއްލުން ބަޔާންކުރެވޭނީ ސީޓީ ސްކޭނަކަށްފަހު… އައިވީއެއް އަޅާ އަދި އިތުރު ފަރުވާވެސް ދޭން ޖެހޭ… ސޯ ބެޓަރ ހަރީ… ވީ އެންމެ އަވަހަކަށް ހޮސްޕިޓަލަށް ގެންދަން ފެނޭ” އަމީލިޔާ މިހެން ބުނުމަށްފަހު އަތަށް ލައްވާފައިވާ އަންގި ބޭލިއެވެ. ކައިރީގައި ހުރި ކުނި ވަށިގަނޑު ތެރެއަށް އަންގި ލުމަށްފަހު އިދާރީ ބައިގެ ތެރެއަށް ވަނެވެ.
ފަޔާޒާއި އެކު ނާއިފާއި އައިންތު ފަޔާޒުގެ ކެބިންއާއި ދިމާލަށް މިސްރާބުޖެހި ވަގުތު ފަޔާޒް އައިންތުއާއި ސުވާލުކޮށްލިއެވެ. “ޝިޔާނާ ކެއުމުގެ ކަންތައް ހުރީ ކިހިނެއް؟”

“އޭނާ އެހާ ރަގަޅަކަށް ނުކައި؟ މިއަދު ހެނދުނު އޭނާގެ ބައްޕައާއި ފިރިމީހާ މިކޮޅަށް ޝިޔާނާއާއި ބައްދަލު ކުރުމަށް އައި…. އިއްޔެގެ ހާދިޘާ ހިނގި ފަހުން އެމީހުން ވަނީ ކުށްވެރިޔާއާއި ބައްދަލު ކުރަން އެދޭ ފޯރމު ހުށައަޅާފައި” އައިންތު ކެބިން ތެރެއަށް ވަންނަމުން ބުންޏެވެ.

ފަޔާޒް ނާއިފާ ދިމާލަށް ބަލާލަމުން ކިހާއިރަކުތޯ ސުވާލުކޮށްލިއެވެ. ޖަވާބުގައި އައިންތު ބުންޏެވެ. “އެމީހުން އައީ ހެނދުނު 8 ޖެހި އިރު…. ބައްދަލުކޮށްފައި ދިޔުމުން ޝިޔާނާ ވަރަށް ރުއި… ” މިހިސާބަށް ބުނުމުން ފަޔާޒް އައިންތު ގާތު ޝިޔާނާ ހޮސްޕިޓަލަށް ގެންދިޔުމުގެ ކަންތައް ހަމަޖެއްސުމަށާއި އެކޮޅުގައި ފުލުހުންގެ ދެމީހަކު އަބަދުވެސް ޝިޔާނާ ކައިރީގައި ހުރުމަށް ބުންޏެވެ. އައިންތު އަވަސްވެގަތީ އެ މަސައްކަތުގައެވެ.

ކެބިން ތެރެއިން އައިންތު ނުކުމެގެން ދިޔުމުން ނާއިފް ފަޔާޒްގެ ކޮމްޕިއުޓަރ ކައިރީ އިށީނދެ ހެނދުނުގެ 8 ޖެހުމާއި ހަމައިން ޝިޔާނާ ބަންދު ކުރެވިފައިވާ ކޮޓަރީގެ ވީޑިއޯ ފޫޓޭޖް ސާވާރ އިން ހޯދުމުގެ މަސައްކަތް ފެއްޓިއެވެ. އަދި ސެކިއުރިޓީ ޑިޕާރޓްމަންޓަށް ގުލާލުމަށް ފަހު އެ ފުޓޭޖް ވަރަށް އަވަހަށް ގެނެސް ދިނުމަށް އެދުނެވެ.

ސެކިއުރިޓީ ޑިޕާރޓްމެންޓްގެ މުވައްޒަފެއް ފަޔާޒްގެ ކެބިންގެ ދޮރު ހުޅުވާލުމަށްފަހު ޕެންޑްރައިވެއް ދިއްކޮށްލީ އޭގެ ފަނަރަވަރަކަށް މިނެޓަށް ފަހުގައެވެ. ފަޔާޒާއި ނާއިފް ވަރަށް ޝައުގުވެރިކަމާއިއެކު ޕެން ޑްރައިވްގައިވާ ވީޑިއޯ ކްލިޕް ލެޕްޓޮޕުން އަޅުވައިގެން ބަލަން ތިއްބެވެ.

*** *** *** *** *** ***

ހެނދުނުގެ ނާސްތާ ނިންމާލުމަށްފަހު ޝިޔާނާ އިނީ މޭޒު ދޮށުގައި ހުރި ގޮނޑީގައި އިށީނދެލައިގެންނެވެ. ގަޑިން 8:12 ވީ ތަނާ ކޮޓަރިއަށް ވަނީ އައިންތުއެވެ. ޝިޔާނާއާއި ބައްދަލުކުރަން ދެމީހަކު އައިސް ތިބި ކަމަށް ބުންޏެވެ.

އެކޮޓަރިއަށް ފުރަތަމަ އައިސް ވަނީ ޒުވާނެކެވެ. ލަފާކުރެވޭގޮތުގައި އެއީ އައިންތު ބުނި ފަދައިން ޝިޔާނާގެ ފިރިމީހާއެވެ. މަތީނު އައިސް ޝިޔާނާގެ ކުރިމައްޗަށްވާ ގޮތަށް ހުރި ގޮނޑީގައި އިށީނުމުން ޝިޔާނާ އިސްއޮބާލިއެވެ. މަތީނު ފުންނޭވާއެއް ލުމަށްފަހު ވާހަކަ ދައްކިއެވެ. “ޝިޔާނާ… ޒާން ގޮވައިގެން ކިހިނެއް މިހެން އުޅޭނީ…. މިވަރުކަމެއް ކޮށްލި އިރު އެންމެ ފަހަރަކުވެސް ޒާން މަތިން ހަނދާނެއް ނެތްތަ؟…. މިހެން ކިހިނެއް އަހަރެމެން އުޅޭނީ… ޝިޔާނާ އުމުރަށް ޖަލަށްލީމާ އަހަރެންވީ މިހެން އުޅެންތަ؟…” ވާހަކަ މިހިސާބަށް ދިޔަ އިރު ޝިޔާނާ ރޯން ފަށައިފިއެވެ. ނަމަވެސް ދިފާއުގައި އެންމެ ބަހެއްވެސް ނުބުނެ ލޮލުން ފައިބަމުން ދިޔަ ކަރުނަތައް އަތުގެ އިނގިލިތަކުން ފޮހެލަ ފޮހެލާ ހުރީއެވެ.

އަނެއްކާވެސް ވާހަކަ ފެއްޓީ މަތީނެވެ. “ސޮރީ… އަހަރެން މި ދަނީ… ޒާން ގޮވައިގެން އަހަރެންގެ ދޮން މަންމަ ކައިރިޔަށް ދާން…. ބައްޕަ ލަންކާއަށް ފުރާނެ…. ދެން މިކަމެއް ނުވާނެ….”
ޝިޔާނާ މަތީނާ ހަތަރު ކަޅި ހަމަކޮށްލިއެވެ. ބަހެއް ނުބުނެވެނީސް ދެންވެސް ވާހަކަ ދެއްކީ މަތީނެވެ. “ތީ ޤާތިލެއް… ތީ ޤާތިލެއް…. ޝިޔާނާ ތިއިނީ ވަރިކޮށްފަ… ތީ މަގޭ އަންބެއް ނޫން….”
ޝިޔާނާ ބަހެއްވެސް ނުބުނެ އިނީއެވެ. މަތީނު ކޮޓަރިން ނުކުމެގެން ދިޔުމުން ރުއިން ހުއްޓާލަން މަސައްކަތް ކުރިއެވެ. އޭނާއަށް މަތީނުގެ ނުރުހުމާ ނަފްރަތު ލިބޭނެކަން އިނގެއެވެ. ޝިޔާނާ ލޮލުން ފައިބަމުން ދާ ކަރުނަތައް ފޮހެލަ ފޮހެލާ އިންދާ ދެން އެކޮޓަރިއަށް އައިސް ވަނީ ޝިޔާނާގެ ބައްޕައެވެ. ޝިޔާނާހުރީ އޭނާގެ ލޯބިވާ ބައްޕައާއި ހަތަރު ކަޅި ހަމަކުރަން ނުކެރިފައެވެ. ބައްޕަ ގައިގާ ބައްދާލަންވެސް ބޭނުމެވެ. ހިމާޔަތުގެ އަތަކުން އޯގާތެރި ފިރުމުން ތަކާއި ހެޔޮ ނަސޭހަތުގެ ބަސްތައް އަޑުއަހަން ބޭނުމެވެ. މަތީނުގެ ފަހުގެ ނިންމުން ބައްޕައަށް ހާމަ ކުރަންވެސް ބޭނުމެވެ. ނަމަވެސް ބޮލުގައި އެޅިފައިވާ ކުށުގެ ސަބަބުން ބައްޕައާއި ކުރިމަތިލާނެ ހިއްވަރެއް ނެތެވެ. ކަރު އެލުވާލައިގެން ހުރީ ބައްޕަ ބުނަން ބޭނުންވާ ވާހަކަ އަޑުއެހުމުގެ އިންތިޒާރުގައެވެ.

“ޝިޔާނާ…. ކީއްވެ ކުރިކަމެއް އެއީ؟ ބައްޕައަށް ޤަބޫލުކުރަން ވަރަށް ދަތި….” ފުއާދުގެ އަޑު ހުރީ ވަރަށް ކުރަކި ކޮށެވެ. ހީވަނީ ރޭހަތަރު ދަމު ނުނިދާ ހިތާމަ ކޮށްފައިވާހެންނެވެ.
ޝިޔާނާ ވާހަކަ ދެއްކިއެވެ. “ބައްޕާ އަޅުގަނޑަށް މަޢާފްކުރޭ…. އަޅުގަނޑުއަތުން އޭނާ މަރާލީ…… އޭނަ އުޅުނީ އަޅުގަނޑާ…. ބެހެންވެގެން…..”
ބައްޕައަށް ޝިޔާނާއާއި ދިމާލަށް ބަލާލެވުނެވެ. “ގޭގައި މީހުންއުޅޭ އިރު އެހެން މީހެއްގެއެހީއެއް ހޯދުމެއް ނެތި އޭނާ މަރާލުން އެއީ ޝިޔާނާ ކުރި ވަރަށް ގޯސް ކަމެއް؟…. މިކަންތައްގަނޑު ހިނގި ވަގުތު މަންމަ ހޭނެތިގެން ހޭނޭރުމުން ހޮސްޕިޓަލަށް ގެންދިޔައީ…” ވާހަކަ މިހިސާބަށް ދިޔަ އިރު ފުއާދަށްރޮވެނީއެވެ. ފުއާދުހުރީ އޭނާގެ ނަފްސު ކޮންޓްރޯލް ކުރުމަށް ވަރަށް މަސައްކަތް ކޮށްގެންނެވެ. ނަމަވެސް ބަޑި ފަޅައިގެން ގޮސް ރޮވެން ފެށުމުން އަނގަމަތީ އަތް އަޅާލިއެވެ. ފުން ނޭވާތަކަކަށް ފަހު އާ ހިތްވަރާކާއި އެކު ވާހަކަ ދައްކަން މަސައްކަތް ކުރަން ފެށިއެވެ. ނަމަވެސް ފުއާދަށް ބަހެއް ނުބުނެވުނީ ޝިޔާނާ ވާހަކަ ދައްކަން ފެއްޓުމުން ނެވެ.

“މަންމަ ކޮބާ؟ ކިހިނެއް… ރަގަޅުތަ؟…” ޝިޔާނާ އެއްފަހަރާ އެތަށް ސުވާލުތަކެއް އޭނާގެ ބައްޕައާއި ކުރަން ފެށިއެވެ. ޝިޔާނާއަކީ އޭނާގެ މަންމަދެކެ އިންތިހާއަށް ލޯބިވާ ދަރިއެކެވެ. މި ހުރިހާ ދުވަހެއްވެސް ޝިޔާނާ ހޭދަކުރީ އޭނާގެ މަންމަ އެއީ އޭނާގެ އެންމެ ގާތް އެކުވެރިޔާ ގޮތުގައި ދެކިގެންނެވެ. ޝިޔާނާގެ ދިރިއުޅުމުގައި އޭނާގެ މަންމައަށް ސިއްރުވެފައިވާ އެއްވެސް ކަމެއް ނެތެވެ. ހަމައެފަދައިން ވަހީދާވެސް ޝިޔާނާދެކެ އިންތިހާއަށް ލޯބިވެއެވެ.

“މީ ޝިޔާނާއާއި ހެދިވީ ކަމެއް… ވަހީދާ އޮތީ ކޯމާއެއްގައި…. ޑޮކްޓަރުން ވަރަށް އުންމީދު ކުޑަކަމަށް ބުނަނީ…. އައިސީޔޫގައި އެޑްމިޓް ކޮށްފައި އޮތީ…..” ފުއާދުއަށް ހިއްވަރުކޮށްފައި ޖަވާބު ދެވުނީ ވަރަށް ކުރުކޮށެވެ. ފުއާދަށް ކެތްނުކުރެވިގެން އެ ކޮޓަރިން ނުކުމެގެން ދިޔައީއެވެ.

މި އިވުނު ވާހަކަތަކުން ޝިޔާނާ އިނީ ބަސް ހުއްޓި ހަރަކާތް ހުއްޓިފައެވެ. ކުރި ފުން އަސަރުން ޝިޔާނާގެ ލޮލުން އަންނަމުން ދިޔަ ކަރުނަތައް ވަނީ ހުއްޓިފައެވެ. ރޯނެ ހިއްވަރެއްވެސް އޭނާގެ ހަށިގަނޑުގައި ނެތް ކަހަލައެވެ. މައްޔިތެއްހެން ގަބުއަރާފައި އިން ޝިޔާނާއަށް ދެ ގަޑިއިރު ވީ އިރުވެސް އެ ހަށިގަނޑަށް ގުޑުމެއްވެސް ނާދެއެވެ. ދެން ފެނުނީ އޭނާ އެ ގޮނޑިން ބިން މައްޗަށް ވެއްޓުނު މަންޒަރެވެ. އޭނާ ތުރުތުރު އަޅަން ފެށި މަންޒަރެވެ. ހީވަނީ ފެނުން މަހުރޫމްވެފައިވާ ރޯ މަހެއް ހެންނެވެ.

*** *** *** *** *** ***

ވީޑިއޯ ކްލިޕް ނިއްވާލުމަށްފަހު ފަޔާޒަށް ބަލާލެވުނީ ކައިރީގައި ހުރި އޭނާގެ އެކުވެރި ނާއިފަށެވެ. ދެމީހުންވެސް ތިބީ މިފެނުނު މަންޒަރުން ބުނެދޭން ނޭނގޭ ކަހަލަ އިޙްސާސްތަކެއް ކޮށްފައެވެ. ޝިޔާނާގެ ހަޔާތުގައި ހިނގަމުންދާ ތޫފާނުގެ އޮއެވަރުގެ ބާރުކަން އިހްސާސްވެ މި ތޫފާނަށް ނިމުމެއް ގެންނައުމަށް ދެމީހުން އަޒުމް ކަނޑައެޅިއެވެ. ގޮނޑިން ތެދުވެ ލެޕްޓޮޕް ގެ ސްކްރީން ލައްޕާލަމުން ފަޔާޒް ބުންޏެވެ. “މި ކޭސް އިތުރަށް އިންވެސްޓިގޭޓް ކުރަން ލަސްނުކޮށް އަހަރެމެން ޝިޔާނާގެ ގެއަށްދާން ފެނޭ”

ނާއިފްވެސް ފަޔާޒް ދެއްކި ވާހަކައަށް ތާއީދު ކުރުމުގެ ގޮތުން ބޯ ޖަހާލުމަށްފަހު ދެމީހުން އެކީގައި ކާރަށް އަރައި މިސްރާބުޖެހީ ޝިޔާނާމެން ދިރިއުޅޭ ފްލެޓަށް ދިޔުމަށެވެ.

= ނުނިމޭ =

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.