ރޫޙާނީ ބިރު – 4 –

މޫދާ ފުދޭވަރަކަށް ކައިރީގައި ހުރީ ވީރާނާވާން ކައިރި ވަފައިވާ ގެއެކެވެ. ތިންމީހުންވެސް ގޭގެ ދޮރުކައިރީ މަޑުކޮއްލިއެވެ. ޒީދާން ޝަލީން އާ ޔާނާއަށް ބަލާލަމުން އެގޭގެ ދޮރުހުޅުވާލަން ތަޅުގައި ހިފާ އަނބުރާލިއެވެ. މުރަނަ އަޑަކާއެކު ދޮރުހުޅުވުނުއިރު އެ ގޭގައިވަނީ އަނދިރިކަމެވެ.

********************

ޒީދާން އެތެރެއަށް ވަންނަން ކުރިއަށް ފިޔަވަޅެއް އަޅާލުމާއެކު ޔާނާ ޒީދާންގެ އަތުގައި ހިފާލިއެވެ.

“ތިއްތިބޭ….އެތެރެއަށް ވަންނާނެ ކަމެއް ނެތް….” ޔާނާ ދެފަރާތަށް ބޯހޫރާލަމުން ބުނެލީ ބިރުގެންފައި ހުރެއެވެ.

“ނާ……އެ އޯކޭވަނޭ ވަދުނަސް….ދޮންތައާ ތިއްތިބެވެސް މި ހުރީނު….ހާސް ނުވެބަ….” ޒީދާން ޔާނާއާ ދިމާލަށް އެންބުރިލަމުން ހަތަރުކަޅި ހަމަކޮއްލިއެވެ. ޒީދާން ހިނިތުންވެލުމުން ޔާނާވެސް ހިނިތުންވެލިއެވެ.

ޒީދާން ޔާނާ އާ ޝަލީންއަށް ބަލާލަމުން އެގެއަށް ވަދެއްޖެއެވެ. ޔާނާއާ ޝަލީންވެސް ޒީދާންގެ ފަހަތުން އެގެއަށް ވަދެއްޖެއެވެ.
ޔާނާ ހުރީ ޝަލީންގެ އަތުގައި ހިފާ ބާރުކޮއްލައިގެނެވެ. ބިރުވެރި ފިލްމުތަކާ ވާހަކަތަކަށް ފޯރިހުއްޓަސް ޔާނާ އަކީ ފިނޑި ކުއްޖެކެވެ. މިއާ ހިލާފަށް ޝަލީންއަކީ ރޫހާނީ ކަންތަކަށް ފޯރިހުންނަ ކުއްޖެކެވެ. ޒީދާން އެގޭގެ ލައިޓް ޖައްސާލިއެވެ. އަނދިރިކަމުގެ މައްޗަށް އަލިކަން ގަދަވެގަނެ މުޅި ތަން ހުދުކުލައިގެ ގަދަ އަތްޔަކުން ވަލިވެއްޖެއެވެ. ތިންމީހުންވެސް ހައިރާންވީ އެތަން އޮތްގޮތް ފެނުމުންނެވެ. ގޭތެރޭގައި ވާހާ އެއްޗެއް ވިއްޔާވަނީ ހަލާކުކޮށް ކުދިކުދި ކޮށް މުޅި ތަނަށް އަޅާފައެވެ. އެތަނެކޭ ގޮނޑެކޭ ތަފާތެއްނެތެވެ. މުޅި ތަނުގައިވަނީ ހިރަފުހެވެ. ތިންމީހުން ހައިރާންވެހުރެ އެގޭގެ އެކި ތަންތަނަށް ބަލަމުން ދިޔައެވެ. ކުއްލިއަކަށް ސިއްސައިގެން ދިޔައީ ބާރު އަޑުފައްގަނޑަކާއެކު ބަންލާފައި އެގޭގެ ދޮރުޖެހުނު އަޑަށެވެ. އެވަގުތު ކަނިޖަހާފައި ލައިޓުނިވިއްޖެއެވެ. ގަތްބިތުން ޔާނާ ޒީދާންގެ ގައިގައި ބައްދައިގަންނަމުން އަޑުގެ ނެތްތަނަށް ހަޅޭއްލަވައިގަތެވެ. އެވަގުތު މުޅި ގޭގައި ގުގުމާލީ ޔާނާގެ ހަޅޭކުގެ އަޑެވެ.

“ނާ….ނާ….ހަމަޖެހިބަލަ……ވަޔާ ދޮރު ލެއްޕުނީ ކަނޭންގެ…..ލީން……ފޯނުއެބަ އޮތްތަ……އަލި ކޮއްލަބަލަ…” ޔާނާ އޭނާގެ ގައިން ނައްޓާލުމަކީ އުންދަގޫ ކަމެއްކަން ވިސްނުމުން ޒީދާން ބުނެލިއެވެ. އެވަގުތު ޝަލީން އޭނާގެ ފޯނުން ފްލެޝް ލައިޓް ޖައްސާލިއެވެ. އެވެސް ދެފަހަރަކު ނިވި ދިއްލިފައި އެއްކޮށް ނިވިއްޖެއެވެ. އެވަގުތު މުޅިތަނުން ދުވި ނުބައިވަހަކުން ތިންމީހުންގެ ބޯއަންބުރައިނުގަތީ ކިރިޔާއެވެ. ޒީދާން ގެ ހަވަނަ ހިއްސު މިވަނީ ރަނގަޅު ގަތެއްނޫންކަން ވިސްނައިދިނެވެ. ގަދަކަމުން ޔާނާ ގަޔާ ދުރަށްލަމުން އެގޭގެ ދޮރު ހުޅުވުމަށް ދިޔައެވެ. ދޮރުހުޅުވޭ ގޮތެއްވެސް ނުވިއެވެ. އެ ވަސްގަނޑު ގަދަވަމުންގޮސް އެތިންމީހުންނަށް ނޯއްދަމައިލަންވެސް އުންދަގޫވިއެވެ.

*********************

“އަދިވެސް އެތިންމީހުން އަންނަން ނުވޭތަ….މިހާރު ދެގަޑިއިރު އެވީ ދިޔަތާ…..” އަލީސާ ބުނެލިއެވެ. އޭނާ ކުޑަކޮށް ކަންބޮޑުވިއެވެ.

“އިރުކޮޅަކުން އައިސްދާނެ….ހިނގާ އަހަރެމެންވެސް މި ރަށު ތަންތަން ބަލާލަން ދަމާ……” ސަލީމް ބުނެލިއެވެ. އަލީސާ އެއްބަސްވުމުން ސަލީމް ޒޯޔާއާ ރިޝްވާން ގޮވައިގެން ރަށުތެރެއަށް ވަދެއްޖެއެވެ.

*****************

ޒީދާން އަދިވެސް މަސައްކަށްކުރަމުން ދިޔައީ އެގޭގެ ދޮރުހުޅުވޭތޯއެވެ.
ނަމަވެސް ހުޅުވޭގޮތެއްނުވިއެވެ. ކުއްލިއަކަށް އަޑެއް އިވެސް ފެށިއެވެ.
ޒީދާން އެއަޑަށް ސަމާލުކަމެއް ދިނެވެ. ބޯޅައެއްކަހަލަ އެއްޗެއް ބިންމަތީގައި ޖަހާކަހަލަ އަޑެކެވެ. ކުއްލިއަކަށް ކުރަކި އަޑަކުން
މީހަކު ހޭންފެށިއަޑު އިވުނެވެ. ގައިން ހީބިހި ހިލުވާލާފަދަ އަޑެކެވެ. އެއަޑު އެއީ އަންހެނެއްގެ އަޑެއްކަމެއް ފިރިހެނެއްގެ އަޑެކަމެއް ނަގައިގަންނާކަށް ޒީދާންމެންނަކަށް ނޭންގުނެވެ. ކޮންތާކުން އަންނަ އަޑެއްކަމެއްވެސް ނޭންގުނެވެ. އެ ހުނުމުގެ އަޑު ބާރުވަމުން ދިޔަވަރަކަށް އެ ނުބައި ވަސްގަނޑުވެސް ދިޔައީ ގަދަވަމުންނެވެ. ކުއްލިއަކަށް އެ ހުނުންގަޑާއި ނުބައި ވަސްގަނޑުވެސް ކެނޑިގެން ދިޔައެވެ. ޝަލީންގެ ފޯނުން ބަންގީގެ މަތިވެރި އަޑުމުޅި ތަނުގައި ގުގުމާލީ އެވަގުތުއެވެ.

– ނުނިމޭ –

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.