ރޫޙާނީ ބިރު – 3 –

ލޯނޗު އެރަށާ ގާތް ކޮއްލުމާއެކު އެންމެން ފޭބިއެވެ. ރިޝްވާން އޭނާގެ ދެ އަހަރުގެ ދަރުފުޅު ރީމް ގޮވައިގެން ފަޅުރަށެއްކަމައްވާ ހިމިއްޗަށް ފޭބުމާއެކު ރީމް ރޯން ފެށިއެވެ. އެވަގުތު ރީމްގެ ބޮޑުވެފައިވާ ދެލޮލުން ބަލަމުންދިޔައީ ނިކަގަހާ ދިމާލަށެވެ.

**************

ރިޝްވާން ރީމް ރޯންފެށުމުން މަސަލަސްކުރެވޭތޯ މަސައްކަތްކުރިއެވެ. ނަމަވެސް ނިކަގަހާ ދިމާލަށް ދެލޯ ބޮޑުކައްލައިގެން ބަލަން ހުރި ރީމްގެ އަޑުދިޔައީ ހިނދެއް ހިނދަކަށް ބާރުވަމުންނެވެ.

“ޒޯ…ރީމްއަށް ކާންދޭންވީނުން…ބަނޑުހައިވީ ކަންނޭގެ…” ރިޝްވާން އޭނާގެ އަނބިމީހާ ޒޯޔާގާތު ބުނެލީ ރީމް އާމެދު ކަންބޮޑުވެފައިވާ ހާލުއެވެ. އެހެނީ މީގެކުރިން ރީމް އެހާ ބާރަށް ރޮއި ހަނދާނެއް ރިޝްވާންގެ ހަނދާނަކަށް ނާދެއެވެ. ޒޯޔާ ރީމް އުރާލިއެވެ. އަދި އަވަހަށް ރީމް މަސަލަސްކުރެވޭތޯ އުޅުނެވެ.

********************

ޔާނާ ، ޝެލީން އަދި ޒީދާން ހިމިއްޗަށް އެރުމާއެކު ބޭނުންވީ ރަށުތެރެ ބަލާލަން ދިއުމަށެވެ. އެހެންނަމަވެސް އެންމެ ފުރަތަމަކަމަކަށް ތިން މީހުންގޮސް އެލީސާ ގާތުން ހުއްދައަށް އެދުނެވެ. އެލީސާ ހުއްދަ ދިނުމުން ތިންމީހުން އެކުއެކީހެން ރަށުތެރެއަށް ވަންނަން ހިނގައިގަތެވެ. އެކި ގެއަށްވަންނަމުން ތަންތަން ބަލަމުންދިޔައެވެ. ވީރާނާވެ ބާވެފައިވާ ގެތަކެވެ. ތަރުތީބުކަމެއްނެތި އެކި ދިމަދިމާލުގައި ގަސްފަޅާފައި ހުއްޓެވެ. އެކި ތަންތަން ބަލަމުން ތިންމީހުން ކިރިއަށް ހިނގަމުން ދިޔައެވެ. ރަށުތެރޭގެ އުތުރުފަރާތް ނިމޭ ހިސާބަށް ދެވުމާއެކު ތިންމީހުންގެ ފިޔަވަޅުތައް ހުއްޓުނެވެ.

**************

ރީމް ރުއިން ހުއްޓާލުމާއެކު ޒޯވާ ރީމްއަށް އެއްޗެއް ދެވޭތޯ ބެލިއެވެ. ރީމް ކައިނިމުމުން ޒޯޔާ ރީމް ގެންގޮސް ރިޝްވާންއަތަށް ދިނުމަށްފަހު އެލީސާ އާ ސަލީމް ކައިރިއަށް ދިޔައެވެ.

“ކޮބަ އެމަންޖެ ރުއިން ހުއްޓާލާފިތަ….ބައްޕައަށް ހީވަނީ އާ މާހައުލެއްވީމަ ވީ ގޮތެއްހެން…” ސަލީމް އޭނާއަށް ހީވާއެއްޗެއް ބުނެލިއެވެ.

“ލައްބަ…ދެންމެ ރީމްއަށް ކާންދީފަ ރިޝްވާން އަތަށް ދީފަ މިއައީ…” ޒޯޔާ ބުނެލިއެވެ.

“ރީޝްވާންވެސް ކުޑައިރު ވާނީ އެވަރު….ނުދަންނަ ތަނަކަށް އާދެވިއްޖެއްޔާ ދެން އެ ނިމުނީ….ރޯންފަށާ ގޮތަށް ހުއްޓާލާނީކީ ނޫން އެތަނުން ދަންދެން….ފަހުން އަހާލީމަ ބުނާނެ ފޫހިވެގެން ކުރާނެ ކަމެއް ނެތިގެންނޭ ރޯން ފަށަނީ….އޭރުން އެތަނުން އަވަހަށް ދެވޭނެން ނޫންހޯ……ފޫހިވެސް ފިލަނެއޯ…ހެހެ…” އެލީސާ ރީޝްވާންގެ ކުޑައިރުގެ ހަނދާނެއް އާކޮއްލަމުން ހީލިއެވެ. ސަލީމްއާ ޒޯޔާވެސް ހިނިތިންވެލިއެވެ.

“މަންމާ…ކޮބާ ލީން ، ނާ އާ ދާން؟….” ޒޯޔާ ވަށައިގެން އެ މާހައުލަށް އަވަސް ނަޒަރެއްދެމުން ޝެލީން ، ޔާނާ އަދި ޒީދާން ނެތުމުން އެލީސާ ގާތު ސުވާލުކޮއްލިއެވެ.

“ރަށުތެރެ ބަލާލަން ގޮސް ވީ….އަދި އަލަށް މިކަހަލަ ތަނެއް ފެނުނީމަ ތިބޭނީ ހުއްޓުންއަރާފަ….” އެލީސާ ހިނިތުންވެލަމުން ބުނެލިއެވެ.

****************

ހުއްޓުން އަރާފައިތިބި ތިންމީހުންވެސް އެކަކު އަނެކަކުގެ މޫނަށް ބަލާލަމުން ކުރިއަށް ހިނގައިގަތެވެ. މޫދާ ފުދޭވަރަކަށް ކައިރީގައި ހުރީ ވީރާނާވާން ކައިރިވެފައިވާ ގެއެކެވެ. ތިންމީހުންވެސް ގޭގެ ދޮރުކައިރީގައި މަޑުކޮއްލިއެވެ. ޒީދާން ޝަލީން އާ ޔާނާއަށް ބަލާލަމުން އެގޭގެ ދޮރުހުޅުވާލަން ތަޅުގައި ހިފާ އަނބުރާލިއެވެ. މުރަނަ އަޑަކާއެކު ދޮރުހުޅުވުނުއިރު އެ ގޭގައިވަނީ އަނދިރިކަމެވެ.

– ނުނިމޭ –

:މި ވާހަކައަކީ އަޅުގަނޑު ލިޔަންފަށާފައިވާ ވާހަކައެކެވެ. ދެވަނަ ޕާރޓް އަޕް ކުރުމައްފަހު އަޅުގަނޑު މިވާހަކައިގެ އެހެން ޕާރޓްއެއް އަދި އަޕް އެއްނުކުރަމެވެ. އަދި މިކަމާ ގުޅިގެން ހުރިހާ ކިޔުންތެރިންގެ ފަރާތުން ނިހާޔަތަށް މާފަށް އެދެމެވެ. ނަމަވެސް މިޔަދުން ފެށިގެން މި ވާހަކައިގެ ކޮންމެ އެޕިސޯޑްއެއް ކޮންމެ ހޮނިހިރު ދުވަހެއްގެ ވަގުތެއްގައި އަޕް ކޮއްދޭނަމެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.