ލޯތްބަކީ 2

މާދަމައަކީ ޝައިރާ ވަޒީފާއަށް ނިކުންނަން ހަމަޖެހިފައިވާ ފިހާރަ އަލަށް ހުޅުވާދުވަހެވެ. އެކަމަކު ޝައިރާއަށް ހުޒާމް ކިޔައިދީފައިވާގޮތުން މިއަދު ޝައިރާ ފިހާރައަށް ނުކުންނަންޖެހެއެވެ. އެއީ މިއަދު ފިހާރައިގަ ކުރަންޖެހޭ ވަރަށް ބުރަ އެހާމެ މުހިންމު މަސައްކަތްތަކެއް ހުރުމުންނެވެ. އެއީ އެފިހާރައިގެ ހުރި ހުރިހާ މުދަލެއް ގުނާ، ކޮމްޕިއުޓަރަށް އެންޓަރ ކުުރުމެވެ. މާދަމަ ފިހާރަ ހުޅުވާ ދުވަސްކަމުން މިއަދު އެކަން ނިންމާލަން ސަމީރުގެ ދަރިފުޅަށް އެހީވެލާދޭން ސަމީރުވަނީ ޝައިރާ ފޮނުވުމަށް ހުޒާމްގެގާތު ބުނެފައެވެ. ކާކުކަން ނުދަންނަ މީހަކާއެކު މަސައްކަތް ކުރަންޖެހުމުން ޝައިރާހުރީ ހިސާބަކަށް ހާސްވާގޮތްވެފައެވެ. އާދައިގެ ގޮތަކަށް އުޅެން ދަސްވެފަހުރި ޝައިރާ ކުޑަގޮތަކަށް ރީތިވެލައިގެން ދިޔައީ ފިހާރައަށެވެ.                    * * * * * * * * * * * * * *   ހެނދުނު ހޭލެވުމާއިއެކު ތާޒާވެލައިގެން ފިހާރަ ހުޅުވުމަށް ކުރަންހުރި ފަހުމަސައްކަތް ނިންމަންދާން ގެއިންނިކުތް ރާއިލް ހުއްޓުނީ ބައްޕަ ގޮވާލުމުންނެވެ. “ދަރިފުޅާ! ދަރިފުޅަށް އެހީވެލަން އަންނާނެ ފިހާރައަށް ބައްޕަ ހަމަޖައްސާފަހުރި ސޭލްސްގާރލް.” ރާއިލް ހަމައެކަނި ހޫމް އަކުންފުއްދާލަމުން ދާންނުކުތީ ރާއިލްއަކީ އެންއިރެއްގައިވެސް ބައްޕައާއި ދެބަސްވާކުއްޖަކަށް ނުވާތީއެވެ. ނަމަވެސް ރާއިލް ހުރީ އެކަމާއި ހިތްހަމަ ނުޖެހިފަކަން ރާއިލްއަށް ބަލައިލި ކޮންމެ މީހަކަށްވެސް އެނގިގެންދާނެއެވެ. އެހާވެސް ނިތަށްއެރުވި ރޫ ގިނައެވެ. “އެކްސްކިއުޒްމީ” މުދާތައް ގުނަން އަވަދިނެތި އުޅުން ރާއިލްގެ ސަމާލުކަން އަތުލީ ފަހަތުން އަންހެންކުއްޖެއްގެ އަޑުއިވުމުންނެވެ. ގައިން ހީބިހި ނަގައިގެންދާހާ އަންހެންވަންތަ އަޑެކެވެ. ނުދެނަހުރިކަމަށްހަދާފައި ރާއިލް އެނބުރި އެކުއްޖާއަށް ނިތްޕއަރުވާލީ ކޮންބޭނުމަކުހޭ އެހުމުގެ މާނައިގައެވެ. ޝައިރާ ފާޑަކަށް ރަކިވެ، ބަސްހުއްޓި، އިސްޖެހިއެވެ. ރާއިލް މަތިންތިރިއަށް މި ނުދަންނަ ކުއްޖާއަށް ބަލައިލިއެވެ. ބޮލައް އޮޅާލާފަހުރި ނޭވީބުލޫ ކުލައިގެ ޝޯލް އެދޮންމޫނާ ނުހަނުގުޅެއެވެ. ލަދުގަތުމުގެ ސަބަބުން ދޮންދޮން ކޯތާފަތަށް އަރާފަހުރި ފިޔާތޮށިކުލަ ވަރަށްވެސް ހިތްގައިމެވެ. މަޑު ފިޔާތޮށިކުލައަށްދާ ތުންފަތުގަ ދަތްއަޅައިގެން ހުރިގޮތް ކިތަންމެހާވެސް ލޯތްބެވެ. ލައިގެންހުރި އަޅިކުލައިގެ ގަޔަށްދޫ ހައުސްކޯޓުން މީހާގެ ވަނާތައްވަނީ ފޮރުވިފައެވެ. އެތެރެއަށްވަނުމަށް ބުނެ އަނެއްފަރާތައް އެނބުރުނީ އެނުދަންނަ ކުއްޖާއަށް ރާއިލްގެ އެބެލުން ފާހަގަވިޔަނުދިނުމަށެވެ. ރާއިލްއާއި އެކު މަސައްކަތުގައި އަވަދިނެތި އުޅުން ޝައިރާ ވެސް ސިއްރު ސިއްރުން ރާއިލްއަށް ބަލައިލިއެވެ. ކަޅުކަންގަދަ ބުމަޔާ، ނަންބަރު އައިނެއްގެ އެހީ ހޯދާފައިވާ ތޫނުލޮލާ، ފިޔާތޮށިކުލައިގެ ތުންފަތް އެދިގުމޫނާ ނުހަނުގުޅެއެވެ. ބޭރުގައުމެއްގައި އުޅުމުގެ ސަބަބުން މީހާގެ ކުލައަލިވެފައި ހަންގަނޑު އޮމާނެވެ. ދެމީހުންގެވެސް މަސައްކަތުން ގެއަށް ދިޔައީ ކުރަންހުރި ހުރިހާ މަސައްކަތެއް ނިންމާ މާދަން ހުޅުވަން ރެޑީކޮށްފައެވެ.               * * *  * * * * * * * * * * * އަޔާން ހުރީ ސުމާއަށް ގުޅައިގެން ސުމާ އަންނާނެ އިރެއްގެ އިންތިޒާރުގައި ސުމާގެ ގެއާއި ޖެހިގެންހުރި ގޯޅިގަނޑުގައި ސުމާއަށް ކުޑަ ގިފްޓެއްވެސް ހިފައިގެނެވެ. މިއީ އަޔާން ސުމާއަށް ދޭ ފުރަތަމަ ހަދިޔާކަމުން ސުމާ އުފާވާނެވަރު ހިތަށްގެނެސް އެލޯބި ހިނިތުންވުން ދުށުމުގެ އިންތިޒާރުގައި އަޔާންވަނީ ކެއްމަދުވެފައެވެ. ނަމަވެސް ކަންވާނޭގޮތް އެނގޭނީ ފަހެ ކާކަށްހެއްޔެވެ؟ އަޔާންގެ އިންތިޒާރަށް ނިމުންގެނެސްދެމުން ސުމާ އައިސް ހުއްޓުމާއިއެކު އަޔާންގެ އަތުގައި އޮތް ހަދިޔާ ދިއްކޮއްލީ އުފާވެރި ހިނުތުންވުމަކާއިއެކުއެވެ. އެހިނިތުންވުމުގެ ބަދަލު ސުމާދިނީ އަޔާންގެ ހިތްކުދިކުދި ކޮށްލާ ހިތްރޮއްވާލާފައެވެ. އެހާ ލޯބިން ދިން ހަދިޔާ ބިންމައްޗައް ވައްޓާލާ ސުމާގެ ފައިންއަރާ ފިތާލާފަގޮސް އެނބުރި ގެއަށް ވަދެއްޖެއެވެ. “އަހަންނަށް އުމުރުގަވެސް ލޯބި މިވެވުނީ ކޮންކަހަލަ އަންހެނެއްދެކެ ހެއްޔެވެ؟ އަހަންނަށް މިނޫން ދުވަހެއް ހަމަ ނެތީހެއްޔެވެ؟” މަގުމަތީހުރެ ގިސްލާރޮމުން ދިޔަ އަޔާން އަމިއްލަ ހިތާ ޝަކުވާކުރިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.