ނޭނގި ހިތޭ ތި އަތުލީ 21

“އާދެބަލަ އިށީންނަން އަހަރެން ވަރަށް ބޮޑު ވާހަކައެއް ދައްކަންބޭނުން” މައުވަން ތެދުވެ އެނދުގައި ހަމަޖެހެލަމުން ބުނެލިއެވެ. މަލާކް އައިސް އެނދުގައި އިށީނެވެ. އަދި ފަށާށޭ ބުނާކަހަލަ ގޮތަކަށް މައުވަންގެ މޫނަން ބަލާލިއެވެ. “އަނހަ…. އަނހަ…. އަހަރެންބުނީ ކޮންއިރަކުންހޭ ދެން ގެއަށް ބަދަލުވާނީ” މައުވަން އަށް ބުނެވުނީ އޭނަ ބުނަން އުޅުނު ވާހަކައެއްނޫނެވެ. ނޭނގޭ ސަބަބަކާހުރެ ލޯބިވާވާހަކަ ބުނަން ފަސްޖެހެނީއެވެ. “މައުވަން ގެއަށް ބަދަލު ވާވާހަކަ ނުދައްކާތީ އަހަރެންވެސް މަޑުކޮށްގެން މިހުރީ. ދެން މަންމަ ކާރީ ބުނެލާފަ ބަދަލުވާންއުޅެންވީ” މަލާކްދިނީ މައުވަންކުރި ސުވާލުގެ ޖަވާބެވެ. އިންސާނުން ނަކީ އެކަކު އަނެކަކު ހިތަށް އަރާހާ އެއްޗެއް އެނގޭބައެއް ނޫންވިއްޔާއެވެ. އެހެންނޫންނަމަ މިރޭ މަލާކަށް މައުވަން ހިތް ހަމަޖެހޭވަރުގެ ޖަވާބެއް ދެވުނީސްކަން ގައިމެވެ.

އަކްޔަންގެ ކައިވެނީގެ އެއްމެފަހުގެ ތައްޔާރީތަށް ވަމުންދެއެވެ. މައުވަން އެތަށް ފަހަރު ކައިވެނި ކެންސަލްކުރުމަށް ރަފާގެ ކިބައިން އެދެފިއެވެ. ރަފާ ކުރަނީ އިންކާރެވެ. ޙަޤީޤަތް މަންމަމެންނަން ކިޔާދޭން މައުވަންބޭނުމެވެ.

އަކްޔަންގެ ކައިވެނި ހަމަޖެހިފައި ވިއެއްކަމަކު އަލާއާއި ދެމީހުން ގުޅުން އޮވެއެވެ. ބައްދަލުކުރަން ދާ ކޮންމެފަހަރަކު ރަފާ ރޮއެވެ. މިކަމުން އަކްޔަންގެ ހިތަށް އަސަރު ކުރެއެވެ. އެހެންކަމުން އަކްޔަން ނިންމީ އަލާ އާއި ކައިވެނި ކުރުމަށެވެ. މަންމަމެންނަން ސިއްރުންނެވެ. އަދި މިކަން އޭނަގެ ދޮންބެއާ ހިއްސާކުރަން އޭނަ ނިންމިއެވެ.

ހުކުރު ދުވަސް ކަމުން އެރެއަށް ބާބަކިއު ހެދުމަށް ތައްޔާރުވުމަށް މެންދުރު ފަހު ހުރިއާ ޒުވާނުން އުޅެނީ ގޭތެރެ ހަލަބޮލިކޮށްލައިގެންނެވެ. އިސްވެ އުޅެނީ ޒާނާއެވެ. އޭނަގެ މަޤްސަދަކީ އަކްޔަން ހިތްހަމަ ޖައްސައި ދިނުމެވެ. މަލާކްއަށް އާދެވުނީ ތަންކޮޅެއް ފަހުންނެވެ. އެކި ކަންކަމުގައި އުޅެލާފައި މަލާކް ކޮޓަރިއަށް ދިޔައީ ފާޚާނާއަށް ވަނުމުގެ ބޭނުމުގައެވެ. ހަމަޖެހިލާފައި ގޮސް ދޮރުހުޅުވާލަން ތަޅުގައި ހިފާލި ވަގުތު ލުބާގެ ކޮޓަރި ހުޅުވުނުއަޑަށް އިޚްތިޔާރަކާ ނުލާ އެދިމާ ބަލާލެވުނެވެ. އެ ކޮޓަރިން ނުކުތީ މައުވަންއެވެ. މަލާކް އަޅާނުލާ ކޮޓަރިއަށްވަނެވެ. މައުވަންއަށް އަތްޖައްސާލެވުނީ ނިތްކުރީގައެވެ. އޭނަ މިއަދު ލުބާގެ ކޮޓަރިއަށްވަނީ ލުބާއަށް ވިސްނަ ދިނުމުގެ ބޭނުމުގައެވެ. ލުބާ އަބަދު މައުވަންގެ ފޯނަން އާދޭސް ކޮށްފައި މެސެޖްކުރާތީ އެކަމާ އުނދަގޫވެގެންނެވެ. އެކަމަކު އެކޮޓަރިން ނުކުންނަނިކޮށް މި ފެނުނީ އޭނަ އެމަންޒަރު ފެންނަން އެންމެ ނޭދޭ ފަރާތަށެވެ.

މައުވަންވެސް ގޮސް ކޮޓަރިއަށް ވަނެވެ. އިރުކޮޅަކުން މަލާކް ފާޚާނާއިން ނިކުތެވެ. “އަހަންނާ ލުބާ އާ ދެމެދު މަލާކް ތި ހީކުރާ ކަހަލަ އެއްވެސް ގުޅުމެއްނެތް” މައުވަން އޮޅުންފިލުވާދިނެވެ. “ނާހަމެންނު” މަލާކް ދިޔައީ ކޮޓަރިން ނިކުންނާށެވެ. “އެކަމު ތިވައްތަރަށް އުޅުމަށްވުރެ ކައިވެނިކުރުން މާރަނގަޅުވާނެ” ދޮރުހުޅުވާލާފައި އެނބުރި މައުވަންއާދިމާލަށް ބަލާލުމަށްފަހު މަލާކް ބުނެލިއެވެ. އަދި ނިކުމެގެން ދިޔައެވެ. މައުވަންއަށް ފައިން ޖަހާލެވުނީ ކައިރީގައި ހުރިސޯފާގައެވެ.

ފޯރީގައި ބާބަކިއު ކުރިއަށް ދިޔައެވެ. އެކަކު އަނެކަކާ ދިމާކޮށް މަޖާވާހަކަ ތަކުގައެވެ. އޭރުވެސް މައުވަން އުޅެނީ ލުބާގެ ކިބައިން ސަލާމަތް ނުވެވިގެންނެވެ. އަބަދު ކޮންމެސް އެއްޗެކޭ ކިޔާފައި ހުންނަނީ އޭނަގެ ފަހަތުގައި ޖައްސާފައެވެ. އެއްމެންތެރޭގައި ވީމައި މައުވަން ހުރީ އެއްޗެއް ނުބުނެ ކެތްތެރިވެގެންނެވެ. މި މަންޒަރުތަކުން މަލާކްވެސް އިނީ އުނދަގޫވެފައެވެ. އެކަމުކު އެހެންމީހުންނާ އެކީ ސަކަރާތް ޖެހުމުގައި އޭނަ އުޅެލާއިރު ކަމެއްވާހެންވެސް ހީނުވެއެވެ. އިހްސާސްތަށް ފޮރުވަން ހަމަ މޮޅީއެވެ. އެހެން އުޅެފައި ބަރާބަރު 12 ޖެހިއިރު ޔަޒާންއައީ ކޭކެއް ހިފައިގެންނެވެ. އަދި މަލާކްގެ ކުރިމަށްޗަށް ހުއްޓި “ހެޕީ ބާތް ޑޭ ޕްރިންސަސް” ބުނެލިއެވެ. އަދި އެއްމެން އެއްފަހަރާ މަލާކް އަށް އުފަންދުވަހުގެ ތަހުނިޔާކިއެވެ. އެއްމެންވެސް ޝަކުވާކުރީ ޔަޒާން އެނގިހުރެ މަލާކްގެ އުފަންދުވަސް ސިއްރު ކުރީމައެވެ. މައުވަން ހުރީ އަމިއްލަ ނަފްސު ދެކެވެސް ރުޅި އައިސްސައެވެ. ކޭކް ފަޅާފައި އެއްމެ ފުރަތަމަ މަލާކް ކޭކް ލެވީ ޔަޒާންއަށެވެ. އަދި ޔަޒާން ވެސް މަލާކަށް ކޭކްލެވިއެވެ. އެއަށްފަހު މައުވަން އަށް ދޭންވެގެން ބަލާލިއެވެ. މައުވަން އެތާކު ނެތެވެ. މަލާކްވެސް ހޯދަން ދާކަށް ގަސްތެއް ނުކުރުއެވެ. ދެން ފެށީ އެކަކު އެކަކު އަނެކަކު ގައިގައި ކޭކް އުނގުޅާށެވެ. އެސަކަރާތް ނިންމާލި އިރު އެއްމެ ބޮޑުވަރު ވެފައި ހުރީ މަލާކަށެވެ.

ގެއަށް ދިއުމުގެ ބަދަލުގައި މަލާކްވެސް ދިޔައީ ކޮޓަރިއަށް ފެންވަރާލާށެވެ. އެއަށްފަހު މައުވަން ވީތަނެއް ބަލާލުމަށް ގަސްތު ކޮށްގެންނެވެ. ކޮޓަރިއަށް ވަތްއިރު މައުވަން އޮތީ އެނދުގައެވެ. މަލާކް ހުރިގޮތް ފެނުމާއެކު  އެތާ ވީކަންތަން މައުވަންއަށް ދޭހަވިއެވެ. އަދި އަތުގައި އެއޮތީ ކާކުގެ ހަދިޔާއެއްކަންވެސް އެނގުނެވެ. “ހާދަ މަޖަލޭ. ކީއްވެތަ މާ އަވަހަކަށް އައީ” މައުވަންގެ އިހްސާސްތަން ނޭނގި ހުރެ މަލާކްއެހިއެވެ. އޭރުވެސް މަލާކް ހުރީ ހެވިފައެވެ. މައުވަން ބުނެލީ ކަމެއް ނުވާކަމުގައެވެ. ކިތައްމެ ވަރަކަށް ހިތްހަމަ ނުޖެހި ރުޅިއައިސް އޮތެއްކަމަކު މައުވަން ބެލީ ކެތްކުރެވޭތޯއެވެ. ފެންވަރައިގެން ނިކުމެ މަލާކް ޖައްސާލީ ސޯފާގައެވެ. މައުވަންގާތު އިސްވެގެއަށް ދާން ކޮންމެހެން ނުބުނީ މާ ބޮޑަށް ދަންވެސް ވެފައި ހުރުމާއެކުގައެވެ. މަލާކް ސޯފާގައި އޮށޭތެއް ކަމަކު އޭނަ ދިޔައީ ފޯނުން ޗެޓް ކުރަމުންނެވެ. ބައިގަޑިއިރު ވެގެން ދިޔައިރުވެސް ފޯން ބާއްވާފައި ނިދާޚިޔާލެއް މަލާކްގެ ނެތެވެ. މައުވަންގެ ކެތްތެރިކަން ކޮޅުންލިއެވެ. ދިޔަ ގޮތަށް ގޮސް ބަހެއްބުނުމަކާ ނުލާ މަލާކްގެ ފޯން އަތުލައި ޓައިލްސް ތަށް މަތީގައި ޖެހިއެވެ. އެއާއެކު ފޯން ދިޔައީ ފަޅިފަޅި ވެގެންނެވެ. މަލާކްހުރީ ބިރުން ދެލޯ ބޮޑުވެފައެވެ. އެއްޗެއް ބުނަންވެސް ނުކެރުނެވެ. “ދަންވަރު ބާރަ އެކެއް ޖެހީމަ ހިލޭފިރިހެނުން ނާ ވާހަކަ ދައްކަން އޮންނާކަން ނުޖެހެ” މައުވަން ރުޅިވެރި ކަމާއެކު އިއްވާލިއެވެ. މަލާކްހުރީ އިސް ޖަހައިގެން ކޮޅަށެވެ. ނުރޯން ހިތްވަރު ކުރިއެއްކަމަކު އޭނަގެ ލޮލުން ފެން އާދެއެވެ. “ދެންމެ ވާހަކަ ދެއްކީ ބައްޕައާ” ރޮވިފައިވާ އަޑަކުން މަލާކް ބުނެލިއެވެ. ބަންލާފައި ދޮރުޖަހާފައި މައުވަން ދިޔައީ ކޮޓަރިން ނިކުމެގެންނެވެ.

މަލާކް ހެނދުނު ހޭލި އިރުވެސް މައުވަން ކޮޓަރިއަކު ނެތެވެ. ތެދުވެގެން ޔަޒާން ދިން ޕާރްސަލް އާއި ކުދި ކުދިވެފައިވާ ފޯންގެ ބައިތަށް  ހިފައިގެން އޭނަދިޔައީގެއަށެވެ.

މައުވަންގެއަށް އައީ ރަތް ފިނިފެންމާ ބޮޑިއެއް ހަފައިގެންނެވެ. އަދި އެނދުގައި އިށީދެގެންއިން މަލާކަށް އެ ދިއްކޮށްލާފައި ސޮރީ އޭބުނެލިއެވެ. މަލާކް އަޑުއިވޭކަމަށް ހަދާނުލިއެވެ. މައުވަން ސޮރީ އޭ ބުނެ ކުޑަކޮށް މާބޮނޑި މަލާކްގެ މޫނުގައި ޖައްސާލިއެވެ. “ކިހިނެއް ވެގެންތަ މައުވަން ތި އުޅެނީ” މަލާކް ހިތްހަމަ ނުޖެހިފައި އަހާލިއެވެ. “ރޭގަ ވީކަންތަކާ ވަރަށް ބޮޑަށް ސޮރީ” މައުވަން މަޑު މަޑުން ބުނެލިއެވެ. “އަހަރެންމީ މައުވަން މާފަށް އެދެންޖެހޭ ފެންވަރުގެ މީހެން ނޫން.” މަލާކް ބުނެލިއެވެ. އެވަގަތު އޭނަގެ ލޮލުގައި އަޅައި ގަތީ ޑްރެސިންޓޭބަލް މަތީ އޮތް ޔަޒާން ދިން ޕާރްސަލްއެވެ. މަލާކް ގޮސް އެ ހިފައިގެން އައިސް އެނދުގައި ޖައްސާލިއެވެ. އަދި ކަނޑާލިއެވެ. އޭރު މައުވަންވެސް އިނީ އެނދުގައި އިށީދެގެން މަލާކްއާދިމާލަށް ބަލާށެވެ. ޕާރްސަލްގައި އޮތީ އެއްމެފަހުފެ އައި ފޯންއެކެވެ. މަލާކަށް ވާއު އޭ ބުނެލެވުނީ އިޚްތިޔާރަކާ ނުލައެވެ. މިފަހަރުވެސް މައުވަންގެ ރޭވުން ނާކާމިޔާބު ވީއެވެ. އޭނަ ނިންމައިގެން ހުރީ މަލާކަށް އޭގެ ފޯނެއް މިރޭ ގެނެސް ދިނުމަށެވެ. އެކަމުކު ދެން އެކަން ކުރުމުގެ ބޭނުމެއް ނެތެވެ. “ދެޓްސް  ބިއުޓިފުލް” ފޯނަން އިޝަރާތްކޮށް މައުވަން ބުނެލިއެވެ. މަލާކް ހިތްހަމަ ޖައްސާލުމުގެ ގޮތުންނެވެ. “މައުވަން އަހަރެން ދެކެ ކިތައްމެ ރުޅިއަޔަސް އަހަންރެންދެކެވެސް ހެޔޮއެދޭ ލޯބިވާ މީހުން ތިބެޔޭ” މަލާކް ރައްދުގައި ބުނެލިއެވެ. “ކޯންޗެއް މަލާކްބޭނުމީ ބާތްދޭ ގިފްޓަކަށް” މަލާކް ބުނެލި ޖުމްލައަށް އަޅާލުމެއްނުދީ މައުވަން އަހާލިއެވެ. “އެއްވެސް އެއްޗެއް ބޭނުމެއްމޫން” ޝައުގުވެރިކަން ނެތް ގޮތަކަށް މަލާކް އިއްވާލިއެވެ. އޭރު މަލާކް އެފޯނަން ސިމް ލައްވާލައި ޗާޖަށް ޖަހާލަނީއެވެ. “ދެން ނުބުނަންޏަކާ އަހަންނަކަށް ނޭނގޭނެ ދޭނެ އެއްޗެއްވެސް. މަލާކް ލައިކް ވާ އެއްޗިސްސެއް އަހަންނަކަށް އެއްވެސް ވަރަކަށް ނޭނގެ ވިއްޔަ” މައުވަން ބުނެލިއެވެ. “ދެންނުދޭނީނު. ކާކުތަ ބުނީ ކޮންމެހެން ގިފްޓެއް ދޭންޖެހެއޭ” މަލާކްހުރީ ދޫދޭ ގޮތަކަށް ނޫނެވެ. “އޯކޭ. އެހެންވިއްޔާ އަހަންނާއެކު ޑިނައަކަށް ދެވިދާނެތަ މިރޭ” މައުވަން އެދުނެވެ. “ނޫން” މަލާކް ދިނީ ކުރު ޖަވާބެކެވެ. “ކަމެއް އޮތީތަ މިރޭ” މައުވަން އަހާލިއެވެ. “ނޫން” ފަރުވާކުޑަ ގޮތަކަށް މަލާކް ބުނެލިއެވެ. “ކީއްތަވާނީ އަހަންނާއެކު ޑިނައަކަށް ގޮސްލީއާ” އަނެއްކާވެސް މައުވަން އެދުނެވެ. “ކަމެއްނުވާނެ” ޖަވާބު ދިނުމަށް ފަހު މަލާކް ހިނގައިގަތީ ކޮޓަރިން ނިކުތުމަށެވެ. މައުވަން ވެސް ފަހަތުން ހިނގައިގަތެވެ.

މަލާކް އުޅުނީ ކޮފީތައްޓެއް ހަދާށެވެ. މައުވަން އެދުނީ އޭނައަށްވެސް ހަނދާދިނުމަށެވެ. އެހެން ބުނެ މައުވަން މޭޒުދޮށުގައި އިށީނެވެ. މަލާކް ދެތަށި ކޮފީ ހަދާ ނިންމާލި ތަނާ އަމީނާވެސް އަތުވެއްޖެއެވެ. “މަންމާ މަލާކްއަށް ގިފްޓަކަށް ދޭން އެއްމެ ރަނގަޅުވާނީ ކޯއްޗެއްތަ” މައުވަން ގަސްތުގައި މަލާކް ރުޅިއަރުވާލަންވެގެން އަމީނާ ގާތު އެހިއެވެ. “ތީ މަލާކާ ކުރަންޖެހޭ ސުވާލެއްނު” އަމީނާ ބުނެލިއެވެ. މައުވަން ހާމަކޮށްލީ މަލާކް އެސުވާލު ޖަވާބު ނުދިއްކަމުގައެވެ. އެވަގުތު ބެލް އެޅިއަޑަށް އަމީނާ ދިޔައެވެ. އަމީނާ ހިގައިގެން އައީ ކޮތަޅެކެވެ. އެ ދިއްކޮށްލީ މަލާކްގެ އަތަށެވެ. ކޮތަޅުގައި އޮތީ ޕާރްސަލްއެކެވެ. މަލާކް އެ ކަނޑާލިއެވެ. އޭގައިވަނީ ރީތި އަގުބޮޑު ފަށަކާއި ތަޅު ދަނޑިއެކެވެ. ދެން އޭގައި ހުރީ މަލާކްގެ ނަމުގައި ރަޖިސްޓްރީ ކޮށްފައިވާ ކާރެއްގެ ލިޔެކިއުން ތަކެކެވެ. އެއާއެކު އެއީ ކާކުގެ ހަދިޔާއެއްކަން މަލާކަށް އެނގުނެވެ. ނޭނގުނީ ހަމައެކަނި މައުވަންއަށެވެ. އަމީނާގެ މޫނުން ފެންނަންހުރީ ނުރުހުމެވެ. އަދި އޭނަ އެތަނުން ދިޔައެވެ. އަމީނާގެ މޫނަން އެރި ކުލަތަށް މައުވަން ދުއްޓެވެ. މައުވަން ކާކުގެ ފަރާތުން ލިބުން އެއްޗެއްތޯ އެހުމުން ބައްޕަގެ ކަމަށް މަލާކް ބުނެލިއެވެ. އޭރު މަލާކްއިނީ އަމީނާ ދިޔަދިމާ ބަލަހައްޓައިގެންނެވެ. އެއީ އާދައެވެ. މަލާކްގެ ބައްޕަގެ ފަރާތުން އެދަފަ އަގު ބޮޑެތި ހަދިޔާ ދޭތީ އަމީނާ އަބަދުވެސް ނުރުހުންވެއެވެ. އަމީނާމެން ދެމައިން އުޅެން މާލެއިން އެޕާޓްމެންޓް ހިފާފައި އެތަށް ފަހަރަކު ބަދަލުވާން މަލާކްގެ ބައްޕަ ޝަރީފް އެދުނެވެ. ކޮންމެ ފަހަރަކުވެސް އަމީނާ ކުރަނީ އިންކާރެވެ. ޝަރީފް އޭނަ ދޫކޮށްލާފައި ދިޔަދުވަހުން ފެށިގެން އޭނަ ޝަރީފް ދެކެ ރުޅިއާދެއެވެ. އެކަމަކު ހަޤީޤަތަކީއަމީނާގެ ހިތުގައި ޝަރީފަށްޓަކައި ލޯބިވާކަމެވެ. އެވަރަށް ރުޅި އާދެވެނީ ލޯބި ވާތީކަމަށްވެސް ވެދާނެއެވެ.

އަކްޔަން މައުވަން ގާތު އަލާ އާއި ކައިވެނި ކުރަން ގަސްތުކުރާކަން ހާމަކުރިއެވެ. މައުވަންގެ ފަރާތުން އެކަމަށް ފުރިހަމަ އެއްބާރުލުން ލިބޭނެ ކަމުގައި މައުވަން ބުނެލިއެވެ. އަދި ރަފާގެ ކައިވެނި ހުއްޓުވަން ކުރެވެން އޮތް ކަމެއް އޮތިއްޔާ ކޮށްދޭނެ ކަމުގައި ހާމަކޮށްލިއެވެ. އެކަމަކު ރަފާގެ ހަޤީގަތް އަކްޔަންއަށް ކިޔާދޭން މައުވަން ފަސްޖެހުނެވެ.

އަކްޔަން ހުރީ ފޯނުން ލައިހާއަށް ގުޅައިގެންނެވެ. ލައިހާވެސް އޭނަގެ ބޭބެއަށް ހިތްވަރު ދިނެވެ. އަކްޔަން އިރުޝާދު ދިނީ ލައިހާ އާއި ނިއަމްގެ ގުޅުން އަވަހަށް މަންމަމެނާ ހިއްސާކުރުމަށެވެ. ނޫންނަމަ ލަނޑެއް ލިބިދާނެކަމުގައެވެ. ލައިހާވެސް އެކަމާ އެއްބަސްވިއެވެ.

ޒާނާ އާއި ޔަޒާން ވާހަކަ ދައްކަންތިބީ ޔަޒާންގެ ކޮޓަރީގައެވެ. ޒާނާއަށް ޔަޒާން ވަރަށް ލޯބިވާ ކުއްޖަކު ހުންނަކަން އެނގެއެވެ. އެކަމަކު އެކުއްޖަކީ މަލާކްކަން އެނގުނީ އަދި ކިރިޔާއެވެ. ޒާނާ އިނީ ބުނާނެ އެއްޗެއް ނޭނގިފައެވެ. އޭނަގެ ބޭބެއަށް މިދިމާވީ ހާދަ ދެރަކޮށެވެ. އެއްމެލޯބިވާ މީހާ އެހެން މީހަކާ އެކީ އުޅޭތަން ބަލަން މި އޮތީ ޖެހިފައެވެ. އަދި އެވެސް ބޭބެއަކާ އެކީއުޅޭތަނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.