ޔާރު މިވަނީ ލޯތްބޭ ޙަޤީގީ (ސައްވީސްވަނަ ބައި)

ޝިއުރީ ވަރަށް ވާހަކަ ދެއްކުމުން މިޝަލް ހަމައަކަށް އެޅުނެވެ. އަދި ޝިއުރީ ދެއްކި ވާހަކަ ޤަބޫލުކުރުމުގެ ގޮތުން މަޑުމަޑުން ބޯ ޖަހާލުމަށްފަހު، ދެލޮލުން އައިސްފައިވާ ކަރުނަތައް ފޮހެލިއެވެ.

“އަހަންނަށް ކޮން ޚަބަރެއް ދޭންވެފައި އޮތީ….؟؟؟؟” މިޝްޔާގެ އަޑަށް ޝިއުރީއާއި މިޝަލް ސިހިފައި ދޮރާ ދިމާއަށް ބަލާލިއެވެ. މިޝްޔާއަށް ބަލަހައްޓައިގެން ދެކުދިންނަށް ތިބެވުނީ އެ ސުވާލުގެ ޖަވާބުދޭން ނުކެރި ފަސްޖެހިފައެވެ.
______________________________

އަޔާނީއާއި ޔަލްވީގެ އެހީގައި މިޝްޔާ ކޮޅަށްހުރިއިރު ވަރުދެރަވެގެން ގޮސް އޭނާ ހުރީ އެލިފައެވެ. ރުއިމުގެ ސަބަބުން ދެލޯ ރަތްވެ ދުޅަވެފައިވާއިރު މޫނަށްވަނީ ލޭކުލަ އަރާފައެވެ. ބޯ ހޭވިފައިވުމުގެ ސަބަބުން ބައެއް އިސްތަށިތައް ކަރުނައާއިއެކުވެ، މޫނުގައި ތަތްލަވާފައި ވެއެވެ. ލައިގެން ހުރި ރަތްކުލައިގެ ހެދުމުގެ ކަރުވަޅާއި މޭމަތިވެސްވަނީ ކަރުނައިން ތެމިފައެވެ. މިޝްޔާމެންގެ ފަހަތުގައި އިޔާޒާއި ޝައުންވެސް މަޑުކޮށްލައިގެން ތިއްބެވެ.

“ދޮންބޭ ބުނެބަލަ….. ޖަވާބު ދީބަލަ…. ޒީކްގެ ޚަބަރެއް ވީތަ….؟؟؟؟” މިޝްޔާ އަނެއްކާވެސް އާދޭސްކޮށްލިއެވެ. މިޝަލަށް ބަލާލެވުނީ ޝިއުރީއާއި ދިމާއަށެވެ. ހަދަންވީ ކިހިނެއްހޭ އަހާލާ ފަދައިންނެވެ. އެ ދެލޮލުން ޝިއުރީއަށް ބިރުވެރިކަމާއި ހާސްކަން ފެނިގެން ދިޔައެވެ. އެހެންކަމުން ޝިއުރީ ލޮލުގެ އިޝާރާތުން ހަމަޖެހުމަށް އަންގާލިއެވެ. އަދި މަޑުމަޑުން ކުރިޔަށް ހިނގާލާފައި ގޮސް މިޝްޔާގެ އަތުގައި ހިފާލިއެވެ. އަދި ލޯތްބާއިއެކު އެ ދެލޮލުން އައިސްފައިވާ ކަރުނަތައް ފުހެލައިދިނުމަށްފަހު، އޭނާގެ ގައިގައި ހިފަހައްޓާލައިގެން ގެނެސް މަސްފެންގަނޑު ކައިރީގައި ހުރި ދިގު ގޮނޑީގައި ބޭންދިއެވެ. އަދި މިޝަލަށް ބަލާލަމުން މިޝްޔާގެ ގާތުގައި އިށީނުމަށް ލޮލުގެ އިޝާރާތުން އަންގާލިއެވެ. ޝިއުރީ ފުން ނޭވާއެއް ބޭރުކޮށްލުމަށްފަހު މިޝްޔާގެ ގާތުގައި ދެކަކޫ ޖަހާލަމުން އޭނާގެ ދެއަތުގައި ހިފަހައްޓާލީ މިޝްޔާގެ ދެލޮލަށް ބަލާލަމުންނެވެ. ޝިއުރީ ދައްކަން އުޅޭ ވާހަކައެއް އަޑު އަހާލުމުގެ ބޭނުމުގައި ޔަލްވީމެންވެސް އައިސް އެގޮނޑީގެ ލެނގޭބައިގައި ހިފަހައްޓާލަމުން ފަހަތުގައި މަޑުކޮށްލައިގެން ތިއްބެވެ.

“މިޝް…. އަހަރެން މިދައްކާ ވާހަކަ ކަނުލާ އަޑުއަހައްޗޭ…… މި ދުނިޔެއަކީ އަހަރެމެންނަށް ކުރިމަތިވެފައިވާ އިމްތިހާނެކޭ މިޝް އަބަދުވެސް ބުނަމެއްނު ދޯ….” ޝިއުރީ މިހެން ބުނުމުން މިޝްޔާ ބޯ ޖަހާލިނަމަވެސް، ޝިއުރީ ދައްކަމުންދިޔަ ވާހަކައިގެ މިސްރާބު ހުރި ގޮތުން އޭނާގެ ހިތް ބާރު ބާރަށް ތެޅެން ފެށީ ހިތް ބިރުގަތް ވަރުންނެވެ.

“އެހެންވީމަ އަހަރެމެން ޖެހޭނެ މިދުނިޔެމަތީގައި ދިމާވާ ހުރިހާ ކަންތަކަށް ކެތްތެރިވެ، އެ ހުރިހާ ކަމަކާ ނިކަން ކެރިގެން ކުރިމަތިލާން…. އަހަރެން ބުނަން މި އުޅެނީ މިޝްއަށް އަޑު އަހަން މާ ފަސޭހަ ވާހަކައެއް ނޫން….” ޝިއުރީއަށް މިހިސާބަށް ބުނެވުނުއިރު މިޝްޔާ ވަރަށް ބާރަށް އޭނާގެ އަތަށް ފިއްތާލިއެވެ. މިޝްޔާގެ މިއަމަލުން އޭނާ ޖެހިލުންވެފައި އިންވަރު ޝިއުރީއަށް ވިސްނުނެވެ. އެވާހަކަ ބުނަން ޖެހިލުންވާ ގޮތްވީ އެކަމުން މިޝްޔާއަށް ވާނެގޮތް ހިތަށް ގެންނަންވެސް ނޭނގޭތީއެވެ.

“ޝިއު އިތުރަށް ނުތަޅުވާ ބުނެބަލަ….” މިޝްޔާ އެއިން ގޮތަށް އިނދެ ތުރުތުރުލާ އަޑަކުން ބުނެލިއެވެ.

“މިޝްގެ މަންމަ އޮތީ ވަރަށް ސީރިއަސް ޙާލަތެއްގައި….. މަންމައަށް ވަނީ ކެންސަރު ޖެހިފައި…. އެންމެ ފަހު ސްޓޭޖްގައި…. ޑޮކްޓަރުންވަނީ އުންމީދުވެސް ކަނޑާލާފައި….” ނޭވާ ހިފަހައްޓާލައިގެން އިނދެ ޝިއުރީ އިއްވާލިއެވެ. މިޝްޔާއަށް ހީވީ އޭނާގެ ކަންފަތްމަތީގައި މީހަކު ޖެހިހެންނެވެ. އެ އަޑުތައް އޭނާއަށް އިވުނީ ހޮނު ގުގުރިއެއްގެ އަޑުހާ ބިރުވެރިކޮށްށެވެ. ނޫނެކޭ ބުނެ އޭނާ ކަންފަތުގައި ދެއަތް އަޅައިގެން ގޮނޑިން ތެދުވަމުން ބާރަށް ހަޅޭއްލަވައިގަތެވެ.
މާ ކުރިއްސުރެ އެކަމަށް ތައްޔާރުވެގެން އިން މިޝަލް ކޮޅަށް ތެދުވެ މިޝްޔާގެ ގައިގައި ހިފަހައްޓާލިއިރު، އޭނާއަށްވެސް ރޮވިއްޖެއެވެ. އަޔާނީއާއި، ޔަލްވީއަށް އަނގަމަތީ އަތްއަޅާލެވުނުގޮތަށް ދެލޯ ބޮޑުކޮށްލައިގެން ހުރެވުނީ ޤަބޫލުކުރަން ދަތިވެފައެވެ. އިޔާޒް މިޝަލްގެ ކޮނޑުގައި އަތް ބާއްވާލިއިރު އޭގެ ދެބެއިންނަށް ކެތްތެރިކަން ދެއްވުމަށް އެދި މާތްﷲ ޙަޟްރަތަށް ދުޢާ ދެންނެވުނެވެ. ޝައުނަށްވެސް މިޝަލްގެ އަނެއްކޮނޑުގައި އަތްބާއްވާލެވުނީ ހުރިހާ ކަމެއް ރަނގަޅުކުރެއްވުމަށް އެދި ހިތާހިތުން މާތްﷲގެ ޙަޟްރަތަށް ދުޢާ ދަންނަވާ ޙާލުއެވެ.

“ދޮންބޭ ކީއްވެ އެހެން މިވީ….” މިޝްޔާ، މިޝަލްގެ މޭމަތީ ބޯ އަޅާލަމުން ގިސްލާފައ ރޯން ފެށިއެވެ. އޭގެ އިރުކޮޅެއްފަހުން މިޝްޔާގެ ރުއިމުގެ އަޑު ކެނޑުމުން މިޝަލް، އޭނާ ގަޔާއި ދުރުކޮށްލިއެވެ. މިޝްޔާ އޮތީ ހޭނެތިފައެވެ. ލޯބިވާ ކޮއްކޮ އެ ޙާލުގައި ފެނުމުން މިޝަލަށް ފުން އަސަރުތަކެއް ކުރިއެވެ. ނަމަވެސް ކެތްތެރިވެވޭ އެންމެ މަތީ ދަރަޖައަށް ކެތްކުރަމުން، އެކުވެރިންގެ އެހީއާއިއެކު، އޭނާ އަވަސްވެގަތީ މިޝްޔާ ހަސްފަތާލަށް ގެންދެވޭތޯއެވެ.
********************

ހަސްފަތާލުގައި އެނދުމަތިކޮށްފައި އޮތް މިޝްޔާގެ ގާތުގައި ހުރި ގޮނޑީގައި އިށިނދެލައިގެން މިޝަލް އިނެވެ. އޭރުވެސް އޭނާގެ ދެލޮލުން ކަރުނަ ހުސްނުވެއެވެ. އިރުއިރުކޮޅުން އޭނާގެ އަތުތެރޭގައި އޮތް މިޝްޔާގެ އަތަށް ބޮސްދެއެވެ. އެނދުގެ އަނެއް ފަރާތުގައި ހުރި ގޮނޑީގައި އިށީނދެލައިގެން އިން ސަޖާޔާ މިޝަލަށް ހިތްވަރުލައިދެމުން ދިޔަނަމަވެސް، މިޝަލްގެ ހިތްވަރުވަނީ އެލިފައެވެ.

ޝިއުރީމެން ތިބީ ބޭރު ގޮނޑިބަރީގައި މަޑުކޮށްލައިގެންނެވެ. އެކުދިންގެ މޫނުމަތިންވެސް ފެންނަނީ ހިތާމައިގެ އަސަރުތަކެވެ. ގޮނޑިއަށް ވަރު ދޫކޮށްލައިގެން ތިބިއިރު އެއިން ކޮންމެ ކުއްޖަކު ފެނުން މީހެއްގެ ހިތުގައި ޙަމްދަރުދީ އުފެދޭހާ އެކުދިންގެ ޙާލު ދެރައެވެ.

“މަންމާ…..” ހޭއެރުމާއިއެކު ރޮއެގެންފައި މިޝްޔާ ތެދުވާން އުޅުނެވެ. އެހެނަސް ސަޖާޔާއާއި މިޝަލް މިޝްޔާ މަސަލަސް ކުރަން މަސައްކަތް ކުރަމުންދިޔައެވެ.

“ދޮންބޭ…. މަންމަ ގާތަށް އަހަރެން ގެންގޮސްދީ ޕްލީޒް….” މިޝްޔާ އާދޭހާއިއެކު މިޝަލްގެ މޭގައި ބޯ އަޅާލަމުން ބުނެލިއެވެ.

“މިޝް ނުބުންޏަސް ދޮންބެ މިޝް ގެންގޮސްދޭނަން…. އިހަށް ކުރުނބާ ފެންތަށި ބޯލައިގެން ގައިގައި ވަރު ޖައްސާލާ…..” ސަޖާޔާ ދިއްކޮށްލި ކުރުނބާ ފެންތަށި މިޝްޔާގެ ތުނބުގައި ޖައްސާލަމުން މިޝަލް ލޯތްބާއިއެކު ބުނެލިއެވެ.

“ނޫން ދޮންބޭ އަހަންނަކަށް ނުބޮވޭނެ….” އިތުރަށް މިޝަލްގެ މޭގައި ބޮނޑިވެލަމުން މިޝްޔާ ބުނެލިއެވެ.

“މިޝް ބަސްއަހައިގެން ފެންތަށި ބޯލާ… ވަރަށް ވަރުދެރަވެފައި ތިއޮތީ… މަންމައަށް މިޝް ތިހެން ހުއްޓާ ފެނިއްޖެއްޔާ މަންމަ ވަރަށް ދެރަވާނެ…. މިޝް ބޭނުންތަ އެހެންވާން…..؟؟؟؟” ސަޖާޔާ މިޝްޔާގެ ބޮލުގައި ފިރުމާލަމުން މިޝްޔާއަށް ވިސްނައިދޭން މަސައްކަތްކުރިއެވެ. މިޝަލް އަނެއްކާވެސް ފެންތަށި ދިއްކޮށްލުމުން މިޝްޔާ މޫނުލީ އަނެއް ދިމާއަށެވެ.

“އޯކޭ…. ކުރުނބާ ފެންތަށި ނުބޮންޏާ މިޝް އޮންނަން ޖެހޭނީ މިތާނގައި… ދޮންބެ އެކަނި މަންމަ ގާތަށް ދާނީ….” މިޝަލް ތަންކޮޅެއް ހަރުކަށިގޮތަކަށް މިހެން ބުނުމުން މިޝްޔާ އަވަސްއަވަހަށް ކުރުނބާ ފެންތަށި މިޝަލްގެ އަތުން އަތުލުމަށްފަހު، ތުންޖަހާލިއެވެ. އަދި ގަދަކަމުން އެތަށި ބޮއެ ހުސްކޮށްލިއެވެ. މިޝްޔާގެ އެ ހިތްވަރުން ހިތްވަރު ލިބިގަންނަމުން މިޝަލް މިޝްޔާގެ ނިއްކުރިއަށް ބޮސްދިނެވެ.
********************

މިޝަލްމެންނަށް މާލެ ދެވޭގޮތްވީ ޖެހިގެން އައި ދުވަހުގެ ހެނދުނެވެ. ލޯންޗުން ފޭބިގޮތަށް ޓެކްސީއެއްގައި އެމީހުން ދިޔައީ ހަސްފަތާލަށެވެ. އެތަނަށް ދެވުމުން މިޝަލް މާހިރަށް ގުޅާލިއެވެ. މާހިރާއިއެކު މެހެރީން ބާއްވާފައި އޮތް ކޮޓަރިއާއި ހަމައަށް ދެވުމުން މިޝަލްމެން ހުއްޓުނީ މާހިރުވެސް މަޑުކޮށްލުމުންނެވެ. އޭރުވެސް މިޝްޔާގެ ދެލޮލުން ކަރުނަ ހުސްނުވެއެވެ.

“ދަރިފުޅާ ނުރޮއެ ހިތްވަރުކުރޭ…. ދަރިފުޅު ތިގޮތަށް ރޮންޏާ ބައްޕައަކަށް ނުކެރޭނެ މަންމަގެ ގާތަށް ދަރިފުޅު ގެންދާކަށް….. މަންމައަށް ދަރިފުޅު ތި ޙާލުގައި ފެނިއްޖެއްޔާ މަންމަގެ ޙާލު އިތުރަށް ގޯސްވެދާނެ…..” މިޝްޔާގެ ބޮލުގައި ފިރުމާލަމުން މާހިރު ބުނެލިއެވެ. މިޝަލްވެސް ދެލޯ ފެންކަޅިވާން ފެށުމުން މޫނުގައި އަތްހިންގާލަމުން ކަރުނަތައް ހިންދާލަން މަސައްކަތް ކުރިއެވެ.

“ނޫން…. ބައްޕާ…. އަހަރެން ބޭނުން މަންމަ ދެކިލަން…. މަންމަ ގާތުގައި ހުރެގެން، އަހަންނެއް ނުރޯނަން…. ހިތްވަރުކުރާނަން….” ދެލޮލުން އައިސްފައިވާ ކަރުނަތައް އަވަހަށް ފުހެލަމުން މިޝްޔާ ބުނެލިއެވެ. މާހިރު އަނެއްކާވެސް މިޝްޔާގެ ބޮލުގައި ފިރުމާލުމަށްފަހު އޭނާގެ ނިއްކުރިއަށް ބޮސްދިނެވެ. އަދި އޭނާގެ އަތުގައި ހިފައިގެން މެހެރީން ބާއްވާފައި އޮތް ކޮޓަރިއަށް ވަނެވެ.

އެކިއެކި ހޮޅިތަކާއި މެޝިންތައް ގުޅާފައި އޮތް މެހެރީން ފެނުމުން މިޝްޔާގެ ގައިން ހީބިހި ނަގައިގެން ދިޔައެވެ. އޮކްސިޖަން ގުޅާފައިވާއިރު ލޭ މަދުކަމުން ލޭ ފުޅިއެއްވެސް ގުޅާފައި އޮތެވެ. ދޮން މޫނު ހީވަނީ ނޫފައިގެންފައި އޮތްހެންނެވެ. ހަފްތާއެއްގެތެރޭ މީހާ ހިކި އަނަރޫފަވެފައި އޮތްތައް ފެނުމުން ދެކުދިންވެސް ހިތުގައި ޖެހި ރޮވޭގޮތްވިއެވެ. އެހެނަސް ބައްޕަ ބުނިފަދައިން މަންމަ ކުރިމަތީގައި ކަރުނަތައް ހިފަހައްޓަން، ދެކުދިންވެސް ހިތްވަރުކުރަމުން ދިޔައެވެ.

ދޮރުމަތީގައި މަޑުކޮށްލައިގެން ތިބި ދެދަރިން ފެނުމުން ވަރުދެރަވެފައި އޮތް މެހެރީންގެ ހިކިފައިވާ ތުންފަތަށް ހިނިތުންވުމެއް ވެރިވިއެވެ. މަޑުމަޑުން ދެކުދިންނާއި ދިމާއަށް އަތްހިއްލާލުމުން ދެކުދިން އެއްފަހަރާ އޭނާގެ ގާތަށް ދިޔައެވެ. މެހެރީންގެ އަތުގައި ހިފާލަމުން މިޝްޔާ، އެ އަތަށް ބޮސްދިންވަގުތު ދެލޮލުން ކަރުނަ އަންނަންފެށިއެވެ. އެހެނަސް އަވަސްއަވަހަށް ކަރުނަ ފުހެލުމަށްފަހު، މަންމައަށް ބަލާލަމުން ހިނިތުންވާން މަސައްކަތް ކުރިއެވެ.
މިޝަލްވެސް މަންމަގެ ބޮލުގައި ފިރުމަމުން ދިޔައިރު އޭނައަށް ހުރެވެނީއެއް ނޫނެވެ.
މެހެރީން މަޑުމަޑުން އެއްޗެކޭ ބުނެލިއެވެ. އެހެނަސް، އޮކްސިޖަން ގުޅާފައި އޮތުމުން އޭނާ ދައްކާ ވާހަކަ ސާފުވާގޮތެއް ނުވިއެވެ.

“މަންމާ އެހަށް ވާހަކަ ނުދައްކާ އަރާމުކޮށްލާ….. މާތްﷲ އިރާދަކުރެއްވިއްޔާ މަންމަ ވަރަށް އަވަހަށް ރަނގަޅުވާނެ….” ޑަކުޓަރުން އުއްމީދު ކަނޑާލާފައި ވީނަމަވެސް، މިޝަލް އުއްމީދު ކަނޑާލާކަށް ބޭނުމެއް ނުވެއެވެ. އޭނާ ލަސްލަހުން ގުދުވެ މަންމަގެ ނިއްކުރިއަށް ބޮސްދިނެވެ. އެވަގުތު މެހެރީންއަށް ދެލޯމަރާލެވުނުހިނދު، އެސްފިޔަތައް ފޫދުއްވާލުމަށްފަހު ކަރުނަތައް ފައިބައިގަތެވެ. މިޝަލް އެހެން ބުނިކަމުގައިވިޔަސް އޭނާއަކަށް، ރަނގަޅުވާނެކަމުގެ އެއްވެސް އުއްމީދެއް ނެތެވެ. އޭނާގެ ގައިގައި އަޅައި ވޭނައި ރިހުން އެންމެ ރަނގަޅަށް އެނގޭނީ އޭނާއަކަށް ނޫންހެއްޔެވެ.؟ މެހެރީން އެންމެ ދެރަވަނީ އެހާ ލޯބި ލޯބި އަޚްލާޤް ރަނގަޅު ދެކުދިންނާއި، ލޯބިވާ ފިރިމީހާ ދޫކޮށް ދާންޖެހޭތީއެވެ. އެހެން ހިތަށް އެރުމުން އޭނާއަށް ގިސްލެވެން ފެށުނެވެ. މެހެރީން ރޯތަން ފެނުމުން މިޝްޔާމެންނަށްވެސް ކެތެއް ނުވިއެވެ. އެންމެ ހިތްވަރުކޮށްގެން ހުރި މާހިރުގެ ދެލޮލުންވެސް ކަރުނަ ފާއްދާލިއެވެ.
********************

ހަފްތާއެއް ހޭދަވެގެން ދިޔައިރުވެސް ޒިކާންގެ ޚަބަރެއް ނުވެއެވެ. މެހެރީންގެ ޙާލުވެސް ދިޔައީ ދުވަހެއް ދުވަހަކަށް ދަށްވަމުންނެވެ. ނުކައި ހުންނަން ފެށުމުން މިޝްޔާވެސް އައީ ދުވަހެއް ދުވަހަކަށް ހިކެމުންނެވެ. އަބަދު ރޮއެ ހިތާމަކުރުމުގެ ސަބަބުން ދެލޯދޮށް ކަޅުވެ، ދެލޯހުންނަނީ ވަޅުވަދެފައެވެ. ދެލޮލުން ކަރުނަ ހުސްވާ ވަގުތެއް އަންނަހެންނެއް ހިއެއް ނުވެއެވެ. މިޝަލްގެ ޙާލަކީވެސް މިއެވެ. ނަމަވެސް އާއިލާއަށްޓަކައި އޭނާއަށް ނެތް ހިތްވަރުލާން އެބަޖެހެއެވެ. އެހެންކަމުން ގަދަކަމުންނަމަވެސް، ކާ އެއްޗެއް ކެވޭތޯ އޭނާ މަސައްކަތް ކުރެއެވެ. އަދި އެގޮތް މިގޮތުން މިޝްޔާއަށްވެސް ކާންދޭން މަސައްކަތް ކުރެއެވެ.
********************

އެކުވެރިޔާއަށް ދިމާވެފައިވާ ހިތްދަތިކަމުގެ ސަބަބުން ޝިއުރީމެންގެ ދިރިއުޅުމަށްވެސް އަސަރުކޮށްފައިވެއެވެ. އެކުވެރިޔާ ނެތްކަމުގެ ފަޅުކަން އިޙުސާސް ކުރެވޭ ކޮންމެ ފަހަރަކު އެއިން ކޮންމެ މޫނަކުން މާޔޫސީގެ އަސަރު ފާޅުވެއެވެ. އެހެނަސް ކޮންމެ ދުވަހަކު އެތައް ފަހަރަކު ގުޅާ ހާލު ބަލަމުންދާކަމީ، އެ ގުޅުމުގައިވާ އެކުވެރިކަން ރަމްޒުކޮށްދޭ ވަރުގަދަ ހެއްކެކެވެ.
********************

“ރޯޒީ”ގޭ ހަލަބޮލިވެފައިވަނީ ޝައިމަންގެ ކައިވެނީގެ ޙަފްލާއަށް ތައްޔާރުވަމުންދިޔަ މީހުންގެ އަޑު ފަށްގަނޑުންނެވެ. ޝިއުރީއާއި އަޔާނީ އަދި ޔަލްވީވެސް އެމީހުންގެ ތެރޭގައި ޙަރަކާތްތެރިވަމުން ދިޔައެވެ. އެކުވެރިޔާގެ ހިތާމަތަކުގެ ސަބަބުން ހިތަށް އަސަރު ކޮށްފައިވީނަމަވެސް މިރެއަކީ ޝައިމަންގެ ޙަޔާތަށް އަންނާނެ އެންމެ އުފާވެރި އެއް ރެއަށްވުމުން ޝިއުރީ މަސައްކަތް ކުރަމުން ދިޔައީ ވެވުނު ވަރަކުން ޝައިމަންގެ އުފަލުގައި ބައިވެރިވެވޭތޯއެވެ.

ޝައިމަންގެ ވާންއުޅޭ އަނބިމީހާ ރިފްގާއަކީ އެ އަތޮޅު އެހެން ރަށެއްގެ ކުއްޖެކެވެ. އެ ދެކުދިންގެ ކައިވެނީގެ ޙަފްލާގައި ބައިވެރިވުމަށް ރިފްގާގެ ޢާއިލާގެ ވަރަށް ގިނަ މީހުން އެ ދުވަހު އެރަށަށް އައިސްއުޅެއެވެ. ޝިއުރީ އަވަދިނެތި އުޅެމުންދިޔައީ ކައިވެނީގެ ޙަފްލާއަށް ރިފްގާ ތައްޔާރުކުރުމުގައެވެ. ޔަލްވީއާއި އަޔާނީ އޭނާއަށް އެހީވުމުގައި އެތާގައި ޙަރަކާތްތެރިވަމުންދިޔައެވެ. ހުދުކުލައިގެ ބޮޑު ކައިވެނީގެ ހެދުމުގައި އިން ރިފްގާ ތައްޔާރުކޮށް ނިމުމުން ޝިއުރީ ހިންދެމިލަމުން ހުރިހާކަމެއް ރަނގަޅަށް ކުރެވިފައިވޭތޯ ރިފްގާއަށް ބަލާލިއެވެ. އެހިނދުމެ ރިފްގާގެ ރީތިކަމަށް ތަޢުރީފްކޮށްނުލާ އޭނާއަކަށް ނުހުރެވުނެވެ. ރިފްގާއަކީ ހަމުގެ ކުލަ މާ އަލި ކުއްޖަކަށް ނުވިޔަސް ގުދުރަތުން އޭނާއަށްވަނީ ރީތިކަމެއް ލިބިފައެވެ. ލަކުނެއް ނުވާ އޮމާން މޫނެކެވެ. ބޮޑުބޮޑު ދެލޮލާއި ދިގު އެސްފިތަކުން މީހުންގެ ހިތްތައް ފިދާވާހާ ވެއެވެ. ރިފްގާ ރީތިކޮށް ނިމުމުން ކައިވެނީގެ ޙަފްލާ ފެށެންވާއިރަށް ޝިއުރީ ދިޔައީ ތައްޔާރުވާށެވެ.

ފައތިލައާއި ހަމައަށް އަރާ ވިލުނޫކުލައިގެ ދިގު ހެދުމުގައި ޝިއުރީ ހީވަނީ ރީތި ޕަރީއެއްހެންނެވެ. ހެދުމުގެ މޭމަތީ ރީތި ޑިޒައިނަކަށް އަޅާފައި ހުރި އަޅިކުލައިގެ ވެލިފޮތިތަކުގެ އަލި ދޮން މޫނަށް އެޅިފައިވާއިރު، ފެންނަލެއް ނުހަނު ހިތްގައިމެވެ. ދިގު އިސްތަށިގަނޑު އޮތީ ހުޅިޖަހާ ހައްޔަރުކޮށްލާފައެވެ. ކުރު އިސްތަށިކޮޅުތައް ކަންފަތްކައިރިން ދޫކޮށްލާފައި އޮންނައިރު ބުޅިކަމުން އޮތީ އޮޅިފައެވެ. އަޅިކުލައިގެ ދެލޮލުގެ ވަށައިގެން އަނދުން އަޅާފައިވާއިރު އެ ދެލޯ އިހުނަށްވުރެވެސް ބޮޑަށް ފާޅުވެއެވެ. ތުންފަތުގައި ރަތް ކުލައިގެ ލިޕްސްޓިކް ޖައްސާފައިވާއިރު ޝިއުރީގެ ދޮންމޫނާ ނުހަނު ގުޅެއެވެ. އަތުގައާއި، ކަރުގައި، ހެދުމާއި ގުޅޭ ކުލަތަކުން ގަހަނާ އަޅާފައިވެއެވެ. ކޮޓަރިން ނުކުމެގެން އައިއިރު ފެންނަ ކޮންމެ މީހަކަށްވެސް ޝިއުރީގެ ރީތިކަމަށް ތަޢުރީފްކޮށްނުލައެއް ނުހުރެވުނެވެ. ޔަލްވީމެންވެސް ޝިއުރީ ފެނުމުން އޭނާގެ ރީތިކަމަށް ތަޢުރީފްކޮށްލިއެވެ. އެރޭ އެ ކުދިން މިޝްޔާ މަތިން ވަރަށް ހަނދާންކުރިއެވެ.

ކައިވެނިކޮށް ނިމުމުން އެންމެންވެސް މިސްރާބުޖެހީ ވަލީމާ ބޭއްވުމަށް ހަމަޖެހިފައިވާ ސަރަޙައްދަށް ދިއުމަށެވެ. ވަލީމާ ބޭއްވުމަށް ހަމަޖެހިފައިވީ އެގެއާއި ދިމާ އަތިރިމަތީ ސަރަޙައްދުގައެވެ.

ޝިއުރީއާއި ޝަނާޔާ ރިފްގާގެ ދިގުހެދުމުގެ ފަސްބައިގައި ހިފަހައްޓާލައިގެން ހުރީ ހެނދުން ބިންމަތީގައި ކޭއްތޭތީއެވެ. ޔަލްވީމެންވެސް ގާތުގައި ތިއްބެވެ. ރިފްގާއާއި އެއް ހަމައެއްގައި ހުރެގެން ޝައިމަންވެސް ދިޔައެވެ. ދެންތިބި މީހުން އައީ އެމީހުންގެ ފަހަތުންނެވެ.

“އޯހް….ނޯ…. ބުކޭ ވީ ގޭގަ…. ހަނދާނެއްވެސް ނެތް އެ ގެންނާކަށް…..” ވަލީމާ ބާއްވާ ސަރަޙައްދަށް ދެވުމުން ކުއްލިއަކަށް ހަނދާންވެގެން ޝިއުރީ ބުނެލިއެވެ. އަދި ހަލުވިކޮށް ހިނގާލާފައި ގެއާއި ދިމާއަށް މިސްރާބުޖެހީ އެ ބަލާ ދިއުމަށެވެ.

ގެއަށްވަދެ ކޮޓަރީގައި އޮތް ބުކޭ ހިފައިގެން ނުކުންނަންދިޔަ ޝިއުރީއަށް ހުއްޓެވުނީ ކާގޭ ތެރެއިން ބަޔަކު ވާހަކަ ދައްކާ އަޑަށްށެވެ. އެ ދިމާއަށް ހިނގައިގަނެވުނީ އެތާ އުޅެނީ ކޮންބައެއްތޯ ބަލާލުމުގެ ބޭނުމުގައެވެ. އެހެނަސް ދެފައި ގަނޑުވިކަމުގެ އިޙުސާސް ކުރެވުނީ ކާގޭ ތެރެއިން ފެނުނު މަންޒަރަކުންނެވެ. އަތުގައި އޮތް ބުކޭ އަތުން ދޫވެގެން ވެއްޓުންއިރު، އޭނާއަށް އަނގަމަތީ އަތްއަޅާލެވުނީ ކުރިމަތިން ފެންނަމުން ދިޔަ މަންޒަރު ޤަބޫލުކުރަން ދަތިވެފައި ހުރެއެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.