ހިތް އެކީ ދެވިއްޖޭ….28

“ކިއާ ލޯތްބަކީ ވަރަށް ފާޑެއްގެ އެއްޗެއް… އެކަމް ކިއާ ތިކުރީ އެންމެ ރަނގަޅަށް ހުރިހާ ކަމެއްވެސް…. އޭނާއަށް ތި ލޯތްބެއް ހައްޤެއްނޫން ހަމައެހެންމެ ކިއާއަށްވެސް އޭނާ ހައްޤެއްނޫން..” ސަމާހް ބުންޏެވެ. ކިއާރާ ހުމްމް އޭ ބުންޏެވެ.. “ސޭމް އަށް ލޯބި ފާޑެއްގެ އެއްޗަކަށް ވީ ކީއްވެ؟” ކިއާރާ އެހިއެވެ. ސަމާހް ހެމުން ހެމުން ކިއާރާއަށް ބަލައިލިއެވެ. “އެއް ސިޓުއޭޝަންއެއް… އޭޒް ޔޫ…. ލޯބިވާ ކުއްޖާ ލޯބިވަނީ އެހެން ކުއްޖެއް ދެކެ. އެ ހިތް ވަރަށް ކުރިންވެސް ވަނީ މިލްކް ކުރެވިފައި..” ސަމާހް ބުންޏެވެ.. “އަޅޭ… އެކަމް ސޭމް.. ސީ! ލޯބި ހޯދުމަކީ ވަރަށް މުހިންމު ކަމެއް.. ލޯބިވެޔޭ ކިޔާފަ ލޯބި ހޯދަން މަސައްކަތްނުކުރުމަކީ ފިނޑިންގެ އާދަ.. ޔޫ ނޯ މީހުން ބުނޭ ފިންޑިންނަށް ލޯބި ޑިސަރވް އެއް ނުވާނޭ.. ޔޫ ޝުޑް ޓްރައި އޭނާ ހޯދަން…” ކިއާރާ ބުނެލީ ސަމާހްއަށް ހިތްވަރެއް ދޭފަދަ ގޮތަކަށެވެ. އެއްގޮތަކަށްވެސް އޭނާއަށް އެ ދެއްކީ އޭނާގެ ވާހަކަކަމެއް ނޭނގެއެވެ. ސަމާހް ހޭންފެށިއެވެ. “އޭނާ އެހެން ކުއްޖެއް ދެކެ ލޯބިވޭ ކިއާ.. އޭނާ ހޯދުމަކީ އުނދަގޫކަމެއް…” ސަމާހްއެހެން ބުނުމުން ކިއާރާ ސަމާހް ގެ އަތުގައި ހިފެހެއްޓިއެވެ.

“ކިއާގެ ޑޭޑް ކިއާ ކައިރި އަބަދުވެސް ބުނާ ވާހަކައެއް މީ…. ބޯޅަ ހިފަހައްޓަން ގޯލްކީޕަރެއް ހުއްޓަސް ގޯލް ޖަހައެއް ނޫންހޭ…. އެވްރީ ގޯލް ހޭސް އަ ކީޕަރ… ބަޓް ސްޓިލް ވީ ސްކޯރ…. ރައިޓް؟ ސޯ އޭނާގެ ހިތުގައި އެހެން މީހަކު އޮތަސް ޓްރައި ކުރުން ހުއްޓާލާކަށް ނުވާނެ…” ކިއާރާ ބުންޏެވެ. ސަމާހް ހެމުން ކިއާރާގެ ކޮލަށް ދަމާލިއެވެ. “އަބަދު ގޯލްއަކަށް ބޯޅައެއް ނުވަންނާނޭ… ބޭރަށްވެސް ދޭނު.. އެން  ގޯލް ކީޕަރާއި ގޯލްގެ ދަނޑީގެ ކަނެކްޝަން މާ ރަނގަޅު ވިއްޔާ؟ އެހެންނަމަ ކިއާވެސް ހޯދަންވީނު އަޔާން؟” ސަމާހް އެހެން ބުނުމާއި އެކު ކިއާރާ ހިީލާފައި އިސްޖެހިއެވެ. “ހޯދަން އުޅުނިން… ފުރަތަމަ ސްޓެޕް އާއި އެކު އޭނާ ލޮތްބަށް ކުރީ މަލާމާތް… ސޯ ބެޓަރ ޓު ނޮޓް ސްކޯރ..” ކިއާރާ އިތުރަށް ބުނަން ނުހަދާ އެހިސާބުން މެދުކަނޑާލިއެވެ.. “ދެން ސޭމް އެ ކުއްޖާ ހޯދަން އުޅުނީމަ ވާނީ ކިހިނެއް؟ އޭނާ އެހެން ކުއްޖެއް ދެކެ އިންތިހާއަށް ލޯބިވެ ސޭމްއަށް ޔަޤީން އޭނާ ނުލިބޭނެކަން..” ސަމާހް އެހެން ބުނުމުން ކިއާރާ ލޯ އަޅާލިއެވެ. “އެކަމް ގިވް އަޕް ނުކޮށް ޓްރައި ކުރާތި..” ކިއާރާ އެހެން ބުންޏެވެ. “ހިނގާ ދާން ދޯ…” ސަމާހް ތެދުވަމުން އެހެން ބުނެލީ އެތަނުން ދާން ބޭނުންވިލެއް ބޮޑުވެގެންނެވެ. އޭނާއަށް މައިޝާ ދެއްކި ހުރިހާ އެއްޗެއްގެ މާނަ އިނގުނެވެ. ކިއާރާ އަސްލެއްނޫނޭ ބުނި ބަހުގެ މާނަވެސް އިނގުނެވެ.

ކިއާރާވެސް ތެދުވެ ސަމާހް އާއި  އެއްވަރަކަށް ހިނގާލާފައި މަގުމައްޗަށް ނިކުތެވެ.. ކިއާރާ އަޔާން ދިޔަ ދިމާލަށް ބަލައިލެވުނު އިރު . ސަމާހް ކިއާރާއަށް ބަލައިލިއެވެ. “ކިއާ… ކިއާ އޭނާ ދެކެ ލޯބިވާހާ ހިނދަކު މި ލޯތްބެއް ނުފޯރުކުރެވޭނެ…” ސަމާހް ހިތާހިތުން ބުނީ އެ މޫނަށް ގެއްލި ހުރެފައެވެ.  އެއަށްފަހު ކާރަކަށް އަތް ހިއްލިއެވެ. “އެކަނިންތަ ދާނީ؟” ސަމާހް އެހިއެވެ.. “އާދޭ ސޭމްވެސް ދާން…” ކިއާރާ ކާރަށް އަރަމުން އެހެން ބުންޏެވެ. އެހެންކަމުން ސަމާހްވެސް އެރިއެވެ.

ކިއާރާއާއި ސަމާހް ބޮޑު ގޭޓުން އެތެރެއަށް ވަދެ ގޭގެ ތެރެއަށް ވަދެވެން ހުރި ބޮޑު ދޮރު ހުރަސްކުރިއެވެ. އެވަގުތު ފަތުހީ ސިޑިން ތިރިއަށް ފައިބައިގެން އަންނަނީއެވެ. “އަނހަ ސަމާހްވެސް އައީތަ.. ވަދޭ ވަދޭ..” ފަތުހީ ބުނެލީ ހިނިތުންވުމާއި އެކުގައެވެ. “ދެން ކައިގެން ވާނީ ދާން..” ފަތުހީ ބުންނެވެ. “ނޫނޭ…. ކައިގެން މިއައީ..” ސަމާހް ސޯފާގައި އިށިނދެލަމުން ބުނެލީ ބަނޑުގައި އަތް އަޅާލާފައެވެ.. ކިއާރާ ވެސް ސަމާހް ކައިރި އިށީނދެލަމުން ފޯނާއި ކުޅެން އިނެވެ. ސަމާހް އާއި ފަތުހީ ވާހަކައިގައި ތިއްބެވެ.

“ޝަކޫރު ބުނި ސަމާހް ބުލޫސްއާއި ގުޅޭވާހަކަ؟” ފަތުހީ އެ ތެދެއްތޯ ޔަޤީންކުރަން އެހިއެވެ. “ލައްބަ މިހާރު އުޅޭ އޮފީހުގެ މެނޭޖްމެންޓް ވަރަށް ސަކަރާތް، ދެން ދޮންބޭބެ ބުނުއްވި ބުލޫސްއާއި ގުޅެން، އަދި ހަމެޖެހޭ ވަޒީފާއެއް މި ބަލަނީ..” ސަމާހް ބުންޏެވެ. “އެޗް އާރ ހައިޝަމް އެބައުޅޭ ލީވް ކުރަން، އެ ޖޮބް ވަރަށް ރަނގަޅުވާނެ ސަމާހްއަށް، ޝަކޫރުވެސް ދެއްކީ އެވާހަކަ..” ފަތުހީ އޭނާގެ ހިޔާލުފާޅުކޮށްލުމުން ސަމާހް އެއްބަސްވިއެވެ. “އަޅުގަނޑު ހައިޝަމް އާއި ވާހަކަދައްކާލާނަން….” ކިއާރާ ފޯނާއި ކުޅެން އިނދެފައި އެހެން ބުންޏެވެ.

އަނެއްދުވަހު މައިޝާއާއި ޒާއިން މެލޭޝިޔާއަށް ފުރިއެވެ. ކިއާރާ އެމީހުންނާއި ބައްދަލު ނުކުރެވުނީ އޮފީހުގައި އޭނާއަށް ބުރަވުމުގެ ސަބަބުންނެވެ. ޒާއިންގެ މަސައްކަތްވެސް އޭނާގެ ބޮލުގައި އެޅުނީމައެވެ. މަހެއްވަރު އޭނާ ޖެހެނީ އެކަމުގައި އުޅެންށެވެ. މިއަދު އޭނާއާއި ފަތުހީ ކާރުގަ އާއިރު ކިއާރާ ދުއްވީއެވެ. އޭނާއަށް މާ އުނދަގުލެއްނޫނެވެ. އެކޮޅުގައިވެސް އޭނާވަނީ ކާރު ދުއްވައިފައެވެ. އެކަމުގެ ސަބަބުން ޑްރައިވިން ޓެސްޓްއިން ފަސޭހައިން ފާސްވެ ލައިސެންސް ލިބުނެވެ. މަގުތަށް މިހާރު ހިސާބަކަށް ކިއާރާއަށް އިނގެއެވެ.

ވަގުތު ހޯދައިގެން ކިއާރާ މައިޝާމެންނަށް ގުޅާ ވާހަކަ ދެއްކުމަށްފަހު ބާއްޖަވެރި ދަތުރަކަށް އެދި އަވަހަށް ބައްދަލުވާނެކަމަށް ބުނެ ފޯނު ކަނޑާލިއެވެ. އަދި އަނެއްކާވެސް މަސައްކަތުގައި އުޅުނެވެ. ކިއާރާ މުވައްޒަފުން ކައިރިއަށް ގޮސް އެމީހުންގެ މަސައްކަތުގައި ބައިވެރިވުމާއި އެ ހުރިހާ ކަމެއްގައި އުޅުނެވެ. “ހޭ ހައިޝަމް؟ ކޮބާ ކިހިނެއްވަނީ؟ އިންޑިއާ ޓްރިޕް؟ ކޮންފޯރމް ވީތަ؟” ކިއާރާ އަހާލީ އެމީހުންގެ ތެރޭ އުޅެނިކޮށް ހައިޝަމް ފެނުމުންނެވެ. “މިއަދު މޭމް ކައިރިއަށް ދާންވެގެން މިއުޅެނީ ތިވާހަކަ ދައްކަން… އަޅުގަނޑު ގެ ދިޔުން މިހާރު ކޮންފޯރމް ވެއްޖެ.. ރިޒައިން ވާނަން މިއަދު.. ރެޝިޕްޝަނަށް އަޅުގަނޑު ލެޓަރ ހަވާލްކޮށްލިން…” ހައިޝަމް ބުންޏެވެ. “އެހެންތަ… އަދި އެކަހަލަ ވާހަކައެއް ހިފައިގެން ނާދެ އެކޮޅުން ކުއްޖެއް… މިއަދު އެޕްރޫވްކޮށްޕަ ހަވާލުކޮށްލާނަން އިނގޭ..” ކިއާރާ އެހެން ބުނެފައި ރެޝިޕްޝަނަށް ދާން ހިނގައިގަތީ އެކަން އަވަހަށް ކޮށްލުމުގެ ގޮތުންނެވެ.

ރިޝެޕްޝަނާއި ވާހަކަދެއްކުމަށްފަހު ކިއާރާ ފަތުހީއާއި ޝުކޫރުއާއި ހަމާއަށް އެވާހަކަ ގެންގޮސް ހައިޝަމްގެ ކަންތަށް ނިންމާލުމުގައި އުޅުނެވެ. އަދި ސަމާހް އެއަށް ހަމަޖެއްސުމުގައި އުޅުނެވެ.

އޭނާގެ މަސައްކަތްހުއްޓުނީ ފޯނަށް އައި ކޯލެއްގެ ސަބަބުންނެވެ. އެއީ ފަތުހީއެވެ. އަވަހަށް ކެބިންއަށް އައުމަށް އެދުނީއެވެ. ކިއަރާ ހަލުވިކަމާއި އެކު ދިޔައެވެ. “ކީކޭތޯ ބައްޕާ؟” ކިއާރާ އެހިއެވެ. “ވަރަށް އަވަހަށް ދޭބަލަ އެއަރޕޯޓަށް.. ދެވޭނެ އެއްނު ދޯ؟.. އެއްކަ މެލޭޝިޔާއިން އަންނަންއުޅުނު ޑެނީ އައިއްސި.. ބައްޕައަކަށް ނެތް ދެވޭކަށް.. ޒާއިން ހުރި ނަމަ އޭނާ ފޮނުވީހީ… ކިއާ ދޭބަލަ އަވަހަށް…” ފަތުހީ ބުނީ ވަރަށް އަވަސްއަވަހަށެވެ.. އޭރުވެސް އޭނާ އިނީ މަސައްކަތެއްގައެވެ. “ވަޓް؟ އޭނާ އުޅުނީ މާދަމާއެއްނު އަންނަން؟” ކިއާރާ ބުނެލީ ނިތްކުރިމަތީ ޖަހާލަމުންނެވެ. މިހާ ބުރަދުވަހަކު މިހަކަލަ ކަމެއް ނޫނީ ނުވާނެއެވެ. “ބައްޕަވެސް ހީކުރީ މާދަމާ ކަމަށޭ… އެކަމް އޭނާ ޑޭޓް އަވަސްކުރީ މިހާރު ޖައްސައިފި ފްލައިޓް.. ބައްޕަ ހަނދާންވެސް ނެތިފައި ހުރީ.” ފަތުހީ ކުރުގޮތަކަށް ބުންޏެވެ.. “އޯކޭ ޑޭޑް.. މިދަނީ..” ކިއާރާ ބުނެފައި ހިނގައިގަތެވެ.  “އިނގޭނެ ދާން؟ ބައްޕަ ފޮނުވާލާނަން އޭނާ ރާއްޖެ ނަމްބަރ” ކިއާރާ ދާން ހިނގައިގަތުމުން ފަތުހީ އެހިއެވެ. “ލައްބަ ޑޭޑް.. މެޕްގެ އެހީގައިވެސް ދެވޭނޭ… މިދަނީއަވަހަށް..” ކިއާރާ އެހެން ބުނެފައި އަވަސް އަވަހަށް އޭނާގެ ކެބިންއަށް ވަދެ ދަބަސް އަޅުވާލަމުން ނިކުތެވެ. ދަބަސް ތެރެއިން ނެގި ކުޑަ ފުއްދަޅާއި ލިޕްސްޓިކް ތުންފަތުގައި ހާކާލާ އެ މޫނުމަތި ރީތިކޮށްލީ ލިފްޓް ތެރޭ ހުރެފައެވެ. ދިޔުމުގެ ކުރިން ރެސިޕްޝަން ކައިރި ކިއާރާ މަޑުކޮށްލިއެވެ.

“އިންނާނެ ކެބިންގެ ޒާއިން ސަރ އިންނަ ފަޅީގައި ބްލޫ ފައިލްއެއް.. އެ ފައިލް ނަގާފައި ވަރަށް އަވަހަށް ހައްމާދު އާއި ހަވާލުކޮށްލަބަ… މިދަނީ އަންނަން ބުނި އެއްނު ޑެނީ އޭނާ ގެންނަން..” ކިއާރާ އެއްނޭވައިން އެހެން ބުނެފައި ހިނގައިގަތެވެ. ހަސްނާ އަވަހަށް ކިއާރާ ބުނި ކަންތަށްކުރަން އުޅުނެވެ. . ކިއާރާ ހަލުވިކަމާއި އެކު ނިކުމެ އެނބުރުގަތް ވަގުތު ޕާކްއޭރިއާއިން ހިނގައިފައި އައި އަޔާން ފެނުނެވެ. ކިއާރާ ހިންދިރުވާލިއެވެ. އަދި ލަސްފިޔަވަޅާއި އެކު އިސްޖަހާލައިގެން އެ ދިމާލަށް ދިޔައެވެ. އައިނުން ފޮރުވާލެވިފައި އިން އަޔާންގެ ދެލޯ ހުރީ ކިއާރާއަށެވެ. ދެމީހުން ސީދާ ވުމާއި އެކު ހުއްޓެވުނީ ކުއްލިއަކަށެވެ. ކިއާރާ އަޔާންގެ މޫނަށް ބަލައިލީ ކުޑަކޮށް އިސްއުފުލާފައެވެ. އަޔާން އިސްތިރިކޮށްލަމުން ކިއާރާގެ މޫނަށް ބަލައިލިއެވެ. ކިއާރާ ނަޒަރު ތިރިކޮށްލަމުން ހިނގައިގަތީ ދަބަހުގެ ވާގަނޑާއި ކުޅެމުންނެވެ. އެ ހިތް ހީވަނީ ރޭސްއެއްޖަހާހެންނެވެ. އަޔާން ވެސް ފުންނޭވައެއް ދޫކޮށްލާފައި ހިނގައިގަތެވެ. އެ ހިމޭންކަމުގެ ކުޑަ ސިކުންތުކޮޅު ތެރޭ އެތަށް ވާހަކައެއް އެދެހިތް ދެއްކިއެވެ.

“ޔާރާ އޭ އަޑުއަހާށޭ….

މިހިތަށް ލޯބި ދޭށޭ…”

ކިއާރާ ގޮސް ކާރަށް އަރާލައިފާ ހޭންޑްލް ގައި ހިފަހައްޓާލައިގެން އިނދެ އަމިއްލަ ނަފްސް ހަމަޔަކަށް އަޅުވާލިއެވެ. އަދި ކާރު ސްޓާރޓްކުރިއެވެ.. އޭނާ ގޮސް ކާރު ވަކި ހިސާބެއްގައި ޕާކްކޮށްލުމަށްފަހު ދަބަސް ހިފައިގެން ހިނގައިގަތީ ފެރީގެ ޓިކެޓް ކައުންޓަރ އަށެވެ. އެއަށްފަހު ޓިކެޓް އެއް ނަގައިގެން އެތާ ހިޔަލުގައި ހުއްޓާ އޭނާގެ ލޮލު ކުރިމައްޗަށް އެރީ ކިއާރާގެ އެއްފަޅިއަކަށް މަޑުކޮށްލި އަނީލްއާއި ހަމްނާއެވެ. ކިއާރާ އެމީހުން ފެނިފައި ކުޑަކޮށް ސިހުނެއްކަމަކު ހަމަޖެހުނެވެ. ހަމްނާ ކިއާރާއަށް ބަލާލާފައި ހިނިތުންވުމެއް ދިނުމުން ކިއާރާވެސް އެގޮތަށް ކަންކުރިއެވެ. އެ ތިންމީހުންވެސް އަރަން ޖެހުނީ އެއް ފެރީއަކަށެވެ. ކިއާރާ ފެރީއަށް އަރަން ވަރަށް ބިރުގަނެއެވެ. އެ ތެޅޭވަރުން އިރު އިރުކޮޅާ ދުރަށް ޖެހި ކައިރިވެއެވެ. ކަނޑުވެސް މިއަދު އެހާ މަޑެއްނޫނެވެ. ނަގައި ރާޅުތަށް އެހާ ބޮޑު ނޫނަސް ކުޑައެކޭ ނުބުނެވޭނެއެވެ. ކިއާރާގެ މޫނު ފެނިފައި އަނީލްއަށް އިނގުނީކަންނޭނގެއެވެ. އެހެންކަމުން ހަމްނާ އެރުވުމަށްފަހު އެ އެންމެންގެ ތެރެއިން ކިއާރާއަށް އަތްދިއްކޮށްލީ އެރުމަށް އެހީވެދޭންށެވެ. ކިއާރާ ހިންދިރުވާލުމަށްފަހު އަނީލްގެ އަތުގައި ހިފައިފާ ފެރީއަށް އެރިއެވެ. އަދި ޝުކުރު ދަންނަވާލުމަށްފަހު ގޮސް ހުސް ޖާގައެއްގައި އިށީނެވެ. ހަމްނާވެސް އައިސް އިށީނީ ކިއާރާ ކައިރިއެވެ. “ތީ ދޯ އެރޭ ލަވަ ކީ ކުއްޖަކީ ޖޫލިޔަންގެ ޕާޓީގަ؟” ހަމްނާ އަށް އިނގިގެން އެހީ އަދިވެސް ޔަޤީންކުރާށެވެ..

ކިއާރާ ބޯ ޖަހާލިއެވެ. ހަމްނާ ކިއާރާގެ އިސްތަށިގަނޑުގައި ފިރުމާލީ ލޯބިންނެވެ. “އަނީލް އިނގޭތަ؟ މީއޭ އޭރު ވެއްޓެނިކޮށް ހިފެހެއްޓި ކުއްޖަކީ… ލަވަ ކީ ކުއްޖާ އޭ ބުނީމެއްނު..” ހަމްނާ ބުންޏެވެ.. އެވަގުތު ފެރީ ނައްޓާލައިފިއެވެ. އަނީލް ކިއާރާއަށް ބަލާލުމުން ކިއާރާ ހީލިއެވެ. ހިސާބަކަށް އޭނާ އިނީ ނުތަވަސްވެފައެވެ. “އެހެންތަ؟ މީ ފަތުހީގެ ދަރިފުޅޭ ހަމްނާ… އިނގިއްޖެ ދޯ؟ ބްލޫސްގެ… ދެވަނަ އިމާރާތް ހުންނަނީ ބްލޫސް އާއި ޖެހިގެން..” އަނީލް ބުންޏެވެ، “އަސްލުވެސްތަ؟ އެކޮއެ ކީއްކުރަން ތި ދަނީ ހުޅުމާލެ؟” ގާތްގޮތަކަށް ހަމްނާ އެހިއެވެ.  “މިދަނީ ބިޒްނަސް ކަމަކު ގެނައި ބޭފުޅެއް މިކޮޅަށް ދުރުވީމަ ގެނެސްދެން ބައްޕަގެ އެދުމުގެ މަތިން..” ކިއާރާ ބުންޏެވެ.. ކަނޑަށް ފެރީ ނިކުތުމާއި އެކު ދެކޮޅަށް ތެޅެންފެށިއެވެ. ކިއާރާ ދެލޯ ބޮޑުވިއެވެ. އޭނާ މިކަހަލަ ތަޖުރިބާއެއް ނުކުރާތާ އަހަރުތަކެއް ވަނީއެވެ. ކުޑައިރުވެސް އޭނާ މީ ދަތުރުކުރުމާއި ދުރުގައި އުޅުނު ކުއްޖެކެވެ. ކަނޑުގަދައިރު ދުވަހަކުވެސް އޭނާ ދަތުރު ކޮށްފައެއް ނީންނާނެއެވެ. ކިއާރާ ބިރުން ދެލޯ މަރާލާފައި ކައިރި އިން ހަމްނާގެ އަތުގައި ހިފަހައްޓާލެވުނެވެ. ހަމްނާއެ އަތުގައި ފިރުމާލަމުން ހިފަހައްޓާލީ ރައްކަތެރިކަން އިހްސަސްކޮށްދޭންށެވެ. ކުއްލިއަކަށް އައި ރާޅެއްގެ ބޮޑުކަމުން ފެރީ އެއްކޮޅަކަށް އަރިވިއެވެ. ބައެއް މީހުންކުޑަކޮށް ހަޅޭލަވައިލި އަޑާއި ބައެއް އެއްޗެހި އެކޮޅަށް ކައްސާލިއަޑު އިވުނެވެ

ދެލޯ މަރައިގެން އިން ކިއާރާ ހަޅޭލަވައިގަނެފައި ހަމްނާގެ ގައިގާ ބައްދައިގަތީ މަންމާ އޭ ކިޔާފައެވެ. އޭނާ ބިރުން ރޫރޫ އަރައިގަތެވެ. މިހާ ކަނޑުގަދަ އިރު ލޯންޗްގައި އައިނަމަ ވާނެވަރު ވިސްނާލެވި ނާދެވުނުކަމާއި މެދު ޝުކުރުވެވުނެވެ. ހަމްނާ ގައިގާ ކިއާރާ ބައްދާލެވުނީ ކީއްވެކަމެއް ހުދު އޭނާއަށް ވެސް ނޭނގެއެވެ. ބިރުން އޭނާ ތުރުތުރުލައެވެ. ހަމްނާ ކިއާރާގެ ބޮލުގައި ފިރުމާލަ ފިރުމާލާ އިނެވެ. އެތަކެއް ތެޅުންތަކަކާއި އެކު ހުޅުމާލެއަށް ފެރީ ޖެއްސިއެވެ. ކިއާރާ ދެލޯ ހުޅުވާލާ ހަމްނާގެ ގައިން ވަކިވީ ފެރީ މަޑުކޮށްލި ކަން އިހްސާސްވެގެންނެވެ. އޭނާ ލަދުގަތެވެ. ހަމްނާ ހޭންފެށިއެވެ. “އެހެންވެސް ވާނޭ.. އެކޮއެ އެހަށް އިނދޭ.. މި މީހުން ފޭބީމަ ދާނީ އެންމެންނާއި އެކު ނިކުންނަން ވަރަށް އުނދަގޫވާނެ…” ކިއާރާ ތެދުވާން އުޅުމުން ހަމްނާ ހިފެހެއްޓިއެވެ. ތެދެކެވެ. މިގަޑީގައި އެންމެން ނިކުންނަން ހަދައިގެން ވަކި ވާނެ އަވަހެއް ނޯންނާނެއެވެ. ދޮރުމަތީ މީހުންވަނީ ފުރި ބާރުވެފައެވެ. ހަމްނާ ކިއާރާގެ އަތުގައި ހިފާލައިގެން ތެދުވެ އަނީލް ފަހަތުން ހިނގައިގަތެވެ. ކިއާރާ ހަމްނާގެ އަތަށް ބަލައިލިއެވެ. އަދި ހިނިތުންވެލިއެވެ. އެފަދަ މަންމައެއް އޭނާއަށްވެސް ލިބުނުނަމައެވެ. ހިމާޔަތްކުރާ ހެޔޮ މަންމައެއް އޭނާ އަބަދުވެސް އެދެވެއެވެ. ފަތުހީ ބައްޕައެއްގެ ރޯލް ކިތަންމެ ރަނގަޅަށް އަދާ ކުރިއެއްކަމަކު ކިއާރާއަށް އަދިވެސް އަދި އަބަދުވެސް މަންމައެއް ނެތްކަމުގެ އިހްސާސްކުރެވެއެވެ. އުނދަގޫވެއެވެ. ބައްޕައެއްކައިރި ނުދެއްކޭ އެހެނަސް މަންމައެއް ކައިރި ދެއްކޭ އެތައް ވާހަކަތަކެއް ހުންނާނެއެވެ. ކިއާރާ ޖެހެނީ އެވާހަކަތަށް އަމިއްލަ ނަފްސާއި ހިއްސާކުރާށެވެ. އަމިއްލަ އެހީ ހޯދާށެވެ.

މިފަހަރުވެސް ކުރިއެކޭ އެއްފަދައިން އަނިލް ކިއާރާ ފެރީއިން ބޭލުވިއެވެ. ކިއާރާ އަށް އެމީހުން އެހީވެދިނުމުން ހަމަ ހުރެފައި ދާކަށް ނުކެރުނެވެ. “ދައްތަ ކީއްކޮށްލަންތޯ ތި ދުރުވީ؟” ކިއާރާ އެހިއެވެ. “މިއައީ ދައްތަ ގާތް އެކުވެރިއެއް ފުރުވާލަން.. މިހާރު ވީ އެއާރޕޯޓް ތެރޭ…” ހަމްނާ ބުނެފައި ހިނގައިގަތެވެ. ކިއާރާވެސް ހިނގައިގަތެވެ. އެމީހުން ގޮސް އެތެރެއަށް ވަނެވެ. ކިއާރާ ބޭރުގައި ހުރެފައި ފަތުހީ ފޮނުވި ނަމްބަރަށް ގުޅާލިއެވެ. “ހެލޯ؟ ޑެނީ؟ ޔާ އަމް ހިއަރ.. ވެއަރ އާރ ޔޫ؟” ކިއާރާ ބުނެލީ އެކޮޅުން ފޯނު ނެގުމާއި އެކުގައެވެ.  “އޯކޭ އަމް ވެއިޓިން އައުޓްސައިޑް…” ކިއާރަ އެހެން ބުނެފައި ފޯނު ކަނޑާލިއެވެ. އަދި ޑެނީ އަންނަން ދެން އިންތިޒާރުގައި ހުރިއެވެ. ލަސްވެގެން އިރު އިރުކޮޅާ ގަޑިއަށް ބަލައިލަނީ އޭނާ ފުރިހަމަ ނުކޮށް ހުރި އެތައް މަސައްކަތްތަކެއް ހުރީމައެވެ. އޭނާ އެކަންތަށް ނިންމަން ޖެހޭނެއެވެ. އޭރުން ގެއަށް ދެވޭނީ ވަރަށް ލަހުންނެވެ. ކިއާރާ ގޮސް ބެންޗެއްގައި އިށީނދެލާ ފޯނުން ކުޅެން އިނެވެ.

………..

އޮފީހަށް ދިޔަގޮތަށް އަޔާން ހަލުވިކަމާއި އެކު ވަނީ ކެބިންއަށެވެ. އަދި ދިޔަގޮތަށް ގޮސް ސޯފާގައި އިށީނދެ މޫނުފޮރުވާލިއެވެ. ކިއާރާ އާއި އޭނާއާއި ދެމެދު މިވާ ހިމޭންކަމުގައި އެ ހިތް ދައްކާ ވާހަކަތަކަކީ ކޮބައިކަން އަޔާންއަށް އިނގެއެވެ. އޭނާ ކިއާރާ ކިބައިން މާފަށް އެދެން ބޭނުންވާއިރު ކިއާރާ އެ ހުރިހާ ކަމެއްކުރުމުގެ ސަބަބު އޮޅުން ފިލުވަން ވަނީ ވަރަށް ބޭނުންވެފައެވެ. ނަމަވެސް އަދިވެސް އޭނާގެ ސިކުނޑި އޭނާއަށް ބާރުފޯރުވައެވެ. އިތުބާރުކޮށްގެން ދޯކާ ނޫން އެއްޗެއް ލިބިފައި ނުވާއިރު އޭނާ އިތުރަކަށް އެ މަގުން ހިނގާކަށް ބޭނުމެއްނޫނެވެ. އަލަކުން އެ ވޭންތަށް ހޯދާކަށް ބޭނުމެއްނޫނެވެ. އެނާ ހަނދާނަށް އައީ އާލިޔާ ހޯދަން ކުރި މަސައްކަތްތަކެވެ. އޭނާ ނުފެނިގެން އުޅުނުވަރެވެ. ކޮންމެވެސް ވަރަކަށް އަމިއްލަ ނަފްސް ކުށްވެރިކުރެވިފައިވާތީވެ އެ ހިތަށް އެތަކެއް އަހަރުވީއިރުވެސް ހަމަޖެހުމެއް ނުލިބުނެވެ. ނަމަވެސް މިއަދު ކިއާރާ އެހާ ހަމަޖެހިފައި އުފަލުގައި އުޅޭތަން ފެނުމުން އޭނާ އަށް ހަމަ ޔަޤީންނުކުރެވުނީއެވެ. އަޔާން ބޯ ގޮވާވަރުވިއެވެ. ވިސްނާ ވިސްނާވެސް ކުރަންވީ ކަމެއް ނޭނގުނެވެ.

…………..

ކިއާރާ ސިހުނީ މީހަކު އައިސް ކައިރި ބެންޗްގައި އިށީނުމުންނެވެ. ކިއާރާ މޫނުމަތިން އަތް ނަގާލަމުން ބަލާލިއިރު ހިނިތުންވެލައިގެން އިނީ ހަމްނާއެވެ. ކިއާރާ ވެސް ހިނިތުންވެލިއެވެ. “ނިމުނީތަ ދައްތަމެން؟” ކިއާރާ އަހާލިއެވެ. “އާނ ދައްތަ ނިމިއްޖެ އެކަމް ބޭބެ އެއަރޕޯޓުން އެކުވެރިއެއްދިމާވެގެން ގޮއްސި ކޮފީއަކަށް.. ދައްތަ ކައިރި ގެއަށް ދާށޭ ބުނެފަ ދިޔައީ.. ލަސްވާނެނު ފިރިހެނުން ޖެހިއްޖެއްޔާ…” ހަމްނާ ބުންޏެވެ. ކިއާރާ ހޭންފެށިއެވެ. “އެކޮއެ އަދިވެސް އެމީހަކު ނާންނަނީތަ؟” ހަމްނާ އެހީ އެކި ދިމާ ދިމާ ބަލަމުންނެވެ.. “ލައްބަ.. އަދި 15 މިނެޓް ވަރު ނަގާނޭ ބުނީ..” ކިއާރާ ބުނެލީ ވަރުބަލިކަމާއި އެކުގައެވެ. “ދައްތަ އެހެންވިއްޔާ އިންނާނީ އެކޮއެ އާއި އެކު ދާން.. މައްސަލައެއް ނެތެއްނު ދޯ؟” ހަމްނާ އެހިއެވެ.. “ލައްބަ އަޅުގަނޑު ކޮން މައްސަލައެއް އޮންނާނީ…” ކިއާރާ ހިނިތުންވެފައި ބުންޏެވެ.. ހަމްނާ ކިއާރާ ގެ ނަމާއި އުމުރާއި ހުރިހާ އެއްޗެހިވެސް އެހިއެވެ. ކިއާރާއަށް ކުރީ ވަރަށް ގާތް އިހްސާސްއެކެވެ. ހަމްނާ ފެނުމާއި އެކު ކިއާރާއަށް ހަނދާނަށް އަންނަނީ އަޔާންއެވެ.

ހަމްނާ ކިއާރާ ގެ ވާހަކަތަށް އޮޅުންފިލުވަމުން އޭނާގެ އާއިލާގެ ވާހަކަތަށްވެސް ހިއްސާކުރިއެވެ. އަޔާންއާއި އަނާން އާއި އިޝާންގެވާހަކަވެސް ބުންޏެވެ. “އަޅުގަނޑަށް އިނގޭ އަނާން އާއި އަޔާން.. ވަރަށް ގިނައިން ދިމާވެ…” ކިއާރާ ބުންޏެވެ. ހަމްނާ އެހެންހޭ ބުންޏެވެ. އެދެމީހުން ދާދި ކުޑަވަގުތުކޮޅެއްތެރޭ ގާތްވެވުނެވެ. ހާއްސަކޮށް އަޔާންގެ މަންމައަށްވީތީވެ ކިއާރާ އޭނާއާއި ވަރަށް ރަނގަޅަށް ވާހަކަދައްކާ ހެދިއެވެ. އެވަގުތު ޑެނީ އެތަނަށް އައިސް ކިއާރާއަށް ގޮވާލުމުން އޭނާ ތެދުވެ އެދިމާލަށް ދިޔައީ ހަމްނާ ގޮވައިގެންނެވެ. ޑެނީ އާއި އެކު ކުޑަކޮށް ކުންފުނީގެ ވާހަކަދެކެވެމުން ދިޔައިރުވެސް ކިއާރާ ހިނދުކޮޅަކަށްވެސް ހަމްނާ އެކަހެރިކޮށްނުލައެވެ. ހަމްނާގެ އަތުގައި ހިފަހައްޓާލައިގެން ހުރިއިރު އޭނާ ހަމްނާއާއި ވެސް ވާހަކަދައްކަމުންދިޔައެވެ.

“ޑޭން.. އިޓްސް ނޮޓް ގުޑް ޓު ޓްރެވަލް އިން ލޯންޗް ރައިޓް ނައު ސޯ ލެޓްސް ޔޫސް ފެރީ…” ކިއާރާ އެހެން ބުނެފައި ފެރީއަށް ޓިކެޓް ގަނެ ފެރީއަށް އަރަން އުޅުނެވެ. ޑެނީ ފުރަތަމަ އަރައިފައި ހަމްނާ އެރުވިއެވެ.. އެއަށްފަހު ކިއާރާ އެރުވިއެވެ. ތިންމީހުން ގޮސް އިށީނދެލިއިރު ކިއާރާ އިނީ އެމީހުންގެ މެދުގައެވެ. “އިޒް ޝީ ޔުއަރ އާންޓް؟” ޑެނީ އެހިއެވެ.  ކިއާރާ ހަމްނާއަށް ބަލައިލިއެވެ. ދޭނެ ޖަވާބެއް އޭނާއަށް ނޭނގުނެވެ. “ސަމްވަން ޖަސްޓް ލައިކް ހާރ މަމް..” ހަމްނާ އެހެން ބުނުމުން ކިއާރާ ދެލޯ ބޮޑުކޮށްލާފައި ހަމްނާއަށް ބަލައިލެވުނެވެ.. އަދި ފުޅާ ހިނިތުންވުމެއް ދެވުނުއިރު ދެލޯ ފުރުނެވެ. ހަމްނާ ކިއާރާގެ އަތުގައި ހިފިއެވެ. “ވާނެ އެއްދުވަހުން ދައްތަ ގެ ގެއަށް އަންނަން އިނގޭ… ދައްތަ ވަރަށް ބޭނުންވެއްޖެ ކިއާ ގެންނަން..” ހަމްނާ ބުންޏެވެ.ކިއާރާގެ މޫނުވަގުތުން ބަނަވިއެވެ. އޭނާ އިސްޖަހާލިއެވެ. “މައްސަލައަކަށް ނުވާނޭ.. އަންނައްޗޭ.. ދައްތަ ފޯނުގައި ނަމްބަރ ޖަހައިދީ އަވަހަށް.. އޭރުން ދައްތަ ގުޅާނަން ކިއާ އަށް އިނގޭ..” ހަމްނާ އެހެން ބުނުމުން ކިއާރާ ފަސްޖެހެވުނެވެ. ނަމަވެސް އޭނާގެ ނަމްބަރު ހަމްނާގެ ފޯނުގައި ޖަހައިދިނެވެ. “ދައްތަ އެކަނިންނު ގެއަށް ދާންޖެހޭނީ؟” ކިއާރާ ވާހަކަ އޮޅުވާލަމުން ބުނެލިއެވެ.

“އާނ ޓެކްސީގަ ދާނީ..” ހަމްނާ ބުންޏެވެ. “އުނހު ދައްތަ އަޅުގަނޑުގެ ކާރަށް އަރާނީ… އޯކޭ އެއްނު އަޅުގަނޑު ގެންގޮސް ދޭނަން…” ކިއާރާ ބުންޏެެވެ. “އެކަމް އޭނާއަށް ލަސް…..” “ދައްތާ… އޭނާއަކަށް ނުވާނެ ލަހެއް… އަޅުގަނޑު ލައިދީފާނަމޭ….” ކިއާރާ ގެ އާދޭސްތަކުގެ ސަބަބުން ހަމްނާ ބޯޖަހާލިއެވެ. ކަނޑުގެ ރާޅުތަކާއި އެކު ފެރީ ހެލެން ފެށުމުން ކިއާރާ ހަމްނާގެ ގައިގާ ހިފަހައްޓައިގެން އިނެވެ. ޑެނީވެސް އިނީ ހިސާބަކަށް ބިރުންނެވެ.

ފެރީއިން ފޭބުމަށްފަހު ކިއާރާ ދެމީހުން ގޮވައިގެން ދިޔައީ އޭނާ ކާރު ޕާކް ކުރިތަނަށެވެ. އެއަށްފަހު ކާރަށް އަރާ ދުއްވާލިއެވެ. ހަމްނާ ދާން ބުނި މަގަށް ކިއާރާ ގޮސް ހަމްނާ އިޝާރާތްކުރަމުން ދިޔަ ގޯޅިއަކަށް އެޅިެއވެ.. އެއާއި އެކު އޭނާގެ ލޮލުގައި އަޅައިގަތީ އެމީހުންގެ ބޮޑުގެއެވެ. ހުދުކުލަލެވިފައިވާ މެހެލެއް ހެން ހީވާ ބޮޑު ގެއެވެ. ކިއާރާ އެގެއަށް ބަލަން އިނީ ދެލޯ ބޮޑުކޮށްލާފައެވެ. ބޮޑު ގޭޓް ދޮށުގައި ހުރީ ސެކިއުރިޓީ ގާޑެކެވެ. ކިއާރާ ކާރު ކައިރިކޮށްލުމުން އޭނާ ހަމްނާގެ އިޝާރާތަށް ގޭޓް ހުޅުވުނެވެ.. ކިއާރާ މުޅިގެއަށް ބަލަމުންދިޔައެވެ. މަގަސްތަކުން މުޅި ތަން ވަނީ ފުރިފައެވެ. ބޮޑުގެވެސް އެހާމެ ރީއްޗެވެ. ދެ ބުރިއަށް ހިއްލާފައި ހުރިއިރު އެ ގޭގައި ޖަހަނީ ޝާހީ މެހެލެއްފަދަ ވައްތަރެކެވެ. ކިއާރާ ކާރު ހުއްޓީ ގޭ ބޮޑު ދޮރާއި ދިމާލަށް ދެވޭ ސިޑިކުރިމައްޗަށެވެ. ކާރު ވަންނަތަނުގައި ވަނީ ގާޖަހާލެވިފައެވެ.  ހަމްނާ ކާރުން ފޭބިއެވެ. “އަންނަންވީނު ދައްތަގެއަށް ކާލަން… އޭނާއަށްވެސް ކެވޭނެއެއްނު.. ބަނޑުހައިވެފަ މިހާރު އިންނާނީ..” ހަމްނާ ބުންޏެވެ. ކިއާރާ ދެކޮޅުހަދާލިއެވެ. “ދައްތަ ފަހުން އަންނާނަން އިނގޭ… މިއަދު ވަރަށް ގިނަ މަސައްކަތްވެސް އެބައޮތް..” ކިއާރާ ދެރަވެލާފައި ބުނެލީ ދެކޮޅުހަދަން ޖެހުނީތީއެވެ.

“އެހެންތަ؟ އަވަހަށް ދޭ އެހެންވިއްޔާ… ދައްތަ ގުޅާލާނަމޭ އަންނަންވީމަ.. ބަލައިގެން ދައްޗޭ..” ހަމްނާ އެހެން ބުނެފައި ކިއާރާ ކާރު ގޭޓުން ނިކުންނަން ދެން ބަލަން ހުރެފައި ހިނގައިގަތީ ރީތި ހިނިތުންވުމަކައި އެކުގައެވެ. ކިއާރާ ގޮސް އޮފީހަށް ވަނީ ޑެނީގޮވައިގެންނެވެ. ޑެނީ ހުރީ ވަރަށް އާވެފައެވެ. ކިއާރާ ޑެނީގޮވައިގެން ދިޔައީ ފަތުހީގެ ކެބިންއަށެވެ. ފަތުހީއަށް ޑެނީފެނުމުން އައިސް ބައްދާލިއެވެ. ފަތުހީ ކިއާރާ އެންމެ ދިޔަޔަސް ރަނގަޅުކަމަށް ބުނުމުން ކިއާރާ ވަރުބަލިކަމާއި އެކު އައިސް ކެބިންއަށް ވަނެވެ. އެވަގުތު މޭޒުމަތީ ހުރި ފައިލްތަށް ފެނި ދެލޯ ބޮޑުވިއެވެ. އޭނާ ކުރަން ބުނި މަސައްކަތް ކޮށްފާ އެމީހުން ފައިލް އެހުރީ ބަހައްޓާފައެވެ. ދެން ޖެހޭނީ ކިއާރާގެ މަސައްކަތްފަށާށެވެ. އެ ހުރިހާ ފައިލްތަކަށް ބަލާލުމަށްފަހު ގޮނޑިއަށް ވެއްޓިގަތެވެ. “އާރގްގްގް…” ކިއާރާ އެހެން ބުނެފައި ކުޑަކޮށް މޫނުގައި އަތް އުނގޫޅާލިއެވެ. އެއަށްފަހު މަސައްކަތައިގެން އުޅުނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.