ނަމަވެސް ޒާނާގެ ދިގު އިސްތަށިގަނޑު ވިހުރިގެން ދިޔަ ވަގުތު އަހަރެންނާއި ހަމައަށް ގެނެސް ދިނީ އެހެން ބިރުވެރި ހަޤީޤަތެކެވެ. ނިއުޅިގެން ދިޔައީ އެހެން ސަފްހާއެކެވެ.
********
ދެފަރާތަށް ބޯ ހޫރަމުން ދިޔަ ޒާނާގެ ދިގު އިސްތަށިގަނޑު ވިހުރުނު ވަގުތު ޒާނާ ލައިގެން އިން ނިވާކަން ކުޑަ ނައިޓީގެ ހާމައަށް އޮތް ބުރަކަށި ފެނުނު ވަގުތު އަހަރެންގެ މުޅި ދުނިޔެވެސް އެފުށް މިފުށަށް ޖެހުނުހެން ހީވިއެވެ. ދެލޯ ބޮޑުވެފައި އަހަރެންނަށް ބަލަން އިނދެވުނީ ޒާނާގެ ބުރަކަށީގައި ހުރި އެކި ވަރުވަރުގެ ލަކުނުތައް ފެނުމުންނެވެ. ލޮލަށް ފެންނަމުން ދިޔަ މަންޒަރު ސިކުނޑިއަށް ނަގައިގަންނަން ވެސް ވަގުތު ކޮޅެއް ވެސް އަހަރެންނަށް ބޭނުން ވިހެން ހީވިއެވެ.
ސުބުހާނައްﷲ އެވެ. މިއީ ކޮންފަދަ ކަންތައް ގަނޑެއް ހެއްޔެވެ.؟ އަހަރެންގެ ލޮލުގެ ކުރިމައްޗަށް މި ދައްކަވަނީ ކޮންފަދަ ކަންތައް ތަކެއް ހެއްޔެވެ؟ މިއީ ހަޤީޤަތެއް ހެއްޔެވެ؟ މިއީ ކޮންފަދަ ބޮޑު އަނިޔާވެރިކަމެއް ހެއްޔެވެ؟ ސަހަރޯއެވެ. މިއަށް ވުރެން އަހަރެންގެ މުޅި ޖާނާއި މާލު އަނދައި އަޅީޔަށްވި ނަމަވެސް އަހަރެން މިހާ ދެރަ ނުވީހެވެ.
އަހަރެންގެ ހިތް ކުދިވާނެ އެންމެ މަތީ ދަރަޖައަކަށް ކުދިކުދި ވިއެވެ. ޗިސްޗިސް ވިއެވެ. ފިރިހެނަކު ފުނޑޭނެ އެންމެ ބޮޑު ވަރަކަށް އަހަރެން ފުނޑުނެވެ. ގަބޫލު ނުކުރެވިފައި ހައިރާންކަމާއި ހިތްދަތިކަމާއިއެކުގައި އަހަރެންނަށް ރޮމުން ގިސްލަމުން ދިޔަ ޒާނާއަށް ބަލައިލެވުނީ އެ އަންހެން ކުއްޖާ އެ ހުރިހާ ކަމެއް ތަހަންމަލު ކުރީ ކިހިނެތް ބާއޭ ހިތަށް އަރާފައެވެ. ކޮންފަދަ ހިތްވަރުގަދަ ކަމެއް ހެއްޔެވެ؟ ކޮންފަދަ ބޮޑު ބަދުނަސީބު ކަމެއް ހެއްޔެވެ؟ ޒާނާގެ ދިރިއުޅުމަށް ޖެހުނީ ކާކުގެ އެސްފީނާއެއް ހެއްޔެވެ؟ މިވަރުގެ އަނިޔާއެއް ހައްޤުވަން އެ އަންހެން ކުއްޖާއަށް ކުރެވުނީ ކީއްހެއްޔެވެ؟ މިވަރުގެ ނާއިންސާފަކާއި ކުރިމަތިލާން ޖެހުނީ ކީއްވެ ހެއްޔެވެ؟
ޒާނާގެ ބަސްތަކުން އަހަރެންގެ ހިތް އިތުރަށް ފުނޑުފުނޑު ވުން ނޫން ކަމެއް ނުވިއެވެ. އަމިއްލަ މީހާގެ ހިތުގައި އަޅަމުން ދިޔަ ވޭނަށް ވުރެން ޒާނާގެ ހިތުގައި އަޅަމުން ދިޔަ ވޭން އެނގުމުން އަހަރެން މާ ބޮޑަށް ބަލިކަށިވާ ގޮތް ވިއެވެ. ހިތްވަރުކުރަން އުނދަގޫ ވިއެވެ. ނަމަވެސް މިވަގުތު ޒާނާ ބޭނުންވަނީ ކެތްތެރިކަމާއި އޯގާތެރި ކަމެވެ. ލޯތްބާއި ރައްކާތެރިކަމެވެ. ހިމާޔަތް ދޭނެ ބައިވެރިއެކެވެ. އެމީހަކީ އަހަރެންނެވެ.
” ޒާނާ….. އަހަރެން ﷲ ގަންދީ ހުވާ ކޮށްފަ މިބުނަނީ އަހަރެންގެ ހުއްދައެއް ނެތި މިތަނަކަށް ރުހާމް އަކަށް ވެސް އަދި އެހެން މީހަކަށް ވެސް ނުވަދެވޭނެ… ” ހިތްދަތިކަން މަތީގައި ނެތް ހިތްވަރުން އަތް އަޅައިލަމުން ސާބިތުކަމާއިއެކުގައި އަހަރެން ޒާނާއަށް ޔަގީންކަން ދިނީމެވެ.
” ނޫން ނޫން… އަންނާނެ…. ރުހާމް ބޭނުންވާ ކަމެއް ނުކޮށްދީފިއްޔާ އަނިޔާ ކުރާނެ… ޖަހާނެ… އެއީ އަނިޔާވެރި ކަމުގެވެސް އިންތިހާ… އަހަންނަކަށް ދެން އިތުރު އަނިޔާއަކަށް ކެތެއް ނުވާނެ….” ރޮމުން ރޮމުން ޒާނާ ބުނަމުން، އާދޭސް ކުރަމުން ދިޔައެވެ. އެ ލޯބި ދެލޮލުން އަންނަމުން ދިޔަ ކަރުނަތައް ހައްތަހާއި ވީ ގިނައެވެ. އަހަރެން ދިން ޔަގީންކަމަށްވެސް ޒާނާއަށް އިތުބާރު ނުކުރެވުނެވެ. ކަންކަން ގޯސްވެފައިވީ މިންވަރު އެކަމުން އެނގެމުން ދިޔައެވެ.
“ޕި… ޕީރިއަޑް ވެފަ ހުއްޓަސް…..!!!!” އެބަސްތައް… އެ ލަފްޒުތައް އަހަރެންގެ ކަންފަތާއި ހަމައަށް ފޯރީ ހޮނު ގުގުރިއެއްގެ ސިފައިގައެވެ. ކަށިން އަހަރެން ނެރެމުން ދިޔަ ހިތްވަރުވެސް ފުނޑުފުނޑުވެ ބުރައިގެން ދިޔަ ހިނދުކޮޅަކީ އެއީ އެވެ. ޒާނާގެ މޫނުގައި އަހަރެން ހިފަހައްޓައިގެން އިން އަތް ސޮހިގެން ދިޔައެވެ. ދެލޯ ބޮޑުވެފައި އަހަރެންނަށް ބަލަހައްޓައިގެން އިނދެވުނެވެ. މާތްކަލާކޯއެވެ. އެ ދަރަޖައަށް ރުހާމްގެ އަނިޔާވެރިކަން ގޮސްފައި ވޭ ހެއްޔެވެ؟ އެއީ ފަހެ އިންސާނެއް ހެއްޔެވެ؟ މާތް ﷲ ނަހީ ކުރެއްވި އެވަރުގެ ފާފައެއް ކުރިއިރު ރުހާމެގެ ބިރު ކޮބައި ހެއްޔެވެ؟ އަމިއްލަ އަނބިމީހާއަށް އެވަރުގެ އަނިޔާއެއް ދޭން ރުހާމްއަށް ކެރުނީ ކޮން ހިތަކުން ހެއްޔެވެ.؟
” އަނިޔާ ކޮށްފަ ވިޔަސް…. އަނިޔާ… އެކަން… ކުރާނެ….” މާތްކަލާކޯއެވެ.. ރޮމުން ދިޔަ ޒާނާ ގެނެސް އަހަރެންގެ މޭގެ ތެރޭގައި ފޮރުވައިލެވުނެވެ. ބުނާނެ އެއްޗެއްވެސް ދުލަށް ނައީ އެވެ. ބުނާނީވެސް ފަހެ ކީކޭ ހެއްޔެވެ؟ ސިކުނޑި ސުމަކަށް ދާވަރުވެއެވެ. ހިތްދަތިވެގެން ހިތް ފަޅައިގެން ގޮސްދާނެހެން ހީވިއެވެ. އެފަދަ ކިތައް ކަންތަކާއި ޒާނާ ކުރިމަތިލާފައި ވޭ ހެއްޔެވެ؟ އެ ބިރުވެރިކަމުގައި ޒާނާ ކިހާވަރަކަށް ތެޅިފައި ހުންނާނެ ހެއްޔެވެ؟ އެއް އަނިޔާއަކާއި ކިތައް ފަހަރު ޒާނާ ކުރިމަތިލައިފައި ހުންނާނެ ހެއްޔެވެ؟
” އިސްތިރިވެސް ޖައްސާނެ…. ރުޅި އައީމަ އަތްވެސް…. ފިހެލާނެ…. އިސްތަށިގަނޑުގަވެސް ހިފާ…..” ޒާނާއަށް ރޮވޭވަރުން ރަނގަޅަށް ވާހަކަ ވެސް ނުދެއްކުނެވެ.
” ފަލަވެ ވެސް މަލާމާތް ކުރޭ… ހުންނަ ގޮތަށް އަބަދު ފާޑުކިޔާ….އޭނައަށް ކަމުދާ އެއްވެސް ސިފައެއް އަހަރެންގެ ގަޔަކު ނެތޭ އަބަދު ބުނަނީ… އެކަމަކު އަބަދު ބެހެން އުޅެނީ….” ޝަކުވާއާއި ހިތްދަތިކަން އެ އަޑުގައި ވިއެވެ.
” ސިޑިންވެސް ވައްޓާލީ…. ” ޒާނާ ބުނެލިއެވެ. ވީ ދެރައިން އަހަރެންނަށް ލޯ މަރައިލެވުނެވެ. ކަންކަން އެހާ ގޯސްވި ހެއްޔެވެ؟ ގަބޫލުކުރަން އަހަރެންނަށް ދަތިވެފައި ވިޔަސް ޒާނާގެ ދުލުން އިވެމުން އެދަނީ ހަޤީޤަތެވެ. ޒާނާގެ ހާލު އިތުރަށް ގާތުން ބަލާލުމަށް އަހަރެންގެ ހިތް އެދުނު ކިތަންމެ ފަހަރެއް ވޭތުވެ ދިޔަ ހަތް އަހަރުގެ ތެރޭގައި ދިޔައެވެ. ހިތުގެ އެދުމާއި އެއްގޮތަށް އަމަލު ކުރެވުނު ނަމައޭ އަހަރެންގެ ހިތަށް އެތައް ފަހަރަކު އަރަމުން ދިޔައެވެ. އެހެން ނަމަ ކޮންމެވެސް ގޮތަކުން އަހަރެންނަށް ޒާނާއަށް ވަމުން ދިޔަ ގޮތް ފެނުނީހެވެ.
” ކީއްވެ ނައީ…؟” އަހަރެންގެ މޫނަށް ކަރުނައިގެން ފުރިގެންވީ ދެލޮލުން ބަލައިލަމުން ޒާނާ ޝަކުވާ ކޮށްލިއެވެ. ޒާނާއަށް ރަނގަޅަށް ކަންކަން ނުވިސްނޭކަން އެހާލަތުގައި އަހަރެންނަށް އެނގުނެވެ. އެހެން ނޫންނަމަ އެ ޝަކުވާއެއް ޒާނާ ނުކުރީސްކަން އަހަރެންނަށް އެނގުނެވެ. ނަމަވެސް އެއީ ވޭތުވެދިޔަ ހަތް އަހަރު ޒާނާގެ ހިތަށް ކިތަންމެ ފަހަރަކު އަރައި ފޭބި ޝަކުވާއެއް ކަން އަހަރެންނަށް އެނގުނެވެ. އަހަރެންގެ ހިތުގައި އިތުރަށް ޖެހުނީ އެހެންވެއެވެ. ލަގޮނޑި ފަޅައިގެން ހިނގައިދާނެހެން ހީވިއެވެ.
” ހިތަށް ހާދަ އެރިއޭ އަންނާނެ ނަމައޭ…..” ގިސްލުމާއިއެކުގައި ޒާނާ ޝަކުވާ ކޮށްލިއެވެ. ހިތްދަތިވެފައި އަހަރެން ޒާނާއާއި ހަތަރުކަޅި ހަމަކޮށްލީމެވެ. ޒާނާގެ ނިއްކުރީގައި އަހަރެންގެ ނިއްކުރި ޖައްސައިލަމުން ލޯ މަރައިލީމެވެ.
އެ ދުވަސްތައް… “އެދުވަސް”…. އެ ވަގުތުތައް…. އެއިން ކޮންމެ ސިކުންތެއް އަނބުރައި ގެނެވޭނެ ނަމައޭ އަހަރެންގެ ހިތަށް އެރިއެވެ. ހުރިހާ ކަމެއް ބަދަލުކުރެވޭނެ ނަމައޭ ހިތަށް އަރަމުން ދިޔައެވެ. ޒާނާގެ ހަޔާތުން ހުރިހާ ރިހުމަކާއި ތުރާތަކެއް ފިލުވައިލަ ދެވޭނެ ނަމައޭ ހިތަށް އަރަމުން ދިޔައެވެ. އެހެނަސް އެކަންކަން ބަދަލު ނުކުރެވޭނެކަން އަދި އެދުވަސްތައް އަނބުރައި ނުގެނެވޭނެކަން އެނގުމަށްވުރެން ބޮޑު ހިތްދަތިކަމެއް ކޮބައި ހެއްޔެވެ؟
” ޒާނާ… މިއީ އަހަރެން ވާ ވައުދެއް އިގޭ… ރުހާމްއަކަށް ދެން ޒާނާ ފެންނަ ހިސާބަށް ވެސް ނާދެވޭނެ.. ތިއީ އަހަރެންގެ އަންބެއް… ހަމައެކަނި އަހަރެންގެ މީހެއް… އަހަރެން ޒާނާ ހިމާޔަތް ކުރާނަން… ރައްކާތެރިކުރާނަން…..” އެވަގުތު އަހަރެން އަޒުމެއް ކަނޑައެޅީމެވެ. ހިތުގައި ރުހާމްއަށްޓަކައި ހިނގަން ފެށި ނަފުރަތުގެ މައްޗަށް އަހަރެން އަހަރެންގެ އަމިއްލަ ނަފްސަށް ވައުދެއް ވީމެވެ. އަހަރެން ދެން ހަމަނޭވާ ލާނީވެސް ރުހާމް ސަލާމަތް ނުވެވޭ ވަރަށް ހަ ފަރާތުން ބައްދާލާފައެވެ. ރުހާމްގެ ބަރުބާދީއަކީ އހަރެން ޒާނާއަށް އަދާ ކޮށްދޭން ޖެހޭ ދަރަންޏެއްކަމުގައި އަހަރެން ދެކުނީމެވެ. މިއީ ޔޫސުފް ޖަލީލްގެ ދަރިއެއްކަން މިފަހަރު އަހަރެން ރުހާމްއަށް ރަނގަޅަށް ދައްކައިލާނަމެވެ.
ޒާނާގެ ރުއިމަކަށް ބަދަލެއް ނައެވެ. ގިސްލުމަކަށް ބަދަލެއް ނައެވެ. އަހަރެންގެ ހިތް ފޮތިފޮތިވަމުން ދިޔައެވެ. ޒާނާގެ ކޮންމެ ކަރުނަތިއްކެއް ކޮންމެ ގިސްލުމެއްގެ އަޑު އަހަރެންގެ ހިތުގައިވީ ޒަހަމްތަކުގައި ލޮނުމިރުސް އަޅަމުން ދިޔައެވެ.
” ހާދަ… ހާދަ ހަނދާން ވިއޭ….” އަހަރެންގެ ހިތް ރޮއެގަތެވެ.
” ހާދަ ހިތަށް އެރިއޭ ނަވީން އަންނާނެ ނަމައޭ… ކޮންމެވެސް ގޮތަކުން އަންނާނެ ނަމައޭ….” ޒާނާ ގިސްލުމާއެކުގައި ބުނެލިއެވެ.
” ހާދަ ރެއަކު ރުއީމޭ…. ” ޒާނާ ބުނެލިއެވެ.
” ހަނދާންވާވަރުން ނުނިދިގެން…..” ޒާނާ ބުނެލިއެވެ.
” ޒާނާ…. ޕްލީޒް ދެން ހުއްޓާލާ…. އަހަރެން ދެން ދުވަހަކުވެސް ޒާނާ ނުފެންނަ ހިސާބަކަށް ނުދާނަން …..މުޅި އުމުރަށް ގާތުގަ ވާނަން… މުޅީ އުމުރަށް ހިމާޔަތް ދޭނަން…. ޒާނާ ބޭނުން ވަރަކަށް ވަގުތު ދޭނަން… އަހަރެން ޒާނާއަށް އެއްވެސް ކަމަކަށް މަޖުބޫރެއް ނުކުރާނަން…. ކޫރުމެއްވެސް ދެން ޒާނާގެ ގައިގަ އެޅުނަކަ ނުދޭނަން… ތިއީ ހަމައެކަނި އަހަރެންގެ ލޯތްބަކީ…. އަހަރެންގެ ފުރާނަ އަކީ… އަހަރެން އެންމެ ލޯބިވާ ފަރާތަކީ…. އަހަންނަށް މައާފު ކުރާތި ޒާނާ….. ޒާނާ ތި ހާލުގަ އުޅުނުކަން އަހަރެންނަށް އެނގުނު ނަމަ …. ” އަހަރެންނަށް އަހަރެންގެ ޖުމްލަ ފުރިހަމަ ކުރެވޭ ގޮތެއް ނުވިއެވެ. ހިތްދަތިކަން މާ ބޮޑުވީއެވެ.
އެނދުގެ ފައިލާ ކޮޅުގައިވީ ބްލޭންކެޓް ގެނެސް އަހަރެން ޒާނާގެ ގައިގާ އޮޅާލަ ދިނީމެވެ. ގަޔާއި ދުރުކޮށްލަން ބޭނުން ނުވެ ޒާނާ ގަޔާއިލައި ބޮނޑިކޮށްލައިގެން އަހަރެން އިނީމެވެ. އެ ގޮތުގައި ވަގުތުތައް ފާއިތުވަމުން ދިޔައެވެ. އޯގާތެރިކަމާއިއެކުގައި ޒާނާގެ އިސްތަށިގަނޑުގައި ފިރުމާލަ ފިރުމާލަ އަހަރެން އިނީމެވެ. އެ ބީހުން ތަކުން ޒާނާގެ ހިތުގައި އަޅަމުން ދިޔަ ވޭންތައް އަދި އެ ބިރުވެރިކަން ކުޑަކޮށްދޭން ބޭނުންވިއެވެ.
އެއްފަރާތުގައިވީ ކުޑަދޮރުން ވަންނަމުން ދިޔަ ހަނދުވަރުގެ ރިހި އަލިން މުޅި ކޮޓަރިތެރެ ހުޅުދާން ވެފައި ވިޔަސް އަހަރެންގެ ހިތަށް ވެރިވެފައިވީ ބުނެދޭން ނޭނގޭފަދަ އަނދިރިކަމެކެވެ. ނުހަނު އުފަލުން އެންމެ ލޯބިވި އަންހެން ކުއްޖާއާއި ކައިވެނީގެ ގޮށް ޖަހައިލެވުނު ރޭ އެނގިގެން މިދިޔައީ ކޮންފަދަ ކަންތައް ތަކެއް ހެއްޔެވެ؟ މިއީ ކޮންފަދަ ބޮޑު އިމްތިހާނެއް ހެއްޔެވެ؟ ކޮންފަދަ ހިތި ހަޤީޤަތް ތަކެއް ހެއްޔެވެ؟ ރޭގެ އުފާވެރިކަމާއި ހިތްގައިމުކަން ކަނުއަނދިރި ކަމަށް ބަދަލުވީ ބަސްބުނާހާ ހިނދުންނެވެ. ފޮނިފޮނި އުންމީދުތަކެއް ހިތި ހަބަރަށްވީ ލޮލުގެ ކުރިމަތީގައެވެ. ވަންހަނާ ވެފައިވީ ބިރުވެރި ހަޤީޤަތެއް ފެންމަތިވީ ނުވެސް އެނގި ހުއްޓަ އިންޒާރަކާއިވެސް ނުލައެވެ. އެ ލިބުނު ސިހުމާއި އެ ޝޮކުން އަހަރެންގެ މުޅީ ދުނިޔެ އެކޮޅު ކޮޅުން ޖެހިގެން ދިޔައީ އެސްފިޔަ ޖަހާލާހާ ހިނދުންނެވެ. އެންމެ ލޯބިވި އިންސާނާ ހިމާޔަތްކޮށް ނުދެވި ފެއިލް ވެއްޖެ ކަމުގައި ހީކުރެވުނެވެ. މި ބާރާއި… މި ނުފޫޒާއި… މި ފައިސާތަކުގެ ބޭނުމެއް ކޮބައި ހެއްޔެވެ؟ އެންމެ ލޯބިވާ މީހުން މީގެން ހިމާޔަތްކޮށް ރައްކާތެރިކޮށް ނުދެވުނު ނަމަ މީގެ ބޭނުމެއް ކޮބައި ހެއްޔެވެ؟ ފަންސޫރުން ލިޔެފައިވީ އިބާރާތެއް ފޮހެލާ ފަދައިން އެ ސަފްހާތައް ފޮހެލާފައި އަލުން އެ ސަފުހާތައް ލިޔެވޭނެ ނަމައެވެ. ޒާނާގެ އެ އަޑިގުޑަން ދުނިޔެ އާރާސްތު ކޮށް ދެވޭނެ ނަމައެވެ. އެ ހަޔާތް އަލިކޮށްލަ ދެވޭނެ ނަމައެވެ. ވެދިޔަތަން އަނބުރައި ގެނެވޭނެ ނަމައެވެ.
ނުނިމޭ
މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.
Other Articles
ތަޤްދީރު-28
އެއީ އެކަނިވެރިއެެކެވެ 1
