އެއްފަރާތުގައިވީ ކުޑަދޮރުން ވަންނަމުން ދިޔަ ހަނދުވަރުގެ ރިހި އަލިން މުޅި ކޮޓަރިތެރެ ހުޅުދާން ވެފައި ވިޔަސް އަހަރެންގެ ހިތަށް ވެރިވެފައިވީ ބުނެދޭން ނޭނގޭފަދަ އަނދިރިކަމެކެވެ. ނުހަނު އުފަލުން އެންމެ ލޯބިވި އަންހެން ކުއްޖާއާއި ކައިވެނީގެ ގޮށް ޖަހައިލެވުނު ރޭ އެނގިގެން މިދިޔައީ ކޮންފަދަ ކަންތައް ތަކެއް ހެއްޔެވެ؟ މިއީ ކޮންފަދަ ބޮޑު އިމްތިހާނެއް ހެއްޔެވެ؟ ކޮންފަދަ ހިތި ހަޤީޤަތް ތަކެއް ހެއްޔެވެ؟ ރޭގެ އުފާވެރިކަމާއި ހިތްގައިމުކަން ކަނުއަނދިރި ކަމަށް ބަދަލުވީ ބަސްބުނާހާ ހިނދުންނެވެ. ފޮނިފޮނި އުންމީދުތަކެއް ހިތި ހަބަރަށްވީ ލޮލުގެ ކުރިމަތީގައެވެ. ވަންހަނާ ވެފައިވީ ބިރުވެރި ހަޤީޤަތެއް ފެންމަތިވީ ނުވެސް އެނގި ހުއްޓަ އިންޒާރަކާއިވެސް ނުލައެވެ. އެ ލިބުނު ސިހުމާއި އެ ޝޮކުން އަހަރެންގެ މުޅީ ދުނިޔެ އެކޮޅު ކޮޅުން ޖެހިގެން ދިޔައީ އެސްފިޔަ ޖަހާލާހާ ހިނދުންނެވެ. އެންމެ ލޯބިވި އިންސާނާ ހިމާޔަތްކޮށް ނުދެވި ފެއިލް ވެއްޖެ ކަމުގައި ހީކުރެވުނެވެ. މި ބާރާއި… މި ނުފޫޒާއި… މި ފައިސާތަކުގެ ބޭނުމެއް ކޮބައި ހެއްޔެވެ؟ އެންމެ ލޯބިވާ މީހުން މީގެން ހިމާޔަތްކޮށް ރައްކާތެރިކޮށް ނުދެވުނު ނަމަ މީގެ ބޭނުމެއް ކޮބައި ހެއްޔެވެ؟ ފަންސޫރުން ލިޔެފައިވީ އިބާރާތެއް ފޮހެލާ ފަދައިން އެ ސަފްހާތައް ފޮހެލާފައި އަލުން އެ ސަފުހާތައް ލިޔެވޭނެ ނަމައެވެ. ޒާނާގެ އެ އަޑިގުޑަން ދުނިޔެ އާރާސްތު ކޮށް ދެވޭނެ ނަމައެވެ. އެ ހަޔާތް އަލިކޮށްލަ ދެވޭނެ ނަމައެވެ. ވެދިޔަތަން އަނބުރައި ގެނެވޭނެ ނަމައެވެ.
*******
ޒާނާގެ ގިސްލުމުގެ އަޑު މަޑުވަމުން ގޮސް އެކަށް ހުއްޓުނެވެ. މަޑުމަޑުން އެ ހަށިގަނޑު އަހަރެންގެ އަތުގެ ތެރެއަށް ސޮހުނެވެ. ރޮއެރޮއެ ވަރުބަލި ވެގެން ޒާނާއަށް ނިދުނީކަން އަހަރެންނަށް އެނގުނެވެ. ލިބުނު ބިރުވެރިކަމުން އަދި މާޒީގެ ސަފްހާތައް އައިސް ވަށައިލުމުން ސިކުނޑީއަށް މާބޮޑަށް ބާރުބޮޑުވީއެވެ.
މަޑުމަޑުން ޒާނާ އަހަރެން ގަޔާއި ދުރުކޮށްލަމުން އަހަރެންގެ އަތްދަނޑި މައްޗަށް އުފުލައިލީމެވެ. އަދި އެނދުގައި ޒާނާ ބާއްވައިލަމުން ބާލީސްތައް ގަޔާއި ކައިރިކޮށްލަދީ ރަޖާގަނޑު ގައިމަތީގައި އަޅާއިލަ ދިނީމެވެ.
އަހަރެން އެނދުގެ މަގަތުގައި އިށިނދެލުމާއިއެކުގައި ޒާނާގެ މޫނަށް އެޅިފައިވީ އިސްތަށިތައް މަޑުމަޑުން އެއްފަރާތް ކޮށްލަ ދިނީމެވެ. ރޮއެރޮއެ ރަތްވެފައިވީ އެ ރީތި މޫނަށް އަހަރެން ބަލައިލީމެވެ. ހިތް ފިތިގެން އައީ ޒާނާގެ ބަސްތައް އަހަރެންގެ ކަންފަތުގައި ގުގުމަން ފެށުމުންނެވެ. ޒާނާގެ ތެމިފައިވީ އެސްފިޔަތަކާއި ރަތްވެފައިވީ ނޭފަތް ކުރި ފެނުމުން އަހަރެންގެ މޭ ކަރައިލިއެވެ. ނިދީގެ ތެރޭގައިވެސް މަޑު ގިސްލުމެއްގެ އަޑު ދޭތެރެއަކުން އިވިލަމުންދާ ގޮތުން އަހަރެންގެ މޭގައި އަތް އަޅާފައި ގަންބާލާފަދަ އިހުސާސެއް ކުރެވެމުން ދިޔައެވެ.
ކޮޓަރިން ބޭރަށް ނިކުމެވޭ ގޮތަށް ހުރި ބިއްލޫރި ބެލްކަނި ދޮރު ކަހައިލަމުން އަހަރެން ބޭރަށް ނިކުތީމެވެ. އެއާއެކުގައި ޖެހެމުން ދިޔަ ތެތްފިނި މަޑު ވައިރޯޅިތައް އަހަރެންގެ މޭގައި ބޮސްދީފައި ސަމާސާ ކުރަން ފެށިއެވެ. ނަމަވެސް އެ ފިނި ފިނި ރޯޅިތަކަށްވެސް އަހަރެންގެ ހިތަށް ފިނިކަމެއް މިފަހަރަކު ގެނެހެއް ނުދެވުނެވެ. އެއަށްވުރެން ހިތުގެ ގިލަން ވަނީ ބޮޑުވެފައެވެ. ހިތަށް ލިބިފައިވީ ހިތްދަތިކަމާއި ސިކުނޑައަށް ލިބިފައިވީ ޝޮކު ބޮޑެވެ.
ހުޅެވި ހަނދު މެދުއުޑުގައި ރަނިކަން ކުރަމުން، ނަލަ ނަލަ ހަނދުވަރެއް މުޅި މާހައުލަށް ދެމުން ދިޔައެވެ. ކުރިމަތީގައި އޮތް މާސިންގާ ކަނޑަށް އެޅެމުން ދިޔަ ހަނދުވަރުގެ ރިވެލި ފެންނަނީ އަޖައިބުވާހާ ޗާލުކޮށެވެ. ނަމަވެސް އުޑުގެ އެ ރާނީއަށްވެސް މިފަހަރަކު އަހަރެންގެ ހަޔާތަށް އަލިކޮށެއް ނުދެވުނެވެ. އެއަށްވުރެން ދާންވީ ރަސްތާ އަނދިރިވެފައި ނާމާނެވެ. އަޑިގުޑަން ގިނައެވެ. ނަމަވެސް މިފަހަރު ރުހާމްގެ ކަންތައް ކޮޅެއްގައި ޖައްސަން އެބަ ޖެހޭ ކަމަށް އަހަރެންގެ ޒަމީރުވެސް ހަރުއަޑުން ގޮވަމުން ދެއެވެ.
ބޭރުގައި ހުރި ދިގު ގޮނޑިތަކުން ގޮނޑިއެއްގައި އަހަރެން އިށީނދެލީމެވެ. ފިކުރުތަކުން އަހަރެންގެ ސިކުނޑި ބަރާވަމުން ދިޔައެވެ. ޒާނާގެ ކޮންމެ ޖުމްލައެއް އަހަރެންގެ ކަންފަތުގައި ތަކުރާރުކޮށް ގުގުމަމުން ދިޔައެވެ. ލިބެމުން ދިޔަ ހިތްދަތިކަމަށް އެއިން ކޮންމެ ފަހަރަކު ބޮޅެއް އިތުރުވަމުން ގެތެމުން ދިޔައެވެ.
ފިކުރުގެ ފުން ކަނޑެއްގައި ހާސްކަމުގައި ގެނބެމުން ދަނިކޮށް، އިސްޖަހައިން އިންދައި ފައިތިލަ ކައިރިއަށް ޖެހުނު ފެންތި އަހަރެންނަށް ފެނުނެވެ. އަހަރެން އުޑުމައްޗަށް ބަލައިލީ ވާރޭ ވެހެން އުޅެނީ ކަމަށް ހީކޮށެވެ. ނަމަވެސް އުޑުމަތީގައި އެންމެ ވިލާ ރޮއްޖެއްހާ މިންވަރުވެސް ނެތެވެ. އެހިނދު ކޯތާފަތުން ތިރިއަށް ދެމިލި ކަރުނަތިލި ފިރުކިލާފައި ގޮސް ތުނބުޅީގެ ތެރެއަށް އޮބުނެވެ. ހައިރާންވެފައި އަހަރެންނަށް މޫނުގައި އަތް ޖައްސައިލެވުނެވެ. އަހަރެންނަށް ރޮވެނީކަން ހުދު އަހަރެންނަށް ވެސް ގަބޫލު ނުކުރެވުނެވެ. ނަމަވެސް ހަޤީޤަތަކީ އެއީއެވެ. އެ ހަޤީޤަތާއި އަހަރެން ދެކޮޅު ހަދާނީ ކިހިނެތް ހެއްޔެވެ؟
ފަހަރަކު ތިއްކެއް އޭގެ މަގާމު ދޫކޮށް ފިރުކިލާފައި އަހަރެންގެ ކޯތާފަތުން ފައިބަން ފެށިއެވެ. އެ ކަރުނަތައް ހުއްޓުވާކަށް އަހަރެން މިއަދަކު މަސައްކަތެއް ނުކުރަމެވެ. މޫނުމަތިން ހިތާމައިގެ އަސަރެއް ނުދައްކައި ވޭތޯ ބެލިޔަސް ހިތް ފުރޭންދެން ރޯލަން ބޭނުން ވިއެވެ. ހިތަށް ހަމަޖެހުމެއް އެކަމުންވެސް ލިބިދާނެ ކަމަށް އަހަރެން އުއްމީދު ކުރީމެވެ.
އިސްޖަހައިލަމުން ދެކަކުލުގައި އުޅަނބޯށި ވިދެލަމުން އަހަރެން ކުޑަކޮށް ކުރިއަށް ގުދުވެލީމެވެ. އިސް އޮބައިލުމައި އެކުގައި މުށްކަވައިލި ދެއަތް ގެނެސް ނިއްކުރީގައި ޖައްސައިލަމުން ލޯމަރައިލީމެވެ. ހިތަށް ކުރަމުން ދިޔަ އަސަރުން ހަމަ ރީއްޗަށްވެސް ރޮވެން އަހަރެންނަށް ފެށުނެވެ. އަޑު ވީއްލައި ނުރުޔެއް ކަމަކު އަހަރެންގެ ހިތް ރޮމުން ދިޔައީ އަޑުން އަޑު ނަގައެވެ. ކަރުނައިން ދެލޯ ފުރި ބަންޑުން ވަމުން ދިޔައެވެ. ޒާނާގެ ބަސްތައް އެ ހިތްދަތިވެފައިވީ މައުސޫމު މޫނު އަހަރެންގެ ލޮލުގެ ކުރިމައްޗަށް އިރުއިރުކޮޅައި ފެންނަ ކަހަލައެވެ. އެބަސްތައް އަހަރެންގެ ކަންފަތުގައި ތަކުރާރު ވަމުން ދިޔައެވެ. ރުހާމްގެ އަނިޔާތަކުގެ ތަފްސީލު އަކުރުން އަކުރަށް ޒާނާއަށް ކިޔައި ދެވޭނެހައި ހިތްވރު ނުލިބުނު ކަމުގައި ވިޔަސް ޒާނާގެ ހިތުގައިވީ ހުރިހާ ވާހަކަ ތަކެއް އަހަރެންނަށް ނަގައިގަނެވުނެވެ. ހިތްދަތިވެގެން ހިތް ފަޅައިގެން ހިނގައިދާނެހެން ހީވީ ފިކުރުތަކުން މީހާ ހާސްވީ ވަރުންނެވެ.
އެތައް އެއްޗެއް އަހަރެންގެ ހިތަށް އަރައި ފައިބަމުން ދިޔައެވެ. އެންމެ ފުރަތަމަ ޒާނާއާއި ދިމާއި ދުވަހާއި ފުރަތަމަ ނަޒަރުންވެސް އެ އަންހެން ކުއްޖާ ހާއްސަ ވި ގޮތެވެ. އަހަރެންގެ ހިލަ ހިތުގެ ފުނުން މަޤާމެއް އެންމެ ފުރަތަމަ ފެނިލުމުންވެސް ޒާނާ ކަށަވަރު ކުރިއެވެ. ދެމެދުގައި ލޯތްބެއް އުފަންވީ ގޮތެވެ. އެ ހާއްސަ ވަގުތުތަކާއި އެ ރޭތަކުގެ އުފާވެރިކަމެވެ. ޒުވާން ހޫނު ލޭގައި ދައުރުވާންފެށި އިޝްޤުގެ އިހުސާސް ތަކެވެ. އެކުގައި ލޯބިން ހޭދަކުރި ދުވަސްތަކަށްފަހު އައި ކޮޅިގަނޑެއްގައި ޖެހި ދެމީހުންގެ މަންޒިލް މަޖުބޫރަކުން ކަމުގައި ވިޔަސް ބަދަލުކޮށްލަން ޖެހުނު ހިތްދަތި ގޮތެވެ. އޭގެ ފަހުގައި އަހަރެންގެ ހަޔާތް ވިއްސިވިހާލިވި ގޮތެވެ. އަހަރެންގެ ދުނިޔެ އެފުށް މިފުށަށް ޖެހުނު ހިތްދަތި ގޮތެވެ. ހޭ ބުއްދިފިލާފައިވީ މީހެއް ފަދައިން އަހަރެން ވީ ދުވަސްތަކެވެ. ޒާނާ ދެކެވީ ގަދަ ލޯބީގައި އަހަރެން ފަނާވަމުން ދަނިކޮށް ބައްޕަގެ ހިތްވަރާއި މިންނެތް މަސައްކަތުން އަހަރެން ނަގައި ކޮޅަށް ޖެހި ގޮތެވެ. ބައެއް ގުޅުން ނިމިގެން ދިޔަ ދިޔުންވީ ބައެއް ގުޅުންތަކުގެ ފެށުން ކަމުގައި ހަޔާތުގެ އެ ބާބު ވި ގޮތެވެ.
އެތައް މަސައްކަތަކުންވެސް އެތައް ހިތްވަރަކުންވެސް އަހަރެންނަށް ޒާނާ ހަނދައިން ނައްތައެއް ނުލެވުނެވެ. ތެދަށް ބުންނަޔާ ހަނދާން ނައްތާލަން ބޭނުންވެސް ނުވީއެވެ. އެތައް ހިތްވަރަކުން ކޮޅަށް ތެދުވިއިރުވެސް އެ ހަނދާންތައް އަހަރެންގެ ހިތަށް އުނދަގޫ ކުރުވިއެވެ. ބިންވަޅު ނެގިފައި އެ ފޮނިފޮނި ރޭ ތަކާއި އެ އަންހެންވަންތަ ސޫރަ ހިތުގައި ކުރެހިފައި ވިއެވެ. އެތަށް ރެޔެއްގެ ނިދިން މަހުރޫމު ކުރުވި ސަބަބަކަށް ޒާނާގެ ހަނދާންތައް، އެ ރީތި މޫނު ވިއެވެ. ލޮލާއި ނިންޖާ ވަކިކުރުމަށް ފަހު ޒާނާ ދިޔުމުން އަހަރެންގެ އޭގެ ފައިދާވެސް ނެގީމެވެ. ނުނިދުނު އެތައް ރެއެއްގެ މަސައްކަތުން އަހަރެން މިއަދު ވެފައި މިވަނީ އަހަރެންގެ ބައްޕަފަދަ މަޝްހޫރު ނަންކިޔައިލެވޭ ވަރުގެ ނުފޫޒު ގަދަ މީހަކަށެވެ.
ހިތަށް ކެތް ނުވެގެން ޒާނާގެ ހާލު ދުރުދުރުން އަހަރެން ބެލީމެވެ. އުފާވެރި ކަމުގައި ޒާނާ ވާ ތަން އަހަރެންނަށް ފެނުމުން ހިތުގައި ރިހުނެވެ. ނަމަވެސް ކެތްތެރިވީމެވެ. ޒާނާ އުފަލުގައި ވުމުން އަހަރެން ހިތްހަމަ ޖައްސައިލީމެވެ. ދުރުގައި ހުރެގެން ސިއްރު ސިއްރުން ލޯބިވީމެވެ.
ނަމަވެސް ޖަނާގެ ފަރާތުން އެނގުނު ކަންތައްތައް އަހަރެންގެ ލޯ ހުޅުވައި ދިނެވެ. ލޮލަށް ފެންނަހާ މަންޒަރަކީ ހަޤީޤަތެއް ނޫންކަން އަންގައި ދިނެވެ. އެ ހުރަގެއެއްފަދަ ކައިވެނިން ޒާނާ ސަލާމަތް ކޮށްދިނުމުގައި އަހަރެން ސިއްރުސިއްރުން އެހި ވީމެވެ. އަހަރު ތަކަކަށްފަހު ޒާނާ އަދިވެސް އަހަރެންނަށް ލިބިދާނެކަމުގެ އުއްމީދެއް އާވެގެން ދިޔައެވެ. އަހަރުތަކަކަށް ފަހު ފެށުނު ގުޅުން ސާފުވެފައި އޮމާނެވެ. ހީނުކުރާހާ ފަސޭހައިން ޒާނާއާއި ގުޅުން ބޭއްވުނެވެ. ނަމަވެސް މުސްކުޅިން ބުނެއުޅޭހެން ކޮޅިގަނޑެއް އައުމުގެ ކުރިން ދުނިޔެ މަތި ހަމަހިމޭން ވެލައެވެ. އަހަރެންގެ ދިރިއުޅުމަށްވެސް ވީ އެހެންނެވެ. އަހަރުތަކަކަށް ފަހު ޒާނާ އަހަރެން ބޭނުންވި ގޮތަށް އަހަރެންގެ މިލްކަކަށް ވެއްޖެއެވެ. ދިގު އިންތިޒާރަށް ނިމުނެއް އައެވެ. ނަމަވެސް…. ކައިވެނީގެ ރޭ، އުފާކުރަންވީ ރޭ އަހަރެންނަށް ނޭނގި ނަމަވެސް ޒާނާ ބިރުގަންނަވައި ލެވިއްޖެއެވެ. އުފާވެރިކަމުގައި ހޭދަ ކުރަންވީ ރޭ ހިތްދަތިކަން އައިސް ވަށައިލައިފިއެވެ. މާޒީގެ ހިޔަނި ނުވެސް އެނގި ހުއްޓާއި އައިސް ވަށައިލައިފިއެވެ. އެކަމުގެ ސަބަބުން ފެންމަތިވެގެން ދިޔަ ހަޤީޤަތްތަކުގެ ސަބަބުން އަހަރެންގެ ސިކުނޑީ ފަޅާއިގެން ހިނގައިދާނެހެން ހީވެއެވެ.
ޒާނާ ލިބުނު އިރު އެ މަލަށް ވަނީ އަނިޔާވެރިއެއްގެ ޝިކާރައަކަށްވެ ޒަހަމް ވެފައެވެ. ބައެއް ޒަހަމްތައް ވަނީ ފޫ ނުބެއްދޭވަރުގެ ގެއްލުން ތަކަށް ވެފައެވެ. ވަންހަނާ ވެފައިވީ ހަޤީޤަތްތައް ފާޅުވެގެން ދިޔައިރު އެ ހަޤީޤަތްތަކުގެ ހިތިކަން ހިތި ހަބަރަށް ވުރެން ހިތިވެފައި ވެއެވެ. ހަޖަމް ނުވާނޭފަދަ ލާއިންސާނީ ދަށުދަރަޖައިގެ އަމަލުތަކަކަށް ރުހާމްގެ އަނިޔާވެރިކަން ވަނީ ވެފައެވެ.
އިށީނދެ އިންނަން އުނދަގޫ ވެގެން އަހަރެން ކޮޅަށް ތެދުވީމެވެ. ވިސްނި ވިސްނިހެން އަހަރެންގެ ބޯ ހާސްވަމުން ދިޔައެވެ. މޫނުމަތިން އެ ކުލަވަރު ނުދެއްކި ކަމަށް ވިޔަސް އަހަރެންގެ ސިކުނޑީގައި އުފެދިފައިވީ ހައިޖާނެކެވެ.
ކުރިއަށް ޖެހިލައި ރެއިލިންގައި ދެއަތް އަޅުވައިލަމުން އަހަރެން ލޯމަރައި ތަގުޑިކޮށްލީ ލޮލުން އިތުރު ކަރުނައެއް އަޔަ ނުދިނުމަށެވެ. ހިތްވަރު ކުރުމަށެވެ. އެކަން އަހަރެންނަށް ކާމިޔާބުވެސް ވިއެވެ. ނަމަވެސް މޭގައި އުފެދިފައިވީ ބަރުކަމަށް ލުޔެއް ނައެވެ. ކަރުތެރޭގައި އެއްޗެއް ތާށިވެފައި ހުރިކަމުގެ އިހުސާސް ކުރުވަމުން ދިޔައީ ހިތްދަތިވެފައި ހުރިވަރު ބޮޑުކަމުން ކަންނޭނގެއެވެ. މޭގައި މަޑު ރިހުމެއްވެސް އުފެދިފައި ވިއެވެ. ހިންދިރުވައިލަންވެސް އުނދަގޫވެފައި އަހަރެންނަށް ހުރެވުނެވެ. އެ ކަމުގެ ސަބަބުން ދަގަނޑު ރެއިލިންއަށްވެސް ބާރުކުރެވެމުން ދިޔައެވެ. ޒާނާ ވޭތުވެދިޔަ އަހަރުތަކުގައި ރުހާމްއާއިއެކުގައި ހޭދަ ކޮށްފައިވީ ހިތްދަތި ދުވަސްތައް އަހަރެންގެ ހިތަށް ހަމަ އުނދަގު ކުރަނީއެވެ. ލޮލަށް ފެނިފައި ނެތަސް ޒާނާއަށް މަޖުބޫރު ކޮށްގެން ޒާނާ ލައްވައި ރުހާމް ކޮށްފައި ހުންނާނެ ކަންކަން އަހަރެންގެ ލޮލުގެ ކުރިމައްޗަށް ސިފަވާހެން ހީވަނީއެވެ. އެ ހަށިގަނޑުގައިވީ އެކިވަރުގެ ލަކުނުތައް ލޮލުގެ ކުރިމައްޗަށް ސިފަ ވަނީއެވެ. އަހަރެންނަށް ދަތްކުނޑި ވިކައިލެވުނީ ނަފްސު ހިސޯރުކުރަން ފެށި ގަދަ ރުޅީގެ ސަބަބުންނެވެ. ނަމަވެސް އެ ރުޅީގެ މައްޗަށް ކުރި ހޯދަމުން ދިޔައީ ޒާނާގެ ރޮވިފައިވާ މޫނު އިރުއިރުކޮޅާއި ލޮލުގެ ކުރިމަތިން ސިފަވާން ފެށުމުންނެވެ. ޒާނާގެ ދުލުން ބޭރުވި ބަސްތަކުންނެވެ. ވޭނާއި ހިތްދަތިކަމާއި ކެކުޅުން އެކުލެވިގެންވީ އެއަޑުންނެވެ. އެ އަހަރުތަކުގައި ޒާނާ ތެޅޭނެ ތެޅުން ހިތަށްއަރާފައެވެ.
ޖީބަށް އަތް ކޮށްޕައިލަމުން އަހަރެން ފޯނުނެގީމެވެ. އަތުގައި މަޑު ތުރުތުރެއް އުފެދިފައިވީ ކަންވެސް އަހަރެންނަށް އެނގުނީ އެވަގުތުއެވެ. ތުރުތުރު އަޅާ އިނގިލި ތަކުން ނަންބަރަކަށް ޑައިލް ކޮށްލަމުން އަހަރެން ފޯނު ގެނެސް ކަންފަތުގައި ޖައްސައިލީމެވެ. އަތުގެ ނުފުށުން މޫނު ފުހެލަލަމުން ނޭފަތް އެތެރެއަށް ދަމައިލެވުނެވެ.
” ހެލޯ…..” ތިންވަނަ ރިންގާއި އެކުގައި ބައްޕަ ފޯނު ނެގިއެވެ.
ނުނިމޭ
މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.
Other Articles
ވާރޭގެ ތެރެއިން ހިތަކަށް -1
