މި ލޯތްބާއި ތި ވަޢުދު (37)

“ނިއު އިންޓާރންސް” ކުއްލިއަކަށް އޮފީހުގެ ދޮރު ހުޅުވުނު އަޑާއެކު ޚިޔާލެއްގެ ތެރޭ ގެއްލިފައި އިން ރޫޔާ ތެޅިގަނެވުނެވެ. އަތުގައި އޮތް ގަނޑު، ލައިގެން ހުރި ހުދު ކޯޓުގެ ޖީބު ތެރެއަށް ލުމަށްފަހު އޭނާ ރާޝިދަށް ބަލައިލިއެވެ.
“އޯހް… އެކުދިން އައީތަ މިހާރު؟” ލުއި ހިނިތުންވުމެއް ހަދިޔާކޮށްލަމުން ރޫޔާ އެހިއެވެ.
“ހޫމް. ސަހާ އެބައުޅޭ އެކުދިންނާއެކު، އޭނާ އެޓެންޑިންގެ ރޯލް ވަރަށް ސީރިއަސްކޮށް ނަގަމުންދަނީ” ޗޮކެއް ކަނޑައިލަމުން ރާޝިދު ބޯ ހޫރައިލިއެވެ. “އެމީހުންގެ އޮރިއެންޓޭޝަން، ދެން ޕޯސްޓް ގްރެޖުއޭޓް ސެރެމޮނީ ފެށޭނެ ދިހައެއް ޖަހާއިރު”
“އެހެން…” ގޮނޑިން ތެދުވަންނަމުން ރޫޔާ ހެދުން ރީތިކޮށްލިއެވެ. “ހިނގާ ދާން..”
“މަޑުކޮށްބަލަ ޢާއިޝާ” ރާޝިދުގެ އަޑު ސީރިއަސްވުމާއެކު ރޫޔާގެ ފިޔަވަޅުމަތީ ހުއްޓުނެވެ. މައި ބަދަމަތިން ފިނިކަމުގެ ރާޅެއް ދަތުރުކުރީ ކުއްލިއަކަށެވެ. އަނެއްކާ ރާޝިދަށް ވެގެން އުޅޭގޮތް ރޭކާލެވުނީ ބާއެވެ؟
“ކިހިނެއްވީ؟” މޭ ތެރޭ ގަދަޔަށް ތެޅެމުން ދިޔަ ހިތް ހަމައަކަށް އަޅުވަންވަމުން ރޫޔާ ރާޝިދާ މޫނު ހަމަކޮށްލިއެވެ.
“ޔޫޝާގެ ޚަބަރެއް ވެއްޖެތަ؟ އަހުމަދު ބުނި ޔޫޝާ ޔޫ.ކޭގައި ވީ ވާހަކަ؟” ރާޝިދުގެ ސުވާލާއެކު ރޫޔާގެ އުދާސްތައް ކުޑަވަގުތުކޮޅަކަށް ފިލައި ދިޔައެވެ. ކުޑަ ނޭވާއެއް ނެގުމަށްފަހު އޭނާ ބޯ ހޫރައިލިއެވެ.
“ނޫން. ރަޒާން އަދި ނުބުނޭ އޭނާ ފެނުނު ވާހަކައެއް…” ދޮރު ހުޅުވަމުން އޭނާ ޖަވާބު ދިނެވެ. “މިއަދު ބިޒްނަސް މީޓިން ނިންމާފަ އެކޮޅުގެ ޕްރައިވެޓް އިންވެސްޓިގޭޓަރަކާއެކު އެކަމުގައި އުޅޭނެ ވާހަކަ ބުނި..” އޮފީހުން ނުކުމެ، ރޫޔާއާއި ރާޝިދު މިސްރާބު ޖެހީ ހޮސްޕިޓަލުގެ އޮޑިޓޯރިއަމާ ދިމާލަށެވެ.

“ޑރ. ރާޝިދު.. ޑރ. ރޫޔާ” އޮޑިޓޯރިއަމް ތެރޭ އަތުރައިފައިވާ ގޮނޑިބަރިތަކާ އަރާ ހަމަވުމާއެކު، ފަހަތުން ސަހާގެ އަޑު އިވިފައި ރޫޔާ މޫނު އަނބުރައިލިއެވެ. ސަހާގެ މޫނު މަތިން ފެންނަމުންދާ އުފާވެރިކަމުގެ ކުލަވަރު ފެނިފައި ރޫޔާއަށް ލުއި ކޮށް ހީލެވުނެވެ.
“ޑރ. ސަހާ…” އޭނާގެ ކައިރީގައި ހުރި ރާޝިދު ސަހާއަށް ބޯ ޖަހައިލިއެވެ. “މަރުޚަބާ… ބަލާބަލަ..އެހާ އަވަހަށް ބޮޑުވީ… އަހަރެންގެ ސާރޖިކަލް ދަރިފުޅު.. ދޯ. ޢާއިޝާ…”
“ޑރ. ރާޝިދުވެސް. ދޯ… މަޑުކޮށްބަލަ” ސަހާ ގާތު އުމުރުން ދުވަސްވީ އަންހެނަކާ ފިރިހެނެއް މަޑުކޮށްލުމާއެކު ސަހާ އަވަހަށް އެދެމީހުންނަށް ބަލައިލިއެވެ. އަންހެން މީހާގެ އަތުގައި ހިފައިލުމަށްފަހު އޭނާ ރޫޔާމެންނަށް އިޝާރަތްކޮށްލިއެވެ.
“މަންމާ.. ބައްޕާ.. މިހުރީ ޑރ.ރާޝިދު.. ދެން ޑރ. ރޫޔާ… އަޅުގަނޑުގެ ދެ މެންޓަރ” ސަހާގެ ބަހާއެކު އެދެމީހުން ރޫޔާމެންނަށް ހިނިތުންވުމެއް ހަދިޔާކޮށްލިއެވެ.
“މިއީ ދޯ މީގެ އަހަރެއްކުރިން… މަތިންދާބޯޓުގައި…. ހުސެއިން..” އަންހެން މީހާއަށް ރޫޔާއަކީ ކާކުކަން އެނގުމާއެކު އަވަހަށް ރޫޔާގެ ދެއަތުގައި ހިފައިލިއެވެ.
“ދައްތަ ވަރަށް އުފާވެއްޖެ، ސަހާ ޑރ. ގެ ދަރިވަރަކަށްވުމުން. ހަމައަސްލަށްވެސް.. އަލްޙަމްދުﷲ، ދައްތަ ބޭނުންވަނީ ސަހާ ހަމަ ދަރިފުޅު ކަހަލަ ޑޮކްޓަރަކަށް ވާން…” އެ އަންހެންމީހާގެ ފަހު ބަހާއެކު ރޫޔާގެ ހިނިތުންވުން ގަނޑުވިއެވެ. ހިތު ތެރޭ ވެރިވި ޚިޔާލާއެކު އޭނާ ދެން ހިނިތުންވެލީ ގަދަކަމުންނެވެ.
“އަޅުގަނޑުގެ ދުޢާއަކީ ސަހާ އަޅުގަނޑަށް ވުރެ ރަނގަޅު ޑޮކްޓަރަކަށް ވާން. ސަހާގެ ގައިގައި އެ ފެންވަރު އެބަހުރި….” ސަހާއަށް ބޯ ޖަހައިލުމަށްފަހު ރޫޔާ އެ ދައްތަގެ ބުރަކަށީގައި ފިރުމައިލިއެވެ. އެ ދައްތަގެ އަތުން ދޫކޮށްލުމަށްފަހު، ރާޝިދާއި އޭނާ އުޅުނީ އަވަހަށް ގޮނޑީގައި އިށީނަންށެވެ.

ގޮނޑީގައި ހަމަޖެހިލެވުމާއެކު ރޫޔާ ޖީބުން ފޯނު ނެގިއެވެ. ރަޒާންގެ ޚަބަރެއްވޭތޯ ބަލައިލަންވެގެން އޭނާ މެސެޖެއް ފޮނުވައިލިއެވެ. ފުންނޭވާއެއް ދޫކޮށްލުމަށްފަހު އޭނާ ޝަފަޤުގެ ހާލުބަލައިލުމަށް މެސެޖު ކުރަން ފެށިއެވެ.

މާލަމުގައި ތިބި ހާޒިރީންތައް ތެދުވި މަންޒަރު ފެނުމާއެކު ރޫޔާވެސް އަވަހަށް ގޮނޑިން ތެދުވިއެވެ. މާލަމުގެ ދޮރު ހުޅުވި، އެތެރެއަށް ވަދެގަތީ ޖަލްސާގެ ޝަރަފްވެރި މެހެމާނެވެ. އޭނާގެ ފަހަތުން ހޮސްޕިޓަލުގެ ބާނީ އާދަމް ނަސީރެވެ. ނަސީރުގެ ސިފަ ލޮލަށް ފާޅުވުމާއެކު ރޫޔާއަށް ބޭއިޚްތިޔާރުގައި އަތް ޖައްސައިލެވުނީ، ލައިގެން ހުރި ހުދު ކޯޓުގެ ޖީބު މަތީގައެވެ. ޖީބުތެރޭގައި އޮތް ކަރުދާސްކޮޅު އިހުސާސްވުމާއެކު އޭނާއަށް ދެލޯ މަރައިލެވުނެވެ. ހުސްކޮށް އޮތް އަތް ގޮށްމުއްކަވައިލުމާއެކު، އަތުގެ ހަންގަނޑަށް ނިޔަފަތި ވަތް ތަދާއެކު އޭނާ ދެލޯ ހުޅުވައިލުމަށްފަހު ނަސީރަށް ރަނގަޅަށް ބަލައިލިއެވެ. ޝަރަފްވެރި މެހެމާނާއެކު ނަސީރު ސްޓޭޖަށް އަރައި، ގޮސް އިށީނީ ސްޓޭޖު މަތީ އަތުރައިފައި ހުރި ގޮނޑީގައެވެ.

ކީރިތި ޤުރްއާންގެ ބަރަކާތުން ޖަލްސާ ފެށިގެން ދިޔައެވެ. މުޅި މާލަމުތެރޭ ގުގުމަމުން ދިޔައީ، އެ ފުރާވަރު ފިރިހެންކުއްޖާ ކިޔަވަމުން ދިޔަ ރީތި އަޑެވެ. ކުއްޖާ ކިޔަވާ ނިމުމާއެކު ޖަލްސާ ހޮސްޕިޓަލުގެ ދެ މުވައްޒަފުން ޖަލްސާ ހުށަހަޅަން ފެށިއެވެ. އެ ހުރިހާ ވަގުތު ރޫޔާ އިނީ ނަސީރަށް ކަޅި އަމާޒުކޮށްގެންނެވެ. ކައިރީގައި އިން ޝަރަފްވެރި މެހެމަނާ ވާހަކަ ދައްކަން އިން ނަސީރުގެ ވިސްނުން ހުރި ދިމާ އޭނާ ވިސްނަން އުޅުނެވެ. ޔޫޝާގެ ވާނުވާއާއި މެދު އެ ކުޑަ ވަގުތުކޮޅު ވިސްނައިލެވުނެވެ. ޝަފަޤާއި ބައްޕަ މަތިން ހަނދާންވިއެވެ. ސިކުނޑިއަށް ވެރިވާ ކޮންމެ ޚިޔާލާއެކު، އޭނާގެ ޖީބު ތެރޭ އޮތް ގަނޑުކޮޅުގެ ‘ބަރުކަން’ އިހުސާސްކުރެވެން ފެށުނެވެ.

އެ ފަޅި ސިކުންތުކޮޅުގައި ނަސީރު މޫނު އަނބުރައިލި ވަގުތު އޭނާއާ ހަތަރު ކަޅި ހަމަވިއެވެ. ހަދިޔާކޮށްލި ހިނިތުންވުމަކާއެކު ހީވީ ފަހަތުން މީހަކު އައިސް އޭނާގެ ނޭވާ ހޮޅީގައި ހިފައި ބާރުކޮށްލިހެންނެވެ. މުޅި މީހާ އެކީ ހުއްޓުން އެރީ ކުއްލިއަކަށެވެ.

“މިއަދު އާ ފިޔަވަޅުތަކެއް އަޅަން އުޅޭ ޑޮކްޓަރުންނަށް އުނގަންނައިދީ، އެ ޑޮކްޓަރުން ބައްޓަން ކުރި މުދައްރިސުންގެ އަގުވަޒަން ނުކޮށް މި ޖަލްސާ ނިންމައިލުމަކީ، އަޅުގަނޑު ދެކޭ ގޮތުގައި ބޮޑު ނާއިންސާފެއް ދެއްތޯ..” ހުށަހަޅަމުންދިޔަ އަންހެން ކުއްޖާގެ ޖުމުލައާއެކު މުޅި މާލަމުގެ ތެރޭ ގުގުމައިލީ އެންމެންގެ ހުނުމުގެ އަޑެވެ. “އާދެ، ދެން އޮތީ މި ހޮސްޕިޓަލުގެ ރެސިޑެންސީ ޕްރޮގްރާމުގައި ޝާމިލުވެ، މުސްތަޤުބަލުގައި މަސައްކަތް ކުރާ ޑޮކްޓަރުން ތަމްރީނުކުރުމުގައި ބައިވެރިވި ޑޮކްޓަރުންނާއި އިސްނަރުހުންގެ އަގުވަޒަންކޮށް، އެބޭފުޅުންނަށް ހޮސްޕިޓަލުގެ ފަރާތުން ހާއްސަ ހަނދަނީ ފިލާ ހަވާލުކުރުން.. މި  ނަމްބަރ ފުރިހަމަކޮށްދެއްވަނީ ނަސީރު މެޑިކަލް އިންސްޓިޓިއުޓްގެ ބާނީ، އަލްފާޟިލް އާދަމް ނަސީރު..”

ނަސީރުގެ ނަން ގޮވައިލުމާއެކު، ނަސީރާއެކު ޝަރަފްވެރި މެހެމާނު ގޮނޑިންތެދުވިއެވެ. ދެމީހުން އެކަކު އަނެކަކާ ސަލާމް ކުރުމަށްފަހު ނަސީރު ގޮސް ހުއްޓުނީ ސްޓޭޖްގެ މެދުގައެވެ.
“ޑރ. އިބްރާހިމް ފައިސަލް”
“ހެޑް ނާރސް ޝަމްސުއްނިސާ”
“ޑރ. މަރިޔަމް ވަހީދާ…”
“ޑރ. ރާޝިދު ސަލީމް” ރަޝީދުގެ ނަން ގޮވުމާއެކު ރޫޔާ ލުއި ހިނިތުންވުމަކާއެކު އަތް ޖަހަން ފެށިއެވެ. ރާޝިދު ސްޓޭޖަށް އަރައި ނަސީރާއެކު ސަލާމްކޮށްލި ވަގުތު ރޫޔާގެ ހިތަށް ފަނޑު ބިރުވެރިކަމެއް ފެތުރުނެވެ.
“ޑރ. ޢާއިޝަތު ރޫޔާ އިސްމާޢިލް” އޭނާގެ ނަމާއެކު މުޅި މާލަމު ތެރޭ ގުގުމައިލީ އަތްތިލަ ބަޑީގެ އަޑެވެ. ކައިރީގައި ތިބި އެންމެންގެ ކަޅި ހުއްޓިފައި ހުރީ އޭނާއަށެވެ. ނޭވާއެއް ނަގަމުން އޭނާ އިސްނަގައި ސްޓޭޖަށް ބަލައިލިއެވެ. ހާޒިރީނާއި އެއްރާގެއްގައި އޭނާއަށް އަތް ޖަހަން ހުރި ނަސީރުގެ މޫނުމައްޗަށް އަރައިފައި އިން ހިނިތުންވުން ފެނިފައި އޭނާގެ ހިތް އިތުރަށް އުނދަގޫ ވާން ފެށިއެވެ. މީހާ ހަމައަކަށް އަޅުވަމުން އޭނާ ގޮނޑިން ތެދުވިއެވެ. އާދައިގެ ފިޔަވަޅުތަކެއް އަޅަމުން އޭނާ ސްޓޭޖާ ދިމާލަށް މިސްރާބު ޖެހިއެވެ. ހިތުގައި ފުނިޖެހިފައިވާ އިހުސާސްތައް ފޮރުވަމުން އޭނާ މޫނުމައްޗަށް ލުއި ހިނިތުންވުމެއް ގެނައެވެ. ސްޓޭޖަށް އެރުމާއެކު އޭނާ ހަށިގަނޑު ނަސީރަށް ސީދާކޮށްލިއެވެ. ސަލާމް ނުކުރަންވެގެން އޭނާ ކަނާތް އަތް ނަގައި މޭ މަތީ ޖައްސައިލީ އެ ހިނިތުންވުމާއެކުއެވެ.
“ޑރ. ރޫޔާ.. އަޅުގަނޑުގެ ހިތުގެ އެންމެ ފުން މިނުން ޝުކުރު އަދާކުރަން. ޑރ. ކޮށްދެއްވި މިންނެތް މަސައްކަތަށް.” ރޫޔާއަށް ހަނދާނީ ފިލާ ހަވާލުކުރަމުން ނަސީރު ރޫޔާއަށް ބޯ ޖަހައިލިއެވެ. “އުންމީދަކީ ޑރ ކުރިއަށް އޮތް ދުވަސްތަކުގައިވެސް ތިގޮތަށް، އެހެން މީހުންނަށް މަންފާވާނެގޮތަށް ޢަމަލުތައް ބަހައްޓާނެ ކަމަށް” ނަސީރުގެ އެ ބަސްތައް ބުނުމަށްފަހު މޫނު އަނބުރައިލީ ފޮޓޯއަށް ނަގަންވެގެންނެވެ. ހަނދަނީ ފިލައިގައި ރޫޔާ ހިފުމަށްފަހު ކެމެރާމޭނަށް މޫނު އަނބުރައިލިއެވެ. އެ ހިނދުކޮޅު އޭނާއަށް ތަރުހީބު ދޭންވެގެން އަދިވެސް އަތް ޖަހަން ތިބި ޔަމީން މެން ފެނުނެވެ. އޭނާގެ ފޮޓޯ ނަގަންވެގެން ފޯނު ހިފައިގެން އިން ރާޝިދު އޭނާގެ ލޮލުގައި އަޅައިގަތެވެ.

ނަސީރު ދެންމެ ބޭރުކޮށްލި ބަސްތަކަކީ އާދައިގެ ބަސްތަކެއް ނޫން ކަން އޭނާއަށް އެ ވަގުތު ވިސްނުނެވެ.
***
އޮޑިޓޯރިއަމް އިން ނުކުމެ ރޫޔާ އަވަހަށް ހިނގައިގަތީ އެ ފަންގިފިލާއިން ފައިބާންށެވެ. ދެންމެ ވީ ކަންތައްތައް ލޯ ކުރިމަތީ ސިފަވުމާއެކު ރޫޔާ ދެލޯ މަރައިލުމަށްފަހު ނޭވާއެއް ދޫކޮށްލެވުނެވެ. ކޮންމެ ގޮތެއްވިޔަސް…
“ޑރ. ރޫޔާ..” ފަހަތުން މީހަކު ގޮވައިލި އަޑަށް ރޫޔާ ފަސް އެނބުރި ބަލައިލިއެވެ. ދެ މީޓަރު ދުރުގައި މަޑުކޮށްލައިގެން ހުރި ފިރިހެން މީހާ ފެނިފައި ރޫޔާގެ ދެބުމަ ގޮށްޖަހައިލެވުނެވެ.
“އަޅުގަނޑަކީ އުވައިސް… ނަސީރު ސަރ ގެ އެސިސްޓެންޓް…” އެ މީހާ ތަޢާރާފުވުމާއެކު ރޫޔާ ބޯ ޖަހައިލިއެވެ. “ޔަޤީން ކޮށްލަންވެގެން.. އެ ދަޢުވަތު ޤަބޫލުކޮށްފިންތޯ؟” އުވައިސްގެ ސުވާލާއެކު ރޫޔާ މުޅި ހަށިގަނޑު ފިނިވިއެވެ.
“އުންމީދަކީ ޑރ ކުރިއަށް އޮތް ދުވަސްތަކުގައިވެސް ތިގޮތަށް، އެހެން މީހުންނަށް މަންފާވާނެގޮތަށް ޢަމަލުތައް ބަހައްޓާނެ ކަމަށް” ސްޓޭޖު މަތީ ނަސީރު ބޭރުކޮށްލި ބަސްތައް ކަންފަތުގައި ގުގުމަން ފެށިއެވެ. އަތު ތެރޭ އޮތް ފިލާގަނޑުގައި ބާރަށް ހިފައިލެވުނީ ބޭ އިޚްތިޔާރުގައެވެ. ނޫނެކޭ ބުނެފިއްޔާ ކަންތައް ދެންވާނެ ގޮތް އޭނާއަކަށް އަންދާޒާކޮށްލާކަށް ނޭނގުނެވެ. ރޫޔާއަށް ކުރެވުނުހާ ކަމަކީ ބޯ ޖަހައިލުމެވެ.
“ރަނގަޅު… އަޅުގަނޑު ދާނަން ކާރުގައި ޑރ. ބަލާ” ރޫޔާއަށް އެއްޗެކޭ ބުނަން ފުރުސަތު ނުދީ އުވައިސް އަވަހަށް އެތަނުން ދިޔައެވެ. ރޫޔާއަށް ހުރެވުނީ އުވައިސްގެ ބުރަކަށްޓަށް ބަލަންށެވެ.

“ޑރ. ރޫޔާ” ސަހާގެ އަޑު އިވުމާއެކު ރޫޔާ ސިހުނެވެ. އަތުގައި އޮތް ފިލާގަނޑު ނުވެއްޓުނީ ކިރިޔާއެވެ.
“ސޮރީ. ސިއްސައިގެން ދިޔައީތަ؟” ސަހާއަށް ރޫޔާގެ މޫނުމައްޗަށް އަރައިފައިވާ ހާސްކަމުގެ ކުލަވަރު ފެނިފައި އެހިއެވެ.
“ހޫމް.. ޔެސް..” މިހާ ހަމައަކަށް އަޅުވަމުން ރޫޔާ ހަށިގަނޑު ތެދުކޮށްލިއެވެ. އޭނާ ރަނގަޅަށް ސަހާއަށް ބަލައިލިއެވެ. “ކިހިނެއްވަނީ ކަންތައް؟ ޖޫނިއަރ އެޓެންޓިން އިޒް ނޮޓް އޭން އީޒީ ވޯކް” ލިފްޓްގެ ފިތަށް ފިތައިލަމުން ރޫޔާ ސުވާލުކުރިއެވެ.
“އަޅުގަނޑަށް އެނގޭ…” ރޫޔާއާއެކު ލިފްޓަށް ވަންނަމުން ސަހާ ޖަވާބު ދިނެވެ. “ދެޓްސް ވައި… އައި އޭމް ގްލެޑް ޓު ހޭވް އަ މެންޓަރ ލައިކް ޔޫ”

ސަހާއަށް ރައްދެއް ދޭން އުޅުނު ވަގުތު ރޫޔާއާއި ސަހާގެ ފޯނު ރިންގުވާ އަޑު އިވިފައި ދެމީހުން އެކަކު އަނެކަކަށް ބަލައިލިއެވެ. ފޯނަށް އަރައިފައި އޮތް މެސެޖު ފެނިފައި ދެމީހުން މިސްރާބު ބަދަލުކޮށްލީ އީ.އާރ އާ ދިމާލަށެވެ.

***
“ޕީޑިއާޓްރިކް ޓްރައުމަރ، އެޕްރޮޒްސިމޭޓްލީ އެއިޓް އިޔަރޒް އޯލްޑް މޭލް، ރޯޑް ޓްރެފިކް އެކްސިޓެންޑް، ޕެޑެސްޓްރިއަން ސްޓްރަކް ބައި އަ ސެޑަން، ޖީ.ސީ.އެސް ފޯރޓީން، އެޖިޓޭޓެޑް، އެބްޑޯމިނަލް ޓެންޑާރނެސް، އިންކްރީޒިން ޕެއިން، ޕްރެޝަރސް ޑްރޮޕިން” އީ.އާރ ގެ ތެރެއަށް ރޫޔާއާއި ސަހާ ވަދެވުމާއެކު ނާރސް ލަކްޝްމީ އަވަހަށް އެދެމީހުން ގާތަށް ޖެހިލިއެވެ. ތިން މީހުން އަވަސް ފިޔަވަޅުތަކެއް އަޅަމުންދިޔައީ ބަލިމީހާ އޮތް އެނދާ ދިމާލަށެވެ.
“ސަހާ، މިކޭސް ނަގައި” ރޫޔާ އެނދުގެ ފައިބުޑު ކައިރީ މަޑުކޮށްލަމުން ސަހާއަށް ބޯ ޖަހައިލިއެވެ.

ލަކްޝީ ދެމުން ދިޔަ މަޢުލޫމާތު އަޑު އަހަމުން ސަހާ އަވަހަށް އަންގި އަތަށް ލެއްވިއެވެ. އެނދުގައި އޮތް ކުޑަ ފިރިހެން ކުއްޖާ ކައިރިއަށް ޖެހިލުމަށްފަހު އޯގާތެރިކަމާއެކު ވާހަކަ ދައްކަން ފެށިއެވެ.
“ކިހިނެއް ވީ؟” ޕެރެމެޑިކް އެ އެނދުކައިރިއަށް ޖެހިލި ވަގުތު ރޫޔާ ސުވާލުކުރިއެވެ.
” މަގު ހުރަސްކުރަނިކޮށް އޮވާރޓޭކް ކުރަން އުޅުނު ކާރެއްގައި ޖެހި، ވިއްސައިގެން ދިޔައީ.. ގާތް ގަނޑަކަށް ތިން މީޓަރު ދުރަށް. ވާތް ފަރާތަށް ވެއްޓުނީ.. އެކްސިޑެންޓް ވި ވަގުތު ހެޔެއް ނުނެތޭ.. ޓްރާންސްޕޯޓް ކުރަނިކޮށް އެއް ފަހަރު ހޮޑުލި…ހޮސްޕިޓަލަށް އާދެވުމުގެ ހަތަރު މިނެޓް ކުރިން ހޭ ހުރި… އެކަމަކު ވަރަށް މަޑުން ހުރީ”
“ޖީ.ސީ.އެސް؟”
“އޭރު ސާދަ، މިހާރު ތޭރަ. ގޮވީމަ ލޯ ހުޅުވާ ހެދި”
“ޕިއުޕިލް ރިއެކްޝަން؟”
“އީކުއަލް އެންޑް ރިއެކްޓިވް”

ރޫޔާ ބޯ ޖެހުމަށްފަހު ސަހާއަށް ބަލައިލިއެވެ. ސަހާވެސް ރޫޔާއަށް ބޯ ޖެހީ ދެމީހުން ވިސްނީ އެކައްޗެއްކަން އެނގިގެންނެވެ.
“ލަކްޝްމީ… ފާސްޓް. ގިވް މީ ދަ ޕްރޯބް”

އަލްޓްރާސައުންޑް ޕްރޯބް އަތަށް އެރުމާއެކު ސަހާ އަވަހަށް އެ ޕްރޯބް ޖެއްސީ އެކުއްޖާގެ ބަނޑުގައެވެ. ބަނޑުގެ އެކި ދިމަ ދިމާލަށް އެ ޕްރޯބް ގެންދަމުން، އެނާގެ ސަމާލުކަން ހުރީ ސްކްރީނަށެވެ.
“ފްރީ ފްލުއިޑް އިން ދަ ލެފްޓް އަޕަރ ކުއާރޑްރަންޓް، ސްޕްލެނިކް އިންޖަރީ”
“ގުޑް..” ރޫޔާ އެއްބަސްވިއެވެ.

ދެން ހަދަންވީ ގޮތް ސަހާގެ އަތް މައްޗަށް ދޫކޮށްލުމަށްފަހު ރޫޔާ އުޅުނީ އީ.އާރ އިން ނުކުންނަންށެވެ. އެހެނަސް، އީ.އާރ ދޮރުމަތީ ހުއްޓިހުރި އަންހެން މީހާ ފެނިފައި އޭނާގެ ފިޔަވަޅުތަކަށް މަޑު ޖެހުނެވެ. އެ އަންހެން މީހާގެ ބޮލުން ފެށިގެން ފަޔަށް ރަނގަޅަށް ބަލައިލިއެވެ. އެ އަންހެންމީހާގެ ވާއަތުގެ މުލައްދަނޑީގައި އިން ޒަޚަމް ފެނިފައި ރޫޔާއަށް އަޅައެއް ނުލައި ނުހުރެވުނެވެ. އަވަސް ފިޔަވަޅުތަކެއް އަޅަމުން އޭނާ އެ އަންހެން މީހާ ހުރި ދިމާލަށް ހިނގައިގަތެވެ.
“ކިހިނެއްވީތޯ؟ މިތާ ދަންނަ ބޭފުޅަކު އިނީތޯ؟” އެ އަންހެން މީހާގެ ސަމާލުކަން ލިބުމާއެކު ރޫޔާ ސުވާލުކުރިއެވެ.
“ނޫން.. މީ.. އެކްސިޑެންޓް ވީ ކުއްޖާ… ހައު.. އިޒް ހީ؟” އެ އަންހެން މީހާ ފަހަތަށް ފިޔަވަޅެއް ނަގަމުން ރޫޔާއަށް ބަލައިލިއެވެ. “ސޮރީ… މީ…” އެ އަންހެން މީހާ ފުންނޭވާއެއް ނެގިއެވެ.
“އައި ސޭވްޑް ދަ ކިޑް…”
“އޯހް.. އޭނާ އެއުޅެނީ ސާރޖަރީއަށް ދާންވެގެން.. އިރާދަކުރެއްވިއްޔާ ރަނގަޅުވާނެ” ރޫޔާ ޖަވާބާއެކު އެ އަންހެންމީހާ ލޯ ހަނިކޮށްލުމަށްފަހު ބޯ އަރިކޮށްލިއެވެ.
“ސޮރީ… އައި…އާހް”
“ދައްކަބަލަ” އެ އަންހެން މީހާގެ އަނިޔާވެފައި އޮތް އަތް ބަލަންވެގެން ރޫޔާ ގާތްވެލި ވަގުތު އެ އަންހެންމީހާ ކުއްލިއަކަށް ފަހަތަށް ޖެހިލިއެވެ. “އޯހް. ސޮރީ… ޔޫ ވާންޓް ޓު ޗެކް މައި އިންޖަރީ”
އެ އަންހެންމީހާ ގަތް ލަދާއެކު އަވަހަށް ރޫޔާއަށް އެ އަތް ދިއްކޮށްލިއެވެ. ކުޑަ ހިނިތުންވުމަކާއެކު ރޫޔާ އެ އަތް ބަލަން ގާތްވި ވަގުތު އޭނާގެ ދެލޯ ބޮޑުވީ އެ އަންހެން މީހާގެ އަތުގެ ހުޅު ފެނިފައިއެވެ. އެއްޗެކޭ ބުނެފައި އޭނާ ތުންފަތް ފިތައިލިއެވެ.
“ޔޫ ނީޑް ސްޓިޗެސް.. ދަ ލެސަރޭޝަން އިޒް ޑީޕް.. ކަމް ވިތް މީ”
—-

ޓްރީޓްމެންޓް ރޫމްގެ އެނދުގައި އިށީނދެ އިން އެ އަންހެނާއަށް ރޫޔާ ރަނގަޅަށް ބަލައިލިއެވެ. އޭނާ ނަޒަރު ބަދިކޮށްލީ އެ އަންހެން މީހާގެ ދެއަތުގެ ހުޅަށެވެ.
“ލެއިލާ ވޯޒް އިޓް؟” ބޭނުންވާ އެއްޗެހި ތައްޔާރުކުރުމަށްފަހު ރޫޔާ އަތަށް އަންގިލެއްވިއެވެ.
“ޔެސް… ފްރޮމް ކަޒަކްސްތާން…” ލެއިލާ ލުއި ގޮތަކަށް ހީލިއެވެ.
“ކަޒަކް… އައި ތޯޓް ޔޫ ވާ އަ މޯލްޑިވިއަން.. އައި މީން ޔޫ އަންޑަރސްޓޫޑް ވެން އައި ސްޕޯކް އިން ދިވެހި؟؟ އެންޑް ޔޫ ލުކް ލައިކް…މޯލްޑިވިއަން”
“ޔެސް…” ރޫޔާގެ ބަސް އިވިފައި ލެއިލާއަށް ހެވުނެވެ. “ޔެސް.. އައި ގެޓް ދެޓް އަ ލޮޓް.. އައި ވޯކް އެޒް އަ ޓްރާންސްލޭޓަރ.. ދިވެހި އިޒް ވަން އޮފް ދަ ލެންގުވޭޖެސް އައި އޭމް ފްލުއެންޓް އިން… ”
“ރިއަލީ؟” އާޝޯހުވެފައި ރޫޔާ ލެއިލާއަށް ބަލައިލިއެވެ. “ދިވެހިން ވާހަކަ ދެއްކީމަ އެނގޭ ދޯ ކިޔާ އެއްޗެހި”
“ހޫމް. އެނގޭ”
“ޔޫ ސްޕީކް ލައިކް އަ މޯލްޑިވިއަން…” ލެއިލާގެ ހުނުމުގެ އަޑާއެކު ރޫޔާއަށްވެސް ހެވުނެވެ. ލެއިލާގެ ހުނުމުގެ އަޑު މަޑުވުމާއެކު ރޫޔާ ލެއިލާއަށް ބަލައިލިއެވެ.
“ޑޮކް… އެކުއްޖާ ހަމަ ރަނގަޅުވާނެތަ؟”
“އިންޝާﷲ، އަޅުގަނޑުމެން އެންމެން މިދަނީ ކުރެވެން އޮތް ހުރިހާ ކަމެއް ކުރަމުން” ރޫޔާގެ ޖަވާބަށް ލެއިލާ ބޯ ޖަހައިލިއެވެ. ލެއިލާ ނަޒަރު ހިންގައިލީ އޭނާގެ ދެއަތަށެވެ.
“ޑިޑް ޔޫ ގެޓް ދެޓް ފްރޮމް އެން އެކްސިޑެންޓް؟” ލެއިލާގެ އަތުގެ ހުޅު ވަށައިގެން، ހިމަކޮށް ދެމިފައިވާ ލަކުނަށް އިޝާރަތް ކުރަމުން ރޫޔާ އެހިއެވެ.
“ޔެސް… އެކްސިޑެންޓް ވީ ގޮތް މާ ބޮޑަކަށް ހަނދާނެއް ނުވޭ.. އެކަމަކު ޑޮކްޓަރުން ބުނީ ދެއަތް ސާރޖިކަލީ ރިއެޓޭޗުކުރި ވާހަކަ….”
“ސާރޖިކަލީ… ރިއެޓޭޗު؟؟ ދެއަތް؟؟” އަޑުއިވުނީ ރަނގަޅަށްތޯ ޗެކު ކުރަންވެގެން ރޫޔާ ތަކުރާރުކޮށްލިއެވެ. ރައްދުގައި ލެއިލާ ރަނގަޅަށް އޮތް އަތް ހިއްލައިލިއެވެ. ރޫޔާއަށް އެ ލަކުނު ރީއްޗަށް ފެނުނެވެ.
“ކޮންއިރަކު؟”
“މިހާރު ދެއަހަރު މިވަނީ…” ރޫޔާ ލެއިލާގެ ޒަޚަމް ފަހައި ނިމުމަށްފަހު އެ ލަކުނަށް އަދި އެއްފަހަރު ބަލައިލިއެވެ. މަޑުމަޑުން ބޯ ޖަހައިލެވުނީ އެ ލަކުނާ މެދު ޝައްކު އުފެދިގެންނެވެ.

***
ލޮކަރ ރޫމްގެ ބެންޗުގައި އިށީނދެ އިން ރޫޔާގެ ނަޒަރު ހުއްޓިފައި ހުރީ، އުނގުމަތީ ބާއްވައިލެވިފައި އޮތް އޭނާގެ ދެއަތަށެވެ. ސީދާކޮށް ބުނާނަމަ، ރަޒާން އޭނާގެ ވާއަތު ކަށި އިނގިލީގައި އެޅުވި އަނގޮޓިއަށެވެ. ޚިޔާލެއްގައި އިނދެ، އޭނާ ކަނާއަތް ނަގައި، އެ އަނގޮޓި މަތީ ފިރުމައިލެވުނެވެ.

ކައިރީގައި އޮތް ފޯނު ރިންގުވާ އަޑު އިވިފައި ރޫޔާ ކަޅިއެއްލައި ލެވުނީ ފޯނުގެ ސްކްރީނަށެވެ. ރަޒާންގެ ނަން ފެނިފައި އޭނާގެ ލޯ މަރައިލެވުނެވެ. ފުންނޭވާއެއް ދޫކޮށްލުމަށްފަހު އޭނާ އެ ފޯނު ނަގައި، ކޯލު ނެގުމަށްފަހު ކަންފަތުގައި ފޯނު ޖައްސައިލިއެވެ.
“ހަލޯ…” ރޫޔާ މަޑުމަޑުން ގޮވައިލިއެވެ.
“ނޫރުލް ޢައިން..” ރަޒާންގެ އަޑުން، އޭނާ އުފާވެފައި ހުރި ވަރު އިހުސާސްވުމާއެކު ރޫޔާގެ ހިތް އިތުރަށް ބަރުވިއެވެ. އަތުގައި އޮތް ފޯނު ބާރަށް ހިފައިލެވުނީ ބޭ އިޚްތިޔާރުގައެވެ.
“ހާދަ އުފާވެފަ” އަމިއްލަ މޫނު މައްޗަށް ގަދަކަމުން ހިނިތުންވުމެއް ގެންނަމުން ރޫޔާ އެހިއެވެ.
“ޑރ. ރާޝިދު ފޮޓޯ ފޮނުވި… ހަނދަނީ ފިލާ ހިފައިގެން އިން ފޮޓޯ. އަހަރެންގެ ފިއުޗަރ ވައިފް. އެންމެން ގާތު ބުނެވޭނަމަދޯ. އަސްލުވެސް ވަރަށް އުފާވޭ. ރޫ ތިކުރާ މަސައްކަތް އެހެން މީހުން ބަލައިގަންނަ ކަން އެނގުނީމަ”
“އުންމީދަކީ ޑރ ކުރިއަށް އޮތް ދުވަސްތަކުގައިވެސް ތިގޮތަށް، އެހެން މީހުންނަށް މަންފާވާނެގޮތަށް ޢަމަލުތައް ބަހައްޓާނެ ކަމަށް” ރަޒާންގެ ބަސްތަކުގެ ދަށުން ރޫޔާގެ ކަންފަތުގައި ގުގުމަން ފެށީ ނަސީރުގެ ބަސްތަކެވެ. ކުޑަ ވަގުތުކޮޅަކަށް ނަމަވެސް ރޫޔާގެ ހިއްސުތަކުގެ މަސައްކަތަށް ހުއްޓުމެއް އައެވެ. ހަނދާނަށް އައީ ރޭ އޭނާއަށް ލިބުނު ނޯޓުކޮޅެވެ. ސަހާގެ އެއްބާރުލުން މަތިންނެވެ. ޔަމީންމެން އޭނާއަށް ތަރުހީބު ދޭން ތިބި މަންޒަރެވެ.
“ރޫޔާ…”

ކޯތާފަތް މަތީ ދަތުރު ކޮށްލި ކަރުނަ ތިއްކާއެކު ރޫޔާ އިސްނެގީ އަޒުމާއެކުއެވެ. ކޮންމެ ގޮތެއްވިޔަސް އެ އަމާންކަމާއި އުފާވެރިކަން ދަމަހައްޓަން އޮތް ގޮތަކީ އެ ނޯޓުކޮޅުގައިވާ ގޮތަށް ޢަމަލުކުރުން ކަމުގައި ވާނަމަ އެކަން ކުރަން އޭނާ އެހުރީ ތައްޔާރަށެވެ.
“ދެން ރަޒާންވެސް…” ނޭފަތް ދަމަމުން ރޫޔާ ބޯ ހޫރައިލިއެވެ. “ހީވަނީ ފިލާ އެރުވުނީ ރަޒާނަށް ހެން.. ތިހާ އުފާވެފައި ހުރީމަ”
“ރޫޔާ.. ރޫޔާއަށް ލިބޭ ކޮންމެ އުފަލަކީ އަހަންނަށްވެސް ލިބޭ އުފަލެއް… ތެދަށް ބުނާނަމަ އަހަރެން އަދިވެސް ޤަބޫލެއް ނުކުރެވޭ ރޫޔާ ތީ އަހަރެންގެ ބައިވެރިޔާ ކަމެއް…”
“އޭތް… ތީ އަހަރެންގެ ލައިން….” ސަމާސާގެ ރާގަކަށް ރޫޔާ އެހެން ބުނުމާއެކު ފޯނުން ރަޒާން ހޭ އަޑު ރޫޔާއަށް އިވުނެވެ. “ނޫން… ހަމަ އަސްލަށްވެސް… އަހަރެންވެސް ބޭނުން….ރަޒާން އުފަލުގައި ހުންނަން…” ބެންޗުން ތެދުވަންނަމުން ރޫޔާ ލޮކަރ ކައިރިއަށް ހިނގައިގަތެވެ.
“ދެން އެހެންވީމާ ހިނގާ މިކަންތައް ނިންމައިފައި ދެމީހުން އުފަލުގައި އުޅެން…” ރަޒާންގެ ބަހާއެކު ރޫޔާ ހުއްޓުން އެރިއެވެ. އެ އުފާވެރިކަން ލިބޭނީ ކޮން ދުވަހަކުން ބާއޭ އޭނާގެ ހިތަށް އެރިއެވެ.

***

“ޝަފޫ” އެޕާޓްމެންޓަށް ބޯ ދިއްކޮށްލި މައިރާގެ އަޑު އިވިފައި ރޫޔާއާއި ޝަފަޤް ދޮރަށް ނަޒަރު ހިންގައިލިއެވެ. އަވަސް ފިޔަވަޅުތަކެއް އަޅަމުން މައިރާ ސިޓިން ރޫމު ހުރަސްކޮށް، ސޯފާ މަތީ އިން ޝަފަޤްގެ އަތުގައި ހިފައިލިއެވެ.
“އަހަންނަށް ޚަބަރު ލިބުނުހާ އަވަހަށް މިއައީ… ޝަފް… ޔޫ އާރ ގޮނަ ބީ ފައިން.. ހެލްޕެއް ބޭނުންވަންޏާ އަހަރެން މިހުރީ ޝަފްގެ އަރިހުގައި….”
“ތެންކްސް މައި…” ބޮޑުވެފައި އޮތް ބަނޑުގައި ފިރުމަމުން ޝަފަޤް ޖަވާބު ދިނެވެ. “އެކަމަކު މައި އަށް އުނދަގުލެއް ނުވާނެތަ؟ އައި މީން… މައި މިހާރުވެސް” ލާނެއް ގޮތަކަށް ހީލަމުން ޝަފަޤް މައިރާއަށް ބުމަ އަރުވައިލިއެވެ.
“ތެދެއް… މިއުވާން އަދި އެއްކޮށް ރަނގަޅު ނުވޭ. ރަޒާން ބުނީ އޭނާ ރިޒައިނޭޝަން ލެޓާރ ލި ވާހަކަ….” ރޫޔާ މައިރާއަށް ބަލައިލިއެވެ. ރޫޔާގެ ޖުމުލަ އިވިފައި މައިރާ ނިތްކުރީގައި ފިރުމައިލިއެވެ.
“ދެން ރަޒާން ކިހިނެއް ހެދީ؟”
“ސަސްޕެންޝަން.. މެޑިކަލް.. މިއުވާން ނުކިޔައިދޭތަ؟” ރޫޔާގެ ސުވާލަށް މައިރާ ބޯ ޖަހައިލިއެވެ.
“އަހަރެން އުޅުނިން ތިކަން ހުއްޓުވަން… އައި މީން.. އަހަންނެއް ބޭނުމެއް ނޫން އަހަރެންގެ ސަބަބުން އޭނާގެ ކެރިޔާ ރިސްކު ކުރާކަށް. އޭނާއަކީ ރަންމުތް ހޯލްޑިންގ ގެ ލީގަލް ޓީމުގެ މީހެއް. ރަޒާންގެ ސްޕެޝަލް ކައުންސެލް….”
ރޫޔާއާއި ޝަފަޤް އެކަކު އަނެކަކަށް ބަލައިލިއެވެ. ޝަފަޤް ނޭވާއެއް ދޫކޮށްލުމަށްފަހު ބޯ ހޫރައިލިއެވެ. “މައި.. ސައިޑް ނަގަނީކީއެއްނޫން… އެކަމަކު މައި… އަހަންނަށް ހީވަނީ، ވީ ކަންތައްތަކާމެދު މިއުވާން ގިލްޓީ ވެގެން އުޅޭހެން.. މިބުނީ.. މައިއަށް ދިމާވި ކަންތައްތަކަކީ މިއުވާންގެ ފެމިލީގެ ސަބަބުން ވީ ކަންތައްތައް ދޯ….”
“އެނގޭ…” ސޯފާގައި ބޯ އަޅަމުން މައިރާ ދެލޯ މަރައިލިއެވެ. “މޯ ރީޒަން އައި ޑޯންޓް ވޯންޓް ހިމް އިން ދިޒް މެސް” ވިސްނުމެއްގެ ތެރޭ ފީނަމުން މައިރާ ބުންޏެވެ.
***

އަސަރެއް ނެތް ގޮތަކަށް ރޫޔާ ލޯގަނޑަށް ބަލައިލީ އޭނާ ލައިގެން ހުރި ހެދުން ބަލައިލަންށެވެ. ސިލްކު ފޮތިން ހަދައިފައިވާ އެ ރަތާއި ކަޅު ކުލައިގެ ހެދުން ޑިޒައިން ކޮށްފައި އޮތް ގޮތުން ދައްކަނީ ޝާހީކަމެވެ. އަމިއްލަ ސޫރައަށް ބަލަން ހުރެފައި ރޫޔާ ދޫކޮށްލެވިފައިވާ އިސްތަށިގަނޑު ރީތިކުރަންފެށިއެވެ. އިސްތަށިގަނޑު ހުޅި ޖެހުމަށްފަހު އޭނާ މޭކަޕް ކުރަން ފެށިއެވެ. އަދުން އަޅައި ތުންފަތް ރަތް ކޮށްލުމަށްފަހު އޭނާ ކަބަޑު ހުޅުވައިލިއެވެ. ރަޒާން އެޅުވި އަނގޮޓި ބޭލުމަށްފަހު އޭނާ ރަން ފަށާއި، ތަނޑިބައި ނެގިއެވެ. ހިތްހަމަޖެހޭ ވަރަށް ރީތިވެވުމުން އޭނާ ދުރަށް ޖެހިލިއެވެ. ފަހު ފަހަރަށް އޭނާގެ ސޫރައަށް ބަލައިލުމަށްފަހު އެނދުމަތީ އޮތް ދަބަހާއި ފޯނު ނެގުމަށްފަހު ކޮޓަރިން ނުކުތެވެ.

އިމާރާތުން ނުކުމެވުމާއެކު، ރޫޔާގެ ލޮލުގައި އަޅައިގަތީ، ކާރު ކައިރީ މަޑުކޮށްގެން ހުރި އުވައިސްއެވެ. ނޭވާއެއް ދޫކޮށްލުމަށްފަހު އޭނާ އެ ކާރަށް އެރިއެވެ.

***
ކާރު ޕާކުކުރުމަށްފަހު، އުވައިސް އައުމާއެކު ރޫޔާ އޭނާގެ ފަހަތުން އެ ރެސްޓޯރެންޓަށް ވަދުނެވެ. ވެއިޓަރަށް ހުރި ކުއްޖާ ކައިރީ އުވައިސް އެއްޗެކޭ ބުނުމާއެކު އެ ކުއްޖާ އެ ދެމީހުންނަށް އިޝާރަތް ކުރީ އޭނާގެ ފަހަތުން އަންނާށެވެ. މަޑު ފިޔަވަޅުތަކެއް އަޅަމުން ރޫޔާ އުވައިސްގެ ފަހަތުން ހިނގައިގަތެވެ.

ލިފްޓުން ނުކުތުމަށްފަހު އެ ކުއްޖާ ދޮރަކަށް އިޝާރަތް ކުރިއެވެ. އުވައިސް އެ ކުއްޖާއަށް ބޯ ޖަހައިލިއެވެ. އޭނާ ރޫޔާއަށް ބަލައިލިއެވެ.
“ސަރ އެހުރީ ޑރ. ގެ އިންތިޒާރުގައި” އުވައިސް ހާމަކުރިއެވެ.

“އޯކޭ” އުވައިސަށް އެއްވެސް ސަމާލުކަމެއް ނުދީ ރޫޔާ ގޮސް އެ ދޮރުގެ ތަޅުގައި ހިފައިލިއެވެ. އެތެރެއަށް ދޮރު ކޮށްޕައިލުމާއެކު، އެކޮޓަރީގެ އެތެރެ ހާމަވިއެވެ. ބޮޑު ޗާންދަލިއާއެކު އެ ކޮޓަރީގެ މެދުގައި އިނީ ވަށް މޭޒެކެވެ. މޭޒުގެ ދެ ފަރާތުގައި ދެ ގޮނޑި ތައްޔާރުކޮށްފައި އިނެވެ. އެއް ގޮނޑި ކައިރީ، ފޯނު ހިފައިގެން ހުރި ނަސީރަށް ރޫޔާ ފެނުމާއެކު ހިނިތުންވެލިއެވެ.
“މަރުހަބާ ޑރ. އަޅުގަނޑު ދިން ދަޢުވަތު ޤަބޫލުކުރި ކަމަށްޓަކައި ޝުކުރުވެރިވަން”