ދީފާ އުފާ

އަޅުގަނޑުގެ މިވާހަކައަކީ ކުރިންވެސް އެސްފިޔައިގާ އަަޕްކުރެވިފައިވާ ވާހަކައެކެވެ. ނަމަވެސް ދިމަވި ކަމަކާހުރެ އަޕްކުރެވުނީ ވާހަކައިގެ އެއްބައެވެ. މިވާހަކަ އަޕް ވާނީ ކޮންމެ ވީކެއްގެވެސް ސަންޑޭ ގައެވެ.

ނިދާފައި އޮތް އާރާއަށް ހޭލެވުނީ އުނދަގުވާ ކަހަަލަ އަޑެއް އިވޭތީއެވެ. ގަޑި ބަލާލިއިރު ގަޑިން މެންދަމު ބާރަ ޖަހަން ގާތްވަނީއެވެ. ލޯފޮހެމުން ގޮސް އާރާ ކޮޓަރީގެ ދޮރު ހުޅުވާލާފައި ބޭރަށް ނިކުތެވެ. އަޑު އަންނަނީ ސިޓިންގް ރޫމުން ކަމަށްވާތީ ސިޑިން ފައިބައިގެން ތިރިއަށް ދިޔައެވެ. މުޅިތަނަށް  އަނދިރިކަން ވެރިވެފާ ވާއިރު އަދިވެސް އެ އަޑު އިވެމުން ދިޔައެވެ.

” އިމީ.. ބެންޖީ..” އެގޭގާ މަސައްކަތް ކުރަން ގެންގުޅޭ ދެމަފިރިން ކަމަށްވާ އިމީ އާ ބެންޖީ އަށް އާރާ ގޮވަން ފެށިއެވެ. ނަމަވެސް އެމީހުންގެ ހަބަރެއް ނުވިއެވެ. އާރާ ސިއްސައިގެން ދިޔައީ ކުއްލިއަކަށް މުޅިތަން އަލިވެ އެންމެން އެއްފަހަރާ ކަހަލަގޮތަކަށް އާރާ އަށް އުފަންދުވަހުގެ ތަހުނިޔާ ކިޔަންފެށުމުންނެވެ. އާރާ މޫނުމަތިން ހައިރާން ކަން ފިލައިގެން ގޮސް ހެވެން ފެށީ މަންމަ ނާއިލާ އާއި ބައްޕަ އަނަސް ކުރިއަށް ޖެހިލިތަން ފެނުމުންނެވެ.

” ދަރިފުޅަށް ދިގު އުމުރެއް ދެއްވާށި.. ދަރިފުޅުގެ އަށާރަވަނަ އުފަންދުވަހަށް މަރުހަބާ..” އަނަސް އޯގާތެރިކަމާއެކު އާރާގެ ބޮލުގައި ފިރުމާލަމުން ބުންޏެވެ. އާރާ ޝުކުރު އަދާކޮށް އަނަސްއާއި ނާއިލާ ގައިގާ ބައްދާލިއެވެ.

” މަންމަ އާއި ބައްޕައަށްތަ ހުރިހާ ލޯތްބެއް.. ދޮންބެމެންވެސް އެބަތިބިން” މިއަޑަށް އާރާ ފަހަތް ބަލާލިއިރު އާރާގެ ތިން ބޭބެ ކަމަށްވާ ރާކިން، ރަޔާން އަދި ރެހާންް ތިއްބެވެ. އެތިންބެއިންނަކީ އަނަސްގެ ކުރީގެ އަންހެނުން ރައިމާއަށް ލިބިފައިވާ ތިން ދަރިންނެވެ. ރީހާންއަކީ އެންމެ ބޮޑު ކުއްޖާ އަށް ވާއިރު ރަޔާންއަށް ވުރެ ރާކިން ކުޑަވާނީ އެންމެ ދެއަހަރެވެ.

” އަޅެ ތެންކިއު ދޮންބެ.. ތިއްތި.. އެންޑް ކުޑަބެ.. ” އާރާ ތިން މީހުންނަށް ވަކި ވަކިން ބަލާލަމުން ބުންޏެވެ. އާރާ އަކީ އާއިލާގަ ހުރި އެންމެ އަންހެން ކުއްޖަކަށް ވުމާއެކު އެންމެންވެސް އާރާދެކެ އިންތިހާއަށް ލޯބިވެއެވެ.

” ކޮބާ ދޮންބެދައްތަ” އާރާ ރެހާންއަށް މުހާތަބުކޮށް އަހާލިއެވެ. އެވަގުތު އާރާއަށް ގޮވާލިއަޑަށް ފަހަތް ބަލާލިއިރު ރެހާން ގެ އަންހެނުން މިޝަލް ކޭކެއް ހިފައިގެން ހުއްޓެވެ. މިޝަލް ކުރިއަށް ޖެހިލާ މެދުގައި ބަހައްޓާފަ ހުރި ކުޑަ މޭޒުމަތީގައި އެކޭކު ބައިންދާލިއެވެ، އަދި އެއަށްފަހު އާރާއާއި ކުރިމަތިލިއެވެ.

“ހެޕި ބަރތްޑޭ ޕްރިންސެސް” އާރާގައިގާ ބައްދާލަމުން މިޝަލް ބުންޏެވެ.

” ވާއު.. އަހަރެންގެ ފެވަރިޓް އޮރެންޖް ކޭކެއް.. ތެންކިއު ދޮންބެދައްތާ..”  އާރާ އުފަލުން އަވަހަށް ވަޅި ނަގައިގެން ކޭކު ފަޅަން ދިމާކުރިއެވެ.

” އަހަރެން ނުލާތަ ކޭކު ފަޅަނީ” މިއަޑަށް އާރާ ބަލާލިއިރު ޔުއާން އާއި އޭނާގެ މަންމަ ސޮފާ ވަދެގެން އަންނަނީއެވެ. ސޮފާއަކީ ނާއިލާގެ އެންމެ ގާތް ރަހުމަތްތެރިޔާގެ އިތުރުން އަނަސްގެ ބިޒްނެސް ޕާރޓްނަރެކެވެ. ނާއިލާއާއި ސޮފާއެކޭ އެއްގޮތަށް އެއްކޮށް ބޮޑުވަމުންއައި އާރާއާއި ޔުއާންއަކީވެސް އެންމެ ގާތް ދެރަހުމަތްތެރިންނެވެ.

” އާން ޔުއާންއަކަށް ނުދޭނަން އެންމެ އެތިކޮޅެއްވެސް.. ހުރިހާ ކޭކެއް އާރާ ކާލާނީ”  އާރާ ބުނެލިއެވެ.

” އެހެންވާން ލާހިކެއް ނޫނެއްނު” ޔުއާން މިހެން ބުނަމުން މޭޒުމަތީގައި ބަހައްޓާފައިހުރި ކޭކު ހިފައިގެން ދުއްވައިގަތެވެ. އާރާވެސް ޔުއާންގެ ފަހަތުން ދުއްވައިގަތެވެ. މަންޒަރު ބަލަން އެންމެންތިބީ ހެވިފައެވެ. އާރާ ވަރުބަލިވެގެން ހުއްޓުމުން ޔުއާން ގޮސްހުރިތާނގައި ކޭކު ބެހެއްޓިއެވެ.

” މިހާރު އެނގިއްޖެ ދޯ މަަށައްނުދީ ކޭކު ނުކެވޭނެކަން.. ” ޔުއާން މިހެން ބުނެލިއިރު އާރާ ހުރީ ތުންއަނބުރައިގެން ޔުއާންއާއި ދިމާއަށް ބަލަހައްޓައިގެންނެވެ.

” ކަމޯން ބަރތްޑޭ ގަރލް.. ދެން ތިހެން ރުޅި މޫނު ހަދައިގެން ނުހުރެ އަވަހަށް އާދެބާ ކޭކު ފަޅަން ” ޔުއާން އާރާގެ އަތުގައި ހިފައިގެން ގެނެސް ކޭކު ކައިރީގައި ބެހެއްޓިއެވެ. އާރާ ކޭކު ފަޅާފައި އެންމެ ފުރަތަމަވެސް ލެވީ އަނަސްއާއި ނާއިލާއަށެވެ، އެއަށްފަހު ސޮފާއަށެވެ. ރެހާން އަށް ކޭކު ލަވަން އުޅުމުން އާރާގެ އަތުގައި އޮތް ކޭކުކޮޅު އަތުލާފައި އާރާގެ މޫނުގައި އުނގުޅާލިއެވެ. އެއާއެކު އެންމެެންވެގެން އާރާގެ މޫނުގައި އުނގުޅަން ފެށިއެވެ. ކުދިންޖަހާ ސަކަރާތް ބަލަން ތަނކޮޅެއް ދުރުގައި ނާއިލާއާއި އަނަސްގެ އިތުރުން ސޮފާ ހުއްޓެވެ.

………………………………………………………………………………………………….

އާރާއަށް ކޮޓަރިއަށް އާދެވޭވަރުވީ މެންދަމުން އަނބުރާ ދޭއް ޖެހި ފަހުންނެވެ. ފެންވަރާލާއިގެން ފާހާނައިން ނިކުތްއިރު ޔުއާން ދެފަަހަރަށް ގުޅާފައި އޮތެވެ. އެނދުމަތީގައި ބަހައްޓާފައިހުރި ގިފްޓްތައް ބެހެއްޓުމަށްފަހު އާރާ އެނދުމަތީގައި އިށީނދެލިއެވެ. އަދި ޔުއާންއަށް ގުޅާލިއެވެ.

” ކޮބާ އަހަރެންގެ ގިފްޓް.. ” ޔުއާން ފޯނު ނެގުމާއެކު އާރާ އަހާލިއެވެ.

” ގިފްޓަށް އަދި ތަންކޮޅެއް އިންތިޒާރު ކޮށްލާ.. މާދަން މެންދުރުއެކެއް ޖަހާއިރު އަހަރެން ދާނަން އާރާ ބަލާ.. ރެޑީވެގެން ހުންނައްޗެ..” ޔުއާން ބުނެލިއެވެ. އާރާވެސް އާއެކޭ ބުނުމަށްފަހު ފޯނުބޭއްވިއެވެ. އަދި އެންމެން ދީފައި ހުރި ގިފްޓްތައް ކަނޑަން ފެށިއެވެ.

………………………………………………………………………………………………………………………………………………..

އެންމެން ހެނދުނު ނާސްތާއަށް އިންސާފު ކުރަން ތިބިއިރު އެތަނުން މަދުވަނީ ހަމައެކަނި ނަވާރަ އަހަރުގެ ރާކިންއެވެ. ރީހާންއާއި ރަޔާން އަނަސް އާ އެއްކޮށް އޮފީހަށް ދާން ތައްޔާރުވެގެން ތިއްބެވެ. އާރާވެސް ޕާނެއްގައި ބަޓަރު ޖައްސަން އިންއިރު މޫނުމަތިން ނިދީގެ އަސަރު ފެންނަން ހުއްޓެވެ.

” ބެންޖީ ދޭބާ ރާކިންއަށް ގޮވަން.. ކޮލެޖަށް ދާ ގަޑިވެސް ޖެހެނީ” އަނަސް ގަޑިއަށް ބަލާލަމުން ބުންޏެވެ. ބެންޖީ ކުރަންހުރި ކަންތައް ހުއްޓާލުމަށްފަހު ސިޑިން އަރައިގެން މައްޗަށް ދިޔައެވެ.

” ރާކިން ހޭލާނެތަ އެހާ އަވަހަށް.. ރޭގަ އަހަރެން ފެންފުޅިއެއް ބަލާ ތިރިރއަށް އައިއިރުވެސް އިވޭ ކޮންމެސް މީހަކާ ފޯނުން ވާހަކަ ދައްކާ އަޑު” މިޝަލް ބުނެލިއެވެ.

” ރާކިން ބިޓެއް ނެގީ ކަންނޭނގެއެއްނު” ރަޔާންވެސް މަޖާވެލާފައި ބުނެލިއެވެ.

” ރަޔާން މާ މަޖާވާނެ ކަމެއް ނެތް.. ކޮންއިރަކު ހަޔާ މިގެއަށް ގެންނާނީ.. އަނެއްކާ ތިއުޅެނީ އަހަރުމެންނަށް ދައްކާވެސް ނުލާ އިންނަންތަ” މިޝަަލް ބުނެލި ވާހަކައިން އެންމެންގެ ނަޒަރު ރަޔާންއަށް ހުއްޓުނެވެ.

” މަންމައާ ބައްޕަ ހުއްދަ ދީފިއްޔާ މާދަމާ މިގެއަށް ގެންނަންވީ” އަނަސްއާއި ނާއިލާއަށް ބަލާލަމުން ރަޔާން ބުންޏެވެ.

” ދަރިފުޅުގެ ނިންމުމަކަށް މަންމަމެން ދެކޮޅެއް ނުހަދާނަން.. ” ނާއިލާ ބުންޏެވެ.

” ބައްޕަގެ ޕްރިންސެސް ވެސް ކޮލެޖަށް ދާ ދުވަސްވެސް ކައިރިވަނީނު.. ދާންވާއިރަށް ހުރިހާ ކަމެއް ތައްޔާރު ކުރައްޗެ.. ” އަނަސް ހެވިލާފައި އިނދެ އާރާއަށް ބުންޏެވެ. އާރާ ހީލާފައި އާއެކޭ ބުނުމުގެ ގޮތުން ބޯޖަހާލިއެވެ.

…………………………………………………………………………………………………..

އެކެއްޖަހަން ކައިރިވުމާއެކު އާރާ އަތުއޮތް އެންމެ ރިތި ހެނދުން ލައިގެން ޔުއާން އަންނަންވާއިރަށް ތައްޔާރުވާން ފެށިއެވެ. މިންޓް ގްރީން ކުލައިގެ ކަކުލާ ހަމައަށްދާ ހެދުމެއް ލައިގެން ހުރިއިރު އާރާ ޕަރީއެއްފަދައެވެ. ސިޜިންގްރޫމުން ޔުއާންގެ އަޑު އިވުމާއެއްކޮށް އާރާ ކޮޓަރިން ނިކުމެގެން ސިޑިމަތިން ދުވެފައި ކަހަލަ ގޮތަކަށް ފައިބާންފެށިއެވެ. އާރާފެނި ޔުއާން ހުރީ ކިޔާނެ ބަހެއް ނޭނގިފައެވެ. އާރާއަކީ ރީތި ކަމުގެ އިންތިހާއޭ ޔުއާންގެ ހިތަށް އަރަމުން ދިޔައެވެ. ސްކޫލް ދައުރުއްސުރެ ޔުއާން އާރާދެކެ އިންތިހާއަށް ލޯބިވެއެވެ. ނަމަވެސް އެކަން ފާޅުކުރަން ނުކެރެނީ ދެމީހުންގެ ދެމެދުގައި އޮތް ރަހުމަތްތެރި ކަމުގެ ގުޅުން ކަނޑާލަން ޖެހިދާނެތީއެވެ. އާރާ އައިސް ކައިރީގައި ހުއްޓުނުއިރުވެސް ޔުއާން ހުރީ ކަޅި ޖަހާވެސް ނުލާ އާރާއަށް ބަލަހައްޓައިގެންނެވެ.

“ހެލޯ..” ޔުއާންގެ މޫނުމަތީގައި އަތް ހުރަސްކޮށްލަމުން އާރާ ބުނެލިއެވެ. ޔުއާންއަށް ހޭވެރިކަމެއްވި ދެނެވެ.

” ރީތިތަ މިހެދުން ..” އާރާ ދެފަރާތަކަށް އެނބުރިލަމުން ޔުއާންއަށް ދައްކާލިއެވެ. ޔުއާން ގޮތަކަށް ބަލާލިއެވެ.

” ދެން ހަޑިއެއް ނޫންދޯ.. ” ޔުއާން ބުންޏެވެ.

” ވަޓް ޔޫ މީން ހަޑިއެއް ނޫނޭ” އާރާ ތުއިގޮތަކަށް ބުނެލިއެވެ.

” އޭގެ މާނައަކީ އެއްޗެއް ނެތްތާކަށް ރީއްޗޭ.. ދެނަ މާގިނައިން ވާހަކަ ދައްކަން ނުހަދާ ހިނގާބާ އަހަންނާއެއްކޮށް..'” އާރާ އިތުރަށް ރުޅިއަރުވާލުމަށް ޔުއާން ބުންޏެވެ. އަދި އާރާގެ އަތުގައި ހިފައިގެން ގެއިން ނިކުންނަން ހިނގައިގަތެވެ. އާރާ ރުޅިއައިއްސަ ހުރެ ޔުއާންގެ އަތް ފޮޅުވާލިއެވެ.

” އަަހަރެންމީ ކުޑަ ކުއްޖެއް ނޫނޭ އަތުގަ ހިފައިގެން ދާކަށް.. އަހަންނަށް އެނގޭ ހިނގަން” ކުރިއަށް ހިނގައިގަންނަމުން އާރާ ބުންޏެވެ. ޔުއާންވެސް ލާނެތް ގޮތަކަށް ހީލާފައި އާރާގެ ފަހަތުން ދާން ފެށިއެވެ.

ގޭގެ ޕޮޓިކޯއަށް ނިކުތްއިރު ފެނުނު އެއްޗަކުން އާރާގެ އަނގަމަތިގައި އަތް އަޅާލެވުނެވެ. ކުރިމަތީގައި ބަހައްޓާފާއި ހުރި ޔުއާންގެ ޑުކާޓެ ސްޓްރީޓްފައިޓަރ ސައިކަލާ ދިމާއަށް ދުއްވައިގަތްތަންފެނި ޔުއާން ހުރީ ހެވިފައެވެ.

” އަޅެ ސޮފާއްތަ ހުއްދަދިނީތަ މީތި ދުއްވަން.. އަޅެ ޔުއާން ހާދަ ރަނގަޅޭ..” ސައިކަލުގައި އަތް ހާކަމުން އާރާ ކިޔަންފެށިއެވެ.

” ޔެސް! ތީ އަރާގެ ބަރތްޑޭ ގިފްޓަކީ” ޔުއާން ބުނެލިއެވެ.

” މިއަދު އޮންނާނީ ތީގަ އާރާ ގޮވައިގެން ދުއްވުން.. އާރާ އަހަރެން ކައިރީގަ ބުނިކަމެއްް މިއަދު ކޮށްދޭނަން.. ސޯ ޓޭކް ޔޯ ޗާންސް” ހެލްމެޓް އަޅައިގެން ސައިކަލުގެ ކުރީގައި އިށިންނަމުން ޔުއާން ބުނެލިއެވެ. އާރާވެސް އުފަލުން ތެޅެމުން ފޮޅެމުން އައިސް ސައިކަލަށް އެރިއެވެ. ސައިކަލު ދުއްވާލިއިރުވެސް އާރާގެ ހުނުމުގެ އަޑު މުޅި ތަނުގައި ހަރުލާފައި ހުއްޓެވެ.

………………………………………………………………………………………………..

ބާރުމުނުގައި އޮފީހުން ނިކުމެގެން އައި ސޮފާއަށް ހުއްޓެވުނީ ކަރުން ފޭބި އަނަސްގެ ކުރިމައްޗަށެވެ.

” މާއަވަހަށް ކޮންތާކަށް ދާން ތިދަނީ..” ސޮފާ އަވަސް އަރުވާލައިގެން އުޅޭތަންފެނި އަނަސް ސުވާލުކުރިއެވެ.

” އަހަރެންގެ ރައްޓެއްސެއްގެ ދަރިއެއް މިއަދު އެބައާދޭ.. އަހަރެން ބޭނުންވޭ ޕަރސަނަލީ އޭނަ ރިސީވް ކުރާންދާން..” ސޮފާ އަވަސް އަވަހަށް ޖަވާބު ދިނެވެ.

” ސޮފާ ނުގޮސް ޔުއާން ފޮނުވަންވީނު..” އަނަސް ބުންޏެވެ.

” ޔުއާން ވެއްޖެ އާރާއާ އެއްކޮށް ދުއްވާލާން ގޮސް.. އާރާގެ އުފަންދުވަސް ވިމަ ސްޕޮއިލް ނުކޮށްލަންވެގެން..” ސޮފާ ކިޔައިދިނެވެ.

” އެކަމަކު ސޮފާ ނެތިއްޔާ ކިހިނެއް ބޯރޑް މީޓިންގ ކުރިއަށް ގެންދާނީ.. ސޮފާ ޔުއާންއަށް ގުޅާފައި ބުނެބާ.. އެކުދިންނަށް ވިސްނޭނެ” އަނަސްގެ ޖުމްލައިން އިރުކޮޅަކު ވިސްނަން ހުރުމަށްފަހު ސޮފާ ފޯނު ނަގާފައި ޔުއާންއަށް ގުޅާލިއެވެ.

……………………………………………………………………………………………………

” އޯކޭ މަންމާ” ޔުއާން ފޯނު ބާއްވާފައި ސައިކަލު ފަހަތުގައިން އާރާއަށް ބަލާލިއެވެ.

” އާރާ ވަރަށް ބޮޑަށް ސޮރީ… މަންމަ ބުނެގެން އެއަރޕޯރޓަށް މަންމަގެ ވަރަށް ގާތް ރައްޓެއްސެއްގެ ދަރިއެއް ރިސީވެކުރާން ދާންޖެހިއްޖެ” ކުށްވެރިއަކު ފަދައިން އިސްޖަހައިގެން އިނދެ ޔުއާން ވާހަކަ ދެއްކިއެވެ.

” ސޯ ވަޓް އަހަރެން ގޮވައިގެން ދެވިދަނެއްނު…އެކަމަކު ޖެހޭނެ ބަރގަރ ކިންގުން އަހަންނަށް ކާންދޭން.. ” އާރާގެ ޖަވާބުން ޔުއާންއަށް ހީލެވުނެވެ. އަދި ހުޅުލޭ ފެރީއަށް ދާން ދުއްވާލިއެވެ.

” ބައިދަ ވޭ.. ރިސީވް ކުރަން މިދާ ކުއްޖާއަށް ކިޔަނީ ކޮންނަމެއްތަ” އާރާ އަހާލިއެވެ.

” މާޒް ” ޔުއާން ޖަވާބު ދިނެވެ. އެވަގުތު ވައި އަޑުން އާރާއަށް އެނަން ކިޔާލެވުނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.