ވަފާތެރިމަވީމޭ 2 (9)

ޔޫއާގެ އިޝާރާތައް ލަސް ލަހުން ފައިޒަން އެތެރެއަށް ވަނެވެ. ވަގުތުން ޔޫއާންގެ ދެލޮލުން ދިޔައީ ތަރި ބުރައިގެންނެވެ. “ޔަލޫ… އެއީ ޔަލޫގެ ބައްޕި…” އިނގިލި ދިއްކޮށްލަމުން ޔޫއާ އެހެން ބުނެލިއެވެ. ލޯ މަރާލައިގެން ހުރި ޔަލާ ދެލޯ ހުޅުވާލިއެވެ.

(9 ވަނަ ބައި)

“ފައިބެ އަކީތަ ޔަލޫގެ ބައްޕިއަކީ…؟” ޔަލާގެ ދެލޯ ވިދާލިއެވެ. ބޮޑުވަމުން އައި އިރު އޭނާއާއި އެހާ ގާތުގައި ފައިޒަން އުޅުމުން ހަގީގަތުގައި ޔަލާގެ ހިތުގައި ވެސް ފައިޒަންއަށްޓަކައި ބައްޕައެއްގެ ކުލުނު ވިޔެވެ.

“ޔެސް… ދެން ފައިބެއެއް ނޫން އިނގޭ ކިޔާނީ؟ ބައްޕި ކިޔާނީ…” ހީނލަމުން ޔަލާގެ ހަށިގަނޑުގައި ފައިޒަން ބައްދާލިއެވެ.

ޔަލާ ކުރިމަތީގައި އެއްޗެކޭ ނުބުނަންވެގެން ޔޫއާން، ޔޫއާގެ އަތުގައި ހިފާ ދަމާފައި ކަހަލަ ގޮތަކަށް ގޮސް ބަދިގެއަށް ވަނެވެ. ދޮރު ކުޑަކުޑަކޮށް ހުޅުވާފައި ބަހައްޓާފައި އޭނާ ބޭރުބަލައިލިއެވެ. ފައިޒަންގެ އަތުތެރޭގައި ބޮނޑިވެގެން އިން ޔަލާ ފެނި އެއީ އެއްވެސް ލޭގެ ގުޅުމެއް ނެތް ބަޔެކޭ އެއްވެސް މީހަކު ނުބުނާނެއެވެ. ހަގީގަތުގައިވެސް ހީވަނީ ބައްޕައަކާއި ދަރިއެއް ހެންނެވެ.

“ޔޫ މޮޔަވީތަ؟؟؟ ކީއްވެ ޔަލޫ ގާތުގައި އެހެން ތިބުނީ؟ ފައިޒަން އާއި ޔަލޫގެ ކޮން ގުޅުމެއް އޮތީ…؟” ހިތްހަމަ ނުޖެހިފައި ޔޫއާން އެހިއެވެ.

“ދޮންބޭ… ހަމަ ޖެހިބަލަ. ޔަލޫ ބައްޕަ ކައިރިއަށް ދާން ރޯތީވޭ ޔޫ މިހެން ހަދަން މިނިންމީ…” ހަރަމް ބަނދެލަމުން ޔޫއާ ބުންޏެވެ.

“އެކަމަކުވާ… ތީ އެކަމަކު ޔަލޫއަށް ދެވޭ ހާދަ ބޮޑު ދޯކާއެކޭ. ހާދަ ބޮޑު އޮޅުވާލުމެކޭ. ނިކަން ދޮންބެ ބުނާ ގޮތް ހަދާބަލަ. ޔޫ-”

“ޔޫ ނޫޅެން ދޮންބެ ބުނާހެން ހަދާކަށް. އިއްޔެ ނިކްޔާންއަށް ކައިވެނި ކުރި އިރު ‘ދޮންބެ ބުނާ ގޮތް ހަދާބަލަ’ އޭ ބުނެ ނައީ ކީއްވެތަ؟ އެދުހަށް ވުރެ މިއަދު ދޮންބެ މޮޅީތަ؟ މިހާރު ޔޫ މިއީ ބޮޑު އަންހެނެއް. ޔަލާ އެއީ އަހަރެންގެ ދަރިފުޅު. ނިކްޔާންގެ ލޭ ދައުރުވިޔަސް އެއީ އަހަރެންގެ ދަރިފުޅު. ހަމަ އެކަނި އަހަރެންގެ ދަރިފުޅު. ނުވަމަހާ ނުވަދުވަސް ވަންދެން މަގޭ ބަނޑުގައޭ ޔަލޫ އޮތީ.. ވިހެއުމުގެ ވޭންވެސް ތަހައްމަލު ކުރީ މަށޭ. ގާތުން ދީ އެވަރަށްވެސް ބަލާ ބޮޑު ކޮށްފަ އެހުރީ މަށޭ. އެހެންވެ އެދަރިފުޅުގެ ހަޔާތް ބިނާ ކުރަންވީ ގޮތް އިނގޭނީ، ހުދު އަހަރެންނަށް” މޭގައި ޝަހާދަތް އިނގިލި ޖައްސާލަމުން ޔޫއާ ބުނެލިއެވެ. އަދި ޔޫއާންއަށް ފުރަގަސް ދީފައި ނިކުމެގެން ދިޔައެވެ.

***5 އަހަރު ކުރިން***

ގަޑިން ހަތަރެއް ޖަހާ ބޮޑުވެފައިވީ ނަމަވެސް، މުޅި މާހައުލަށް ވެރިވެފައިވަނީ ކަޅު ފޮއި ރޭގަނޑެއް ފަދަ އަނދިރިކަމެކެވެ. އުދަރެހުން ފެންނަން އޮތް ނޫކުލަ ވަނީ ބޯ، ކަޅު ވިލާތަކުގެ ނިވާފަތްގަނޑެއްގެ ފަހަތަށް ގެއްލިފައެވެ. ވައިގެ ބާރުމިން ހުރީ އާދަޔާ ހިލާފަށް ގަދަކޮށެވެ. ގަދަ އަޑަކާއެކު ޖެހެމުންދިޔަ ވައިރޯޅިތަކުން، މަގުމަތީގައި ހުރި ބިޔަ ގަސްތައް މުލުން ލުހެވިދާނެހެން ހީވެއެވެ. ގަސްތަކުގެ އޮފިތައް އެކި ފަރާތްފަރާތަށް ހޫރެމުން ދާއިރު، އެއިން އިވޭ ގުގުމުން ހީވަނީ ގުދުރަތުގެ ބާރުގަދަ ނުރުހުމެއް އަމާޒުވެފައިވާ ހެންނެވެ. މަގުމަތީގައި ހުރި ކުނިބުނިތަކާއި ހިކި ފަތްތައް ވައިގެ ތެރޭގައި އެނބުރެމުން ދިޔައީ ހަމަހޭ ނެތް ފަދައިންނެވެ.

ކުއްލިއަކަށް އުޑުމަތި ފަޅައިގެން ދިޔަ ފަދަ ބާރު ގުގުރިއަކާއެކު، ކުރިމަތިން ފެންނަން ހުރި ގެތަކާއި މަގުތައް، ފުސް ދުންގަނޑެއްގެ ތެރެއަށް ގެއްލި، މަންޒަރު މުޅިން ނުފެންނަ ވަރު ވެއްޖެއެވެ. ވައިގެ ބާރުމިނާއެކު ވާރޭގެ ތިކިތައް އައިސް ކުޑަދޮރުތަކުގައި ޖެހެމުންދިޔައީ، ބިރުވެރި މީހަކު ދޮރުގައި ތަޅައިގަންނަ ފަދަ ބާރުމިނެއްގައެވެ.

އެ ބާރު ގުގުރީގެ އަޑަށް އުމުރުން އެންމެ 3 ގަޑިއިރުގެ ޔަލާ ސިހިފައި ރޯން ފެށިއެވެ. ދެފަޔާތް އަތް ތަޅުވަ ތަޅުވާފައި އެކުއްޖާ ރޮމުން ދިޔައީ އެ ބިރުވެރި އަޑުގެ ސަބަބުން ގަންނާ ކުރެއްވީ ބިރުންނެވެ. ޖާލި ދޮރުން ބޭރު ބަލަން އިން ޔޫއާއަށް އެ އަޑު އިވި އެނދުން ތެދުވަން އުޅުނެވެ. ގުގުރާތީވެ އޭނާއަށް ކާއެއްޗެހި ގެނެސްދޭން ދިޔަ މަންމަމެނަށްވެސް އެތިބީ ނާދެވިފައެވެ.

“އޭ އޭ. އަދި ނުވޭ ތިހެން ތެދުވެ އުޅޭކަށް. އަވަހަށް އިށީނދޭ” ދަތި ކަމާއި އެކު ތެދުވަން އުޅުން ޔޫއާ، އެވަގުތު އެތަނަށް ވައިން ކުޑަކުދިންގެ ޑަކްޓަރު، ފައިޒަންއަށް ފެނި އޭނާ ހުއްޓުވިއެވެ. ހީނލަމުން ޔޫއާ އެނދުގައި އިށީނެވެ.

ޔަލާ ނަގައިގެން އޭނާ އެކި ގޮތް ގޮތައް ތަޅުވަން ފެށިއެވެ. ކުޑަ ހިނދުކޮޅެއްގެ ތެރޭގައި ޔަލާ ހުއްޓާލިއެވެ. ކުދި ކުދި އިނގިލިތައް ބޮމުން ބޮމުން ފައިޒަންއާއި ދިމާލަށް ބަލަން ޔަލާ އޮތެވެ.

“ވާއު. ތީނަ ހާދަ މޮޅޭ ދޯ؟ މިއީ އަދި ފުރަތަމަ ދަރިފުޅު. ކުޑަކޮށް އާ ވާނެ ހެހެ…” ބޯ ކަހާލަމުން ޔޫއާ ބުނެލިއެވެ.

“ހެހެ. އަހަރެންގެ ނެތް ކުއްޖެއް އެކަމަކު”

“ދެން؟ ކިހިނެތް ހުއްޓުވަން އެނގުނީ؟”

“ހަހަ. އަހަރެން މިއީ ކުޑަކުދިންގެ ޑަކްޓަރެކޭ. މިއައީ ޔަލާގެ ހާލު ބަލައިލަން” ހީނލަމުން ފައިޒަން އެހެން ބުނެލުމުން ކުރިއަށް ދިޔުމަށް ޔޫއާ އިޝާރާތް ކޮށްލިއެވެ. ޔަލާގެ ހާލު ބަލާ ނިމުމުން އޭނާ ރަނގަޅު ކަމުގައިވެސް ފައިޒަން ބުންޏެވެ.

“ކޮބާތަ ޔޫއާގެ ފިރިމީހާ؟ ފުރަތަމަ ދިމާވި ދުވަހު ބަނޑުބޮޑުވެ ހުރީ. އެކަމަކު އެދުވަހުވެސް ހުރީ އެކަނި. މިއަދުވެސް އެކަނި.” ފައިޒަންއާއި ދިމާލަށް ބަލަން އޮވެ، ދޫނެރެލަ ނެރެލަ އޮތް ކުޑަކުޑަ ޔަލާގެ އަތުގައި ހިފާލަމުން އޭނާ އެހިއެވެ.

“ވަރިވެފަ…” ޔޫއާގެ ޖަވާބު އިވި ފައިޒަންގެ އަނގަ ކުނި ވިއެވެ. އެހެން އެހުނީތީ ލަދުގަނެ، ދެރަވިއެވެ. “ސޮރީ…”

(ނުނިމޭ)

ދިހަވަނަބައިގެ ތެރެއިން:

“ބައްޕީ… ޒަކޫ ބޭނުން ކަމަކު ކިޔަންން…” ނިކްޔާންގެ ފައިގައި އެލިގަންނަމުން ޒާކު ބުނެލީ މައުސޫމް ގޮތަކަށެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.