ވަފާތެރިމަވީމޭ 2 (10)

“ކޮބާތަ ޔޫއާގެ ފިރިމީހާ؟ ފުރަތަމަ ދިމާވި ދުވަހު ބަނޑުބޮޑުވެ ހުރީ. އެކަމަކު އެދުވަހުވެސް ހުރީ އެކަނި. މިއަދުވެސް އެކަނި.” ފައިޒަންއާއި ދިމާލަށް ބަލަން އޮވެ، ދޫނެރެލަ ނެރެލަ އޮތް ކުޑަކުޑަ ޔަލާގެ އަތުގައި ހިފާލަމުން އޭނާ އެހިއެވެ. “ވަރިވެފަ…” ޔޫއާގެ ޖަވާބު އިވި ފައިޒަންގެ އަނގަ ކުނި ވިއެވެ. އެހެން އެހުނީތީ ލަދުގަނެ، ދެރަވިއެވެ. “ސޮރީ…”

(10 ވަނަ ބައި)

“އެ އޯކޭ ވާނެ. އަހަރެން އޭނަ ގެއްލިގެން ދެރައެއްވެސް ނުވޭ މިހާރު. ކައިވެނި ކުރީވެސް އާއިލާ މަޖުބޫރު ކޮށްގެން. ވަރިވީ އޭނާ ބޭވަފާތެރިވެގެން” އިނގިލިތަކާއި ކުޅެން އިނދެ ޔޫއާ ވާހަކަ ދެއްކިއެވެ. އެހެން ބުނި ނަމަވެސް އެއީ ކަނޑަ އެޅިގެން ދޮގެކެވެ. ނިކްޔާން ނެތް ކަމުގެ ހިތާމަ އަދިވެސް އޭނާ ދަނީ ކުރަމުންނެވެ. އެއީ މަޖުބޫރު ކައިވެންޏެއް ނަމަވެސް ނިކްޔާންދެކެ އޭނާ ނިހާޔަތައް ލޯބިވިޔެވެ.

“އެއްވެސް ކަހަލަ އެހީއެއް ބޭނުމިއްޔާ ގުޅާލާ އިނގޭ؟ މިއީ ދެން ގާތް އެކުވެރިޔެއްގެ ގޮތުގައި ދެކިލާ” ހީނލަމުން ފައިޒަން ބުނެލިއެވެ.

***މިހާރު***

ޔޫއާ އެނބުރި ސިޓިންގ ރޫމަށް ދިޔަ އިރު ޔަލާ އުފާވެލާފައި ފައިޒަންއާއި އެކު ކުޅެން އިނެވެ. އެމަންޒަރު ފެނި ޔޫއާގެ ހިތް އުފަލުން ނަށާލިއެވެ. އެއީ ދާއިމީ ހައްލެއް ނޫން ކަން އޭނާއަށްވެސް އެނގެޔެވެ. ނަމަވެސް މިވަގުތަށް އެއީ އެންމެ ރަނގަޅު ގޮތް ކަމުގައި އޭނާ ނިންމިއެވެ.

“ކޮބާ ބައްޕިވެސް އެ އިނީ އައިއްސައެއްނުން؟ އަވަހަށް ހިނގާ ދާން ކާން ދަރިފުޅޫ” ޔަލާ ގާތުގައި އިށީންނަމުން ޔޫއާ ބުނެލިއެވެ.

“މިއަދު ދާނީ ރެސްޓޯރެންޓަށް ކާން. ބާގާ ކާން ބޭނުމީ. ޕުލީޒް ބައްޕީ” ފައިޒަންގެ ކޯތާފަތުގައި ފިރުމާލަމުން ޔަލާ މައުސޫމް ގޮތަކަށް ބުންޏެވެ.

“ހެހެ ދަރިފުޅު ބޭނުން ގޮތެއް ހަމަ. ދޭ އަވަހަށް މަންމިއާއި އެކު ތައްޔާރުވެލަން” ފައިޒަންގެ ޖަވާބާއި އެކު ޔަލާ މަޑުމަޑުން “ޔޭ” އޭ ބުނެލިއެވެ. އަދި ޔޫއާގެ އަތުތެރެއަށް ވަނެވެ.

“މަންމީ އަވަހަށް ހިނގާ ތިއްތިވާން” ޔަލާގެ ދެލޮލުގައި ވިދަމުން ދިޔަ އުފާވެރިކަން ފެނި ޔޫއާގެ ހިތުގައި އުފާވެރިކަމުގެ ވިންދެއް ޖަހާލިއެވެ.

ސިޓިންގ ރޫމު ތެރޭގައިވީ ފަންކާގެ އަޑާއި ޓީވީގެ އަޑު އެކަންޏެވެ. ބިންމަތީގައި ކުޅޭ އެއްޗެހި ހިފައިގެން އިން ޒާކު އިރު އިރުކޮޅުން ޓީވީއަށް ބަލައިލައެވެ. ކުޅެން އިން ‘ބުލޮކްސް’ އިން އޭނާ އިނީ ކޮންމެވެސް އެއްޗެއް ހަދާށެވެ. އެހަދަން އިން އެއްޗަކަށް އޭނާގެ ހުރިހާ ސަމާލު ކަމެއްވަނީ ހުއްޓިފައެވެ.

ސޯފާގައި އިން ނިކްޔާން އިނީ ފުން ޙިޔާލެއްގައެވެ. އޭނާގެ ހަށިގަނޑުގައި ތަތްވެގެން އިން ޒުކާއާއި މެދު އެއްވެސް ހިޔާލެއް ފިކުރެއް އޭނާގެ ނެތެވެ. ވިސްނެމުން ދިޔައީ މިއަދު ޔޫއާ އާއި އެކު ފެނުން ޒުވާނާއާއި މެދުއެވެ. އެއީ ކާކު ހެއްޔެވެ؟ ޔޫއާގެ ލޯބިވެރިޔާ ހެއްޔެވެ؟ ނުވަތަ އެކުވެރިއެއް ހެއްޔެވެ؟ އެކޮންމެ މީހަކަށް ވިޔަސް މިހާރު ހަގީގަތުގައި އޭނާއަށް އެކަމާ ބެހޭ ގޮތުން އެއްވެސް އެއްޗެއް ބުނެވޭކަށް ނެތެވެ. ނަމަވެސް ޔޫއާއަށްޓަކައި އެ ހިތުގައިވީ ލޯބީގެ ސަބަބުން އެމީހަކަށްޓަކައި ނިކްޔާންގެ ހިތުގައި ނަފުރަތު އުފެދުނެވެ.

“ބައްޕީ… ޒަކޫ ބޭނުން ކަމަކު ކިޔަންން…” ނިކްޔާންގެ ފައިގައި އެލިގަންނަމުން ޒާކު ބުނެލީ މައުސޫމް ގޮތަކަށެވެ. ޒާކުގެ އަޑަށް ޙިޔާލު ތަކުގައި ޣަރަގު ވަމުން ދިޔަ ނިކްޔާންއަށް ހަމަ ބިމަށް އާދެވުނެވެ. ޒާކު އެއްޗެކޭ ހިތަށް ނާރާނެ ގޮތަކަށް ޒުކާ ދުރުކޮށްލަމުން ޒާކު އުރާލިއެވެ.

“ކީކޭ ދޫނީ؟” ޒާކުގެ ކޯތާފަތުގައި ނިކްޔާން ތުން ޖައްސާލިއެވެ.

“މިހާރު ޒަކޫގެ ރައްޓެހި ރިހާންއަށްވެސް ކޮއްކޮއެއް ލިބެން އެއުޅެނީ. ބައްޕީ. ޒަކޫވެސް ކޮއްކޮއެއް ބޭނުން” ތުންކޮޅު އޮޅާލަމުން ޒާކު ބުނެލި ޖުމްލައާއި އެކު ނިކްޔާންގެ އަނގަ ކުނިވިއެވެ.

“ދަރިފުޅު ކޮޮއްކޮއެއް ބޭނުންތަ؟ ހަމަ ޖައްސާލާ ދޫނީ. އިންޝާ ﷲ ވަރަށް އަވަހަށް ދަރިފުޅަށް ކޮއްކޮއެއް ހޯދަ ދޭނަން އިނގޭ؟” ޒާކުގެ ކޮލުގައި ތުން ޖައްސާލަމުން ޒުކާ އެހެން ބުނެލުމާއި އެކު ނިކްޔާން އޭނާއަށް ‘ސައިޑް އައި’ އެއް ދިނެވެ.

“ޒުކާ މޮޔަވީތަ؟” ޒާކުއަށް ނީވޭނެ ވަރަށް ނިކްޔާން މަޑުމަޑުން ބުނެލިއެވެ.

“ކިހިނެތްތަވީ؟ ޒަކޫ އެބުނީނުން ކޮއްކޮއެއް ބޭނުމޭ؟ ކޮން ކަހަލަ ކޮއްކޮއެއްތަ ޒަކޫ ބޭނުމީ؟ އަންހެން ކޮއްކޮއެއްތަ؟ ފިރިހެން ކޮއްކޮއެއްތަ؟”

ޒުކާގެ ސުވާލާއި އެކު ނިކްޔާން ޒާކު ބިންމަތީގައި ބައިންދާލިއެވެ. އަދި ޒުކާގެ އަތުގައި ހިފާ ދަމަމުން ކަހަލަ ގޮތަކަށް ގޮސް ކޮޓަރިއަށް ވެއްދިއެވެ.

“އޯހް ބޭބް ހާދަ ރުޅިއައީ؟”

“ކޮން ‘އޯހް ބޭބް’ އެއްތަ؟ ޒުކާ މޮޔަވީތަ؟ އަހަރެން ބޭނުމެއް ނޫން އިތުރު ކުއްޖެއް ހޯދާކަށް. އެހާ ލޯބިން އުޅޭ ބައެއް ވިއްޔާ މިއީ” ނިކްޔާން ހުރީ ވަރަށް ހިތްހަމަ ނުޖެހިފައެވެ.

“ތިއީ ހާދަ އަމިއްލަ އެދުން ބޮޑު ބައްޕިއެކޭ ދޯ؟ އަހަރެންދެކެ ފޫހިވާތީއޭ ކިޔާފައި ނުޖެހޭ ދޯ ޒަކޫއަށް އޭގެ ސަބަބުން އަނިޔާ ލިބޭކަށް. ޒަކޫ ކޮއްކޮއެއް ބޭނުމިއްޔާ ޒަކޫއަށް ކޮއްކޮއެއް ވެސް ދޭން ޖެހޭނެ ދޯ؟ އެންމެ ކޮއްކޮއެއް ކީއްކުރަން؟ 14 ކޮއްކޮ ބޭނުމޭ ބުންޏަސް ހަމަ ދޭން ޖެހޭނީ” ހަރަމް ބަނދެލަމުން ޒުކާ ބުނެލިއެވެ.

“ވާހާ. ހާދަ ހެއްވައޭ ދޯ؟ ކަލޭ ތިއުޅެނީ ކޮންމެހެން ޒާކުއަށްޓަކައި، ޒާކުއަށް ކޮއްކޮއެއް ދޭކަށްވެސް ނޫން. ކަލޭ ތިއުޅެނީ ކަލޭގެ އަމިއްލަ ވަހުޝީ ހެދުންތައް ފުއްދޭތޯ”

“އާނ. ތިވެސް މުޅިއަކުން ދޮގެއް ނޫން. އެހެން ނޫނަސް ކޮބާ މައްސަލައަކީ؟ މިއީ ދެމަފިރިންނޭ. ހުއްދަ ދެމީހުން މިއީ. ނިކް މާ ފޯރި ހުރި މި ގުޅުން ހަރާން އިރު. ހުއްދަ މީހުން ކަމު ނުދަނީތަ؟” ޒުކާ ކޮށްލި ސުވާލުން ނިކްޔާން އަތް ހިއްލާލީ ޒުކާގެ ހަށިގަނޑުގައި ޖެހުމަށެވެ. ނަމަވެސް އެވަގުތު ޒާކު ދޮރު ހުޅުވާލިއެވެ.

(ނުނިމޭ)

އެގާރަވަނަބައިގެ ތެރެއިން:

“ދަރިފުޅު ނުކައިތަ ތީނީ އަދިވެސް…؟” ސޯފާގައި ކުރުގެޅިލައިގެން އޮތް އިލައިކާ ފެނި ހާސްވެފައި އިޔާލް އެހިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.