ވަފާތެރިމަވީމޭ 2 (2)

“އަޅެ ކުރިން ވިޔަސް ގުޅުމެއް ހިންގާފަ އޮތީމަ ދޯ ޒުކާ ބަނޑުބޮޑުވީި އެ؟ ދެން ދަރިފުޅު ޒުކާއާއި ކައިވެނި ކުރޭ. އެހެން ނޫނީ ޒުކާގެ އެ ދަރިފުޅުވެސް ބައްޕަނެތް ކުއްޖަކައްވާނީ” މިހެން ބުނެ މާޔާވެސް ގޮސް ވަނީ ކޮޓަރިއަށެވެ.

(5 އަހަރު ފަސް)

(2 ވަނަ ބައި)

ދިވެހިރާއްޖޭގެ ޤައުމީ ޔުނިވަރސިޓީގެ ދަސްވެނިވުމުގެ ރަސްމިއްޔާތު ބޭއްވިގެން ދިޔަ މާލަމަކީ ފެންނަފެނުމަށް ބަހާރު މޫސުމުގެ ފިނިކަން އިޙްސާސްވާ ފަދަ ހިތްގައިމު ތަނެކެވެ. މުޅި މާލަން ވަނީ ޔުނިވަރސިޓީގެ ރަސްމީ ކުލަތަކާއި، ހުދުކުލައިގެ މާތަކުން ޒީނަތްތެރި ކޮށްފައެވެ. ސީލިންގުން ތިރިއަށް އެލުވާލާފައިވާ ޖަަންތީރުތަކުން ފެންނަނީ ކާމިޔާބީގެ އުޖާލާކަމެވެ. ދަސްވެނިން ތިބީ އެކުދިންގެ ކަޅު ކުލައިގެ ގައުންތަކާއި، މުށި ކުލައިގެ އަންނައުނުގައި ނުހަނު ފިސާރި ފަރިކޮށެވެ. މުޅި މާލަމުގައި ހިފާލާފައިވަނީ މީރުވަސްދުވާ ސެންޓާއި، ތާޒާ މާތަކުގެ ވަހެވެ. ކޮންމެ ދަސްވެންޏެއްގެ މޫނުމަތިންވެސް ފެންނަނީ އެތައް އަހަރެއްގެ ބުރަ މަސައްކަތަށްފަހު ލިބުނު ފަޚުރުވެރި ކާމިޔާބީގެ ހިނިތުންވުމެވެ.

ޖަލްސާގެ ރަސްމީ ބައި ފެށިގެން ދިޔައީ ކީރިތި ޤުރުއާނުގެ ބަރަކާތުންނެވެ. ކިޔެވުންތެރިޔާގެ ހިތްގައިމު އަޑުން މުޅި މާލަން ގުގުމާލިއިރު، އެ އަޑުގެ ސަބަބުން ހިތްތަކަށް މަޑުމޮޅިކަމާއި ރޫޙާނީ ދިރުމެއް ލިބިގެންދިޔައެވެ. ޤުރުއާނުގެ ބަރަކާތަށްފަހު، ރަސްމިއްޔާތުގެ އެންމެ މުހިންމު ވަގުތު އައިސް ޖެހުނެވެ. އެއީ ތަޢުލީމީ ޙަޔާތް ނިންމާލި ކުދިންނަށް ސަނަދާއި އިނާމު ދިނުމުގެ ވަގުތެވެ. ސްޓޭޖްމަތީގައި ހުންނެވި އިޢުލާންކުރާ ފަރާތުން، ވަރަށް އަސަރުގަދަ އަޑަކުން ނަރުސްކަމުގެ ދާއިރާއިން ދަސްވެނިވި ދަރިވަރުންގެ ނަންތައް ގޮވާލަން ފެށިއެވެ. އިންސާނިއްޔަތަށް ޚިދުމަތްކުރުމުގެ މަތިވެރި އަޒުމުގައި ކިޔެވި މި ކުދިންނަށް މަރުޙަބާ ކިޔުމަށް މުޅި މާލަން ތައްޔާރުވެފައި އޮތީ ނުހަނު ޝައުޤުވެރިކަމާ އެކުގައެވެ.

އެވަގުތު މުޅި މާލަމުގައި ގުގުމާލީ “އައިޝަތު ޔޫއާ ހުމައިދު” ގެ ނަމެވެ. ޔޫއާގެ ނަން އިވުމާއެކު އޭނާގެ ހިތުގެ ތެޅުން އަވަސްވެ، ފަޚުރުވެރިކަމާއެކު ސްޓޭޖާ ދިމާއަށް ހިނގައިގަތެވެ. ނަރުސްކަމުގެ ދާއިރާއިން މަތީ ވަނަތަކެއް ހާސިލުކޮށް، ދަސްވެނިވި ކަމުގެ ސަނަދާއި ރަން މެޑަލް އޭނާގެ އަތަށް އެރުވުނު ވަގުތަކީ އޭނާގެ ޙަޔާތުގައި އައި އެންމެ އުފާވެރި ސިކުންތެވެ.

ޖަލްސާ ނިމި، މާލަމުން ބޭރަށް ނުކުތްއިރު ޔޫއާގެ އިންތިޒާރުގައި މުޅި ޢާއިލާ ތިއްބެވެ. އެންމެ ކުރީގައި ހުރި ޔަޒީދާގެ ލޮލުން އައި އުފާވެރިކަމުގެ ކަރުނައާއެކު ޔޫއާގެ ގައިގައި ބައްދާލިއެވެ. ހުމައިދު ފަޚުރުވެރިކަމާއެކު ޔޫއާގެ ބޮލުގައި ބޮަސްދީ މަރުޙަބާ ކިޔެވެ. ޔޫއާންއާއި ހިދާޔާވެސް މާބޮނޑިތަކާއެކު އައިސް ޔޫއާއަށް ތަހުނިޔާ ކިޔެވެ. އެންމެ ފާހަގަކޮށްލެވުނީ، އުމުރުން 6 އަހަރުގެ ހިނާޔާއާއި، ޔޫއާގެ އަމިއްލަ ލޯބިލޯބި 5 އަހަރުގެ ދަރިފުޅު ޔަލާ އެވެ.

“މަންމީ މަރުޙަބާ!” އޭ ބުނެ ޔަލާ ދުވެފައި އައިސް ޔޫއާގެ ފައިގައި ބައްދާލި ވަގުތު، ޔޫއާގެ ހުރިހާ ވަރުބަލިކަމެއް ފިލައިގެން ދިޔަ ކަހަލައެވެ.

“ޖަޒާކައްﷲ ޙައިރަން މަންމި ފުރާނަ ކޮޅު” ކުޑަކުޑަ ޔަލާ އުރާލަމުން އޭނާގެ ކޯތާފަތުގައި ތުން ޖައްސާލަމުން ޔޫއާ ބުނެލިއެވެ. އެއީ ޔޫއާގެ ދަރިފުޅު ޔަލާއެވެ. އެއީ ޔޫއާގެ ދިރިހުރުމެވެ. ލޮލުގެ ކޮއެއެވެ. މިއަދު މިހިސާބައް އައުމަށް އޭނާއަށް ހިތްވަރުލައިދިން ބައިވެރިޔާއެވެ.

އުމުރުން 5 އަހަރުގެ ޔަލާ ހީވަނީ ޔޫއާގެ ސިފަ ނަކަލު ކޮށްގެން ހުރި ހެންނެވެ. ހަމަ އެދެލޮލެވެ. އެތުންފަތެވެ. އެ ނޭފަތެވެ. ޔޫއާގެ ވާތު ކޯތާފަތުގައި އިން ކަޅު ތިލަވެސް ޔަލާގެ ކޮލުގައި އިނެވެ. ދެމައިން އެހާ ވެސް ވައްތަރެވެ. ޔޫއާ ލައިގެން ހުރި މުށި ކުލައިގެ ‘ސިލްކް’ އަބާޔާގެ އާއި އެއްވައްތަރު ކޮށްފައި ޔަލާވެސް ލައިގެން ހުރީ ހަމަ އެފޮތީގެ ހެދުމެކެވެ. ތަފާތަކީ ޔަލާގެ ބަނޑާއި ދިމާލުގައި އިން މުށި ކުލައިގެ މަލެވެ. އެކުއްޖާގެ ބޮލުގައިވެސް ހަމަ އޭގެ މަލެއް އިނެވެ.

“ކޫއްތަ ޖެހޭނެ އައިސް ކްރީމް ގަނެދެން އިނގޭ؟” އެވަގުތު ކުރިއަށް ޖެހިލަމުން ހިނާޔާ ބުނެލީ އަމުރުވެރި ގޮތަކަށެވެ. ކުޑަކުޑަ ހިނާޔާވެސް ހުރީ ޔަލާ ލައިގެން ހުރި ކަހަލަ ހެދުމެއް ލައިގެންނެވެ.

“ހެހެހެ އޯކޭ އޯކޭ. ކޫއްތަ އައިސް ކްރީމް ގަނެދޭނަމޭ އެންމެނަށްވެސް އިނގޭ؟ ހިނގާ ދެން ފޮޓޯ ނަގަމާ؟” މުޅި ޢާއިލާ އެކުގައި ފޮޓޯ ނަގަމުން ދިޔައިރު، އެ މޫނުތަކުން ފެންނަނީ ނުހަނު ބޮޑު އުފާވެރިކަމެކެވެ. އެއީ ލޯތްބާއި ކާމިޔާބީން ފުރިގެންވީ ތާރީޚީ ރެއެކެވެ.

ޔަލާއާއި ހިނާޔާ ގޮވައިގެން ޔޫއާންއާއި ހިދާޔާ ދުރަށް ޖެހިލީ ޔޫއާއާއި މަންމަމެން ވާހަކަ ދައްކާލަން ފުރުސަތެއް ދިނުމަށެވެ. ޔަޒީދާ އުފަލާއި އެކު ޔޫއާގެ ހަށިގަނޑުގައި ބައްދާލި އިރު ފަހަތުގައި ހުރި ހުމައިދުގެ ލޮލުގައިވެސް ވިދަމުން ދިޔައީ އުފާވެރިކަމުގެ ކަރުނައެވެ.

“ދަރިފުޅާ. މިއަދު ބައްޕަ ވަރަށް އުފާ ވެއްޖެ. ކިޔެވުމަކީ އަންހެން ކުދިންނަށްވެސް ވާނޭ ކަމެއްކަން މިއަދު ދަރިފުޅު ހާމަ ކޮށްދީފި. މާޝާ ﷲ މިއަދު ބައްޕަ ވަރަށް ފަޙުރުވެރި ވެއްޖެ. ހިތައް އަރާ އޭރުވެސް ޔޫއަށް ކައިވެނި ކުރުވަން މަޖުބޫރު ނުކޮށް ކިޔަވަން ފުރުސަތު ދެވުންނަމައޭ. އެ ނުލަފާ ނިކްޔާންގެ ސަބަބުން ކިހާ ބޮޑު ވޭނެއް ދަރިފުޅު ތަހައްމަލު ކުރީ؟ މީ އަހަރެންގެ ކުށް. އަހަރެން ޔޫއަށް ކައިވެނި ކުރަން މަޖުބޫރު ނުކުރުވިނަމަ މިހެން ނުވީސް…” އަދިއަދަައް ދާން ދެންވެސް ހުމައިދު ދިޔައީ އެކަމުގެ ހިތާމަ ކުރަމުންނެވެ.

(ނުނިމޭ)

ތިންވަނަބައިގެ ތެރެއިން:

“ޔަލޫ އެއީ އަހަރެންގެ ފުރާނަ. ޔަލޫއާއި ނުލާ މިކަމެއް ޔޫއަކަށްވެސް ނުވީސް” ދެލޯ ފުހެލަމުން ޔޫއާ ބުނެލިއެވެ. ކުޑަކުޑަ ޔަލާއާއި ދިމާލަށް ބަލައިލީ އިރު ޔޫއާގެ ލޮލުގައިވީ އިންތިހާ ލޯތްބެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.