ވަފާތެރިމަވީމޭ 2 (1)

(1 ވަނަ ބައި)

ދެލޮލުން ކަރުނަ ފުލެހަމުން ދުވެފާ ކަހަލަ ގޮތަކައް ގޮސް ޔޫއާ އެއްޗެހިތައް ޕެކް ކުރަން ފެށިއެވެ. އެއްވެސް ތަރުތީބެއް ނެތި ހުރިހާ އަންނައުނުތައް ދަބަހައް އަޅާލަމުން އޭނާ ގުޅީ ޔޫއާންއަށެވެ. ތިންވަނަ ރިންގުގައި ޔޫއާން ފޯނު ނެގިއެވެ. “ކީކޭ ކޮއްކޯ؟ ހަމަ ގުޅަން އުޅެނިކޮށް ތިގުޅީ. ދޮންބެ މާލޭގަ މިހުރީ. މިފޭބީ ލިފްޓުން އާދެބަލަ ގޭ ދޮރު ހުޅުވަން” ޔޫއާން ވާހަކަ ދެއްކިއެވެ.

“ދޮންބޭ. ޔޫ ރަށަށް ގެންދޭ. ހެޔޮނުވާނެ. ދެން ޔޫއަކަށް ކެތެއްނުވާނެ…” ރޮވިފާ ވާހާލުގާ ޔޫއާ ބުނެލިއެވެ.

“އެއީ؟ ކިހިނެތްވީ؟ ބުނެބަ؟ ކީއްވެ ތިރޮނީ؟” ޔޫއާން ވަަރަށް ހާސް ވެއްޖެއެވެ.

“ޔާން… ދޮންބޭ… ޔާން…” ޔޫއާއަކަށް އިތުރަށް އެއްވެސް އެއްޗެއް ނުބުނެވުނެވެ. ހުރި ތަނަށް ދެމިގެން ދިޔަ ވަގުތުގާ ގޭ ދޮރު ހުޅުވާލި އަޑުވެސް އިވުނެވެ. ގެއަށް ވައިން ޔޫއާންއަށް ވަދެވުން އިރު ދޮރު ހުޅުވާފައި ހުރުމުން ވަރަށް ބޮޑު ކަމެއް ވެއްޖެޔޭ އޭނާގެ ހިތް ބުނެލިއެވެ. ބަދިގެ ތެރޭގައި ޔޫއާ ނެތުމުން ދެން އޭނާވަނީ ކޮޓަރިއަށެވެ. “ޔޫއާ!”

ބިންމަތީގައި ހޭނެތިފައި އޮތް ލޯބިވާ ކޮއްކޮ ފެނި ޔޫއާންގެ ހިތް ތެޅިގަތެވެ. ފޮއްޓައް އެއްޗެހި އަޅާފައި ހުރިތަން ފެނުމުން އޭނާ ވަކިން ހާސްވިއެވެ. ނިކްޔާން ޔޫއާ ވަރި ކުރީ ހެއްޔެވެ؟

“ޔޫއާ؟ އޭ. ބަލަ. ކޮއްކޯ؟” ޔޫއާގެ މޫނުގައި މަޑުމަޑުން ޖަހާލަމުން ޔޫއާން ގޮވާލިއެވެ.

ލިފްޓައް ނޭރިފައި ހުރި ނިކްޔާންގެ ދެލޮލުން ކަރުނަ އަންނަމުން ދިޔައެވެ. ޔޫއާ ގެއްލެން އުޅޭ ކަމުގެ ފެހި ސިގުނަލް މިއަދު އޭނާއަށް ލިބިއްޖެއެވެ. އެންމެންތައް ތޮއް ޖެހިފައި ވީ އިރު ހުރިހާ ލިފްޓުތައްވެސް ހުރީ އެންމެ މަތީ ބައިބައިގައެވެ.

“ތިއީ ދެން ކޮން ކަމެއްތަ ނިކް؟ ޔޫއާ ދޫކޮށްލާ. މަށާ ކައިވެނި ކުރޭ…” ނިކްޔާން ހަރަކާތްތަކައް ބަލަން އިރުކޮޅަކު ހުރެފައި ޒުކާ އައިސް ބުނެލިއެވެ. ޒުކާގެ ވާހަކަ އިވި ނިކްޔާން ދަތްކުނޑިވިކާލަމުން ފަހަތް ބަލައިލިއެވެ.

“ކަލޭ… ކަލޭ މަގޭ މުޅި ދިރިއުޅުން ތި ހަލާކު ކޮށްލީ. ދަން ޖެހި މަރުވަން ޖެހުނަސް މަ ކަލެއަކާ ނީންނާނަން” ކަރުނުން ފުރިފައިވީ ނިކްޔާންގެ ދެލޮލުގައި ޒުކާއަށްޓަކައި ފެންނަމުން ދިޔައީ އިންތިހާ ނަފުރަތެވެ.

ޔޫއާ ހޭނާރައިގެން ކަންބޮޑުވެފައި އިން ޔޫއާން އުޅުނީ ނިކްޔާންއަށް ގުޅާށެވެ. އޭނާގެ ހަރަކާތްތައް ހުއްޓުނީ ޔޫއާގެ ފިނިވެފައިވީ އަތުން ޔޫއާންގެ އަތުގައި ހިފުމުންނެވެ. “ދޮންބޭ…”

“ޔެސް ޔޫ… ކިހިނެތްތަވީ؟ މަޑު ކުރޭ. މިގުޅަނީ ނިކްޔާންއަށް” އަވަސް އަވަހަށް ޔޫއާން ބުނެލިއެވެ.

“ނޫން… ނުގުޅާތި…”

“އެއީ؟ ކިހިނެތްވީ؟”

“ޔާން… ޔާން ޔޫއަށް ބޭވަފާތެރިވީ… އެކުއްޖާ އެ އިނީ މިހާރު ޔާންގެ ދަރިއަކަށް ބަލިވެ…” ޔޫއާއަށް އަނެއްކާވެސް އަޑުން އަޑު ނަގާ ރޯން ފެށުނެވެ. އެވަގުތު ވެގެން ދިޔައީ ނިކްޔާންއަށް ގެއަށް ވަދެވުނު ވަގުތަށެވެ. ދޮރު މަތީގައި ހުރި ނިކްޔާން ފެނި ޔޫއާންއަށް ގޮށް މުއްކަވާލެވުނެވެ.

“ޔޫއާން…” ޔޫއާންގެ މޫނުމަތީގައިވީ އަސަރު ތަކުން އޭނާއަށް މިހާރު އެވާހަކަ އެނގިއްޖެކަން ނިކްޔާންއަށް އެނގި ޔަގީންވިއެވެ. ޔޫއާގެ ހަށިގަނޑު އެނދުމަތީގައި ބާއްވާލަމުން ޔޫއާން ގޮސް އޭނާގެ ކަންކަށިމަތީގައި ޖެހިއެވެ.

“ހުރި ލަދު ހަޔާތް ކުޑަކަން ބަލާބަލަ. ނަހަލާލައް އެހެން އަންހެން ކުއްޖަކު ބަނޑުބޮޑު ކޮށްލި އިރު އަހަރެންގެ ކޮއްކޮ މަތިން ކަލޭ ހަނދާންވެސް ނެތް ދޯ؟ އާނ ދެން މަ ގަބޫލު ކުރަން މިއީ މަޖުބޫރު ކައިވެންޏެއްކަން. ކަލޭގެ އެކްސްދެކެ ތިހާ ލޯބި ވަންޏާ ކީއްކުރަން މަގޭ ކޮއްކޮއަށް އިނީ؟ ކީއްކުރަން މަގޭ ކޮއްކޮ ބަނޑުބޮޑު ކޮށްލީ؟ ތިއީ ހަމަ ފައްކާ ހަރުފައެއް!” އައިސްފައި ހުރި ރުޅިން ޔޫއާންގެ ހަށިގަނޑު ތުރުތުރުލަމުން ދިޔައެވެ.

“ދޮންބޭ.. ރުޅި ނާދެބަލަ. އަހަރެން ދައްކާ ވާހަކަ އަޑު އަހާބަލަ. ހެޔޮނުވާނެ..” ނިކްޔާންއަށް އަނެއްކާވެސް ރޮވުނެވެ.

“ނޫޅެން އަޑު އަހާކައް. ދެން އަހަރެމެން ބައްދަލު ކުރާނީ ކޯޓުން. ހަނދާން ކުރާތި. މަގޭ ކޮއްކޮ ހޯދަން ދެން ދުވަހަކުވެސް އައިސްގެން ނުވާނެ. މަގޭ ކޮއްކޮގެ ބަނޑުގަ އޮތް ދަރިފުޅައްވެސް ހަނދާނެ ގޮތް އިނގޭނީ ހަމަ ކޮއްކޮއަށް. ވައްޓާލަން ބޭނުމީއާ ވައްޓާލަންވީ. ކޮއްކޮ އެ ދަރިފުޅު ވިހޭ ނަމަވެސް، އެއީ ކަލެއަށް ގުޅުން ހުރި ކުއްޖަކައް ނުވާނެ. ސާފު ރީތި ދިވެހި ބަހުން މިބުނީ”

ޔޫއާ ގޮވައިގެން ޔޫއާން އެގެއިން ނިކުން ފަހުން ނިކްޔާންއަށް ޔޫއާ ފެނުނީ ހަމަ ޔޫއާން ބުނިހެންމެ، ކޯޓުންނެވެ. އެދުވަހުވެސް ނިކްޔާން ގިނަ އާދޭސްތަކެއް ކުރިއެވެ. ނަމަވެސް އޭނާ ކުރި ކޮންމެ އާދޭހަކައް ޔޫއާން ދިނީ އަތުގެ ހަމަލާއެވެ. އޭނާގެ ރޭވުން ކާމިޔާބު ވުމުން ޒުކާ ހުރީ ވަރަށް އުފަލުންނެވެ. ނަމަވެސް ޒުކާގެ ސަބަބުން އެހަލާކުވީ ކިތައް ހިތް ހެއްޔެވެ؟

ރަށަށް އައިސް ގެއަށް ވައިން ނިކްޔާންގެ ލޮލުގައި އަދިވެސް ވީ ކަރުނައެވެ. ސޯފާގައި މާޔާއާއި ނިހާލް ތިއްބެވެ. ނިހާލްގެ މޫނު މަތީގައިވީ ރުޅިވެރިކަމެވެ. މާޔާގެ މޫނުމަތީގައިވީ ލަދުވެތި ކަމެވެ.

“މަންމާ… ބައްޕާ…” ނިކްޔާން ރޯން ފެށީ ކުޑަ ކުއްްޖެއް ފަދައިންނެވެ.

“ކަލޭ މަށަކަށް ބައްޕަ ކިޔާނެ ކަމެއް ނެތް. ހުރި ލަދު ހަޔާތް ކުޑަކަން ބަލާބަލަ. އަހަރެމެންނައް ވަގައް އެ ޒުކާ ގޮވައިގެން ޒިނޭގެ އެނދުމަތީގައި އޮތް އިރު އަހަރެމެން މަތިން ހަނދާނެއް ނެތެއްނުން؟ ދެންވެސް އަހަރެމެން މަތިން ހަނދާން ކުރާނެ ކަމެއް ނެތް” ނިހާލް އޭނާ ބުނަން ބޭނުންވީ ބަސްތައް ބުނެ ނިންމާފައި ގޮސް ކޮޓަރިއަށް ވަދެ ‘ބަން’ ކިޔާފައި ދޮރު ޖެހިއެވެ.

މާޔާ އިސްޖަހާލީ ލަދުންނެވެ. ހަމަ ޔަގީނުންވެސް އޭނާ މިއަދު ވަރަށް ލަދުގަނެއްޖެއެވެ. “މަންމަވެސް ތިހުރީ އަޅުގަނޑުދެކެ ރުޅިންތަ؟” ލަސް ލަހުން ގޮސް ނިކްޔާން މާޔާގެ ފައިބުޑުގައި އިށީނެވެ. “މަންމާ… މަންމަގެ މަޢާފް އަޅުގަނޑައް ދެއްވާ… މަންމަގެ ތި ފައިތިލަ ދަށުގަ ސުވަރުގެވެސް ވީ.. ހެޔޮނުވާނެ މަންމާ… އަޅުގަނޑު މަންމަ ބުނި ކަމެއް ކުރާނަން. އަޅުގަނޑައް މަޢާފް ކުރޭ… އެކަމަކު ބުނަން؟ ހަމަ ހުވާ… ޔޫއާއާއި ކައިވެނި ކުރިފަހުން ޒުކާއާއި އެކު ގުޅުމެއް ނުހިންގަން…” ނިކްޔާން ރޮމުން ރޮމުން ވާހަކަ ދެއްކިއެވެ.

“އަޅެ ކުރިން ވިޔަސް ގުޅުމެއް ހިންގާފަ އޮތީމަ ދޯ ޒުކާ ބަނޑުބޮޑުވީި އެ؟ ދެން ދަރިފުޅު ޒުކާއާއި ކައިވެނި ކުރޭ. އެހެން ނޫނީ ޒުކާގެ އެ ދަރިފުޅުވެސް ބައްޕަނެތް ކުއްޖަކައްވާނީ” މިހެން ބުނެ މާޔާވެސް ގޮސް ވަނީ ކޮޓަރިއަށެވެ.

(5 އަހަރު ފަސް)

(ނުނިމޭ)

ދެވަނަބައިގެ ތެރެއިން:

“މީ އަހަރެންގެ ކުށް. އަހަރެން ޔޫއާއަށް ކައިވެނި ކުރަން މަޖުބޫރު ނުކުރުވިނަމަ މިހެން ނުވީސް…”

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.