ވާތީ ހިތަކު ލޯބި މަންމަންވެފާ 36

“ކަލޭ… ކަލޭ މަގޭ މުޅި ދިރިއުޅުން ތި ހަލާކު ކޮށްލީ…” ދެންވެސް އިމްރާންއަށް ބުނެވުނީ އެހެންނެވެ. “ފެއާކޮށް ދޯ ކުޅެންވާނީ؟ ކަލޭ ފުރަތަމަ މަގޭ ދިރިއުޅުން ހަލާކު ކޮށްލީ. މަގޭގެ ބައްޕައަކަށް ވާން ނުކެރުނު އިރު އެހުރީ މަގޭ މަންމައަށް ހަދާލި ގޮތް. ކަލޭ މަގޭގެ މުޅި ދިރިއުޅުން ހަލާކު ކޮށްލީ” އިމްރާންގެ ކަންކަށި މަތީގައި ޖަހަމުން ރަޝާ ބުންޏެވެ. އަދި ބަރުހެލި ފިޔަވަޅު ތަކެއްގައި އެތަނުން ނިކުމެގެން ދިޔައެވެ.

(36 ވަނަ ބައި)

ރަޝާ ސްޓޭޝަނުން ނިކުން އިރު ބޭރުގައި ދިޔާން ހުއްޓެވެ. ހިތި ގޮތަކަށް ހިނިތުންވެލަމުން އޭނާ ގޮސް ދިޔާން ކުރިމަތީގައި ހުއްޓުނެވެ. “ވީ ގޮތް އިވިގެން މިއައީ. ޔޫ އޯކޭ؟” ދިޔާން އަހައިލިއެވެ. “ކީއްކުރަން އަހަރެންގެ ހާލު ބަލަނީ؟ ތިއީ ޔޫޒާގެ ފިރިމީހާ. އަހަރެންގެ ކަހަލަ ފައިފުއްސެއްގެ ހާލު ބަލާކަން އެނގުނީއާ ޔޫޒާ ކިހާ ރުޅި އަންނާނެ؟” އިސްޖަހާލަމުން ރަޝާ ބުނެލިއެވެ. “ރައްޓެއްސެއްގެ ގޮތުގަ އާދެވިދާނެއްނުން؟”

“ނޫން ދިޔާން. އަހަރެމެންނަކަށް ރައްޓެހިންނަކަށް ނުވެވޭނެ. ހިލޭ ބައެއްގެ ގޮތުގައި ލިބެ އެއްދާން ކޮށްފައި ތިބި ބައެއް މިއީ. އަހަރެމެންނަކަށް ރައްޓެހިންނަކަށް ނުވެވޭނެ” ރަޝާ ދެކޮޅު ހެދިއެވެ. “މައްސަލައެއް ނެތް. ހެޔޮ އެދޭ މީހެއްގެ ފަރާތުން. ރަޝާ އެއްވެސް އެހީއެއް ބޭނުންތަ؟ މިއޮށް ހާދުވަހު އިމްރާން ލާރި ފޮނުވިއެއްނުން؟ ދެން؟ ރަޝާ އޯ؟” ދިޔާން އަހައިލިއެވެ. “އަހަރެން… އަހަރެން މިއީ ބޭކާރު މީހެއްނުން…؟” ހިނިތުންވުމަކާއި އެކު އެހެން ބުނި ނަމަވެސް ރަޝާގެ ދެލޯ ކަރުނުން ފުރި ބާރުވިއެވެ.

“ތިހެން ނުބުނޭ ރަޝާ. އެއްވެސް މީހަކީ ބޭކާރު މީހެއް ނޫން. އެހީއެއް ބޭނުންތަ؟ ރުފިޔާއެއް ދޭންތަ؟” ދިޔާން ހުރީ ރަޝާއަށް އެހީވާށެވެ. “ނޫން. އަހަރެން މަންމަ ގޮވައިގެން ދާނީ މާލެއަށް. މާލޭ މުއްސަންޖަކަށް އިންނަން މިއުޅެނީ. ކީއްކުރާނީ؟ މިކަހަލަ ގޮތަކަށް ދޯ މަށަށް ރުފިޔާއެއްވެސް ލިބޭނީ. މަންމައަށް ފަރުވާ ކުރަންވެސް ބޭނުން. އެހީ އަކަށް އަތް ދިއްކޮށްލީތީ ވަރަށް ބޮޑަށް ޝުކުރިއްޔާ” ނޭފަތް ދަމާލަމުން ރަޝާ ބުނެލިއެވެ. އަދި ލަސް ހިނގުމުގައި އެތަނުން ހިނގައިގަތެވެ.

އަތިރިމަތީގައި އިށީނދެލައިގެން އިން ވިޝާޔާ އިންތިޒާރު ކުރަމުން ދިޔައީ ޝަރަފްއަށެވެ. ކަޅު ކުލައިގެ އަބާޔާއަކާއި އެކު ކަޅު ކުލައިގެ ޙިމާރެއް އަޅައިގެން ރަނގަޅަށް ނިވާވެގެން އިން ވިޝާޔާ ވަރަށް ލޯތްބެވެ. އޭނާގެ ދޮން މޫނު ޙިމާރުގެ ތެރެއިން ފެންނަމުން ދިޔައީ ކަޅުފޮއެ އަނދިރި ރެޔެއްގައި ހަނދު ފެންނަހާ ފުރިހަމަ ކޮށެވެ. އެހާ ވެސް ލޯތްބެވެ.

“އާޗާ. ހާދަ ތަފާތޭ މިހާރު” އެތަނަށް އައި ޝަރަފްއަށް ފުރަތަމަ ވެސް އަޅައިގަތީ ވިޝާޔާ ހެދުން އަޅާފަ ހުރިގޮތެވެ. ވާނީ ވެސް އެހެން ނޫން ހެއްޔެވެ؟ ވިޝާޔާއަކީ ކުރިން ޓޮޕާއި ޖިންސުލައިގެން އުޅުން ކުއްޖެކެވެ.

“އާނ. ވަރަށް ކަންކަން ބަދަލު ވެއްޖެ” ވިޝާޔާ ބުނެލިއެވެ. “ހޫމް. ކިޔާބަލަ. ކޮން ވާހަކައެއްތަ ދައްކަން ތިއުޅެނީ؟ މިހާރު ދެރޭވީ ގައިމު ގެއަށް ގެންނަން އުޅޭތާ. އަބަދު ބިޒީ ބިޒީ” ޝަރަފް ހުރީ ފާޑަކަށް ހިތްހަމަ ނުޖެހިފައެވެ. “ތިވާހަކަ ދައްކަން މިގެނައީ. ޝަރަފް. އަހަރެން ބޭނުމެއް ނޫން މިހެން މިގުޅުން ކުރިއަށް ގެންދާކަށް” ވިޝާޔާ ބުނެލިއެވެ. “ތިބުނީ؟” ޝަރަފްއަކަށް ސާފެއް ނުވިއެވެ.

“މިބުނީ މިހެން މިގުޅުން ކުރިއަށް ގެންދާކަށް ބޭނުމެއް ނޫނޭ. މާލެ ގޮސް މި ކިޔެވި ކިޔެވުމުން ވަރަށް ކަންކަން ދަސް ވެއްޖެ. އަހަރެން ބޭނުމެއް ނޫން ދެން ކައިވެނިން ބޭރުން ގުޅުން ހިންގާކައް. ނިކަން ވިސްނާލަބަލަ. އަހަރެމެން އެކަކު އަނެކަކުދެކެ ލޯތްބެއް ނުވޭ. ކުރެވުނު އިހުސާސަކީ ޝައިތާނާ ދެއްކި ދަޅަ. ނިކަން ވިސްނާލަބަލަ. މިއީ ކިހާ ބޮޑު ފާފައެއް؟ ދެން ބުނެބަލަ. އަހަރެމެންގެ ދެމެދުގައި ދުވަހަކުވެސް ލޯބިން ވާހަކައެއް ދެކެވުންތަ؟ ނޫން. ދިމާވާ ކޮންމެ ފަހަރަކު އަރަނީ އެނދަށް. އަޅެ ބުނެބަލަ. ޝަރަފް ބޭނުންތަ މަށާ އިންނަން؟”

“އަހަރެން އަދި މީހަކާ އިންނާކަށް ތައްޔާރެއް ނޫން” ޝަރަފް ބުނެލިއެވެ. “ތީ މިބުނާ ވާހަކައަކީ. ޝަރަފް އަދި މިކަހަލަ ކަމަކައް ތައްޔާރެއް ނޫން. އަހަރެންވެސްމެ. މިހާ ހިސާބުން މިގުޅުމަށް ނިމުމެއް ގެންނަމާ؟” ވީޝާޔާ ބުނެލިއެވެ.

“އެންމެ ރަނގަޅު. އެކަމަކު. ވިޝާޔާ އަހަރެންގެ ހަޔާތައް އައީތީ އަހަރެން ވަރަށް އުފާވޭ. އިންޝާ ﷲ އަހަރެންވެސް އިސްލާހުވާން މަސައްކަތް ކުރާނަން” ހިނިތުންވެލަމުން ޝަރަފް ބުނެލިއެވެ.

ދުވަސްތައް ފާއިތުވަމުން ދިޔައެވެ. އެޒިކިއެލްއާއި މިކްޔާގެ ގުޅުން ދިޔައީ ދުވަހެއް ދުވަހަކަށް ވަރުގަދަ ވަމުންނެވެ. އެހެނަސް އެލާރާއާއި ޒަވުލްގެ ގުޅުމުގައިވީ ނުފެންނަ ފާރެއް ލެވިފައެވެ. ހަމަ އެހެން ޒާލާއާއި އަކްނާންގެ ގުޅުންވެސްވީ ހީނަރުވެފައެވެ. ޒާލާއަށް ސިއްރުން އަކްނާން ދިޔައީ ނަހާތުއާއި އެކު ގުޅުން ހިންގަމުންނެވެ. ލަޝްކާއާއި ދާއިޔަލްގެ ކައިވެނީގެ ފަހު މަރުހަލާތައްވެސް ދިޔައީ ކުރިއަށް ދަމުންނެވެ. ރަޝާ މާލެ ބަދަލުވީ އިރު އިމްރާންއަށް 25 އަހަރުގެ ޖަލު ހުކުމެއް ލިބުނެވެ. މީކައިލްއާއި ވިޝާހާގެ ގުޅުންވެސް ދިޔައީ ބާރު ސްޕީޑުގައި ކުރިއަށް ދަމުންނެވެ. ދިޔާންގެ ބޭވަފާތެރިކަމުގެ ވާޙަކަ ނޭނގި ޔޫޒާ އޭނާއާއި އެކު އުފަލުގައި އުޅެމުން ދިޔައެވެ. އެކަނިވެފައި ތިބީ ޔައުލާންއާއި ވިޝާޔާއެވެ. ޔައުލާން އިންތިޒާރު ކުރަމުން ދިޔައީ އެލާރާއަށެވެ. ވިޝާޔާ ހުރީ އޭނާ ބޭނުންވާފަދަ ފިރިހެން ކުއްޖެއް ލިބޭނެ ދުވަހެއްގެ އިންތިޒާރުގައެވެ. ވިޝާޔާގެ ވާހަކަތައް އަހާ ޝަރަފްގެ ދިރިއުޅުމަށްވެސް ވަނީ ވަރަށް ގިނަ ހެޔޮ ބަދަލުތަކެއް ގެނެސްފައެވެ.

***އެއްމަސް ފަސް***

(ނުނިމޭ)

ތިރީސްހަތްނަބައިގެ ތެރެއިން:

“މިވަގުތުން ފެށިގެން ލަޝްތިއީ ހަމަ އެކަނި ދާއިގެ މީހެއް. ހަމަ އެކަނި ދާއިގެ” ލަޝްކާގެ ނިތުގައި ބޮސް ދެމުން ދާއިޔަލް ސިއްރު ސިއްރުން ބުނެލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.