ކަޅު ބުޅާ 18

ބަރާބަރު 12 ޖެހި އިރު އިވްޔާ ހުރީ ބަނދަރުގައެވެ. ކުޑަ ހިނދުކޮޅެއް ތެރޭގައި ހިންމަފުއްޓައް ދިޔުމައް ދަތުރު ފެށުނެވެ. ލޮލުގެ ހިމަކޮޅުން ހުރާ ގެއްލެންދެން އިވްޔާ ބަލަން އިނެވެ. އިވްޔާ އެދިޔައީ މިޒިޔަލްއާއި އެކު ހޭދަކުރެވުނު އުފާވެރި ވަގުތުތައް ހުރާގެ ފަސްގަނޑުގައި ވަޅުލާފައެވެ. ކުޑަކުޑަ އީވާއަށް ޓަކައި ކެތް ކުރަން އަޒުމް ކަނޑައަޅައިގެންނެވެ.

(18 ވަނަ ބައި)

އިވްޔާއަށް ނޭނގުނު ނަމަވެސް އިވްޔާ ފުރި މަންޒަރު ބަލަން ފިލާ މިޒިޔަލް ހުއްޓެވެ. އެދެލޯ ކަރުނައިން ފުރިފައިވީ އިރު، ވޭން ހުރީ އިންތިހާއަށެވެ. ހިތުގައި ނުފިލާ ވޭނެއް ހުރި އިރު ދެލޮލުން ކަރުނަ ހުއްޓުވުމަށް ނުކުޅެދުނެވެ. ނަމަވެސް މިއަދު އޭނާއަށް މިވަނީ މަޖުބޫރުވެފައެވެ. އިވްޔާއަދި އީވާއާއި އެކު އުފާވެރި ހަޔާތެއް އުޅުމުގެ ނަސީބެއް އޭނާއަކަށް ނެތެވެ…

***

“ހަހަ. ކަލެއަށް ފެނުނީކީ ހުވަފެނެއް ނޫން. އެއީ ހަމަ ހަގީގަތް. ހުވަފެނެއްގެ ސިފައިގައި ކަލެއަށް ފެނުނީ އިވްޔާ ނަމަވެސް ކަލޭ ގުޅުން ހިނގީ މަށާއި އެކު” އަޑަށް ބާރު ލަމުން މިލީން ބުންޏެވެ.

މިޒިޔަލް ފަހަތަށް ފިޔަވަޅު އަޅަމުން ދުއްވައިގަތެވެ. އޭރު އޭނާގެ ހިތް ތެޅެމުން ދިޔައީ ފެނުން ނަގާ ރޯމަހެއް ތެޅޭ ބީދައިންނެވެ. ނަމަވެސް ދުވާތާ 5 ވަރަކަށް މިނިޓްވީ އިރުވެސް މިޒިޔަލްއަކަށް އެއްވެސް ތަނަކަށް ދެވުނުހެނެއް ހިޔެއް ނުވެޔެވެ. ހީވަނީ ވަށާ ބުރެއް ޖެހޭ ހެންނެވެ. ވަރުބަލިވެ މާނޭވާ ލެވޭވަރުވުމުން މިޒިޔަލް ފިޔަވަޅުތައް މަޑު ކުރިއެވެ. އޭރު މިޒިޔަލްއަށް ހުރީ ހަމަ ރަނގަޅަށްވެސް ރޮވިފައެވެ.

“ހާދަ ބާރަކަށް ތިދުވަނީ؟ ހަހަ. މަޑުކޮއްބަލަ. އަދި އަހަރެންގެ ވާހަކައެއް ނުނިމެޔޭ!” މިލީން ހެމުން ހެމުން ވާހަކަ ދެއްކިއެވެ. “ހެޔޮނުވާނެ، އަހަރެން ދިޔަދީ”

“އަހަރެން ކަލޭ ދިޔަދޭނީ ޝަރުތެއްގެ މަތިން!” މިލީން ބުންޏެވެ. “ކޮ.. ކޮން.. ކޮން ޝަރުތެއް…؟” މިޒިޔަލްއަށް އެހުނީ އަޅައަޅައި ގަންނަމުންނެވެ.

“އިވްޔާ ވަރިކުރޭ! މުޅި އުމުރަށް އީވާއާއި ވެސް ގުޅުން ކަނޑާލާ!” މިލީން ބުނެލިއެވެ. އޭރު މިލީންގެ ދެލޯ ވަނީ ރަތް ކުލައިން ދިއްލިފައެވެ. “އަހަރެން މާދަމާ ވިހާނެ. އަހަރެން ވިހާނީ ކަލޭގެ ގޭގަ. ކަލޭގެ ކޮޓަރީގައި. ކަލޭގެ ދާނުގައި. އަހަރެން ވިހާ އިރު އީވާ ނުވަތަ އިވްޔާ ހުއްޓަސް ދެމީހުންގެވެސް ދުވަސް ދުއްވާލާނަން!” މިލީން ބުނެލީ އިންޒާރެއް ދޭފަދައިންނެވެ.

“ނޫން ނޫން. އަހަރެން ކަލޭ ބުނާގޮތެއް ހަދާނަން. އިވްއާއި އީވީއަށް ގެއްލުމެއް ނުދޭތި، ހެޔޮނުވާނެ” މިޒިޔަލް ބިންމައްޗައް ޖެހި، އާދޭސް ކުރަން ފެށިއެވެ. މިލީން ހީލިއެވެ.

***

ލަސް ހިނގުމުގައި ހިނގާފައި އައި މިޒިޔަލްގެ މޫނުމަތީގައިވީ މާޔޫސް ކަމެވެ. ގެއަށް އައި އިރު ބޭރު ޖޯލީގައި އިށީންދެ އިން މިލީން ފެނި މިޒިޔަލް ވަކިން ފޫހިވިއެވެ.

“އާދެބަލަ” މިލީން ޖޯލިން ތެދުވިއެވެ. އަދި ގޭތެރެއަށް ވަނެވެ. ދާހިތް ނުވިޔަސް މިޒިޔަލް ދިޔައެވެ. އެހެން ގޮތެއް މިއަދު އޭނާއަށް އެބައޮތް ހެއްޔެވެ؟

މިޒިޔަލް ކޮޓަރިއަށް ވައިން އިރު އެނދުމަތީ އިށީންދެލައިގެން މިލީން އިނެވެ. ތުއްތު ކުއްޖަކު ގޮވައިގެންނެވެ. މިޒިޔަލްގެ ފިޔަވަޅުތައް މަޑު ޖެހުނު އިރު މުޅި ހަށިގަނޑުގައި ހީބިހި އަރުވާލިއެވެ.

“އަން. މިއޮތީ ކަލޭ ދަރި” މިޒިޔަލް އަތަށް އެކުއްޖާ ލައިދެމުން މިލީން ބުންޏެވެ. މިޒިޔަލް މަޑުމަޑުން އެކުއްޖާގެ މޫނަށް ބަލައިލިއެވެ.

ހަވީރުގެ ވަގުތެވެ. ދޮހާ ތަބަށް ހިފައިގެން މިޒްނާ އިނީ ބޭރު ޖޯލި ފަތީގައެވެ. އެހެން އިންދައި މިޒްނާގެ އެކުވެރިޔާ ޝިފާޒާ ފެނުނެވެ.

“ޝިފޫ. ހާދަ ފިޔަވަޅުތައް އަވަސްކޮށް ކޮންތާކަށް ތިޔަ ވަޑައިގަންނަވަނީ؟” މިޒްނާގެ އަޑަށް ޝިފާޒާ އަރުވާ ޖަހައިގަނެފައި އެދިމާލަށް ހިނގައިގަތެވެ. “މަކީމެއްނުން ކަލޭ ކައިރީ ހީވެޔޭ މަގޭ ދޮންތަ ޝިފާއަށް ހުރީ މީހަކު ސިހުރު ހަދާފަހެން. އެހެންވެ ރުގްޔާ ކުރާ މީހަކު ގެނެސްގެން މިއުޅެނީ” ޝިފާޒާއެއް ނޭވާއިން ކިޔައިދިނެވެ.

“މިދެން ކިހާ ދެރަކަމެއްތަ ޝިފޫ. އަޅެ އެކޮއެ އެހުރީ ނަފްސާނީ ވެފައޭ. ޑަކްޓަރުންވެސް އެބުނަނީދޯ އެހެން؟” މިޒްނާ ދެފަރާތަށް ބޯހޫރުވާލިއެވެ.

“ދެން. އެނގިދާނެތާ؟ ކަލޭ ހިނގާ މަށާއި އެކު. އިބްރާހީމް ކިޔާ ސޮރެއް މިގެނައީ. އިބްރާހިމްބެ ބުނީ އެކިޔަވާ އަޑު އިވުނީމަ އުނދަގޫވާނޯ ސިހުރު ޖެހިފައި ހުރީއާއި. ހިނގާ. ކަލޭ ވާނެ މަށާއި އެކު ދާން މިއަދު” މިޒްނާގެ އަތުގައި ހިފައިގެން ޝިފާޒާ ހިނގައިގަތެވެ.

ޝިފާޒާ ގެއަށް ވަދެ ހަމަޖެހިލި ތަނާހެން އިބްރާހިމްބެ ގެއަށް އަހިސްވަނެވެ. “ކޮބާ އުޅޭ ފަށަންދޯ؟”

މެދުގެތެރޭގައި ހުރި ފައްޖެހި އެނދުގައި ޝިފާ އޮށޯވެލިއެވެ. ޝިފާގެ ހަށިގަނޑުގައި އިބްރާހިމްބެގެ އެދުމަށް ފޮތިގަނޑެއް އަޅިއެވެ. “އަޅުގަނޑު މިކިޔަވާލަނީ ޤުރްޢާންގެ އާޔަތް ތަކެއް. މި އާޔަތްތައް ކިޔެވުމުން ސިހުރު ޖެހިފައިވާނަމަ ބޯއަނބުރާ، ހޮޑުލަވާ، ގައި ހިރުވާ، އަޑު އަހަން ބޭނުންނުވެ، ގޮތް ގޮތް ވާނެ” އިބްރާހިމްބެ މިހެން ބުނެ ކިޔަވަން ފެށިއެވެ.

އިބްރާހިމްބެ ކިޔަވަން ފެށިތާ 5 ވަރަކަށް މިނިޓް ވެއްޖެއެވެ. ނަމަވެސް ޝިފާއަކަށް އެއްވެސް އުނދަގުލެއް ނުވިއެވެ. “ޝިފާގެ އެއްވެސް މައްސަލައެއް ނެތް އެހެންވެ. އަލްހަމްދުލިއްލާހި” 10 މިނިޓް ކިޔަވާފައި އިބްރާހިމްބެ ބުންޏެވެ.

“ހޫމް. ދެން ކޮންމެ ގޮތެއް ވިޔަސް ކަލޭ ދެއްކިވާހަކަ ގަބޫލް ކުރަން މިޖެހުނީދޯ-” ޝިފާޒާގެ ވާހަކަ ހުއްޓުނީ މިޒްނާ ހުރި ގޮތް ފެނިފައެވެ. ބޮލުގައި އަތް އަޅައިގެން ހުރި އިރު ފުންކޮށް ނޭވާތަކެއް ލަމުން ދިޔައެވެ. ނިތް މަތީގައި އޮށްދާ ހިތްލާފައި ހުރި އިރު މޭގައި އަތް އަޅައިގެން ހުރުމުން މިޒްނާއަށް އުނދަގޫ ތަކެއް ވާކަން ޝިފާޒާ އަދި އިބްރާހިމްބެއަށް ވެސް އެނގުނެވެ.

“އެކޮއެ ބާއްވާލަބަލަ އެނދުގަ” އިބްރާހިމްބެ ބުންޏެވެ. ޝިފާ ކޮޓަރިއަށް ފޮނުވާލާފައި މިޒްނާ އެނދުމަތީގައި ބާއްވާލިއެވެ.

އިބްރާހިމްބެ މިޒްނާއަށް ކިޔެވެލި ކިޔަވާލިއެވެ. ހިނދުކޮޅެއް ފަހުން މިޒްނާ ހަމައަކަށް އެޅުނެވެ. “އިބްރާހިމްބޭ ކިހިނެތްމިވީ؟” ޝިފާޒާ އެއްސެވެ. “ވީގޮތަކީ މިކޮއެއަށް ސިހުރު ޖެހިފައި ހުރުން” އިބްރާހިމްބެ ފުންނޭވާއެއް ދޫކޮށްލިއެވެ. “އޭން؟ ކީކޭ؟ ކީއްވެ؟ ކާކު މަށަށް ސިހުރު ހަދާނީ؟” މިޒްނާ އެއްފަހާ ސުވާލު ތަކެއް ކޮއްލިއެވެ.

“މިޒްނާ ބޭނުން ނަމަ ކިޔެވެލި ކިޔަވާ، މިޒްނާއަށް ސިހުރު ހެދީ ކާކުކަމާއި، ހަދާފައި ހުރީ ކޮންކަހަލަ ސިހުރެއްތޯ ބެލިދާނެ” އިބްރާހިމްބެ އިތުރު ކޮއްލިއެވެ.

މިޒްނާ އެނބުރި ގެއަށް އައި އިރު އިރު އޮއްސިއްޖެ. އިވިގެން ދިޔަ ހަގީގަތުގެ ސަބަބުން މިޒްނާގެ މޫނު މަތީގައި އަދިވެސްވީ ހައިރާން ކަމެވެ. އޭނާގެ ދިރިއުޅުމަށް މިވީ ކިހިނެތް ހެއްޔެވެ؟ އަދިވެސް އޭނާއަށް އެކަން ގަބޫލު ކުރަން އުނދަގުލެވެ.

އެވަގުތު ގޭދޮރު ހުޅުވާލާފައި މޫނު ބުރުގާ އަޅައިގެން ހުރި މެދު އުމުރުގެ އަންހެނަކު ގެއަށް ވަނެވެ. “ދޮންތާ”

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.