ކަޅު ބުޅާ 19

މިޒްނާ އެނބުރި ގެއަށް އައި އިރު އިރު އޮއްސިއްޖެ. އިވިގެން ދިޔަ ހަގީގަތުގެ ސަބަބުން މިޒްނާގެ މޫނު މަތީގައި އަދިވެސްވީ ހައިރާން ކަމެވެ. އޭނާގެ ދިރިއުޅުމަށް މިވީ ކިހިނެތް ހެއްޔެވެ؟ އަދިވެސް އޭނާއަށް އެކަން ގަބޫލު ކުރަން އުނދަގުލެވެ. އެވަގުތު ގޭދޮރު ހުޅުވާލާފައި މޫނު ބުރުގާ އަޅައިގެން ހުރި މެދު އުމުރުގެ އަންހެނަކު ގެއަށް ވަނެވެ. “ދޮންތާ”

(19 ވަނަ ބައި)

ލާންޗު އޭގެ އެންމެ ބާރު ދުވެލީގައި ދުއްވަމުން އަހިސް މަޑުކޮއްލީ ކ.ހިންމަފުށި ބަނދަރު މައްޗަށެވެ. ލާންޗުން ފޭބި އިވްޔާގެ މޫނުމަތީގައި އެއްވެސް ދިރުމެއް ނެތެވެ. ދުވަހަކު އުފަލެއް ލިބުނު މީހެއްހެންވެސް ހީނުވެޔެވެ. އިވްޔާ އަތުގައި އޮތް ކުޑަ ކުޑަ އީވާއަށް ބަލާލުމާއި އެކު އަނެއްކާވެސް އިވްޔާއަށް ރޮވޭ ގޮތް ވިއެވެ. ނަމަވެސް އެންމެން ކުރިމަތީ ހުރެ ނުރޯން ވެގެން އިވްޔާ ހިނގައިގަތީ އޭނާގެ ގެއާއި ދިމާލަށެވެ.

ސޯފާގައި ޓީވީ ބަލަން އިން އިނާގެ ނަޒަރު ދޮރާއި ދިމާލަށް ހުއްޓުނީ ދޮރު ހުޅުވުނު އަޑަށެވެ. ދޮރު ކުރިމަތީ ކަރުނައިން ފޯވެފައި ހުރި އިވްޔާ ފެނި އިނާގެ ހިތް ހުއްޓުނު ފަދައެވެ. ދުވެފައި ކަހަލަ ގޮތަކަށް ގޮސް އިވްޔާ ކުރިމަތީގައި ހުއްޓުނެވެ.

“ދަރިފުޅާ؟ ކިހިނެތް ވީ؟” ކުޑަ ކުޑަ އީވާ އުރާލަމުން އިނާ އަހާލިއެވެ. “މަންމާ… މަންމާ… ޔަލް… ޔަލް އަޅުގަނޑު ވަރި ކޮއްފި” ކުޑަ ކަކޫ މައްޗަށް ތިރިވެ ރޮއެގަންނަމުން އިވްޔާ ބުނެލިއެވެ.

އީވާ ގެންގޮސް ކޮޓަރިއަށް ލާފައި އިނާ އެނބުރިއައެވެ. އިވްޔާ އަތުގައި ހިފައިގެން ގޮސް އިނާ ސޯފާގައި އިށީނެވެ.

“ކިހިނެތްތަ ވީ ދަރިފުޅާ؟ ހުއްޓާލާފަ ވާހަކަ ދައްކަބަލަ” އިނާގެ ދެލޮލުގައިވެސް ކަރުނަ ވިދާލިއެވެ.

“ނޭނގެ… ހީ… ހީވަނީ ޔަލް ބޭވަފާތެރިވީހެން. އިއްޔެ ޔަލް މަންމަ ގެއަށް ގެނައި ފާޑެއްގެ އަންހެން ކުއްޖެއް. ބުނީ ޔަލްގެ ވަރަށް ގާތް ރަހުމަތްތެރިޔެކޭ. އެކަމަކު ހިޔެއް ނުވޭ އެހެނެއް. އަޅުގަނޑު ގާތު ކައްކާށޭ ކިޔާފަ އީވީ ގޮވައިގެން އެދެމީހުން ވަނީ ކޮޓަރިއަށް. ދެން ކައްކައިގެން ގޮސް ވައިން އިރު އެއަންހެން ކުއްޖާ އިނީ އީވީއަށް ގާތުން ދޭން. އެވާޙަކަ ބުނަން ގުޅީމަ ފޯން ވެސް ނުނަގާ. ދެން ބުނީމެއްނުން ޔަލް ދަތުރު ދިޔައޭ. އެދަތުރުން އައި ގޮތަށް އަހިސް ދިނީ ވަރީގެ ފޯމް. 12 ޖަހަން ވާއިރަށް ނިކުންނާށޭ ކިޔާފަ. އެހާ ޅައުމުރަކު ބައްޕައަކަށް ނުވެވޭނޭ ކިޔާފަ…”

އިވްޔާ ވާހަކަ ދައްކަމުން ގޮސް ދެން ކުރިއަށް ނުދެވިގެން ސޯފާއަށް ދެމުނެވެ. އޭރު އިވްޔާއަށް ނޭވާ ނުލެވިގެން ރޮއެ ހޭރެނީއެވެ. ހަސަން ނިޔާވި ފަހުން މާބޮޑަށް ރޮއެ، ވިސްނާ ހަދަންޏާމުން އިވްޔާއަށް އަބަދުވެސް “ޕެނިކް އެޓޭކްސް” ޖެހެޔެވެ. ހަދާނެ ނުހަދާނެ ގޮތެއް ނޭނގިގެން އިން އިނާ ގުޅީ ޔަޝްފާއަށެވެ. ޔަޝްފާގެ އެހީގައި އިވްޔާ އަވަސް ގޮތުގައި ހޮސްޕިޓަލަށް ގެންދެވުނެވެ.

“މިއީ… މިއީ އިންސާނެއްތަ؟ ކަލޭ ބުނީ ކަލޭ ބަނޑުގައި އޮތީ އިންސި ކުއްޖެއް ނޫނޭ. އެކަމަކު މިއީ އިންސާނެއްނުން؟” އެކުއްޖާގެ މޫނަށް ބަލަން އިރުކޮޅަކު ހުރެފައި މިޒިޔަލް ސުވާލު ކޮއްލިއެވެ. މިލީން ހީލިއެވެ. “ކަލޭ ހާދަ ގަމާރޭދޯ؟ ތިއީ ކަލޭގެ ލެޔެއްނުން؟ ކަލޭ ތިއީ އިންސާނެއްނުން؟ އެހެންވެ ތިކުއްޖާގެ ހަށިގަނޑުގައި ކަލޭގެ ނަސްލުވެސް ހުންނާނުން؟ ކީކޭތަ ކަލޭމެން ކިޔަނީ؟ އާންނނ. ޑީ.އެން.އޭ. ހަހަ”

މިލީން ދެއްކި ވާހަކަ އަހަން ހުރެފައި މިޒިޔަލް އެކުއްޖާގެ މޫނަށް ބަލައިލިއެވެ. ބަލާލާފައި އެއްވެސް މީހަކު އެއީ ޖިންނި ކުއްޖެކޭ ނުބުނާނެއެވެ. ދޮން ދޮން އެކުއްޖާގެ މޫނަށް ބަލަން ހުރެފައި މިޒިޔަލް އެކުއްޖާގެ މަޑު ކަފަކޮޅެއް ފަދަ އަތުގައި ހިފާލިއެވެ. އެއާއި އެކު ބޭއިޙްތިޔާރުގައި މިޒިޔަލަށް ހިނިތުންވެވުނެވެ.

“އަދި އެއްވާހަކަ. މިއަދުން ފެށިގެން ކަލޭގެ އީވާ ކިޔާ ދަރިއަކު ނުހުންނާނެ. މިއަދުން ފެށިގެން ކަލޭގެ ހުންނާނީ އެންމެ ކުއްޖެއް! އެއީ މިދަރިފުޅު. އަހަރެމެންގެ މައްވިޝް” މިލީން އިތުރު ކޮއްލިއެވެ. މިޒިޔަލް އިސްޖަހާލިއެވެ.

“ކިހިނެތްވެފަ ބަލީތަ؟” މިޒްނާގެ ވަރުބަލިވެފައިވީ މޫނަށް ބަލައިލަމުން މިޒްނާގެ ދޮންތަ އިޒްނާ އެއްސެވެ. “ހެހެ ނޫނޭ. މިއަދު ތަންކޮޅެއް ބިޒީކޮށް އުޅުނީމަ. ކޮބާތަ އިޒާކް؟” އިޒާކްއަކީ އިޒްނާގެ ހުރި ހަމަ އެކަނި ދަރިފުޅެވެ.

“އެބައުޅޭ ގޭގައި. އެޒާ ހަމަ ރަނގަޅު އަލްހަމްދުލިއްލާހި” އިޒްނާ ވާހަކަ ދެއްކިއެވެ. “ކޮބާ ކޮން ކަމަކުތަ ތިއައީ؟” މިޒްނާ އަހާލިއެވެ. އިޒްނާއަކީ ގިނަ ފަހަރު ކަމަކު ނޫނީ ނާންނަ މީހަކަށް ވުމުންނެވެ. “އަނޭ.. މަބުނީ.. އެބަހުރިތަ ތަދުކަނޑުވާ ބޭސް؟” އިޒްނާ އިނގިލި ތަކާއި ކުޅެމުން އަހާލިއެވެ. އެއަޑުގައިވީ ނުތަނަވަސްކަން މިޒްނާއަކަށް ވަންހަނާއެއް ނުވިއެވެ.

އިޒްނާގެ މޫނުން ފެންނަން އިން ދެލޮލަށް މިޒްނާ ބަލައިލިއެވެ. އެދެލޮލުން ވޭން ފެންނަމުން ދިޔައެވެ. ނަމަވެސް މިޒްނާ އެކަން ނޭނގޭ ކަމަށް ހެދުނެވެ. އަދި މިޒްނާ އަތުގައި އޮތް ތަދު ކަނޑުވާ ބޭސް އިޒްނާ އަތަށް ދިނެވެ. “އަވަސް ޝިފާއަކަށް އެދެން” މިޒްނާ ބުނެލިއެވެ.

އިޒްނާ ނިކުމެގެން ދިޔުމުން މިޒްނާއަށް ސޯފާއަށް ޖެހިގަނެވުނެވެ. މޭގައި އަތް އަޅައިގެން އިނދެ ފުންކޮށް ނޭވާތަކެއް ލަމުން ދިޔައެވެ. ނަމަވެސް މިޒްނާގެ ނޭވާ ހީވަނީ އުފުރިގެން ހިނގައިދާނެ ހެންނެވެ. އަދިވެސް އޭނާއަށް ގަބޫލު ކުރަން އުނދަގުލެވެ.

***

“މިޒްނާގެ ކިތަށް ދަރިން ތިބޭ؟” އިރުކޮޅަކު ކިޔަވާފައި އިބްރާހިމްބެ ސުވާލު ކޮއްލިއެވެ. “އެންމެ ކުއްޖެއް”

“ފިރިހެން ކުއްޖެއްދޯ؟” އިބްރާހިމްބެއަށް އެކަން އެނގުމުން ކޮންމެވެސް ވަރަކަށް މިޒްނާ ހައިރާން ވިއެވެ. ތެދުވެ އިށީންދެވުނެވެ. “ލައްބަ. ކިހިނެތް… އިބްރާހިމްބެއަށް…؟” މިޒްނާ ހައިރާން ކަމާއި އެކު ސުވާލު ކޮއްލިއެވެ.

“އިބްރާހިމްބެ ތިބުނަނީ މިޒްނާގެ ދަރިފުޅޭތަ މިޒްނާއަށް ސިހުރު ހެދީ؟” ޝިފާޒާ ވެސް ހުރީ އެހާ ހައިރާންވެފައެވެ. އިބްރާހިމްގެ ޖަވާބާއި އެކު އެކޮޓަރިއަށް ހީވީ ކުޑަވަރެއްގެ ބޮމެއް ގޮވި ހެންނެވެ. ގަބޫލު ކުރަން ދަތިވިއެވެ.

“ޔަގީންތަ؟” މިޒްނާއަށް އަނގަ މަތީ އަތް އަޅައިގެން އިނދެ މިޒްނާއަށް ސުވާލު ކޮއްލެވުނެވެ. “މުޖައްރިބު” އިބްރާހިމްބެ ޔަގީންކަން ދިނެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.