ޒެވިއަން 42

7 ދުވަސްފަހުން އަރޫޝާ އަހުމަދަށް ސިޓީ ފޮނުވިއެވެ. ކުޑަކުޑަ ޔަޝްއަލްއަށް ނަންކީ ދުވަސްކަމަށް ވުމުންނެވެ. “ޔަޝްއަލް އަހުމަދު” އަހުމަދު މަޑުމަޑުން ޔަޝްއަލްގެ ނަން ކިޔާލިއެވެ. އޭގައި އޮތް ޔަޝްއަލްގެ އެފޮޓޯ ނަގާފައި ޔަޝްއަލް ހިނިތުންވެލިއެވެ. އަދިއަދަށް ދާންދެންވެސް އަހުމަދު އެގެންގުޅެނީ އެފޮޓޯއެވެ.

ޔަޝްއަލްއަށް 2 އަހަރު ވާންދެން އަހުމަދާއި ބައްދަލު ކުރުމަށް އަރޫޝާ ޔަޝްއަލް ގެނެއެވެ. ޔަޝްއަލް އެދުވަސްތައް މަތިން ހަނދާން ނުހުންނާނޭ ކަން އެނގޭތީއެވެ. ދުވަހެއް ދުވަހަކަށް އަހުމަދާއި ޔަޝްއަލްގެ ގުޅުންވަރުގަދަ ވަމުންދިޔައެވެ. އަހުމަދަށް ލިބުނު 3 ދަރިންތެރެއިންވެސް އަހުމަދު އެންމެ ލޯބިވީ ޔަޝްއަލްދެކެކަން އެއީ ޝައްކެއްވެސް އޮތް ކަމެއް ނޫންކަން ގައިމެވެ.

ޔަޝްއަލްއަށް 3 އަހަރުވެ ސުކޫލަށް ވައްދަންވުމުން އަހުމަދުގެ ބަހާއި އެއްގޮތަށް އަރޫޝާ ޔަޝްއަލް ގޮވައިގެން ހދ ނޭކުރެންދޫއަށް ބަދަލުވިއެވެ. އެދުވަހަށް ފަހު ޔަޝްއަލް ގޮވައިގެން އަރޫޝާ އުޅެމުން ދިޔައީ ނޭކުރެންދޫގައެވެ.

***14 އަހަރު ފަސް***

ރޭގަނޑުގެ ވަގުތެވެ. ބޯކޮށް ވެހެމުން ދިޔަ ވިއްސާރައިގެ ސަބަބުން އެންމެންވީ އެމީހުންގެ ގޭތަކަށް ވަދެއެވެ. ޑިޓެންޝަން ސެންޓަރ އިން ނިކުން އަހުމަދުގެ މޫނު މަތީގައިވީ ބުނެދޭން ނޭނގޭ ކަހަލަ އިހުސާސްތަކެކެވެ. ޖީބަށް އަތް ޖަހާލައިގެން ހުރި އިރު އަހުމަދު މިއަދު އެހުރީ ގައިމުވެސް ވަރަށް އުފަލުންނެވެ. މިއަދު މިއީ އަހުމަދުގެ ދުވަހެވެ. ޖަހާލި ބާރުގުގުރިއާއި އެކު އަހުމަދުގެ ނުލަފާ ހިނިގަނޑުވެސް ހިނދިގެން ދިޔައެވެ.

އަހުމަދުގެ އިންތިޒާރުގައި އަރޫޝާ އޭރު ހުއްޓެވެ. ދެމީހުން އެކުގައި ނޭކުރެންދޫއަށް ފުރައިގެން ދިޔައެވެ. “ކޮބާ ޔަޝްއަލް؟” ގެއަށް އާދެވުމުން އަހުމަދު އެއްސެވެ. “ނިދާފަ” ޔަޝްއަލްގެ ކޮޓަރިއަށް އިނގިލި ދިއްކޮއްލަމުން އަރޫޝާ ބުންޏެވެ. އަރޫޝާއަށް ހިނިތުންވުމެއް ހަދިޔާ ކޮއްލާފައި އަހުމަދު ގޮސް ދޮރުހުޅުވާލިއެވެ.

ހަމައެކަނި ސޯޓެއް ލައިގެން އޮތް ޔަޝްއަލް އޮތީ އަރާމު ނިދީގައެވެ. ކޮޓަރި ތެރޭގައި އެއްވެސް އައްޔެއް ނެތް އިރު، ދޮރުހުޅުވާލުމުން ޔަޝްއަލްގެ މޫނުމައްޗަށް އެޅުނު ލުއި އަލިން ޔަޝްއަލްގެ މޫނު މަތިން ފެނިގެން ދިޔައީ މައުސޫމްކަމެވެ.

އަހުމަދު ލަސް ހިނގުމުގައި ގޮސް ޔަޝްއަލް ގާތުގައި އިށީނެވެ. “ބައްޕަގެ ލޯބި ނަފްރަތަށް ބަދަލު ނުކޮށް ބަސްއަހާނެ ކަމަށް އުންމީދު ކުރަން” ވިހަ ހިނިތުންވުމަކާއި އެކު އަހުމަދު ބުންޏެވެ.

“އަހަރެންގެ ޝަރުތު ފުރިހަމަ ވެއްޖެ. ކޮބާ އަހުމަދުގެ ޝަރުތު؟” ޔަޝްއަލް ކޮޓަރިން އަހުމަދު ނުކުތުމުން އަރޫޝާ އެއްސެވެ. “ހަމަ ޖެހިބަލަ. މި ހަފްތާ ބަނދުގައި ކުޅުދޫފުއްޓަށް ގޮސް ރަން ކިޔާނީ. ދެން 7 ދުވަސްފަހުން އެކޮޅުގަ ކައިވެނި ކުރާނީވެސް” އަހުމަދު ބުންޏެވެ. އަރޫޝާ ބޯޖަހާލިއެވެ.

ހެނދުނުގެ ވަގުތެވެ. ބައްޕައާއި އެކު ނަގާ ފުރަތަމަ ނާސްތާ ކަމުން ޔަޝްއަލް ހުރީ ކޮންމެވެސް ވަރަކަށް ހާސްވެފައެވެ. އެހެންނަމަވެސް ހާސްކަން ފިލުވާލާފައި ޔަޝްއަލް ނުކުތެވެ. އޭރު ކާމޭޒު ކައިރީގައި އަހުމަދާއި އަރޫޝާ އިނެވެ. ޔަޝްއަލް ވަނުމުން އަހުމަދުގެ ބަހާއި އެއްގޮތަށް އަރޫޝާ ނުކުމެގެން ދިޔައެވެ.

“ކުއްޖަކާ ރައްޓެހިވެގެންތަ އުޅެނީ؟” އަހުމަދުގެ ފުރަތަމަ ސުވާލާއި އެކުވެސް ޔަޝްއަލްގެ ހަރަކާތްތައް ހުއްޓުނެވެ. ނަމަވެސް ހަމަ ޖެހިލަމުން ބޯޖަހާލިއެވެ. “ކާކު؟” އަހުމަދު ސީދާ ޔަޝްއަލްގެ ދެލޮލަށް ބަލައިލަމުން އެއްސެވެ. “މާވީ ކިޔާ ކުއްޖެއް. އެއީ-”

“މަށަށް ހެޔޮ ކޮންމެމީހަކަސް. އަވަހަށް ތިގުޅުން ނިންމާ” ޔަޝްއަލްގެ ވާހަކަ ހުއްޓުވާފައި އެއްވެސް އަސަރެއް ނެތި އަހުމަދު ބުންޏެވެ. “ބައްޕާ. އެކަމަކު.. އަޅުގަނޑުމެން އެކުގަ އުޅޭތާ 6 އަހަރު ވެއްޖޭ..” ޔަޝްއަލްއަށް ބުނެވުނީ ޝަކުވާގެ ރާގަކަށެވެ. އެހެންވިޔަސް ބަދަލުގައި ޔަޝްއަލްއަށް އަހުމަދު ދިނީ ހޫނު އަތްތިލައެކެވެ.

“ކާކުތަ ބުނީ ކަލޭ ކައިރީ ކަލޭ ބޭނުން މީހަކާ ރައްޓެހިވާށޭ؟ އެއިން؟ ތިއީ އަހުމަދުގެ ދަރިފުޅު. ޔަޝްއަލް ލޯބިވާނީވެސް ކައިވެނި ކުރާނީވެސް އަހުމަދު ބޭނުން މީހަކަށް ސާފު ވެއްޖެ؟” އަހުމަދު ރުޅި އަހިސްފައި ހުރެ އެއްސެވެ. ޔަޝްއަލްއަށް އެއްވެސް އެއްޗެކޭ ނުބުނެވުނެވެ. ހުރި ގޮތަށް ހުރެވުނީއެވެ.

“އާދޭ މަށާއި އެކު” އަހުމަދު ބުންޏެވެ. ބިރުން ހުރި ނަމަވެސް އަހުމަދު ފަހަތުން ޔަޝްއަލް ދިޔައެވެ. އަހުމަދު ޔަޝްއަލް ވެއްދީ އޭނާގެ ކޮޓަރިއަށެވެ. “ޓީޝާޓު ބާލާ” ބިންމަތީގައި އޮތް ދަގަނޑުބުރި ނަގަމުން އަހުމަދު ބުންޏެވެ.

ޔަޝްއަލްގެ ވޭނީ ރުއިމުގެ އަޑު އަހަން ދުރުގައި އަރޫޝާ ހުއްޓެވެ. ކަންވާނީ މިހެންކަން ކުރިންވެސް އޭނާއަށް އެނގޭ ފަދައެވެ. ނަމަވެސް ދެން އެނބުރި ދިޔުމެއް ނެތެވެ. ދެން ކޮންމެގޮތެއްވިޔަސް އެއީ އަހުމަދުގެ ލޭނޫން ކަމުގައިނުވާނެއެވެ. ކެހި ބުއީ އަރޫޝާ އަމިއްލައަށެވެ.

***2 ހަފްތާ ފަސް***

ހެނދުނުގެ ވަގުތެވެ. އާދައިގެ މަތިން މިއަދުވެސް އަރޫޝާ ދިޔައީ ހޮސްޕިޓަލަށެވެ. އިލޮށިފައްޗާއި އެއްޗެހި ހިފައިގެން އަރޫޝާ ކުނިކަހަމުން ދިޔައިރު އޭނާގެ ޙިޔާލުގައިވީ އަހުމަދެވެ. އަހުމަދަކީ އެހާ އަނިޔާވެރި މީހެއްކަން ކުރިން އަރޫޝާއަށް އެނގިފައެއް ނެތެވެ. ނަމަވެސް ދެން އަރޫޝާ ކުރާނީ ކީއްހެއްޔެވެ؟

އުމުރު ދުވަހަށް ޖަލަށް ލާނީ ކިހާ ގޯސް އަމަލެއް ހިންގުމުން ހެއްޔެވެ؟ އެހެންވިޔަސް އަރޫޝާގެ މޮޔަހިތް އަހުމަދަށް ލެނބިގެން ދިޔައީ ބަސްބުނާހާ އަވަހަށެވެ. މިހާރު އަރޫޝާއާއި އަހުމަދުގެ ކައިވެނިވެސް ކުރެވިއްޖެއެވެ. އެހެންވިޔަސް މިހާރު އަހުމަދުދެކެ އަރޫޝާ ގަންނަނީ ފާޑެއްގެ ބިރެކެވެ.

“އޭ އަރޫޝާ. މަގޭ ވާހަކައެއް އަހައިފީމޭ” އަރޫޝާގެ އެންމެ ގާތް އެކުވެރިޔާ ކަމަށްވާ އިނާސާ އަހިސް ބުންޏެވެ. އިނާސާއަކީ ހޮސްޕިޓަލުގައި މަސައްކަތް ކުރަމުންދާ ހީވާގީ ނަރުހެކެވެ. “ކޮން ވާހަކައެއްތަ؟” ހަށިގަނޑު ތެދުކޮއްލަމުން އަރޫޝާ އެއްސެވެ. “އަރޫޝާ ދަރިފުޅު ގެންގުޅޭ ކޮއެ އެއްނުން މާވީއަކީދޯ؟” އިނާސާ އެއްސެވެ.

ފާޑަކަށް ގަބުވިނަމަވެސް އަރޫޝާ ބޯޖަހާލިއެވެ. “މައަޑު އަހައިފިން މާވީ އިނީ ބަލިވެޔޭ. އޭނަ މަންމަވެސް އޭނަ ގެއިން ނެރެލައިފި. ޔަޝްއަލް ދަރިއެކޯ. އެދެމީހުން އެހެންވެ މައްސަލަވެސް ޖެހިގެންނޯ އުޅެނީ. އެތެދެއްތަ؟” އިނާސާގެ ސުވާލާއި އެކު އަރޫޝާ ގަބުވިއެވެ. އަތުގައި އޮތް އިލޮށިފަތި ދޫވެ ބިންމައްޗަށް ވެއްޓުނެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.