ޒެވިއަން 43

ފާޑަކަށް ގަބުވިނަމަވެސް އަރޫޝާ ބޯޖަހާލިއެވެ. “މައަޑު އަހައިފިން މާވީ އިނީ ބަލިވެޔޭ. އޭނަ މަންމަވެސް އޭނަ ގެއިން ނެރެލައިފި. ޔަޝްއަލް ދަރިއެކޯ. އެދެމީހުން އެހެންވެ މައްސަލަވެސް ޖެހިގެންނޯ އުޅެނީ. އެތެދެއްތަ؟” އިނާސާގެ ސުވާލާއި އެކު އަރޫޝާ ގަބުވިއެވެ. އަތުގައި އޮތް އިލޮށިފަތި ދޫވެ ބިންމައްޗަށް ވެއްޓުނެވެ.

މާވީ ބަލިވެ އިން ޙަބަރާއި އެކު ދެން ސުކޫލަށް ދާހިތް ނުވުމުން ޔަޝްއަލް އިނީ އަތިރިމަތީގައެވެ. ޔަޝްއަލްގެ ދެލޮލުން ކަރުނައިގެ މުތީތައް ބަބުޅަމުން ދިޔައެވެ. ފަހަރަކު ކަރުނަ ތިއްކެއް ޔަޝްއަލްގެ ކޯތާފަތުގައި ފިރުމާލާފައި ވެއްޓިގެން ދެޔެވެ.

ޔަޝްއަލްގެ ލުއި ގިސްލުމުގެ އަޑުއިވޭ ކޮންމެ މީހެއްގެ ހިތްވެސް ފިސްފިސް ވާނެކަން ގައިމެވެ. އެހެންވިޔަސް ރޮއެގެންދެންވާނީ ކިހިނެތް ހެއްޔެވެ؟ މަންމަމެން އޭނާއަލުން މާވީއަށް ގުޅުނަދޭނެ ހެއްޔެވެ؟ ހިތްފުރޭވަރަށް ރޯލާފައި ޔަޝްއަލް ގެއަށް ދިޔައީ ސުކޫލް ގަޑި ނިމުމުންނެވެ.

ދުވަހުގެ ބާކީ އޮތްބައި މަސައްކަތް ކުރާނެހާ ހިތްވަރު ނެތުމުން އަރޫޝާއައީ ދެން ގެއަށެވެ. އެންމެ ފުރަތަމަވެސް އަރޫޝާ ދިޔައީ ޔަޝްއަލްގެ ކޮޓަރިއަށެވެ. އެނދުމަތީގައި އޮތް ޔަޝްއަލް ފެނި އަރޫޝާ ގޮސް ޔަޝްއަލް ގާތުގައި އިށީނެވެ.

“އެއީ ތެދެއްތަ؟” ފުރަތަމަވެސް އަރޫޝާ ސުވާލުކޮއްލިއެވެ. “ކޯއްޗެއް” އެއްވެސް އަސަރެއް ނެތި ޔަޝްއަލް އެއްސެވެ. “މާވީ ބަނޑުބޮޑީތަ؟” ހިންދިރުވާލާފައި އަރޫޝާ އެއްސެވެ. އެކަން ހަގީގަތަކަށް ނުވޭތޯ ހިތާ ހިތުން ދުޢާ ކޮއްލަމުންނެވެ.

ޔަޝްއަލް ޖަހާލީ ހިނިގަނޑެކެވެ. “ދެން…؟ އަހަރެން މާވީ ގާތަށް ދިޔަ ދޭނަންތަ؟” ޔަޝްއަލް އެއްސެވެ. “ދަރިފުޅާ….” ވޭނީ އަޑުން އަރޫޝާއަށް ގޮވާލެވުނެވެ. އެއީ ވާނޭކަމެއް ނޫންކަން އަރޫޝާއަށް ޔަގީންވުމުންނެވެ.

“ކީއްވެ؟ ކީއްވެ މިހެން ވާންވީ؟ މަގޭ ހަޔާތުގައި ވޭތުވި 17 އަހަރު ދުވަހު އަހަރެންގެ ބައްޕަ އަހަރެން ގާތަކު ނެތް. ކީއްވެ ކުއްލިއަކަށް އަހިސް އަހަރެންގެ ދިރިއުޅުމުގެ ހުންގާނުގައި އޭނަ ހިފަންވީ؟ ކީއްވެ؟” ޔަޝްއަލްއަށް ޝަކުވާ ކޮއްލެވުނެވެ. އަރޫޝާއަށް އިސްޖަހާލެވުނެވެ.

ދުވަހަކުވެސް ކުރިން ޔަޝްއަލް ރުއިތަނެއް އަރޫޝާ ނުދެކެއެވެ. ޔަޝްއަލްގެ ތުންފަތުގައިވީ ލުއި ހިނިތުންވުން އެކީހެން ފިލައި ގޮއްސިއެވެ. މޫނުމަތީގައިވީ އުޖާލާކަމުގެ ހުޅުކޮޅު އެކީގައިހެން ނިވިއްޖެއެވެ. އަރޫޝާއާއި ޔަޝްއަލްގެ ދެމެދުގައި އޮތް ގުޅުންވެސް އެދަނީ ހީނަރުވަމުންނެވެ.

ޔަޝްއަލް ކޮޓަރިން ނިކުމެ ދެން އަރޫޝާ ވަނީ އަހުމަދުގެ ކޮޓަރިއަށެވެ. “ޔަޝްއަލް ހަމަ މާވީއާއި ދުރުކުރުވަންތަ ތިވިސްނަނީ؟” ހާސްވެފައި ހުރެ އަރޫޝާ އެއްސެވެ. އަހުމަދު ބޯޖަހާލިއެވެ. “މާވީ ބަނޑުބޮޑު…” އަރޫޝާގެ ޖުމްލައާއި އެކު އަހުމަދު ދެލޯބޮޑުވިއެވެ. “ކީކޭ؟” ޔަގީން ކޮއްލުމަށް އަހުމަދު އެއްސެވެ. “ޔަޝްއަލްއަށްވެސް އެނގުނީ މާވީ ދޫކޮށްލިފަހުން.” އަރޫޝާ އިސްޖަހާލިއެވެ.

“ހެޔޮ މަށަށް” އަހުމަދުގެ ޖަވާބާއި އެކު އަރޫޝާ ދެލޯ ބޮޑުވިއެވެ. “ކީކޭ؟” އަރޫޝާ ރުޅިގަނޑު މައިތިރި ކުރަން މަސައްކަތް ކުރަމުން ބުންޏެވެ. “ހެހެ. ކާކުތަ ބުނީ ޔަޝްއަލްއަކީއޭ މަގޭ ހުރި ހަމަ އެކަނި ދަރިއަކީ؟ މަގޭ ޔަޝްއަލް ނޫނަސް ކުދިން ތިބޭ. ކާފަ ދަރިންވެސް އެބަތިބި. ދެން؟ މަށަށް އެމީހުނާ ނުލާ އުޅެވޭއިރު ކީއްވެ ޔަޝްއަލްއަށް ނޫޅެވެންވީ؟” އަހުމަދު ނިއްހިތްލާލާފައި އެއްސެވެ.

އަރޫޝާއަށް މައިތިރިވެވުނީ އެއީ އޭނާއަށް މުޅިން އައު ޙަބަރަކަށްވީތީއެވެ. އެހެން ކަމަށް ވަންޏާމުން އަރޫޝާއާއި އަހުމަދު އެގުޅުނީވެސް އަހުމަދުގެ “ބަދަލު” ގެ ޕްލޭންގެ ގޮތުގައިތާއެވެ. ނަމަވެސް ދެން އަރޫޝާއަށް ކުރެވޭނެ ކަމެއް، ބުނެވޭނެ ބަހެއް ނެތެވެ.

***

ދުވަސްތައް ފާއިތުވަމުން ދިޔައެވެ. ކޮންމެ ދުވަހަކުހެން އަހުމަދު ދިޔައީ ޒެވިއަންއަށް ފާރަ ލަމުންނެވެ. އެގޮތުގައި ދުވަސްތައް ފާއިތުވަމުން ގޮސް ޒެވިއަންއާއި ނުހާގެ ގުޅުމުގެ ޙަބަރު އަހުމަދަށް ލިބުނެވެ. އެދުވަހަށް ފަހު އަހުމަދު ތައްޔާރު ވަމުން ދިޔައީ ރަނގަޅު ވަގުތަކަށެވެ. ވަގުތުގެ ބޭނުން އަހުމަދު ހިފާލީ ކައިވެންޏަށް 2 ހަފްތާއަކަށް ވުމުންނެވެ.

“ވަޓް؟ ނުހާއާއި ކައިވެނި ކުރާށޭ؟” އަހުމަދުގެ ޖުމްލައާއި އެކު ހައިރާންވެފައި ޔަޝްއަލް އެއްސެވެ. “ހޫމް. މަށަށް ހެޔޮ ކަލޭ ކޮންމެ ކަމެއް ކުރިޔަސް. ބްލެކްމެއިލް ކޮއްގެން ފަސޭހަވާނެ. ދެހަފްތާ ތެރޭގައި ކުރެވޭ ނުހާގެ ކައިވެނީގައި ނުހާގެ ފިރިމީހާގެ މަގާމުގައި އިންނަން ޖެހޭނީ ކަލޭ” އަހުމަދު ކޮފީ ޖޯޑުގައި ތުން ޖައްސާލަމުން ބުންޏެވެ.

“އަޅުގަނޑު ލޯބިވަނީ މާވީދެކެ. މާވީ ނޫން އެހެން އެއްވެސް ކުއްޖެއް ބޭނުމެއް ނޫން” އިސްޖަހާލާފައި ޔަޝްއަލް ބުންޏެވެ. އަހުމަދު ހީލިއެވެ. އަދި މޭޒު މަތީގައި އޮތް ކުޑަ ފައިލް ނަގާ ޔަޝްއަލް ފައިބުޑައް އެއްލައިލިއެވެ. ހީވާފަދައެވެ. އަހުމަދު ހުރީ ޔަޝްއަލްގެ އެޖުމްލައަށް ތައްޔާރު ވެގެންނެވެ.

ޔަޝްއަލް ފައިލް ނަގާ ބަލައިލިއެވެ. އޭގައި އިން ޔަޝާއާއި މާވީގެ ފޮޓޯފެނި ޔަޝްއަލްގެ ހަރަކާތްތައް ހުއްޓުނެވެ. “ކަލޭ ބޭނުން ގޮތެއް މީގަ އޮތީ. ނުހާގެ ކައިވެންޏައް ދިޔުންތޯ، ނުވަތަ މާވީއާއި ޔަޝާގެ ޖަނާޒާއަށް ދިޔުންތޯ. އަވަހަށް ގޮތެއް ނިންމާ” އަހުމަދު ހީލާފައި ބުންޏެވެ.

***

ފާރުގައި ހުރި ފޮޓޯތަކުން އަހުމަދު ލުބައިނާގެ ފޮޓޯގައި ރަސްގެ ލިޔެވެ. އޭރު ލުބައިނާ ގާތުގައި އިން އާދިލްގެ ފޮޓޯގައި ވަނީ ރަސްގެ ލެވިފައެވެ. ދެން އަހުމަދުގެ ދެލޯ ދައުރު ކޮއްލީ ޒެވިއަންގެ ފޮޓޯއަށެވެ. އެއާއި އެކު އޭނާގެ ތުންފަތަށް ވެރިވީ ނުލަފާ ހިނިތުންވުމެކެވެ.

އެނދުމަތީގައި ބަންޑުން އޮށޯވެލައިގެން އޮތް ޔަޝްއަލްގެ ނަޒަރު ހުއްޓިފައިވީ ސީލިންގުގައި އިން ފަންކާއަށެވެ. އެދެލޮލުގައި މީހެއްގެ ހިތް ފުނޑުފުނޑުވާހާ ވޭން އެކުލެވިފައިވިއެވެ. ނުހާ ބަދިގޭގައި ކަމުން ޔަޝްއަލް ބޭނުންވީ އިހްސާސްތައް ބޭރުކޮއްލަންށެވެ.

ފުންނޭވާއެއް ލާފައި ޔަޝްއަލް ދެލޯ މަރާލިއެވެ. އަމިއްލަ މީހާގެ ބަދުނަސީބު ކަން ހިތަށް އަރާފައެވެ. ލިލިއާ ބުނީ ހަމަތެދެއްތާއެވެ. އޭނާއަކީ އަހުމަދު ކުޅެން އުފަން ކުރި ބުދެކެވެ. އެވަގުތު ޔަޝްއަލްގެ ސިކުނޑީގައި އެނބުރެމުން ދިޔައީ ނުހާއާއި ކައިވެނި ކުރެވުނު ދުވަހުގެ މެންދުރު ވަގުތުގުގައި ލިލިއާ އާއި އެކު ދެކެވުނު ވާހަކައެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.