އިންސާފު ލިބޭނެބާ – 21

އަހަރެމެންނަށް މައުލޫމާތު ލިބިއްޖެ ޕޮލިހަކަށް ހަމަލާއެއް ދޭން މަސައްކަތް ކުރާ ކަމަށް.. ވަރަށް ބޮޑަށް އެމީހުން ވަނީ އެކަމަށް ރާވާފަ.. މައުލޫމާތު ލިބޭގޮތުންނަމަ މިރޭގެ ވަގުތަކު އެކަމެއް ކުރަން ތައްޔާރުވަނީ.. އަހަރެމެންނަށް މިކަން ނުހުއްޓިއްޖެނަމަ އެމީހަގެ ފުރާނައަށް ނުރައްކާ ވާނެ..” އެއް ނޭވާއިން ހާސްވެފައި ހުރެ ޒިޔަލް މާވިން ކުރި ސުވާލަށް ޖަވާބުދިނެވެ.

***ޕާޓް 21***

ޒިޔަލްގެ ވާހަކައިން މާވިންގެ ދެލޯ ބޮޑުވިއެވެ. ” އަހަރެމެންގެ ގޭންގުންތަ؟ ” މާވިން ހާސްވެފައިހުރެ އަހައިލިއެވެ. ” ނޫން ޝެޑޯ ގޭންގް ކިޔާ ގޭންގަކުން.. އެމީހުންގެ ޓާގެޓަކަށްވެފަ މިވަނީ، ތި ބްލަޑް މާފިޔާ ގޭންގުން އަލިފާން ޖެހި އަންހެންމީހާގެ ދަރި މަރައިލުމަށް..” ޒިޔަލް ކިޔައިދިނެވެ. ” އެއީ ދާރިއަންގެ ޕޮލިސް ޓީމްގެ ލީޑަރު.. ” ހާސްވެފައި މާވިން ބުންޏެވެ. ޒިޔަލް ބޯޖަހައިލިއެވެ. އަދި އަވަސް އަވަހަށް އެކަން ހުއްޓުވުމަށް ޓީމްއެއް ތައްޔާރު ކުރަން ފެށިއެވެ. މާވިން ދާރިއަންއަށް ގުޅަމުން ކެބިންއިން ނުކުތެވެ. ދާރިއަންއަށް ގުޅާފައި ސަފާރީގެ ޑެކްއަށް ނުކުތުމަށް ބުނުމަށްފަހު، މާވިން އެތަނަށް ދިޔައެވެ.

މާވިންއަށް ޑެކްއާއި ދިމާލަށް ދެވުން އިރު ދާރިއަން ހުރީ އެތަނުގައެވެ. ” ހޭ ކިހިނެތްވީ؟ ހާދަ ހާސްވެފަ މިތަނަށް އަންނަން ބުނީ.. ” ދާރިއަން ވާނުވާގައި ހުރެ އަހައިލިއެވެ. ” އުކައިލްއަށް ހަމަލާ ދޭން އެބަ ރާވާ.. ” މާވިން ބުންޏެވެ. ” ކާކު؟ އަހަރުމެން ގޭންގް ބައެއްތަ؟ ” ހާސްވެފައި ހުރެ ދާރިއަން އަހައިލިއެވެ. މާވިން ބޯހޫރުވައިލިއެވެ. ” ކޮންމެވެސް އެހެން ގޭންގެއް.. ޒިޔަލް ބުނީ ޝެޑޯ ގޭންގް ކިޔާ ގޭންގެކޭ.. ” މާވީން ދާރިއަންގެ ސުވާލަށް ޖަވާބުދިނެވެ. ” އުކައިލްއަށް ތި ކަންތައް އަވަހަށް އަނގަން ޖެހޭނެއެއްނުން. ” ދާރިއަން ފޯނުނަގަމުން ބުންޏެވެ.

މާވިން ދާރިއަންގެ އަތުން ފޯނު އަތުލިއެވެ. ” ކަލޭ މޮޔަވީތަ؟ ފޯނުން މިކަހަލަ ވާހަކައެއް ނުބުނެވޭނެ.. މިތަނުން އެބަ ފޮނުވާ ޓީމްއެއް މާލެއަށް އުކައިލް ރައްކާތެރިކުރަން.. ކަލޭ އެތަނުން ފެނިއްޖެޔާ އެމީހުން ޝައްކު ކުރާނެ.. ” މާވިން ބުންޏެވެ. ދާރިއަން ބޯޖަހައިލަމުން މާވިންގެ ވާހަކަ ގަބޫލު ކުރިއެވެ. ” ކޮންއިރަކު އެ ހަމަލާ ދޭން ރާވާފަ އޮތީ؟ ” ދާރިއަން އަހައިލިއެވެ. ” މިރޭ ކޮންމެސް އިރަކު..އެކަމަކު މިރޭ އެގަޑީގަ ވަދީހުމެން ބާއްވައެއްނުން ކަލޭގެ ޕާޓީވެސް ގޭންގަށް ވެއްދިކަމުގެ؟ ކަލޭ އެތާގަ ހުންނަން ޖެހޭނެ.. ” މާވިން ބުންޏެވެ. ” މަގޭ އެކުވެރިޔާ މަރުވާން ދޫކޮށްފަ މަ ޕާޓީ ކުރަންވީ؟ ތީ ހާދަ ހެއްވާ ކަމެކޭ ދޯ.. ނޫޅެން އެ ޕާޓީގަނޑަށް ދާކަށް މަށަށް ކޮންކަމެއް.. ” ދާރިއަން ހިތްހަމަ ނުޖެހިފައި ބުންޏެވެ.

މާވިން ބޯހޫރުވާލިއެވެ. ” ކަލޭ ތިހެން ހެދީމަ އެމީހުން ކަލެޔަށް ޝައްކު ކުރާނޭ.. ކަލޭގެ ވަރުގަދަ ސިކުނޑިއަށް އެކަމެއް ނޭނގޭތަ؟ ” މާވިން ދާރިއަންގެ ބޮލުގައި ފުއްޓައްކެއް ޖަހައިލަމުން ބުންޏެވެ. ދާރިއަން ރުޅި އައިސްފައި ހުރެ މާވިންގެ އަތް ފޮޅުވައިލިއެވެ. އަދި ތަންކޮޅެއް ދުރަށްގޮސް ސިގިރޭޓެއް ތުނބުގައި ޖަހާ އެތެރެއަށް ދަމާލިއެވެ. އޭނަގެ މޫނުން ފެންނަނީ ހާސްކަމާއި ރުޅިވެރިކަމެވެ. މާވިން ދެއްކީ ތެދުވާހަކައެއްކަން އެނގުނު ނަމަވެސް، އެކުވެރިޔާއަށް އެފަދަ ހަމަލާއެއްދޭން ރާވާފައި ހުއްޓަ ޕާޓީއަކަށް ދާކަށް ބޭނުމެއްނުވިއެވެ.

އުކައިލް ގޮސް އެތަނުގައި ހުރި ބެލްކަންޏަކަށް ނުކުތުނެވެ. ދާލިޔާ މަޑުމަޑުން އުކައިލްގެ ފަހަތުގައި ހުއްޓިލިއެވެ. ދާލިޔާ އިރުއޮއްސޭ މަންޒަރާއި ދިމާލަށް ބަލައިލިއެވެ. އޮރެންޖާއި ރަތް އަދި ގަދަ ދަނބުކުލައިގައިވާ އުޑު ފެންނަނީ މޮޅު ކުރެހުންތެރިއަކަށްވެސް ކުރަހައި ނުލެވޭނެހާ ފުރިހަމަކޮށްށެވެ. ރަތްކަންގަދަ އިރާއި މޫދާއި ގުޅޭ ހިސާބުން އިރުގެ އޮރެންޖް އަލިތައް މޫދުން ދަތުރުކުރަމުން ދިޔައެވެ. މީ ކިތަންމެ ހިތްގައިމު މަންޒަރެއް ނަމަވެސް އުކައިލްއަށް މި ހިތްގައިމުމަންޒަރުން އެއްވެސް އަސަރެއް ކުރިހެނެއް ހިޔެއްނުވެއެވެ. އޭނާގެ ވިސްނުން ދިޔައީ މާ ދުރަށް ދަތުރު ކުރަމުންނެވެ.

ސިގިރޭޓުގައި ރޯކޮށްލަމުން ތުބުގައި ޖަހަން އުޅެނިކޮށް ދާލިޔާ އެ ސިގިރޭޓު އަތުލުމަށްފަހު ފައިން އަރައި ޗިސްކޮށްލިއެވެ. ” އަހަރެން ވަރަށް ފޫހިވޭ ދުންބޯ ފިރެހެނުން ދެކެ.. ” އަނގައަށް ގޮތެއް ހަދައިލަމުން ދާލިޔާ ބުންޏެވެ. ދާލިޔާގެ ޖުމުލައިން އުކައިލްގެ މޫނަށް ކުޑަ ހިނިތުންވުމެއް ވެރިވިއެވެ. ” ދާޔާ ތިހެނެއް ނުބުނާނެ ދާޔާ އެއްފަހަރު ނަމަވެސް ރަހަބަލާލިއްޔާ.. ” އުކައިލް ހީލަމުން ބުންޏެވެ. ” ޗީޑި އަހަރެން ނޫޅެން.. ދޮންބެއަށް ތިކަހަލަ ޑެވިލްއެއް ނޫން މީހަކު ބެސްޓީއަށް ހަދަން ނުފެނުނީބާއޭ އަހަރެން ހިތަށް އަރަނީ.. ” ދާލިޔަ ކަޅި އަބުރާލަމުން ބުންޏެވެ.

” އަހަރެންނަށް އެހެން އެއްޗެއް ބޯން ލިބޭނެ ނަމަ ދާޔާ ބުނާހެން ދުމެއް ނުބޯނަމޭ.. ” ލާނެތް ގޮތަކަށް އެއްމިޔަކަނުން ހީލަމުން، ދާލިޔާގެ މަޑު ފިޔާތޮށިކުލައިގެ ވަށް ތުންފަތަށް ބަލައިލަމުން އުކައިލް ބުންޏެވެ. ދާލިޔާ އިރުކޮޅަކު އުކައިލް ބުނި އެއްޗެއް ނޭނގި ހުއްޓެވެ. އުކައިލް ދާލިޔާގެ ދުންފަތަށް ބަލަން ފެށުމުން އުކައިލް މާނަ ކުރި ގޮތް އެނގުމުން ދާލިޔާ އަވަހަށް އަނގަމަތީގައި އަތް އަޅައިލިއެވެ. ” ޔޫ ޑާރޓީ މައިންޑެޑް ޑެވިލް.. ” އުކައިލްގެ ކޮނޑުގައި މަޑުން ޖަހައިލަމުން ދާލިޔާ ބުންޏެވެ. އޭރު އޭނަގެ ކޯތާފަތައް ވަނީ މަޑު ރަތް ކުލައެއް އަރައިފައެވެ.

ދާލިޔާއަށް ވީ ގޮތުން އުކައިލް ހޭން ފެށިއެވެ. އުކައިލް ހޭން ފެށުމުން ދާލިޔާގެ ކޯތާފަތް ވަކިން ރަތްވިއެވެ. ނަމަވެސް ރުޅިއައިކަން ދައްކަން އޭނަ ދެލޯ އަޅައިލިއެވެ. ” އޯކޭ އޯކޭ ސޮރީ ދިމާކުރުން ނިމުނީ.. ދާޔާ ފޫހިވާ ކަހަލަ ފިރިހެނަކަށް އަހަރެނަށް ކިހިނެތް ވާނީ.. އިރާދަކުރެއްވިއްޔާ ދެން ސިގިރޭޓެއް ނުބޯނަން.. ހެޕީ؟ ” އުކައިލް އޭނާގެ ކަންފަތުގައި ހިފާލަމުން މާފަށް އެދޭ ފަދައިން ބުންޏެވެ. “ޕްރޮމިސް؟” ދާލިޔާ ކުޑަވާ އިނގިލި ނަގަމުން ކުޑަކުއްޖެއް ފަދައިން ބުންޏެވެ. ދާލިޔާގެ މި މައުސޫލު އަމަލުން އުކައިލްގެ ބަނޑުގައި ކޮކާ އުދުހޭ ފަދަ އިހްސާސެއް ކުރެވުނެވެ. މަޑުމަޑުން ހީލަމުން ބޯޖަހައިލުމަށްފަހު އޭނަގެ ކުޑަވާ އިނގިލި ދާލިޔާގެ އިނގިއްޔާ ގުޅުވައިލިއެވެ.

ދާލިޔާމެންގެ މި އަމަލު ބަލަން ހިޔަނިތަކުގެ ތެރޭގައި ހުރި މީހާ ފޯނު ނަގައި މީހަކަށް ގުޅައިލިއެވެ. ” ކޮބާ އެންމެން މިރެޔަށް ތައްޔާރުތަ؟ ” އެމީހަ ފޯނުގެ އަނެއްކޮޅުގައި ހުރި މީހައަށް ބުންޏެވެ. “ތައްޔާރު” ފޯނުގެ އަނެއްކޮޅުގައި ހުރި މީހަ އެހެން ބުނުމުން އެމީހަ ފޯނު ކަނޑާލުމަށްފަހު ނުލަފާ ގޮތަކަށް ހީލިއެވެ. އެމީހަގެ ދެލޮލުން ނަފްރަތުގެ އަލިފާން ކަނި ބުރާ ފަދައިން ހީވެއެވެ. ” މިހާރު ދެކުދިން ހޭނެ ވަރަކަށް ހީ މާދަން ޖެހޭނީ ރޮއެރޮއެ ބަލިވާންވިއްޔަ.. ” މަޑުމަޑުން އަމިއްލަ ނަފްސަށް އަޑުއިވޭ ވަރަށް އެމީހަ ބުންޏެވެ.

ދާލިޔާ އާއި އުކައިލް ސިހުނީ އިޔާދު ކަރުކެހިލުމުންނެވެ. އިޔާދު ގަދަކަމުން ހީލަމުން އެމީހުންގެ ގާތަށް އައިސް ހުއްޓުނެވެ. ” އޭނައަށް އަހަރެންގެ މައުލޫމާތު ލިބުނުގޮތް ބުނިތަ؟ ” އުކައިލް އަހައިލިއެވެ. އިޔާދު ފުން ނޭވާއެއް ދޫކޮށްލަމުން ބޯހޫރައިލިއެވެ. އުކައިލް އިސްތަށިގަނޑަށް އަތްމަހައިލަމުން މާޔޫސްކަމާއިއެކު ދުރު ބަލައިލިއެވެ. ދާލިޔާ އުކައިލްއަށް ހިތްވަރު ދިނުމުގެ ގޮތުން އުކައިލްގެ ކޮނޑުގައި އަތް ބާއްވާލިއެވެ. ” އަހަރެން އޭނައާ ވާހަކަ ދައްކާނަން.. ” އުކައިލް ބުންޏެވެ. ” އުކައިލް ޕްލީޒް ނޫން.. އުކައިލް އެތަނަށް ގޮސްފިއްޔާ ކަންތައް މާ ގޯސްވާނެ.. ” ދާލިޔާ ބުންޏެވެ.

” އެއީ ކީއްވެ؟ އަހަރެން އެތަނަށް ގޮސްގެން ކަންތައް ގޯސްވާންވީ؟ އަހަރެންމީ ފުލުހެއް.. އަހަރެންނަށް އަމިއްލަ ނަފްސު ކޮންޓްރޯލް ކުރަން އެނގޭ.. އެހެންނޫނީ ހީވަނީތަ އަހަރެންނަށް އެތަނަށް ގޮސްގެން އަމިއްލަ ނަފްސު ކޮންޓްރޯލް ނުވާނޭ؟ ހީވަނީތަ އެ ފިރެހެނާ އަހަރެންގެ މަންމަ އަދި ބައްޕައާ އެހެން ބެހުނީ އޭނަ ލައިގެން ހުރި އެއްޗެހީގަ ހިފާ މޭޒަށް ގަންނަވާލާނޭ؟؟ ” އުކައިލް ވާހަކަ ދައްކަމުން ދިޔަވަރަކަށް ދިޔައީ ދާލިޔާއާ ގާތަށް ޖެހެމުންނެވެ. ދާލިޔާ ފަހަތަށް ފިޔަވަޅު އަޅަމުންގޮސް ފާރުގައި އޭނަގެ ބުރަކަށި ޖެހުނެވެ. މިހާރު އެއީ ދާލިޔާއާ ދެންމެ ސަމާސާ ކުރި އުކައިލްހެން ހީވެސް ނުވެއެވެ. ދާލިޔާގެ ދެފަރާތުން އުކައިލްގެ އަތް ފާރުގައި ޖައްސާލަމުން ހައްޔަރުކޮށްލިއެވެ.

” އުކައިލް ކީއްތިކުރަނީ.. ” އިޔާދު އުކައިލްއާ ކައިރިވުމަށްފަހު، ދާލިޔާއާ ދުރައްޖެއްސުމަށްޓަކައި، އުކައިލްގެ ކޮނޑުގައި އަތް ޖައްސައިލިއެވެ. އުކައިލް ރުޅިގަދަވެ ހުރެ އިޔާދުގެ އަތް ފޮޅުވައިލިއެވެ. ” ދިސް އިޒިންޓް ޔޫ.. ” ދާލިޔާ އުކައިލްގެ ކޯތާފަތުގައި މަޑުމަޑުން އަތްލަމުން ބުންޏެވެ. ދާލިޔާގެ މަޑުފޮނި އަޑުން އުކައިލްގެ ރުޅިވެރި ސިކުނޑު ހޭލުއްވައިލިފަދައެވެ. ދާލިޔާގެ އަތުގެ ބީހުން އިހްސާސްވުމުން އުކައިލްގެ ހިތް އައިސްކްރީމްކޮޅެއް ވިރޭ ފަދައިން ވިރިގެން ދިޔަ ފަދައެވެ. އޭނައަށް އުޅެވުނު ގޮތް އިހްސާސްވުމުން އަވަހަށް ދާލިޔާއާއި ދުރަށްޖެހިލިއެވެ.

ނަމަވެސް ދާލިޔާ އުކައިލއަށް އޭނަޔާ ދުރުވުމުގެ ފުރުސަތެއް ނުދިނެވެ. ދާލިޔާ އުކައިލްގެ ކަނދުރާގައި އަތް އަޅުވައިލުމަށްފަހު އުކައިލްގެ ބޯ ގެނެސް އޭނަގެ ކޮނޑުގައި ބާއްވާލިއެވެ. އުކައިލް އޭނަގެ އަތް ދާލިޔާގެ ހަށިގަނޑުގައި ވަށައިލިއެވެ. ” އައިމް ސޮރީ.. ” މަޑުމަޑުން އުކައިލް ބުންޏެވެ. ދާލިޔާ އިރުކޮޅަކު އެއްޗެކޭ ބުނުމެއް ނެތި ހުއްޓެވެ. އުކައިލްގެ އިސްތަށިގަނޑުގައި އޭނާގެ ހިމަ އިނގިލިތައް ދިޔައީ ހަރަކާތް ކުރަމުންނެވެ. ” އިޓްސް އޯކޭ.. ” ދާލިޔާ މަޑުމަޑުން ބުންޏެވެ. ” އަހަރެން ކުޑަކޮށް ރެސްޓްކޮށްލަން ގެޔަށް ގޮސްލަނީ މިރޭ ދެން.. ” ފުން ނޭވާއެއްލުމަށްފަހު އުކައިލް ބުންޏެވެ. އޭނަގެ ދެލޮލުން ފެނިގެން ދަނީ ވަރުބަލި ކަމުގެ އަސަރުތަކެވެ.

ދާލިޔާ ބޯޖަހައިލުމަށްފަހު އުކައިލްގެ ގައިން ދޫކޮށްލިއެވެ. އުކައިލް ކުޑައިރުކޮޅަކު ދާލިޔާގެ ހަށިގަނޑުގައި ހިފަހައްޓައިގެން ހުއްޓެވެ. އޭނަގެ ހިތުގައި ބޮޑު ކަމެއްވާން އުޅޭފަދަ އިހްސާސްއެއް އުފެދުނެވެ. ދާލިޔާގެ ހަށިގަނޑުގައި ވަށައިލައިފައިވާ އަތް ކުޑަކޮށް ބާރުކޮށްލުމަށްފަހު ދޫކޮށްލިއެވެ. ” އައި ލަވް ޔޫ.. ” މަޑުމަޑުން އުކައިލް ބުންޏެވެ. ދާލިޔާގެ ކޯތާފަތަށް ރަތްކުލަ އަރައިގެން ދިޔައެވެ. ” ދާޔާގެ ޖަވާބަކަށް މުޅި އުމުރު ދުވަހު އިންތިޒާރު ކުރަން ޖެހުނަސް އަހަރެން ކުރާނަން.. ” މަޑުމަޑުން ދާލިޔާގެ އަތުގައި ތުންފަތް ޖައްސާލަމުން އުކައިލް ބުންޏެވެ.

އުކައިލް ދާލިޔާއަށް ލޯބިން ފުރިފައިވި ހިނިތުންވުމެއް ދިނުމަށްފަހު، އޭނަގެ އޮފީހަށް ވަދެ ފޯނާއި ކާރުގެ ތަޅުދަނޑި ހިފައިގެން ބޭރަށް ނިކުތުނެވެ. ކާރަށް އަރައި އޭނަގެ ގެއަށް ދިޔުމަށްޓަކައި ދުއްވާލިއެވެ. އޭރު އޭނަގެ ހިތުން ބޮޑު ހިލަގަނޑެއް ނަގައި އެއްލާލެވުނުކަމުގެ އިހްސާސް ކުރެވުނެވެ. މަޑު ރާގަކަށް ލަވަ ކިޔަމުން ދިޔަ އުކައިލްއަށް ކާރު ކުއްލިޔަކަށް ހުއްޓާލެވުނީ ފަހަތުން އައި ކާރެއް އޭނަގެ ކާރުގެ ފަހަތުގައި ބާރަށް ޖެއްސުމުންނެވެ. އުކައިލްގެ ބޯ ކާރުގެ ހުންގާނުގައި ޖެހުނުލެއް ބާރުކަމުން ބޯ ފަޅައިގެންގޮސް ރަތްކުލައިގެ ލޭތަށް ފާބައިގަތެވެ. މޫނުގައި މާސްކްތަކެއް އަޅައިގެން ހުރި ބަޔެއް އައިސް އުކައިލްގެ ކާރުގެ ކުޑަ ދޮރު ތަޅައިލުމަށްފަހު އުކައިލް އެ ކާރުން ނެރުނެވެ.

އެމީހުންތައް އުކައިލް ބިންމައްޗަށް ހޫރައިލާ ގައިގެ އެތަން މިތަނުގައި ތަޅަން ފެށިއެވެ. ކުއްލިއަކަށް އެތަން އެމް.ވީ.އެސް.އޭ ގެ މީހުންތަކުން ވަށައިލިއެވެ. އެމީހުން ތިބީ ކަނޑު ނޫކުލައިގެ ޔުނީފޯރމްގައި މޫނު ނިވާކުރުމުގެ ގޮތުން މާސްކު އަޅައިގެންނެވެ. އެމީހުން އުކައިލްއަށް ހަމަލާ ދިން މީހުން ތަޅާ ބަލިކުރަން ފެށިއެވެ. ސައިކަލުގައި ދިޔަ ދާލިޔާއަށް ބަޔަކު ތަޅާފޮޅާ މަންޒަރު ފެނުމުން އެތަނާ ކައިރިވާން އުޅުނެވެ. ދާލިޔާއަށް އުކައިލްގެ ކުރިމަތި އަދި ފަހަތުގައި ބަޑި ދިއްކޮށްގެން ހުރި ދެ މީހުން ފެނުމުން، އޭނަގެ ހިތުގައި ހިފާ މީހަކު ފިއްތައިލި ކަމުގެ އިހްސާސްވިއެވެ. ދާލިޔާ އޭނަގެ ހަށިގަނޑަށް ހަރަކާތެއް ގެންނަން އުޅުނު ވަގުތު ބަޑީގެ ވަޒަނުގެ އަޑާއި ދާލިޔާގެ ހަޅޭކުގެ އަޑު އެއްވެގެން ދިޔައެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.