ހަސްކާ

އަހަރެންނަށް ހޭލެވުނީ ސިއްސައިގެން ގޮސްފައެވެ. ދޮރު ދާރައިން ގޭތެރެއަށް އެޅިފައި ވާ ރަން އަލި ފެނުމާއެކު އަހަރެންގެ ހިތް ތެޅިގަތީ އެހެނެއް ބަލާފައެއް ނޫނެވެ. އަވަސް އަވަހަށް ތެދުވެ އިސްތަށިގަނޑު އޮޅަލަމުން ހުޅިއެއް ޖަހާލީމެވެ. ގިފިއްޔަށް ވަދެ މޫނު ދޮވެލައި ހަދާލައިގެން ލިބާސް ރީތި ކުރަމުން ކިޔަވަން ގެންދާ ފިލާ ހިފައިގެން ހިނގައިގަތީމެވެ. އެއިރު އަދި ގޭގެ އެކަކުވެސް ހޭނުލައެވެ. ގޭގެ ބޮޑު އުނދޯލީގައި ބައްޕަ ގަދައަށް ނިދާފާ އޮތެވެ. މަންމަ އޮތީ ދިމާ އެނދުގައެވެ. ކޮއްކޮމެންވެސް ބޮޑު އެނދުގައި އެގޮތް މި ގޮތަށް ނިދާފައި ތިއްބެވެ.

ގޭތެރެ ބަލަން ވަގުތު ނެތުމާއެކު ލިބާސް ކޮށިކޮށްލަމުން އަހަރެން އަވަސް އަވަހަށް ހިނގައިގަތީ އެދުރު ގެއަށް ދިއުމަށެވެ. ގަޑި ޖެހިއްޖެ ނަމަ އަދަބު ލިބޭނެތީ އަހަރެންގެ ހިތް ވަނީ އަވަސް ވެފައެވެ. މިއާދެވެނީ އަދި ސައި ނުކައްކާކަން އަހަރެންގެ ހަނދަނަށް އައިއިރު އަހަންނަށް ހުރެވުނީ ގޭއާ ފުދޭވަރަކަށް ދުރުގައެވެ. އެހެންކަމުން ކުޑަކޮށް މަޑުވެސް ކޮށްލެވުނެވެ. ނަމަވެސް ކުރެވޭނެ އިތުރު ކަމެއް ނެތެވެ. އެއްކޮޅުން ޤުރުއާން ކިލާހެވެ. އަނެއްކޮޅުން ހެނދުނުގެ ސައެވެ. މި ދެކަންތަކުން އެންމެ ކަމެއް ނުކުރެވުނަސް އަހަންނަށް އަދަބު ހައްޤު ވާނެއެވެ. ބޮޑަށް ވޭން އަޅާނީ މަންމަ ދޭ އަދަބުގައި ކަން އަހަންނަށް އެނގެއެވެ. ނަމަވެސް އަހަރެން ހިނގައިގަތީ އެދުރު ގޯއްޗާ ދިމާއަށެވެ.

 އަވަސް އަވަހަށް ފިޔަވަޅުތައް އަޅަމުން މަގުމަތިން ހިނގާފައިދިޔައިރު، ކުނިކަހަން ނުކުމެ އުޅޭ ދެތިން އަންހެނުން ފެންނަމުންދިޔައެވެ. ރޭ ވެހުނު ވިއްސާރައިގެ ސަބަބުން، މަގުގެ ދެތިން ދިމާއެއްގައި ފެން ހެދިފައި ހުއްޓެވެ. ގަސްތަކުގެ ފަތްތަކުގައިވެސް ކޮންމެވެސް ވަރަކަށް ފެނުގެ އަސަރު ހުރުމުގެ ސަބަބުން މަންޒަރު ފެންނަމުން ދިޔައީ ނުހަނު ތާޒާ ކަމާއެކުގައެވެ. އަރައިގެން އައި އިރުގެ ރަން އަވިން މުޅި އަޑުމަތި އެކީ އެކައްޗަކަށް ވިރުވާ އަޅަމުން ދިޔައެވެ. ގަދަ ނޫކުލައާއި ރަން ކުލަ އެކުވެގެން އުފެދުނު ‘ކުލަ މަޖާ’ ގަނޑު، ބަލާލަން ކިތަންމެހާވެސް ހިތްގައިމެވެ.

ފަސްވަރަކަށް މިނެޓް ހިނގުނު އިރު އެދުރު ގޯތި ފެންނަން ހުއްޓެވެ. އަހަރެން އަދިވެސް އިތުރަށް ހިނގުން ބާރު ކޮށްލީމެވެ. އެއިރު މަޑުމަޑުން އެގެއިން ޤުރުއާން ކިޔެވުމުގެ އަޑު އިވެން ފަށައިފިއެވެ. އަހަރެން ދުއްވައިގަތީ އެހާ ހިސާބުންނެވެ.

އެދުރު ގެއާ އަރާ ހަމަވީއިރު އަހަރެންނަށް ހުރީ މައި ނޭވާ ލެވިފައެވެ. ޖަހާފައި ހުރި ހުޅިވެސް އެއިރު ރޫޅިގެން އައިސް އަހަރެންގެ މޫނުމައްޗަށް އެޅިއްޖެއެވެ. އަތުން އިސްތަށިގަނޑު ހަމައަކަށް އަޅުވާލަމުން ލަދުވެތި ލަސް ހިނގުމެއްގައި އަހަރެން އެެތެރެއަށް ވަނީމެވެ. ހަރުއަޑުން ޤުރުއާން ކިޔަވަމުން ދިޔަ ހުރިހާ ކުދިންގެ ނަޒަރު އަހަރެންނަށް ހުއްޓުނެވެ. އެދުރުބެ ގެ ރުޅިވެރި ނަޒަރު އަހަރެންނަށް ހުއްޓުނީ އޭގެ ފަހުންނެވެ.

އެދުރުބެގެ އަދަބު އަހަންނަށް ހައްޤު ވީއެވެ. ދަނޑިބުރިއަކުން އަހަރެންގެ އަތުގައި އެދުރުބެ ޖެހިއެވެ. ލޮލުން ކަރުނަ ހިލުނީ ނަގައިގަތް ދިލައެއްގެ ބޮޑުކަމުންނެވެ. ދަތް ކުނޑި ވިކާލަމުން އަހަރެން ކެތް ކުރީމެވެ. އެދުރުބެ އަހަރެންގެ ގައިގާ ޖެހީ އެންމެ ފަހަރަކު ނޫނެވެ. އަތުގައި ޖެހީ އެންމެ ފުރަތަމަ ފަހަރުއެވެ. ދެން ޖެހީ އުނަގަނޑުގައެވެ. ބަނޑުގައި ވެސް ޖެހިއެވެ. އަހަރެންނަށް ރޮއެ ގަނެވުނީ އެހާ ހިސާބުންނެވެ.

“ގަޑި ނުޖެހި އަންނަން އެނގޭނީ މިހާވަރު ކުރީމަ! އަދިވެސް ގަނޑި ޖެހޭނަން؟؟؟ އޭނ؟؟” ފަހަރަކު ބޮނޑިއެއް އަޅަމުން ދިޔައިރު އަހަރެންނަށް ހުރެވުނީ ގިސްލަ ގިސްލާފައި ރޯށެވެ. ކުރެވޭނެ އިތުރު ކަމެއް އެބޮތް ހެއްޔެވެ؟ އަހަރެން ފަދަ ނިކަމެތި އަންހެން ކުއްޖަކު، އިދިކޮޅައް އެންމެ ބަހެއް ބުނެލިއަސް…….

އަދަބު ދީ ނިމުނު ކަމުގައި ވިއަސް އަހަންނަށް ހުންނަން ޖެހުނީ ރޯ އަވީގައެވެ. މުޅި ގައިން ދިލަ ނަގަމުން ދިޔައެވެ. ދަނޑިބުރިން ޖެހި ކޮންމެ ތަނަކުން ލޭ ކޮށިފައި ހުއްޓެވެ.

މިއީ އަހަރެންގެ އާދައެވެ. ކޮންމެ ދުވަހަކު އެތަށް ވޭނަކާ ކުރިމަތި ލާން ޖެހެއެވެ. މިއީ އަދި ދުވަހުގެ ފެށުމެވެ. ކުރިންވެސް ބުނި ފަދައިން، މަންމަ ގެ އަދަބު އަދި މާ ބޮޑު ވާނެއެވެ. މާ ވޭން އަޅާނެއެވެ. އެހެން ހިތަށް އެރުމާއެކުވެސް މުޅި ގައިން ހީބިހި ހިލުވާލިއެވެ.

އަހަރެންގެ މަންމައަކީ ދަރިން ދެކެ ލޯބިވާ މަންމަ އެކެވެ. ނަމަވެސް ރުޅި އައިސްފި ނަމަ ކުރެވޭ ނުކުރެވޭ ކަމެއްވެސް ނޭނގޭނެއެވެ. އަތުގައި އެވަގުތަކު އޮންނަ އެއްޗަކުން މަންމަ ޖަހާފާނެއެވެ. އެއީ ބޮޑު ގާ ބުރިއަކަށް ވިޔަސް ވެހެވެ. އަހަރެންގެ އުމުރުން 12 އަހަރު ވެފައިވާއިރު، އެ ފަދަ ކިތަންމެ އަނިޔާ އަކާ މިހާރު ކުރިމަތި ލާފައި ހުންނާނެއެވެ.

މަންމަ އުޅެމުންދިޔަ އަވަދިނެތި ދިރިއުޅުން ވަރަށް ކައިރިން އަހަރެން ދުށީމެވެ. ޅަ އުމުރުގައި ގިނަ ކުދިންތަކެއް ވިހެއުމުގެ ސަބަބުން މަންމަގެ ހަށިގަނޑު ވަރަށް ބަލިކައްޓެވެ.  ކައިރި ކައިރިން ކުދިން ވިހެއުމުގެ ސަބަބުން މަންމަ އަށް ބަލަން ޖެހިފައިވަނީ ދާދި އެއް އުމުރެއްގެ ކުދިން ތަކެކެވެ. އަހަރެން މިއީ އެންމެ ދޮށި ކުއްޖާއެވެ. އަހަރެންގެ އިތުރުންވެސް މަންމަގެ 6 ކުދިން ތިބެއެވެ. މަންމަ ފެންނަ ކޮންމެ ފަހަރަކު އަހަރެންގެ ހިތް ހަމްދަރުދީއިން ފުރެއެވެ. އެއީ ހާދަހާ ވާ ކުޅަ ދާނަ މަންމަ އެކެވެ.

ކިޔަވާ ނިމުމައެކު އަހަރެން އަވަސް އަވަހަށް އެދުރުގެއިން ނުކުތީމެވެ. އެއިރު މުޅި ދުނިޔެ ވަނީ އިރުގެ ހޫނު އަވިން ދިއްލާލާފައެވެ.

ހަށިގަނޑުން ނަގަމުން ދިޔަ ދިލައަށް ސަމާލުކަމެއް ނުދީ އަހަރެން ހިނގައިގަތީ ގެއާ ދިމާއަށެވެ. ގެއަށް ވަދެވޭ ތަނުން ކުރިމަތި ވާނީ ކޮންފަދަ ހައިޖާނުގަނޑަކާކަން އަހަރެންނަށް އެނގެއެވެ. ނަމަވެސް އެންމެ ފިޔަވަޅެއްވެސް އަހަރެން ފަހަތަކަށް ނުޖެހެމެވެ. ނުވެސް ޖެހޭނަމެވެ. މަންމަ ގެ އަތުން ލިބޭ އަދަބަކާ އަހަރެން ކުރިމަތި ލާނީ ކެރިގެން ހުރެއެވެ. އަހަރެމެން ދުނިޔެއަށް އުފަން ކުރުމަށްޓަކައި އެ މަންމަ އުފުލިވަރުގެ ވޭނެއް އެހެން އެކަކަށްވެސް ނުއުފުލޭނެއެވެ. އަހަރެން ކެތް ކުރީ އެހެންވެގެންނެވެ. ސުވަރުގެ ވަނީ މަންމަގެ ފައިތިލަ ދަށުގައެވެ.

ގެ ހުރި ގޯޅިއަށް އެޅުމާއެކު އަހަރެންގެ ކަޅި ގޮސް ހުއްޓުނީ މަންމަގެ ރުޅިވެރި މޫނަށެވެ. ފާރުގައި އަތް ވިއްދައިގެން ހުރުމަށްފަހު މަންމައަށް އަހަރެން ފެނުމާއެކު އަވަސް އަވަހަށް އަހަންނާ ދިމާއަށް ހިނގައިގަތެވެ.  މަންމަގެ އަތުގައި އޮތް ދާނި ދަނޑި އަހަންނަށް ފެނުނީ މާ ފަހުންނެވެ. ހިތުގައި ބިރުވެރިކަން ހިނގައިގަތެވެ. ނަމަވެސް އަހަރެންގެ ފިޔަވަޅުތަކަށް އެންމެ ބަދަލެއްވެސް ނުގެންނަމެވެ.

މަންމަ އައިސް ހުއްޓިލީ އަހަރެންގެ ކުރިމައްޗަށެވެ. އަހަންނަށްވެސް މަޖުބޫރުވީ ހުއްޓޭށެވެ. އިސްޖަހައިގެން އަހަރެން ހުރީ މަންމަ ދޭ އަދަބެއް ދޭން ދޫކޮށްލައިގެންނެވެ.

ދާނި ދަނޑި އަތަށް ހެޔޮވަރުކޮށްލުމަށްފަހު ވަރުހުރި އެތިފަހަރެއް އަހަރެންގެ އުނަގަނޑުގައި މަންމަ ޖެހިއެވެ. ހީވީ މުޅި ދުނިޔެ ކުދި ކުދިވެގެން ފޭބިހެންނެވެ. މޫނުމައްޗަށް އަނދިރިވާން އުޅުނުހެން ވެސް ހީވިއެވެ. އަތުގައި އޮތް ޤުރުއާން ފިލާ ވެސް ވެއްޓުނެވެ. އަހަރެންނަށް އަތް ވިއްދާ ލެވުނީ ފާރުގައެވެ. ނުވެއްޓި އަހަރެން ސަލާމަތް ވީ އެހެންވެއެވެ.

އަނެއްކާވެސް މަންމަ ޖެހިއެވެ. މިފަހަރު މަންމަގެ ހޫނު ހަމަލާ އެރީ އަހަރެންގެ ފަޔަށެވެ. ހިވީ ކަށިމަތިން ބިނދައިގެން ދިޔަހެންނެވެ. ޖެހުނުތަން އިސާހިތަކު ދުޅަވެ އަރައިފިއެވެ.

“ހަޔާތް ކުޑަ!! ސައި ނުހަދާ ފިލައިގެން ރައްކާވާން ލަދެއްވެސް ނުގަތެއްނު! ހުރެބަލަ މިފަހަރު ކުޅި ދައްކާލާނަން!” ކަރު ބުޑުން މަންމަ ހަޅޭލަވައިގަތެވެ. އެއަށްފަހު މަންމަ ހިފީ އަހަރެންގެ ލިބާގުގެ ކަރުގައެވެ. ލުއްކެތް ޖަހާލުމާއެކު ލިބާސް ދެފަޅިއަށް ވީދިގެން ދިޔައެެވެ. އަހަންނަށް ބަޖުބޫރުވީ ދެއަތުގެ ހިމާޔަތުން އަހަރެންގެ ހަށިގަނޑުގެ އަބުރު ރައްކާތެރިކުރާށެވެ.

“ފިލާ ގަނޑު ހިފައިގެން އަމާ ގާތަށް އަމާ ދަސްކުރަން ތަ މި ދުވަނީ؟؟ ސައި ނުހަދާ ކީއްވެ ނުކުމެގެން ދިޔައީ؟؟” މަންމަ އަނެއްކާވެސް ތަޅައިގަތެވެ. އަހަރެން ގިސްލަ ގިސްލާފައި ރޮމުންދިޔައިމެވެ. އެއިރު އަވައްޓެރިން ވެސް އެތަނަށް އެއްވާން ފަށައިފިއެވެ. ހާމައަށް އޮތް އަހަރެންގެ ހަށިގަނޑާ ދޭތެރޭވެސް މަންމަ ފަރުވަލެއް ނުބެހެއްޓިއެވެ. ދެ އަތް ހަށިގަނޑުގައި ވަށާލައިގެން އަހަރެން ހުރީ ގޮތް ހުސްވުމުގެ އިތުރުން ލަދުވެސް ގަނެފައެވެ.

“ހައްވާ މޮޔަވީތަ؟” ދެލޯ ފިއްތާ ބާރުކޮށްގެން ހުރުމަށް ފަހު އަހަންނަށް ލޯ ހުޅުވާލެވުނީ އަވައްޓެރި ސަމީމަ ދައިތަގެ އަޑަށެވެ. އެއިރު ސަމީމަ ދައިތަ ހުރީ މަންމަގެ އަތުގައި އޮތް ދާނި ދަނޑީގައި ހިފަހައްޓައިގެންނެވެ. “ބަލަ އެއީ ބޮޑުވެފައި ހުރި އަންހެން ކުއްޖެކޭ، ތިޔަ ހެން ހަދާކަށް ނުވާނެ އެއްނު…”

އެދުވަހު އަހަރެން ސަލާމަތް ކުރީ ސަމީމަ ދައިތައެވެ. ސަމީމަ ދައިތަގެ ގެއަށް ގެނެސް އަހަރެން ވެއްދިއިރުވެސް މަންމަ ކަރުބުޑުން ހަޅޭ ލަވާ އަޑު އަހަރެން އެހީމެވެ.

އަހަރެން ކެތް ކުރީމެވެ. އެއީ އަހަރެންގެ މަންމަ އެވެ. މިއަދު އަހަރެންގެ ގައިގާ މި އެޅި ވޭނަށްވުރެ ވަރުގަދަ ބޮޑު ވޭނެއް މަންމަ ވަނީ އުފުލާފައެވެ. ވީއިރު މަންމަ އަށް އިޙުތިރާމް ކުރުން ނޫން އެހެން ގޮތެއް އެބަ އޮތް ހެއްޔެވެ؟

މަންމަ އަހަރެންގެ ގައިގާ ތެޅި ތަންތަން ހުރީ ފަޅައިގެން ގޮސްފައެވެ. މުޅި ގައިން ދިލަ ނަގަމުން ދިޔައެވެ. ސަމީމަ ދައިތަ އަހަރެން ގެނެސް ވެއްދީ ގިފިއްޔަށެވެ. ފެން އަޅައިގެން ހަށިގަނޑުގައިވާ ލޭތަށް ސާފުކޮށް ބޭސް އަޅައިދިނީވެސް ސަމީމަ ދައިތައެވެ. އެ ދުވަހު ސަމިމަ ދައިތަ ގައިގާ ބައްދައިގަނެގެން އޮވެ އަހަރެން ރުއީމެވެ. ހިތުގައިވީހާ އުދާސްތަށް ބޭރުކުރީ ކަރުނައިގެ ސިފައިގައެވެ.

އޭގެ ފަހުން ގަޑިއިރެއްވެސް ނުވިއެވެ. މަންމަ އަހަރެން ބަލައި އަތުވެއްޖެއެވެ. އަހަރެން ކުރިންވެސް ބުނިފަދައިން މަންމަ އަކީ ދަރިން ދެކެ ލޯބިވާ މަންމަ އެކެވެ. އެ ދުވަހު މަންމަ ރުޔެވެ. އަހަރެންގެ ގައިގާ ފިރުމީ ހަމަ އަހަރެންގެ ގައިގާ ތެޅި ދެ އަތުންނެވެ. ތަފަތަކީ، އެ ދެއަތުން މިހާރު  އުތުރި އަރަމުން ދަނީ މައިވަންތަ ކަމުގެ ލޯބި ކަމެވެ. އަހަރެން ހިތާ ހިތުން މަންމަ އަށް މައާފް ކުރީމެވެ.

***

އަހަރެން މިއަދު މިއީ 5 ކުދިންގެ މަންމަ އަކީމެވެ. އަހަރެންގެ މަންމަ އަހަންނަށް ކުރި އަނިޔާ ދުވަހަކުވެސް ހަނދާނެއް ނުނެތޭނެއެވެ. ނަމަވެސް  އަހަރެން ހިތް ހަމަ ޖައްސާލަނީ އެ މަންމަ އަހަރެންގެ ގައިގާ ފިރުމި ދުވަސްތައް މަތިން ހަނދާން ކޮށްލައިގެންނެވެ. އެއިރު އެޅި ވޭނަށްވުރެ ފަހުން ފިރުމި ފިރުމުމުގެ އަރާމު މާ ބޮޑެވެ.

މަންމަ އަހަންނަށް ދެއްކި ހަސްކާ، އަހަރެންގެ ދަރިންނަށް ދައްކާކަށް އަހަރެން ބޭނުމެއް ނޫނެެވެ. އުމުރުން 13 އަހަރުގައި އަހަރެން މީހަކާ އިނދެފީމެވެ. އަހަރެން ހީކުރީ އަހަރެން ކެތްކުރި ފަދައިން އަހަރެންގެ ކޮއްކޮމެންވެސް، މަންމަގެ އަނިޔާއަށް ކެތް ކުރާނެ ކަމަށެވެ. ނަމަވެސް އެހެންނެއް ނުވިއެވެ. އަހަރެންގެ ކޮއްކޮ ސިއާދާ ގެ ދިރިއުޅުމަށް ބަލައިލުމުން ނުހަނު ސާފުކޮށް އެކަން އެނގިގެން ދިޔައެވެ.

ސިއާދާ އަކީ ހަމަ ދެވަނަ ‘މަންމަ’ އެވެ. ހަމަ އެހާ ޒީލަ ގަދައެވެ. އެހާ ރުޅި ގަދައެވެ. އޭނާ ގެ ދަރިންތަކަށް އޭނާ ކުރާ އަނިޔާ އަހަރެން ދެކެމެވެ. ބައެއް ފަހަރު ކުދިން ރުޅިއައިސްގެން ގެއިން ނުކުމެގެން ދޭވެސްމެއެވެ. އަހަރެން ކިތަންމެ ފަހަރަކު ސިއާދާ އަށް ނަސޭޙަތް ތެރި ވީމެވެ. ނަމަވެސް ވީ ފައިދާ އެއް ނެތެވެ. މަންމަ ފަދައިން ސިއާދާވެސް ގިނަ ކުދިންތަކެއް ވިހެއެވެ. އަނެއް ކޮޅުން އޭނާގެ ފިރިމީހާއަކީވެސް އެހާ ޒީލަ ގަދަ މީހެކެވެ. ހުރިހާ ކަމަކާ ވިސްނަން ހަދައިގެން ސިއާދާގެ ބޯ ގޮވީއެވެ. ހުރިހާ ރުޅިއެއް ބޭލެނީ ދަރިން ތަކަށެވެ.

އަހަރެންވެސް މީ ހަމަ އެ މަންމަ ގެ ދަރިއެކެވެ. ސިއާދާވެސް މެއެވެ. ނަމަވެސް ތަފާތަކީ ދެ މީހުންގެ ވިސްނުމެވެ. މަންމަ ސިއާދާއަށް ކުރި އަނިޔާގެ ދެ ގުނަ އަހަރެން ތަހައްމަލް ކޮށްފައިވާނެއެވެ. ނަމަވެސް އެންމެ ފަހަރަކުވެސް އަހަރެންގެ ދަރިއެއް ގައިގާ އަހަރެން ނުޖަހަމެވެ. ނަމަވެސް، ދަރިއަކަށް ކުރެވޭނެ ހުރިހާ އަނިޔާއެއް ސިއާދާ ދަރިންނަށް ކުރެއެވެ. އެކުދިންވެސް ބޮޑެތި ވެގެން އަންނައިރު އަޅާނީ ދެ މަގަކުންނެވެ. ހުރިހާ ކުދިންނަކީ އަހަރެން ފަދައިން ކެތްތެރިކަން އިޚްތިޔާރު ކުރާނެ ކުދިންނެއް ނޫނެވެ. ޤަބޫލު ކުރަން ކިތަންމެ ދަތިވިއަސް މީ ހަޤީޤީ ހާދިސާ އެކެވެ.

ނިމުނީ