ޒާޔާ (ސަތުތިރީސްވަނަ ބައި)

“ކޮބާ. އިންތިޒާރުގަ ބަހައްޓާނީތަ؟” ޖަމީލާ އަހައިލިއެވެ. “ނޫނޭ. މިހާރު ހަމަ އެ އަންނަނީ. އަހަރެން ތިނަކަށް ގުނަންވާއިރަށް އެ ހަދިޔާ ހުންނާނީ ހަމަ ޖަމީލާގެ ކުރިމަތީ.. އެކެއް… ދޭއް……. ތިނެއް.” ނިހާން އެހިސާބަށް ގުނައިލިއިރު ޖަމީލާގެ ކޮނޑުގައި މީހަކު އަތް އަޅުވައިލިއެވެ. ޖަމީލާ ފަހަތް ބަލައިލުމާއިއެކު އޭނާއަށް ލިބުނީ ކުއްލި ހައިރާންކަމެކެވެ. ކުރިމަތީ ހިނިތުންވެލައިގެން އޭނާއާއި ދިމާލަށް ބަލަހައްޓައިގެން ހުރި މީހާ ފެނި ޖަމީލާ ހުރީ މިއީ ޙަޤީޤަތެއްކަމަށް ޤަބޫލުކުރަން ދަތިވެފައެވެ.

“ކޮބާ؟ ކަމުދޭތަ؟” ދެލޯ ބޮޑުކޮށްގެން ޒާޔާ އާއި ދިމާލަށް ޖަމީލާ ބަލަހައްޓައިގެން ހުއްޓައި ނިހާން އަހައިލިއެވެ. ޖަމީލާ އެއްވެސް އެއްޗެކޭ ނުބުންޏެވެ. ހަމަ އެހުރިގޮތަށް ޒާޔާއަށް ބަލަހައްޓައިގެން ހުރީއެވެ. ދެއަހަރު ފަހުން ޒާޔާ ފެނުނުއިރު ޒާޔާ އެހުރީ ކުރިއަށްވުރެވެސް މާ ރީތިވެފައެވެ. ޖަމީލާ ހީކުރީ ޒާޔާ މިވޭތުވެ ދިޔަ ދުވަސްތަކުގައި އުޅޭނީ ވަރަށް ނިކަމެތި ދިރިއުޅުމެއްކަމުގައެވެ. އެހެނަސް އެކަން އެހެނެއް ނުވިތާއެވެ.

“ތި ދެމައިން ވާހަކަ ދައްކާލާ. އަހަރެން މި ދަނީ އެކޮޅަށް.” ނިހާން އެހެން ބުނެފައި އެތަނުން ދިޔައެވެ. އޭނާ އެހެން އެހެދީ އޭނާ ދިޔުމުން ޖަމީލާ ޒާޔާއާއި ދިމާލަށް އެއްޗެހި ކިޔާނެކަން އެނގޭތީއެވެ. އަދި އޭރުން އުސްމާނަށްވެސް ޖަމީލާގެ ގޮތް ފެނިގެންދާނެކަން އެނގޭނެކަން އެނގިހުރެއެވެ.

ނިހާން ދިއުމުން ޒާޔާ ކުޑަކޮށް ހިތް ނުތަނަވަސްވެ ބިރުގަތެއްކަމަކު ހިތްވަރު ކުރެވޭތޯ ބެލިއެވެ. މިފަހަރު ޖަމީލާ ކުރިމަތީގައި ޒާޔާ ބަލިވާކަށް ބޭނުމެއްނޫނެވެ. ޖަމީލާ އަކީ ކާކުކަން މިއަދު އެންމެން ކުރިމަތީ ހާމަކޮށްލާނީ ހަމަ ޒާޔާގެ ދުލުންނެވެ. ޖަމީލާ ޒާޔާ ބޭޒާރުކޮށްލީ މީސްމީޑިއާގައެވެ. ޒާޔާ މިފަހަރު ޖަމީލާ ބޭޒާރުކޮށްލާނީ ހަމަ ރަށުތެރޭގައެވެ.

ޒާޔާ އެހެން ހުރެފައި ޖަމީލާގެ އަތުގައި ހިފަހައްޓައިލިއެވެ. އަދި ތުނޑިން ނުކުންނަން ހިނގައިގަތެވެ. “ޒާޔާ. ކޮންތާކަށް ތި ދަނީ؟” ޒާޔާގެ އަތް ނައްޓުވަން މަސައްކަތް ކުރަމުން ޖަމީލާ އެހިއެވެ. ނަމަވެސް ޒާޔާ އެއްވެސް އެއްޗެކޭ ނުބުނެ ޖަމީލާ ގޮވައިގެން ބާރަށް ހިނގަމުން ދިޔައެވެ. ރަށުތެރެއަށް ނުކުމެވުމުން ޖަމީލާ އެންމެ ފަހުން ޚަތިޔާރު ބެހެއްޓިއެވެ. މީހުންތައް އެމީހުނަށް މާވަރަކަށް ބަލާތީ ޖަމީލާ އެންމެ ފަހުން ވާހަކަ ދެއްކުން ހުއްޓައިލައި ޒާޔާއާއިއެކު މަޑުމަޑުން ހިނގައިލައިފައި ދިޔައީއެވެ.

ކޮންމެއަކަސް ބަނދަރުމައްޗަށް އައިސްފައި ޒާޔާ ހިނގުން ހުއްޓައިލިއެވެ. ޖަމީލާ ހުރީ ޒާޔާ އޭނާ ގޮވައިގެން ބަނދަރަށް އައުމުން އެކަމާ ޙައިރާންވެފައެވެ. އެމީހުން އެތަނަށް އައިތާ އިރުކޮޅެއްވީއިރު ނިހާންމެންވެސް އެމީހުނާއި ތަންކޮޅެއް ދުރުގައި ހުއްޓިލިއެވެ. ޖަމީލާއަށް ނިހާނާއި ދިމާލަށް ބަލައިލެވުނެވެ. އަދި މި ވަނީ ކީއްކަން ނޭނގިހުރެ މުޅި މާޙައުލަށް ނަޒަރެއް ހިންގައިލިއެވެ. އޭރު ބަނދަރުމަތީ އެތައް ބަޔަކު އެމީހުނާއި ދިމާލަށް ބަލަހައްޓައިގެން ތިއްބެވެ. “ޒާޔާ.” ޖަމީލާ ނިކަން ހާސްވެފައި ހުރެ ޒާޔާގެ ނަން ކިޔައިލެވުނެވެ. އަދި ޒާޔާގެ އަތުގައި ހިފަހައްޓައިލެވުނެވެ.

ޖަމީލާ ކުއްލިއަކަށް ސިހިގެން ދިޔައީ ޒާޔާ ދަތްކުނޑިވިކައިގަނެފައި އޭނާގެ އަތް ފޮޅުވައިލުމުންނެވެ. ޖަމީލާ ސިހިފައި ހުރެ ޒާޔާއަށް ބަލައިލިއިރު ޒާޔާ ހުރީ ރުޅިވެރި ނަޒަރަކުން ޖަމީލާއާއި ދިމާލަށް ބަލަހައްޓައިގެންނެވެ. ފަވާޝަތުމެން ކައިރީހުރި އުސްމާން ހުރީ ވާނުވާ ނޭނގިފައެވެ.

“އަހަރެން ނުކުރާ ކުށެއްގެ އިލްޒާމް އަހަރެންގެ ބޮލުގަ އަޅުވާ އެންމެންގެ ތެރޭ ބަދުނާމުކޮށްލާފަ މިއަދު ކީއްވެ އެންމެން ތިބީމަ ހާސްވެގެން އަހަރެންގެ އަތުގަ ތި ހިފީ؟” ޒާޔާ އަޑަށް ބާރުލަމުން ވަރަށް ސާބިތު އަޑަކުން ޖަމީލާއާއި ވާހަކަދެއްކިއެވެ. ޒާޔާ އެ ބުނެލި ޖުމުލައަކުން ޖަމީލާއަށް އިސްޖަހައިލެވުނެވެ. އަދި އެކަހަލަ ހާމަ ތަނެއްގައި ޒާޔާ އެގޮތަށް ވާހަކަދެއްކުމުން ޖަމީލާ ވަރަށް ލަދުގަތެވެ. ޖަމީލާ ލަދުން ހުރެ ދުރުގައި ހުރި ނިހާން އާއި ދިމާލަށް ބަލައިލިއެވެ. ނިހާން އެހުރިގޮތަށް ޖަމީލާއާއި ދިމާލަށް ބަލަހައްޓައިގެން ހުރީއެވެ. ޖަމީލާ ހީކުރީ ނިހާން ޒާޔާ ހުއްޓުވަން އެމީހުން ގާތަށް އެވަގުތު އަންނާނެކަމަށެވެ. އެހެނަސް ނިހާން ހަމަ އެހުރިގޮތަށް ހުރީއެވެ.

“ޒާޔާ! ކިހިނެތްވެގެންތަ ތިއުޅެނީ؟ ކީކޭ ކިޔާނަމޭ ހިތާތަ ތިއުޅެނީ ހުރިހާ ކަމެއް ކޮށްފަ؟ އަމިއްލައަށް ހުރިހާ ކަމެއް ކޮށްފަ މަންމަގެ ބޮލަ…”    “ހުއްޓާލާ!” ޒާޔާ ހަޅޭއްލަވައިގަތުމާއިއެކު ޖަމީލާގެ އަނގަ ބަންދުވިއެވެ. “ކަލޭ ތީ މަގޭ މަންމައެއް ނޫން. އެކަން ހަނދާންކުރާތި. ކަލޭ ހީކުރީތަ އަހަރެން ހަނު ހުންނާނެކަމަށް؟ އޭނ.. ބަލާބަލަ ހުރި ވައްތަރު އަދި. މޫނުބުރުގާ އަޅައިގެން ހުރެ މާ ރީތިކަމެއްތަ ތި ކުރެވުނީ. އެންމެ ރީތި އަދި އެންމެ މާތް ހެދުމަށްވެސް ކަލޭއަށް ނޭނގިނަމަވެސް މަލާމާތެއްނު ތި ކުރެވުނީ.” ޒާޔާ ދެން ދެއްކި ވާހަަކަތަކުން ޖަމީލާ މާ ބޮޑަށްވެސް ލަދުގަތެވެ. އެވަގުތު އެންމެންވެސް އޭނާއާއި ދިމާލަށް ބަލަން ފެށުމުން ޖަމީލާއަށް އިސްއުފުލައިލާކަށްވެސް ނުކެރުނެވެ.

“ޒާޔާ! ކީކޭ ތި ކިޔަނީ؟” ދުރުގައި ހުރި އުސްމާން އައިސް ޖަމީލާ ގާތުގައި ހުއްޓެމުން ޒާޔާ ގާތުގައި ސުވާލުކުރިއެވެ. އޭރު އެ އަޑުގައި ނުރުހުމުގެ އަސަރު އެކުލެވިފައިވެއެވެ. “ބޮޑުބޭ.” އޭރު ޖަމީލާ ރޮއެގަންނަމުން އުސްމާންގެ ކޮނޑުގައި ބޯ އަޅައިލިއެވެ. އެ މަންޒަރު ފެނި ދުރުގައި ތިބި ނިހާންމެންގެ ގާތަށް ރުޅި އަންނަގޮތްވިއެވެ. “ވަރަށް ރަނގަޅު. ވަރަށް މޮޅު. އަދިވެސް ބަލައި ރަނގަޅަށް އެކްޓް ޖެއްސޭތޯ..” ނިހާން އައިސް ޒާޔާ ގާތުގައި ހުއްޓެމުން ޖަމީލާއާއި ދިމާލަށް ރުޅިވެރި ނަޒަރަކުން ޖަމީލާއާއި ދިމާލަށް ބަލައިލަމުން ބުންޏެވެ. އެވަގުތު ޤަބޫލުނުކުރެވިފައިވި ނަޒަރަކުން ޖަމީލާއަށް ނިހާންގެ މޫނަށް ބަލައިލެވުނެވެ. “ނިހާން؟” ސުވާލުގެ ނަޒަރަކުން ޖަމީލާއަށް ނިހާނާއި ދިމާލަށް ބަލަހައްޓައިގެން ހުރެވުނެވެ. އުސްމާންވެސް ހުރީ އެފަދަ ނަޒަރަކުން ނިހާނާއި ދިމާލަށް ބަލަހައްޓައިގެންނެެވެ.

“ކީކޭތަ ޒާޔާމެން ތި ކިޔަނީ؟ އަހަންނަށްވެސް އެއްޗެއް އެނގޭ ގޮތަށް ކިޔާބަލަ.” އުސްމާންވެސް މިފަހަރު ތަންކޮޅެއް ބާރަށް ބުންޏެވެ. އެވަގުތު ޖަމީލާ އަވަހަށް ކޮންމެވެސް އެއްޗެކޭ ކިޔައިފައި އުސްމާން ގޮވައިގެން އެތަނުން ދެވޭތޯ އުޅުނެވެ. ނަމަވެސް އެކަމަށް ހުރަސް އެޅީ ދުރުގައި ތިބި ފަވާޝަތުމެނެވެ.

“އުސްމާންބޭ. މަޑުކުރޭ! ޖަމީލާ އެއުޅެނީ އޭނަ ކުރިކަންތައް އުސްމާންބެއަށް އެނގިދާނެތީ އަވަހަށް މިތަނުން ފިލަންވެގެން.” އުސްމާންމެން ކުރިމައްޗަށް އަރަމުން ފަވާޝަތު ބުންޏެވެ. އުސްމާން ހަސްނައިންމެނަށް ބަލައިލިއިރު އެ ދެމީހުން ބޮލުގެ އިޝާރާތުން އެއީ ތެދެކޭ ބުނެލިއެވެ.

އުސްމާންމެން އެގޮތަށް ތިއްބާ ޒާޔާ އައިސް އެދެމީހުން ކުރިމައްޗަށް އެރިއެވެ. “ކަލޭ ދޫކުރޭ އުސްމާންބެ އަތުން. އުސްމާންބެއެއްވެސް ނުހުންނާނެ ކަލޭ ސަލާމަތްކޮށްދޭކަށް.” ޒާޔާ އައިސް އުސްމާންގެ އަތުން ޖަމީލާގެ އަތް ނައްޓުވައިލިއެވެ. ޖަމީލާ އެވަގުތު ނިހާންއަށް ބަލައިލިއެވެ. ނިހާން ނުރުހުންވެފައި ޖަމީލާއާއި ދިމާލަށް ބަލަހައްޓައިގެން ހުރިތަން ފެނުމުން ޖަމީލާއަށް އިސްޖަހައިލެވުނެވެ.

“އުސްމާންބޭ.. ރަނގަޅަށް އަޑުއަހާ! ލިއަމް ސަރ މޮޔަ ހައްދައިގެން އަހަރެންގެ ނަމުގަ އެހާ ލަދުކުޑަކޮށް ވާހަކަދައްކާފަ ހުރި މީހަކީ މީންދަ ފެންނަ ފަރުދާގެ ނިވަލަށް ވަދެ ފިލާ ހުރި ޖަމީލާ.” ޒާޔާ ބާރަކަށް އެ ޖުމުލަ ބުނެލިއެވެ. އެވަގުތު ދުރުގައި ތިބި އެތައް ބަޔަކު ޤަބޫލުނުކުރެވިފައިވި ގޮތަކަށް ޖަމީލާއާއި ދިމާލަށް ބަލަން ފެށިއެވެ. އަދި އެކަކު އަނެކަކަށް ސިއްރުން އެއްޗެއް ބުނެލާ ހަދައެވެ. އުސްމާންވެސް ޙައިރާންވެފައި ހުރެ ޖަމީލާއާއި ދިމާލަށް ބަލަހައްޓައިގެން ހުރެވުނެވެ. ޖަމީލާ ހަމަ އެފަދަ ކަމެއް ކޮށްފާނެހެއްޔެވެ؟ ހާދަހާ ޤަބޫލުކުރަން ދައްޗެވެ.

“އަހަރެން ކިހިނެތް ތިކަން ގަބޫލުކުރާނީ؟ އަހަންނަކަށް ހިއެއްނުވޭ ޖަމީލާ އެކަހަލަ ކަމެއް ކޮށްފާނެހެނެއް.” އުސްމާން އަށް އެ ވާހަކައެއް ޤަބޫލެއްނުކުރެވުނެވެ. “އެންމެ ރަނގަޅު. ދެން އަހަރެންގެ ދުލުން ބުނީމަ ގަބޫލުނުކުރެވިދާނެ. މީންދަ މީހާއާ ސުވާލުކޮށްބަލަ. އޭރުން ގަބޫލުކުރެވިދާނެއްނު.” ޖަމީލާއަށް އިޝާރާތް ކުރަމުން ޒާޔާ ބުންޏެވެ. ޒާޔާ ޖަމީލާއަށް ނިޞްބަތްކޮށް ‘މީންދަ މީހާ’ އޭ ބުނެލި ގޮތުން ޖަމީލާ ވަރަށް ހިތްހަމަނުޖެހުނެވެ. އެތާ ތިބި ބަޔަކަށް ބަލައިލުމެއްނެތި ޖަމީލާ ޒާޔާގެ މޫނުމަތީ ޖަހަން އަތްހިއްލައިލިއެވެ. ނަމަވެސް އޭނާއަށް ޒާޔާގެ މޫނުމަތީ ނުޖެހެނީސް އޭނާގެ އަތުގައި މީހަކު ހިފެހެއްޓުމުން ޖަމީލާއަށް އެމީހަކާއި ދިމާލަށް ބަލައިލެވުނެވެ. އޭރު މަތީން ޖަމީލާގެ އަތަށް ތަދުވާނެވަރަށް ބާރަށް ހިފަހައްޓައިލައިގެން ހުއްޓެވެ. “ދޫކޮށްބަލަ.” އަތަށް ތަދުވިވަރުން ޖަމީލާއަށް ބުނެވުނެވެ. މަތީން ޖަމީލާގެ އަތް ބާރަކަށް ފޮޅުވައިލިއެވެ. އަދި ޒާޔާގެ ކުރިމައްޗަށް އެރީ ޖަމީލާ އިތުރަށް ޒާޔާއަށް ގޮތެއް ހަދައިފާނެތީއެވެ.

“އަމިއްލައަށް އަމިއްލަ ގައިގަ ޖަހާބަލަ. ކޮންމެހެން ޒާޔާ ގައިގަ ޖަހަން އުޅޭނެކަމެއްނެތް އަމިއްލައަށް ހުރިހާ ކަމެއް ކޮށްފަކާއެއް.” ޖަމީލާގެ ދެލޯ ބޮޑުވެގެން ދިޔައެވެ. އެންމެންތަކުގެ ތެރޭ ހަމަ ރަނގަޅަށްވެސް އޭނާ އެ ދަނީ ބޭޒާރުވަމުންނެވެ. އަދިވެސް ބަލަންވީ މިކަމުން ސަލާމަތްވެވޭތޯއެވެ. “ބަލަ އަހަރެން ކީއްތަ ކުރީ؟ ކުރިކަމެއް ކުރީ މިހިރަ ޒާޔާއެއްނު. މިހާރު ޒާޔާ ކަލެމެން ގާތު ހުރިހާ ވާހަކައެއް ހަދަހަދައިލައިގެން ދެއްކީ ދޯ.. ހުރިހާ ކަމެއް މަގޭ ބޮލަށް ޖަހަންވެގެން.” ޖަމީލާ ވަކި ދޫނުކުރަންވެގެން މަތީން ވާހަކަ ދެއްކި ވަރަށްވުރެ ބާރަށް ވާހަކަ ދެއްކިއެވެ. “ޖަމީލާ. ކަލޭ ހުރިހާ ކަމެއް ކުރަން ބުނި މީހާ ކައިރީ ތި ހުރިހާ ދޮގެއް ތި ހަދަނީ. މަށަށް ކޯއްޗެއް ނޭނގޭނީ. ކަލޭ ރޭވި ހުރިހާ ރޭވުމެއްގެ އެންމެ ކައިރިން ބައިވެރިވި މީހަކީ އަހަރެން. ﷲ އިރާދަކުރެއްވިއްޔާ ވަގުތު ފާއިތު ނުވަނީސް އަހަންނަށް ވިސްނުނު.”

ޖަމީލާ ރުޅިއައިސްފައި ހުރެ މަތީނާއި ދިމާލަށް ބަލަހައްޓައިގެން ހުއްޓެވެ. މަތީންވެސް ހަމަ އެ ނަޒަރުން ޖަމީލާއާއި ދިމާލަށް ބަލަހަައްޓައިގެން ހުއްޓެވެ. އެގޮތުގައި ވަގުތުކޮޅެއް ހިމޭނުން ހޭދަވިއެވެ. އެތާ ތިބި ބަޔަކަށް ބެލުމެއްނެތި ޖަމީލާ މަތީން ކޮށްޕައިލައިފައި އެ ދިިޔަގޮތަށް ގޮސް ޒާޔާގެ ކަރުގައި ހިފިއެވެ. އެއާއިއެކު ނިހާންމެން ޖަމީލާ އާއި ޒާޔާ ދުރުކުރުވަން އުޅުނެވެ. ފަވާޝަތު ނިހާ އުރައިގެން ހުރުމުން އޭނާއަކަށް ޒާޔާ ކައިރިއަކަށް ނުދެވުނެވެ. ހަތަރު ފިރިހެނުން ވެގެން ޖަމީލާ ޒާޔާއާއި ދުރުކުރުވިއެވެ. “ދަރިފުޅާ..!” ކަންބޮޑުވެފައި ހުރެ ނިހާންއަށް ޒާޔާއަށް ގޮވައިލެވުނެވެ. އޭރު ޒާޔާ ކެއްސަމުން އޭނާގެ ކަރުގައި ފިރުމަމުން ދިޔައެވެ. “ބައްޕާ.. އަހ.. އަހަރެން ރަނގަޅޭ.” ޒާޔާއަށް އެހެން ބުނެވުނީ ކުޑަކޮށް އާގަންނަމުންނެވެ. ހިތުގައި ކުޑަވަރެއްގެ ބިރުވެރިކަމެއް އުފެދުނަސް އޭނާ ޖަމީލާ ކުރިމަތީ އަދިވެސް ބަލިވާކަށް ބޭނުމެއްނުވެއެވެ. މިހާރު ޖަމީލާ އެހުރީ އަމިއްލައަށްވެސް ބޭޒާރުވެފައެވެ.

“ދޫކުރޭ އަހަރެން… ދޫކުރާށޭ!” ޖަމީލާ ހަޅޭއްލަވަމުން ދިޔައެވެ. މަތީންމެންގެ އަތްދަށުން ޖަމީލާ ސަލާމަތްވާން އުޅޭއިރު ހީވަނީ މޮޔައަކު އުޅޭހެންނެވެ. “މަތީން. ދޫކޮށްލާ. އޭނަ ހަދާނެ އެއްޗެއް ހަދަން ދޫކޮށްލާ.” ޒާޔާ ޖަމީލާ ގާތަށް އަންނަމުން ބުންޏެވެ. “އެކަމަކު ޒާޔާ..” މަތީން އެކަމާ ދެކޮޅު ހަދަން އުޅުނެވެ. އެހެނަސް ޒާޔާ މަތީނަށް ބަލައިލުމާއިއެކު މަތީން އާއި ހަސްނައިން ޖަމީލާގެ އަތުން ދޫކޮށްލިއެވެ. އަދި ޖަމީލާއާއި ދުރަށް ދިޔައެވެ. މިފަހަރު ޒާޔާ ހުރީ ޖަމީލާ އޭނާގެ ގަޔަށް އަތްލަފާނެކަމަށް ވަރަށް ޚުޝިޔާރު ވެގެންނެވެ.

“ކަލޭ ތިކަހަލަ ކިތަންމެ އަނިޔާއެއް މަށަށް ދީފަ އެބަހުރި.. އަހަރެން ހުން އައި ދުވަހު މަގޭ ބޮލުގަ މާވަށިގަނޑުން ޖަހާ އަހަރެން ހޭނައްތާލި ދުވަސް ހަނދާންވޭތަ؟ އޭނ..” ޒާޔާ އެ ބުނެލި ޖުމުލައިން ޖަމީލާ ގާތަށް އިތުރަށް ރުޅިއައެވެ. ނަމަވެސް ނުތަނަވަސްވެފައި ހުރެ ޖަމީލާއަށް ނިހާނާއި ދިމާލަށް ބަލައިލެވުނެވެ. އޭރު ނިހާން ދެލޯ ބޮޑުކޮށްލައިގެން ޖަމީލާއާއި ދިމާލަށް ބަލަހައްޓައިގެން ހުއްޓެވެ. އެދުވަހު ޖަމީލާ ނިހާން ގާތުގައި ހެދި ދޮގުތައް ހަނދާނަށް އައުމުން ޖަމީލާ ވަރަށް ބޮޑަށް ނުތަނަވަސްވިއެވެ. ޖަމީލާއަށް ހިން ދިރުވައިލެވުނީ އެދުވަހު އެވީ ކަންތަކުގެ ޙަޤީޤަތްވެސް ނިހާނަށް އިނގިއްޖެކަން އެނގުމުންނެވެ.

ޒާޔާމެން އެގޮތުގައި ބަނދަރުމަތީ ތިއްބައި އިރުވެސް އޮއްސިއްޖެއެވެ. ޒާޔާގެ ފަހަތުގައި ހުރި މަލައިކާ ދަނޑިވަޅު ބަލައިފައި ޒާޔާގެ ހަށިގަނޑު ތެރެއަށް ވަނެވެ. އެވަގުތު ޒާޔާއަށް ދެލޯ ބޮޑުކޮށްލަމުން އިސްޖަހައިލެވުނެވެ. މަލައިކާ ޒާޔާގެ ހަށިގަނޑުތެރޭ ހަމަޖެހިލުމުން ޒާޔާ ހަމައަކަށް އެޅުނެވެ. އަދި ނިކަން ރުޅި އައިސް ހުރެ ޖަމީލާއާއި ދިމާލަށް ބަލައިލިއެވެ. މިހާރު ޒާޔާގެ ހަށިގަނޑު އެ ހަރަކާތްކުރުވަނީ ޒާޔާގެ ހަށިގަނޑު ތެރޭ އިން މަލައިކާއެވެ.

“މަށަށް މިގޮތަށް އުޅެން ޖެހުނީ ކަލެއާ ހެދި ޒާޔާ.. އަހަންނަށް ނިހާނާ އެންމެ ފުރަތަމަ ނީނދެވުނީ ކަލެއާ ހެދި. ފަހުންވެސް އެކަން ނުވީ ކަލެއާ ހެދި. އިނގިއްޖެ! ތީ ހަމަ  މީހަކަށް ޖެހޭނެ އެންމެ ބޮޑު މުޞީބާތް.” ޖަމީލާ ހަމައެކަނި ޒާޔާއަށް އަޑުއިވޭނެވަރަށް ބުނެލިއެވެ. ޒާޔާ އެގޮތަށް ޖަމީލާއާއި ދިމާލަށް ބަލަހައްޓައިގެން ހުރެފައި ކުއްލިއަކަށް ޖަމީލާގެ އަތުގައި ހިފެހެއްޓިއެވެ. ޖަމީލާ އޭނާގެ އަތް ނެއްޓޭތޯ އުޅުނެވެ. އެހެނަސް އަތް ނައްޓަން އުޅުނު ވަރަކަށް ޖަމީލާގެ އަތަށް ތަދުވަމުން ދިޔައެވެ. ޖަމީލާ ޒާޔާއާއި ދިމާލަށް ބަލައިލުމާއިއެކު ޒާޔާގެ ދެލޯ ދިއްލުނުތަން ޖަމީލާއަށް ފެނުނެވެ. ޖަމީލާއަށް ކުޑަކޮށް ފަހަތަށް ޖެހެވުނެވެ.

“މީ ޒާޔާއެއް ނޫން. ޒާޔާގެ ސިފައިގަ ހުރި ނުބައި އެއްޗެއް މީ.” ޒާޔާ ދެންވެސް އޭނާގެ ދެލޯ ދިއްލައިލުމުން ޖަމީލާ ބާރަކަށް ބުނެލިއެވެ. “ޖަމީލާ!” ނިހާނަކަށް މަޑަކުން ނުހުރެވުނެވެ. އޭނާގެ ދަރިފުޅަށް ނިޞްބަތްކޮށް ޖަމީލާ އެ ބުނި އެއްޗަކުން ނިހާންގެ ލޭގަނޑު ކެކިގަތީއެވެ.

“ޚަބަރުދާރު ކަލޭ މަގޭ ދަރިފުޅާ ދިމާލަށް އޭގެން އެންމެ ލަފްޒެއް ބުނެލިޔަސް.. ނިމުނީ.” ޖަމީލާގެ އަތުގައި ބާރަކަށް ހިފަހައްޓަމުން ނިހާން ބުންޏެވެ. “އެކަމަކު..”  “ކަލޭ ތިހުރީ ވަރިކޮށްފަ.” ޖަމީލާ ބުނަން އުޅުނު ޖުމުލަ މެދުކެނޑުނީ ޖަމީލާ އެންމެ އަޑުއަހަން ބޭނުންނުވާ ބަސްތައް ނިހާންގެ ދުލުން ބޭރުކުރުމުންނެވެ. ދެލޯބޮޑުވެ އެއްޗެކޭ ބުނަން ނޭނގިފައި ޖަމީލާއަށް ނިހާނާއި ދިމާލަށް ބަލަހައްޓައިގެން ހުރެވުނީއެވެ. އެވަގުތު މަލައިކާ ޒާޔާގެ ހަށިގަނޑުތެރެއިން ނުކުތެވެ. “ޝްޝްޝް.” ޒާޔާ އަށް މަލައިކާ ފެނުމާއިއެކު ޒާޔާ އެއްޗެކޭ ބުނަން އުޅުމުން މަލައިކާ އެތާ ތިބި އެންމެން ޒާޔާއަށް ދައްކައިލިއެވެ. “ބެސްޓް އޮފް ލަކް.” ޒާޔާގެ ކަންފަތް ދޮށުގައި ވައި އަޑުން އެހެން ބުނެލުމަށްފަހު މަލައިކާ އެތަނުން ހިނގައްޖެއެވެ.

ކުއްލިއަކަށް ޖަމީލާގެ ދެލޮލުން ކަރުނަ އޮހޮރެން ފެށިއެވެ. ނިހާން ޖަމީލާގެ އަތް ފޮޅުވައިލައިފައި ފަވާޝަތު ކައިރިއަށް ގޮސް ނިހާ އުރައިލިއެވެ. އަދި ޒާޔާގެ އަތުގައި ހިފައިގެން ޒާޔާ ގޮވައިގެން އެތަނުން ހިނގައިގަތެވެ. ނިހާންމެން ދިޔުމާއިއެކު ފަވާޝަތުމެންވެސް އެމީހުންގެ ގެއަށް ދާން މިޞްރާބުޖެހިއެވެ.

ބަނދަރުމަތިން މީހުންތައް މަދުވަމުން ގޮސް މިހާރު އެތާ ތިބީ އުސްމާނާއި ޖަމީލާ އެކަންޏެވެ. ތަންކޮޅެއް ދުރުގައި ހުރި ޖޯލިފައްޗެއްގައި ދެތިން މީހަކު އޮލަ ވާހަކަތަކެއް ދައްކަން ތިއްބެވެ. ޖަމީލާ އިސްޖަހައިގެން ހުރެ ރޮނީއެވެ. ޖަމީލާ ރޯތަން ބަލަން ދެރަވެފައި އުސްމާން ހުއްޓެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.