ލޯތްބައްޓަކައި(29ވަނަ ބައި)

‎އެހައި ކުއްލި ގޮތަކަށް ނިކްޔަން އެ ދަތުރު ރޭވުމުން ފަލަކްއަށް ހޮސްޕިޓަަލަކުން ޗުއްޓީއެއް ހަމައެއްނުޖެހުނެެވެ. އެހެންކަމުން އެމާރޖެންސީ ދިހަ ދުވަހުގެ ލީވް ނަގައިގެން ފަލަކް ރާއްޖެ ދާން ނިންމިއެވެ.

‎އެނބުރި ދިވެހިރާއްޖެއަށް ދެވުމުން ފަލަކްއާއި ކުރިމަތި ލާންޖެހޭނީ ކޮންކަހަލަ ކަންތައްތަކަކާ ބާއެވެ؟ ނިކްޔަން ދެން ކަންތައް ކުރާނީ ކިހިނެއް ބާއެވެ؟ ރަފްގާގެ ރޭވުމަކީ ކޮބާ ބާއެވެ؟ އާލިމް އަދި ޔަނާގެ ދިރިއުޅުމަށް ދެން އަންނާނީ ކޮން ކަހަލަ ތޫފާނެއް ބާއެވެ.

ވެލާނާ އިންޓާރ ނޭޝަނަލް އެއަރޕޯޓުން ނިކުތް ނުހާއަށް އެކި ދިމަދިމާލަށް ބަލާލެވުނެވެ. ހަތްއަހަރު ފަހުން އަމިއްލަ ޤައުމަށް އެނބުރި އާދެވުމުން ހިތަށް ފަސޭހަކަމެއް ލިބުނު ފަދައެވެ. ނުހާގެ މޫނުމަތިން އުފާވެރިކަމާއި ހިތްހަމަޖެހުމުގެ ކުލަވަރު ފެންނަމުން ދިޔަ ނަމަވެސް، ނިކްޔަންއާއި ފަލަކްގެ މޫނުމަތީގައި ވަނީ ތަފާތު އަސަރުތަކެކެވެ. ކާރު އަންނަންދެން ތިން މީހުން މަޑު ކޮއްލައިގެން ތިބި އިރު، އިރު އިރު ކޮޅާ ފަލަކްއަށް ނިކްޔަންއާއި ދިމާލަށް ބަލާލެވެނީ، ނިކްޔަން އިސްވެ އޭނާއާއި ވާހަކަ ދައްކާތޯއެވެ. އިއްޔައިންސުރެ ފެށިގެން ނިކްޔަން އޭނާއާއި ދުރުކަމެއް ބަހައްޓަމުން އައި ކަން ފަލަކްއަށް ފާހަގަ ކުރެވުނެވެ. ނަމަވެސް، އިސްވެ އެއްޗެއް އަހަން ފަލަކްއަށް ނުކެރުނީ، ނިކްޔަންގެ މި މަޑުމައިތިރިކަމަކީ ރޫމާގެ މަރުގެ ސަބަބުން އައި ބަދަލެއްކަމަށް ހީކުރެވުމުންނެވެ.

ނިކްޔަންއާއި ދިމާލަށް ބަލަހައްޓައިގެން ފަލަކްއަށް ހުރެވުނީ ކިހާ އިރަކުކަމެއްވެސް ނޭނގެއެވެ. ލައިގެން ހުރި މަޑު މުށި ކުލައިގެ ސޯޓާއި ހުދުކުލައިގެ ރޮނގދެމި ޗޮކުލެޓް ކުލައިގެ ޓީޝާޓުގައި ނިކްޔަން ފެންނަނީ ނުހަނު ހިތްގައިމު ކޮންނެވެ. ގަދަ މުށިކުލައިގެ ފަން އިސްތަށިކޮޅު އެއްވެސް ސްޓައިލެއް ކުރުމެއް ނެތި ނިތްކުރި މައްޗަށް ދޫކޮއްލާފައި ހުރި އިރު، ބޮޑަށް ވައްތަރީ ކޮރެޔާ ހިސާބުގެ ފިލްމުކުޅޭ މީހަކާއެވެ. ތޫނު ދެލޯ ރޭބަން އަވި އައިނަކުން ފޮރުވާލައިގެން، އެއް ޖީބަށް އަތްޖަހާލައިގެން ހުރި އިރު ބަލާ ފޫހިނުވާނެކަން ގައިމެވެ.

ފަލަކްއަށް ހޭވެރިކަން ވީ އަޅި ކުލައިގެ ކާރެއް އައިސް އެމީހުންގެ ކުރިމަތީގައި މަޑުކޮށް ލުމުންނެވެ. ނުހާއާއި ފަލަކް ކާރުގެ ފަހަތު ސީޓަށް އެރި އިރު، ފޮށިތައް ޑިކީ އަށް ލުމަށްފަހު ނިކްޔަން އެރީ ކުރީ ސީޓަށެވެ. އާދައިގެ ސްޕީޑެއްގައި ކާރު ހުޅުމާލޭގެ ހައިވޭގެ މަތިން ދުއްވަން ފެށުމުން ފަލަކްއަށް ދެލޯ މަރާ ތަގުޅި ކޮއްލެވުނެވެ. ކުރިމަތިން ފެންނަށް އެ އޮތް ބްރިޖަކީ، އެ ބްރިޖެއްގެ މަތީގައި މީގެ ހަތް އަހަރު ކުރިން ހިނގައިދިޔަ އެކްސިޑެންޓެއްގެ ސަބަބުން އޭނާގެ ބައްޕަ އޭނާ އަށް ގެއްލުނު ބްރިޖެވެ. އަދިވެސް އެ ބިރުވެރި ދުވަހާއި އެ އެކްސިޑެންޓު ހިނގި ދުވަހު ކަންވީގޮތް އޭނާގެ ހަނދާނުގައި އެބަހުއްޓެވެ.

ފަލަކް ދެލޯ ހުޅުވާލީ ހުޅުމާލޭގެ މަގުތަކަށް ކާރު ލަނބާލުމުންނެވެ. ބޮޑެތި ބަދަލުތަކެއް ހުޅުމާލެއަށްވެސް އައިސްފައިވާއިރު، ތަރައްޤީގެ ކުލަވަރު ދިއައީ ފެންނަމުންނެވެ. އުސް އިމާރާތްތަކާއި، ޓްރެފިކް ބޮޑު މަގުތަކެވެ. ބޮޑެތި ހޮޓެލްތަކާއި ދުނިޔޭގައި ނަން މަޝްހޫރު ރެސްޓޯރެންޓުތަކެވެ. ފަހަތު ސީޓުގައި އިން ނުހާ ދިއައީ ކާރުގެ ކުޑަދޮރުން ބޭރު ބަލަމުން، ފޯނުގައި މި މަންޒަރުތައް ރައްކާ ކުރަމުންނެވެ.

ކާރު ގޮސް މަޑު ކޮއްލީ ބޮޑު އިމާރާތެއްގެ ކުރިމަތީގައެވެ. “ޖަމައިކަލް ރެސިޑެންސް” ގެ ނަަމުން ނަން ދެވިފައިވީ އެ އިމާރާތުގެ ތެރެއަށް ވަދެގެން ގޮސް ލިފްޓަށް އަރައި، ނިކްޔަން ހަތަރު ވަަނަ ފަންގިފިލާއަށް ދިއުމަށް ފިތަށް އޮއްބާލިއެވެ. ލިފްޓު ހުއްޓުމާއި އެކު އޭގެން ފައިބައި، ހަތަރެއް ޑީ ޖަހައިފައި އިން އެޕާރޓްމެންޓް އަތުގައި އޮތް ކާރޑުން ނިކްޔަން ހުޅުވާލުމާއިއެކީ، އޭނާގެ ފޮށި ހިފައިގެން ނުހާ އެތެރެއަށް ދެމިގަތެެވެ. ބޮޑު ތިން ކޮޓަރީގެ އެޕާރޓްމެންޓެކެވެ. ތަަނަވަސް ސިޓިންރޫމުގެ މެދުގައި ކަޅުކުލައިގެ ސޯފާސެޓަކާއި ފަތި ޓީވީ އެއް ހަރުކުރެވިފައި ހުރި އިރު، ބިއްލޫރި ދޮރެއް ކަހާލާފައި ވަދެވޭ ގޮތަށް ހުރި ބަދިގެ އަކާއި ކާގެ އެއް ހުއްޓެވެ. މުޅި ތަންވެސް ފަރުމާ ކުރެވިފައިވަނީ ކަޅާއި ހުދު ބޭނުން ކޮއްގެނެވެ.

އެޕާރޓްމެންޓުގެ ބިއްތަކަށް ނަޒަރު ހިންގަމުން ދިޔަ ފަލަކްއާއި ނުހާ ސިއްސައިގެން ދިއައީ، އެތަނުން ކޮޓަރިއަކަށް ވަދެ ނިކްޔަން ދޮރު ޖެހި އަޑަށެވެ. “ދޮންބެއަށް ކިހިނެއްވެފަ އެހެރީ؟ އިއްޔެ ވެސް ވަރަށް ފާޑަކަށް ދޯ ހުރީ” ފަލަކް ގާތުގައި ނުހާ އަހާލިއެވެ. ދޭނެ ޖަވާބެއް ނޭނގިފައި ފަލަކްއަށް ހުރެވުނީ އެއީ އޭނާގެ ހިތުގައިވެސް އޮތް ސުވާލަށް ވީތީއެވެ. “އައި އޭމް ވެރީ ޓަޔަޑް…ސީ ޔޫ” އެހެން ބުނެލުމަށް ފަހު ނުހާ ދިއުމުން އޭނާގެ ފޮށި ހިފައިގެން ގޮސް ނިކްޔަން ވައިން ކޮޓަރިއަށް ފަލަކް ވަނެވެ.

ހޮސްޕިޓަލުގައި ޔަނާ ބޭއްވިފައި އޮތް އެނދުކައިރީ ހުރި ގޮނޑީގައި އިށީނދެ އިން އާލިމްގެ ނަޒަރު ހުއްޓިފައިވަނީ، ފުން ނިންޖަކުން ނިދާލާފައި އޮތް ޔަނާ އަށެވެ. ޔަނާ ހޭ އަރާނެ އިރެއް ބުނަން ނޭނގޭ ކަމަށް ޑޮކްޓަރު ބުންޏަސް، ވަރަށް އަވަހަށް ޔަނާ އެނބުރި އޭނާގެ ގާތަށް އަންނާނެ އޭ އާލިމްގެ ހިތް ތަކުރާރުކޮށް ބުނަމުން ދިއައެވެ. އޭނާގެ ދެލޮލުގެ ކައިރީގައި ކުރަހާލެވިފައި ވާ ހިޔަންޏަކީ ރޭ ހަތަރު ދަމު ނުނިދާ ކަމުގެ ހެއްކެވެ. ޔަނާގެ މޫނުން ނަޒަރު ވަކި ކޮށްލަމުން އެކޮޓަރީގެ ދޮރާއި ދިމާލަށް އާލިމް ބަލާލީ ދޮރު ހުޅުވުނު އަޑަށެވެ.

“އާލް…ދަރިފުޅު ދެން ދޭ ގެޔަށް ގޮސް ނިދާލާ ތާޒާ ވެލަން…މަންމަ ޔަނާ ކައިރީ މަޑު ކޮއްލާނަން” ވަދެގެން އައި ވަރުދާ ބުނެލިއެވެ. “ނޫން އަހަރެން މަޑުކުރާނީ ޔަން ކައިރީ…އަހަރެން ގޮސް ހުއްޓާ ޔަން ހޭލައިފިއްޔާ..” “ޔަނާ ހޭލައިފިއްޔާ މަންމަ ދަރިފުޅަށް ގުޅާ ނަމޭ…ޔަނާ ކިހާ ދެރަ ވާނެ ދަރިފުޅު ތިގޮތަށް ނުކައި ނުބޮއެ އޭނަ ކައިރީ މަޑު ކުރިކަން އިނގިއްޖިއްޔާ…ދޭ ގޮސް ނިދާލާ” ވަރުދާގެ ބަސްއަހަމުން އާލިމް ގެއަށް ދާން ތެދުވީ، ޔަނާގެ ނިތަށް ބޮސް ދިނުމަށް ފަހުގައެވެ. އާލިމް ނިކުމެގެން ދިއުމާއި އެކު ވަރުދާ ގޮސް އާލިމް އިށީނދެގެން އިން ގޮނޑީގައި އިށީނދެލިއެވެ.

“ދަރިފުޅާ…ދެން ތިހެން ނޯވެ އަވަހަށް ތެދުވެބަލަ…އޭރުންނެއްނު އަވަހަށް ދަރިފުޅު ބޭނުންވާ ގޮތަށް ބޮޑު ކައިވެނި ޕާރޓީ އެއް ބޭއްވޭނީ…” ޔަނާއާއި މުހާތަބުކޮށް ވަރުދާ ވާހަކަ ދެއްކި އިރު އޭނާގެ ދެލޮލުގައި ޖަމާވެފައި ހުރި ކަރުނަތައް ދިއައީ އޭގެ މަޤާމު ދޫކޮށް ފައިބަމުންނެވެ. “ދައްތާ…ތިހެން ވާހަކަ ދައްކާ އިރު ހިތާމަ ނުކޮށް ޕޭޝަންޓު އުފާ ވާނެ ކަހަލަ ވާހަކަތައް ދެއްކުން ރަނގަޅު، އޭރުން ޕޭޝަންޓަށް ހިއްވަރު ލިބޭނެ ހޭއަރަން މަސައްކަތް ކުރަން” ޓްރޭއެއް ހިފައިގެން އެތެރެއަށް ވަދެެގެން އައި ނަރުސް ކުއްޖާ ވާހަކަ ދެއްކިއެވެ. “ޔަނާއަށް އަހަރެމެން ކިޔާ އެއްޗެހި އަޑު އިވޭނެތަ؟” ކުރަކި ވެފައިވީ އަޑަކުން ވަރުދާ އަހާލިއެވެ.

“ލައްބަ…ކޯމާއެއްގަ ޕޭޝަންޓް އޮންނަ އިރު އެއްކޮން ހޭނެތިފައެއް ނޫން އަސްލު އެ އޮންނަނީ…ވަރަށް ފުން ނިންޖެއްގަ އެ އޮންނަނީ…މި ސްލީޕް ސްޓޭޓް ގަ އޮންނަ އިރު ޕޭޝަންޓްގެ އެންމެ ބޮޑު ސަމާލުކަމެއް ހުއްޓިފަ ހުންނާނީ ވަށައިގެން އިވޭ އަޑުތަކަށް…އެހެންވީމަ ތިޔަބޭފުޅުން ވާހަކަ ދައްކަވާ އިރު ވީހާވެސް ޕޭޝަންޓް ހިތްހަމަޖެހޭ ކަހަލަ ވާހަކަ ދެއްކުން ވަރަށް މުހިންމު” ޔަނާގެ ގަޔަށް ގުޅާފައި ހުރި މެޝިނުތައް ޗެކު ކުރަމުން އެ ނަރުސް ކުއްޖާ ކިޔައިދިނެވެ.

އޭނާގެ ކެބިންގައި މަސައްކަތުގައި މަސްޢޫލުވެ އިން ލޫތްއަށް ކޮމްޕިއުޓަރުން ދުރަށް ނަޒަރު ހުއްޓާލަން މަޖުބޫރުވީ މޭޒުމަތީގައި އޮތް އޭނާގެ ފޯނު ރިންގުވާން ފެށުމުންނެވެ. ނުދަންނަ ނަމްބަރަކުން ގުޅިޔަސް މަސައްކަތުގެ ގޮތުން މުހިންމު ކޯލަކަށް ވެދާނެތީ ލޫތް ފޯނު ނަގައި ކަންފަތުގައި ޖަހާލިއެވެ. “ހަލޯ…ކޮންބޭފުޅެއްތޯ؟” އެކޮޅުން އިވިގެން ދިޔަ ވާހަކަތައް ކަނުލައި އަޑުއަހަން ލޫތް ހުރި އިރު އޭނާގެ ނިތްކުރިއަށް ރޫތައް ދިއައީ ގިނަވަމުންނެވެ. “އެކަމު ނިކް… އާރ ޔޫ ޝުއާރ އެބައުޓް ދިސް؟” ލޫތް އަހާލިއެވެ. އެކޮޅުން ނިކްޔަންގެ ޖަވާބު އަޑުއިވުމުން އެންމެ ރަނގަޅު ކަމުގައި ބުނަމުން ލޫތް ފޯނު ބޭއްވިއެވެ. އޭރު އޭނާގެ މޫނުމަތީގައި ވަނީ ކަންބޮޑުވުމުގެ އަސަރު ތަކެވެ.

ބެލްކަނީގައި ހުރެ ފޯނު ބޭއްވުމަށްފަހު ފަހަތަށް އެނބުރިލި ނިކްޔަންއަށް ކުއްލި ސިހުމެއް ލިބުނީ، އޭނާގެ ފަހަތުގައި ހުއްޓި ހުރި ފަލަކް ފެނުމުންނެވެ. އަނެއްކާ ދެންމެ އޭނާ ދެއްކި ވާހަކަތަށް ފަލަކްއަށް އަޑުއިވުނީ ބާއެވެ. “ކާން ދާން ވީނު؟” ފަލަކް ކޮއްލި ސުވާލާއި އޭނާގެ މޫނުމަތީގެ އަސަރުތަކުން ދެންމެ ދެކެވުނު ވާހަކަ ފަލަކްއަށް އަޑު ނީވޭކަން ޔަޤީންވުމުން ނިކްޔަންއަށް ހަމަޖެހުމުގެ ނޭވާއެއް ބޭރު ކޮއްލެވުނެވެ. ބޯ ޖަހާލަމުން ފަަލަކްގެ ފަހަތުން އޭނާ ހިނގައިގަތެވެ.

ކާން މޭޒު ދަށުގައި ތިބި އިރު ނުހާ އެކިކަހަލަ ވާހަކަ ދައްކަމުން ދިޔައިރު ފަލަކްވެސް ދިއައީ ނުހާއާއި ބައިވެރިވަމުންނެވެ. ނަމަވެސް، ނިކްޔަންގެ ފަރާތުން ފެންނަމުން ދިއައީ ހިމޭންކަމެވެ. އަވަހަށް ކައި ނިންމައިގެން ނިކްޔަން ބޭރަށް ދިއުމުން، ފަލަކްއާއި ނުހާ ސޯފާގައި ޖައްސާލީ ޓީވީ އަޅުވާލަމުންނެވެ. “ނުއްކޯ…ހިނގާ ހަވީރު ޝޫރާދައްތަ މެންގެޔަށް ގޮސްލަން ދޯ…މައު ދޮންތަޔާ ޒުމާދައްތަޔާ ވެސް މީޓް ކޮއްލާ ހިތްވޭ ވަރަށް އެބަ” ފަލަކް އަހާލިއެވެ. “އޯކޭ… އައި އޯލްސޯ ވޮނަ ގޯ އައުޓް…އައިސް ކްރީމް ވެސް ބޮއެެގެން ދޯ އަންނާނީ” ނުހާ އޭނާގެ ހިޔާލު ފާޅުކުރުމުން އެޔަށް ތާއީދު ކުރަމުން ފަަލަކް ބޯޖަހާލިއެވެ.

ހަވީރުގެ ވަގުތެވެ. އޭރު ބޭރަށް ދިޔަ ނިކްޔަން އަދިވެސް އެނބުރި ނާންނާތީ ނުހާއާއި ފަލަކް ތައްޔާރު ވަމުން ދިއައީ ބޭރަށް ދިއުމަށެވެ. ނިކްޔަންއަށް ގުޅައި ގުޅައި ފޯނު ނުނެގުމުން ބޭރަށް ދާވާހަކަ އަންގާލުމަށް މެސެޖެއް ކޮއްލުމަށް ފަހު ނުހާއާއިއެކީ ފަލަކް މާލެ ދިއައެވެ.

ޒުމާމެން ދިރިއުޅޭ އިމާރާތް ހުންނަނީ ހެންވޭރުގައި ކަމުން ފުރަތަމަ ފަލަކްއާއި ނުހާ ދިއައީ އެގެއަށެވެ. ލިފްޓަށް އަރައި ފަސްވަނަ ފަންގިފިލާގެ ޒުމާމެން ދިރިއުޅޭ އެޕާރޓްމެންޓުގައި ބެލް އަޅާލުމަށް ފަހު މަޑުކޮއްލައިގެން ތިބި ނުހާއާއި ފަލަކްގެ އިންތިޒާރަށް ނިމުމެއްއައީ ޒުމާ އައިސް ދޮރު ހުޅުވުުމުންނެވެ. “އޯމައި ގޯޑް ފަލަކް، ނުހާ….ކޮންއިރަކު އައިސްގެން ތިއުޅެނީ…” ވަކިވަކިން ފަލަކްއާއި ނުހާގެ ގައިގައި ބައްދާލަމުން ޒުމާ އަހާލިއިރު އޭނާގެ އަޑުގައިވަނީ އުފާވެރިކަމެވެ. “އެތެރެއަށް ނުވައްދާ ދޮރުމަތީގަ ބައިތިއްބައިގެންތަ ހުރިހާ ސުވާލެ ކުރަން ނިންމައިގެން ތިހިރީ… ޒުމް ގަނޑާ” ފަލަކް ބުނެލުމާއިއެކު ހެމުން ހެމުން އެމީހުންނަށް އެެތެރެއަށް ވަނުމަށް ޒުމާ ދައުވަތު ދިނެވެ.

“ސޯ ކޮން އިރަކު ކަމަނާފާނު މިކޮޅަށް އައީ” ފަލަކްއާއި ނުހާ ދެމީހުނަށް ދެ ކޮފީ ޖޯޑު ދިއްކޮއްލަމުން ޒުމާ އަހާލިއެވެ. އޭރު ނުހާ އިނީ ކުޑަކުޑަ ލުޔޫން ނަގައި އުނގަށް ލައިގެން އެކުއްޖާއާއި ސަކަރާތް ޖަހާށެވެ. “ހަަމަ މިއަދު ހެނދުނު އައީ…ކޮބާތަ ލޫތް” ގޭތެރެއަށް ނަޒަރެއް ހިންގާލަމުން ފަލަކް އަހާލީ ލޫތް ފެންނަން ނެތުމުންނެވެ. “އޮފީހުގަ ވީ…ކީތްކުރާނީ ޑިވޯރސް ލޯޔަރަކަށްވީމަ ގެއަށް އާދެވޭ ވަރު ވަނީ ދިހަ އެއްޖަހާ ފަހުން….” ސޯފާގައި އިށީނދެ ހަމަޖެހިލަމުން ޒުމާ ކިޔައިދިނެވެ. “ތިހެންވީރުން ރާއްޖޭގަ ޑިވޯރސްވާ މީހުން ގިނައީތާ ދޯ” ގިނަ ދުވަހަށްފަހު އެންމެ ގާތް އެކުވެރިޔާއާއި ދިމާވުމުން ދެމީހުންވެސް ތިބީ ދައްކާނެ ވާހަކަ ހުސްނުވެފައެވެ. ނުހާވެސް ދޭތެރެއަކުން އެދެމީހުނާ ބައިވެރިވެލައެވެ. “އޭ ނިކް ކިހިނެއްތަ؟” ލުޔޫން ގޮވައިގެން ނުހާ ބެލްކަންޏަށް ނިކުމެލުމުން، ޒުމާ ފަލަކްގެ ގާާތުގައި އަހާލިއެވެ. “ޔަން ރަނގަޅޭ…ކިހިނެއްވީ؟” “ބަލަ އަހަރެންނަށްވެސް އިނގެޔޭ ނިކް ހުރީ ހެޔޮހާލުގަ ކަން….އަހަރެން މި އަހަނީ ތި ދެމީހުންދޭތެރޭގަ ކަންތައްތައް ކިހިނެއްހޭ..” ޒުމާގެ ސުވާލާއިއެކު ފަލަކްގެ މޫނު މައްޗައް ލުއި ހިނިތުންވުމެއް ވެރިވިއިރު ކޯތާފަތައް ޖަންބުކުލަ އަރައިގެން ދިއައީ އެދެމީހުންގެ ދެމެދުގައި ހިނގި ގުޅުމުގެ މަތިން ހަނދާންވުމުންނެވެ. ފަލަކްގެ މޫނުގެ ކުލަވަރުން ޒުމާއަށް އޭނާގެ ސުވާލުގެ ޖަވާބު ލިބިގެން ދިއައެވެ.

އެތައް އިރަކު ޒުމާމެން ގޭގައި ތިބުމަށްފަހު، ފަލަކްއާއި ނުހާ އެގެއިން ނިކުތީ ހައެއް ޖަހަން ކައިރިވެފައި ވަނިކޮށެވެ. ލަސްވެފައި ހުރުުމުން ޝޫރާ މެންގެޔަށް މާދަން ދާން ނިންމައި ފަލަކްއާއި ނުހާ އެނބުރި ހުޅުމާލެއަށް ދިއައީއެވެ. ޝޫރާމެން ދިރިއުޅެނީ ވިލިމާލޭގައި ކަމުން، ވަރުބަލިވެފައި ތިބުމާއިއެކު އިތުރަށް ދަތުރު ދިގުނުކުރަން ވެގެންނެވެ.
ހުޅުމާލެއަށް ގޮސް އެޕާރޓްމެންޓަށް ދިޔަ މަގުމަތީގައި ހުރި އައިސްކްރީމް ވިއްކާ ރެސްޓޯރެންޓަށް ކާރު މަޑުކޮއްލީ ނުހާގެ އެދުމަށެވެ.

“ކިހާ ދުވަހެއް ނަގާނެ ޕޭޕަރު ތައްޔާރުވާން” ކުރިމަތީގައި އިން ލޫތްއަށް ބަލާލަމުން ނިކްޔަން އަހާލިއެވެ. އޭނާގެ އަޑުގައިވަނީ ސީރިއަސް ކަމެވެ. އެދެމީހުން ތިބީ މާލާގެ މަޝްހޫރު ރެސްޓޯރެންޓެއް ކަމުގައިވާ ގްލޯރިއާ ޖީންސްގެ ހިތްގައިމު މާހައުލުގެ މޭޒެއްގައެވެ. ދެ ޒުވާނުންގެ ކުރިމަތީގައި އާވީ އަރާ ދެ ކޮފީ ޖޯޑު ހުރި އިރު، ދެމީހުންގެ މޫނުމަތީގެ ކުލަވަރުންވެސް އެދެމެދުގައި ދެކެވެމުން އެދަނީ ކޮންކަހަލަ ވާހަކައެއްކަން ހާމަވެއެވެ.

“ނިކް މަށަކަށް ނޭނގެ ނިކް ތިހެން ކަންތައް ކުރަން ތިއުޅެނީ ކީއްވެ ކަމެއް….އެކަމު ބުނަން ގޮތެއް ނިންމުމުގެ ކުރިން ފަލަކް ބޭނުންވާ ގޮތެއް ސާފުކޮއްލުން ވަރަށް މުހިންމު…އާފްޓާރ އޯލް މީ ތިދެމީހުންގެވެސް ކައިވެނި” ލޫތް ވާހަކަދެއްކީ ނިކްޔަންއަށް ވިސްނައިދިނުމަށެވެ. “ފަލަކް ބޭނުންވާ ގޮތް އިނގޭތީ އަހަރެން މި ނިންމުން މި ނިންމީ…އެނޫނަސް އެ ކައިވެންޔެއްގަ ލޯބި ނެތިއްޔާ އެކުގަ އުޅުމުގެ ބޭނުމަކީ ކޮބާ!…ފަަލަކްއަށްވެސް އަދި އަހަރެންނަށްވެސް މިވަގުތު އޮތް އެންމެ ރަނގަޅު ގޮތަކީ ވަރި” ނިކްޔަންގެ ދުލުން ނިކުތް ބަސްތަކުގައި އޮއްޓަރު ހުރި ނަމަވެސް، އޭނާގެ އަޑުގައި ވީ ރިހުން ލޫތްއަށް ދެނެގަނެވުނެވެ.

“ތީ ތިދެމީހުންވެސް ބޭނުންވާ ގޮތްނަމަ އަހަރެން ބަލާނަން ވީ ހާވެސް އަވަސްވީ ގޮތަކަށް ހުރިހާ ކަމެއް ނިންމާލަ ދެވޭތޯ….ކޯޓަށް ނުގޮސް ޕޭޕަރުން ނިންމާލަން ބޭނުން ކަމުގަ ވަންޏާ އެއް ހަފްތާ ވަރު ނަގާނެ….އެއީ ކޯޓުން އެ ޕޭޕަރުގަ ޖަހަން ޖެހޭ ތަތްގަނޑު ޖަހަން…ސޯ އެންމެ އަވަހަށްވެސް އެއް ހަފްތާ..” ނިކްޔަންގެ ނިންމުމުގެ ސަަބަބުން ހައިރާންވީ ނަމަވެސް، ނިކްޔަންގެ އެ ނިންމުން އޭނާއަށް ބަދަލު ނުކުރެވޭނެ ކަން ލޫތް ދެނަހުއްޓެވެ. “އަދި އެއް ކަންތައް ކޮއްދީފާނަންތަ؟” ނިކްޔަން އަހާލުމާއި އެކީ ކޮންކަމެއްހޭ ލޫތް އަހާލިއެވެ. “ޕޭޕަރުތައް ތައްޔާރު ވަންދެން މި ވާހަކަ އަހަރެމެން ދެމީހުންގެ ދެމެދުގަ ބާއްވަދީ..” ނިކްޔަންގެ އެދުމަށް އެއްބަސްވީ ނަމަވެސް ލޫތްގެ ހިތުގައި ފުނިޖެހިފައި ހުރީ ހުސް ސުވާލެވެ. ނިކްޔަން ފަލަކް ވަރި ކުރަން ބޭނުންވަނީ ކީއްވެ ބާއެވެ.

ފަލަކްއާއި އެކު އެ ރެސްޓޯރެންޓަށް ވަދެގެން ގޮސް މޭޒެއް ކައިރީ އިށީންނުމަށްފަހު ނުހާ އައިސްކްރީމްގެ ވައްތަރުތަށް ޗެކް ކުރަން ކައުންޓަރު ކައިރިއަށް ދިއަ އިރު ފަލަކް މޭޒުކައިރީގައި އިނީ ފޯނަށް ގެއްލިފައެވެ. ކައުންޓަރު ކައިރިއަށް ޖެހިލާ ދެ ކޮޓަން ކޭންޑީ އައިސްކްރީމަށް އޯޑަރު ދިނުމަށްފަހު ހިނގައިގަތް ނުހާއަށް ސިހުމެއް ލިބުނީ، މީހެއްގެ ގައިގައި އޭނާ ޖެހި، އެމީހާގެ އަތުގައި ހުރި އައިސްކްރީމް ތަށި އޭނާގެ ގަޔަށް ބަންޑުން ވުމުންނެވެ. އޭނާ ލައިގެން ހުރި ހުދު ކުލައިގެ ޓޮޕް ކޮޅުގައި އުނގުޅިފައި ހުރި ޗޮކްލެޓް އައިސްކްރީމްތައް ފެނުމުން ރުޅިވެރި ނަޒަރަކުން ކުރިމަތީގައި ހުރި ޒުވާނާއާއި ދިމާލަށް ނުހާ ބަލާލިއެވެ.

ކުރިމަތީގައި ހުރި އަންހެން ކުއްޖާގެ ގަޔަށް އޭނާގެ އަތުގައި ހުރި އައިސްކްރީމްތައް ބަންޑުންވުމުން މާފަށް އެދޭން އެކުއްޖާއާއި ދިމާލަށް ބަލާލި ކައިލާންއަށް މަޑުޖެހި ލެވުނީ، އެ އަންހެން ކުއްޖާގެ މޫނު ފެނުމުންނެވެ. ދޮން އޮމާން ހަންގަޑެއް ލިބިފައިވާއިރު، އެ ކުއްޖާގެ ހިތުފަތު ދެބުމަ ވަނީ ގޮތްޖަހާ ލެވިފައެވެ. ފަތްކޮޅެއް ފަދަ އެ ކުއްޖާގެ ފަން އިސްތަށިގަނޑުން ބައެއް އިސްތަށިތައް އެ މޫނުގައި ބޮސްދެމުން ދިއައިރު، ބޯ އެސްފިޔަތަކުގެ ނިވަލުގައިީ ކަޅުކުލައިގެ ޖާދުވީ ދެލޮލުން އޭނާއާއި ދިމާލަށް ބަލަހައްޓައިގެން ހުރީ ރުޅިވެރި އަދި އެހާމެ ނުރައްކާތެރި ނަޒަރަކުންނެވެ.

“އެކްސް ކިއުޒް މީ މިސްޓާރ” އުތުގެ އިނގިލިތަކުން ކައިލާންގެ މޫނުމަތީގައި އަޑެއް ގޮއްވާލަމުން ނުހާ ވާހަކަދެއްކުމުން ހޭވެރިކަން ވީމީހެއް ފަދައިން ނުހާގެ މޫނުން ކައިލާން އޭނާގެ ނަޒަރު ވަކި ކޮއްލިއެވެ. “ބަލައިގެން ހިނގާކަށް ނޭނގޭތަ!…އަހަރެންގެ ގަޔަށް އައިސްކްރީމްތައް ވަރާލާފަ އަދި އެންމެ ކުޑަމިނުން ސޮރީއޭ ބުނާކަށްވެސް ނޭނގެޔޭ” ނުހާގެ އަޑަށް ކައުންޓަރު ކައިރިޔަށް ފަލަކް ދިއައެވެ. އޭރުވެސް ކައިލާން ހުރީ ނުހާއަށް ގެއްލިފައެވެ. “އޯ ހަލޯ” ކައިލާންގެ މޫނުމަތީގައި އަތް ހިންގާލަމުން ނުހާ ގޮވާލީ އެ ނުދަންނަ މީހާގެ ސަމާލުކަން އޭނާގެ މޫނަށް ހުއްޓިފައި ހުރުމުންނެވެ. “ވީ އާރ ވެރީ ސޮރީ….ނުއްކޮ ލެޓްސް ގޯ ފަހުން އަންނާނީ އައިސްކްރީމް ބޯން” ގިނަ މީހުންގެ ނަޒަރު އެމީހުނަށް އަމާޒުވާން ފެށުމުން ނުހާގެ އަތުގައި ހިފައިގެން ފަލަކް އެ ރެސްޓޯރެންޓުން ނިކުތެވެ.

“ދޮންބެދައްތަ ކީއްވެތަ އޭނަ ކައިރީ ސޮރީ ބުނީ….ބަލާބަ ނުހާގެ މުޅި ޓޮޕް އޭނަޔާ ހެދި ހަޑިވީ…ދެންމެ ދޮންބެދައްތަ ނުހާ ނުހުއްޓުވި ނަމަ އެ މީހާއަށް ރަނގަޅު ފިލާވަޅެއް ނަގައިދިނީމުހޭ..” ނުހާ އަދިވެސް ހުރީ އޭނާގެ ހެދުން ހަޑިވުމުން ހިތްހަމަނުޖެހިފައެވެ. ނުހާ ވާހަކަ ދެއްކީ ގޮތުން ފަލަކްއަށް ހެވުނީއެވެ. “އަޅެ ދެންންން…ވައި އާރ ޔޫ ލާފިންގް” ނުހާ އަހާލީ ފާޑަކަށް ރަކިވެ ހުރެއެވެ. “ނުއްކޮ ހީވަނީ އެ ބޯއީ މަރޑާރ ކުރަން އުޅޭހެން ވިއްޔަ ހެވޭނެ އެއްނު….އޭނަވެސް ގަސްތަކު ނުއްކޮ ގަޔަކަށް އައިސްކްރީމް އެއް ނާޅާނެ އެއްނު ދޯ…އަޅާ ނުލާ ހިނގާ ގެއަށް ދާން އަަވަހަށް” ނުހާ އުޅުނު ގޮތުން ފަލަކްއަށް އޭނާގެ ހިނިގަނޑު ހިފަހައްޓައިލެވުނީ ހަމަ ކިރިޔާއެވެ. އައިސްކްރީމް ބޯ ހިޔާލު ދޫކޮއްލުމަށް ފަހު ދެމީހުންވެސް ކާރުގައި އެޕާރޓްމެންޓަށް މިސްރާބު ޖެހިއެވެ.

ހަފްތާއެއް ވޭތުވެގެން ދިއައިރު ޔަނާގެ ހާލަތަކަށް އެއްވެސް ބަދަލެއް ނާދެއެވެ. އަދިވެސް ޔަނާ އޮތީ ކޯމާއެއްގައެވެ. އާލިމް އޭނާގެ ހުރިހާ ވަގުތެއް ޔަނާއަށް ހުސްކުރަމުން އައި އިރު، އާލިމްގެ ހާލަތު ފެންނަ ކޮންމެ ފަަހަރަކު ހާޖަރާއާއި ވަރުދާ އެކަމާ ހިތާމަކުރެއެވެ. އަދި ޔަނާއަށް އަވަސް ޝިފާއަކަށް އެދި މާތްﷲ ގެ ހަސްރަތަށް ދުޢާ ކުރެއެވެ.

ލޫތްގެ ކެބިންގައި ނިކްޔަންއާއި ލޫތް ތިބި އިރު އެދެމީހުންގެ ކުރިމަތީ ހުރި މޭޒު މަތީގައި އޮތީ އެ ޕޭޕަރެއް ތައްޔާރުވުމުގެ އިންތިޒާރުގައި ނިކްޔަން ހުރި ޕޭޕަރެވެ. ކިތަންމެ ހިތައް ތަދުވިޔަސް ފަލަކްގެ އުފަލައްޓަކައި މިއަދު އޭނާ ޖެހޭނީ ފަލަކް މިނިވަން ކުރާށެވެ. ލޯބީގެ ފޮނި މީރުކަން ނެތް މި ކައިވެނިން އަބަދުގެ އަަބަދަށް ފަލަކް މިންޖު ކުރާށެވެ. “ނިކް އަދިވެސް ވިސްނާލަންވީނު” ނިކްޔަން ގިރާކުރަން އެއުޅެނީ ކިހާ ބޮޑު ހަރުފަތެއްކަން އިނގޭ ހާލު ލޫތް އެދުނެވެ. “ނޫނޭ ލޫތް…ދިސް އިޒް ފޯރ ދަ ބެސްޓް” މޭޒުމަތީގައި އޮތް ގަލަން ނަގައި ނިކްޔަން އެ ގަނޑުގައި ސޮއި ކޮއްލީ އޭނާގެ ހިތުގެ މަތީގައި ގާގަނޑެއް ބާއްވަމުންނެވެ. އޭނާ ކެތްކުރާނެ އެވެ. ލޯތްބައްޓަކައެވެ. އެ ޕޭޕަރު ހިފައިގެން އޭނާގެ ކެބިންއިން ނިކުމެގެން ދިޔަ ނިކްޔަން ދިޔަ ދިމާލަށް ބަލަހައްޓައިގެން ލޫތްއަށް ހުރެވުނީ ގޮތްހުސްވެފައިވާ މީހެއް ފަދައިންނެވެ.

ޝޫރާއާއި އެކު ވިލިމާލޭގެ ހޮސްޕިޓަލަށް ފަލަކް ދިއައީ ޝޫރާ މެންގޭގައި ހުއްޓާ ބޯ އަނބުރާ ކަހަލަ ގޮތެއް ވާން ފެށުމުންނެވެ. ޝޫރާމެން ދިރިއުޅޭ ގެ ހުންނަނީ ހޮސްޕިޓަލާއި ނުހަނު ކައިރީގައި ކަމުން މައުރިފާ އަދި ޝޫރާގެ އެދުމަށް ޑޮކްޓަރަށް ދައްކާލަން ފަލަކް ނިންމީއެވެ. ހަމްދާން އާއި ޝޫރާގެ އެހީގައި ހޮސްޕިޓަލަށް ދެވުމާއިއެކީ ފަލަކް އެނދުމަތި ކުރެވުނެވެ. ދެތިން ޓެސްޓެއް ހަދަން ލޭ ނެގުމަށްފަހު އައިވީ ގުޅާފައި އެ ހުސްވަންދެން ފަލަކް އެޑްމިޓް ކުރެވުނެވެ. ފަަލަކްގެ އެދުމަށް އެކަކުވެސް ނިކްޔަންއަށް ނޭންގީ އެހައި ސީރިއަސް ނުވުމުންނެވެ. ތިން ގަޑީރި ތެރޭގައި އައިވީ ފުޅި ހުސް ވިއިރު ޑޮކްޓަރު ހުރީ ހެދުނު ޓެސްޓުގެ ނަތީޖާ ހިފައިގެން އައިހެވެ.
ފުޅާ ހިނިތުންވުމަކާއި އެކު ޑޮކްޓަރު ދިން ޚަބަރަކުން ފަލަކްގެ މޫނުމަތި އުޖާލާ ވެގެން ދިއައެެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.