ޒާޔާ (ސޯޅަވަނަ ބައި)

އެކޮޅުން އެމީހަކު ގުޅަން ފެށުމުން ޖަމީލާ ވަގުތުން ބިޒީ ކޮށްލިއެވެ. އަދި އެމީހާ ކިހިނެތްވީހޭ އެހުމުން ޖަމީލާ ބުނެލީ ގުޅުމަކީ އޭނާ އެހާ ހިތްހަމަޖެހޭ ކަމެއް ނޫންކަމުގައެވެ. ޒާޔާގެ ނަމުގައި ޖަމީލާ އެމީހަކާ ވާހަކަދައްކަމުން ގޮސް އެންމެ ފަހުން ޒާޔާގެ އެހެނިހެން ފޮޓޯތަކެއްވެސް ފޮނުވައިލައިފިއެވެ. އަދި ޗެޓް ލޮގުން ނުކުމެ އެ ޗެޓް ލޮގު ހައިޑް ކޮށްލިއެވެ. އަދި ފޯނު އެނދުގެ ހެޑްބޯޑް މަތީ ބާއްވައިފައި އެނދުމަތީ އޮށޯވެލިއެވެ. “ހަހަ. ޒާޔާ. މިފަހަރު ކަލެއަކަށް ސަލާމަތެއް ނުވާނެ.” އަމިއްލަ ނަފްސަށް އަޑުއިވޭވަރަށް އެހެން ބުނެލުމަށްފަހު ޖަމީލާ ދެލޯ މަރައިލިއެވެ. ޖަމީލާ ނިންމައިގެން އެހުރީ ލިއަމް މިރަށަށް ގެނައިސް ޒާޔާއަށް ކުރާނެކަމެއް ކޮށް ނިމުނީމަ އޭނާ އާއި ލިއަމް އާއި ދެމެދު ދެކެވުނު ވާހަކަތައް ނިހާނަށް ދައްކާށެވެ. ޖަމީލާއަށް ޒާޔާ މުޅި ދުނިޔެއަށް ބޭޒާރު ކޮށްލެވިދާނެކަމުގެ ބޮޑު ޔަޤީންކަމެއް އޮތަސް ޖަމީލާއަށް ނޭނގުނު ކަމަކީ ތިމާ ފޭހުނު އިލޮށި ހެރޭނީ ހަމަ ތިމާގެ ލޮލަށްކަމެވެ.

ބިންމަތީގައި އޮތް ގޮޅި ޖެހި ރަތް ކުލައިގެ ގަމީސް ލައިގެން ލިއަމް ކޮޓަރިން ނުކުތެވެ. ލައިގެން ހުރި ޖީންސުގެ ޖީބުގައި އޮތް ވޮލެޓުން ފަސް ރުފިޔާ ނަގައިގެން ލިއަމް ގެއާއި ކައިރީގައި ހުރި ފިހާރައަށް ދިޔައެވެ. ފަސް ރުފިޔާއިން ލިބުނު ސުޕާރީކޮޅު ޖީބަށް އަޅައިފައި ދެން ލިއަމް މިޞްރާބު ޖެހީ އޭނާ ގެންގުޅޭ ސައިކަލު ޕާކްކޮށްފައިވި ސަރަޙައްދަށެވެ.

ތަޅުދަނޑި ހައްދާ ތަނެއްގެ ކުރިމަތީގައި ޕާކްކޮށްފައިވި ރަތްކުލައިގެ ހޮންޑާ ސައިކަލު ނެރެ ލިއަމް ސައިކަލަށް އަރައި ދުއްވައިލިއެވެ. އޭނާގެ މިޞްރާބަކަށް ވެފައިވީ އޭނާއާއި އެއް ކޮލެޖެއްގައި ކިޔަވާ ކުއްޖެއްކަމަށްވާ އަފްލާހްގެ ގެއެވެ.

އެޕަރޓްމެންޓްގެ ސިޓިންގްރޫމުގައި ހަރުކޮށްފައި ހުރި ބޮކި ބަދަލުކުރަން ހަރުގަނޑަށް އަރައި ހުރި އަފްލާހަށް ދޮރާއި ދިމާލަށް ބަލައިލެވުނީ ގޭގެ ބެލް އަޅުވައިލި އަޑު އިވުމުންނެވެ. މިވަގުތު ގެއަށް އަންނާނީ ކާކުހޭ ހިތައި އަފްލާހް އަވަހަށް ބޮކި ލައްވައިލުމަށްފަހު ހަރުގަނޑުން ފައިބައިފައި ގޮސް ދޮރު ހުޅުވައިފިއެވެ. “ލިއަމް؟ މިގަޑީ ކީއްކުރަން؟” ނިއްކުރިން ވިދަމުން ދިޔަ ދާ ތިކިތައް ފުހެލަމުން އަފްލާހް އެހިއެވެ. “މީ… ފައިސާކޮޅެއް ލިބިދާނެތަ؟” ލިއަމް އަހަން ނާހަން ހުރެފައިވެސް އެހިއެވެ. އޭނާ މީގެ ދުވަސްތަކެއް ކުރިންވެސް އެކި ކަންކަމުގައި އަފްލާހުގެ އަތުން ލާރި ހޯދައިފައިވިއެވެ. އަބަދު އަފްލާހް ގާތު ލާރި ދޭން ބުނުމުން އަފްލާހް ނުރުހިދާނެހެން ހީވުމުން ލިއަމްގެ ހިތް ކުޑަކޮށް ނުތަނަވަސްވާ ގޮތްވިއެވެ. އެހެނެއްކަމަކު އަފްލާހް ކުރިއެކޭ އެއްގޮތަށް ލިއަމް އެތެރެއަށް ވައްދައި ބޭނުންވަނީ ކިހާވަރެއްހޭ އަހައިލިއެވެ. “އަސްލު ވަރަށް ކަޑަވޭ މިހެން އަބަދު އަފްލާހް އަތުން ލާރި ހޯދަންވީމަ. އަހަ..” ލިއަމްގެ އަނގަ ބަންދުވީ އަފްލާހް ޕިސްޕިސް ލައްވައިލުމުންނެވެ. “ތި ބޭކާރު ވާހަކަ ނުދައްކަ ބުނެބަލަ ދޭންވީ ވަރެއް. އަހަރެން އަތުގަ އެހާވަރަށް ތަނަވަސްކަން އެބަހުއްޓޭ އިރާދަކުރެއްވިއްޔާ. އަހަރެން ލިއަމް އަށް ކިތަންމެ ބޮޑު އެއްޗެއް ދިނަސް އަހަރެންގެ އަތުން އެއްޗެހި މަދުވާނެކަމަކަށް އަހަރެން ގަބޫލެއްނުކުރަން. ބުނޭ އަވަހަށް. ލިއަމް ބޭނުންވި ކޮންމެ އެއްޗެއް އަހަރެން މިހުރީ ދޭން ތައްޔާރަށް.” އަފްލާހް ދެއްކި ވާހަކަތަކުގެ ސަބަބުން ލިއަމްގެ ހިތުގައި އުފެދިފައިވި ނުތަނަވަސްކަން އެއްކޮށް ފިލައިގެން ދިޔައެވެ. ލިއަމް ހީކުރިވަރަށްވުރެ އަފްލާހް މާ ދީލައްޗެވެ.

“ޝުކުރިއްޔާ އިނގޭ ވަރަށް ބޮޑަށް. އަހަރެން މިދޭތެރޭ ރަށަކަށް ޖައްސާލަން މިއުޅެނީ. އެހެންވެ ލޯންޗް ޓިކެޓަށް ދައްކަން ޖެހޭނެ ލާރިކޮޅަކާ ދެން އިތުރު ބައެއް ޚަރަދުތަކަށް ބޭނުންވާ ލާރިކޮޅެއް.” އަފްލާހް ބޯ ޖަހައިލުމަށްފަހު ލިއަމް ގާތުގައި ސޯފާގައި އިށީނުމަށް ބުންޏެވެ. އަދި އޭނާގެ ކޮޓަރިއަށް ގޮސް އަލަމާރި ހުޅުވައި ފައިސާ ރައްކާކުރާ ވަތްގަނޑު ހުޅުވައިލިއެވެ. ލިއަމް އެބުނާ ދަތުރަކަށް ބޭނުންވާވަރަށް ފައިސާ ނެގުމަށްފަހު އަފްލާހް ސިޓީއުރައެއް ނަގައި އެއަށް އެ ލާރިކޮޅު ލިއެވެ. އަދި ސިޓީއުރަ ބަންދުކޮށްލުމަށްފަހު ކޮޓަރިން ނުކުތެވެ. “އަނ. މިއޮތީ. އަހަރެން އެއްވެސް ބަދަލެއް ބޭނުމެއްނޫން. އަހަރެން ހަމަ ބުނަން އޮތް ވާހަކައަކީ ލިއަމް ރަނގަޅު ވަޒީފާއެއް ހޯދައި އަމިއްލަ ފައިމައްޗަށް ކޮޅަށް ތެދުވާށޭ.” ލިއަމް އެވާހަކަތަކަށް ހަމައެކަނި ބޯ ޖަހައިލީއެވެ. އަދި އަފްލާހަށް ޝުކުރު އަދާކުރުމަށްފަހު ގޮއްސިއެވެ. އަފްލާހް ދޮރު ތަޅުލައިފައި އައިސް ހަރުގަނޑު ނަގައި ޓެރަހަށް ގޮސް ޓެރަހުގައި ބެހެއްޓިއެވެ.

ލިއަމް އެ ސިޓީއުރަ ފޮތި ކޮތަޅަކަށް ލުމަށްފަހު ސައިކަލުގެ މަޑިދަށަށް ލިއެވެ. ލިއަމް އެގޮތަށް ކަންތައް ކުރީ މީގެ ކުރިން އޭނާ ގެންދިޔަ ސިޓީއުރައެއް ފުލުސް މީހަކަށް ފެނިގެން އެމީހާ ލިއަމް ހިފެހެއްޓުމުންނެވެ. ނަމަވެސް އަފްލާހް ހުރިހާ ވާހަކަތަކެއް ކިޔައިދިނުމުން ފުލުސް މީހާ ލިއަމް ދޫކޮށްލީއެވެ. ލިއަމް ގެއަށް އައިސް ކަނދުރާއާއި ހަމައަށް ދިގުވެފައިވި އިސްތަށިގަނޑުގައި އަތް ފުނާ އަޅައި ތުނބުން ފުމެމުން އޭނާގެ ކޮޓަރިއަށް ވަނެވެ.

ލިއަމް ކޮޓަރީގެ ބޮކި ދިއްލައިލައިފައި އެނދަށް އަރައި އެ ސިޓީއުރަ ކަނޑައިލައިފައި އޭގައި ހުރި ލާރިތައް ނެގިއެވެ. “ސޯޅަ ހާސް ރުފިޔާ.. ވާއު. މީގެން މާ ރަނގަޅަށްވެސް މަށަށް ވާނެ. އެކަމަކު އަފްލާހު ހާދަ މަސައްކަތެއް ކޮށްގެނޭ ދޯ އެހާވަރަކަށް އެ ލާރި ލިބެނީ. މަވެސް ވީ އެކޮޅަށް ގޮއްސަ މަސައްކަތެއް ފައްޓަން.” ރުފިޔާތައް އަނބުރައި ސިޓީއުރައަށްލައި ބަންދުކޮށްލުމަށްފަހު ލިއަމް އެ ކޮޓަރިތެރޭ ހުރި ކުޑަ އަލަމާރިއެއްގެ ތެރެއަށް ލިއެވެ. ދެން ލިއަމް ބެލީ އެރަށަށް ފުރަން ލޯންޗެއް ހަމަޖެހިފައިވޭތޯއެވެ. ކަނޑުމަތީގައި އުޅޭ ލިއަމްގެ އެކުވެރިއަކަށް ގުޅުމުން އޭނާ ބުނީ ކޮންމެ ހަފްތާއެއްގެ ހުކުރު ދުވަސް ފިޔަވާ އެހެން ހުރިހާ ދުވަހަކު ހަވީރު އެ ލޯންޗު އެރަށަށް ދަތުރު ކުރާ ކަމުގައެވެ. ލިއަމް ފޯނު ބޭއްވީވެސް އެ މީހާގެ އަތުން އެ ލޯންޗު ކައްޕިގެ ނަމްބަރުވެސް ހޯދާފައެވެ.

މެންދުރު ނަމާދުކޮށްލައިގެން ޒާޔާ ނުކުތީ ކާންވެގެންނެވެ. ނަމަވެސް ބަދިގެއަށް ނުވަދެވެނީސް ފަވާޝަތު ގުޅައިފައި އެމީހުނާއިއެކު ރެސްޓޯރެންޓަށް ކާން ދިއުމަށް ދައުވަތު ދިނެވެ. ޒާޔާ ހުރީ ދާން ބޭނުންނުވެފައެވެ. ކިޔަވާ ދުވަސްވަރު ރައްޓެހިންނާއިއެކު ރެސްޓޯރެންޓް ތަކަށް ގޮސް ކައި ހެދުމަކީ ޒާޔާއަށް އުނދަގޫވާ ކަމެކެވެ. އެހެނަސް އާއިލާގެ މީހަކާއިއެކީ އެގޮތަށް ރެސްޓޯރެންޓަކަށް އެއްޗެއް ކައިލަން ދިޔަޔަސް އެއީ މައްސަލައެއްކަމުގައި ޒާޔާއެއް ނުދެކެއެވެ. ޒާޔާ ބަހަނާދެއްކުމުންވެސް ފަވާޝަތު އެ އަޑު ނާހައި ބުނީ އަވަހަށް އައުމަށެވެ. އަދި ޒާޔާ ނާންނަނީސް އެމީހުން ރެސްޓޯރެންޓަށް ނުވަންނާނެކަމާއި މެންދުރު ނުކާނެކަންވެސް ބުންޏެވެ.

ފިޔާތޮށިކުލައިގެ ކަކުލާއި ހަމައަށް އަންނަވަރުގެ ރީތި ހެދުމެއް ލުމަށްފަހު ޒާޔާ އޭނާގެ އިސްތަށިގަނޑު ރީތިގޮތަކަށް ސްޓައިލް ކޮށްލިއެވެ. އިސްތަށިގަނޑު ދިގުވެފައި ވުުމުގެ ސަބަބުން އެ އިސްތަށިގަނޑަށް ރީތި ގޮތްގޮތް ހަދައިލެވެއެވެ. އަލަމާރިތެރޭ ހުރި ކުޑަވަރެއްގެ ފައުންޑޭޝަން ފުޅިން ކުޑަވަރެއްގެ ތިއްކެެއް އިނގިލި ކުރީގައި ޖައްސައިލުމަށްފަހު އެ މޫނުގައި ހައިކައިލިއެވެ. އަދި ތުންފަތަށް ކިރިޔަ ކިރިޔާ ރަތްކުލަ އަރާވަރަށް ލިޕްސްޓިކް ޖައްސައިލިއެވެ. އެންމެ ފަހު ކަމަކަށް ގަޔަށް ސެންޓުކޮޅެއް ޖަހައިލުމަށްފަހު ޒާޔާ ކޮޓަރިން ނުކުތެވެ. ޒާޔާ ނުކުތް ވަގުތު އޭނާއަށް އެރުނީ ޖަމީލާ އާއި ނިހާން އާއި ދެމީހުންގެ ކުރިމައްޗަށެވެ.

“ދަރިފުޅު ކޮންތާކަށް ތި ދަނީ މާ ރީތިވެލައިގެން؟ ޕާޓީއެއް އޮތީތަ އަނެއްކާ؟” ނިހާން ސުވާލުކޮށްލުމާއިއެކު ޒާޔާ ހިނިތުންވެލަމުން ނޫނެކޭ ބުނެލައިފިއެވެ. ނިހާން ޒާޔާ ކައިރިއަށް ގޮސްދާނެތީ ޖަމީލާ ހުރީ ނިކަން ބާރަށް ނިހާންގެ އަތު މުލައްދަނޑީގައި ހިފަހައްޓައިގެންނެވެ. އެކަމަކު ނިހާން އޭނާގެ އަތު މުލައްދަނޑީގައި އެޅުވިފައިވި ޖަމީލާގެ އަތް ނައްޓުވައިލަމުން ޒާޔާ ކައިރިއަށް ދިޔައެވެ. ހަމަ އެވަގުތު ޖަމީލާގެ ދެއަތް މުއްކެވުނެވެ. މި މަންޒަރު ނިހާނަށް ނުފެނުނެއްކަމަކު ޒާޔާއަށް ނުހަނު ރީތިކޮށް ފެނުނެވެ. ޖަމީލާގެ ހިތުގައި ޒާޔާއާއި ދޭތެރޭ ކޮންމެވެސް ވަރަކަށް ނުރުހުންތެރިކަން ހުރިކަން ޒާޔާއަށް ކުޑަކޮށް ރޭކައިލާން ފަށައިފިއެވެ. “ދެން ކޮންތާކަށް ތި ދަނީ؟” ޒާޔާގެ އިސްތަށިގަނޑުގައި އެލުވިފައި އިން ޓިސްދައްޗެއް ރީތިކޮށް ޒާޔާގެ އިސްތަށިގަނޑަށް ޖަހައިދެމުން ނިހާން އެހިއެވެ. “ފަވާއާއެއްކޮށް ކާން މިދަނީ އޭނަ ބުނެގެން. އަޅުގަނޑު ނުދަންޏާ އޭނަ ނުކާނަމޭ ބުނީމަ ދެން ދާކަށްނު ޖެހޭނީ. ދޯ ބައްޕާ!” ނިހާން ހިނިތުންވެލަމުން ބޯ ޖަހައިލިއެވެ. އަދި ނިހާންމެންވެސް ހިނގައިލަން ދަނީ ކަމުގައާއި ޢަޞްރު ވުމުގެ ކުރިން ގެއަށް އައުމަށް ބުންޏެވެ. ޒާޔާ އާނއެކޭ ބުނެލުމަށްފަހު ނިހާން ފަސްދީ ދިޔައެވެ. ޒާޔާ ނުކުތުމުން ނިހާން ޖަމީލާ ގޮވައިގެން ގޭ ދޮރާށި ތަޅުލައިފައި ނުކުމެއްޖެއެވެ.

ފަވާޝަތު ބުނި ރެސްޓޯރެންޓް ކައިރިއަށް ދެވުނުއިރު ފަވާޝަތާއި ނޫމާނާއި ހަސްނައިން އެތާ މަޑުކޮށްގެން ތިއްބެވެ. ހަސްނައިންގެ ލޮލުގައި ޒާޔާ އަޅައިގަތުމާއިއެކު އޭނާއަށް ކުޑައިރުކޮޅަކަށް ނަމަވެސް ޒާޔާއަށް ބަލަހައްޓައިގެން ހުރެވުނެވެ. ޒާޔާ ބަލައިލުމާއިއެކު ހަސްނައިން ނޫން ކަމަށް ހަދައިފައި ދުރު ބަލަން ފެށީއެވެ. “މިއޮއް އައީއެއްނު. ހިނގާ އެތެރެއަށް.” ނޫމާން ބުނުމާއިއެކު އެންމެން ނޫމާންގެ ފަހަތުން އެތެރެއަށް ވަދެއްޖެއެވެ. އެ ރެސްޓޯރެންޓަކީ ތިން ބަރިއަކަށް ހަދައިފައި ހުންނަ ރެސްޓޯރެންޓެކެވެ. އަދި އެއީ ރަށުގެ އެންމެ ފެންވަރު ރަނގަޅު އެއް ރެސްޓޯރެންޓެވެ. އެތަނުގައި މަސައްކަތް ކުުރާ ޝެފުންނަކީ އިޓަލީ އާއި ފްރާންސް އަދި ޖަރމަނީން ގެނެއްސައި ހުރި ޝެފުންނެވެ. އެހެންކަމުން މާލެއެކޭ އެއްގޮތަށް އެ ރެސްޓޯރެންޓުވެސް އޮންނަނީ ކަސްޓަމަރުންތަކުން ފުރިފައެވެ. ފަވާޝަތުމެން އެރީ ރެސްޓޯރެންޓުގެ އެންމެ މަތީ ބަޔަށެވެ.

އެކުދިން އިށީނުމާއިއެކު ވެއިޓަރަކު އައިސް މެނޫ އެއް ދިއްކޮށްލިއެވެ. ކޮންމެ ކުއްޖަކުވެސް އެކުއްޖަކު އެންމެ ކާން ބޭނުންވާ އެއްޗަކަށް އޯޑަރު ކުރިއެވެ. “މަޑުކޮށްބަލަ. ކާކު ޕޭ ކުރަނީ މި ހުރިހާ އެއްޗަކަށް؟” ވެއިޓަރ އޯޑަރު ނަގައިގެން ދިޔުމުން ޒާޔާ އަހައިލިއެވެ. “މީ އަހަރެން ދޭ ކެއުމެކޭ. މިއަދު މީ އަހަރެން ބޮޑުވާ ދުވަހެއްނު.” ނޫމާން ލައިގެން އިން ގަމީހުގެ ގިރުވާނުގައި ހިފައި ކުޑަކޮށް މައްޗަށް އުފުލައިލަމުން ފޮނި ގޮތަކަށް ބުނެލިއެވެ. “އަސްލުތަ؟ އެއިޓީން ވީ ދޯ މިހާރު. ހެހެ.” ޒާޔާ ބުނެލިއެވެ. “އާނ ދެން. މިރާއްޖޭގަ އަށާރަ ނުވަންޏާ ބުއްފުޅި ބޯ ތުއްތު ކުއްޖެއްނު.” ފޫހި ރާގަކަށް ނޫމާން ބުނެލިއެވެ. “އޯކޭ ސްޓޮޕް. ނޯ ނީޑް ޓު ޓޯކް އެބައުޓް ދެޓް… ފަވާ އޭ..” ހަސްނައިން ފަވާޝަތަށް ގޮވައިލައިފައި ލޮލުގެ އިޝާރާތުން ނޫމާން ދައްކައިލިއެވެ. ދެބުމަ ގޮށްޖެހި އިސްޖަހައިގެން އިން ނޫމާނަކަށް އެކަމެއް ނޭނގުނެވެ. ހަސްނައިން ލޮލުގެ އިޝާރާތުން އެ ބުނީ ކީކޭކަން އެނގުމުން ފަވާޝަތު ޒާޔާ އާއި ކައިރިވެލާ މިއަދު ހަވީރު އެމީހުން ކުރަން އުޅޭ ކަންތައް ސިއްރުން ޒާޔާ އާއި ޚިއްޞާ ކުރިއެވެ. ޒާޔާގެ ތުންފަތަށް ވަގުތުން ލާނެތް ހިނިތުންވުމެއް ވެރިވިއެވެ. ޒާޔާ ދެބުމަ އަރުވައިލީ ފަވާޝަތު ބުނި ކަންތަކާ އެއްބަސްވަމޭ ބުނުމަށެވެ.

ހަތަރު އެކުވެރިން އެކިއެކި ވާހަކަތައް ދައްކަން ތިއްބައި ވެއިޓަރ ކާ އެއްޗެހި ހިފައިގެން ގެނައެވެ. ކާ އެއްޗެހި ބަހައްޓައިފައި ދެން އައީ ހަތަރު އައިސް މައިލޯ ތަށި ހިފައިގެންނެވެ. ވެއިޓަރ އެއްޗެހި ބަހައްޓައިފައި ދިޔުމުން އެންމެންވެސް ކާން ފެށިއެވެ. ކަމުން ދިޔަ ވަގުތުގައިވެސް ހަތަރު އެކުވެރިންގެ ވާހަކަ ހުސްނުވެއެވެ. ނޫމާން ދޭތެރެއަކުން ބުނެލާ މަޖާ އެއްޗެހިން އެންމެން ހެވައިގަނެއެވެ. ހަސްނައިން އަށް ދޭތެރެއަކުން ޒާޔާއާއި ދިމާލަށް އެހެން ގޮތަކަށް ބަލައިލެވެއެވެ. މައުސޫމް ކަމުން ފުރިފައިވި ޒާޔާގެ މޫނު ފެނުމުން ހަސްނައިން ހަނދާންވަނީ އޭނާގެ ކޮއްކޮ މަތިންނެވެ. ކޮއްކޮ މާލޭގައި ކިޔަވަން ބަހައްޓައިފައި ހުންނާތީ ހަސްނައިންއަށް އޭނާގެ ކޮއްކޮ ނުފެނި ގިނަދުވަސްތަކެއް ވޭތުކުރަން ޖެހިފައިވިއެވެ.

“ހަސްނައިން ކަލޭ ތި އިންނަނީއެކޯ ތަނެއްގަ ބަހައްޓައިފަ ހުރި ފިހިގަނޑެއްހެން؟” ހަސްނައިން ދެލޯ ހަނިކޮށްލައިގެން ޒާޔާއަށް ބަލަން އިންކަން ފާހަގަވެގެން ނޫމާން އެހިއެވެ. ނޫމާން ބުނި ޖުމުލައިން ޒާޔާއަށް ހެވުނު އިރު ފަވާޝަތު ބޯން އިން އައިސްމައިލޯ ތަށި އޭނާގެ އަތުން ދޫނުވީ ކިރިޔާއެވެ. ހަސްނައިން އަވަހަށް ނޫންކަމަށް ހަދައިފައި އޭނާގެ ތަށިން ފްރައިޑް ރައިސްކޮޅެއް ނަގައި ކައިލިއެވެ. “ނޫމާން ހެޔޮނުވާނެ ކާން އިންނަގަޑީ ތިކަހަލަ އެއްޗެހި ނުކިޔަބަލަ. ހަހަހަ.” ފަވާޝަތަށް އެ ޖުމުލަ ބުނެވުނީވެސް ހެމުން ހެމުންނެވެ. ނޫމާން ހިނިގަނޑެއް ޖަހައިލުމަށްފަހު ސްޕެގެޓީ ކޮޅެއް ކައިލިއެވެ. އެންމެންވެސް ކައި ނިމުމުން އެތަނުން ތެދުވެގެން ރެސްޓޯރެންޓުން ނުކުތެވެ. ނޫމާން މަޑުކުރީ ބިލް ދައްކައިފައި ނުކުންނަންވެގެންނެވެ. މާގިނައިރުތަކެއް ނުވެ ބިލް ދައްކައިފައި ނޫމާން ނުކުމެއްޖެއެވެ.

ޒާޔާއަށް ގެއަށް ދެވުނުއިރު މެންދުރު އަނބުރައި ދޭއް ޖަހައިފިއެވެ. ގެއަށް ވަންނަން ދޮރާށީގައި ހިފިއިރު ދޮރާށި ތަޅުލައިފައި ހުރުމުން ޒާޔާ ނިހާނަށް ގުޅައިލިއެވެ. “ބައްޕަ އެބަ ދަން އިރުކޮޅަކުން. ދަރިފުޅު ދޮރުމަތީގަ މަޑުކޮށްލާ އިނގޭ.” ޒާޔާ ފޯނު ކަނޑައިލައިފައި މަގުގެ ދެފަރާތަށް ބަލައިލައިފައި އަނެއްކާވެސް ފޯނާއި ކުޅެން ހުއްޓެވެ.

މެންދުރު ކާންވެގެން ނުކުތް މަތީނާއި ޖިނާނަށް ޒާޔާ ފޯނާއި ކުޅެން ހުއްޓާ ފެނުމުން އެދެމީހުނަށް ހުރިތާ ހުއްޓެވުނެވެ. އެމީހުން ތިބީ އެހެން މަގެއްގައި ކަމަށް ވާތީ ޒާޔާއަކަށް އެދެމީހުނެއް ނުފެނެއެވެ. “އެމަންޖެ ބޭރަށް ނުކުމެ ކީއްތަ އެ ކުރަނީ؟” ޖިނާން ވައި އަޑުން އަހައިލިއެވެ. “ނޭނގެޔެއްނު. އެ މަންޖެއަކަށްނު އިނގޭނީ.” މަތީން ޒާޔާގެ ދޮން އަތްތިލައަށް ބަލަން ހުރެ ބުންޏެވެ. ކަންކަމުގައި ކެތްތެރިކަން ކުޑަ ޖިނާން ދެވަނަ ވިސްނުމެއް ނެތި ޒާޔާ ކައިރިއަށް ދާންވެގެން މަޑުމަޑުން ހިނގައިގަތެވެ. މަތީނަށް ތަންކޮޅެއް ދުރުން ނިހާން އާއި ޖަމީލާ އަންނަތަން ފެނުމުން ފަހަތުން ޖިނާންގެ ޓީޝާޓުގައި ހިފައި ދަމައިގަނެފައި އޭނާއާއި ކައިރިއަށް ގެނެސް ޖިނާން ކޮށްޕަމުން އެ މަގުން ނިވާވިއެވެ.

“ކީއްތަ ތިކުރީ؟” ޓީޝާޓުގެ ކަރުވަޅުގައި ހިފައި ޓީޝާޓު ރަނގަޅުކޮށްލަމުން ޖިނާން އެހިއެވެ. “ޒާޔާގެ ބައްޕަމެން އަންނާތީ ޖިނާނު ގެނައީއެއްނު މި. ކަލޭ ދީވާނަ ވެފަ ހުރިވަރުން ނުފެނުނު ވިއްޔަ އެމީހުން އަންނަތަނެއްވެސް. ދެންވެސް ހިނގާ ދާން.” މަތީން ބޭނުންވީ އެމީހުން އެތާ ތިބިކަން ނިހާނަށް ނޭނގެނީސް އަވަހަށް ދާށެވެ. ޖިނާންވެސް އިތުރު ވާހަކަތަކެއް ނުދައްކައި މަތީނާއިއެކީ ހިނގައިގަތެވެ.

ނިހާން ދޮރު ހުޅުވުމުން ޒާޔާ އެތެރެއަށް ވަނެވެ. ޖަމީލާ ވަނީ ނިހާން ވަތް ފަހުންނެވެ. ޒާޔާ ބަދިގެއަށް ފެން ބޯން ދިއުމުން ޖަމީލާ އަވަހަށް ޒާޔާގެ ކޮޓަރިއަށް ވަދެ އެ ކޮޓަރީގެ ލިޔާ މޭޒުމަތީގައި ފޯނު ބޭއްވިއެވެ. އަދި އެ ކޮޓަރިން ސިޓިންގް ރޫމަށް ނުކުމެ ސޯފާގައި އިށީނެވެ. ޖަމީލާ އެކަން ކުރި ސަބަބަކީ އެ ފޯނު ގިނަގިނައިން ޒާޔާ ކޮޓަރީގައި ބޭއްވީމަ ނިހާނަށް އެއީ ޒާޔާ ކުރާކަމެއްކަން ބޮޑަށް ޤަބޫލުކުރެވޭނެތީއެވެ. އޭރުން ޒާޔާ އެކަން ނުކުރާނެކަމަށް ބުނެފިނަމަ ނިހާން އެ ވާހަކައެއް ޤަބޫލެއްނުކުރާނެއެވެ. ޒާޔާ ކޮޓަރިއަށް ވަނުމުން ޖަމީލާ ވަށްކަޅިން އެ ކޮޓަރިއާއި ދިމާލަށް ބަލައިލިއެވެ. އަދި ނުލަފާ ހިނިތުންވުމެއް ތުންފަތަށް ވެރިކުރުވަމުން ނިހާންގެ ކޮޓަރިއަށް ވަނެވެ.

ޢަޞްރު ނަމާދުކޮށްލައިގެން ޒާޔާ އާދައިގެ ގޮތަކަށް ތައްޔާރުވެލައިގެން ނުކުތެވެ. ފެނާއި ކުލަ ޖަހަން ދާތީ ޒާޔާ ނުކުތީ އޭނާގެ ފޯނު ނުލައެވެ. އޭނާ ދަމުން ދިޔައީ ނިހާން ގާތުގައި އެ ވާހަކަ ބުނެފައެވެ. މިދަނީ ނޫމާންއަށް ހަމަލާދޭންކަމަށް ބުނެ ޒާޔާ ނުކުތް އިރު ޒާޔާ އެދިޔައީ ނޫމާންގެ އުފަންދުވަހު އޭނާގެ ގަޔަށް ފެނާއި ކުލަ ޖަހަންކަން ނިހާނަށް އިނގެއެވެ. ނިހާނަށްވެސް މިއަދަކީ ނޫމާނަށް އަށާރަ އަހަރު ފުރުނު ދުވަސްކަން އެނގެއެވެ. ޖަމީލާ ޒާޔާ ދިޔުމުން އެކިގޮތްގޮތުން ނިިހާންގެ ހިތުގައި ޝައްކު އުފައްދަން މަސައްކަތް ކުރިއެވެ. ނަމަވެސް ނިހާން އޭގެން އެއްވެސް ވާހަކައެއް އަޑެއްނޭހިއެވެ. ހަމައެކަނި ހްމްމް ލައްވައިލަނީއެވެ. “ތިހެން ހްމްމް ލައްވައިލަ ލައްވައިލައެއް ނީންދެވޭނެ ފަހަކުންނެއް ކަލެއަކަށް. ކަލޭގެ ދަރި ބޭޒާރުކޮށްލާނަން. އަޑުއިވިއްޖެ.” އެބަސްތައްވީ ޖަމީލާގެ ހިތުތެރޭގައެވެ. އަދި އޭނާއަށް އޭނާ ބުނަން ބޭނުންވާ އެއްވެސް އެއްޗެއް ނިހާނާއި ދިމާލަށް ބުނާކަށް ނުކެރެއެވެ.

ޒާޔާ ފަވާޝަތުމެން ގެއަށް ދިޔުމުން ފެން އަޅައިފައި ހުރި ދެތިން ޖޫސްޕެޓީ ކޮތަޅާއި ކުލަ އަޅައިފައި ހުރި ޖޫސްޕެޓީ ކޮތަޅެއްވެސް ދިނެވެ. ފަވާޝަތު އައީ ބިސް ކޮތަޅެއް ހިފައިގެންނެވެ. ދެކުދިން އެ އެއްޗެހި ހިފައިގެން ދެން ދިޔައީ ހަސްނައިންގެ ގެއަށެވެ. ހަސްނައިން ވެސް ހުރީ ދެތިން ކުލަ އަޅައިފައި ހުރި ޖޫސްޕެޓީ ކޮތަޅުތަކެއް ހިފައިގެންނެވެ. “ނޫމާން ނުކުންނާނެ އަތިރިމައްޗަށް ދާން. އަހަރުން ހިނގާ އަވަހަށް ދާން އޭނަ ދިޔުމުގެ ކުރިއަށް.” ހަސްނައިން އެހެން ބުނުމުން ޒާޔާއާއި ފަވާޝަތު ބޯ ޖަހައިލުމަށްފަހު ހަސްނައިން އާއި އެކީގައި ހިނގައިގަތެވެ.

ކަކުލާއި ހަމައަށް އަންނަވަރުގެ ސޯޓެއްލައި ރަތްކުލައިގެ ބާ ޓީޝާޓެއް ބޮލަށް ވައްޓައިލަމުން ނޫމާން ކޮޓަރިން ނުކުތެވެ. ނޫމާން ދާތަން ފެނުމުން އުސްމާން ނޫމާނަށް ގޮވައި އޭނާ ކައިރިއަށް ގެނައެވެ. “ދަރިފުޅާ. އަށާރަ އަހަރު ފުރުނެއްކަމަކު އޭގެ މާނައެއްނޫން ބޭނުންހާ ގޮތަކަށް އުޅެވޭނެއެކޭ. ބައްޕަ ނުބުނަން ދަރިފުޅު އެހެން އުޅެއެކޭ. އެކަމަކު… ނަމަނަމަ ދަރިފުޅު ގޯސްކަމެއް ނުކުރާތި. ބައްޕަމެން ލަދުގަންނަންޖެހޭކަހަލަ އެއްވެސް ކަމެއް ދަރިފުޅު ނުކުރާތި.” ނޫމާން އެފަދަ ގޮތަކަށް ނޫޅޭނެކަން އެނގިހުރެވެސް އުސްމާން އެ ނަޞޭޙަތް ނޫމާނަށް ދިނީ މި ޒަމާނުގައި އެ އުމުރުފުރާގެ ގިނަ ޒުވާނުން އުޅޭގޮތް އުސްމާންގެ ހަމަލޮލުން ފެނިފައި ވާތީވެއެވެ. “ބައްޕަ ހާސްނުވޭ. އަޅުގަނޑަކީ ތިހީކުރާހާ ގޯސް ކުއްޖެއްނޫން. ބައްޕަ އަޅުގަނޑަށް ގޯސްގޮތާއި ރަނގަޅުގޮތް ބުނެދީފަވާއިރު އަޅުގަނޑު ގޯސްކޮށް އުޅުމުގެ ބޭނުމެއްނެތްތާ ދޯ.” އުސްމާން ހިނިތުންވެލުމުން ނޫމާން ވެސް ހިނިތުންވެލައިފައި ދިޔައެވެ.

ނޫމާނަށް އަތިރިއަށް ދެވުނުއިރު ހަތަރެއް ޖަހަން ފަސްމިނެޓަށް ވެއްޖެއެވެ. ހަސްނައިންމެން ސަރޕްރައިޒެއް ގެންނާނަމޭ ބުނުމުން ނޫމާން ހީކޮށްގެން ހުރީ އެމީހުން ކޭކެއް ގެންނަނީ ކަމަށެވެ. އެހެނަސް ކަންތައްވީ އެހެނެއް ނޫނެވެ. ނޫމާން އަތިރިއަށް ފައިބަނިކޮށް އޭނާގެ ބުރަކަށީގައި ހަރުއެއްޗެއް ޖެހި ފެޅުނު އިޙުސާސެއް ކުރެވުނެވެ. އޭގެ ވަސްދުވަން ފެށުމުން އެއީ ބިހެއްކަން ނޫމާނަށް އެނގުނެވެ. ނޫމާން އެނބުރިލިތަނާ އޭނާ ތެމިއްޖެއެވެ. ޒާޔާ އެއްލި ފެން ޖޫސްޕެޓީ ނޫމާންގެ މޭމަތީ ޖެހި އެ ފެޅުނީއެވެ. ޒާޔާ އެ އެއްލުމާއިއެއްކޮށް ހަސްނައިން ކުލަ ޖޫސްޕެޓީ އެއްލިއެވެ. ނޫމާން އެ އެއްޗެހި ފިލުވަން ހުއްޓައި ދެން ފެނުނީ މަގޫގަސްތަކުގެ ތެރެއިން ޒާޔާއާއި ފަވާޝަތު އަދި ހަސްނައިން ނުކުތްތަނެވެ. ނޫމާން އެމީހުން ކައިރިއަށް ދާން އުޅެފައި އޭނާއަށް އެމީހުންގެ އަތުގައި ހުރި އެއްޗެހި ފެނިފައި ދެފައި ބިމުގައި ތަތްލިކަހަލައެވެ. “މަ ފުނޑައިފި!” ނޫމާން ދެފަޔަށް ލެވުނުހާ ބާރެއް ލައިފައި ދުއްވައިގަތެވެ. ނޫމާން ދުއްވައިގަތުމާއިއެކު ޒާޔާމެންވެސް ނޫމާން ގައި ފަހަތުން ދުއްވައިގަތެވެ. އެމީހުން ދުވަމުން ދިޔައިރު އެއްވަރަކަށް ނޫމާނާއި ދިމާލަށް އެއްޗެހި އުކަމުން ދިޔައެވެ. ފަވާޝަތު ބިސްތައް ނޫމާން ގަޔަށް ޖަހަމުން ގޮސް ފަސްބިހަށްވުމުން ކޮތަޅުން އެއްވެސް ބިހެއް ނުނަގައި ކޮތަޅު އޮތްގޮތަށް ނޫމާން އާއި ދިމާލަށް އެއްލިއެވެ. އެގޮތަށް ހަތަރުކުދިން ސަކަރާތް ޖަހަމުން ގޮސް އެންމެ ފަހުން ގެއަށް ދިޔައީ ފަސްގަޑި ބައިވިފަހުންނެވެ.

“ހަހަ. ތި އައީ ކޭކު ފަޅާފަ؟” ގެއަށް އައިސް ވަތް ނޫމާން ފެނި އުސްމާނަށް އަހައިލެވުނެވެ. “ކޭކު ފަޅައިފައެއްނު މިއޮތީ. ކޭކު ފަޅާނެކަމަށް ހިތާއޭ އެމީހުން ބުނެގެން ދިޔައީ. އެކަމަކު މިހިރީނު އެމީހުން ދިން ހަމަލާ އަހަންނަށް.” ގައިން ކުލައާއި ފެން ފުހެމުން ނޫމާން ބުންޏެވެ. “މިހުރީ ދެން.. ޗީޑި.. މުޅި ގައިން ބިސް ވަހޭ ދުވަނީ. ދެތިން ސައިބޯނިފުޅި ހުސްވާއިރުވެސް ނޭނގެ މި ވަސްގަނޑު ފިލާނެހެނެއް.” ނޫމާން އަމިއްލައަށް ކުދިކިޔަމުން ގޮސް އޭނާގެ ކޮޓަރިއަށްވަނެވެ.

ނޫމާން ހިތްހަމަޖެހޭވަރަށް ފެންވަރައިގެން ނުކުމެ އުނަގަނޑުގައި ތުވާލި އަނދެލައިގެން ލޯގަނޑު ކުރިމައްޗަށް ހުއްޓުނެވެ. ގައިން ކޮންމެވެސް ވަރަކަށް ބިސްވަސް ދުވާތީ ނޫމާން އޭނާގެ ހެއަރ ޖެލް ދަޅު ނެގިއެވެ. އަދި އެ މުޅި ގައިގައި ހޭކުމަށްފަހު ރީތި ގަމީހަކާއި ޖީންސެއް ލިއެވެ. ނޫމާން ބޭނުންކުރި ހެއަރ ޖެލް އަކީ ވަސްގަދަ ހެއަރ ޖެލްއެއްކަމުން އެ މުޅި ގައިގައި ހޭކިއިރަށް މުޅި ކޮޓަރިތެރޭގައި ހަރުލީ އެ ހެއަރ ޖެލްގެ މީރުވަހެވެ. ޖެނީ ސައިބޯން ދާން ގޮވުމުން ނޫމާން ތުވާލި ހަރުގައި އަޅުވައިލައި ބޮލުގައި ފުނާ އަޅައިލުމަށްފަހު ކޮޓަރިން ނުކުތެވެ.

އިރުއޮއްސި ބަންގި ގޮވުމާއިއެކު ޒާޔާ ކުރަން ހުރި މަސައްކަތް ބަހައްޓައިފައި ގޭތެރެއަށް ވަނެވެ. އޭނާ އަތިރިން އައި ގޮތަށް ފެންވަރައިގެން ނުކުމެ ގޯތިތެރޭ ހުރި ގަސްތަކަށް ފެންދީ ގޯތިތެރެ ސާފުކޮށްލީއެވެ. ކޮޓަރިއަށް ވަދެ ކޮޓަރި ތަޅުލިތަނާ ކޮޓަރީގައި މީހަކު ޓަކި ޖަހަން ފެށުމުން ޒާޔާ ދޮރު ހުޅުވައިލިއެވެ. “މަންމަގެ ފޯނު ގެނައިންތަ؟” ޖަމީލާ ކޮޓަރިތެރެއަށް ނަޒަރު ހިންގައިލަމުން އެހިއެވެ. “ނޫން. ކިހިނެތްވީ؟” ޖަމީލާ އެތެރެއަށް ވަނުމުން ޒާޔާ އެހިއެވެ. ޖަމީލާ އެއްވެސް އެއްޗެކޭ ނުބުނެ ތަންތަން ހޯދާ ކަމަށް ހެދުނެވެ. ލިޔާ މޭޒުކައިރިއަށް ގޮސް ފޮތްތަކެއް ހާވާފައި ވާހަކަފޮތެއްގެ ދަށުގައި އޮތް ޖަމީލާގެ ފޯނު ޖަމީލާ ނެގިއެވެ. “މިއޮތީނު.” ފޯނު ދައްކައިލަމުން ޖަމީލާ ޒާޔާއާއި ދިމާލަށް ބުންޏެވެ. ޒާޔާ އަށް ހުރެވުނީ ދެލޯ ބޮޑުކޮށްލައިގެންނެވެ. އޭނާ ހަމަ ގައިމުވެސް ޖަމީލާގެ ފޯނު މިކޮޓަރިއަކަށް ނުގެނެއެވެ. ކުޑަމިނުން އޭގައި އަތްވެސް ޖައްސައިނުލައެވެ. “ކޮންއިރަކު ފޯނު ނެގީ؟ ކީއްކުރަން ފޮތްތަކުގެ ދަށަށް ލީ؟” ޖަމީލާ ޒާޔާ އިތުރަށް ހާސްކުރުވަންވެގެން ސުވާލުކުރިއެވެ. “ހަމަ ތެދެއް މިބުނީ ދައްތާ. އަހަރެން ތީގަ އަތްވެސްނުލަން. ނޭނގެ މިތަނުގަ އޮތްކަމެއްވެސް.” ޖަމީލާ އެއްވެސް އެއްޗެކޭ ނުބުނެ ދެން ނުކުމެގެން ދިޔައީއެވެ. ޒާޔާ އެކަން މާ ބޮޑުކަމަކަށް ނުހަދައި ދޮރު ލައްޕައި ކޮޓަރި ތަޅުލިއެވެ.

މަލްހާ ދުނިޔެއަށް ދިއުމަށްޓަކައި ވާން ޖެހޭ ހުރިހާ ތައްޔާރީތަކެއް ވަމުން ދިޔައެވެ. އެގޮތުން އޭނާއަށް އުދުހުމުގެ ބާރު ލިބިފައި ނުވާތީ އެކަމަށް އޭނާގެ އެކުވެރިންގެ އެހީ ހޯދިއެވެ. އޭނާގެ އެކުވެރިން މަލްހާއަށް ބާރުދޭން އެއްބަސް ނުވާތީ މަލްހާ އެދުނީ އެ ޖިންނިން އޭނާ ދުނިޔެއަށް ފޮނުވައިދިނުމަށެވެ. އެކަމާ އެ ޖިންނިތައް އެއްބަސްވިއެވެ. މަލްހާ މިހުރިހާ ކަމެއް ކުރަމުން ދިޔައީ މަލަކާ އާއި މާލިކުއަށް ވަރަށް ސިއްރުންނެވެ. އެދެ ޖިންނީންނަށް ކިރިޔާވެސް އިޝާރާތެއް ނުވާފަދައިންނެވެ. މަލައިކާ މަރައިލުމަށް ޢަޒުމު ކަނޑައަޅައިގެން ހުރިއިރު މަލްހާއަށް އެއީ އޭނާގެ އުފަން ދަރިފުޅުކަންވެސް ހަނދާން ނެތިފައިވާފަދައެވެ. މަލައިކާ އިސްލާމް ވުމުން މަލްހާގެ އެތައް އެކުވެރިންނެއް މަލްހާ ލަދުގަންނަގޮތަށް ވަނީ މަލްހާއާއި ދިމާލަށް އެއްޗެހި ކިޔައިފައެވެ. އެ ކީ އެއްޗެހީގައި މަލްހާ ގާތަށް އައި ގަދަ ރުޅިގަނޑު ބޭލީ މަލައިކާއަށެވެ. މަލައިކާ މި ވުޖޫދުން ފުހެލުމުން ނޫނީ އޭނާއަށް ދެން ހަމަޖެހިގެން ނޭވައެއްވެސް ނުލެވޭނެއެވެ.

އަންނަން އުޅޭ ގަދަ ތޫފާނުގެ ހިލަމެއް ނުވާ ޙާލު މަލައިކާ އަމިއްލައަށް އުފަލާއިއެކު ދިރިއުޅެމުން ދިޔައެވެ. މަޣްރިބް ނަމާދުކޮށް ނިންމައިގެން މަލައިކާ ނުކުތީ ބޭރަށެވެ. ރަށުގައި ހެދިފައި އޮތް ބިޔަ ބޮޑު ޖަންގަލި ތެރެއިން މަލައިކާ ރަށުތެރެއަށް ނުކުތްއިރު ކޮންމެވެސް ވަރަކަށް މީހުން ހިނގާބިނގާވެ އުޅޭ މަންޒަރު ފެންނަމުން ދިޔައެވެ. ނަމާދަށް ނުގޮސް ބޯޅަ ކުޅެ ނިންމައިލައިގެން ދަނޑުގައި އިށީންދެލައިގެން ތިބި ފިރިހެން ކުދިންތަކެއް ފެނި މަލައިކާ އެކުދިން ބިރުގަންނަވައިލަން ހިތަށް އެރިއެވެ. އެކުދިންނާއި ދިމާލަށް ދާން އެއް ފިޔަވަޅު އެޅުނު ވަގުތު މަލައިކާގެ ޚިޔާލު ބަދަލުވިއެވެ. ބިރު ދައްކައިގެން އެކުދިން އެތަނުން ފޮނުވައިލުމަކީ ކޮށްގެން ވާނެ ކަމެއްނޫންކަން މަލައިކާއަށް ވިސްނުނު ވަގުތު އޭނާ ހަދާނެ އެހެން ގޮތެއް ވިސްނައިލިއެވެ. ބޯޅަ ދަނޑު ކައިރީ ހެދިފައި ހުރި ގަސްތަކެއްގެ ނިވަލަށްވަދެ މަލައިކާ އިންސާނެއްގެ ސިފައަށް ބަދަލުވެލިއެވެ. މިހާރު އޭނާ ހުރީ ބޮޑު ބުރުގާ އަޅައި ހިޖާބު އަޅައިގެންނެވެ. ގަސްތަކުތެރެއިން ނުކުމެ މަލައިކާ އެކުދިންނާއި ދިމާލަށް ދިޔައެވެ. “ކޮއްކޮމެން އަވަހަށް ދޭ ނަމާދަށް. ތިހެން ނަމާދަށް ނުުގޮސް ތިބުމަކީ ވަރަށް ނުރައްކާތެރިކަމެއް. މަރުވާނީ ކޮންވަގުތަކު ކޮންތާކުކަމެއް ނޭނގޭނެ.” އެކުދިންނަށް އެ ރީތި އަންހެން ކުއްޖާ އެދިން ރީތި ނަޞޭޙަތް ޤަބޫލުކޮށް އެތަނުން ހިނގައިގަތެވެ. ނަމަވެސް އެތަނުން ތަންކޮޅެއް ރުޅިގަދަ ކުއްޖަކު އެ އަންހެން ކުއްޖާއާއި ބެހިލާނަމޭ ހިތައި ފަސްއެނބުރި ބަލައިލިއިރު އެ ކުއްޖާ ފެންނާކަށް ނެތެވެ. ހިސާބެއްގެ ބިރުވެރިކަމެއް ހިތަށް ވަނަސް އޭނާވެސް އެހެން ކުދިންނާއި އެކީ ހިނގައިގަނެއްޖެއެވެ.

މަލައިކާ ހިނގައިލައިފައި ދިޔައީ ރަށުގައި ހުރި ބޮޑު މިސްކިތާއި ދިމާލަށެވެ. އޭނާ މިސްކިތް ތެރެއަށްވަދެ އެތާ ހަދައިފައި ހުރި ބުރު މަތީ އިށީންދެލިއެވެ. މަލައިކާ އިނީ އިމާމް މީހާ ޤުރްއާން ކިޔަވަމުން ދިޔަ އަޑުއަހާށެވެ. މިސްކިތުގައި އެއްކޮށް ނަމާދުކޮށް ނިމޭންދެން މަލައިކާ އިނީ އެ ބުރުގައި އިށީންދެލައިގެންނެވެ. މިސްކިތުން މީހުން ފައިބައި މަންޒަރު ބަލަން ހުއްޓައި މަލައިކާ އަށް މީގެ ކުރިން އޭނާ ފަހަތު އަޅުވައިލައިގެން އުޅުނު ފިރިހެން މީހާ ފެނުނެވެ. ރީތިވަރަކަށް ތުނބުޅި ދިގުކޮށްލައިފައި އެހާ ކަޅުކަންގަދަ ބުމައަކާއި ތޫނުދެލޯ ލިބިފައި ހުރިއިރު ނުލާހިކު ރީއްޗެވެ. އޭނާ ވައި އަޑުން އެއްޗެއް ކިޔެވިއެއްކަމަކު މަލައިކާގެ ކަންފަތަށް ނުހަނު ސާފުކޮށް އޭނާ އެ ކިޔާވާ އެއްޗެއްގެ އަޑު އިވެމުން ދިޔައެވެ. އޭނާ އެ ކިޔަވަނީ މިސްކިތުން ފައިބަމުން ކިޔާ ދުޢާއެވެ. އެ ފިރިހެން މީހާ މިސްކިތު ބޭރުގައި މަޑުކޮށްލުމުން މަލައިކާގެ ހިތުގައި ސުވާލު އުފެދުނެވެ. ނަމަވެސް އޭނާގެ ހިތުގައި އުފެދުނު ސުވާލަށް ލަސްތަކެއް ނުވެ ޖަވާބު ލިބުނެވެ. އެ ފިރިހެން މީހާ މިސްކިތުން ފޭބިތާ އިރުކޮޅެއްނުވެ ހިޖާބުވެގެން ހުރި އަންހެނެއް މިސްކިތުން ފައިބައި އެ ފިރިހެން މީހާ އަތުގައި ހިފައިލައިގެން ދިޔައީއެވެ. އެ މަންޒަރު ފެނި މަލައިކާއަށް ރޮވޭގޮތްވެސް ވިއެވެ. އެހެނަސް ކަރުނަ ފުހެލައިފައި މަލައިކާ އެދެމީހުންނަށް ހެޔޮ ދުޢާ ކުރަމުން މިސްކިތުން ނުކުމެ އަނެއްކާވެސް އޭނާގެ ގެއަށް ދާން ހިނގައިގަތެވެ.

މަލައިކާއަށް ރަށުގެ ހުޅަނގު ފަރާތަށް ގޮސް ވަލުތެރެއަށް ވަންނަން އުޅުނު ގަޑީ އަންހެނެއްގެ ހަޅޭކުގެ އަޑު އިވުނެވެ. އޭނާ ފަސްއެނބުރި ބަލައިލިއިރު ހޭޅިފަށުން އަންހެނަކު ދުވެފައި ނުކުންނަނީއެވެ. އޭނާގެ ފަހަތުން ބިޔަ ފިރިހެނަކު ދުވެފައި ނުކުތެވެ. ފިރިހެން މީހާ އެ އަންހެން މީހާ ހިފެހެއްޓުމުން އަންހެންމީހާ ގަދަ ހަދައިފައި ފިރިހެން މީހާގެ އަތުތެރެއިން ނުކުންނަން އުޅުނެވެ. ދެން މަލައިކާއަށް ފެނުނީ އެ ފިރިހެން މީހާ އަންހެން މީހާގެ ހެދުމުގައި ހިފެހެއްޓި މަންޒަރެވެ. އަންހެން މީހާ ސަލާމަތަށް އެދި ގޮވަމުން ދިޔައެވެ. މަންޒަރު ބަލަން ކެތްނުވެގެން މަލައިކާ އޭނާގެ ދެލޯ ދިއްލައިލުމަށްފަހު އައްޔެއް ދޫކޮށްލިއެވެ. އެ އަލި ގޮސް ޖެހުނީ ފިރިހެން މީހާގެ އަތުގައެވެ. ފިރިހެން މީހާގެ އަތަށް އެރި ނުބައި ތަދެއްގެ ސަބަބުން ހަޅޭއްލަވައިގަނެފައި އަންހެން މީހާގެ ގައިން އޭނާގެ އަތް ދޫކޮށްލެވުނެވެ. ދަނޑިވަޅު ބަލައިފައި އަންހެން މީހާ ދުވެ ރައްކާވެއްޖެއެވެ. އަތުން ވާގި ދޫވީހެން ހީވި ވަގުތުކޮޅު އެއޮތް ބޮޑު ވަރުގަދަ މީހާއަށް ރޮވެން ފެށުނެވެ. މަލައިކާ އެކަމާ ދެރަވިއެއްކަމަކު އަންހެން ކުއްޖަކާ ބެހެން އުޅުނީތީ އޭނާއަށް ދެވެން އޮތް އަދަބު އެއޮތީ ފިރިހެން މީހާއަށް ދީފައެވެ. މަލައިކާ ދެން ވަލުތެރެއަށްވަދެ އޭނާގެ ދިރިއުޅޭ ގެއަށް ވަނެވެ.

ހަތަރު ޖިންނީންގެ އެހީތެރިކަމާއިއެކު މަލްހާއަށް ދުނިޔެއަށް އާދެވިއްޖެއެވެ. މަލްހާމެން ތިބި ދިމާ ތިރިއަށް ބަލައިލިއިރު މަލްހާމެނަށް އެ އުދުހެވެނީ މިހާރު ސްރީލަންކާގައިކަން އެނގުނެވެ. ޖިންނީންތައް ދެން މިޞްރާބު ޖެހީ ސްރީލަންކާ އާއި ތަންކޮޅެއް ދުރުގައި ކުދިކުދި ތިކިތަކެއްހެން ފެންނަން ހުރި ދިވެހިރާއްޖެއާއި ދިމާލަށެވެ. އެތައް ގަޑިއިރެއްވަންދެން އުދުހުމަށްފަހު އެންމެ ފަހުން ރާއްޖޭގެ މެދުތެރޭ އޮތް އެންމެ ބޮޑު އަތޮޅާއި ކައިރިވެވިއްޖެއެވެ. ދެން މިޞްރާބު ޖެހީ އެ އަތޮޅާއި ވަކިވެފައި އޮތް ބޮޑު ރަށުގެ ވަލުތެރެއާއި ދިމާލަށެވެ.

މަލައިކާ ނަމާދުކޮށްލައިގެން އޭނާގެ ގެއިން ނުކުތީ ޒާޔާގެ ގެއަށް ދިއުމަށްޓަކައެވެ. އެހެނަސް އޭނާއަށް އެރުނީ އޭނާ ފެނިދާނެކަމަށް ހީވެސް ނުކުރާ ޖިންނިއެއްގެ ކުރިމައްޗަށެވެ. އޭނާގެ އުފަން މަންމަގެ ކުރިމައްޗަށެވެ. މަލްހާ އޭނާގެ ވަށައިގެންވި ޖިންނީންނަށް އެތަނުން ދާން އަމުރުކުރުމުން އެ އެއްޗެހިތަށް އުދުއްސައިގެންފިއެވެ. މަލައިކާގެ ރީތި ސޫރަ ފެނިފައި މަލްހާގެ ހިތުގައި ޙަސަދަވެރިކަން އުފެދުނެވެ. މީގެ މަސްތަކެއް ކުރިން އޭނާ ކޮށައިލި އިސްތަށިގަނޑު އެއޮތީ ކުރިއެކޭ އެއްގޮތަށް ދިގުވެ ރީތިވެފައެވެ. މިލާ މޯޅިވެފައި ހުރި މަލެއްހެން ހުރި ހަށިގަނޑަށް މިހާރު އެވަނީ ދިރުން ލިބި ތާޒާވެފައެވެ. “ކަލޭ މަލަކާގެ ސިކުނޑިއާ ކުޅެލީ ދޯ؟” މަލްހާ ހަޅޭއްލަވައިގަތެވެ. “ނޫން. މަލަކާއަށް ހެޔޮގޮތްވާން އެދޭތީ ވިސްނަދިނީ.” މަޑުމައިތިރިކަމާއިއެކު މަލައިކާ ބުންޏެވެ. “ކަލޭ ކޮން ހެވެއް އެދޭނީ އޭނަޔަށް؟ ކަލެއަކަށް ނޭނގޭތަ އަހަރެންގެ އެކުވެރިން އަހަންނާ ދިމާލަށް ކިޔާ އެއްޗެއްސާ މަލަކާއާ ދިމާލަށް ކިޔާ އެއްޗިއްސެއް؟” މަލްހާ މަލައިކާގެ ކަރުގައި ހިފަން އަތް އުފުލައިލިއެވެ. އެހެނަސް މަލްހާއަށް މަލައިކާގެ ކަރުގައި ނުހިފެހެއްޓުނެވެ. އޭނާގެ އަތަށް ހޫނުވާން ފެށީއެވެ. “މަންމާ! މަންމައަށް ތި ވިސްނެނީ މުޅިން ގޯސްކޮށް. އަހަރުމެން ޖިންނީންގެ ތެރޭ މިއޮންނަ ސަގާފަތަކީ ރަނގަޅު އެއްޗެއް ނޫން.” މަލައިކާ އެ ޖުމުލަ ބުނެ ނިންމައިލި ތަނާހެން މަލްހާ އޭނާގެ ދުލުން މަލައިކާގެ ބޮލުގައި ޖެހިއެވެ. ބޮލަށް އެރި ތަދެއްގެ ސަބަބުން މަލައިކާ ތިރިއަށް ވެއްޓުނެވެ. “ކަލެއަށް އޮޅުންއަރައިގަނެގެން ތިއުޅެނީ. އަހަރުމެން ޖިންނީންގެ ސަގާފަތަކީ އަހަރުމެން އަމަލުކުރަން ޖެހޭ އެއްޗެއް. އެހެންނޫނީ އެއަށް އިހުތިރާމް ކުޑަކުރެވެނީއެއްނު އެ. މަރާލާނަން ކަލޭ. ހުރެބަލަ ނިކަން.” މަލްހާ މަލައިކާ އާއި ތަންކޮޅެއް ދުރަށް ޖެހިލައިފައި އޭނާގެ ދޫ ނެރެ ތަންކޮޅެއް ދިގުކޮށްލިއެވެ. ދިގުކޮށްލުމާއިއެކުހެން ދުލުގެ ވަށައިގެން ކަށިތަކެއް ފަޅަށް ފެށިއެވެ. މަލައިކާއާއި ދިމާލަށް ދޫ އަމާޒުކޮށްލުމާއިއެކު މަލައިކާ އާއި މަލްހާ އާއި ދެމެދު އަލިގަނޑެއް ހުރަސްވިއެވެ.

އިރުކޮޅަކު އެ އަލިގަނޑު އެހެން ހުރުމަށްފަހު އެ އަލިގަނޑު ނިވެން ފެށިއެވެ. ދެން ފެނުނީ މަލަކާގެ ރީތި ސޫރައެވެ. “މަލަކާ؟” މަލްހާ އާއި މަލައިކާއަށް އެ ނަމުން ގޮވައިލެވުނީ އެއްފަހަރާއެވެ. މަލަކާ އޭނާގެ އަތް މަލްހާ އާއި ދިމާލަށް ދިއްކޮށްލުމާއިއެކު މަލްހާގެ ނެރެވިފައިވި ދުލުން އެއްބައި ބުރިވިއެވެ. މަލްހާގެ ދުލުން އިޙްސާސް ކުރެވެމުން ދިޔަ ތަދެއްގެ ސަބަބުން ބިންމައްޗަށް ވެއްޓި ދެފަރާތަށް ފުރޮޅެން ފެށިއެވެ.

މަލްހާ ވާނެ ޙާލެއްގައި ވާން ދޫކޮށްލުމަށްފަހު މަލަކާ މަލައިކާ ކައިރިއަށް ދިޔައެވެ. މަލައިކާ އޭރު އިނީ ބޮލުގައި އެނބުރެމުން ދިޔަ ގަދަ ރިހުމެއްގެ ސަބަބުން ދެއަތުން ބޮލުގައި ހިފަހައްޓައިގެންނެވެ. މަލަކާ އޭނާގެ އަތް ކުޑަކޮށް މަލައިކާގެ ބޮލާއި ކައިރިކޮށްލުމުން އޭނާގެ އަތް ރަން އައްޔަކުން ދިއްލުނެވެ. މަލަކާ އޭނާގެ އަނެއް އަތުން މަލައިކާގެ ދެއަތް މަލައިކާގެ ބޮލުން ނައްޓައިލުމަށްފަހު މަލަކާގެ ދިއްލިފައިވި އަތްތިލަ މަލައިކާގެ ބޮލުގައި ބޭއްވިއެވެ. އަދި މަޑުމަޑުން މަލައިކާގެ ކަނދުރާ އާއި ހަމައަށް މަލަކާ ފިރުމައިލިއެވެ. އިރުކޮޅެއް ވަންދެން މަލައިކާގެ ކަނދުރާގައި އަތް ޖައްސައިގެން އިނދެފައި މަލަކާ އޭނާގެ އަތް ދޫކޮށްލިއެވެ. އެއާއިއެކު މަލައިކާ ދެލޯ ހުޅުވައިލައި މަލަކާ އާއި ދިމާލަށް ބަލައިލިއެވެ. މަލައިކާގެ ބޮލުގައި އޭރު އުފެދުނު ރިހުން މިހާރު އެއްކޮށް ފިލައިގެން ހިނގައްޖެއެވެ. މަލައިކާ މަލަކާ ގައިގައި ބައްދައިލައިފައި އޭނާ އެއިންތަނުން ތެދުވިއެވެ.

ދެލޯ ކުރިމަތީގައި އުފަން މަންމަ މަރަށް ތެޅޭހެން ތެޅެން އޮތް މަންޒަރު ބަލަން މަލަކާ އާއި މަލައިކާއަކަށް ކެތެއް ނުވިއެވެ. މަލަކާ ދުވެފައި ގޮސް އޭނާގެ އަތް މަލްހާ އާއި ދިމާލަށް ދިއްކޮށްލުމުން އެއަތުން ރަން އައްޔެއް ނުކުމެ މަލްހާގެ ދުލުގައި ޖެހުނެވެ. އެއާއިއެކު މަލްހާ ކުޑަކޮށް މައިތިރިވިއެވެ. ނަމަވެސް މުޅިން މައިތިރިވާގޮތްވީ މަލައިކާގެ އެހީތެރިކަމާއިވެސް އެކީގައެވެ. މަލަކާއަށްވުރެ މަލައިކާގެ ބާރު ގަދަވުމުގެ ސަބަބުން މަަލައިކާގެ ލޮލުން ދޫކޮށްލި އަލި މަލްހާގެ ދުލުގައި ޖެހުނުއިރަށް އޭނާ އެއްކޮށް މައިތިރިވިއެވެ. “މަލަކާ… އުދުހެވޭތަ؟” މަލައިކާ އޭނާގެ ދެލޯ ނިއްވައިލަމުން އަހައިލިއެވެ. މަލައިކާ ބޯ ޖަހައިލުމުން މަންމަ ގޮވައިގެން ދިއުމަށް މަލައިކާ ބުންޏެވެ. އެކަމާ މަލްހާ ދެކޮޅަސް އޭނާއަށް އެވާހަކަ ބުނެވޭކަށް ނެތެވެ. އޭނާގެ ދުލުގައި އުފެދިފައިވި ރިހުން އެއްކޮށް ފިލައިފައިވިއެއްކަމަކު އޭނާއަށް ވާހަކަދައްކަން އުނދަގުވެފައިވިއެވެ. މަލަކާ އޭނާގެ އަތް މަލްހާ އާއި ދިމާލަށް ދިއްކޮށްލުމަށްފަހު މައްޗަށް އެރިއެވެ. މަލަކާ މައްޗަށް އެރުމާއިއެކު މަލްހާވެސް މަލަކާގެ ބާރުގެ ދަށުން މައްޗަށް އަރަން ފެށިއެވެ. މަލަކާ މަޑުމަޑުން މައްޗަށް އަރައިފައި މަލައިކާއަށް ސަލާމް ބުނުމަށްފަހު ވައިސޫރިއެއްގެ ބާރުމިނުގައި ގޮސް ޖައްވުތެރެއަށް ވަދެ ގެއްލިއްޖެއެވެ.

މަލައިކާ ކުރިއަށްވުރެވެސް ބޮޑަށް އޭނާގެ އަމިއްލަ ނަފްސަށް ރައްކާތެރިވާން ޖެހިއްޖެއެވެ. މިހާރު އޭނާގެ އުފަން މަންމަ އެހުރީ އޭނާ މަރައިލަން ދިމާކޮށްފައެވެ. އިންސާނަކަށް ޖިންނިއަކު މަރައިލަން އުނދަގޫވިޔަސް ޖިންނިއަކަށް ޖިންނިއެއް މަރައިލުމަކީ ވަރަށް ފަސޭހަކަމެކެވެ. ޒާޔާގެ ގެއަށް ދާ ޚިޔާލު ދޫކޮށްލައި މަލައިކާ ދެން ވަނީ އޭނާގެ ގެއަށެވެ. އޭނާގެ މަންމައަށް ހެޔޮވިސްނުން ދެއްވުން އެދި ދުޢާކުރަމުން މަލައިކާ އެނދުގައި އޮށޯވެ ދެލޯ މަރައިލިއެވެ.

ނިހާން ނިދައިފިކަން ޔަޤީންކުރުމަށްފަހު ޖަމީލާ އޭނާގެ ފޯނު ނެގިއެވެ. ވައިބާއަށް ވަނީ ލިއަމްގެ ފަރާތުން ބައެއް މެސެޖުތައް ލިބިފައި ހުރުމުންނެވެ. އޭގައި ވަނީ އޭނާ ތިން ދުވަސްފަހުން އެރަށަށް ދާނެކަމަށް ބުނެފައެވެ. އަދި އޭނާ ހުންނާނެ ތަނެއް ބުނެދޭން ބުނެފައިވިއެވެ. ޖަމީލާ އެ މެސެޖަށް ރިޕްލައި ނުދީ އަވަހަށް މަތީނަށް ގުޅައިލައި އޭނާ ހުންނަ ގެސްޓްހައުސްގެ ނަން ބުނުމަށް ބުންޏެވެ. މަތީން ނަން ބުނުމާއިއެކު ދެން ޖަމީލާ އެދުނީ އެ ގެސްޓް ހައުސްގައި އިތުރު ރޫމެއް ހުހަށް ހުރިތޯ އާއި ދައްކަން ޖެހޭ ފައިސާގެ އަގު ބުނުމަށެވެ. ހުހަށް ވަރަށް ގިނަ ކޮޓަރި ހުރި ކަމަށާއި ކޮޓަރިތައް ވަރަށް އަގުހެޔޮ ކަމުގައި މަތީން ބުންޏެވެ. ޖަމީލާ މަތީނަށް ޝުކުރުއަދާކުރުމަށްފަހު ވައިބާއަށްވަދެ އެ ހުރިހާ މައުލޫމާތެއް ލިއަމްއަށް ދިނެވެ.

ދެމީހުން އެގޮތަށް ވާހަކަދައްކަމުން ދިޔައިރުވެސް ލިއަމް އަށް އޭނާ އާއި މި ވާހަކަދައްކަނީ ޒާޔާގެ ދޮންމަންމަ ކަމެއް ރޭކައިނުލައެވެ. ލިއަމްއަށް އޭނާ އެހުރެވެނީ ބޮޑު ކަނު އަނދިރިކަމެއްގެ ތެރޭގައިކަމެއް ނޭނގެއެވެ. އެއަށްވުރެ މާ ބޮޑަށް އޭނާ ވަނީ ޖަމީލާ އޭނާއަށް އެ ޖެއްސި ނުބައި ‘ސިހުރު’ ގައި ޖެހިފައެވެ.

ދުވަސްތައް ހަލުވިކަމާއިއެކު ފާއިތުވަމުން ގޮސް ދެވަނަ ޓާމުގެ ކިޔެވުން ފެށިއްޖެއެވެ. އެންމެ ފުރަތަމަވެސް ބޭއްވިގެން ދިޔައީ ބޮޑު އެސެމްބްލީއެކެވެ. ސްކޫލުގެ ޕްރިންސިޕަލް ކުދިންނާއި މުޚާޠަބުކޮށް ވާހަކަދައްކައި ނިމުމާއިއެއްކޮށް އެސެމްބްލީ ނިންމައިލައިފައި ކުދިންތައް ކްލާހަށް ވަންނަން ފަށައިފިއެވެ. މިއަދު ޒާޔާމެންގެ ކްލާހަށް އާ ދިވެހި ޓީޗަރެއް އަންނާނެކަމުގައި ކުދިންނަށް ވަނީ މަޢުލޫމާތު ލިބިފައެވެ. ކޮންމެ ކުއްޖަކުވެސް އެ ޓީޗަރަކު ދެކޭހިތުން ކެތްމަދުވެފައި އިންދައި ދިވެހި ގަޑި ޖެހިއްޖެއެވެ.

ކަނދުރާއާއި ހަމައަށް އިސްތަށިގަނޑު ދިގުކޮށްލައިގެން ހުރި ޒުވާން ރީތި ފިރިހެނަކު ސްޓާފް ރޫމުން ނުކުތެވެ. ރަތްކުލައިގެ އަތްދިގު ގަމީހަކާއި ކަޅު ފަޓްލޫނެއްގައި ބެގީ ޖަހައިގެން ހުރެ ހިނގައިލައިފައި ދިޔަ ގޮތުން ހީވަނީ މޮޑެއްލް އެއް ހިނގައިލައިފައި ދިޔަ ހެންނެެވެ. އޭނާ ހިނގައިލައިފައި ގޮސް ވަނީ ގްރޭޑް ދިހައެއްގެ ކްލާހަށެވެ. ކްލާހަށް ވަދެ އޭނާގެ ފިރިހެންވަންތަ އަޑުން ސަލާމް ގޮވައިލުމާއިއެކު ހުރިހާ ކުދިން ތެދުވެ ސަލާމަށް ޖަވާބުދީފައި އިށީންދެއްޖެއެވެ. ގިނަ އަންހެންކުދިން ތިބީ އޭނާ ފެނުނުގޮތަށް އެހެން ދިމާލަކަށް ބަލައިލަންވެސް ނޭނގިފައެވެ. ޒާޔާއަށްވެސް އިރުކޮޅެއްވަންދެން އެ ޓީޗަރާއި ދިމާލަށް ބަލަހައްޓައިގެން އިނދެވުނެވެ. ޓީޗަރު ޒާޔާ އާއި ދިމާލަށް ބަލައިލުމާއިއެކު ޒާޔާ އަވަސްއަވަހަށް ފަވާޝަތާއި ވާހަކަ ދައްކާކަމަށް ހެދިއެވެ.

ލިއަމް އަކީ ގޯސްކޮށް އުޅުނު މީހެއްކަމުގައިވިޔަސް އޭނާއަކީ އެހާ ގޯސް މީހެކޭ އަދި ނުބުނެވޭނެއެވެ. ލިއަމްއަކީ ކިޔަވާ އުޅުނު ދުވަސްވަރު އެންމެ މޮޅަށް ކިޔެވި އެކަކެވެ. އޭނާ ކަރުގައި ކުޑަވަރެއްގެ ޗޭނުފަށެއް އޮތަސް އޭނާއަކީ ޕާޓޭން އުޅޭ ގޮތަށް އުޅޭ މީހެއްނޫނެވެ. ސިނގިރޭޓާއި މަސްތުވާތަކެއްޗަކީ ލިއަމް އެންމެ ނަފްރަތުކުރާ އެކައްޗެވެ. ލިއަމް ޒާޔާއާއި ދިމާލަށް ބަލައިލުމުން ޒާޔާ ދުރު ބަލައިލި ގޮތުން ލިއަމްގެ ހިތަށް އުނދަގުލެއްވެގެން ދިޔައެވެ. ފަހަރެއްގައި ޒާޔާ ލަދުރަކީ ކަމަށް ވެދާނެއެވެ.

ލިއަމް ސްކޫލް ހުޅުވުމުގެ ދެތިން ދުވަސްކުރިން މިރަށަށް އައިސް އޭނާ އެންމެ ފުރަތަމަވެސް ކުރި މަސައްކަތަކީ ރަށު ސްކޫލުން ވަޒީފާ ހޯދުމެވެ. ސަބަބަކީ ކިޔަވައިދިނުމަކީ އޭނާ ކުރާ ހިތްވާ ކަމަކަށް ވެފައި އަދި ޒާޔާ ވެސް ދެކިލާ ހިތްވާތީއެވެ. ފޮޓޯއިން ޒާޔާ ފެންނަލެއް ރީއްޗެއްކަމަކު ހަމަލޮލަށް ޒާޔާ ފެނުމުން އަދި މާ ރީއްޗެވެ. ލިއަމް އެ ވަގުތު އެ ޚިޔާލުތައް ދޫކޮށްލައި ކިޔަވައިދެވޭތޯ ބެއްޔެވެ.

އެދުވަހަށް ހަމަޖެހިފައިވި ފިލާވަޅު ކިޔަވައިދިނުމަށްފަހު ހަދަން ޖެހޭ ފިލާވަޅު ލިއަމް ކުދިންނާއި ހަވާލުކޮށްލިއެވެ. ހުރިހާ ކުދިންވެސް އެހެންދުވަސްދުވަހާއި ޚިލާފަށް ސަކަރާތްޖެހުމެއް ނެތި ފަރުވާތެރިކަމާއިއެކު ފިލާވަޅު ހަދަން ފެށިއެވެ. ދުވަހަކުވެސް ނުދެކޭފަދަ ރީތި ޓީޗަރެއް ކިޔަވައިދިނުމުން އެ ޓީޗަރަށް ކިޔަމަންވާހިތްވަނީ ކަންނޭނގެއެވެ. ކުދިން ފިލާވަޅު ހަދަމުން ދިޔަގަޑީ ލިއަމް އޭނާއަށް ޚާއްޞަ ކުރެވިފައިވި ގޮނޑީގައި އިށީނެވެ. އަދި ޒާޔާ އާއި ދިމާލަށް ބަލައިލިއެވެ. ޒާޔާ ލިޔަމުން ގޮސް އޭނާގެ ގަލަމުގެ ފަހަތުބައި އަނގައިގައި ޖައްސައިލި މަންޒަރުން ލިއަމްގެ ތުންފަތުގައިވި ހިނިތުންވުން ފުންވެގެން ދިޔައެވެ. ޒާޔާ އެހެން އިނދެފައި ލިއަމް އާއި ދިމާލަށް ބަލައިލައިފިއެވެ. ލިއަމް ހިނިތުންވެލައިގެން އޭނާއާއި ދިމާލަށް ބަލަހައްޓައިގެން އިނުމުން ޒާޔާއަށް އޭނާގެ ގަލަން އަނގަޔާއި ދުރުކޮށްލެވުނެވެ. ޒާޔާއަށްވެސް އިރުކޮޅެއްވަންދެން ލިއަމް އާއި ދިމާލަށް ބަލަހައްޓައިގެން އިނދެވުނެވެ. ޒާޔާ ދެން އަވަހަށް ނޫންކަމަށް ހަދައިލައިފައި ފިލާވަޅު ހެދުމައިގެން ކުރިއަށް ދިޔައެވެ. ޒާޔާ ފިލާވަޅު ހަދަން އިންދައި ކޮންމެވެސް ނުބައެއް އެބައުޅެއޭ އޭނާގެ ހިތުގެ ކަނަކުން ބުނެލީ ކީިއްވެކަމެއް ނޭނގެއެވެ.

ސްކޫލް ކިޔެވުން ނިންމައިލައިފައި ޒާޔާ ގެއަށް ދިޔައިރުވެސް އޭނާގެ ސިކުނޑި ތެރޭ އެނބުރެނީ ކްލާހުގައި އިނދެ އޭނާގެ ހިތުގައި އުފެދުނު ސުވާލެވެ. ލިއަމް މާވަރަކަށް އޭނާއާއި ދިމާލަށް އެ ބެލީ ކީއްވެގެން ހެއްޔެވެ؟ ކޮންމެއަކަސް ލިއަމްގެ އެ ޢަމަލުން ޒާޔާއަށް ވަރަށް ބޮޑަށް އުނދަގޫވެއްޖެއެވެ. އެއީ ޒާޔާއަށް ކުރެވޭ ކުށްހީއެއްކަމަށްވެސް ޤަބޫލުކުރަން ޒާޔާއަށް ދައްޗެވެ. ލިއަމް އޭނާއާއި ދިމާލަށް ބަލަހައްޓައިގެން އިން ގޮތް ޒާޔާ ވަނީ ހަމަ ލޮލުން ދެކެފައެވެ. ދެން އިތުރަށް އެކަމާ ވިސްނަން ނުހަދައި ޒާޔާ ބެލީ އަވަހަށް ގެއަށް ވަދެ ތާޒާވެލައިގެން ރަނގަޅު އެއްޗެއް ކައިލެވޭތޯއެވެ.

ސްކޫލް ނިންމައިފައި ލިއަމް އަށް ގެސްޓް ހައުސްއަށް ވަދެވުނުއިރު މެންދުރު އަނބުރައި ދޭއް ޖަހައިފިއެވެ. ލިއަމް އެއްޗެހި ބަދަލުކޮށްލައިގެން ނުކުމެ ގެސްޓްހައުސްގައި ހުރި ކާބަޔަށް ވަނެވެ. ވެއިޓަރ އައުމުން ކާއެއްޗެއްސަށް އޯޑަރު ކޮށްފައި ލިއަމް އޭނާގެ ފޯނު ނެގިއެވެ. އޭނާއަށް މިއަދު ޒާޔާގެ ފަރާތުން ފެނިފައިވަނީ ތަފާތު މަންޒަރެކެވެ. ކްލާހުން ދިމާވިއިރު ކްލާހުން ބޭރުގައިވެސް ދެމީހުން ދިމާވިއެވެ. އޭނާ ޒާޔާއަށް ފެންނަ ހިސާބުގައި ހުއްޓެއްކަމަކު ޒާޔާ އޭނާއާއި ދިމާލަށް ބަލައިވެސް ނުލައި ދިޔަގޮތުން ލިއަމްގެ ހިތުގައި ކޮންެވެްސްވަރަކަށް ސުވާލު އުފެދިފައިވިއެވެ. އޭނާއާއި އެހާ ލޯބިން އެހާ އެކުވެރިކޮށް ވާހަކަދައްކައިފައިވެސް ބައްދަލުވީމައި ދަންނަ މީހަކަށްވެެސް ހަދައިނުލަނީ ކީއްވެހެއްޔެވެ؟ ލިއަމްގެ ހިތުގައި ހަމައެކަނި ސުވާލު އުފެދުނީކީ ނޫނެވެ. ނުބައި ޝައްކެއްވެސް ކުރެވުނީއެވެ. އަނެއްކާ އޭނާއަށް ޒާޔާ ކަމަށް ހީކޮށް މި ވާހަކަދެއްކެނީ އެހެން މީހަކާ ބާވައެވެ؟ ވައިޓަރު ކާއެއްޗެހި ގެނެއްސައި ދިޔުމުން ލިއަމް ކާންފެށިއެވެ. ލިއަމް ކާން އިންއިރުވެސް އިނދެވުނީ ބޮޑު އޮޅުންގަނޑެއްގެ ތެރޭގައެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.