އިޙްނާ (6)

އިޙްނާގެ ދެލޯ ހަމައެކަނި ހުއްޓިފައިވަނީ ދާދި ދެންމެއަކު ދޮރުން ވަދެގެން އައި މިޙްރާނަށާއި ލީޑިންގ ޓީޗަރަށެވެ. ލީޑިންގ ޓީޗަރުއައީމާ ހައިރާން ނުވިއަސް އިޙްނާ އަޖައިބުވީ އެތަނަށް މިޙްރާން މިޙްރާން އަންނަން ޖެހުނު ސަބަބަކާއި މެދުއެވެ. އަނެއްކާ މީނާތަ ޔޫންގެ ބޮލުގައި ބޯޅައިން ޖެހީ؟

“އިހޫ.. ކާކު ދެންމެ އެއައީ؟” ބަލިއަޑަކުން ބޯހިއްލާލައިފައި ޔޫން އަހާލިއެވެ.

“ނަދީމް ސަރ މިއައީ މިތަނަށް މިޙްރާން ގޮވައިގެން ޔޫންގެ ހާލު ބަލައިލާން.. މިހާރު ރަނގަޅުތަ؟” އިޙްނާ ޖަވާބު ދިނުމުގެ ކުރިން ނަދީމް ސަރ ޖަވާބު ދިނެވެ.

“މިހާރު އަލްހަމްދުލިއްލާހި ރަނގަޅު.. އަރާމުކޮށްލަން އިރުކޮޅެއް ވަންދެން މަޑުކުރާނީ.. އަސްލު ކިހިނެއްވެ ސަރ މިތަނަށް މިޙްރާން ގޮވައިގެން އަންނަން ޖެހުނީ؟” ސުވާލުން ފުރިގެންވާ ނަޒަރަކުން ޔޫންއަށް ބެލެނީ އެދެމީހުންނާ ދިމާއަށެވެ.

ނަދީމް ސަރ މިޙްރާނަށް ލޮލުގެ އިޝާރާތުން ކިޔައިދޭށޭ ބުނުމުން ކިޔައިދޭން ފެށިއެވެ. “އަސްލުވީގޮތަކީ އަހަރެން ގަސްތު ގައެއްނޫން ޔޫން ބޮލުގައި ޖެހީ.. ގޯލާއި ދިމާކޮށް އެއްލި ބޯޅަ އަމާޒުވީ ޔޫންގެ ބޮލަށް.. ވަރަށް ބޮޑަށް މާފަށް އެދެން.” މޫނުމައްޗަށް ހިތާމަވެރިކަމުގެ އަސަރުގެނެސް ޔޫން އާއި އިޙްނާގެ ކުރިމަތީ އެކްޓުކުރިއެވެ. ހަޤީގަތަކީ މިޙްރާން ބޯޅަ އެއްލީ ގަސްތުގައި ޔޫންގެ ބޮލުގައި ޖެހުމަށެވެ. މިޙްރާނަށް ނޭނގުނު ކަމަކީ މިކަން އެންމެ މޮޅަށް ދެނެވޮޑިގެންވާ ކަލަކު ވާކަމެވެ.

ޔޫން މިޙްރާނަށް ހެޔޮ ހިތުން މަޢާފް ކޮށްދިނެވެ. އެހެންނަމަވެސް އިޙްނާގެ ހިތް ބުނަމުން ދިޔައީ މިކަމަކީ މިޙްރާން ގަސްތުގައި ކުރި ކަމެއް ކަމަށެވެ. އެއީ އިއްޔަ އިޙްނާމެން ގެއަށް އައިސް އުޅެފައި ދިޔަ ވައްތަރުންނެވެ.

ދުވަސްތައް ފާއިތުވާލެއް ނުހަނު އަވަހެވެ. އެންމެ ފަހުން ފުރަތަމަ ޓާރމުގެ ޓެސްޓުނަގާ ދުވަސް އަތުވެއްޖެއެވެ. ފާއިތުވީ ދުވަސްތަކުގައި ބުރަމަސައްކަތާއިއެކު ގްރޫޕް ސްޓަޑީގައި ނުހަނު ސީރިއަސްކަމާއެކު އެންމެން މަސައްކަތް ކުރިއެވެ. އެންމެފަހު އަހަރުވީމަ ހެޔޮވިސްނުނީ ކަމަށްވެސް ވެދާނެއެވެ. އެހެން އަހަރުތަކާއި ޚިލާފަށް ދޭ މަސައްކަތްތައް އިތުރުވެ ސްކޫލުގައި އުޅެންޖެހޭލެއް ބުރައެވެ.

ޔޫންގެ ބޮލުގައި ބޯޅައިން ޖެހިދުވަހުއްސުރެ މިޙްރާނުގެ ޖެއްސުންތަކާއި ޔޫން ކުރިމަތިލާން ނުޖެހޭ ދުވަހެއް މަދެވެ. މިކަންތަކާ ވިސްނާ ވިސްނާ އިޙްނާ ބޯގޮވާވަރުވިއެވެ. މިކަންތައްތައް ޔޫންއަށް ކުރުމުގެ ފަހަތުގައި ވަނީ ކޮންކަމެއްބާއޭ އިޙްނާގެ ހިތަށް އަރައެވެ. މިވީހާތަނަށް އެސުވާލުގެ ޖަވާބު އިޙްނާއަކަށް ލިބިފައެއް ނެތެވެ. ޔޫން އެކަމާ މާބޮޑަށް އަޅައިނުލިއަސް އިޙްނާއަކަށް ނުހުރެވެއެވެ. އެއީ މިޖިއްސުންތައް ކޮންމެ ދުވަހަކުވެސް ކުރާނީ މީގެ ފަހަތުގައި ކޮންމެވެސް ކަމެއް އޮތީމާނޫން ހެއްޔެވެ؟

އެރޭ ގްރޫޕް ސްޓަޑީ ނިންމާފައި އިޙްނާ ކާކޮޓަރިއަށް ދިޔައީ ކަރުތެންމާލުމަށްޓަކާ ކޮންމެވެސް ކަހަލަ ދިޔާއެއްޗެއް ބުއިމަށެވެ. ދޮރުން ވަދެގެން އަންނައިރު ކަނާތްފަރާތުގައި ހުރި ކަބަޑުސެޓުގެ ތިންވަނައަށްވީ ދޮރު ހުޅުވާލައިފައި ކޮފީ ދަޅު ނެގިއެވެ. ސިންކު ތެރޭގައި އިންޖޯޑެއް ދޮވެލާފައި އެއްސަމުސާ ހަކުރާއި ކޮފީއާއި ފެން އަޅައިގެން އިޙްނާ 7 މިނެޓް ވަންދެން ގިރިއެވެ. މަޑު މުށިކުލައެއް އައުމުން އިޙްނާ އެޖޯޑު ބަހައްޓާފައި އެހެން ތައްޓެއްގައި ކުޑަ ކިރުކޮޅަކާއި ފެން އަޅައިގެން ގިރިއެވެ. ދެން ކުރިން ގިރި ކޮފީކޮޅު މައްޗަށް އަޅާލިއެވެ.

ފޯނުން ކޮފީތަށީގެ ފޮޓޮލެއް ނަގާފައި ރިހާމާއި ޔޫންއަށް ފޮނުވާލިއެވެ. އަދި ތިރިން ލޭޓް ޑަލްގަނޯ ލިޔެލިއެވެ. ފޯނު ބާއްވަން އުޅުން ގަޑީގައި އިޙްނާގެ ފޯނު ދިއްލުމުން އިޙްނާ ފޯނު ބަލާލިއެވެ.

*ނުނިމޭ*