މަޢާފް – ތިރީސްވަނަ ބައި

ދެބެން އެގޮތުގައި ދެލޯ ބޮޑުކޮށްގެން ތިއްބައި އެ މީހަކު އެތަނުން ތެދުވިއެވެ. އެއާއިއެކު ދެފަރާތުގެ ހަތަރުކަޅި ބައްދަލުވެގެން ދިޔައެވެ. ކުރިމަތީގައި ހުރި އަންޖަދު ފެނިފައި ޝިމާޔާގެ ދެލޯ އިހުނަށްވުރެވެސް ބޮޑުވެގެންދިޔައެވެ. އަންޖަދު އަށް ވެސް ދެލޯ ބޮޑުކޮށްލި ގޮތަށް ޝިމާޔާއަށް ބަލަހައްޓައިގެން ހުރެވުނީއެވެ. އަންޖަދު އަށް އައިއްސައި ހުރި ބަދަލުތަކުން ޝަމީމް ހުރީ ބަސްހުއްޓި ބުނާނެ އެއްޗެއް ނޭނގިފައެވެ. އެގޮތުގައި ތިން ޒުވާނުން އެކަކު އަނެކަކަށް ބަލަހައްޓައިގެން ތިއްބައި ދަންނަ އަޑަކުން އަންޖަދު އޭ ކިޔައިފައި ގޮވައިލި އަޑު އިވުނެވެ. ޝަމީމް އަޑު އައީ ދިމާލަށް ބަލައިލިއިރު ރާއްޖޭގެ މަޝްހޫރު ދީނީ ޢިލްމުވެރިޔަކު އަންޖަދު އާއި ދިމާލަށް އަންނަނީއެވެ. ޢިލްމުވެރިޔާ އައިސް އަންޖަދު ކައިރީ އޭނާއާއެކު އައުމަށް ބުނުމުން އަންޖަދު ޢިލްމުވެރިޔާގެ ފަސްފަހަތުން ހިނގައިގަތެވެ. ނުކުންނަ ދޮރާއި ހަމައަށް ދެވުމުން އަންޖަދު އަނެއްކާވެސް ފަސްއެނބުރި ބަލައިލިއެވެ. އަންޖަދު ހިނިތުންވެލުމަށްފަހު އަނެއްކާވެސް ޢިލްމުވެރިޔާގެ ފަހަތުން ހިނގައިގަތެވެ. ޝިމާޔާ އާއި ޝަމީމް އަށް ބުނާނެ އެއްޗެއް ނޭނގި އިރުކޮޅަކު ތިބެވުނެވެ. ދެބެންނަށް ނަޒަރު ހުއްޓައިލައިގެން ތިބި މީހުނަށް އަވަސް ނަޒަރެއް ދެމުން ޝަމީމް ޝިމާޔާ ގޮވައިގެން ރެސްޓޯރެންޓުން ނުކުތެވެ.

ގެޔަށް ދިޔަ މަގުމަތީގައިވެސް ޝިމާޔާ ހުރީ ނެގިމަޑުވެފައެވެ. ޝިމާޔާގެ އެ ހަމަހިމޭންކަން ފެނި ޝަމީމް އަށް ކިތަންމެ އުނދަގޫ ވި ނަމަވެސް އެއްވެސް އެއްޗެކޭ ނުބުނެ ހުރީ ޝިމާޔާ މަޑުން އެ ހުރި ސަބަބު އިނގޭތީއެވެ. ޝިމާޔާގެ މޫނަށް ބަލައިލިޔަސް އޭނާ އެހުރީ ވަރަށް ބޮޑަށް ލަދުގަނެ ޖެހިލުންވެފައިކަން އިނގެއެވެ. އެހެނީ އަންޖަދު އެގޮތަށް އައިސް ޝިމާޔާ ގައިގައި ޖެހުމުން އެވަގުތު ރެސްޓޯރެންޓުގައި ތިބި ގިނަބަޔަކު ޝިމާޔާ އޭ ކިޔައިގެން ސިއްރު ސިއްރުން ވާހަކަ ދެއްކި އަޑު ޝިމާޔާ އަދި ޝަމީމްއަށް ވެސް އެނގުނެވެ. މާޒީގައި ކަންތައްތައް ހިނގައިފައިވި ގޮތުން މުޅި މާލޭގައި ޝިމާޔާ އަކީ ކާކުކަން ނޭނގޭ މީހަކު ނުހުންނާނެއެވެ. އޭގެތެރެއިން ގިނަ މީހުނަށް އަދިވެސް ނޭނގި އޮތް ކަމަކީ ޝިމާޔާ އަކީ މިހާރު ބަދަލުވެފައިވި މީހެއްކަމެވެ. ޝިމާޔާގެ ގިސްލުމުގެ އަޑު އިވުނުހެން ހީވެގެން ޝަމީމް ޝިމާޔާ އާއި ދިމާލަށް ބަލައިލިއެވެ. އޭރު ޝިމާޔާގެ ލޮލުން ކަރުނަ ތިއްކެއް ވެއްޓެނީއެވެ. “ޝިމް ސްޓޮޕް. ސްޓޮޕް ކްރައިންގް. މިތާ މަގުމަތީގަ ރުއީމަ މީހުން ހީކުރާނީ ކީކޭ؟ އަވަހަށް ހުއްޓާލާފަ ހިނގާ އަވަހަށް ގެއަށް ދެވޭތޯ ބަލަން.” ޝިމާޔާގެ ލޮލުން އޮހޮރެން ފެށި ކަރުނަތައް ފުހެލައިދެމުން ޝަމީމް ބުންޏެވެ. ޝިމާޔާ ކަރުނަތައް ހިންދަން މަސައްކަތްކުރަމުން މޫނު ފުހެލުމަށްފަހު ޝަމީމް އާއިއެކީގައި ހިނގައިގަތީ އަވަހަށް ގެއަށް ދެވޭތޯއެވެ.

ގެއަށް ވަތް ގޮތަށް އެންމެ ފުރަތަމަވެސް ޝިމާޔާ ސޯފާ މައްޗަށް އޭނާގެ އަތްދަބަސް އެއްލައިލައިފައި ދިޔައީ ބަދިގެއަށެވެ. ތައްޓަކަށް ފިނިފެން އެޅުމަށްފަހު އެއަށް ފަސް އައިސް ކިއުބް އަޅައިލީ އިތުރަށް ފެން ފިނިކޮށްލުމުގެ ނިޔަތުގައެވެ. ފެންތަށީގައި އަތްލުމުން ޝިމާޔާގެ އަތަށް ވަރަށް ބޮޑަށް ފިނުވެގެން ދިޔައެވެ. ހީކަރުވައި ނުގަތީ ހަމަ ކިރިޔާއެވެ. އެހާވެސް ބޮޑަށް އެ ތަށި ހުރީ ފިނިވެފައެވެ. ޝިމާޔާ އެއްފަހަރުން އެ ފެންތަށި ހުސްކޮށްލިއެވެ. މީހާ ހަމައަކަށް އެޅުނީ ދެނެވެ. ތަށި ދޮވެލުމަށްފަހު ސިޓިންގް ރޫމަށް ދިޔައިރު ޝަމީމް ސިޓިންގް ރޫމަކު ނެތެވެ. ޝަމީމް ކޮޓަރީގައި އުޅޭކަން ޝިމާޔާއަށް އެނގުނީ އެ ކޮޓަރީގެ އަލި ފަނޑުކޮށް ނަމަވެސް ސިޓިންގްރޫމަށް އެޅިފައިވުމުންނެވެ. ސިޓިންގް ރޫމް ސިއްލައިލުމަށްފަހު ޝިމާޔާ ސޯފާގައި އިށީނެވެ. އަތްދަބަސް ތެރެއިން އޭނާގެ ފޯނު ނެގުމަށްފަހު އަންޖަދުގެ ނަމްބަރަށް ގުޅައިލިއެވެ. ސިކުންތެއް ނުވަނީސް އަންޖަދު ފޯނު ބިޒީކޮށްލައިފިއެވެ. އަންޖަދު މިކުރި ކަމަކުން ޝިމާޔާގެ ހިތުގައި ސުވާލު އުފެދުނެވެ. އެހެންޏާ އަންޖަދު އަކީ ޝިމާޔާ ގުޅާލާއިރަށް ސިކުންތެއް ނުވަނީސް ފޯނު ނަގާ މީހެކެވެ. ފޯނު ބާއްވަން އުޅެނިކޮށް އެކޮޅުން އަންޖަދު ގުޅަން ފަށައިފިއެވެ. ޝިމާޔާ އަވަހަށް ފޯނު ނެގުމަށްފަހު ކަންފަތުގައި ފޯނު ޖައްސައިލިއެވެ.

“ސޮރީ. ޝިމާ. ފޯނު ނަގަން އުޅެނިކޮށް ބިޒީކޮށްލެވުނީ ހަމަ. އެންޑް މިރޭ އަހަރެން ގަސްދަކު ނޫން ޝިމާ ގައިގަ ޖެހުނީކީ. ދެޓްސް އޭން އެކްސިޑެންޓް.” އަންޖަދު އަވަސްއަވަހަށް މިރޭ ކަންތައް ވީގޮތް ޝިމާޔާއަށް ކިޔައިދިނީ ފަހަރުގައި ޝިމާޔާގެ ހިތުގައި ކުށްހީއެއް އުފެދިދާނެތީއެވެ. ކަންވީ އަންޖަދު ހީކުރި ގޮތާއި ޚިލާފަށެވެ. ޝިމާޔާ ފެށީ ހޭށެވެ. “ހަހަހަ… އިނގެޔޭ އަންޖް ގަސްދަކު ނޫންކަން. ކުއްލިއަކަށް ހުރެފަ އަންޖް ފެނުނީމަ އަހަންނަށް ކުއްލި ޝޮކެއް ލިބުނީ. އެތާ ތިބި މީހުންވެސް ވަރަށް ފާޑުފާޑުގެ އެއްޗެހި ކީ.” އެންމެ ފަހު ޖުމުލަ ޝިމާޔާއަށް ބުނެވުނު އިރު އޭނާގެ އަޑު ހުރީ ކޮންމެވެސް ވަރަކަށް ކުރެހިފައެވެ. “އާނ. އަހަންނަށްވެސް އިވުނު އެއްޗެހިތަކެއް ކީ އަޑު. އަޅާނުލާ. ދެޓްސް ޕާސްޓް. ނައު ވީ އާރ ޗޭންޖްޑް. ހެހެ.” އަންޖަދު ދިން ހިތްވަރުން ޝިމާޔާއަށް ކުޑަވަރެއްގެ ހަމަޖެހުމެއް ލިބުނެވެ. “ކޮންއިރަކު އަންޖް މިނިވަންވީ؟” އަންޖަދުއާއި މިރޭ ދިމާވި ފަހުން ޝިމާޔާގެ ހިތުގައި އުފެދުނު ސުވާލުކޮށްލިއެވެ. “އަހަރެން ރަނގަޅަށް އުޅުނީމަ. ދެން މަންމަމެންވެސް ވަރަށް އާދޭސްކުރި ފުލުހުން ކައިރީގަ. މަންމަގެ އާދޭހަށް އަސްލު އަހަރެން ދޫކޮށްލީ. އެކަމަކު ދެން އިންޝާﷲ ޖަލު ގޮޅިއަށް ދާންޖެހޭ ވަރުގެ ކަމެއް ނުކުރާނަން…” ޝިމާޔާއަށް ބޭއިޚްތިޔާރުގައި ހިނިތުންވެލެވުނެވެ. އަންޖަދު އާއި ވާހަކަދައްކަމުން ދައްކަމުން ޝިމާޔާ ކޮޓަރިއަށް ވަނެވެ. އެރޭ ބާރަޖަހަންދެންވެސް ދެ ޒުވާނުންނަށް ތިބެވުނީ ފޯނުން އޮލަ ވާހަކަތަކެއް ދައްކާށެވެ. އެންމެ ފަހުން ޝިމާޔާ ނިދިއަންނަން ފެށުމުން ގުޑްނައިޓް އޭ ބުނެ ފޯނު ކަނޑައިލިއެވެ. ހެދުން ބަދަލު ވެސް ނުކޮށް ޝިމާޔާ ނިދަން އޮށޯތީ މާ ބޮޑަށް ނިދި އައިއްސައި ހުރުމުގެ ސަބަބުންނެވެ.

އިރުގެ އަލި މޫނަށް އެޅެން ފެށުމުން ނިދައިފައި އޮތް ޒައިންއަށް އޭނާގެ ދެލޯ ހުޅުވައިލެވުނެވެ. އާފުރިލައި މޯޅިއަކަށް ދެމި ލުމަށްފަހު އެނދުގެ އަނެއްފަރާތަށް ބަލައިލިއިރު ކަމަކު ދާކަށްނެތެވެ. ޖިއާން އޮތީ ކިރިޔާ ވެއްޓޭ ނުވެއްޓޭ ހިސާބުގައެވެ. ޒައިން އެގޮތަށް ބަލަން އިންދައި ޖިއާން ފުރޮޅާލަނީއެވެ. ޖިއާން އެނދުން ވެއްޓުނަ ނުދީ ސަލާމަތްކުރަން ވެގެން ޒައިން ޖިއާންގެ އަތުގައި ހިފައި ދަމައިގަތެވެ. ކުރަތްޕެއް ދަތް އެޅުމުން ތެޅިގަންނަ ފަދައިން ތެޅިގަނެފައި ޖިއާން ތެދުވެއްޖެއެވެ. ޖިއާންގެ އެ ކުއްލި ހަރަކާތުން ޒައިން ސިއްސައިގެން ދިޔައެވެ. ފަހަތަށް ޖެހެން އުޅުމުގެ ތެރޭގައި އެނދުން ވެއްޓުނީ ޒައިން އެވެ. އުނަގަނޑުގައި ފިރުމައިލަމުން އައްދިއްޔޯއި އަމައްޔޯއި އޭ ކިޔަމުން ޒައިން ތެދުވެ އެނދުގައި އިށީންދެއްޖެއެވެ. ޒައިން އުނަގަނޑުގައި ފިރުމަން އިންގޮތުން ހީވަނީ މުސްކުޅިއަކު އުނަގަނޑުގައި ފިރުމާހެންނެވެ. ޖިއާންއަށް މަޖާވެގެން ހޭންފެށިއެވެ. “ކޮބާ! ކަމެއްހެން ހީވެއްޖެ! އަދިވެސް އަހަރެން އެނދުން ވައްޓާލަން އުޅޭ.” ޖިއާން ހީކުރީ އޭނާ ހޭލުއްވައިލަންވެގެން ޒައިން އޭނާ އެނދުން ވައްޓައިލަން އުޅުނު ކަމަށެވެ. “އަޅެ ދޯ. މަށަށް ހޭލެވުނުއިރު ޖިއާން އޮތީ ކިރިޔާ ނުވެއްޓި. އަހަރެން ޖިއާން މި ފަރާތަށް އަނބުރައިލަންވެގެން އުޅެނިކޮށް ޖިއާން ހެދި އެއްޗަކުން އެންމެ ފަހުން އެނދުން މި ވެއްޓުނީ އަހަރެން ވިއްޔަ.” އުނަގަނޑުގައި ފިރުމަމުން ފިރުމަމުން ޒައިން ބުންޏެވެ. ޖިއާން ހެމުން ހެމުން ގޮސް ފާޚާނާއަށްވަނެވެ. ޒައިން އެނދުގެ ހެޑްބޯޑުގައި ލެނގިލުމަށްފަހު އޭނާގެ ފޯނު ނަގައި އުޝާއަށް ގުޅައިލިއެވެ.

އުޝާއަށް ކުއްލިއަކަށް ދެލޯ ހުޅުވައިލެވުނީ އޭނާގެ ފޯނުން ވައިބަރ އިން ރިންގް ވާން ފެށުމުންނެވެ. ފޯނު ނެގުމަށްފަހު ނިދިބަރު އަޑަކުން އުޝާ ހެލޯ އޭ ބުންޏެވެ. “އަދި ކިރިޔާތަ ތި ހޭލެވުނީ؟” ހިނގަނޑެއް ޖަހައިލުމަށްފަހު ޒައިން އެހިއެވެ. “ހްމްމް. ބޭބެ ވެސް ދެންމެއެއްނު ތި ހޭލީ.” ލޯ އުނގުޅަމުން އެނދުން ތެދުވެ އިށީންދެލަމުން އުޝާ ބުންޏެވެ. “ސަހާދެއް މިބުނީ ކަންނެތް ކުއްޖެއް.” އުޝާ ރުޅިއަރުވައިލުމުގެ ގޮތުން ޒައިން ބުންޏެވެ. “އެހެންތަ؟ ފަތިސް ނަމާދުކޮށްގެން ނިދާލީމަވެސް. ހަހް.. ބޭބެ މާކަންނެތް.” އުޝާއަށް ދެން އިތުރަށް ބުނާނެ އެއްޗެއް ނޭނގުނެވެ. “ހަހަ.. ތި ނިކަން ނިދަން ނޯވެ ދޭބަލަ ކުއްޖަކާއެއްކޮށް ބުރެއް ޖަހާލަން. ހަަހަހަ..” ހެމުން ހެމުން ޒައިން ބުންޏެވެ. “ދެން ބޭބޭ.. ބޭބެ ކީއްވެތަ އަބަދު އަހަންނާ ދިމާކުރަނީ؟” އަކުރުތަކަށް ދަމައިލަމުން އުޝާ ބުންޏެވެ. “އޭ ސޮރީ. ހަމަ އުޝާ ރުޅިއަރުވާލާ ހިތްވީ. ސޮރީ. ހެހެ.” އުޝާ ދެރަވީކަން އެނގުމުން ޒައިން ބުންޏެވެ. ދެބެން އެކަކު އަނެކަކާ ވާހަކަދައްކަން މިނެޓްތަކެއް ވަންދެން ތިއްބެވެ. ފަހުން ގުޅާނެކަމަށް ބުނަމުން ޒައިން ފޯނު ކަނޑައިލީ ޖިއާން ފާޚާނާއިން ނުކުތުމުންނެވެ. “އޭ އަވަސްކުރައްޗޭ އިނގޭ. އޭރުން އަވަހަށް ރެސްޓޯރެންޓަށް ގޮސް ރަނގަޅަށް ސައިބޮއެލެވޭނީ.” ޖިއާން އޭނާގެ ދަބަހުން ފެހިކުލައިގެ ޓީޝާޓެއް ނަގަމުން ބުންޏެވެ. ޒައިންވެސް ބަނޑުހައިވެފައި ހުރުމުގެ ސަބަބުން އިތުރަށް ލަސްކުރަން ނުހަދައި ތުވާލި ހިފައިގެން ގޮސް ފާޚާނާއަށް ވަނެވެ.

ހޮޅުއަށި ހޮޓާގެ ހަލަބޮލި މާޙައުލުގައި ސަޔަށް އިން ސާފުކުރަން ނައިޒަކް އާއި ޝަމީމް ތިއްބެވެ. އެކި ކަންކަމާ މަޝްވަރާ ކޮށް ވާހަކަދައްކަން ދެމީހުން ތިއްބެވެ. އެންމެ ފަހުން ޝަމީމް އަންޖަދުގެ ވާހަކަ ބުނުމުން ނައިޒަކް ކޮށިއަރައިގަތެވެ. “އަނެއްކާވެސް އޭނަ ދޫކޮށްލީތަ؟” ނައިޒަކް އިނީ ޤަބޫލުކުރަން ދަތިވެފައެވެ. އެވަރުގެ ނުބައި ނުލަފާ މީހަކު އަނެއްކާވެސް މިނިވަންކުރުމުން ނައިޒަކްގެ ހިތުގައި ރުޅިވެރިކަން އުފެދުނެވެ. “އަދި ވެގެން އުޅޭ ގޮތެއް ނޭނގެއެއްނު ނައިކުއަކަށް. ތިހާ ރުޅި ނާދެބަލަ. ހަމަޖެހިބަަލަ.” ބަޖިޔާކޮޅެއް ހަފައިލަމުން ޝަމީމް ބުންޏެވެ. “ހްމް ދެން ކިޔާ ދީބަލަ ތި ވެގެން އުޅޭ ގޮތެއް.” ވެެގެން އުޅޭ ގޮތް އޮޅުންފިލުވަން ނައިޒަކް އިނީ ނުހަނު ބޭނުންވެފައެވެ. ޝިމާޔާ ފަތިހު ޝަމީމް ގާތުގައި ދެއްކި ހުރިހާ ވާހަކަތަކެއް ޝަމީމް ނައިޒަކް އަށް ކިޔައިދިނެވެ. ޝިމާޔާ ވަނީ ރޭ ފަތިހު ޝަމީމް އަށް އަންޖަދު ކިޔައިދިން ހުރިހާ ވާހަކަތަކެއް ކިޔައިދީފައެވެ. “ހީ ހެޑް ޗޭންޖްޑް އަ ލޮޓް. ފަހަރެއްގަ ނައިކުއަށް ވަރަށް އުނދަގޫވެދާނެ އޭނައަށް އިތުބާރުކުރަން. އެކަމަކު އަންޖަދު އެއީ މިހާރު ކުރީގެ އަންޖަދެއް ނޫން. މުޅިން އާ އަންޖަދެއް. އޭނަގެ އުޅުން ވަރަށް ބޮޑުތަން ރަނގަޅުކޮށްފި މިހާރު މާޝާﷲ.” ޝަމީމް ދެއްކި ވާހަކަ ތަކަށް ނައިޒަކް ހަމައެކަނި ބޯ ޖަހައިލީއެވެ. ދެޒުވާނުންވެސް ސައިބޮއެ ނިންމައި ބިލު ދެއްކުމަށް ފަހު އެމީހެއްގެ ގެއަށް ދިޔައެވެ.

ޒައިން އާއި ޖިއާން ސައިބޮއެ ނިންމައިލުމަށްފަހު ރެސްޓޯރެންޓުން ނުކުތެވެ. ދެޒުވާނުންގެ މިޞްރާބަކަށްވެފައިވީ މިރޭ ޝޯ ބާއްވަން ޚާއްޞަ ކޮށްފައި އޮތް ސަރަޙައްދެވެ. އެތަނަށް ދިޔައިރު ސްޓޭޖް ތައްޔާރު ކުރުމުގައި މީހުން ހަރަކާތްތެރިވަމުން ދިޔައެވެ. ޓީވީ މޯލްޑިވްސް ގެ ކެމެރާމަނުންވެސް އެތަން ތައްޔާރުކުރުމުގައި އުޅެއެވެ. ޒައިން އާއި ޖިއާންވެސް އެމީހުނަށް އެހީތެރިވުމުގެ ގޮތުން މަސައްކަތްފެށިއެވެ. ސްޓޭޖްގެ ބެކްގްރައުންޑް ޑިޒައިން ކުރީ ޒައިންއާއި ޖިއާންއެވެ. އެހެނިހެން މަސައްކަތްތަކުގައިވެސް ޒައިންއާއި ޖިއާން ބައިވެރިވިއެވެ. ޢަޞްރު ވަންދެން ޒައިން އާއި ޖިއާން އުޅުނީ މަސައްކަތްތެރީންނަށް އެހީވުމުގައެވެ. ދެމީހުން ކުރި މަސައްކަތް ވެސް ވަކި ކުޑައެއް ނޫނެވެ.

ޢަޞްރު ނަމާދުކޮށްލައިގެން ރިޝާނާ އާއި އުޝާ ހަވީރު ފިންޏަށް ހިނގައިލަން ނުކުތެވެ. ކައިރި ފިހާރައަކުން ދެ އައިސްކޯން ގަނެގެން އެ ބޮމުން ދެބެން ވަކި މިޞްރާބެއްނެތި ހިނގަމުން ދިޔައެވެ. ބައެއް މީހުންގެ ކަތި ނަޒަރުން ދެބެންނަށް އުނދަގޫވަމުން ދިޔައެވެ. ނަމަވެސް އެކަމާ އަޅައިނުލައި ދެބެންވެސް އަމިއްލަ ވާހަކަތަކެއް ދައްކަމުން ދިޔައެވެ. “ބޭބެ ގުޅިތަ މިއަދު؟” ޒައިން މަތިން ހަނދާންވެގެން ރިޝާނާ އެހިއެވެ. “އާނ. ވަރަށް ދިމާކުރި.” ފޫހިގޮތަކަށް އުޝާ ބުންޏެވެ. “ހެހެ.. ދޮންތަ ތިހާ ލޯބިކޮށް ހުންނަންޏާ ބޭބެ ދިމާކުރާނެއްނު.” ރިޝާނާ ބުންޏެވެ. އުޝާ ކަޅިމައްޗަށް ހިންގައިލިއެވެ. “މިރޭ އޮންނާނެ އެއްކަލަ މެލޭމޯލްޑިވްސް ޝޯ. ބަލަންވާނެއްނު.” އުޝާ ބޯ ޖަހައިލުމަށްފަހު އާން ދޯ އޭ ބުނެލިއެވެ. ދެބެން ވާހަކަދައްކަމުން ދަނިކޮށް ނައިޒަކް ރިޝާނާ ގެ ފޯނަށް ގުޅަން ފަށައިފިއެވެ. “ކީކޭ ދޮންބޭބޭ.” ފޯނު ނަގައި ކަންފަތުގައި ޖައްސައިލަމުން ރިޝާނާ އެހިއެވެ. “ލަސްނުވެ އަންނައްޗޭ އިނގޭ ރިޝޫ. މަންމަ މިހާރުވެސް އެބައުޅޭ ކަންބޮޑުވެގެން.” ރިޝާނާ އާނއެކޭ ބުނެ ފޯނު ކަނޑައިލިއެވެ. “އަޅެ އަހަރުމެން މީ ކުޑަކުދިންތަ؟ ހަމަ ބޭރަށް ނުކުމެލާއިރަށް މަންމަ ކަންބޮޑުވާން ފަށާނެ.” ދެބުމަ ގޮށްޖަހައިގެން ހުރެ ރިޝާނާ ޝަކުވާކުރަން ފެށިއެވެ. “އެއީ އަހަރުމެންނަކީ. އަންހެންކުދިންނަށްވީމައޭ. މިހާރު ކަންތައްތައް ހިނގާ ގޮތުން ކޮންމެ މަޔަކުވެސް ކަންބޮޑުވާނެ އެމީހެއްގެ ދަރިއަކު އަމިއްލައިން ބޭރުގަ އުޅެންފެށީމަ. ކަމެއްވާނީ ބުނެފައެއްނޫނެއްނު. މިހާރުވެސް ފެނެއެއްނު މީހުން ބަލާވަރު. ހަމަ ހީވަނީ ދެންމެ ދެންމެ އައިސް އަތުލައިގެންފާނެހެން.” ވިސްނައިދޭ ފަދައަކުން އުޝާ ބުންޏެވެ. އިރުކޮޅެއް ވަންދެން އެއްވެސް އެއްޗެކޭ ނުބުނެ ހުރުމަށްފަހު ރިޝާނާ ބޯ ޖަހައިލިއެވެ.

މިރޭ ހީވަނީ އުޑުމަތީގައި ކަޅު ސާލެއް އޮޅައިލައިފައިވާހެންނެވެ. އެއްވެސް ތަރުތީބެއްނެތި އެކި ދިމަދިމާލުގައި ތަރިތައް ފިޔަޖަަހަމުން ދެއެވެ. މިރޭގެ ޝޯ އަށްޓަކައި ޒައިން ހުރީ ވަރަށް ފުރިހަމަ އަށް ތައްޔާރުވެގެންނެވެ. ގަދަނޫކުލައިގެ ކޯޓު ފަޓުލޫނުގައި ޒައިން ކުރިއަށްވުރެ ރީތިކަމަށް ދައްކައެވެ. ބޮލުގެ އިސްތަށިގަނޑު ސްޓައިލް ކޮށްލައިފައި ހުރީ އެހެންޏާ ސްޓައިލް ނުކުރާ ފަދަ ގޮތަކަށެވެ. އަތުގައި އޮތް ކަރުދާސްކޮޅަށް އަވަސް ނަޒަރެއް ދެމުން ޒައިން ޖިއާން އާއިއެކީ ޓެކްސީއެއްގައި ޝޯ ބާއްވާ ސަރަޙައްދަށް ދިޔައެވެ.

ސްޓޭޖްމަތީ ބަހައްޓައިފައި ހުރި ސްޓޭންޑާޑް މައިކް ކައިރީ ޒައިން ހުއްޓިލި ވަގުތަކީ އެންމެންގެ ލޯތައް އޭނާއަށް އަމާޒުވި ވަގުތެވެ. ޓީވީއިން ޝޯ ބަލަމުން ދިޔަ އެތައް ބައެއްގެ ޝައުގުވެރިކަން ޒައިންއަށް ހުއްޓެމުން ދިޔައެވެ. “އަޅެ. މިރޭ އަދި ވަކިން ބޭބެ ބައްޕައާ ވައްތަރު.” ޓީވީ ސްކްރީނަށް ބަލައިލަމުން މުނީޝާ ބުންޏެވެ. އާރިޝްމެންވެސް އެއީ ތެދެކޭ ކިޔައި އެވާހަކަ ދެއްކިއެވެ.

ޝޯގެ ތަޢާރަފެއް ދެމުން ޒައިން އޭނާގެ ވާހަކަ ކުރިއަށް ގެންދިޔައެވެ. ފުރަތަމަ އައިޓަމް ހުށަހެޅުމަށް ގޮވައިލެވުމާއިއެކު ދިވެހި ސަގާފީ ޑާންސް ގްރޫޕް ސްޓޭޖަށް އަރައި އެމީހުންނަށް ހުށަހަޅައިދެވުނު އެންމެ ފުރިހަމައަކަށް ނެށުން ހުށަހަޅައިދެވުނު ދިޔައެވެ. މިގޮތަށް މެލޭޝިޔާ މީހުންވެސް އެކި އެކި ހުށަހެޅުންތައް ހުށަހަޅައިދެމުން ދިޔައެވެ. އެކި ޤައުމުތަކުގައި އޮންނާނީ އެކި ސަޤާފަތް ކަމާއި އެއްބަޔަކު އަނެއް ބައެއްގެ ސަޤާފަތަށް އިޙްތިރާމްކުރަން ޖެހޭނެކަން މިރޭގެ ޝޯއިން ވަރަށް ރަނގަޅަށް ދައްކައިދޭ ޖޫން ދިޔައެވެ. ކޮންމެއަކަސް ދެ ޤައުމުގެ ރައްޔިތުންގެ ފޯރިގަދަ ޙަރަކާތްތަކަކާއިއެކު މިރޭގެ ޝޯ ކާމިޔާބުކަމާއިއެކު ނިންމައިލެވުނެވެ.

ރޫމަށް ވަތް ޒައިން އެ ދަށް ވެއްޓިގަތީ ވާޅުވެފައި ހުރުމުގެ ސަބަބުންނެވެ. އިރުކޮޅަކު އަރާމުކޮށްލަން އޮތުމަށްފަހު ޒައިން ތެދުވެ ފެންވަރައިލައިގެން އަތްދިގު ޓީޝާޓަކާއި ކެރެޓް ޖީންސެއް ލުމަށްފަހު ރޫމުން ނުކުތެވެ. އޭރު ޖިއާން ބޭރުގައި މަޑުކޮށްގެން ހުއްޓެވެ. “ހާދަ ގިނައިރެކޭ ތި ވަނީ.” ޒައިން ތަންކޮޅެއް ލަހުން ކޮޓަރިން ނުކުތުމުން ޖިއާން ޝަކުވާކޮށްލިއެވެ. “ވާޅުވެފަ ހުރީމަ ކުޑަކޮށް ޖައްސާލީ.” ޒައިން ބުންޏެވެ. ދެޒުވާނުންވެސް ދެން ހިނގައިގަތީ ބާޒާރު ކޮށްލުމަށްޓަކައެވެ. ޒައިން އޭނާގެ ޢާއިލާއަށް އެކި ހަދިޔާ ގަންނަމުން ދިޔައެވެ. ޖިއާންވެސް އޭނާގެ އާއިލާއަށް ބޭނުންވާ ހަދިޔާ ގަންނަމުން ދިޔައެވެ. ބާޒާރު ކޮށް ނިންމައިގެން ދެޒުވާނުން ދެން ދިޔައީ ރެސްޓޯރެންޓަކަށެވެ. ކައި ނިންމައިގެން ދެޒުވާނުންނަށް ގެއަށް ދެވުނުއިރު ހުރީ ދަންވެފައެވެ.

“އޭތް. އަހަންނަށް ގޮވާތި ހެނދުނު.” އެނދަށް އަރައި އިށީންނަމުން ޖިއާން ބުންޏެވެ. “ހްމްމް.” ޒައިން އެހެން ބުނެ ފޯނާއި ކުޅެން އިނެވެ. ޖިއާން އަނެއްފަރާތަށް އެނބުރެމުން ރަޖާ އަޅައިގެން އޮވެ ދެލޯ މަރައިލިއެވެ. ޒައިން ގޭމް ކުޅެން އިނދެފައި ފޯނު ބޭއްވީ މާދަން ހެނދުނު ފުރަން ޖެހޭތީއެވެ. ސައިޑް ޓޭބަލް މަތީ ދިއްލައިފައި ހުރި ލޭމްޕް ނިވައިލަމުން ޒައިންވެސް އޮށޯތެވެ. މާދަން ބޯއްޓު ތެރޭގައި ވާނެ ގޮތަކާއި ވިސްނޭވަރުން ޒައިންއަށް ރަނގަޅަކަށް ނިދޭގޮތެއް ނުވިއެވެ. އެކަމާ ވިސްނަން އޮވެ ޒައިންއަށް ނިދުނީ ވަރަށް ދަންވިފަހުންނެވެ.

– ނުނިމޭ –