މިނަން ތިހިތުން ފިލުވާލަނީހޭ…11

“ދެން ބުނެބަލަ… ކީއްވެތަ މިދޭތެރެއަށް އެ ޒެވިންއެއް ތި ވެއްދީ… އަދި އެވެސް އަހަރެން އެހާ ފޫހިވާ މީހަކު ދޯ ވައްދަން އެނގުނީވެސް… ކީއްވެތަ ރިތިކް ރޯޝަންއޭ ނުބުނީ؟… ނޫނީ މޫރަތް އޭ ބުނިނަމަވެސް…” އަހަރެން މަޖާވެލާފައި ބުނީމެވެ.

“އެކަމެއް ނޭނގެ، ރޭގަވެސް ސައިކަލުމަތީ ތަތްވެލާފަ ތިބިއިރު…” ޝާޔަން ދެން ބުނި އެއްޗަކުން އަހަރެންގެ ތަބީޢަތު ބަދަލުވެއްޖެއެވެ.

********

ދެލޯ ބޮޑުކޮށްގެން އަހަރެން ހުރީ ޝާޔަންގެ މޫނަށް ބަލާށެވެ. އަހަރެމެން ސައިކަލުގައި ތަނަކަށް ދިޔަކަން ޝާޔަންއަށް އެނގުނީ ކިހިނެތް ހެއްޔެވެ؟ އަނެއްކޮޅުން ޝާޔަން ބުނީ އޭނަގެ މަންމަ އާއިއެކު ހޮސްޕިޓަލުގައި އުޅުނު ވާހަކައެވެ.

ބުނެވުނު އެއްޗެއް ރޭކައިލުމުން ކަންނޭނގެއެވެ. ޝާޔަންގެ މޫނުމަތީގެ ކުލަވަރު ބަދަލުވެއްޖެއެވެ. ހާސްކަން ފެންނަމުންދިޔަ އެ މޫނުމަތިން ކަމެއް ސިއްރުކުރާކަން ކަށަވަރުވިއެވެ. ފުރަތަމަ ފަހަރަށް ޝާޔަން އާއިމެދު ހިތުގައި ޝައްކުގެ އޮށެއް އިންދުނެވެ. އޭގައި ކުރިލައިގެން ހެދުމުގެ ކުރިން ވީގޮތް ސާފުކުރަން އަހަރެން ބޭނުންވިއެވެ.

“ކިހިނެތް ޝާޔަންއަށް އެކަން އެނގުނީ؟…” ޝާޔަންގެ އަތުގެ މުލައްދަނޑީގައި ހިފަހައްޓަމުން އަހަރެން ބުނީމެވެ. އަހަރެންގެ އަތް ފޮޅުވާލާފައި، ޝާޔަން އުޅުނީ އެތަނުން ދާށެވެ.

“ޝާޔަން، އަހަރެން ބޭނުމޭ ޖަވާބެއް…” އަހަރެން ވާހަކަދެއްކީ އާދޭހުގެ ރާގަކަށެވެ.

ޝާޔަން އެ ފުރުޞަތެއް ނުދިނެވެ. އަހަރެންގެ ހިތުގައި އެތައް ސުވާލެއް އުފައްދާފައި، އެތަނުން ދިޔައީ އަހަރެން ގޮވަގޮވައި ހުއްޓައި، ބީރު ކަންފަތެއް ދީފައެވެ.

ޝާޔަން ދިޔަތާ މާ ގިނައިރެއްނުވެ، އޭނަގެ މެސެޖެއް ލިބުނެވެ. މަޢާފަށް އެދި ފޮނުވާފައިވާ އެ މެސެޖުގައި އޮފީހުން ވަކިވާން ބޭނުންވާ ކަމަށް ބުނެފައި އޮތެވެ. އަހަރެންގެ ތަބީޢަތު އެއްކޮށް ބަދަލުވިއެވެ. ޝާޔަންއަށް އެހާ ބޮޑު ބަދަލެއް އައި ސަބަބަކާއިމެދު ވިސްނާ ވިސްނައި ސިކުނޑި ސުމަކަށް ދިޔައެވެ. އަހަރެން ތަކުރާރުކޮށް ގުޅުމުންވެސް އެ ފޯނަށް ގުޅޭގޮތެއް ނުވިއެވެ.

އަހަރެން އޮފީހަށް ނުކުތީ ދެދުވަސް ފަހުންނެވެ. ޝާޔަންގެ ކަންތަކާއި، ވިސްނާވިސްނައި އެއްވެސް ކަމެއް ކުރާހިތް ނުވީއެވެ. ޝާޔަންއަށް ގުޅިއަސް، ފޯނެއް ނުނަގައެވެ. އެކަމަކު މެސެޖު ކުރުމުން ބައެއް މެސެޖުތަކަށް ޖަވާބު ފޮނުވައެވެ.

އޮފީހަށް ނުކުތުމުން އެނގުނީ، ވަޒީފާއިން ވަކިވުމަށް ޝާޔަން ސިޓީ ލީކަމެވެ. ސިޓީއަށް ޖަވާބު ތައްޔާރުކުރަން ބުނެފައި އަހަރެން އިނީ ކެބިންގައެވެ. ކިތަންމެ ބޭނުންވިޔަސް، ދާން ހުންނަ މީހަކު ނުހިފޭއްޓޭނެއެވެ. އެއީ އަހަރެން ޤަބޫލުކުރާ ގޮތެވެ. ގޮނޑީގައި ބޯ އަޅާލައިގެން އޮތްއިރު، ޝާޔަން ދެއްކި ކޮންމެ ވާހަކައަކާއިމެދު ވިސްނެމުން ދިޔައެވެ.

ޝާޔަންގެ ވަޒީފާއަށް މީހަކު ހޯދުމަށް އިޢުލާން ކުރެވުނެވެ. އިންޓަވިއު އޮތް ދުވަހު، އަހަންނަށް އޮފީހަށް ދެވޭ ގޮތެއް ނުވިއެވެ. މާ ގަދައަށް ބޮލުގައި ރިއްސާތީ އެދުވަހު ނުވެސް ތެދުވަމެވެ. އެ ހަފްތާ އަހަރެން އެއްގޮތަކަށްވެސް ގެއަކަށް ނުދަމެވެ. މުޅީންހެން އުޅުނީ އޮފީހުގައި އަހަންނަށް ޚާއްސަކުރެވިފައިވާ ކޮޓަރީގައެވެ.

ހަފުތާއެއް ފަހެވެ. އޮފީހަށް ދިޔުމަށް ތައްޔާރުވެލައިގެން އަހަރެން ހުރީ ލިފްޓްގެ އިންތިޒާރުގައެވެ. ހުދުކުލައިގެ އަތްކުރު ގަމީސްކޮޅާއިއެކު ކަޅު ލެގިންސްގައި އަހަރެން ހީވަނީ ތަފާތު މީހެއް ހެންނެވެ. ހުދު އަހަންނަށްވެސް އެ ތަފާތު ފާހަގަ ކުރެވުނެވެ. ގަމީސްކޮޅު އަހަރެންގެ ގައިގައި ރީތިކޮށް ހިފާލާފައި ހުރިގޮތުން އަހަރެންގެ ބައްޓަން ރީތި ހަށިގަނޑު ރީތިކޮށް އެނގެމުން ދިޔައެވެ. އޭގެ ކުރިން އަހަރެން އަބަދުވެސް ލަމުން އައީ ގަޔަށް ދޫކޮށް ހުންނަ ހެދުންތަކެވެ. އެހެން ދުވަސްދުވަހާއި ޚިލާފަށް އިސްތަށިގަނޑުވެސް ފަހަތުން ގެންގޮސް ވޫލުކޮޅަކުން އައްސައިލީމެވެ.

އޮފީސް ބަޔަށް ލިފްޓް ހުއްޓުމާއިއެކު އަހަރެން ނުކުތީމެވެ. ކުރިޔަށް ހިނގައިގަތުމާއިއެކު އިވެމުންދިޔައީ އަހަރެން އަރައިގެން ހުރި ހައި ހީލްސްގެ އަޑެވެ. އެންމެން ތިބީ އަހަންނާއި ދިމާއަށް ބަލަހައްޓައިގެންނެވެ. ހީވަނީ މަޝްހޫރު މީހަކު ފެނުމުން ބަލަހައްޓައިގެން ތިބި ހެންނެވެ. ކައުންޓަރާއި ދިމާއިން ހިނގާފައި އައި ޒެވިންވެސް އަހަރެން ފެނިފައި ހިނދުކޮޅަކަށް މަޑުޖެހިލިއެވެ. އެއަށްފަހު އަހަންނަށްވުރެ ކުރިން ގޮސް ކެބިންއަށް ވަދެއްޖެއެވެ.

ކެބިންގެ ދޮރު ހުޅުވާލުމާއިއެކު އަހަރެން ދިޔައީ ސިއްސައިގެންނެވެ. ހަށިގަނޑު ބެލެންސް ނުކުރެވި އަރި އަޅައިލީ އެތެރެއިން ކޮންމެވެސް މީހަކު ދޮރު ހުޅުވައިލުމުންނެވެ. އަހަންނަށް ދެލޯ މަރާލެވުނެވެ. ތޫލި ހަޅޭކެއްގެ އަޑު ބޭރުވިއެވެ. ވެއްޓެއްދިޔަ ވަގުތު، އެ މީހަކު އަހަރެންގެ އުނަގަނޑުގައި ހިފަހައްޓައިލިކަން އެނގުނެވެ. އަހަރެން ދެލޯ ހުޅުވައިލިއިރު ފެނުނީ ޒުވާން ފިރެހެނެކެވެ. އަހަންނާއި ދިމާއަށް ގުދުވެގެން އޮތްއިރު، އަހަރެން އޮތީ އެ އަތުގެ ބާރުގައެވެ. ދެލޯ ބޮޑުކޮށްގެން އަހަންނާއި ދިމާއަށް ބަލަމުންދިޔަ އެ ޒުވާނާގެ މޫނުމަތިން ފެނުނީ ހައިރާން ކަމެވެ. އަހަންނަށް އޮވެވުނީ އެ މީހެއްގެ މޫނަށް ބަލާށެވެ. ކޮންމެވެސް ތަނަކުން ދިމާވެފައިވާ މީހަކާއި ވައްތަރުވުމުންނެވެ. އެކަމަކު ވިސްނާވިސްނައި ކާކު ކަމެއް ސިކުނޑިއަކަށް ނައެވެ.

ރަސްމީ ހެދުމުގައި އެ ޒުވާނާ ވަރަށްވެސް ފިރެހެންވަންތައެވެ. ބޮލުގެ އިސްތަށިގަނޑުވެސް ސްޓައިލްކޮށްފައިވީ އެންމެ ޒަމާނީ ގޮތަށެވެ. އަހަންނަށް އޮވެވުނީ އެމީހެއްގެ އަތުގެ ބާރުގައިކަން ހަނދާންވުމާއިއެކު، ކުއްލިއަކަށް ތެޅިގަނެފައި ދުރަށްޖެހިލެވުނެވެ. އެވަގުތު ފަހަތުން އައި މީހަކު އަހަރެންގެ އަތުގައި ހިފައި އެމީހަކާއި ދިމާއަށް ދަމައިގަނެފިއެވެ. ހުރިހާ ކަމެއް ހިނގީ ދާދި އަވަހަށެވެ.

އަހަރެން ގޮސް ލައިގަތީ އެމީހެއްގެ ގައިގައެވެ. އަވަހަށް ދުރަށްޖެހިލައިފީމެވެ. އޭރުވެސް އެމީހަކު ހުރީ އަހަރެންގެ އަތުގައި ބާރަށް ހިފަހައްޓައިގެންނެވެ. އެމީހަކީ ޒެވިންއެވެ. ޒެވިންގެ އަތުން ފެށިގެން މޫނާއި ހަމައަށް އަހަރެންގެ ނަޒަރު ހުއްޓުނެވެ. އެއާއިއެކު ދެބުމަ ގޮށްޖަހައިލެވިއްޖެއެވެ. އަތް ދަމައިގަންނަން އުޅެއުޅެ، ޒެވިން އެ ފުރުޞަތެއް ނުދިނެވެ.

ޒެވިންގެ މޫނުމަތިން ފެންނަމުންދިޔައީ ހަރުކަށިކަމެވެ. އަހަރެންގެ ދެލޮލަށް ނަޒަރު ހުއްޓާލައިގެން ހުރިގޮތުން، ކަމަކާއި ފުންކޮށް ވިސްނަމުން ދިޔަކަން އެނގުނެވެ. އެ މޫނުމަތިން ފެނުނު ޢަޞަރުތައް ތަރުޖަމާކުރާކަށް ނޭނގުނެވެ. ޒެވިންގެ ނަޒަރު އަހަރެންގެ މޫނުން ކައިރީގައި ހުރި ޒުވާނާއަށް ހުއްޓުނުތަން ފެނިފައި އަހަރެން އެދިމާއަށް ބަލައިލީމެވެ. ވީގޮތް ސާފުވީ ދެނެވެ. ޒެވިންގެ ތަބީޢަތު ބަދަލުވެފައިވަނީ އެ ޒުވާނާގެ ސަބަބުންނެވެ.

މަޑު ނޫކުލައިގެ އަތްދިގު ގަމީހަކާއިއެކު ގަދަ ނޫކުލައިގެ ޓައީގައި އެޒުވާނާ ފެންނަލެއް ހިތްގައިމެވެ. ފެންނަ ފެނުމަށް ޖެހިލުންކުޑަ ގޮތެއް ހުއްޓެވެ. އެޒުވާނާ ހުރީ ކަޅިޖަހައިވެސްނުލައި އަހަރެންގެ މޫނަށް ބަލާށެވެ. އެ ތުންފަތްމަތީގައިވީ ލުއި ހިނިތުންވުމެކެވެ. ހީވާގޮތުން އަހަންނަކީ ކާކުކަން އޭނައަށް އެނގޭ ކަހަލައެވެ.

“އޭ ޔޫ… މީ އަމިއްލަ ގެއެއް ނޫން އިނގޭ… މިތަނަށް ވަދެ ނުކުމެ ހަދަންވާނީ ތަންކޮޅެއް ބަލާލައިގެން… ނޭނގޭތަ ތަނުގެ ބޮޑެތި މީހުންނަށް ޕްރައިވެސީ ބޭނުންވާ ކަމެއް؟… ނުކުންނަންވެސް ބުނަންތަ ޖެހޭނީ؟…”

ޒެވިންގެ އަޑުގައި ހިތްހަމަނުޖެހުމުގެ އަޞަރުވިއެވެ. ކެބިންއިން ނުކުމެވެން ހުރި ދޮރާއި ދިމާއަށް އިނގިލި ދިއްކޮށްލިގޮތުންވެސް އެކަން އެނގުނެވެ. އެހެން މީހަކަށް ވާހަކަ ދައްކާނޭ ފުރުޞަތެއް ޒެވިންއެއް ނުދިނެވެ. ހީވަނީ ވީގޮތްވެސް އޮޅުންފިލުވަން ބޭނުން ނުވާހެންނެވެ. އަހަންނަށް ދޫކޮށްލެވުނީ ފުން ނޭވާއެކެވެ. އެ ޒުވާނާގެ މޫނުން ނަޒަރުވަކިކޮށްލުމަށްފަހު، ސީލިންގަށް ނަޒަރު ހުއްޓާލީމެވެ. އަހަރެން ކެތްކޮށްގެން ހުރީ އެ ޒުވާނާ ކެބިންއިން ބޭރަށް ނުކުންނަންދެނެވެ. ޒެވިންގެ އަތް ފޮޅުވާލާފައި ދުރަށްޖެހުނީމެވެ.

“ހައު ޑެއަރ ޔޫ ޓަޗް މީ…” ޒެވިން ކަންތައް ކުރިގޮތުން އަހަރެން ހުރީ ހިތްހަމަނުޖެހިފައެވެ.

“ވަޓް؟…” ޒެވިން ކުރިޔަށް ޖެހިލިއެވެ. އަހަންނާއި ދިމާއަށް ބަލައިލިގޮތުން އޭނަގެ އެއްވެސް މައްސަލައެއް އެކަމުގައި އޮތްކަން ޤަބޫލުނުކުރާ ކަހަލައެވެ.

“އާރްރްރް…” އަހަރެން ބޮޑަށް ހިތްހަމަނުޖެހުނީ އެހުރިހާ ކަމަކަށްފަހު، ޒެވިން ވީގޮތްވެސް އެނގޭކަމަށް ހަދައިނުލީމައެވެ. ރުޅިއައިސްގެން ދެކޮޅަށް ހިނގަހިނގާފައި އައިސް ޒެވިންގެ ކުރިމަތީގައި ހުއްޓުނީމެވެ.

“ބުނި އެއްޗެއް އަޑު ނީވުނީތަ ތި އެހީ؟… މިބުނީ ކީއްކުރަންހޭ ގައިގައި އަތްލީ؟…” އަހަރެން ހަށަމް ބަނދެލީމެވެ.

“އަހަރެން އަތްލީމަތަ މައްސަލައަކަށް ވަނީ؟…” ޒެވިން އަނެއްކާވެސް ކުރިއަށް ޖެހިލިއެވެ. މިފަހަރު އަހަންނާއި ކުރިޔަށްވުރެވެސް ބޮޑަށް ގާތަށެވެ. އަހަރެން ވަގުތުން ފަހަތަށް ޖެހިލީމެވެ.

އެހެންމީހުން އޯކޭދޯ އަތްލިޔަސް؟…” ޒެވިން ހިތްހަމަނުޖެހިފައި ބުންޏެވެ.

“ޝަޓަޕް…” އަހަރެން ހިނގައިގަތީ ގޮނޑިއާއި ދިމާއަށެވެ.

ޒެވިން އަހަރެންގެ އަތުގައި ހިފައި ދަމައިގަތެވެ. އަހަރެން އައިސް ތަތްވީ އެ މޭގައެވެ. ވަގުތުން އެ މޭގައި އަތް އަޅައި ދުރަށް ކޮއްޕައިލީމެވެ.

“ބިހޭވް…”

ޒެވިން އާއި ދިމާއަށް ޝަހާދަތް އިނގިލި ދިއްކޮށްފައި އަހަރެން ދިނީ އިންޒާރެކެވެ. ދެބުމަ ގޮށްޖަހާލައިގެން ހުރިއިރު، ދަތްތަކަށް ބާރުވަމުން ދިޔައެވެ. ކޮޅަށް ހުރުމަށްވެސް ދަތިވިއެވެ. އެންމެފަހުން ގޮސް ގޮނޑީގައި އިށީނީމެވެ. ފަހަތުން ޒެވިން އައިސް އަހަރެންގެ ކުރިމަތީގައި ހުއްޓުނެވެ. މޭޒުގައި ދެއަތްތިލަ ވިއްދާލާފައި، އަހަންނާއި ދިމާއަށް ގުދުވިއެވެ.

“ކޮންމެތަނަކަށްވެސް ވެއްޓިގަންނަންދޯ އެނގެނީ؟… ތަންކޮޅެއް ބަލާލައިގެން އުޅެބަލަ… ކޮންމެ ފިރެހެނެއް އަހަރެން ހެނެއް ނުވާނެ… ޚާއްސަކޮށް ފިރެހެނުންގެ ކުރިމަތީ އެބަޖެހޭ ބަލައިގެން އުޅެން…” ޒެވިން ވާހަކަ ދެއްކިލެއް ބާރުކަމުން އަހަންނަށް އިނދެވުނީ ބޮލަށް އުނދަގޫވެފައެވެ.

އެތައް އިރަކު އެތަނުގައި ހުރެފައި ޒެވިން ދިޔައީ އަހަރެން ބަލައިވެސް ނުލުމުންނެވެ. މޭޒުމަތީގައި ބޯއަޅައިގެން އޮތްއިރު، ޒެވިން އެއްޗެކޭ ކީއަޑުވެސް އިވޭކަމަކަށް ހަދައިނުލަމެވެ. ޒެވިން ދިޔުމުން އަހަންނަށް ދޫކޮށްލެވުނީ ފުން ނޭވާއެކެވެ. ގޮނޑީގައި ބޯއަޅާލާފައި ދެލޯ މަރާލީމެވެ. އަހަންނަށް ވިސްނެމުންދިޔައީ ޒެވިންއަށް އެވީ ގޮތަކާއި މެދުގައެވެ. ސިކުނޑި ސުމަކަށްދާން ކައިރިވެފައިވަނިކޮށް، ކޮންމެވެސް މީހަކު ދޮރުގައި ޓަކިޖަހާލާފައި، ދޮރު ހުޅުވާލި އަޑު އިވުނެވެ. އެމީހަކު އެތެރެއަށް ވަނުމުގެ ކުރިން ދެލޯ ހުޅުވައިލީމެވެ. މީހާ ހަމައަކަށް އެޅުނީ ފުލުފުލުގައި ދެތިން ނޭވާއެއް ބޭރުކޮށްލެވުމުންނެވެ.

ދޮރުމަތީގައި ހުރީ އޭގެ އިރުކޮޅެއް ކުރިން ކެބިންއިން ދިމާވި ޒުވާނާއެވެ. ބޮލުގެ އިޝާރާތުން އެތެރެއަށް ވަނުމުގެ ހުއްދަ ދިނީމެވެ.

“ހާއި… ނިޔާލް… ޔުއަރ ސެކްރެޓަރީ…” ސަލާމަށް އަތްދިއްކޮށްލަމުން އެޒުވާނާ ހިނިތުންވެލިއެވެ.

ފިރެހެނުންނާއި އަތާއި އަތްޖޯޑުކޮށް ސަލާން ކުރުމަކީ އަހަރެން ކޮށްއުޅުނު ކަމެއް ނޫނެވެ. އެޒުވާނާގެ އަތަށް ބަލަހައްޓައިގެން އަހަރެން އިރުކޮޅަކު އިނީމެވެ. ސަލާމަށް ޖަވާބުދީފައި ކުރިމަތީގައި ހުރި ގޮނޑީގައި އިށީނުމަށް އެދުނީމެވެ. އެޒުވާނާ ރަކިގޮތަކަށް ހިނިތުންވެލާފައި، ސަލާމަށް ދިއްކޮށްލާފައިވާ އަތް ތިރިކޮށްލިއެވެ. އެއަށްފަހު ގޮނޑީގައި އިށީނެވެ.

“ދެންމެ ވީކަންތަކަށް މަޢާފަށް އެދެންޖެހޭނީ ކާކުކަމެއް ނޭނގޭ… ގަސްދުގައި ކުރިކަމެއް ނޫން… އެކަމަކުވެސް ސޮރީ…” ޒުވާނާ އިނީ ހިނިތުންވެލައިގެންނެވެ.

“އެންމެ ރަނގަޅުތަ އެހާ ފޯމަލްކޮށް ވާހަކަ ނުދެއްކިޔަސް… ލަޔާ ކުރިމަތީގައި އެހާ ފޯމަލްކޮށް ވާހަކަ ދައްކަން އަހަންނަށް ވަރަށް އުނދަގޫ… އަނެއްކާ ކުރިޔާ މިހާރާ އެޓިޓިއުޑް ހަމަ ސޭމް…”

ނިޔާލް ވާހަކަ ދެއްކީ ލުއި ހިނގަނޑެއް ޖަހާލަމުންނެވެ. ވާހަކަ ދެއްކިލެއް ގާތްކަމުން އަހަރެން އިނީ ހައިރާންވެގެން ބުނާނެ އެއްޗެއްވެސް ނޭނގިފައެވެ. “ލަޔާ” އެ ނަމަކީ އަހަންނަށް އާނަމެއް ނޫނެވެ. އެއީ މާޒީގެ އެތައް ހަނދާނަކާއި ގުޅިފައިވާ ނަމެކެވެ. އެއްޗެއް ހަނދާންކުރާ ފަދައިން އެ ޒުވާނާގެ މޫނަށް އަހަންނަށް ބަލަން އިނދެވުނީ އެހެންވެއެވެ.

“ކަމްއޯން… މިހާރު މީ ކާކުކަން ދެން އެނގެންވެއްޖެ އިނގޭ… ބޭބީ މަންކީ…”

ނިޔާލް ބުނި އެއްޗަކުން އަހަރެންގެ ދެލޯ ބޮޑުވެގެން ދިޔައެވެ. ފުންމައިގެން ގޮނޑިން ތެދުވެވުނު ގޮތްވެސް ނޭނގުނެވެ.

“ޔޫ، ގޮރިއްލާ؟…”

ސްކޫލު ދުވަސްވަރުގެ ހަނދާންތައް އާވުމާއިއެކު އަހަންނަށް ސުވާލުކޮށްލެވުނެވެ. ނިޔާލް ބޯޖަހާލިއެވެ. އެއާއިއެކު، އަހަންނަށް ދަތްތަކަށް ބާރުކޮށްލެވުނީ އެދުވަސްތަކުގެ ހަނދާންތައް އާވުމުންނެވެ.

ނިޔާލް އަކީ އަހަންނާއި އެއް ކުލާހެއްގައި ކިޔެވި ކުއްޖެކެވެ. ގްރޭޑް ފަހަކުން ފެށިގެން ނިޔާލްގެ ދިރިއުޅުން ރާއްޖެއިން ބޭރަށް ބަދަލު ކުރަންދެނެވެ. ސްކޫލުގައި އަހަރެމެން ދެމީހުންނަކީ ދެ ހަތުރުންނޭ ބުންޏަސް ދޮގަކަށް ނުވާނެއެވެ. ކުރާ ކޮންމެ ކަމެއް ކުރާނީ އެކަކު އަނެކަކާއި ވާދައަށެވެ. ދެމީހުންވެސް އެކަކު އަނެކަކަށް މުޚާތަބުކުރާނީ އެ މީހަކު އެންމެ ނުރުހޭ ނަމަކުންނެވެ. އެކި ފަހަރު އެކި ނަމުންނެވެ. ދެމީހުންގެ ނަތީޖާވެސް ދާދި އެއްވަރެވެ. އަބަދުވެސް ދެތިން މާކުހެއް ކުރީގައި އުޅޭނީ އަހަންނެވެ. އެއީވެސް ނިޔާލް އަހަރެންދެކެ އިތުރަށް ރުޅި އަންނަ ސަބަބެކެވެ.

“ކީއްކުރަން މިތަނަށް ތިއައީ؟… އަހަރެންގެ ކިބައިން ބަދަލުހިފަންތަ؟…” ގޮނޑީގައި އިށީންނަމުން އަހަރެން ސުވާލުކޮށްލީމެވެ.

“އަހަރެން ހީވެސް ނުކުރަން މަންކީ އާއި ދިމާވެދާނެ ކަމަކަށްވެސް… އޭރު އެހާ ޗަބީކޮށް ހުރި މަންކީ، މިހާރު ހާދަ ލޫޅާފައްޗޭ… މިހާރު ލަދުވެސްގަނޭ މަންކީ ކިޔަން… ހެހެހެ… އާޚްޚް… އެދުވަސްތައް ހަނދާންކޮށްލީމަ ހިތަށް މިއޮއްވާ ގޮތެއް ދޯ…” ނިޔާލް ދެއްކީ މުޅީން އެހެން ވާހަކައެކެވެ. މޭގައި އަތް ޖައްސައި، ދެލޯ މަރާލައިގެން އިންގޮތުން ހީވަނީ އެ ދުވަސްތައް ހިތަށް ސިފަކޮށްލަމުން ބުނެލި ހެންނެވެ.

“ކޮންގޮތެއް ވަނީ؟…” ޒެވިންގެ ބާރު އަޑު އިވުމުން އަހަރެން ދިޔައީ ސިއްސައިގެންނެވެ. ދޮރާއި ދިމާއަށް ދެމީހުންނަށްވެސް ބަލައިލެވުނީ އެކުއެކީގައެވެ.

ކެބިންގެ ދޮރު ހުޅުވާލައިގެން ޒެވިން ހުއްޓެވެ. އެ ނަޒަރު ހުއްޓިފައިވީ އަހަންނަށެވެ. ދެބުމަ ގޮށްޖަހާލައިގެން ހުރިގޮތުން އަހަރެން އިނީ ޖެހިލުންވާގޮތްވެފައެވެ. އަހަރެން ބަލައިލުމާއިއެކު، ޒެވިން އެތެރެއަށް ވަނެވެ. ހިނގަމުން ދިޔައިރުވެސް، އެ ނަޒަރު އަހަންނާއި ވަކި ނުވެއެވެ. ޒެވިން އައިގޮތަށް އައިސް، އަހަރެން އިން ގޮނޑީގެ ފުރޮޅުގައި ފައި ޖައްސައިލިއެވެ. އެއަށްފަހު އަހަރެންގެ އަތުގައި ހިފައި ދަމައިގަނެފައި، ފަޔަށް ބާރުލައި، ގޮނޑި ދުރަށް ކޮއްޕައިލިއެވެ. ގޮނޑި އެދިޔަ ބާރުމިނުގައި ގޮސް ފާރުގައި ޖެހިފައި އިވުނީ ބާރު އަޑުފައްގަނޑެއްގެ އަޑެވެ. އަހަންނަށް ދެލޯ މަރައި ބާރުކޮށްލެވުނެވެ.

(ނުނިމޭ)