ތަޤްދީރު 03 ވަނަ ބައި

” ތައްޓެއްގަ ބާރަށް ހިފާނުލެވެން ތީ ކުޑަ ކުއްޖެއްތަ؟. ކޮންމެ ކަމަކުން ވެސް މިހާރު އުނދަގޫ ކުރަން ނޫނީ ވިދާނަށް ނޭންގެނީތަ؟ މިގޭގަ ހުންނާނީ އަހަރެން ހޯދާފަ ހުރި އެއްޗެހި. އެއްޗެހި ހަލާކު ކުރާކަށް ނުޖެހޭނެ ވިދާނަކަށް ” ސަލީމާ އެއްޗެހި ކިޔަންފެށިއެވެ. ” އަހަރެން ގަސްތުގަ ތަށި ތަޅާލީއެއްނޫން މަންމާ. އަހަރެންގެ އަތުން ތަށި ދޫވީ ” ސަލީމާ ޖެހިލެއް ބާރުކަމުން އެއްފަރާތަށް މޫނު އަނބުރާލައިގެން ހުރި ވިދާން ސަލީމާއަށް ބަލާލަމުން ބުނެލިއެވެ. ” ކޮންމެހެން އަމިއްލަ ދިފާއުގަ ބޭކާރު ވާހަކަ ދައްކާނެ ކަމެއްނެތް. ހަނދާންކުރާތި! މިގޭގަ ނުހުންނާނެ ވިދާން ހަލާކު ކުރަން ގެނެގެން ގެނެސް ހުރި އެއްޗެއް. ޒާތަކަށް ބަލަން ނުހުރެ މިތަން ސާފުކޮށްފަ ކައިގެން މިތަނުން ދާން އުޅޭ ” މިހެން ބުނެފަ ސަލީމާ ގޮސް ކޮޓަރިއަށް ވަނެވެ.

ސަލީމާ ދިޔުމުން ވިދާން ލޮލުން ފައިބަމުން ދިޔަ ކަރުނަތައް ފޮހެލުމަށްފަހު މޭޒުމަތީ ހުރި ބިއްލޫރިތައް ނަގާ ޑަސްބިނަށް އެޅިއެވެ. އަދި މޭޒުކައިރިއަށް ބިއްލޫރި އެޅިފައި ހުރުމުން ފިހިގަނޑު ހިފައިގެން އައިސް ފޮޅަންފެށިއެވެ. ގޭތެރޭގައި ހުދުކުލައިގެ މުށި ޖަހާފަ ހުރުމުން، ވިދާންއަށް ނުފެނި ބިއްލުރިކޮޅެއްގެ މައްޗަށް އެރުން ވަގުތު ވޭނީ އާހަކާއެކު ވިދާން އަތުން ފިހިގަނޑު ދޫވިއެވެ. އަދި ވީތަދަށް ނުބަލާ އަނެއްކާވެސް ސަލީމާ ބޭރަށް ނުކުމެ އެއްޗެއް ބުނެފާނެތީ އަވަސް އަވަހަށް ފިހިގަނޑު ބިންމަތިން ނަގާ މޭޒުގައި ލައްކޮށްލިއެވެ. އަދި ގޮޑީގައި އިށީދެ ބިއްލޫރިކޮޅު ހެރިފައި ހުރި ފައި ނަގާ އަނެއްފައިމަތީ އަޅުވާލާ، ހެރިފައި ހުރި ބިއްލޫރިކޮޅު ނައްޓާލިއެވެ. އެވަގުތު ބިއްލޫރިކޮޅު ހެރުނު އިރަށްވުރެއް ބޮޑަށް ލޭއަންނަން ފެށުމުން އަވަސް އަވަހަށް މުށިތައްމަތި ސާފުކުރުމަށްފަހު ހަމަޔަށް ފައި ބިންމަތީ ނުޖައްސާ ވިދާން ކޮޓަރިއަށް ވަނެވެ. އަދި ފާހާނާއަށް ވަދެ ފަޔަށް ފެންއަޅަން ފެށިއެވެ. އެވަރުންވެސް ފައިބަމުން ދިޔަ ލެޔަށް ބަދަލެއް ނައެވެ. އެހާވަރަށް ފައިން ލޭ އަންނަން ފެށުމުން ވިދާން ކުޑަކޮށް ބިރުގަންނަން ފެށިއެވެ.

ސަލީމާއަށް ގޮވަން ހިތަށް އަރާފަ ވެސް ވިދާން ފަސްޖެހުނީ މައެއްގެ ފަރާތުން ދަރިއަކަށް ލިބެންޖެހޭ ލޯތްބާ ކުލުނު މިހާތަނަށް ލިބިފަ ނުވާތީޔާ، ސަލީމާއަށް އިތުރު ބުރައެއް ޖައްސަން ވިދާން ބޭނުން ނުވާތީއެވެ. އެހެންކަމުން ވިދާން ފާހާނާއިން ނިކުމެ ކޮޓަރިއަށް ވަދެ އަލަމާރިތެރެއިން ވިދާންގެ ޓީޝާޓެއްގަނާ އިރާލިއެވެ. އެއަށްފަހު އެނދުމަތީ އިށީދެ ޓީޝާޓް ބޮޑިކޮށްލުމަށްފަހު ބާރަށް ފައިގައި ބަނދެލިއެވެ. އަދި މަޑުމަޑުން ފަހަތަށް ޖެހުމުން ގޮސް ދެފައި ނަގާ އެނދަށް އަރުވާލުމަށްފަހު އުޑުތިލަމަތިން އޮށޯވެލިއެވެ. ފުރާނަ ހުއްޓަސް މަރުވެފައިވާ މީހެއްފައިން ވިދާން ހަރަކާތެއްނެތި އޮތެވެ. އެހެން އޮތްއިރު ލޯމަތިން ސިފަވަމުން ދިޔައީ ސަލީމާގެ އަތުން ވިދާންގެ ކޯތާފަތުގައި ޖެހި މަންޒަރެވެ. ކޮޓަރީގެ ހަތަރު ފަރާތުން ވިދާންއަށް އިވެމުން ދިޔައީ ސަލީމާގެ ރުޅިވެރި ބަސްތަކުގެ އަޑެވެ. އޭރު ވިދާންގެ ލޮލަށް ޖަމާވަމުން ދިޔަ ކަރުނަތައް ފައިބަމުން ދިޔައެވެ. އުފަން މައިމީހާ ފެންނަ ހިސާބުގައި ހުރެ ވިދާންއަށް ލިބެމުން އެދާ އަނިޔާއަކީ އެއްވެސް މަޔަކަށް ބަލަން ކެއްވާވަރުގެ ކަމަކަށް ނުވާނެކަން ޔަގީނެވެ. ނަމަވެސް ސަލީމާގެ ހިތަށް އެއްޗެއް ނާރައެވެ. އަޅާލާނެ ޔާރެއް އިޔާރެއްނެތް ވިދާނަށް ސަލީމާގެ ރުޅީގެ ސިއްރުވެސް ނޭންގެއެވެ. ފަޔަށް ވަމުން ދިޔަ ތަދާއެކު، ސަލީމާ ވިދާންގެ މޫނުމަތީގައި ޖެހުމުން ވަމުން ދިޔަ ތަދުގެ ތެރެއަށް އިތުރު ތަދަކާ ވޭނެއް އިތުރުވެގެން ދިޔައީ ވިދާން އެހެން އޮށްވައެވެ. ތަދުވާން ފެށުމުން ވިދާން ބޮލުގެ ދެފަރާތުން ބާރަށް ހިފާ ފިއްތާލިއެވެ. ތަދު ގަދަމުން ދިޔަވަރަަކަށް ވިދާން ތެޅެމުން ދިޔައެވެ. އެވޭނުގައި ތެޅިތެޅި އޮށްވާ ވިދާންގެ ހަށިގަނޑަށް ހިމޭންކަން ވެރިވެގެން ދިޔައެވެ.

” ކީއްވެތަ ދާން ފޯން ނުނަގަނީ ” ވިދާނަށް ގުޅާގުޅާ ފޯނަށް ޖަވާބު ނުދިނުމުން ޝުހާދު ބުނެލިއެވެ. ” ދަރިފުޅާ ކިހިނެއްވީ؟ ” ސަކީލާ ކޮޓަރިން ބޭރަށް ނިކުތް ވަގުތު ޝުހާދު ގޭތެރޭގައި ދެކޮޅަށް ހިނގާތަން ފެނުމުން ސުވާލުކޮށްލިއެވެ. ” ކަމެއްނުވޭ މަންމާ ” ޝުހާދު ބުނެލިއެވެ. ” ނުވާނެ އެހެނެއް. ކޮންމެވެސް ކަމެއްވެޖެ. އެހެން ނޫނީ ދަރިފުޅު ތިހާ ކަންބޮޑުވެގެން ނޫޅޭނެ ” ސަކީލާ ޝުހާދު ގާތުގައި ހުއްޓި ބުނެލިއެވެ. ” މިއުޅެނީ ރެއިން ފެށިގެން ދާން ފޯން ނުނަގާތީ. މިއަދު ވެސް ކިހާވަރަކަށް ގުޅާނީ ” ޝުހާދު ބުނެލިއެވެ. ” ވެދާނެއްނު ވިދާން ބަލިވެ އުޅެނީކަމަށް ” ސަކީލާ ބުނެލިއެވެ. ” އެކަމަކު ބަލިވެ އުޅުނަސް ގުޅީމާ ފޯން ނެގޭނެ ކަންނޭންގެ ” ޝުހާދު ހާސްކަމާއެކު ބުނެލިއެވެ. ” ދަރިފުޅު ދާންވީނު އެގެއަށްގޮސް ވީގޮތެއް ބަލާލަން. އަދި ގެއަށް އަންނައިރު ވިދާން ގޮވައިގެން އަންނާތި ” ސަކީލާ މިހެން ބުނުމުން ޝުހާދު ބޮލުގެ އިޝާރާތުން އާއެކޭ ބުނެލުމަށްފަހު،ވިދާނަށް ވީގޮތެއް ބެލުމަށް އެގެއަށް ދިޔުމަށް ގެއިން ނިކުތެވެ.

” ކާކަށް ގުޅައިގެން ތިއުޅެނީ ” ޔާނާ ސުވާލުކޮށްލިއެވެ. ” ރައްޓެހި ކުއްޖެއް ގުޅައިގެން އުޅޭތީ އޭނަޔާ ވާހަކަ ދައްކާލަން މިހުރީ ” ފަޒީލް ބުނެލިއެވެ. ” އަބަދުވެސް ތިވަރަކުން ތިދަނީ ” ޔާނާ ބުނެލިއެވެ. ” އަނެއްކާ ފެށީދޯ ” ފަޒީލް ބުނެލިއެވެ. ” ނުފަށާ ވަރަކަށް ނޫންދޯ ފަޒީލްގެ ކަންތައްތައް ހުންނަނީ ” ޔާނާ ބުނެލިއެވެ. ” ހެވޭ ދެން. ކިހިނެއްވީ ތި ގުޅީ ” ފަޒީލް އަހާލިއެވެ. ” ކަމެއް ޖެހުނީމަ ފަޒީލްއަށް ގުޅަން ޖެހޭ ކަމެއް ކުރިން އެނގިފައެއް ނެތް ” ޔާނާ ޖެއްސުމުގެ ރާގަކަށް ބުނެލިއެވެ. ” ދެން!!! ” ފަޒީލް ބުނެލިއެވެ. ” ވަކި ކަމެއް ކުރާކަށް ނޫން ގުޅީ. ހަމަ ގުޅާލީ. ކޮންމެހެން އަހަރެން ނޫޅެން ފަޒީލްއަށް އުދަގޫ ކުރާކަށް ” މިހެން ބުނެ ޔާނާ ފޯން ކަޑާލުމަށްފަހު އެދުމައްޗަށް ފޯން އެއްލާލިއެވެ. އަދި ކައިރީގައި އޮތް ބާލިސް ނަގާ އުގަށްލާ ހަމަޖެހިލިއެވެ.

ޝުހާދު ވިދާން އުޅޭ ގެގޭގެ ދޮރުމަތީ ހުރެ ދޮރުގައި ޓަކި ޖަހާލިއެވެ. ” ކޮން ކުއްޖެއް ” ޝުހާދު ޓަކި ހާލުމުން އިރުކޮޅެއްފަހުން ސަލީމާ ދޮރު ހުޅުވާލުމަށްފަހު ޝުހާދު ކުރެން އަހާލިއެވެ. ” ވިދާން އެބައުޅޭތަ؟ ” ޝުހާދު އަހާލިއެވެ. ” ހީވަނީ ކޮޓަރީގަހެން ” ޝުހާދު އެހެން އަހާލުމުން ސަލީމާ ފަސްއެނބުރި ވިދާންގެ ކޮޓަރިއާ ދިމާއަށް ބަލާލުމަށްފަހު ބުނެލިއެވެ. ” ތީ ކޮން ކުއްޖެއް ” ހިނިތުން ވެލަމުން އަނެއްކާވެސް ސަލީމާ އަހާލިއެވެ. ” މީ ޝުހާދު. ވިދާންގެ ރައްޓިއްސެއް ” ޝުހާދު މިހެން ބުނުމުން އަތުގެ އިޝާރާތުން ޝުހާދު ގޭތެރެއަށް ވަނުމަށް ސަލީމާ އެދުނެވެ. ” މީ ވިދާންގެ ކޮޓަރި ” ވިދާންގެ ކޮޓަރި ޝުހާދަށް ދައްކާލުމަށްފަހު ސަލީމާ ގޮސް ކޮޓަރިއަށް ވަނެވެ. ސަލީމާ ދިޔުމުން ޝުހާދު މަޑުމަޑުން ކޮޓަރީ ތަޅުގައި ހިފާ އަނބުރާލިއެވެ. ތަޅުނުލާ ހުރުމުން ފަސޭހައިން ދޮރު ހުޅުވުނެވެ. ޝުހާދު ކޮޓަރިއަށްވަދެ ދޮރުލައްޕާލިއެވެ. ކޮޓަރީގައި ހިސާބަކަށް ފަޑު އަލިކަމެއް ހުރުމުން ޝުހާދު ބޮކި ދިއްލާލިއެވެ. އެވަގުތު ޝުހާދުގެ ދެލޯބޮޑުވެގެން ދިޔައެވެ. ހައިރާން ކަމާއެކު އެދާ ދިމާއަށް ހިނގަމުން ގޮސް، އެނދުކައިރީގައި ހުއްޓި ވިދާންގެ ފަޔަށް ބަލާލިއެވެ. ވިދާންގެ ފައިގައި ބާރަށް އައްސާފައި ހުރި ޓީޝާޓް ވަނީ ރަތްވެފައެވެ. ވާނުވާ ނޭންގިފާ ހުރި ޝުހާދުގެ ނަޒަރު މަޑުމަޑުން ވިދާންގެ ހަށިގަނޑަށް ހިންގާލިއެވެ. އޭރު ވިދާންގެ މޫނު އޮތީ އެއްފަރާތަށެވެ.

” ދާން… އޭތް… ދާން ” ވިދާންގެ ހަށިގަނޑަށް ބަލާލުމުން ކަމެއް ގޯސްވެއްޖެކަން ވިސްނި ޝުހާދު  ވިދާނަށް ގޮވަން ފެށިއެވެ. ޝުހާދު ތަކުރާރުކޮށް ވިދާންއަށް ގޮވަން ފެށުމުން ވިދާންއަށް ނިދިން ހޭލެވުނެވެ. އަދި މޯޅިއަކަށް ދެލިމި ވަގުތު ފަޔަށް ލެވުނު ބާރަކުން، ތަދުވުމުން ވިދާނަށް އޮތްތަނުން ތެދުވެވުނެވެ. އަދި ޝުހާދު ފެނުމުން ހައިރާންވިއެވެ. ” ޝުހާދު މިތާ ކީއްކުރަނީ ” އެއްޗެއް ގެއްލިގެން ހޯދާހެން ދެފަރާތަށް ވިދާން ބަލާލަމުން ބުނެލިއެވެ. އަދި ކައިރީގައި އޮތް ފޮތިގަނޑު އަވަސް އަވަހަށް ފައިމަތީގައި ފަތުރާލިއެވެ. ” ކޮންމެހެން ތި ފޮރުވާނެކަމެއްނެތް. އަހަރެންނަށް ތި ހުރިހާ ތަނެއްވެސް ފެނިއްޖެ ” ޝުހާދު މިހެން ބުނެ އެނދުމަތިން ތެދުވިއެވެ. ” އަހަރެން ކޮންމެހެން މިތަނަށް މިއައީ ދާންއަށް އުދަގޫކުރާކަށް ނޫން. މިއައީ އަހަރެން ގުޅާ ގުޅާ ފޯން ނުނެގީމާ . ދާން ހީނުކުރާތި ދާން ބުނަން ނޫޅޭ އެއްޗެއް ގަދަކަމުން އަހަރެން އޮޅުން ފިލުވަން އުޅޭނޭ ” ޝުހާދު ބުނެލިއެވެ. ” ކީއްވެތަ ތިހެން ތިބުނީ ” ވިދާން އަހާލިއެވެ. ” މިހެން މިބުނީ ކީއްވެގެންކަން ދާންއަށް ވަރަށް ރަނގަޅަށް އެނގޭނެ ” ވިދާނަށް ފުރަގަސްދީގެން ޝުހާދު ހުރުމަށްފަހު އެނބުރި ބުނެލިއެވެ. ” އަހަރެންނަށް އެނގޭނަމަ ސުވާލެއް ނުކުރާނެއްނު ” ވިދާން ބުނެލިއެވެ. ” އެގުނަސް ނޭންގޭ ކަމަށް ހެދެންޏާ ދުވަހަކުވެސް ކަމެއް ނޭންގޭނެ ” ޝުހާދު ކުރިއަށް ފިޔަވަޅެއް އަޅާލަމުން ބުނެލިއެވެ. ” މިހާރު އަހަރެންނަށް އެގިއްޖެ ތިހެން ތިބުނީ ކީއްވެގެންކަން. އެކަމަކު އަހަރެން ޝުހާދު ގާތުގަ ނުބުނާކަށްނޫން މިހުންނަނީ. އެއްޗެއް ބުނާނެ ފުރުސަތެއް ނުލިބުނީ ” ވިދާން ފައިމަތީގައި އޮތް ފޮތިގަނޑު އެއްފަރާތް ކޮށްލަމުން ބުނެލިއެވެ.

” އެހެންވިއްޔާ ބުނެބަލަ ކިހިނެއްވީ ކަމެއްތަތީ ” ޝުހާދު އަހާލިއެވެ. ” މަޑުކުރޭ!. އަހަރެން ފާހާނާއަށް ވަދެފަ އައިސް ކިޔާ ދޭނަން ވީގޮތް ” މިހެން ބުނެ ވިދާން އެނދުން ތެދުވަން މަސައްކަތް ކުރިވަގުތު ވިދާން އަރި އަޅާލިއެވެ. ” ބަލައިގެން އުޅެބަލަ ” ވިދާން އަރިއަޅާލި ވަގުތު ޝުހާދު ވިދާންގެ އަތުގައި ހިފަހައްޓަމުން ބުނެލިއެވެ. އެއަށްފަހު ވިދާން ހަލާކުވިފައި މުށިތައްމަތީ ޖައްސާ، ހަލާކުވިފަޔަށް ބާރުނުލާ ޝުހާދުގެ އެހީތެރިކަމާއެކު ފާހާނާޔާ ހަމަޔަށް ދިޔައެވެ.

” ހަލޯ ” ފޯން ރިންގްވާން ފެށުމުން ޔާނާ ފޯން ނަގާ ކަންފަތުގައި ޖައްސާލުމަށްފަހު ބުނެލިއެވެ. ” ކޮންތާކުތަ ތިއުޅެނީ ފެނިވެސް ނުލާ ” ޔާނާގެ އަޑު ކަންފަތުގައި ޖެހުމުން ސީމާ ބުނެލިއެވެ. ” އަހަރެން މިއުޅެނީހަމަ. އަހަންނާ ހަމަޔަށް އަންނަންވެސް ނުކެރޭ މީހަކު ތިހެން ކިޔަނީ ކީއްކުރަންތަ؟ ” ޔާނާ ބުނެލިއެވެ. ” ރަނގަޅު ވާހަކައެއް ތިބުނީ ވެސް. ދިރިއުޅުން އެހެން މިހެން ހިނގަންޔާ ވެސް ހަމަ ހަބަރެއް ނުވެވިދާނެދޯ ” ސީމާ ހީލަމުން ބުނެލިއެވެ. ” ކޮންމެހެން މޮޅުވާހަކަ ދައްކާނެ ކަމެއްނެތް. ކިހިނެއްވީ މިހާ ދުވަސް ކޮށްލާފަ ތިގުޅާލީ ” ޔާނާ ބުނެލިއެވެ. ” އަސްލު މިގުޅާލީ ޔާނާ ގާތުގައި ވާހަކައެއް ބުނަން ވެގެން. އެކަމަކު ނޭންގެ ޔާނާ ގަބޫލް ކުރާނެ ކަމެއް ” ސީމާ ބުނެލިއެވެ. ” އަނެއްކާ ކޮންވާހަކައެއް ބުނަން ތިއުޅެނީ ” ޔާނާ އަހާލިއެވެ. ” ފަޒީލްގެ ވާހަކައެއް ” ސީމާ ބުނެލިއެވެ. ފަޒީލް ކިހިނެއްވީތަ؟ ” ޔާނާ ސުވާލުކޮށްލިއެވެ. ” އަހަރެން ކުރިން ރެއެއްގައި ދެކެފިން ފަޒީލް އެހެން އަންހެން ކުއްޖެއް ގޮވައިގެން ދަނިކޮށް. ސައިކަލްގެ ފަހަތުގައި އެކުއްޖާ އިނީ ފަޒީލްގެ ގައިގައި ޖެހިފިިގެން. ޔަގީނުންވެސް އެއީ ފަޒީލްގެ ރައްޓިއްސެއްނޫން ” ސީމާ ބުނެލިއެވެ. ” އެހެންތަ؟. އަހަރެންނަށް އެނގިގެން ތިކަހަލަ ކަމެއް ނުހިނގާ ” ޔާނާ ބުނެލިއެވެ. ” އެކަހަލަ ކަންތައް ޔާނާއަށް އަންގައިގެން ނުހިންގާނެދޯ. ޔާނާތީ އަހަރެންގެ ރައްޓިއްސެއްވީމާ އެމަންޒަރު ފެނިގެން މިބުނީ ” ސީމާ ބުނެލިއެވެ. ސީމާގެ އެވާހަކައިން ޔާނާގެ މޫނުގެ ކުލަވަރު ބަދަލުވެގެން ދިޔައެވެ. ވެދާނެ ތީ ސީމާއަށް ހީވިއެއްޗެއް ކަމަށްވެސް ” ޔާނާގެ މޫނުގެ ކުލަވަރު ބަދަލުވިޔަސް ހީލާފަ ޔާނާ އެހެން ބުނެލީ، ދުވަސްކޮޅެއްކުރިން ފެށިގެން ފަޒީލްގެ ފަރާތުން ޔާނާއަށް ވެސް ވަމުން ދިޔަ ޝައްކުތައް ސީމާއަށް ސިއްރު ކުރުމުގެ ގޮތުންނެވެ. ” ހިނގާބަލަ ދިމާވެލަން ” ޔާނާ ބުނެލިއެވެ. ” ޔާނާ ފުރީވެލާފަ ގުޅާބަލަ ދިމާވެލަން ” ސީމާ ބުނެލިއެވެ. ” އެންމެ ރަނގަޅު. ވަގުތެއް ހޯދާލާފަ ސީމާއަށް ގުޅާނަން ” މިހެން ބުނެ ޔާނާ ފޯން ކަޑާލިއެވެ.

” ވަރަށް ލަސްވެއްޖެދޯ ” ވިދާން ފާހާނާއިން ނިކުމެ ބުނެލިއެވެ. ” ނޫނޭ. ލަހެއްނުވޭ ” ޝުހާދު ބުނެލިއެވެ. ފާހާނާއިން ނުކުމެގެން އައިސް ވިދާން އެނދުގައި އިށީދެލިއެވެ. ” ޝުހާދު ގެއަށް ތިއައީ ކިހިނެއްވީ ” ވިދާން އެނދުގައި ހަމަޖެހިލަމުން އަހާލިއެވެ.   ” އަހަރެން މިގެއަށް އައީމާ ދާން ހިތްހަމަ ނުޖެހެނީތަ؟ ” ޝުހާދު ބުނެލިއެވެ. ” ނޫނޭ. ޝުހާދު ކުރިން ގެއަށް ނުވަންނާތީ އަހާލީ ” ވިދާން އެނދުގެ ހެޑް ބޯޑުގައި ލެނގިލަމުން ބުނެލިއެވެ. ” ގެއަށް އަންނަން މަޖުބޫރުވީމާ އަންނާނެދޯ ” ޝުހާދު ބުނެލިއެވެ. ” ގެއަށް ނަޔަސް އަހަރެންގެ ފޯން ވެސް މިއޮތީނު ” ކައިރީގައި އޮތް ފޯން ނަގާ ޝުހާދަށް ދައްކާލަމުން ވިދާން ބުނެލިއެވެ. ” ތީނަމަކަށް އޮންނަ ފޯނެއް. ދާން ހިތަށް އެރިއްޔާ އަހަރެން ގުޅިޔަސް ފޯން ނަގާނީ ” ޝުހާދު ބުނެލިއެވެ. ” އެހެން މީހަކު ގުޅައިގެން އާންސަރ ނުކުރިޔަސް ޝުހާދު ގުޅީމާ އާންސަރ ކޮށްފަ ހުންނާނީ ” ވިދާން ފޯން ކައިރީގައި ބާއްވަމުން ބުނެލިއެވެ. ” އެހެންތަ؟ އެހެންވިއްޔާ ފޯން ބަލާބަލަ ކިތައްފަހަރު އަހަރެން ގުޅާފަ އޮތްތޯ ” ޝުހާދު ފޯނަށް އިޝާރާތްކޮށްފަ ބުނެލުމުން ވިދާން ފޯން ބަލާލިއެވެ. ހަމަ އެވަގުތު ވިދާން ބާރަށް ހޭންފެށިއެވެ. ” ހޭނެ ކަމެއްނެތް. ތީހަމަ ދާން އަމިއްލައަށް ކުރިކަމެއް ” ޝުހާދު މޫނު ހަދާލަމުން ބުނެލިއެވެ. ” ސާބަހޭ… ގަސްތުގަ ފޯން ނުނެގީއެއްނޫން. ޝުހާދު އައިސް ގޮވީމާ އަހަރެންނަށް ހޭލެވުނީސް. ދެން ކިހިނެއް އަހަރެން ގަސްތުގަ ކަމެއް ކުރާނީ ” ވިދާން ހުނުން ކޮންޓްރޯލް ކުރަމުން ބުނެލިއެވެ.

” ދެން ބުނެބަލަ. ފަޔަށް ތިހާވަރު ތިވީ ކިހިނެއްވީތަ؟ ” ޝުހާދު އަހާލިއެވެ. ” އެއީ ރޭގަ އަހަރެން ގެ އަތުން ޓައްޓެއް ތަޅައިގެން ގޮސްގެން، އެތަން ސާފުކުރަން އުޅެނިކޮށް ބިއްލޫރިކޮޅެއް ހެރުނީ ” ވިދާން ބުނެލިއެވެ. ” އެހެންތަ؟ ތި ފޮތިގަނޑު ނައްޓުވާބަލަ ” ޝުހާދު ބުނެލިއެވެ. ޝުހާދު ބުނެގެން ފޮތިގަނޑުގައި ޖަހާފައި ހުރި ގޮއް މޮހެލަނިކޮށް ކުއްލިއަކަށް ޝުހާދަށް ވިދާންގެ ކަނާތްފަރާތުން ކޯމަތިފެނުނެވެ. ” ދާންގެ މޫނުގެ އެއްފަޅި ރަތްވެފަ ތިހުރީ ކިހިނެއްވީތަ؟ ” ޝުހާދު ސުވާލުކޮށްލިއެވެ. އެވަގުތު ފައިގައި އައްސާފަ ހުރި ފޮތިގަނޑުން ދޫކޮށްލުމަށްފަހު ވިދާނަށް މޫނުގައި އަތް ހާކާލެވުނެވެ. ” އެއީ ތަށި ތެޅުނީމާ އޭގެ އަސަރުކޮށްފަ ” މޫނުމަތިން އަތް ދުރުކޮށް، އަނެއްކާ ވެސް ފައިގައި އައްސާފައި ހުރި ފޮތިގަނޑު މޮހެލަން އުޅެމުން، އިސްދަށަށް ޖަހައިގެންއިދެ ވިދާން ބުނެލިއެވެ. ” ތައްޓެއް ތެޅިގެން ތިހާވަރުވެފަ ހުއްޓާ މިފެނުނީ އަދި އަލަށް ” ޝުހާދު ޝައްކުގެ ރާގެއްގައި ބުނެލުމުން ވިދާން ޝުހާދަށް ބަލާލިއެވެ. ” އެއީ މަންމަ އަހަރެންގެ ގައިގަ ޖަހާފަ ހުރިތަން ” ވިދާން ބުނެލިއެވެ. ” އެކީއްވެ މަންމަ ޖަހަންވީ ” ޝުހާދު ހައިރާންކަމާއެކު އަހާލިއެވެ. ” އަހަރެންގެ އަތުން ތަށި ތެޅުނީމާ ” ސަލީމާ ޖެހިވަގުތު ވީތަދު  ދެވަނަ ފަހަރަށް ވިދާނަށް އަހުސާސް ވުމާއެކު ދެލޯމަރާ ބާރުކޮށްލިއެވެ. ” ތިހެންވީމާދޯ އަހަރެންގެއަށް ވަންނަންހޭ ބުނާ ކޮންމެ ފަހަރަކު ބޭރުގަ މަޑުކުރަން ބުނަނީ ” ޝުހާދު ވިދާންގެ މޫނަށް ބަލަންއިދެ ބުނެލިއެވެ. ” އާނ. އަހަރެން ބޭނުން ނުވަނީ މިހެން ހިނގާ ހުރިހާ ކަމެއް މީހުންނަށް އެންގަން ” މަރާލި ދެލޯ ހުޅުވާލަމުން ވިދާން ހިތާމަޔާ ހިތްދަތިކަމާ، އަސަރަކާއެކު ބުނެލިއެވެ. އޭރު ވިދާންގެ ދެލޯ ވަނީ ފެންކަޅިވެފައެވެ.

” ކޮންމެ  ކޮންމެ މީހެއްގެ ގާތުގަ ނުބުންޏަސް ދާންއަށް އަހަރެންގެ ގާތުގަ ބުނެވޭނެދޯ. އެހާވަރުގެ ކަމެއްވެސް ދާންއަށް ނުވާންވީ އަހަރުމެން ދެމީހުންގެ ރަހުމަތްތެރިކަމަކީ އަގެއްނެތް އެއްޗަކަށް ވީމަތަ؟ ނޫނީ އަހަރެން ދާންއަށް ދެރަގޮތެއް ވާން އެދޭނެތީތަ؟ ” ޝުހާދު ހިތްހަމަ ނުޖެހިގެން އިދެ ވާހަކަ ދައްކަމުން ދިޔައެވެ. ވިދާން ޝުހާދުގެ ވާހަކަތައް ކުޑަކުއްޖެއްފަދައިން އިސްދަށަށް ޖަހައިގެން އިދެ އަޑު އަހަމުން ދިޔައެވެ. ” ބުނެބަލަ ދާން. ކީއްވެ އަހަރެ ގާތުގައި ތިވާހަކަތައް ނުބުނެ ސިއްރުކުރަން ޖެހެނީ. ދާން ބޭނުން އެހެން ހުރިހާ ވާހަކައެއް އަހަރެންނާ ޝެއާރ ކުރެވޭ. އެކަމަކު އަމިއްލަ ގޭގަ ބަޑުއަޅާ ވިހޭ މައިމީހާ އަނިޔާ ކުރީމާ އެވާހަކަ ނުބުނެވޭ ” ވިދާން އެއްޗެއް ނުބުނުމުން ޝުހާދު އަނެއްކާވެސް ވާހަކަދައްކަން ފެށިއެވެ. ” އަހަރެންނަށް ހީވަނީ ދާން ނުދެކޭހެން އަހަރެންމީ ދާންގެ ރައްޓިއްސެއް ކަމަކަށް. އެހެން ނޫންނަމަ ތިހާ މަޑުން ނުހުންނާނެ ” ޝުހާދު އެވަރަށް ވާހަކަ ދެއްކުމުންވެސް ވިދާން އެއްޗެއް ނުބުނުމުން ޝުހާދު ވިދާންއާ ދުރަށް މޫނު އަނބުރާލިއެވެ.

” ތިހެން ނުބުނޭ ޝުހާދު. އަހަރެންގެ ނެތް ބޭބެއެއް ދައްތައެއް ކޮއްކޮއެއް. މިހުރިހާ ކަމަކަށް ހުރީ ހަމަ އެކަނި ޝުހާދު. އަހަރެން ދެކެނީ ތީ އަހަރެންގެ ބޭބެ ކަމަށް. އަހަރެން ބުނެފިކަމަށް ވާނަމަ ކޮންމެފަދަ ކަމެއްވެސް ކުރާނެ ކަމުގެ ޔަގީންކަން އަހަރެންނަށް އޮވޭ. އެކަމަކު އަހަރެންގެ ދިރިއުޅުން ފެށިގެން މިހާ ހިސާބަށް މިއައީ އަހަރެން ދުވަހަކުވެސް އުންމީދު ކުރި ގޮތަކަށް ނޫން. އަހަރެންނަށް ފެނޭ އަހަރެންގެ އުމުރުގެ އެހެން ކުދިން އުޅޭ ގޮތްވެސް. އެކަމަކު އަހަރެންގެ ނަސީބުގަ އެހުރިހާ ކަމެއް ވާކަށް ނެތް. އެހެންވެ އަހަރެންނަށް ގޭގަ އަހަރެންނާމެދު ކަންތައްވާ ގޮތް ސިއްރު ކުރެވެނީ. ދެން ހުރީ މަންމަ…! އަހަރެންގެ މަންމައަކީ އަހަރެންނަށް ނަމަކަށް ހުރި މީހެއް. ބައެއްފަހަރު އަހަރެންނަށް އިހުސާސްވަނީ މަންމަ އަހަރެން މި ދުނިޔެއަށް އުފަންވާން ވެސް ބޭނުން ނުވާހެން. އެކަމަކު ކީއްކުރާނީ!!!  މީ ތަގުދީރުގަ އަހަރެންނަށް ހުރިގޮތް ” ވިދާން އަމިއްލަ ހާލަތު ޝުހާދާ ހިތްސާކުރިއެވެ.

” ކޮންމެ މީހެއްގެ ހަޔާތުގަ ވެސް ވާނެ ހިތްނޭދޭ، ފޭސްކުރަން ބޭނުންނުވާ ކަންތައްތަކެއް. އެއްވެސް މީހެއްގެ ހުރިހާ ކަމެއް ފުރިހަމައެއް ނުވާނެ ” ވިދާންގެ ވާހަކަ އަޑު އެހުމަށްފަހު ޝުހާދު ބުނެލިއެވެ. ” އަހަރެންގެ ވެސް މަންމަޔާ ބައްޕަގެ ހުރީ އަހަރެން އެކަނި. އެހެން މީހަކު ނެތް. ދެން ހުރީ ދާން. އެހެންވެ އަހަރެން ދާންއަށް އެއްވެސް ކަމެއް ސިއްރު ނުކުރަން ” ޝުހާދު ވާހަކަ ދައްކަމުން އެނދުން ތެދުވެގެން އައިސް ވިދާން ގާތުގައި އެނދު ކައިރީ ހުއްޓި ވިދާންގެ ކޮޑުމަތީ އަތްއަޅާލިއެވެ. ” ސޮރީ ބައްޔާ ” ޝުހާދު އައިސް ހުއްޓުމުން ވިދާން ޝުހާދަށް ބަލާލާފަ ބުނެލިއެވެ. އެވަގުތު ޝުހާދު ހީގަތެވެ. ” ހިންދީ ފިލްމް ބަލާކަން އެބައެނގޭ ” ޝުހާދު ވެސް ހީލަމުން ބުނެލިއެވެ. ” އިޓްސް އޯކޭ ޗޯޓޭ…! ” މިހެންބުނެ ޝުހާދު ވިދާން ބޮލުގެ ފުރަގަހުން އަތްހާކާލިއެވެ. ” ދެންތި ފަޔަށް ކިހިނެއް ހަދަނީ ” ޝުހާދު އަހާލިއެވެ. ” ކަމެއްކުރާނެ ކަމެއްނެތް. މިހެން ހުރެ ރަނގަޅު ވެދެާނެ ” ވިދާން ބުނެލިއެވެ. ހިނގާދާން ” ވިދާން އެނދުގައި ހަމަ ޖެހިލުމުން ޝުހާދު ބުނެލިއެވެ. ” ކޮންތާކަށް ދާން ” ވިދާން އަހާލިއެވެ. ” އަހަރުންގެއަށް ދާން. މަންމަ ބުނީ ދާން ގޮވައިގެން އަންނަން ” ޝުހާދު ބުނެލިއެވެ. ” ކީއްކުރަން އަހަރެން ދަނީ ” ވިދާން ބުނެލިއެވެ. ” ދެން ބޭކާރު ވާހަކަ ގިނަ ނުކޮށް ހިނގާބަލަ ” ޝުހާދު ވިދާންގެ އަތުގައި ހިފާ ދަމާލަމުން ބުނެލިއެވެ.