“އަހަރެންގެ ނިންމުން ބަދަލެއް ނުވާނެ މަސްޢޫދު ކޮންމެ ވާހަކައެއް ބުންޏަސް. ވަރަށް ބޮޑަށް މަޢާފަށް އެދެން މަސްޢޫދަށް އިންކާރު ކުރަން ޖެހުނީތީ…” ސާރިޔާ އެހެން ބުނެ އެ މޭޒުދޮށުން ތެދުވެ ދާން އުޅުނު ވަގުތު މަސްޢޫދުވެސް ތެދުވެލަމުން އޭނަގެ ނަމުން ގޮވާލިއެވެ. އެހިނދު އެ ދެމީހުންވެސް ހުއްޓުން އެރީ ސައި ކޮޓަރީގެ ދޮރުމަތީގައި ހުރި މަޒީދު ފެނުމުންނެވެ. މަޒީދު އެހެން ހުރެހުރެފައި ސާރިޔާއާއި ހިނިތުންވެލުމުން ސާރިޔާއަށްވެސް ޖެހިލުންވުމަކާއެކީ ހިނިތުންވުމެއް ދައްކާލެވުނެވެ. އެއާއެކު އޭނަގެ ޙަޔާތުގައި އެ ފެށިގެން ދިޔައީ އޭނަގެ ޙަޔާތުގެ އެންމެ އަނދިރި ބާބުކަން ސާރިޔާއަށް ރޭކާވެސްނުލައެވެ.
ސާރިޔާއަށް މަޒީދު ކަމުދާ ކަމުގެ ޔަޤީންކަމާއެކީ އޭނަ މަޒީދާއި އިންނަން ނިންމީ އިސްތިޚާރާވެސް ކުރުމެއްނެތިއެވެ. އިސްތިޚާރާ ކުރިޔަސް އޭނަ އިންނަން ބޭނުންވާނީ މަޒީދާއި ކަމަށް ޤަބޫލުކުރެވުނީތީވެއެވެ. ބޭނުންވާ ކޮންމެ ކަމަކުން އުފަލެއް ނުލިބިދާނެކަން ސާރިޔާއަށް އޭރު ދޭހައެއް ނުކުރެވެއެވެ. ނަތީޖާއެއްގެ ގޮތުން އޭގެ ދެދުވަހެއްހާ ދުވަސްފަހުން ސާރިޔާއާއި މަޒީދުގެ ކައިވެނި ކޯޓުގައި ކުރެވިގެން ދިޔައެވެ. މަޒީދު ބުނި ގޮތުގައި މަހީރާ މި ކައިވެންޏާއި ޤަބޫލު ވިޔަސް ކައިވެނި ކުރެވުނު ވާހަކަ ގިނަ މީހުންނަށް އަންގަން އުޅުމުން މަހީރާ ދެރަވާނެއެވެ. ދެމީހުންގެ ކައިވެނި ކުރެވުނު ވާހަކަ އޮފީސް ތެރޭގައިވެސް ނުދައްކަން މަޒީދު ސާރިޔާގާތު ބުނެލީ އެ ވާހަކަތައް ބުނެފައެވެ. އޭރު އަމިއްލަ އެދުންތަކުން ފޯވެފައިވި މަޒީދުގެ މަކަރުވެރިކަން ދެނެގަތުމުގައި ސާރިޔާ ނާކާމިޔާބުވިއެވެ. މަޒީދުގެ ބަސްތަކަށް ހެއްލި އެމީހުންގެ ކައިވެނީގެ ވާހަކަ ސިއްރުކޮށްގެން އުޅުނެވެ. އެ ވާހަކަ ސިއްރު ނުކުރެވުނީ އެންމެ މީހަކަށެވެ. އޭނައާއިމެދު ފިކުރު ބޮޑުވަމުން ދިޔަ މަސްޢޫދަށެވެ.
“މަޒީދު އަހަންނާމެދު ބަހައްޓާ ގާތްކަމާމެދު ސުވާލު އުފެއްދުމުގެ ޙައްޤެއް މިހާރު މަސްޢޫދަކަށް ނޯންނާނެ! އެއީ އަހަރެންގެ ފިރިމީހާ!” އެއްދުވަހު އޭނައާއެކީ އޮފީހުގެ ޢިމާރާތުން ނިކުންނަމުން މަސްޢޫދު ތަކުރާރުކޮށް މަޒީދު ސާރިޔާއާއި ގާތްވާ ގޮތާއިމެދު ސުވާލުތައް އުފައްދަން ފެށުމުން ސާރިޔާއަށް ބުނެލެވުނެވެ. ސާރިޔާ އެ ފަހު ބަސްތައް ބުނެލީ ސާބިތުކަމާއެކީ ކަމަށްވިޔަސް ފަހު ބަސް ބުނެލިއިރު އޭނަގެ އަޑު މަޑުވިއެވެ.
“ފިރިމީހާއޭ؟!” މަސްޢޫދު ފިޔަވަޅުތައް މަޑުޖައްސައި ތަންކޮޅެއް ހަރުއަޑުން އެހެން ބުނެލުމުން ސާރިޔާއަށް ފިޔަވަޅުތައް މަޑުޖައްސައި ނުރުހުންތެރިކަމާއެކީ މަސްޢޫދާއި ކުރިމަތިލެވުނެވެ.
“އާނ…..ފިރިމީހާ! ތިހާ ބާރަށް ތިހެން ނުބުންޏަސް ވާނެދޯ؟” ސާރިޔާއަށް ވަށައި ހޯދަމުން ބުނެލެވުނެވެ.
“ކިހިނެއްވީ ބާރަށް ބުނީމަ؟ މިއީ ސިއްރުކުރަންވީ ވާހަކައަކީތަ؟” މަސްޢޫދު ސުވާލުކުރިއެވެ.
“އާނ…..މަޒީދު ބުނީ އަދި މިވަގުތުގެ މަސްލަޙަތަށް ސިއްރުކުރުމޭ ރަނގަޅުވާނީ…” ސާރިޔާ މަސްޢޫދާއި ހަތަރުކަޅި ހަމަކުރުމެއްނެތި ބުނެލިއެވެ. އެއާއެކު މަސްޢޫދަށް އަސަރެއްނެތް ގޮތަކަށް ހީލެވުނެވެ.
“މަސްލަޙަތޭ؟ ކައިވެންޏެއްގެ ވާހަކަ ސިއްރުކޮށްގެން އޭނަ ހޯދަން އުޅެނީ ކޮންކަހަލަ މަސްލަޙަތެއްބާއޭ އަހަރެންގެ ހިތަށްއަރަނީ….ޙައިރާން އެބަވޭ ސާރިޔާ އެ ބަސްތަކަށް ހެއްލިގެން އުޅޭތީވެސް. އަހަރެން އަދިވެސް މި ބުނަނީ ސާރިޔާ! އެ ދަޅަތަކަށް ނުހެއްލި ހޭއަރާ. މާ ލަސްނުވަނީ ތި މަޅިން ސަލާމަތްވާންވީ ސާރިޔާ. ސާރިޔާއަށް ރަނގަޅަކަށް އަހަ….” މަސްޢޫދުގެ ވާހަކަ ފުރިހަމަ ނުވަނީސް ސާރިޔާ ވާހަކަ ދެއްކިއެވެ.
“މިހާރު ތިއުޅެނީ އަހަރެން މަސްޢޫދު ޚިޔާރު ނުކުރި ކަމުގެ ރުޅި ބާލަންދޯ؟ ފަހު ފަހަރަށް އަހަރެން ބުނެލާނަން މަސްޢޫދު. މަސްޢޫދު ކޮންމެ އެއްޗެކޭ ބުންޏަސް އަހަރެންގެ ޚިޔާލެއް ބަދަލެއް ނުވާނެ!” ސާރިޔާ ހަރުކަށި ގޮތަކަށް އޭނަގެ ފަހުގެ އެންގުން އަންގާލިއެވެ. އެއަށްފަހު މަސްޢޫދަށް އެއްޗެކޭ ބުނުމުގެ ފުރުޞަތެއްވެސް ނުދީ އޭނައަށް ފަސްދީފައި ދާން ހިނގައިގަތެވެ. އެ ހިނދު މަސްޢޫދު ފުން ނޭވައެއް ދޫކޮށްލަމުން ސާރިޔާއަށްޓަކައި ހުއްޓުމެއްނެތި ކަންބޮޑުވަމުން ދިޔަ ހިތަކާއެކީ ސާރިޔާއަށް ބަލަހައްޓައިގެން ހުއްޓެވެ. މަސްޢޫދުގެ އިޙްސާސްތައް ސާރިޔާއަށް ދޭހަ ނުކުރެވުނެއްކަމަކު އެވަގުތު އޮފީސް ޢިމާރާތުގެ ކައިރީގައި މަޑުކޮށްގެން ހުރި މަޒީދަށް ވެސް އެ އިޙްސާސްތަކުގެ ފުންކަން ދޭހަ ކުރެވުނެވެ. އެހެނަސް އޭނަ އެކަމާމެދު އަޅާނުލީ ސާރިޔާ އޭނަ ޚިޔާރުކުރީތީ ލިބުނު ކާމިޔާބީގެ އިޙްސާސާއި އެކީގައެވެ. އަދި ސާރިޔާ ކަހަލަ ރަނގަޅު އަންހެނަކު އޭނައަށް ލިބުނުކަމުގެ އުފަލާއި އެކީގައިވެސްމެއެވެ.
މަޒީދާއި ސާރިޔާގެ ޒަވާޖީ ޙަޔާތުގެ ކުރީކޮޅު އެ އުފާވެރިކަން ދެމީހުންނަށް ވެސް އިޙްސާސް ކުރެވުނެވެ. ކައިވެންޏަށްފަހު ސާރިޔާ އުޅެން ފެށީވެސް މަޒީދުގެ ނަންމަތީގައިވާ ޢިމާރާތްތަކުގެ ތެރެއިން ޢިމާރާތެއްގެ އެޕާޓްމެންޓެއްގައެވެ. މަޒީދު ކޮންމެ ދުވަހަކުހެން ސާރިޔާއާއި ބައްދަލުކުރަން އާދެއެވެ. މަޒީދު ސާރިޔާއާއެކީ ވަގުތު ހޭދަކުރަމުން ދިޔައީ އޭނަގެ އެހެން ޢާއިލާއެއް އޮތްކަން ހަނދާން ނައްތާލާފައޭ ބުންޏަސް ދޮގަކަށް ނުވާނެއެވެ. މަހީރާ ގޭގައި ހުންނަ ވަގުތު ސާރިޔާގެ ކައިރިއަށް ދިޔުމަށްޓަކައި މަހީރާ ގާތު ދޮގު ހެދޭ ދުވަސްތައް ވެސް ގިނަވާން ފެށިއެވެ. އަދި އަމުދުން މަހީރާ އޭނަ ކުރަމުން ދިޔަ އާ މަސައްކަތާއި ގުޅިގެން ބޭރު ޤައުމަކަށް ދުވަސްކޮޅަކަށް ދާން ޖެހުމުން މަޒީދު ސާރިޔާ ހުންނަ ގޭގައި ހުންނަ ވަގުތު މަހީރާ ގުޅުމުން ވެސް މަހީރާއަށް ދޮގު ހަދަމުން ދިޔައެވެ. ފަހުންފަހުން އައިސް މަޒީދު އެ ހެދެނީ ގޯހެއްކަމުގައި ވެސް ނުދެކެއެވެ. އޭނަގެ ދަރިފުޅު މައުވާއަށް ވެސް އޭނަ ނުފެނި ދާ ދުވަސްތައް ގިނަވުމުން މައުވާއަށް ވެސް އޭނަ ޙަޤީޤަތް އޮޅުވާލީ ޖެހިލުންވުމެއްނެތިއެވެ. ފަހަކަށް އައިސް މައުވާ ބެލުމަށްޓަކައި ވަޒީފާ ދީފައި ހުންނަ އަންހެން ކުއްޖާ ގެއަށް ނުގޮސް ހުންނަން ޖެހޭ ދުވަސްތައް ގިނަވިއެވެ.
ދުވަސްތައް މިގޮތަށް ފާއިތުވަމުން ދަނިކޮށް ސާރިޔާ ބަލިވެއިނެވެ. ބަލިވެއިން ޚަބަރު ލިބުމުން ސާރިޔާއާއެކީ މަޒީދުވެސް އުފާކުރީ އަލަތު ކުއްޖަކު ލިބެން އުޅޭ ފަދައަކުންނެވެ. ދެމީހުންގެ ދެމެދުގައި ލިބޭނެ ދަރިފުޅެއްގެ އުއްމީދާއި އެ ދަރިފުޅަށް ދެވޭނެ ނަމާއި އެ ދަރިފުޅަށްޓަކައި ކުރާނެ ކަންތައްތަކާއިމެދު ވެސް ވާހަކަ ދެކެވެން ފެށިއެވެ. އެހެނަސް މި ވާހަކަތައް ވެސް ދެކެވުނީ ހަމައެކަނި އެ ދެމީހުންގެ ދެމެދުގައެވެ. މަޒީދުގެ އެދުމަށް ސާރިޔާ އޭނަ ބަލިވެއިން ވާހަކަ ވެސް އޮފީހުގައި އުޅޭ އޭނަގެ އެކުވެރިންނަށް ވެސް ފޮރުވިއެވެ. އޮފީހުގައި އުޅޭ ވަގުތު ހޮޑުލެވުމާއި މޫނަށް އަނދިރިވުން ފަދަ ކަންތައް ދިމާވުމުން އޭނައަށް ކޮންމެވެސް ނުބައި އެއްޗެއް ކެވުމުގެ ބަހަނާ ދައްކަމުން ދިޔައީ މަޒީދު އެ ބުނާ ‘މަޞްލަޙަތަށް’ޓަކައެވެ. އެހެނަސް ޙަޤީޤަތުގެ ކުޑަވަރެއްގެ ހިލަމެއް ލިބިފައިވި މީހަކަށް މަސްޢޫދުވިއެވެ. މަސްޢޫދު މިފަހަރު ވެސް ސާރިޔާއާއި ވާހަކަ ދައްކަން ބޭނުންވިއެއްކަމަކު އޭނަ އެހެން ނެހެދީ ސާރިޔާ އޭނަގެ ވާހަކަ އަޑު ނާހާނެކަން ދަނެގެންނެވެ. އަދި ސާރިޔާ ބުނިހެން އޭނައާއި މަޒީދުގެ ގުޅުމަށް ފާޑުކިޔުމުގެ ޙައްޤެއް އޭނައަށް ލިބިގެން ނުވާކަމަށް ޤަބޫލުކުރަމުން ވެސްމެއެވެ.
ހުރިހާކަމެއް މަޒީދު ބޭނުންވިހެން އޮމާންކޮށް ކުރިއަށް ދަނިކޮށް ކަންތައް އެފުށްމިފުށަށް ޖެހިގެން ދިޔައީ މައްސަރެއްހާ ދުވަސްފަހުން މަހީރާ އަނބުރާ މާލެ އައުމުންނެވެ. މަހީރާ އަނބުރާ އައިސްގެން އުޅުނު ފުރަތަމަ ދުވަސްކޮޅުވެސް މަޒީދު އާދައިގެ މަތިން އޭނައާއި ސާރިޔާގެ ގުޅުން ސިއްރުކޮށްގެން އުޅުނެވެ. އޮފީސް ތެރެއިން ސާރިޔާ ފެނިފައި ސާރިޔާއަށް ބަދަލެއް އައިކަން ފާހަގަވެ މަހީރާއަށް ވެސް ނިންމުމެއް ނިންމުނެއްކަމަކު ސާރިޔާއަކީ ނުބައި އަންހެނެއްކަމަށް އޭނައަށް ހީކުރެވިފައި ނުވުމުން އެއީ އޭނައަށް ހީވި ހީވުމެއްކަމަށް ނިންމުނެވެ. އެހެނަސް އެ ސިއްރު މަހީރާއަށް ފަޅާއެރީ މަޒީދު ސާރިޔާ ގޮވައިގެން ހޮސްޕިޓަލަށް ދިޔަ ދުވަހެއްގައެވެ. އެދުވަހު ބަލިވެ އުޅުނު މައުވާ ގޮވައިގެން މަހީރާ ހޮސްޕިޓަލަށްދާން ނިންމާފައިވި ކަމެއް މަޒީދު ނުދެނެހުއްޓެވެ. 5 އަހަރުގެ މައުވާއާއި އެކީ ރިސެޕްޝަން ދޮށުގައި ހުރި މަހީރާއަށް މަޒީދާއި ސާރިޔާ އެކީގައި ހެމުން ވާހަކަ ދައްކަމުން ދިޔަ މަންޒަރު ފެނިފައި އޭނަ ހުއްޓުންއަރާ ގޮތްވިއެވެ. މަޒީދު އަތުން ފެނުނު ފޯމުން ހުރި ކަމެއް ދޭހަކުރެވުމާއެކު ހިތަށްވެރިވި ޖަޒުބާތުތަކަށް ކެތް ނުކުރެވުމުން މަހީރާއަށް އަޑުގެ ކޮޅަށް ހަޅޭއްލެވުނެވެ.
“މަޒީދު!!!” މަހީރާގެ އެ އަޑަށް މަޒީދާއި ސާރިޔާގެ އިތުރުން ހޮސްޕިޓަލުގެ އެ ފްލޯގައި ތިބި އެހެނިހެން މީހުންގެ ނަޒަރުތައް ވެސް އޭނައަށް އަމާޒުވެގެން ދިޔައެވެ. މަހީރާ ހިތާމަވެރިކަމާއި ރުޅިވެރިކަން އެކުލެވޭފަދަ މޫނަކާއެކީ އެދެމީހުންނަށް ބަލަން ހުރިއިރު އޭނަ ތުރުތުރު ވެސް އެޅިއެވެ. މަޒީދާއި ސާރިޔާ ބުނާނެ އެއްޗެއް ނޭނގި ހުއްޓުން އަރާފައި ތިއްބާ އޭނަ މައުވާގެ އަތުގައި ހިފައިގެން ގޮސް އެމީހުންނާއި ކުރިމަތިލިއެވެ.
“މިއީ ކޮންކަމެއް؟!” މަހީރާ އެދެމީހުންނަށް ވަކިވަކިން ބަލަން ކުށްވެރިންނާއި ސުވާލުކުރާ ފަދައަކުން ސުވާލުކުރިއެވެ.
“މިއީ….މަހީރާ…ސާރިޔާ ކުޑަކޮށް ބަލިވެ އުޅޭތީ ޑޮކްޓަރަށް ގެންދާނެ މީހަކު ނެތީމަ އަހަރެން…” މަޒީދުގެ ވާހަކަ ފުރިހަމައެއްނުވިއެވެ.
“ކުޑަކޮށް؟ ކުޑަކޮށް ބަލިވީމަތަ މި ފޯމު ހިފައިގެން ތިއުޅެނީ؟ މިކަހަލަ ފޯމެއް ހިފައިގެން މަޒީދު ސާރިޔާއާއެކީ ހިނގާފައި ދާންވީ ސަބަބަކާމެދު ސުވާލުކޮށްލަންތަ؟!” މަހީރާ ހަރުއަޑުން ވާހަކަ ދެއްކިއެވެ. މަޒީދު އެއަށްވެސް ރައްދެއްދޭން އުޅުނު ވަގުތު ސާރިޔާ އޭނައަށްވުރެ ކުރިން ވާހަކަ ދެއްކިއެވެ.
“މަހީރާއަށް ވެސް މިހާރު އެނގޭނެ އަހަންނަކީ ވެސް މަޒީދުގެ އަންބެއްކަން. މިކަން މިގޮތަށް ނުވާނެކަމަށް ހީކޮށްގެންތަ މަހީރާ މަޒީދާއި އަހަރެން އިނުމަށް ޤަބޫލުވީ؟” ސާރިޔާ ހިތުން އެ ވާހަކަ ބުނެލީ ހުރިހާ ކަމެއް ޙައްލުކުރުމުގެ ނިޔަތުގައެވެ. އެހެނަސް އޭނަ އެހެން ބުނުމާއެކު މަހީރާއަށް ލިބިގެން ދިޔަ ދެވަނަ ޝޮކާއެކީ އޭނައަށް ދެލޯ ބޮޑުވެފައިހުރެ މަޒީދަށް ބަލާލެވުނީ ޤަބޫލުކުރަންވެސް ދަތިވެފައި ހުރެއެވެ. ކަރުނުން ފުރެން ފެށި ދެލޮލާއެކީ ވެސް އެމީހުންގެ ކުރިމަތީގައި ނުރޯން މަހީރާ ވަރުގަދަ ޢަޒުމެއް ކަނޑައެޅިއެވެ. ކަރުނަތައް އޭނަގެ ލޮލުން ފޭބުމުގެ ކުރިން އޭނަ އައިސްފައިވި ރުޅިއާއެކީ އޭނަގެ ދަރިފުޅުގެ އަތުގައި ހިފައިގެން އެތަނުން ދާން ހިނގައިގަތީ އެހެންވެއެވެ.
އެރޭ މަޒީދު ގެއަށް އައުމާއެކު މަހީރާއާއި އޭނައާއި ދެމެދު ހޫނު ޒުވާބެއް ހިނގިއެވެ. މަހީރާ އޭނަގެ ހިތުގައި އުފެދުނު ހުރިހާ ޝަކުވާއެއް ބަންޑުންކުރިއެވެ. އޭނައަށް އެހާބޮޑު އޮޅުވާލުމެއް އޮޅުވާލުމުގެ ޝަކުވާއެވެ. އޭނައަށާއި މައުވާއަށް ވެސް ދޮގު ހެދިކަމުގެ ޝަކުވާއެވެ. އޭނަ ހުއްޓާ އެހެން އަންހެނަކާމެދު ޚިޔާލުކުރިކަމުގެ ވެސް ޝަކުވާއެވެ.
“ހިތަށްއަރަނީ އަހަރެން ކިބައިގަ ނެތް ކޮންކަމެއްހޭ އެ ސާރިޔާ ކިބައިގަ ހުރީ؟! އޭނައަށްވުރެ ރީތިވެފަ ބޮޑު މުސާރައެއްވެސް ލިބެނީ ހަމަ އަހަންނަށޭ. އޭނައަށްވުރެ ރަނގަޅު ސިކުނޑިއެއްވެސް ހުރީ އަހަރެންގެ…..ހިތަށް އެބައަރާ އޭނަގެ ވެސް ވަރޭ. ބޭރުފުށުން މާ ޞޯލިހުވެގެން އެހެން މީހުންގެ ފިރިންގެ ފަހަތުން ދުވަން.” މަހީރާ ހަރުއަޑުން ވާހަކަ ދެއްކިއެވެ. އެހިނދު މައުވާވެސް ކޮޓަރީގެ ދޮރު ކަނީގައި ހިފަހައްޓައިގެން ސިޓިންގް ރޫމުގައި ތިބި އޭނަ މަންމައާއި ބައްޕައަށް ފެންކަޅިވެފައިވާ ދެލޮލާއެކީ ބަލަން ހުއްޓެވެ. އޭނައަށް ހިތާހިތުން މަންމަގެ ކޮޅު ނެގެމުން ދިޔައީ ވޭތުވެދިޔަ ދުވަސްތަކުގައި ބައްޕަ އޭނައާއި ދުރުވެފައިވި މިންވަރުންނެވެ. އަދި މިއަދު މަންމައަށް ރޮވުނީ ބައްޕަ ގޯހެއް ހެދުމުންކަން ޔަޤީނާއި ގާތްވުމުންނެވެ. އެވަގުތުވެސް ބައްޕަ މަންމަ ކައިރި ހުއްޓާލަން ބުނުމެއްނެތި މިއަދު ފެނުނު އަންހެން މީހާއަށްޓަކައި އަޑު އިސްކުރަމުން ދިޔަގޮތުން މައުވާގެ ހިތުގައި ބައްޕައަށްޓަކައި ނަފްރަތެއް އުފެދެން ފެށިއެވެ.
“މަހީރާ! ސާރިޔާއަކީ ލަދުކުޑަ އަންހެނެއްނޫން! އަހަރެން ސާރިޔާއާއި އިނީ މަހީރާއާއި ޚިލާފަށް ސާރިޔާ ތިގޮތަށް އަހަރެންގެ ކުރިމަތީގަ އަޑު ނުއުފުލާނެތީ. މަހީރާހެން ހުރިހާ އަންހެނުންނަކީ ޤަދަރު ނުކުރަން ދަންނަ ބައެއްނޫނޭ. ސާރިޔާއާއެކީ އުޅުނީމަ އަހަންނަށް އިޙްސާސްވީ ފިރިމީހާދެކެ ލޯބިވާ އަންބެއްގެ ފަރާތުން ލިބޭނެ އޯގާތެރިކަން!” މަޒީދު ހަރުއަޑުން ހިތުން އެހެން ބުނެލީ މަހީރާ އިޞްލާޙުވާނެކަމަށެވެ. އެހެނަސް އޭރު އޭނައަށް ނޭނގުނު ކަމަކީ އެއިން މަހީރާގެ ހިތަށް ލިބިފައިވި ޒަޚަމްތައް ގޯސްވުން ނޫންކަމެއް ނުވާނެކަމެވެ. މަޒީދު އޭނައާއި ސާރިޔާ އަޅާ ކިޔާލި ގޮތުންވީ ދެރައިގައި މަހީރާގެ ލޮލަށް ކަރުނަތައް ޖަމާވިއެވެ. އެހެނަސް ރުޅީގެ އަލިފާނެއްގެ ރޯވަމުން ދިޔަ އޭނަގެ ކިބުރުވެރި ހިތް ގޮވަން ފެށީ އޭނައަކީ މީހެއްގެ ކުރިމަތީގައި ބަލިކަށިވާނެ މީހެއް ނޫންކަމަށެވެ. އޭނައަކީ ކޮންމެހެން ވެސް އޭނަ ބޭނުންވާ ގޮތް ލިބިގަންނަ މީހެއްކަމަށެވެ. ސިކުނޑިއަށް ވެރިވި އެ ޚިޔާލާއެކީ އޭނަގެ އެ ސިކުނޑި ރާވަން ފެށީ އޭނަ ދުވަހަކުވެސް ނުރާވާ ޒާތުގެ ރޭވުންތަކެވެ. ސާރިޔާއަށް ބަދަލު ހިފައި މަޒީދަށް އޭނަގެ ގޮތް އޭނައަށް ދެއްކިދާނެކަމަށް ހިތް ބުނެލި ވަގުތު މަހީރާއަށް އަސަރެއްނެތް ގޮތަކަށް ހީލެވުނެވެ. އެހިނދު ޙައިރާންކަމެއް ލިބިގެން ދިޔަ މަޒީދަށް އޭނައަށް ބަލަހައްޓައިގެން ހުރެވުނެވެ. އިރުކޮޅެއްފަހުން މަހީރާ މަޒީދަށް ސީރިއަސްކަން އެކުލެވިގެންވި ސާބިތު ނަޒަރެއް ދެމުން ވާހަކަ ދެއްކިއެވެ.
“ހީނުކުރާތި މަ މަޒީދުގެ ކުރިމަތީގަ ރޯނެކަމަށް…..މަށަކީ މަހީރާ! މަހީރާ އެއްވެސް މީހެއްގެ ކުރިމަތީގަ ކުޑަކަކުލެއް ނުޖަހާނެ! މަޒީދު ހަދާނީ އަހަރެން ބުނާގޮތަށް! މިއަދުން މިއަދަށް މަޒީދު ސާރިޔާ ވަރިނުކުރިއްޔާ މަށަށްވުރެ ނުބައި މީހެއް ނުހުންނާނެ!” މަހީރާ ރުޅިވެރިކަމުން ފުރިފައިވި ހިތަކާއެކީ ހަރުއަޑުން އަންގާލިއެވެ. އޭނަ އެ ބުނި ބުނުމާއެކީ އޭނަގެ ކޮޅު ނަގަމުން ދިޔަ މައުވާގެ ހިތުގައި ވެސް އެފަދަ އިޙްސާސްތަކެއް އުފެދެން ފެށިއެވެ. މަންމަ އެ ހަދަނީ ރަނގަޅަށްކަމަށް ޤަބޫލުކުރެވެން ފެށިއެވެ. މިފަހަރު މަހީރާ ބުނެލި ބަސްތަކަށް މަޒީދު އަސަރެއްނެތް ގޮތަކަށް ހީލިއެވެ.
“ވަކި ބޭރުގެ ޖަމުޢިއްޔާއަކާ ގުޅުނީމަ އަހަންނާ ކުޅެވޭނެ ކަމަށްތަ މަހީރާ ތި ހީކުރަނީ؟ ތިހެން ހީވާ ކަމަށްވަންޏާ ތިއީ ވަރަށް ބޮޑު ކުށްހީއެއް. ތި ބޭކާރު ވާހަކަ ނުދައްކާ އަހަރެން މަހީރާ ވަރި ނުކުރާ ކަމަށްޓަކައި ޝުކުރު ކޮށްގެން ހުރިއްޔާ ރަނގަޅުވާނީ!” މަޒީދު އެހެން ބުނެ މަހީރާއަށް ފަސްދީފައި ދާން ހިނގައިގަތެވެ. އެހެނަސް އޭނައަށް މާ ދުރަށް ނުދެވެނީސް މަހީރާ ބުނެލި ވާހަކައިން މަޒީދުގެ ފިޔަވަޅުތައް މަޑުޖެހުނެވެ.
“އަހަރެން ސަލީމްގެ ޕާޓީއަށް ސޮއިކޮށްފިން.” މަހީރާ އަންގާލިއެވެ. އެއާއެކު މަޒީދަށް ހީވީ އޭނަގެ މުޅި ދުނިޔެ ހުއްޓުމަކަށް އައީހެންނެވެ. ސަލީމަކީ އޭރު މުޅި ރާއްޖޭގައިވެސް ހުރި އެންމެ ބާރުގަދަ ސިޔާސީ ލީޑަރޭ ބުންޏަސް ދޮގަކަށް ނުވާނެއެވެ. ކުރިއަށް އޮތް ރިޔާސީ އިންތިޚާބުގައި އޭނަ ހޮވޭނެކަމުގެ ވަރަށް ބޮޑު ފުރުޞަތެއް އޮތްކަމަށް ގިނަ ބަޔަކު ޤަބޫލުކުރެއެވެ. ސަލީމް އަދި ރައީސްކަމަށް ހޮވިފައި ނުވާއިރު ވެސް އޭނަ ސުވާލު އުފެދޭ އެކި ގޮތްގޮތުން ހޯދާފައިވާ މުއްސަނދިކަމުގެ ސަބަބުން އޭނައަކީ ބާރުގަދަ ޝަޚްޞިއްޔަތެކެވެ. އަދި އެ މުއްސަނދިކަމުގެ ބޭނުން ހިފައި އޭނައަށް ފުލުހުންނަށާއި ޝަރުޢީ ދާއިރާއަށް ވެސް ބާރު ފޯރުވެއެވެ. އަދި އަމުދުން އޭނަ ފަންޑުކޮށްގެން ގެންގުޅޭ ގޭންގުތަކުގެ ސަބަބުން އޭނައާއި ދެކޮޅުވާން ޚިޔާލުކުރާ މީހަކުވެސް ޖެހިލުންވާނެއެވެ. ސަލީމްގެ އެންމެ ޢިޝާރާތަކުން ވެސް އެމީހެއްގެ ނިމުން އައިސްދާނެތީވެއެވެ.
މަހީރާ އެފަދަ ނުރައްކާތެރި މީހަކާއި ގުޅުމުން މަޒީދުވެސް ޖެހިލުންވާ ގޮތްވީ އެހެންވެއެވެ. ސަލީމް ފަދައިން މަހީރާއަކީ ވެސް އޭނަ ރުޅި އަންނަ މީހަކަށް އެ ރުޅި ބާލަން ކޮންމެ ފަދަ ދަރަޖައަކަށް ވެސް ގޮސްދާނެ މީހެއްކަން މަޒީދަށް އެނގޭތީވެއެވެ. ސާރިޔާއަށްޓަކައި ކަންބޮޑުވި ހިތަކާއެކީ މަޒީދު ފަސްއެނބުރި މަހީރާއަށް ބަލައި އެއްޗެކޭ ބުނަން އުޅުނު ވަގުތު މަހީރާ ވާހަކަ ދެއްކިއެވެ.
“ސާރިޔާ ވަރިކުރަން އަހަރެން މަޒީދަށް ދޭނީ އެންމެ ދުވަހެއްގެ މުއްދަތެއް. އޭނަ ވަރިކޮށްފަ އެންމެންނަށް އަންގާ އޭނަގެ ބަނޑުގަ އެއޮތީ ތިމަންނަގެ ދަރިއެއްނޫނޭ! މިހެން ހެދީމަ ނޫނީ މަގޭ ހިތަކަށް ހަމަޖެހުމެއް ނުލިބޭނެ!” މަހީރާ އަންގާލިއެވެ.
“އެހެން ނެހެދިއްޔާ ކީއްކުރާނީ ކަލޭ؟ އަހަރެން މަރާލާނީ؟” މަޒީދު މަހީރާގެ ކައިރިއަށް ޖެހިލަމުން ސުވާލުކުރިއެވެ.
“އުނހު! އަހަރެން ކަލެއަށް ކިތަންމެ ރުޅިއަޔަސް މައުވާގެ ބައްޕަ އަހަރެން މަރާނުލާނަން. މެރިއްޔާ މަރާނީ އެ ސާރިޔާއާއި އޭނަގެ ބަނޑުގަ އޮތް ދަރިފުޅު!” މަހީރާ ރުޅިން ރަތްވެފައިވި ދެލޮލާއެކީ ބުނެލި ވާހަކައިން މަޒީދުގެ ހިތް ރޫރޫ އަޅައިގެން ދިޔައެވެ. އޭނަ ހުރިގޮތަށް ބަލަހައްޓައިގެން ހުއްޓާ މަހީރާ އޭނައަށް ފަސްދީފައި ދާން ހިނގައިގަތެވެ.
އެދުވަހުގެ އެވަގުތުން ފެށިގެން ވެސް ސާރިޔާގެ ރައްކާތެރިކަން އިތުރުކުރުމުގެ މަސައްކަތް ފެށިއެވެ. އޭނައާއި ސާރިޔާގެ ކައިވެނީގެ ވާހަކަ މަހީރާއަށް ފޮރުވިކަން އެނގުނު ދުވަހަށްފަހު ސާރިޔާވެސް ހުންނަނީ މަޒީދަށް ނުރުހުންވެފައެވެ. އެތައް ފަހަރެއްގެ މަތިން އޭނަ ވަރިކުރުމަށްވެސް މަޒީދުގާތު އެދެވުނެވެ. އެހެނަސް މަޒީދު އިންކާރު ކުރަމުން ދިޔަ ގޮތުން ސާރިޔާއަށް މަޒީދުގެ ގައިގައި އޮޅުލައިގަނެވެނީ އޭނަގެ ދަރިފުޅާއިމެދު ވެސް ވިސްނަމުންނެވެ. އޭނަގެ ދަރިފުޅު ބައްޕައަކާއި ނުލައި ބޮޑުކުރަން އޭނަ އެއްގޮތަކަށް ވެސް ބޭނުމެއްނުވާތީވެއެވެ. މަޒީދު މަހީރާއަށް އެހާ ބޮޑު އޮޅުވާލުމެއް އޮޅުވާލީތީ މަޒީދަށް ނުރުހުންވިޔަސް މަޒީދާއެކީ ހުންނަން ނިންމުނީ ހަމައެކަނި ދަރިފުޅަށްޓަކައެވެ.
މަޒީދު ވަކިގޮތެއް ނިންމުމަށް މަހީރާ ދިން އެއްދުވަސް ފާއިތުވެގެން ދިޔައީ މަޒީދުގެ ހިތް ބިރުވެރިކަމުން ވަށާލަމުންނެވެ. އޭނަ ސާރިޔާ އުޅޭ ޢިމާރާތުގެ ސެކިއުރިޓީ ވަރުގަދަކޮށް ސާރިޔާގާތު އެކަނި ބޭރަށް ނުދިޔުމަށް ބުނަމުން ދިޔައީ މަހީރާގެ ރޭވުން ސާރިޔާއަށް ފޮރުވަމުންނެވެ. އޭނަ ހިތުން އެކަންތައް ކުރަމުން ދިޔައީ އޭނައަށް މަހީރާ ބުނާ ގޮތަށް ހެދުމެއްނެތި ރެކޭނެ ކަމަށް ނިންމައިގެންނެވެ. އެހެނަސް މަހީރާގެ ޙަމަލާއެއް ސާރިޔާއަށް އަމާޒުވެގެން ދިޔައީ އޭނަ ހީވެސް ނުކުރާ ފަދައަކުންނެވެ. އެއްދުވަހު އޭނަ އޮފީހުން ލަހުން ނިމޭތީ އޭނަ ސާރިޔާ ގެއަށް ފޮނުވުމަށްޓަކައި އޭނަ ދަންނަ ޓެކްސީއަކަށްލިއެވެ. އެހެނަސް މަޒީދަށް ނޭނގުނުކަމަކީ އެ ޓެކްސީގައި ހުރީ ސަލީމް ގެންގުޅޭ ގޭންގެއްގެ މީހެއްކަމެވެ. އެ މީހާ ސާރިޔާއާއެކީ ބާރަށް ދުއްވާފައި ގޮސް ފަހަތުގައި އިން ސާރިޔާއަށް އަނިޔާވާނެ ފަދައަކުން ކާރުގެ ފަހަތު ބައި ހޮޅި ދަނޑިއެއްގައި ޖެއްސިއެވެ. އެކްސިޑެންޓުގެ ވާހަކަ އިވުމާއެކު މަޒީދު ބިރުގެންފައިވި ހިތަކާއެކީ ސާރިޔާ ބަލަން ހޮސްޕިޓަލަށް ދިޔައެވެ. އެދުވަހު ނަސީބު ރަނގަޅުކަމުން ސާރިޔާއަށް މާ ބޮޑު އަނިޔާތަކެއްނުވެ ސާރިޔާއާއި ދަރިފުޅުގެ ޙާލަތުވެސްވީ ރަނގަޅަށެވެ.
އެ ޙާދިސާއަށްފަހު ވެސް މަޒީދު ބަލި ޤަބޫލުކުރާކަށް ބޭނުމެއްނުވިއެވެ. އެ ޙާދިސާއަށްފަހު ވެސް އޭނަ އައި ރުޅި މަހީރާއަށް ބޭލުމަށްފަހު އޭނަ ހުރީ ގޮތް ދޫ ކުރާ ގޮތަކަށް ނޫނެވެ. އެހެނަސް ދެން ފެށިގެން ދިޔައީ ސާރިޔާއަށް އެކިއެކި އަނިޔާތައް ލިބުމުގެ ސިލްސިލާއެކެވެ. މަހީރާ މަޒީދުގާތު އޭނައާއެކީ ގިނަ ވަގުތު ހޭދަކޮށްފިނަމަ މި މައްސަލަތައް ޙައްލުވާނެ ކަމަށް ބުންޏެއްކަމަކު އެ ވެގެން ދިޔައީ ދައްކާލެވުނު ދަޅައަކަށެވެ. ސާރިޔާ އެކަނިމާއެކަނި ފައިމަގުގައި ގެއަށްދާ ދުވަސްތައް ގިނަވެގެން ދިޔަދިޔަހެން އެ މަގުމަތީގައި އޭނައާއި ބެހި އޭނަގެ ގަޔަށް އަތްލާ ފިރިހެނުންގެ ޢަދަދުވެސް ގިނަވެގެން ދިޔައެވެ. އެއްރެއަކު އޭނައަށް މަރުގެ އިންޒާރުތައް އަންނަ ފޯނު ކޯލުތައް އައިއްޔާ އަނެއްރެއަކު އޭނަ ނިދަން އޮންނަ ވަގުތު މީހަކު އައިސް އޭނަގެ ކަރުގައި ހިފާލާނެއެވެ. ސާރިޔާ މި ވާހަކަތައް މަޒީދަށް ނާންގާ ހުރީ މަޒީދަށް އަންގައިފިނަމަ ޙާލަތު އިތުރަށް ގޯސްވެދާނެ ކަމުގެ ބިރުވެސް އެމީހުން އޭނަގެ ހިތަށް ވައްދާފައިވީތީވެއެވެ. މަހީރާއަށް ގިނަ ވަގުތު ދޭންފެށި މަޒީދަށް މިކަންތަކާމެދު ރޭކާވެސް ލީ އެއްދުވަހެއްގެ ހެނދުނު ސާރިޔާ ވަކި ސަބަބެއް އެންގުމެއްނެތި އޮފީހަށް ނާންނަ ވާހަކަ އިވުމުންނެވެ. މަޒީދު ވަގުތުން ސާރިޔާގެ ޙާލު ބެލުމަށްޓަކައި ސާރިޔާ އުޅޭ އެޕާޓްމެންޓަށް ދިޔައެވެ. ގޮސް ބެލިއިރު ސާރިޔާ އޭނަގެ އެނދުމަތީގައި ހޭނެތިފައި އޮތްއިރު އޭނަގެ ކަރާއި ދިމާލުން ރަތްކުލައިގެ ނިޝާންތައް ފެންނަމުން ދިޔަގޮތުން މަޒީދުގެ މޭގަނޑު އަތަށްއައެވެ. މަޒީދު ވަގުތުން ސާރިޔާ ހޮސްޕިޓަލަށް ގެންދިޔައީ ސާރިޔާގެ ފުރާނަ ސަލާމަތް ކުރެވޭތޯއެވެ. ނަސީބު ރަނގަޅުކަމުން އެރޭ ސާރިޔާއަށް ޙަމަލާ ދިން މީހަކު އައީ ސާރިޔާގެ ދުވަސް ދުއްވާލާކަށް ނޫނެވެ. ހެދުނު ޓެސްޓްތަކުން ސާރިޔާއަށް ހޭނެތޭ ފަދަ މާއްދާއެއްގައި ވަސްބެލިފައިވަނީކަމަށް ޑޮކްޓަރުން ބުނުމުން އެ ވީގޮތް މަޒީދަށް ނަގައިގަނެވުނެވެ. ސާރިޔާ ހޭއެރިތަނާހެން މަޒީދު ފެނުމާއެކު ސާރިޔާ މަޒީދު ގައިގައި އޮޅުލައިގަތެވެ. އަދި އެ ހުރިހާ ދުވަހު އޭނައަށް ދިމާވިހާ ކަންތައް އެއްފަހަރާ މަޒީދަށް ކިޔައިދިނީ ކެތް ނުކުރެވުނު ހިތެއްގެ ސަބަބުންނެވެ. މަހީރާ އޭނައަށް އޮޅުވާލީކަން އެނގުންވީ ހިނދު މަޒީދު ރުޅިއައެއްކަމަކު އޭނަ ދެންވީ މަހީރާ އެދޭ ގޮތަށް ކަންތައް ކުރަންކަން އޭނައަށް އެނގުންވިއެވެ. އެހެންކަމުން މަހީރާގެ އެހެން އެދުމަކަށް ބޯ ނުލެނބިޔަސް ސާރިޔާ ވަރިކުރަން އޭނަ ނިންމީ އެހެންވެއެވެ.
“ސާރިޔާ….ހިނގާ ދެމީހުން ވަރިވާން.” ހަމަ އެދުވަހު ސާރިޔާ ބޭއްވިފައި އޮތް ޕްރައިވޭޓް ވޯޑުގައި އިނދެ މަޒީދަށް ބުނެލެވުނެވެ. އެއާއެކު ސާރިޔާ ހުއްޓުން އަރާފައި އޭނައަށް ބަލަހައްޓައިގެން އިނެވެ.
“އެ….އެއީ ކީއްވެ މަޒީދު؟ އަ…އަހަރުމެންގެ ދަރިފުޅު…އެހެން ނަހަދާ މަޒީދު!” ސާރިޔާ ކުރީކޮޅު ޙައިރާންކަމާއެކީ ވާހަކަ ދައްކަމުން ގޮސް ދަރިފުޅު މަތިން ހަނދާންވުމުން ރޮއިގަންނަމުން އެދެވުނެވެ.
“އެއީ ދެން ހެދެން އޮތް އެންމެ ރަނގަޅު ގޮތަކީ ސާރިޔާ….ސާރިޔާއަށް ތި ލިބެމުންދާހާ އަނިޔާއަކީ އަހަންނާއެކީ އުޅޭތީ ލިބޭ އަނިޔާތައް. މިވަގުތަށް ދެމީހުން ވަކިވުން އެންމެ ރަނގަޅުވާނީ ސާރިޔާ. އަހަރެން އަނބުރާ ސާރިޔާ ގާތަށް އަންނާނަން އަހަރުމެންގެ ދަރިފުޅު އުފަންވީމަ….” މަޒީދު ބުންޏެވެ. ސާރިޔާ އެއަށްފަހު ވެސް ރޮއިރޮއިފައި މަޒީދުގާތު އެތައް އާދޭހެއްކުރިއެވެ. އެހެނަސް މަޒީދު އެވަގުތުން ވަގުތަށްވެސް ސާރިޔާ ވަރިކޮށްފައި ދިޔުމުން ސާރިޔާއަށް ގަބުވެފައި އިނދެވުނެވެ. މަޒީދު ހިތުން އެދުވަހު އެތަނުން ނިކުމެގެން ދިޔައީ ހަމަ ޙަޤީޤަތުގައި ވެސް ސާރިޔާގާތަށް އަނބުރާ ދިޔުމުގެ ނިޔަތުގައެވެ. އެހެނަސް ދެންވެސް ކަންތައްވެގެން ދިޔައީ މަޒީދު ހީވެސް ނުކުރާ ފަދައަކުންނެވެ.
އޭގެ އަނެއްދުވަހު މަޒީދު އޮފީހުގައި އިންދާ އޭނައާއި ބައްދަލުކުރަން މީހަކު އައެވެ. އޭނަގެ ކެބިންއަށް އެ މެހުމާނަކު ފޮނުވުމަށް ބުނިތާ މާ ގިނައިރެއްނުވެ ކެބިންގެ ތެރެއަށް ވަދެގެން އައި މީހަކު ފެނިފައި މަޒީދުގެ ދެލޯ ބޮޑުވިއެވެ. އެއީ ކޯޓު ފަޓުލޫނުގައި ޓައި އަޅައިގެން ހުރި ސަލީމް ނޫން ދެވަނަ މީހެއްނޫނެވެ. ތުނިކޮށް ކޮށާލެވިފައިވި އިސްތަށިގަނޑާއި ހަތަރެސްކަން ބައްޓަމަށްވި މޫނާއި ބިޔަ ކަސްރަތީ ހަށިގަނޑުގެ އިތުރުން ހިނގާފައި އައި ގޮތުން ހައިބަތު ހުރިކަމަށް ދައްކައެވެ. މަޒީދު ބަލަބަލާ ހުއްޓާ ސަލީމް ވަކި އިޒުނައެއްވެސް ހޯދުމެއްނެތި އައިސް އޭނަގެ ކުރިމަތީގައި ހުރި ދެ ގޮނޑިން ކުރެ ގޮނޑިއެއްގައި އިށީނދެ ގޮނޑިއަށް ލެނގިލަމުން މަޒީދަށް ބަލާލީ އެތަނުގެ ވެރިޔަކީ އޭނަހެން ހީވާ ފަދައަކުންނެވެ.
“ކީއްތޯ ކޮށްދޭންވީ؟” މަޒީދު ސަލީމް އޭނަ ކައިރިއަށް އަންނަންވީ ސަބަބަކާއިމެދު ވިސްނަމުން ސުވާލުކުރިއެވެ. އޭނަ ސުވާލުކުރުމާއެކު ސަލީމް ހީލިއެވެ.
“ރަނގަޅު…..އަހަންނާ ވާހަކަ ދައްކާއިރު ހުންނަންވާނީ މާތް ބަހެއް. މަޒީދު އެކަން ހަނދާން ނުނެތުނީތީ މަޒީދު އަހަރެންގެ ރަނގަޅު ކޮޅުގަ ބަހައްޓާނަން…..މަޒީދަށް އެނގޭނެ ކަންނޭނގެ އަހަރެން މިއައީ ކީއްވެކަން….މަހީރާގެ ކޮންމެވެސް އެދުމެއް މަޒީދު ފުރިހަމަ ކޮށްނުދޭ ވާހަކަ އިވިފަ މިއައީ…” ސަލީމް ސީރިއަސްކަމާއެކީ ރާގަކަށް ބުނެލިއެވެ. އެއާއެކު މަޒީދުގެ ބުމަގޮށްޖެހުނެވެ.
“މަހީރާ އަހަރެން ކައިރި ބުނީ ސާރިޔާ ވަރިކޮށްދޭށޭ. ސާރިޔާ މިހާރު އެހެރީ ވަރިކޮށްފަ.” މަޒީދު ބުނެލިއެވެ.
“އެހެންތަ؟ ޕިސް ޕިސް…އެކަމަކު ހަމައެކަނި އެހާވަރަކަށް ނޫންކަންނޭނގެދޯ މަހީރާ އެދުނީ؟ ސާރިޔާގެ ބަނޑުވެސް މިހާރު ބޭރުފުށުން އެނގޭވަރަށް ބޮޑު. އޮފީހުގެ ގިނަ ބަޔަކު އެބަ ބުނޭ ސާރިޔާ ނަޙަލާލުން ގުޅުމެއް ހިންގައިގެންނޭ މިހެންވީ. އެ ވާހަކަ ތެދުކޮށްލަންވީއެއްނު؟ ތެދުނުކޮށް ވެސް މަޒީދަށް ކުރެވޭނެ ކަމެއްނެތް. މިކަހަލަ ނޭދެވޭ ވާހަކައެއް މަޒީދާއި ބެހޭގޮތުން ފެތުރުނިއްޔާ މަޒީދުގެ އެއޮތް ބޮޑު ވިޔަފާރިއަށް ވެސް އަސަރުކުރާނެ. މިހާ ކުޑަކަމެއްގެ ސަބަބުން ވިޔަފާރިއަށް އަސަރުކުރީމަ ދެން ވަރަށް ދެރަދޯ؟ އަދި އެހެންނޫނަސް އަހަރެންގެ ސަރުކާރެއްގަ މަޒީދުގެ ވަޒީފާ ގެއްލުން ވެސް އެކަށީގެންވޭ. އެކަހަލަ ވާހަކައެއް މިނިސްޓްރީގަ އުޅޭ މުވައްޒަފަކާ ބެހޭގޮތުން އިވުނިއްޔާ. ހެހެ….” ސަލީމް ސީރިއަސްކަމާއެކީ ވާހަކަ ދައްކަމުން ގޮސް މަލާމާތުގެ ޒާތަށް ހީލުމުން މަޒީދުގެ ގޮށްމުއްކެވުނެވެ.
“މަހީރާ ކިހާވަރަކަށް ލާރި ދީގެން އޭނަ ބުނާހާ ގޮތަކަށް ތި ހަދަނީ؟” މަޒީދު ސުވާލުކުރިއެވެ.
“އައްދެ! މީހަކު ލާރިއެއް ދީގެން ހެއްލޭވަރަށްވުރެ އަހަރެން އަތުގަ ލާރި ގިނަ ކަންނޭނގެދޯ؟ ހެހެ….ވާ ގޮތަކީ މަހީރާއަކީ އަހަރެން ދެކޭ ގޮތުގަ އަހަރުމެންގެ ޤައުމަށް ވަރަށް މުހިއްމު މީހެއް. މަހީރާ ދީނާއި ބެހޭގޮތުން އެ ލިޔާ ލިޔުންތައް މެދުވެރިވެގެން އަހަރުމެންގެ ޤައުމަށް ބޭރުގެ ވަރަށް ގިނަ އެހީތައް ލިބޭނެ. އެހެންވީމަ އަހަރެންގެ ސަރުކާރެއްގަ މަހީރާ އެ ބޭނުންވާ ކަހަލަ ޖަމުޢިއްޔާއެއް ހަދަން އަހަރެން މަހީރާއަށް ފުރިހަމައަށް އެއްބާރުލުން ދޭން އެއްބަސްވެގެން މިހިރީ. އެކަމަކު މަހީރާއަށް ރަނގަޅަށް މަސައްކަތް ކުރެވޭނީ ވެސް އޭނަގެ ޒާތީ ޙަޔާތް ހަމައަކަށް އެޅިގެންތާދޯ؟ އެހެންވީމަ މަޒީދު ކައިރިއަށް މިއައީ. ހީކުރަން މަޒީދު މަހީރާ ބޭނުން ގޮތަކަށް ހަދާނެކަމަށް. އެހެންނޫނީ…..އަނެއްކާވެސް ސާރިޔާ ބިރުވެރި ދުވަސްތަކާއި ކުރިމަތިލާން ޖެހިދާނެ….” ސަލީމް އެހެން ބުނެލަމުން ހިނިތުންވުމެއް ދައްކާލިއެވެ. އެއަށްފަހު ގޮނޑިން ތެދުވެ އެ ގޮނޑި ހިތަށްއެރި ދިމާލަށް ފޮނުވާލުމަށްފަހު ކެބިން އިން ނިކުމެގެން ދިޔައެވެ. ސަލީމް ދިޔުމުން މަޒީދަށް ފުން ނޭވައެއް ދޫކޮށް ދެއަތް ޖޯޑުކޮށްލަމުން ނިތުގައި ޖައްސާލެވުނީ ހުރިހާކަމެއް ބޮއްސުންލައިގެން ދިޔަ ކަހަލަ އިޙްސާސެއް ކުރެވުމުންނެވެ. އޭނަގެ ސިކުނޑިއަށް އެތައް ޚިޔާލެއް އެއްފަހަރާ އެވަގުތު ވެރިވިއެއްކަމަކު އޭނައަށް ޔަޤީންވި އެއްކަމެއްވިއެވެ. އޭނަގެ ސަބަބުން ސާރިޔާއަށް އިތުރު އަނިޔާއެއް ލިބެން އޭނަ ބޭނުންނުވި ކަމެވެ.
އެދުވަހުގެ ހަވީރު ވަގުތެވެ. ސާރިޔާގެ ބަނޑު އާދައަށްވުރެ ބޮޑުކޮށް ހުންނަ މަންޒަރު ފެނިފައި ދެކެވެމުން ދިޔަ ސިއްރު ވާހަކަތައް ފާޅުގައި ދެކެވެން ފެށީ އެދުވަހުގެ ހަވީރު ވަގުތެވެ. އެދުވަހު އޮފީސް ނިންމާ ގޮތަށް އެންމެން އެކީގައި ކެއުމަކަށްދާން އޮތީތީ ރިސެޕްޝަނާއި ހަމައަށް އެންމެންނަށް އާދެވުނީ އެކުއެކީގައެވެ. އެންމެ ފަހަކަށް ލިފްޓުން ފޭބި މީހުންގެ ތެރެއިން ސާރިޔާއާއި އޭނަގެ ދެ އަންހެން އެކުވެރިންވިއެވެ.
“ދެން ސާރިޔާ ބުނެބަލަ ނިކަން! މިހާރު ދެން ސިއްރުކުރެވޭކަށް ނެތެއްނު؟ ކާކުގެ ދަރިއެއްތީ؟ އަހަރުންނަށް ނާންގާ މީހަކާ އިނީތަ އަނެއްކާ؟” އެ އަންހެން ކުއްޖާ ނުހަނު ހަރު އަޑުން ކުރި ސުވާލު އެވަގުތު އެ ޞަރަޙައްދަށް ނިކުމެފައި ތިބި ގިނަ މުވައްޒަފުންނަށް އިވުނެވެ. އެ ސުވާލު އިވުމުންނާއި އޭނައަށް އަމާޒުވެފައިވި ނަޒަރުތަކުގެ ޒާތުން ސާރިޔާއަށް އާނއެކޭ ބުނެލެވުނެވެ. އަމިއްލަ ޤަދަރާއި ޢިއްޒަތް ރައްކާތެރިކުރަން ބޭނުންވެފައިވި މިންވަރުންނެވެ. އަމިއްލަ ދަރިފުޅު ހުތުރު ނަންތަކުން ރައްކާތެރިކުރަން ބޭނުންވި މިންވަރުންނެވެ. ސާރިޔާ އާނއެކޭ ބުނެލުމާއެކު އޭނަގެ އެކުވެރިޔާ އަޑުހަރު ކުރިއެވެ.
“އޭ އޭ އެންމެން އަޑުއަހާބަލަ! ސާރިޔާ އަހަރުމެންނަށް ނާންގާ މީހަކާ އިނިއްޔޯ! ބަލާބަލަ މީނަގެ ވަރުދޯ؟ އަދި އަހަރުމެންނަށް ސައި އޮންނަންވާނެ. ބުނެބަލަ! ކާކުގެ ދަރިއެއްތީ؟” އެ އަންހެން ކުއްޖާ ވާހަކަ ދެއްކި ދެއްކިހެން އެންމެންގެ ނަޒަރު އޭނައަށް އަމާޒުވިއެވެ. ރިސެޕްޝަންގެ ކައިރީގައި ހުރި މަސްޢޫދުގެ އިތުރުން އެއަށްވުރެ ދުރުގައި ތިބި މަހީރާއާއި މަޒީދުގެ ނަޒަރުވެސް މެއެވެ. އެންމެ ފަހު ސުވާލު އިވިފައި ސާރިޔާ މަޒީދަށް ބަލާލީ ފެންކަޅިވެފައިވި ދެލޮލާއި އެކީގައެވެ. މަޒީދުގެ ފަރާތުން ޙަޤީޤަތް ފާޅުކޮށްލުމަށް އޭނަ ގާތު ބުނެލާ ކުޑަ ޢިޝާރާތެއްވެސް ފެނޭތޯ ސާރިޔާ މަޑުކުރިއެވެ. އެހެނަސް އެފަދަ ޢިޝާރާތެއް އޭނަގެ ފަރާތުން ނުލިބުމުން ސާރިޔާ އެންމެ ފަހުން އޭނަގެ ދަރިފުޅަށްޓަކައި ނިންމުމެއް ނިންމިއެވެ.
“މިއީ….މަޒީދުގެ ދަރިއެއް.” ސާރިޔާ އެންމެންނަށް ކަހަލަ ގޮތަކަށް އަންގާލިއެވެ. އެއާއެކު އެ ޙަޤީޤަތް އެނގޭ މީހުން ފިޔަވައި އެހެން މީހުންގެ މޫނުތަކުން ޙައިރާންކަން ފާޅުވެ ސިއްރުވެރި ވާހަކަތަކުގެ އަޑު މުޅި ތަނުގައި ގުގުމާލިއެވެ. މަހީރާ އެއްފަހަރު ސާރިޔާއަށް އަނެއްފަހަރު މަޒީދަށް ބަލާފައި އައި ރުޅީގައި އެއްޗެކޭ ބުނަން އުޅުނު ވަގުތު މަޒީދު ވާހަކަ ދެއްކިއެވެ.
“ދޮގު!” އެންމެންނަށް އިވޭވަރަށް މަޒީދު ބުނެލި އެ ވާހަކައިން އެންމެންގެ އަޑުތަކަށް ހުއްޓުމެއްއައެވެ. އެހިނދު ސާރިޔާއާއި އެއްވަރަށް ޙައިރާންވި މަސްޢޫދުވެސް ހުއްޓުން އަރާ ގޮތްވިއެވެ.
“ކް….ކީކޭތަ މަޒީދު؟” ސާރިޔާ އެ ސުވާލުކޮށްލިއިރު އޭނަގެ ތުރުތުރުއަޅާ އަޑު ވައި އަޑަކަށް ބަދަލުވިއެވެ.
“ތިއީ ހުސް ދޮގޭ އަހަރެން ބުނީ. އަހަރެންގެ އަންހެނުންގެ ފަރާތުން ފިޔަވައި އަހަންނަށް ދަރިއަކު ލިބިފައެއް ނުހުންނާނެ!” މަޒީދު ރުޅިވެރިކަން ދައްކަމުން ބުނެލިއެވެ. އެހިނދު ޙައިރާންކަން ބޭރުފުށުން ދައްކަމުން ދިޔަ މަހީރާއަށް އެތެރެއިން ހިނިތުންވެވެމުން ދިޔައިރު ސާރިޔާއާއިމެދު ވަމުން ދިޔަ ގޮތުން ކެތްތެރިކަން ކޮޅުންލަމުން ދިޔަ މަސްޢޫދަށް ބުނަންވީ އެއްޗެއް ނޭނގިފައި ހުރެވުނެވެ.
“މަޒީދު! ކީކޭ ތިކިޔަނީ؟ މަޒީދެއްނޫންތަ އަހަންނާ ސިއްރުން އިނީ؟ އިނދެގެން އަހަރެން އުޅޭނެ ތަނެއްދީގެން އަހަންނާއެކީ އުޅުނީ މަޒީދު ނޫންތަ؟” ސާރިޔާ އެ ސުވާލުތައް ކުރިއިރު އޭނަ ފެންކަޅިވެ ރޮވެން ކައިރިވިއެވެ.
“ހުނ! ތިއީ ކޮންތަނަކުން ހޯދައިގެން އުޅޭ ވާހަކައެއް؟ ހުވަފެނަކުން ވެސް މަ ސާރިޔާއާއި ކައިރިވެފައެއް ނުހުންނާނެ!” މަޒީދު ބުނެލިއެވެ. އެއާއެކު ސާރިޔާގެ ލޮލުން ކަރުނަތައް ފައިބަން ފެށިއެވެ. ސާރިޔާ އެއްޗެކޭ ބުނަން ނުކުޅެދިފައިވި މަންޒަރު ފެނިފައި މަސްޢޫދަށް ކުރިއަށް ޖެހިލެވުނެވެ.
“ﷲ ގަންދީ އަހަރެން ބުނެފާނަން މިވާހަކަ. ސާރިޔާ ދޮގެއް ނަހަދާނެ! ޚުދު ސާރިޔާ އަމިއްލައަށް މީގެ މަސްތަކެއް ކުރިން އަހަރެން ކައިރީގަ ބުނީ މަޒީދު ސިއްރުން އޭނައާއި އިން ވާހަކަ.” މަސްޢޫދު އަޑުއުފުލިއެވެ. އޭނަ އެހެން ބުނެލި ތަނާހެން މަހީރާ ޗޮއްކަނޑަން ފެށިއެވެ.
“ހައު ޓަޗިންގްދޯ؟ މަސްޢޫދު ސާރިޔާދެކެ ލޯބިވާކަން އަހަރުމެންނަށް އެނގެއޭ. ލޯބިވާވަރުން އެހާ ޕްލޭންކޮށްގެން ގޮއްސަ ޕްރޮޕޯޒްކުރިމަ ސާރިޔާ ނޫނެކޭ ބުނިކަން ވެސް އަހަރުމެންނަށް އެނގެއޭ…” މަހީރާ މަލާމާތުގެ ރާގަކަށް ބުނެލި ވާހަކައިން ވީ ދެރައާއެކީ މަސްޢޫދުގެ އަނގަ ބަންދުވިއެވެ. އޭނަ ސާރިޔާގާތު އިންނަން ރާވަމުން ދިޔަކަން އެކަމުގެ ތެރޭގައި އޭނައާއި ގާތްކޮށް އުޅެމުން ދިޔަ އެކުވެރިންނަށް އެނގުނެވެ. އެ ވާހަކަ ފެތުރިފައި ވަނިކޮށް އޭނަގެ އެކުވެރިން އެކަން ނިމިގެން ދިޔަ ގޮތާއިމެދު ވެސް ޖަވާބުދިނެވެ. ނަތީޖާއެއްގެ ގޮތުން އެއީ މުޅި އޮފީހަށް އެނގޭ ވާހަކައެކެވެ. އެ ވާހަކަ އިވޭ ކޮންމެ ފަހަރަކުހެން އެފަހަރުވެސް އޭނަގެ މޭގައި ރިހުމެއް އުފެދުނެއްކަމަކު އޭނަ އެ ޙާލަތުގައި ސާރިޔާއަށްޓަކައި ވާހަކަ ދައްކަން ބޭނުންވިއެވެ. އެހެނަސް އޭގެ ކުރިން މަހީރާ ވާހަކަ ދެއްކިއެވެ.
“މަށަށް އެނގެނީ މަގޭ ފިރިމީހާ ދެވަނަ އަންހެނަކު ގެންގުޅޭ ވަރަކަށް ގެއިން ބޭރަށް ގޮސްފަ ނުވާކަން. ހިތަށްއަރަނީ ސާރިޔާއާއި އިނިއްޔާ އޭނަ ސާރިޔާއާއި އެކީގަ އުޅުނީ ހަމައެކަނި އޮފީސްތެރެއިންހޭ. އެކަމަކު އޮފީހުގަ އުޅޭއިރުވެސް ސާރިޔާ ވަކި މަޒީދާއި ދިމާވާކަށް ނުޖެހޭދޯ؟ ލޯބި މިއީ ކޮންކަހަލަ ވާހަކައެއްތަ ސާރިޔާ މި ދައްކަނީ؟” މަހީރާ މަޒީދުގެ އަތުގައި ހިފާލަމުން ބުނެލިއެވެ.
“އަހަންނަކަށް ނޭނގޭ. އަހަރެން ނުއިންނަން ސާރިޔާއާ.” މަޒީދު އަމިއްލަ ޖަޒުބާތުތައް ހަމައަކަށް އަޅުވަމުން ސާރިޔާއާއި ހަތަރުކަޅި ހަމަކުރަން ނުކެރޭ ޙާލު ބުނެލިއެވެ. އެއާއެކު އަނެއްކާވެސް އެންމެންގެ ސިއްރު ވާހަކަތައް މުޅި ތަނުގައި ގުގުމާލިއެވެ. އެހެނަސް އެވާހަކަތައް ކުރިއަށް ދިޔަނުދީ މަހީރާ އެންމެން ގާތު ދެން ކާން ހިނގާދޯއޭ ބުނެލިއެވެ. އޭނަ ސާރިޔާއަށް ފަސްދީފައި މަޒީދުގެ އަތުގައި އަތް އަޅުވައިގެން ދާން ހިނގައިގަތީ ސާރިޔާވެސް ބޭނުމިއްޔާ އަންނާށޭ ބުނަމުންނެވެ. ސިކުންތުކޮޅެއްގެ ތެރޭގައި މުޅި ތަނުން އެންމެން ހުސްވީއިރުވެސް ސާރިޔާ އެހުރިތާ ހުރިއިރު އޭނައަށް ބަލަހައްޓައިގެން ހުރި މަސްޢޫދުވެސް ހުރިގޮތަށް ހިރިވެސް ނުލާ ހުއްޓެވެ. މަޒީދު ލޯމައްޗަށް ގެއްލުމާއެކު ސާރިޔާގެ ލޮލަށް އެތައް ހާސް ކަރުނަތަކެއް ޖަމާވެ އޭނައަށް ގިސްލެވެން ފެށިއެވެ. އޭގެ މާ ގިނައިރެއްނުވެ އޭނަގެ ކަކުލުން ވާގި ދޫވެގެން ގޮސް އޭނަ ބިންމައްޗަށް ތިރިވީ ވަގުތު މަސްޢޫދަށް ސާރިޔާގެ ނަމުން ގޮވަމުން ގޮސް ސާރިޔާގެ ގައިގައި ހިފަހައްޓާލެވުނެވެ.
އޭގެ ފަހުން 3 ދުވަސް ވަންދެން ސާރިޔާ އޮފީހުން ނުފެނެއެވެ. އެއީ ކީއްވެކަން އެންމެންނަށް ވެސް އެނގުނެވެ. އެހެނަސް ޙަޤީޤަތް ނޭނގޭ އެންމެން ސާރިޔާއާއިމެދު ނިންމަމުން ދިޔައީ ގޯސް ނިންމުންތަކެވެ. ސާރިޔާގެ އަބުރަށް ހުތުރުވާ ގޮތަށް ވާހަކަ ދެކެވޭ އަޑު އިވިއްޖެނަމަ މަޒީދާއި އެއްވަރަށް މަސްޢޫދަށް ވެސް އުދަގޫވަމުން ދިޔައެވެ. އެހެނަސް މަޒީދާއި ޚިލާފަށް މަސްޢޫދު އޭގެއިން ކޮންމެ ވާހަކައަކަށް ހުއްޓުމެއްނެތި ރައްދު ދެމުން ދިޔައެވެ. އެހެނަސް ސާރިޔާ އަނބުރާ އޮފީހަށް އައުމުން ވެސް އެ ވާހަކަތަކަށް މާ ބޮޑު ބަދަލެއް އައިސްފައި ނުވެއެވެ. މުޅި ދުވަހު އެފަދަ ވާހަކަތައް އިވި މީހުން އޭނައާއިމެދު ވިސްނާ ގޮތާއިމެދު ފިކުރުކުރަމުން ގޮސް ސާރިޔާގެ ރޫޙު މަރުވެފައިވިއެވެ. ސާރިޔާގެ އެކަނިވެރިކަމާއި ސާރިޔާ ހުންނަ ގޮތް ފެނިފައި އެންމެ ބޮޑަށް އަސަރުކުރަމުން ދިޔައީ މަސްޢޫދަށެވެ. އެހެންކަމުން އެ މަންޒަރު ދެކެން ކެތް ނުކުރެވުމުން އެއްދުވަހު މަސްޢޫދު ސާރިޔާގެ ނުރުހުންވުމަށް ވިސްނުމެއްނެތި އެއްކަލަ ސައި ކޮޓަރީގެ މޭޒުދޮށުގައި ސާރިޔާ އިންދާ އޭނަގެ ކުރިމައްޗަށްވާ ގޮތަށް އިށީނެވެ. ސާރިޔާ އޭނައަށް އިންކާރު ކުރި ދުވަހަށްފަހު ސާރިޔާއާއި ކުރިމަތިލައި ވާހަކަ ދައްކަން ވެސް އޭނައަށް ހިތްދަތިކަމަކަށް ވިއެއްކަމަކު އޭނަ ހިތްވަރުކުރަމުން ވާހަކަ ދެއްކިއެވެ.
“ސާރިޔާ…..ފަހަރެއްގަ ސާރިޔާއަށް ކަމުނުގޮސްދާނެ އަހަރެން މި ދޭ ޚިޔާލު އެކަމަކު…..ހިނގާ ދެމީހުން ރަށަށްދާން.” މަސްޢޫދު އޭނަގެ އަޑު ސާބިތުކުރަން މަސައްކަތް ކުރަމުން ބުނެލިއެވެ. އޭނަ އެހެން ބުނުމާއެކު ސާރިޔާ އިސްއުފުލާލަމުން އޭނައަށް ބަލާލިއެވެ.
“ކުރީ ދުވަހު….ސާރިޔާ ވަޒީފާއަށް ލީ ފޯމު ފެނިފަ އެނގުނީ ސާރިޔާވެސް ނިސްބަތްވަނީ އަހަރެންގެ އުފަން ރަށަށްކަން. އަހަރެން މާލޭގަ އުޅޭތާ މިއީ 5 ވަނަ އަހަރު. އެކަމަކު އަހަރެން ދެން ބޭނުމެއްނޫން މިތާނގަ އުޅޭކަށް. ސާރިޔާއާއިމެދު މިފަދަ ވާހަކަތަކެއް ދެކެވޭ ތަނެއްގަ ހުންނާކަށް ބޭނުމެއްނޫން. މިހާރު އަވަށުތެރެއަށް ވެސް އެ ވާހަކަ ފެތުރެމުން ދަނީ. ސާރިޔާ މަޒީދު ފެންނަ ހިސާބުގަ ހުރިއްޔާ ނޭނގޭ މަހީރާ ކުރިއަށް އޮތްތަނުގަ މި ވާހަކަތަކާމެދު ހަދާފާނެ ގޮތެއް. ސާރިޔާއަށް ވެސް އެންމެ ފަސޭހަވާނީ މި އަޑުތަކާއި ދުރަށް ދިޔައިމަ ކަންނޭނގެ. އެހެންވީމަ….އެގޮތަށް ވިސްނާފަ އަހަރެން ހިތަށްއެރީ ރަށަށް ދިޔުމާމެދު ސާރިޔާގެ ޚިޔާލުވެސް ހޯދަނީއޭ……ސާރިޔާ….ބޭނުމިއްޔާ އަހަރެން ސާރިޔާގެ ދަރިފުޅުގެ ބައްޕައަށް ވެދީފާނަން….އެކަމަކު ސާރިޔާ ބޭނުމެއްނޫނިއްޔާ އަހަރެން ސާރިޔާއާއި ދުރުގަ ހުރެދީފާނަން ރަށަށް ގޮއްސަވެސް…އަހަރެން ދޭ ޚިޔާލެއް ނޫންކަންނޭނގެދޯ ސާރިޔާ މި ވަގުތު ބޭނުންވާނީ އެކަމަކު….މި ކަމާމެދު ވިސްނާލައްޗޭ.” މަސްޢޫދު އޭނަގެ ލޮލަށް ޖަމާވަމުން ދިޔަ ކަރުނަތައް ހިންދަން މަސައްކަތް ކުރަމުން ބުނެލިއެވެ. އެހިނދު އިސްޖެހިފައި އިން ސާރިޔާއަށް ވެސް މަސްޢޫދު އޭނަދެކެ ވާ ލޯބީގެ ފުންކަން އިޙްސާސް ކުރެވުނު ވަގުތު އޭނަގެ ލޮލުން ކަރުނަތައް ފައިބައިގެން ގޮސް މޭޒުމަތީގައި ޖެހެން ފެށިއެވެ. ސާރިޔާއަށް ރަނގަޅަށް ބަލަން ވެސް ނުކުޅެދުނު މަސްޢޫދު އެތަނުން ތެދުވެގެން ދާން ހިނގައިގަތީ ސާރިޔާގެ ފަރާތުން ޖަވާބެއް ނުލިބޭނެއޭ ހިތާއެވެ. އެހެނަސް މާ ދުރަށް ނުދެވެނީސް އޭނަގެ ފައިގައި ތަޅުއެޅުވުނީ ސާރިޔާ އޭނަގެ ނަމުން ގޮވާލި އަޑަށެވެ.
“ހިނގާ ރަށަށް ދެމީހުން….މި ހުރިހާ ކަމެއްގެ މަތިން ހަނދާން ނައްތާލާފަ…” ސާރިޔާ ބުނި ވާހަކަ އިވިފައި މަސްޢޫދުގެ ލޮލުން ކަރުނައެއް ފައިބައިގެން އައެވެ. އޭނަ އެއްޗެކޭ ބުނަން ނުކުޅެދިފައި ވަނިކޮށް ސާރިޔާ އިތުރަށް ވާހަކަ ދެއްކިއެވެ.
“އަހަރެން ބޭނުންވަނީ ދުރަށްދާން. މި ވާހަކަތަކާ ވެސް އަދި އޭނައާ ވެސް. އަހަރެންގެ ސޫރަވެސް އަދި އަހަރެންގެ ދަރިފުޅުގެ ސޫރަވެސް އޭނައަށް ދައްކާކަށް އަހަރެން ބޭނުމެއްނޫން…” ސާރިޔާ އެހެން ބުނެލި އަޑު މަސްޢޫދާއެކީ ސައި ކޮޓަރީގެ ބޭރުން އެ ކޮޓަރީގެ ދޮރު ކައިރީގައި ހުރި މަޒީދަށް ވެސް އިވުނެވެ. އެ ހިނދު އޭނަގެ ލޮލަށް ވެސް ކަރުނަތައް ޖަމާވެގެން ދިޔައެވެ.
**
ވާހަކަ އެހާ ހިސާބަށް ދިޔައިރު މަލާކްގެ އެނދު ކައިރީގައި ބެހެއްޓިފައިވި ގޮނޑީގައި އިން މަޒީދުގެ ލޮލުން ކަރުނަތައް ފައިބައިގެން ދިޔަދިޔަހެން އޭނަ އޭނަގެ ނަންބަރު އައިނު ނަގައި އެ ކަރުނަތައް ފޮހެލަންޖެހުނެވެ. އެ ވާހަކަތައް އަޑުއަހައި ނިމުނުއިރު މަލާކްގެ އެސްފިޔަތައް ވެސް ތެމިފައިވީއިރު ސޯފާގައި އިން އަޔާޒްވީ ފުން ވިސްނުމެއްގެ ތެރޭގައެވެ. އޭނަ ސުވާލެއްކުރަން އުޅުނު ވަގުތު މަޒީދު އިތުރަށް ވާހަކަ ދެއްކިއެވެ.
“ވަރަށް ގޯސް ބައްޕައެއްދޯ މަލޫއަށް ލިބުނީ؟ ހެހެ….ބައްޕަ ބޭނުމިއްޔާ އެދުވަހު އެ ދެއްކި ބިރުތަކުގެ ވާހަކައިން ބަހަނާއެއް ދެއްކުނީސް. އެކަމަކު އެހެން ހަދާކަށް ބައްޕަ ބޭނުމެއްނޫން. ބައްޕަގެ ކުށް ބައްޕަ ހިތުގެ އެންމެ ފުންމިނުން ޤަބޫލުކުރަން. ބައްޕައަށް މަޢާފު ކުރުމާއި ނުކުރުމުގެ އިޚްތިޔާރު ބައްޕަ ދަރިފުޅަށް ދެން….” މަޒީދު ބުނެލިއެވެ. އެހިނދު އަނެއްކާވެސް މަންމަ ތަޙައްމަލުކުރި ވޭންތައް ތަޞައްވުރު ކުރެވުމުން ކޯތާފަތް ތެމިގެން ދިޔަ މަލާކް އޭނަގެ ކަރުނަތައް ފޮހެލިއެވެ. އެއަށްފަހު އޭނަގެ ހިތަށްވެރިވެފައި އޮތް ސުވާލެއް ކުރިއެވެ.
“މައުވާ….އެއީ އަޔާޒްއާއި ރައްޓެހިވި މައުވާތަ؟” މަލާކް އަހާލިއެވެ.
“އާނ….އެއީ އަޔާޒްއާއި ރައްޓެހިވި މައުވާ…މައުވާގެ ނަން އިވޭއިރަށް އަޔާޒާއި ރައްޓެހިވި އަންހެން ކުއްޖާދޯ މަލޫ ހަނދާންވަނީ؟” ހިނިތުންވާން މަސައްކަތް ކުރަމުން މަޒީދު ބުނެލިއެވެ.
“ނޫން ބައްޕާ…..ބައްޕަ މައުވާގެ ވާހަކަ ކިޔައިދިންއިރު މަލާކްގެ ހަނދާނަށް އައީ މިއަދު މަލާކްގެ ކަރުގައި ހިފި ކުއްޖާގެ ސޫރަ. އެއީ ހަމަ އަޔާޒްއާއި ރައްޓެހިވި މައުވާ. ތި ވާހަކަތައް އިވުނީމަ މި ދޭހަކުރެވުނީ މައުވާ މަލާކްއަށް އެހާ ރުޅި އަންނަންވީ ކީއްވެކަން….” މަލާކް ވިސްނުމެއްގައި އިނދެ ބުނެލިއެވެ. މަލާކް ބުނެލި ވާހަކައިން މަޒީދުގެ މޫނުމަތިން ކަންބޮޑުވުން ފާޅުވިއެވެ.
“އޭނަ….އޭނަ ކަނބުލޮގެ ކަރުގަ ހިފީތަ؟” މަޒީދު އެ ސުވާލު ކުރި ވަގުތު އެ ވާހަކަ އަލަށް އިވުނު އަޔާޒަށް ވެސް އެކަމަށް ސަމާލުކަން ދެވުނެވެ.
“އާނ…..އެކަމަކު މިހާރު ދޭހަކުރެވޭ ކީއްވެކަން އެހާ ބޮޑަށް ރުޅި އަންނަންވީ….މަލާކް ބުނާނީ މައުވާ އެހެންވުމުގަ މައުވާގެ ކުށެއްނެތޭ. މައުވާއަށް ދިމާވި ކަންތަކުގެ ސަބަބުން މައުވާއަށް އެހެން ދިމާވީ….” މަލާކް އެއްދިމާލަކަށް ނަޒަރު ހުއްޓައިގެން އިނދެ ބުނެލިއެވެ. އެއާއެކު އަޔާޒް ވާހަކަ ދެއްކިއެވެ.
“އެކަމަކު ތިމާ ކުރާ ނުބައި ކަމެއްގެ ޒިންމާ ތިމާއަށް ކުރެވިފައި ހުރި ތަޖުރިބާތަކަށް ނުދެވޭނެ ދޯ މަލާކް؟ މަހީރާގެ ޙަޤީޤީ ނުބައިކަން މިހާރު މި އިޙްސާސް ކުރެވެނީ. އޭނަ މަންމައާއި ބައްޕައާއި ދެމެދު މައްސަލަ ޖެއްސީވެސް އެ ސަލީމް މެދުވެރިވެގެންތަ؟! އަހަންނަށް ހީވި ގޮތަށް އެމީހުން ހަމަ މަންމައަށް ބިރުދެއްކީދޯ؟! ބައްޕަ ގެއަށް އައިއްސަ މިހާރު މަސްޢޫދުބެމެން ގޮއްސިއޭ ބުނި ދުވަހު އަހަންނަށް އެންމެ ފުރަތަމަ މަންމައާއި ބައްޕަ ޒުވާބުކުރާތަން ފެނުނީ….އެއްބައެއްގެ ދިރިއުޅުން ބަރުބާދުކޮށް ނިމުނީމަދޯ އޭނަ އަހަރުމެންގެ ޢާއިލާ އަމާޒުފަތްގަނޑަކަށް ހެދީ؟” އަޔާޒް ރުޅިވެރިކަމާއެކީ އަވަސްއަވަހަށް ސުވާލުކުރިއެވެ.
“ވަކި ނިމުނީމައޭ ބޭބެ ނުބުނާނަން. މަހީރާގެ ރުޅިވެރިކަން ޙަލީމަށާއި މަލީހާއަށް އަމާޒުވާން ފެށީ ކުރިން ވެސް ބުނިހެން އޭނަ ހަދަން އުޅުނު ޖަމުޢިއްޔާއާއި ދެކޮޅުވެރިވީމަ. އެކަމަކު ތިބުނިހެން އެމީހުންނާއި ދެކޮޅަށް ކަމެއްކުރަން މަހީރާ ފަށައިގަތީ މަސްޢޫދުމެން ދިޔަފަހުން. އޭނަ ވަކިން ޚާއްޞަކޮށް ރުޅިއަންނާނެ މަލީހާއަށް. އޭނަ ދީނާއި ބެހޭގޮތުން ލިޔާ ކޮންމެ އާރޓިކަލްއަކަށް ރައްދުދޭ އާރޓިކަލްއެއް މަލީހާ ލިޔެލާތީ. އެހެންނޫނީ މަލީހާގެ މަޤާމުގެ ގޮތުން ވާހަކަ ދައްކަން ލިބޭ ފުރުޞަތުތަކުގަވެސް މަހީރާ ލިޔާ ލިޔުންތަކަށް ފާޑުކިޔައި ވާހަކަ ދައްކާތީ. މަލީހާ ދެރަކުރުމަށްޓަކައި މަހީރާ ބޭނުންވީ އޭނައާއި ޙަލީމްއާ ދެމެދު ފާރެއްލާން. މިގޮތުން އޭނަ ދައްކުވައިދޭން ބޭނުންވީ ޙަލީމް އޭނައާއި ވަރަށް ކައިރިވާކަން. ޙަލީމްގެ ކެބިންއަށް މަހީރާ ވަރަށް ގިނަގިނައިން ވަންނާނެ މަލީހާގެ ކުރިމަތިން. އެކަމަކު މަލީހާ ޙަލީމްއަށް ޝައްކެއް ނުކުރޭ އެހާވަރުންވެސް. ވަރަށް ލޯބިން އުޅުނު ވަރަށް ވަރުގަދަ ގުޅުމެއް އޮތް ދެމީހުން އެއީ. މަހީރާގެ މައްޗަށް އަހަންނަށް ބާރު ނުހިންގޭތީ އަހަރެން ޙަލީމް ކައިރިން އަހަން މަލީހާ ޝައްކު ނުކުރޭހޭ. ބުނިހާއިރަށް ބުނާނެ ދެމީހުން ކައިވެނި ކުރިއިރު އެހާ ބޮޑު ވަޢުދެއް ވެފައިވާއިރު ދެމީހުން ކިހިނެއްހޭ އެކަކު އަނެކަކަށް ޝައްކުކުރާނީ. އެންމެ ފަހުން މަހީރާ އެދެމީހުން ދުރުކުރުވީ އަހަންނަށް ވެސް ނޭނގި މަލީހާއަށް ބިރުދައްކައިގެން. އަޔާޒްއަށް ވެސް އެނގޭނެ ކަންނޭނގެ އަޔާޒްގެ ދޮންބެއަށް ނުބައި ބޭހެއް ކެވިގެން ނޭވާ ހާސްވި ދުވަސް. ސަލީމްގެ މީހަކު ލައްވާ އެދުވަހު ބޭސް ފިހާރައިގެ ތެރެއިން ނިޝާންއަށް ނުބައި ބޭހެއްދިނީ. އެދުވަސްފަހު މަލީހާގެ އުޅުމަށް ބަދަލު އައިސްގެން އުޅޭ ވާހަކަ ޙަލީމްގެ ފަރާތުން އިވުނީ. މަލީހާގެ ދެކުދިންނަށް ވެސް ގޮތެއް ހަދާފާނެކަމަށް ބުނެ މަހީރާ ބިރުދެއްކި އަޑު ބައްޕަވެސް އަޑުއެހިން. މި ވާހަކަތައް ފުލުހުންނަށް އެންގީމަވެސް ވަކި ވީގޮތެއް ނެތް….ހަމަ އެމީހުންނަށް ކާމިޔާބީ ލިބުނީ. އެންމެ ފަހުން މަލީހާ ދިޔައީ…..” މަޒީދުގެ ވާހަކަ މެދުކެނޑުނެވެ.
“މިހިރަ ކުޑަ ކުއްޖާގެ ފުރާނަ ނެތް މަސްގަނޑު ދެކެން ބޭނުންނުވަންޏާ ހަމަ މިއަދު ދާށޭ ބުނީމަ….އޭނަ ބުނީ އެހެން މަންމަ ކައިރި. އަހަންނާ މަންމަ އެދުވަހު ގޭގަ އެކަނި ތިއްބާ…..މަންމަ ދާން އުޅުނީމަ އަހަރެން ބުނަން އުޅުނިން މި ވާހަކަ ބައްޕައާއި ދޮންބެ ކައިރި. އެކަމަކު އަހަންނަށް ސާފުކޮށް އެ ވާހަކަ ބުނާކަށް ނޭނގުނު އޭރު. މަންމަ ފަހުން ފަހުން އައިސް ދެއްކި އުޅުމުގެ ސަބަބުން ބައްޕައާއި ދޮންބެ މަންމައަށް ނުރުހުންވެފައިވީ ވަރުން އަހަރެންގެ އެކަހަލަ ވާހަކައެއް އެމީހުން ޤަބޫލެއްވެސް ނުކުރޭ. އަހަރެން މި ވާހަކަ ތަކުރާރުކޮށް ދައްކާކަން އެނގިގެން ކަންނޭނގެ. އެއްދުވަހު އަހަރެން ސްކޫލްގަ ހުއްޓާ އޭނަގެ ކާރުގަ އޭނަގެ އޮފީހަށް ގެންގޮއްސަ އަހަރެން ކައިރި އޭނަ ބުނީ އެކަކުވެސް އަހަރެންގެ ވާހަކަ ޤަބޫލު ނުކުރާނެއޭ. އަހަރެންވެސް ޤަބޫލުކުރަންޖެހޭނީ އެހެން މީހުން ބުނާ ވާހަކައޭ. ފަހުންފަހުން އައިސް ވީ ވެސް އެހެން. މަންމަ ކީއްވެ އެ ކުޑަ ރަށަށް ދިޔައީ؟ ދޮންބެ ބުނީ އެއީއެއްނޫނޭ މަންމަގެ ރަށަކީ. މަންމަ އެރަށަށް ގޮއްސަ އަހަރުމެންގެ ނޭދެވޭ ވާހަކަތައް ދެއްކީވެސް އޭނަ ބިރުދެއްކީމަތަ؟” އަޔާޒް މަންމަގެ ހަނދާންތަކާއެކީ ކަރުނަ ހިލެމުން ދިޔަ ދެލޮލާއެކީ ސުވާލުކުރިއެވެ.
“ހުމް….ހަމަ ރަނގަޅަށް ތިހީވީ އަޔާޒް. ޙަލީމްއާއި މަލީހާ ވަކިވީމަ އެހާވަރުން ވެސް މަހީރާއަށާއި ސަލީމްއަށް ވެސް ނުފުދުނު. ޙަލީމްގެ ބޮޑު ގެދޮރާއި ތަންތަން ފެނިފަ ސަލީމް ބޭނުންވީ އެތަންތަން ހިފަން. އެކަމަށްޓަކައި އޭނަ ބަޔަކު ފޮނުވައި ޙަލީމްއާއި އަޔާޒްގެ ދޮންމަންމަ ޢަޒީޒާއާ ގުޅުވީވެސް. މަލީހާއަށް ބިރުދެއްކުން ކުރިއަށް ގެންދިޔައީ މަލީހާ އޭނަ އޭރު ބަނޑުބޮޑުވި ދަރިފުޅާއެކީ އަނބުރާ މާލެއަށް އެ މުދާ ހޯދަން ނާންނާނެ ގޮތަށް. އަދި އެ ދަރިފުޅު ކައިރިވެސް އޭނަގެ ބޭބެމެންނާ ބެހޭގޮތުން ގޯސް ވާހަކަތައް މަލީހާ ލައްވާ އިއްވިފަ ހުރީ އެކުއްޖާ ވެސް އަނބުރާ މާލެ ނާންނާނެ ގޮތަށް. މަލީހާ އެރަށަށް ދިޔައީ މަލީހާ މާލޭގަ އުޅޭތަ ދުވަސްވެފަ ހުރީމަ އަމިއްލަ ރަށުގަ ގެދޮރެއް ނެތީތީ. އެ ރަށު މީހުން އޭނައަށް ބީރައްޓެހިވީމަ އޭނަ ސާރިޔާއަށް ގުޅައިގެން އެމީހުން އުޅޭ ރަށަށް ގޮސް އުޅުނީ. ބައްޕައަށް މި ހުރިހާ ކަމެއް އެނގެނީ އެމީހުންގެ ނަޒަރު އަބަދުވެސް މަލީހާއަށް ހުއްޓިފަ ހުންނާތީ. އަދި މަހީރާ މި ޚަބަރުތައް ލިބިގެން ވާހަކަތައް ދައްކާ އަޑު ބައްޕައަށް އިވޭތީ. މަލީހާ އެ ކުޑަ ރަށަށް ގޮއްސަ ވެސް މަހީރާ ލިޔާ ލިޔުންތަކާއި ދެކޮޅަށް ވާހަކަ ދައްކާތީ އެއީ ނުރައްކަލެއްކަމަށް އެމީހުން އަބަދުވެސް ދެކުނީ. އެއީ މަލީހާ އަބަދުވެސް ބޭނުންވީ ލާރި އެއްކުރެވުނު ވަރަކުން އަނބުރާ އަނެއްކާވެސް މާލެއަށްދާން. ކުދިން ބޮޑުވީމަ ކައިރީގަ ހުރި ކުއްޖާއާއެކީ މާލޭގަ ތިބި ދެކުދިން ވެސް ބަލަންދާން. އެކަމަކު އެ މީހުން ދުވަހަކުވެސް އެގޮތަށް ވިޔައެއްނުދޭ. މަލީހާ އެރަށުގަ އުޅުނު ގޭގެ ވެރިމީހާ ކަމަށްވާ ރަޙީމާއަކީ އެމީހުން ލާރި ދީފަ ހުރި އަންހެނެއް. މަލީހާއަށް ލާރި އެއްނުކުރެވޭނެ ގޮތް ޔަޤީން ކުރުމަށް. ފަހުންފަހުން އައިސް މަލީހާގެ އަންހެން ދަރިފުޅު ބޮޑުވީމަ އެ އަންހެން ދަރިފުޅަށް ވެސް އެކިއެކި ގޯނާތައް ލިބުނުހެން އަހަންނަށް ހީވަނީ ސަލީމް ގެންގުޅޭ ފިރިހެނެއްގެ ފަރާތުން. އެއީ އެމީހުން އެމީހުންގެ މަސައްކަތް ކުރީމަ ސަލީމް އެމީހުންނަށް ހަދިޔާއެއްގެ ގޮތުން ހޯދައިދޭ ކަންތައްތައް….އެކަމަކު މިއީ ބޭބެއަށް ހީވާ ހީވުމެއް އިނގޭ؟ އެކުއްޖާ މާލެ ގެނައިއިރު ޙާލަތު ރަނގަޅުތަ؟” މަޒީދު ސުވާލުކުރިއެވެ. އެއާއެކު އަޔާޒާއެކީ މަލާކަށް ވެސް ވިސްނެން ފެށީ އަނުމްއާއި މެދުގައެވެ. އަނުމް މާލެ އައިއިރު ކަންތައް ވީ ގޮތުން އޭނައަށް ހީވި ހީވުމާއިމެދު އަޔާޒަށް ވިސްނެން ފެށިއިރު މަލާކަށް ވިސްނެމުން ދިޔައީ އޭނަ އިންޑިޔާއަށް ދިޔުމުގެ އެއްދުވަސްކުރިން އަނުމް މާޔޫސްވެފައި ހުރިގޮތެވެ. ކަންވީ ގޮތް ނަގައިގަނެވުމުން ދެމީހުން ވެސް ނުރުހުންވީ އެއްވަރަކަށެވެ. އަޔާޒްގެ ގޮށްމުއްކެވި ދެދަތްޕިލަ ޖެހުނު ވަގުތު މަޒީދު ފުން ނޭވައެއް ދޫކޮށްލަމުން ވާހަކަ ދެއްކިއެވެ.
“ވަރަށް ބޮޑަށް މަޢާފަށް އެދެން މި ހުރިހާ ކަމަކަށްޓަކައި ވެސް. ހިތަށްއަރަނީ ބައްޕައަށް ރަނގަޅު ފިރިއަކަށް ވެވުނުނަމަ މަހީރާއަށް އެހެން ނުވީހޭ…ކޮންމެ ގޮތެއްވިޔަސް މީގެ އަހަރުތަކެއް ކުރިން އެކަހަލަ އަންހެނަކާއެކީ އުޅެން ނުވާނެކަން އެނގުނީމަ ބައްޕަ އޭނަ ވަރިކޮށްފިން. އެއަށްފަހު އޭނަ ހެދި ގޯސްތައް ރަނގަޅުކުރަން މަސައްކަތް ކުރަމުން މިދަނީ. ފާރޫޤު ލައްވާ މަލާކްގެ ނުބައި އެމްއާރްއައި ރިޕޯޓެއްވެސް ރަށަށް ގެންދިޔައީ މަހީރާ ބުނެގެން. އެ ރިޕޯޓުގެ ވާހަކަ ފަތުރައިގެން މަލާކް މުސްކުޅި މީހަކާއި ދެވަން އުޅުނު ވާހަކަ މައުވާ އެއްދުވަހު ދެއްކި ވާހަކައިގެ ތެރެއިން އިވުނީމަ ބައްޕަ އެމީހުންނާއި ދެކޮޅަށް ފިޔަވަޅެއް އަޅަން ބޭނުންވީ. މިގޮތުން އެންމެ ފުރަތަމަ ކަމަކަށް އަޔާޒްގެ ބައްޕަގެ ވަޞިއްޔަތް ލިޔެވިފަ ހުރި ފޮތެއް އަޔާޒާއި މަލާކްގެ ކައިވެނީގެ ޝަރުޠާއެކީ މަޒުހަރު ލައްވާ އެގެއަށް ލީ ބައްޕަ. އެއަށްފަހު މަސްޢޫދުގެ ގެއަށް ވެސް ހަމަ އެ ޝަރުޠާއެކީ އެ ވަޞިއްޔަތް ލިން. އެނގޭ ރަނގަޅަށް ނޫންކަން އެކަން ކުރެވުނީ މިހާރު އެކަމަކު ވަރަށް އުފާވޭ ދެކުދިންނަށް މި ޒަވާޖީ ޙަޔާތުން އުފަލެއް ލިބޭކަން އެނގުނީމަ. މަލާކްއާއި އިނުމަށްފަހު ވެސް މައުވާ އަޔާޒްގެ ފަހަތުން އުޅުނީ ސަބަބަކާއި ލައިގެން. މައުވާ ބޮޑުދައިތަ ކިޔާ ލަމްޔާ ނިޝާންގެ ޙަޔާތަށް ދިޔައީވެސް ސަބަބަކާއި ލައިގެން. މަހީރާ ބޭނުންވަނީ މި ޢާއިލާ އެއްކޮށް ފުނޑުފުނޑުކޮށްލަން. އެކަމަށްޓަކައި ރާވާފަ ހުރި ރޭވުންތައް ބައްޕައަށް އެނގޭ. ބައްޕައަށް ތިކުދިން މަޢާފު ނުކުރިޔަސް ބައްޕަ ބޭނުންވަނީ މި ރޭވުންތައް ތިކުދިންނަށް ކިޔައިދީ ތިކުދިންނަށް އެހީވާން…އެންމެ ރަނގަޅުތަ؟” މަޒީދު ސުވާލުކުރިއެވެ. އެއާއެކު ހިމޭންކަމުގެ ވަގުތުކޮޅަކަށްފަހު މަލާކް އެނދުމަތީގައި އޮތް މަޒީދުގެ އަތްމަތީގައި އަތް އަޅާލަމުން ވާހަކަ ދެއްކިއެވެ.
“މަލާކް މަޢާފުކޮށްފިން ބައްޕައަށް. ޙަޔާތުގަ ގޯސްކޮށް ފިޔަވަޅުތައް އެޅިދާނެ ކޮންމެ މީހަކަށް ވެސް. އެކަމަކު އޭގެ ތެރެއިން އެންމެ ރަނގަޅު މީހުންނަކީ އިޞްލާޙުވެ އެ ފިޔަވަޅުތައް ރަނގަޅުކުރަން މަސައްކަތްކުރާ މީހުން…” މަލާކް ހިނިތުންވުމަކާއެކީ ބުނެލި ވާހަކައިން މަޒީދުގެ މޫނުމައްޗަށް ވެސް ހިތާމަވެރި ހިނިތުންވުމެއް ވެރިވިއެވެ.
“އަހަރެންވެސް މަޢާފުކޮށްފިން ބައްޕައަށް. ބައްޕަ ތިއީ ރަނގަޅު މީހަކަށްވީތީ މިހާރު އަހަރުމެންނަށް އެހީވާން ތިއައީ…” އަޔާޒް ވެސް ބުނެލިއެވެ. އެއާއެކު މަޒީދު ވީ އުފަލާއެކީ ލުއި ގޮތަކަށް ހީލެވުނެވެ.
**
އޭގެ އަނެއްދުވަހު އަނުމް އެ ހަފްތާގެ އާދައިގެ މަތިން ބަސްމާމެންނާއެކީ ގަޑިއިރެއްހާއިރު ވަންދެން ފިލާވަޅުތައް ދަސްކުރަން ސްކޫލަށް ދިޔައެވެ. އެދުވަހުވެސް އާދައިގެ މަތިން އޭނައަށް ފާއިޤްގެ ކާރު ސްކޫލަށް ދިޔަ މަގުމަތިން ފެނުނެވެ. ފާއިޤް ކާރު އޭނައާއި ކައިރި ކޮށްފައި ޒޫމްލައްވަމުން ދިޔަ ގޮތުން އަނުމްއަށް އެ ކާރާއި ދިމާލަށް ބެލެމުން ދިޔައީ އަޖާއިބުވެފައި ހުރެއެވެ. މިއީ ފާއިޤް އޭނައާއި ރުޅިވެގެން އުޅޭކަން ދައްކާގޮތްތޯ ހިތާހިތުން ބުނެވެމުން ދިޔައިރު އަމިއްލަ އަމިއްލައަށް ހެވެމުން ވެސް ދިޔައެވެ.
އެހެނަސް ފާއިޤް އޭނައަށް ވެފައިވި ނުރުހުންތެރިކަމުގެ ސީރިއަސްކަން އަނުމްއަށް އެނގުނީ އެދުވަހު އެކްސްޓްރާ ކްލާސް ނިންމުމަށްފަހު ގެއަށް ދިޔަ މަގުމަތީގައެވެ. އޭނަގެ އެކުވެރިން އޭނައަށް ވުރެ ކުރިން ލެބުން ނިކުމެގެން ދިޔުމުން އެންމެ ފަހަކަށް ލެބުން ނިކުތް މީހަކަށް އަނުމްވިއެވެ. ލެބުން ނިކުތް ވަގުތު ހަމަ އެ ފްލޯގައި ހުރި ލައިބްރަރީއިން ނިކުތް ފާއިޤް ވެސް އަނުމްއަށް ފެނުނެވެ. ފާއިޤްގެ ސީރިއަސްކަން އެކުލެވިފައިވި މޫނު ފެނިފައި ވަކި އެއްޗެކޭ ނުބުނެ އަނުމް ދާން ހިނގައިގަތެވެ. އެހެނަސް މާ ދުރަށް ނުދެވެނީސް ފާއިޤް އޭނައަށް އިވޭވަރަށް ވާހަކަ ދެއްކިއެވެ.
“ކީއްވެގެންތަ އެ ފޯނު ނެގީ؟” ފާއިޤް އެ ސުވާލުކޮށްލީ ހިސާބެއްގެ ނުރުހުންތެރިކަމާއި އެކީގައެވެ. އޭނައަށް ފަސްދީގެން ހުރި އަނުމްއަށް އެންމެ ފުރަތަމަ ފާއިޤް އެ ބުނި އެއްޗެއްގެ މާނައެއް ނޭނގުނެވެ. އެހެނަސް އޭގެ ދެވަނަ ސިކުންތުގައި ފާއިޤް އެންމެ ފަހުން އޭނަ ގާތު ބުނެލި ވާހަކައާއެކީ މައުވާގެ ފަރާތުން އޭނައަށް ލިބުނު ކޯލު މަތިން ހަނދާންވިއެވެ.
“އޯ އެ ކޯލް ވާހަކަ ދޯ…..” އަނުމް ފަސްއެނބުރި ފާއިޤްއަށް ބަލަމުން ކިޔައިދޭން އުޅުނު ވަގުތު ފާއިޤް އަނެއްކާވެސް ވާހަކަ ދެއްކިއެވެ.
“ކީއްކުރަން އެކަހަލަ މީހަކާ ވާހަކަ ދައްކައި އެކަހަލަ ކަމެއްކުރަން އެއްބަސްވީ؟ ނޭނގޭތަ އެމީހުން އެއުޅެނީ އަނުމްގެ އަގު ވައްޓާލަންކަން؟” ފާއިޤް އެ ސުވާލުކުރިއިރު އެމޫނުމަތިން ކަންބޮޑުވުމެއް އަނުމްއަށް ފެނުނެވެ. އެއީ އޭނައަށްޓަކައިވި ކަންބޮޑުވުމެއްކަން އެނގުންވި ވަގުތު އަނުމްގެ ހިތް އުފަލުން ނަށައިގަތެވެ. ފާއިޤް އެހެން ހުންނައިރުވެސް ހާދަ ރީއްޗޭ ހިތަށްއެރިއެވެ. ހަމަ އެހިނދު ފާއިޤްއަށް އޭނަގެ ޙަޔާތުގެ ހުރިހާ ކަންތައް އެނގޭތީވެސް ހިސާބަކަށް ޙައިރާންވިއެވެ. އެހެނަސް އެކަމާމެދު ސުވާލުކުރުމުގެ ކުރިން އޭނަގެ ޖަވާބަކަށް އިންތިޒާރުކޮށްގެން ހުރި ފާއިޤްއަށް ޖަވާބުދޭން އޭނަ ބޭނުންވިއެވެ.
“އަހަންނަކަށް ނޭނގޭ ތިކަމެއް. އެގުޅި މީހަކު ބުނީ އަހަރެން މަޝްހޫރުވާނެޔޯ އެ ޝޯއަށް އެރީމަ…” އަނުމް އުޖާލާވި ހިނިތުންވުމަކާއެކީ އެހެން ބުނެލީ ފާއިޤްއަށްވާ ގޮތެއް ބެލުމަށެވެ. އޭނަ އެހެން ބުނެލުމާއެކު ފާއިޤްގެ ދަތްކުނޑި ވިކި އެމޫނުމަތިން ނުރުހުންތެރިކަން ފާޅުވިއެވެ.
“މަޝްހޫރުވާނެއޭ ބުނީމަ އަނުމް ޤަބޫލުކުރީތަ؟! އޭނަ ނުބުނަނީތަ އަނުމް ކުރަންޖެހޭ ކަންތަކުގެ ވާހަކަ. އަނުމް އެމީހުންނަށްޓަކައި ވާހަކަ ދައްކަން އެއްބަސްވީ ތި ރީތި އަޚްލާޤުގެ މަތިން ހަނދާން ނައްތާލާފަތަ؟ އެހެންނޫނަސް އެތާނގަ ތިބޭނެ އެކި ޒާތްޒާތުގެ މީހުން. އެއީ އަނުމް ދާން ރައްކާތެރި ތަނެއްނޫނޭ އަނުމް!” ފާއިޤް ވާހަކަ ދައްކަމުން ދިޔަދިޔަހެން އަނެއްކާވެސް ލަސްލަހުން އެމޫނުމަތިން އެއްކަލަ ކަންބޮޑުވުން ފާޅުވާން ފެށިއެވެ. އެ މަންޒަރު ފެނިގެން ދިޔަދިޔަހެން އަނުމްގެ ތުންފަތްމައްޗަށް ލުއި ހިނިތުންވުމެއް ވެރިވިއެވެ.
“އަހާލެވިދާނެތަ ކީއްވެގެންކަން ފާއިޤް މާ ބޮޑަށް އަހަންނާމެދު ތި ކަންބޮޑުވަނީ ކީއްވެކަން؟” އަނުމް މަޑުމައިތިރި އަޑަކުން އަހާލިއެވެ. އެއާއެކު ފާއިޤް ފުން ނޭވައެއް ދޫކޮށް ދުރަށް ނަޒަރު ހިންގާލިއެވެ. އެ ސުވާލުގެ ޖަވާބަކަށް އޭނަގެ ތުއްތަގެ ކުރިން އަނުމްގެ ރައްކާތެރިކަން އޭނަގެ ހިތަށްވެރިވި ގޮތުން ޚުދު އޭނަވެސް ޙައިރާންވާ ގޮތްވިއެވެ. އެހެނަސް އޭނަ އަވަސްއަވަހަށް ޖަވާބުދިނެވެ.
“އަހަންނަށް….ވަރަށް ގިނައިން އަނުމްއާމެދު ވިސްނޭތީވެއޭ ބުނީމަ ފުދޭނެތަ؟” ފާއިޤް އޭނަގެ ޢާއްމު ސީރިއަސްކަމާއެކީ ބުނެލިއެވެ. އޭނަގެ އެ ބަސްތައް އިވިފައި އަނުމްގެ ހިނިތުންވުން ފުންވިތަން ފެނިފައި އޭނައަށް ބުނެވުނު އެއްޗެއް ދޭހަ ކުރެވުމުން ފާއިޤްގެ އަނގަ ސަކަރާތްވެ އަމިއްލަ ނަފްސަށް ރުޅި އާދެވުނެވެ. އޭނަ އިތުރު އެއްޗެކޭ ނުބުނެ ދިގު ފިޔަވަޅުތަކެއްގައި އެތަނުން ދާން ހިނގައިގަތީ ދުލުން އެކަން ރަނގަޅުކުރަން އުޅުމުން އިތުރު ގޯހެއް ހެދިދާނެތީވެއެވެ. ދެމީހުން އެކަކު އަނެކަކަށް ފަސްދެވުނުއިރު ދެމީހުންގެ މޫނުމަތިން ވެސް ހިސާބެއްގެ ރަތްކަމެއް ފެންނަމުން ދިޔައެވެ.
ފާއިޤް އެ ދިޔަގޮތަށް ގޮސް ސްކޫލުގެ ގޯތިތެރެއިން ހިނގާފައި ގޮސް ގެއަށް ދިޔުމަށްޓަކައި އޭނަގެ ކާރަށް އަރަން އުޅުނެވެ. އެހެނަސް އޭގެކުރިން ސްކޫލްގެ ގޭޓު ކައިރީގައި ހުރި މީހަކު އޭނައަށް ގޮވާލިއެވެ.
“އަޙުމަދު ފާއިޤް ސަލީމް!” ފިރިހެނަކު ގޮވާލި އަޑަށް ފާއިޤަށް އެދިމާލަށް ބަލާލެވުނެވެ. އެހިނދު ގޭޓު ކުރިމަތީގައި ކަޅުކުލައިގެ ކޯޓު ފަޓުލޫނުގައި ދެ ބޮޑީގާޑުންހެން ހީވާމީހުން ތިބިއިރު އެމީހުންގެ ފަހަތަށް ވާ ގޮތަށް މަޑުކޮށްގެން އޮތީ ކަޅުކުލައިގެ އޮފުއަރާ ކާރެކެވެ. އޭނައަށް ގޮވި މީހާ ހަނާއަޅާލުމުން ފާއިޤް އެދިމާލަށް ދާން ފެށީ މޭ ނުބައި ކުރާ ގޮތްވެފައި ހުރެއެވެ. އޭނަ ގޮސް އެމީހާ ކުރިމަތީގައި މަޑުކޮށްލުމާއެކު އެމީހާ ވާހަކަ ދެއްކިއެވެ.
“ރައީސް ސަލީމް އެދިލެއްވީ ފާއިޤްއާ ބައްދަލުކުރައްވަން. އަޅުގަނޑުމެން މިއައީ ތި ބޭފުޅާ ބަލާ…” އެމީހާ އަދަބުވެރިކަމާއެކީ ބުނެލިއެވެ. އެހިނދު ފާއިޤްގެ ގޮށްމުއްކެވުނެވެ. އޭނަ ވަގުތުން ނޫނެކޭ ބުނަން ބޭނުންވިއެވެ. އެހެނަސް ކުއްލިއަކަށް އޭނައަށް މިފަދަ އެންގުމެއް އަންނާނީ ކީއްވެތޯ ދެނެގަންނަން ވެސް ބޭނުންވުމުން އެމީހުން ދޮރު ހުޅުވާލުމުން ފާއިޤް އެ ކާރަށް އެރިއެވެ. އަނުމްއަށް ސްކޫލްގެ ގޯތިތެރެއަށް ނިކުމެވުނު ވަގުތަކީ ފާއިޤް އެ އެރި ކާރު ނައްޓާލި ވަގުތެވެ. އަނުމްއަށް ޙައިރާންކަމެއްގައި އެ ކާރު ދިޔަ ދިމާލަށް ބަލަހައްޓައިގެން ހުރެވުނެވެ.
ފާއިޤް މުޅި ދަތުރުމަތީގައި ޚިޔާރު ކުރީ ހިމޭންކަމެވެ. އޭނަ އެތައް ސުވާލެއް ކުރަން ބޭނުންވިއެއްކަމަކު އޭނަ ސީދާ އެމީހަކާއި ސުވާލުކުރަން އަމިއްލަ ނަފްސު ކޮންޓްރޯލް ކުރިއެވެ. އޭނަގެ މަންޒިލާއި ހަމައަށް ދެވެންދެން ފާއިޤް ބޭރުތެރެއިން ފެންނަމުން ދިޔަ މަންޒަރުތަކަށް ބަލަން ހުރީ އެހެންވެއެވެ. އޭނަ ކުޑަދޮރުން ބޭރުބަލައިގެން ހުއްޓާ ކާރު ލަސްވާން ފެށިތާ މާ ގިނައިރެއްނުވެ އޭނައަށް ފެނިގެން ދިޔައީ ރައީސުލް ޖުމްހޫރިއްޔާގެ އޮފީހުގެ ގޭޓެވެ.
ނުނިމޭ
މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.
Other Articles
ވަމޭ ގާތުގައި 10
މިނަން ތިހިތުން ފިލުވާލަނީހޭ…04
39 Comments!
Comments are closed.
Assalaam’alaikum. Dhen onnaany last part. Last part wednesday ga In Sha Allah ^_^
Ma Sha Allah! Mi part vx v reethi!??? V helpful mi story thah kee ma! I always thought it will be u, when I saw your name! The stories reminded me of the reminders you give!❤️❤️ I simply love the story of Luqman A.S you told us about! I actually ended up by hearting Surah Luqman because of that!?❤️And now that I’m sure! I’m really really happy! Alhamdhulillah! May Allah bless you and your hardwork! I really appreciate it…. And lysm!❤️?
Subhaanallah it cheers me up every time to see your comment Dheenam 😀 Honestly I didnt think i was doing much when i shared those stories and ayahs with you. never thought it would leave such an impact. But no doubt its only Allah Who puts barakah in even the smallest of our good deeds Subhaanallah! And you are very inspiring Ma Sha Allah. Baarakallah Laki! Because I haven’t memorized Surah Luqman yet *hides* I only memorized the bit i explained to you and still have only that bit of that surah memorized to this day. But will get to that surah soon In Sha Allah. 😀 May Allah bless you more and put barakah in every good you do. Love you too, love <3 <3 <3
Maheera ah thedhu magu dhahkavaashi?
Janaa vhk nuninmahche?
Ahan! vaahaka nimmeemaennu Ayaaz ah Malaak aa eky happy ending egga ulheveynee? 😉
Wow wow wow wowwwww. Mi part es varah reethi masha allah
Waiting for next part ???❣️❣️❣️❣️❣️❣️❣️❣️❣️❣️
maa dhigu maazeege bai boa govaafi
Nooney maaxeege bai genes dhyfa eyny enme furihama ah… Alhey haadha ryhchey mi vaahaka masha allah♥ mi vaahaka nimunyma haadha foohi vaaney…. Gud luck dear….. Lysm….. ❤❤ god bless u dear…. Dheenee kanthah thah thihaa furihama ah genes dhyfa hurythy v ufaavey…. So intresting…. Mi raajjeyga thi maheera hen ulhey kithah myhun ebw ulhey…. E enmenah thedhu magu dhahkavaathw dhuaa kuran…
me: to be honest jana ves hury boluga rissaafa mi bai liye nimunu iru. hehe….jana kuruvaane ey bunefa oiyvva expect kuri varah vure dhiguveema dho ehen evy. can feel you. ekamaku maazy dhigu kuran jehuny hurihaa kameh mibain address koh nimman beynunveema ingey 🙂
Kudaa: kudaa ah reethi dho? hehe…kudaa thibunihen raajjeyga ulhey ekahala meehunnah visnaafaey mi vaahaka jana ekulavaaly. Maai Allah alhamen emmennah hidhaayaiy ithuru kohdhevvai alhugandumenge haalathu ekalaange ruhivodigathun libey fadha gothakah badhalu kuravvaashi. Ameen! <3 Love you too Kudaa :*
Nooney maaxeege bai genes dhyfa eyny enme furihama ah… Alhey haadha ryhchey mi vaahaka masha allah♥ mi vaahaka nimunyma haadha foohi vaaney…. Gud luck dear….. Lysm….. ❤❤ god bless u dear…. Dheenee kanthah thah thihaa furihama ah genes dhyfa hurythy v ufaavey…. So intresting…. Mi raajjeyga thi maheera hen ulhey kithah myhun ebw ulhey…. E enmenah thedhu magu dhahkavaathw dhuaa kuran…
Masha allah ❤ vrh rythi btw gonna miss ur stories and yuh sis?mi vhka nimmaafa alun ehn vhka eh liyaanantha?ummeedhu kuran liyaane kamah may allah bless u and sending so much love?❤
Naafy haadha rovifa…jana ves dheravejje mihaaru. In Sha Allah vaahaka thah adhives liyaanan. ekamaku ehaa avahah aa vaahaka eh fennaane kamuge guarantee eh dheveykah neh. jana ge kuriah huri plan thah kiyaidheynan fahu bai up koffa In Sha Allah. May Allah bless you more. Ameen! Much love <3 and smile 🙂
woah nyc story i love this story
Alhamdhulillah! 😀
Blog post:
“We keep asking for knives, and Allah protects us from them.”
I heard these words a few years ago and they still ring in my ears like yesterday. It’s a reminder that I never get over. This was from a lecture by sister Yasmin Mogahed and it was about marriage. In the lecture she gives a beautiful example of a child, who sees a knife and tries to take it. But his mom or his parent takes the knife away from the child, because the parent knows that it will hurt him. But the child doesn’t know that. So he might start crying, bawling in tears. It might ruin his whole day and it might make him sad every time he sees the knife and knowing he will not be allowed to have it. But at the end of the day, the knife is kept away from him only for his own safety.
We are no different from that child. Here we are all grown up, knowing the danger a knife may possess. But we don’t realize that the reality of somethings in our lives are even more dangerous than a knife. And unknowingly, we beg and cry to Allah to grant us those very things. But Allah, being the All-Knowing, withholds us from having them. And that’s only because of the Love He swt has for us. Subhaanallah!
So never, NEVER underestimate the power of seeking guidance from the All-Knowing when you make a decision in life. Never think that you will make that same decision even if you prayed istikhaara. Never think that you are sure about the boat you are going to sail in. Never think that you will regret leaving someone or something even after that’s what istikhaara directed you towards. Because the regret after experiencing the pain from that ‘knife’, would be far worse. And at the end of the day, no matter how many stories you read or movies you watched about ‘first love’, Allah is the Turner of our hearts. If He swt enabled us to love something that isn’t good for us, He swt is also fully Capable of making us love what IS good for us.
May Allah grant us all goodness and grant us the wisdom to see the good in His plans for us. Ameen!
Blog post (Dhivehi)
“އަޅުގަނޑުމެން ރޮއިރޮއިފައި އެދެނީ ތޫނު ވަޅިތަކެއް ލިބިގަތުމަށެވެ. އެހެނަސް ﷲ ސުބުޙާނަހޫ ވަތަޢާލާ އަޅުގަނޑުމެން ރައްކާތެރި ކުރައްވައެވެ.”
މިއީ އަޅުގަނޑަށް މީގެ އަހަރުތަކެއް ކުރިން އިވުނު ބަސްތަކެވެ. އެހެނަސް މި ބަސްތައް އިއްޔެ އިވުނު ބަސްތަކެއް ފަދައިން އަޅުގަނޑުގެ ކަންފަތުގައި ގުގުމައެވެ. މިއީ އަޅުގަނޑު ހަނދާން ނުނެދޭ ޒާތުގެ ހަނދުމަކޮށްދިނުމެކެވެ. މި ބަސްތައް އަޅުގަނޑަށް އިވުނީ ޔާސްމީން މުޖާހިދުގެ ދަރުހަކުންނެވެ. ކައިވެންޏާއި ގުޅިގެން ދެވުނު އެ ދަރުހުގައި ދެއްވާފައިވަނީ ވަރަށް ރީތި މިސާލެކެވެ. ތޫނު ވަޅިއެއް ފެނި އޭތި ނަގަން މަސައްކަތްކުރާ ކުޑަކުއްޖެއްގެ މިސާލެވެ. އެހެނަސް އެކުއްޖާގެ މަންމަ ނޫނީ ބެލެނިވެރިޔާ އެ ވަޅި އެ ކުއްޖާއާއި ދުރު ކުރުވައެވެ. އެކުއްޖާއަށް އެ ވަޅިން ލިބޭނެ ގެއްލުމުން ސަލާމަތް ކުރުމަށެވެ. އެހެނަސް އެކުއްޖާއަށް އެކަމެއް ނޭނގެއެވެ. އެހެންކަމުން އެކުއްޖާގެ އެ އެދުން ފުރިހަމަ ނުވުމުން އެކުއްޖާ ކަރުނަ އަޅައި ގަދައަށް ރޯނެއެވެ. އޭގެ ސަބަބުން އެކުއްޖާގެ މުޅީ ދުވަސް ޚަރާބުވުން ގާތެވެ. އަދި ވަޅިއެއް ފެންނަ ކޮންމެ ވަގުތަކު އެ ވަޅި ނުލިބޭނެކަން އެނގުމުން އެކުއްޖާ ދެރަވުންވެސް އެކަށީގެންވެއެވެ. އެހެނަސް އެ ވަޅި އެ ކުއްޖާއާއި ދުރުގައި ބެހެއްޓިފައި ހުންނަނީ އެކުއްޖާގެ ސަލާމަތަށްޓަކައެވެ.
އަޅުގަނޑުމެންނާއި އެކުއްޖާއާއި މާ ބޮޑު ތަފާތެއްނެތެވެ. މިއަދު ދެ ފައި މައްޗަށް ކޮޅަށް ތެދުވެވުމުން ވަޅިއެއްގެ ހުރި ނުރައްކާތެރިކަން އަޅުގަނޑުމެންނަށް ދޭހަ ކުރެވޭނެއެވެ. އެހެނަސް ޙަޔާތުގެ ބައެއް ކަންތައްތަކުގެ ފަހަތުގައިވާ ޙަޤީޤަތް އެ ވަޅިއަށްވުރެ ވެސް ނުރައްކާތެރިކަން އަޅުގަނޑުމެންނަށް ރޭކާނުލައެވެ. އެހެންކަމުން ނޭނގުމެއްގެ ތެރޭގައި އަޅުގަނޑުމެން ﷲ ގެ ޙަޟްރަތުގައި ރޮއި އާދޭސްކޮށް އެކަންކަމަށް އެދި ދަންނަވަމުއެވެ. އެހެނަސް އެންމެ މޮޅަށް ދެނެވޮޑިގެންވާ ﷲ ސުބުޙާނަހޫ ވަތަޢާލާ އަޅުގަނޑުމެން އެކަންތަކުން ދުރުކުރައްވައެވެ. އެގޮތަށް އެކަންތައް ވަނީ އެކަލާނގެ އަޅުގަނޑުމެންދެކެ ވާ ލޯބިފުޅުގެ ތަނަވަސްކަމުންނެވެ. ސުބްޙާނަ ﷲ!
އެހެންކަމުން ތިބާގެ ޙަޔާތުގައި ނިންމުމެއް ނިންމާއިރު އެންމެ މޮޅަށް ދެނެވޮޑިގެންވާ ފަރާތުގެ ޙަޟްރަތު ހިދާޔަތް ހޯދުމުގެ މުހިއްމުކަމާމެދު ދަށްކޮށް ނުދެކޭށެވެ. އިސްތިޚާރާ ކުރުމަށްފަހު ވެސް ތިބާ ނިންމާނީ ކުރިން ވެސް ނިންމި ގޮތަށްކަމާމެދު ޔަޤީން ނުކުރާށެވެ. ތިބާ ޙަޔާތުގައި ދަތުރުކުރަން ނިންމި އުޅަނދާއިމެދު އެހާ ބޮޑު ޔަޤީންކަމެއް ނުބާއްވާށެވެ. އިސްތިޚާރާ ކުރުމަށްފަހު ތިބާ ކޮންމެވެސް މީހެއްގެ ކިބައިން ނޫނީ ކަމެއްގެ ކިބައިން ދުރުވުމަށް ޢިޝާރާތް ލިބުމުން އެމީހަކާއި ނޫނީ އެކަމަކާއި ދުރުވުމުން ތިބާ ހިތާމަކުރާނެކަމަށް ހީނުކުރާށެވެ. އެހެނީ ‘ވަޅިއެއްގެ’ ފަރާތުން ލިބޭ ވޭންތައް ތަޖުރިބާ ކުރުމުން ތިބާއަށް ލިބޭނެ ހިތާމަ މާ ބޮޑުވާނެއެވެ. އަދި ‘ފުރަތަމަ ލޯބި’ އާއި ބެހޭގޮތުން ތިބާ ކިޔާފައިވަނީ ކިތައް ވާހަކަ ކަމަށްވިޔަސް އަދި ބަލާފައިވަނީ ކިތައް ފިލްމު ކަމަށްވިޔަސް، ޙަޤީޤަތަކީ އަޅުގަނޑުމެންގެ ހިތްތައް ބަދަލުކުރައްވާ ރަސްކަލާނގެއަކީ ﷲ ކަމެވެ. އަޅުގަނޑުމެންނަށް ރަނގަޅު ނޫން ކަމެއްދެކެ ލޯބިވުމަށް އެކަލާނގެ އަޅުގަނޑުމެންނަށް ކުޅަދާނަކަން ދެއްވިނަމަ، އަޅުގަނޑުމެންނަށް ރަނގަޅު ކަމަކަށްޓަކައި އަޅުގަނޑުމެންގެ ހިތުގައި ލޯތްބެއް ލެއްވުމަށްވެސް އެކަލާނގެ ކުޅަދުންވަންތަވެ ވޮޑިގެންވެއެވެ.
މާތް ﷲ އަޅަމެން އެންމެންނަށް ހެޔޮގޮތް މިންވަރުކުރައްވައި އެކަލާނގެ އަޅުގަނޑުމެންނަށްޓަކައި ރާއްވަވާ ރޭވުންތަކުގެ ފަހަތުގައިވި ހެޔޮކަން ދެނެގަނެވޭނެފަދަ ޙިކްމަތެއް ދެއްވާށި! އާމީން!
Assalaam’alaikum. vaahakaige fahu bai wednesday night ahves jana ah nunimmeynehen heevaathy e part up vaany thursday night ga kan hurihaa kiyuntherinnah angaaladhen In Sha Allah. kiyuntherin understand vaane kamah ummeedhukuran. e part up kuran varah excite vefa jana ves mihiry Alhamdhulillah! 😀 Hurihaa kiyuntherin kehtherikamaa eku inthizaaru kohdheyne kamah ummeedhukuran In Sha Allah <3 <3 <3
Konme dhuvahaku vaahaka up veythw beley ebw… Alhe nimaakah beynumeh nuvey mi vaahaka eh… Alhe kudaa ge life nama dhw mee…. ???
Kobaabaa last bai . Waiting for the next part..
If you don’t mind old are you jana
Masha Allah vv salhi igey. Jana pls ehn vaahakaeh up kurahchey. Asluves dheenee side in liyaathy vv interesting. Kiyaalyma vv hiyhama jehun libey.
Waiting waiting…
Assalaam’alaikum. jana mivaahaka nubunumavvure bunelun kanneynge rangalhuvaany kiyuntherin nuruhunviyas. jana ah adhives fahubai liyevifa hury gaaigandakah dhebai kulha ebbayah. mi dhuvaskolhu jana varah bodah busy veema free vaa gadithakuga ves varah varubalivefa hunnaathy mihen mivy. mirey hama nimman kanda alhaigen mihiry. ekamaku mirey avas vaguthegga up kureveynehen jana ah hiyeh nuvey. ehenveema hurihaa kiyuntherin kairi jana bunaany maadhamaa hendhunu 9 vaairah vaahaka upvytho balan In Sha Allah. maadhamaa friday veema jana ah varah time ves libeyne In Sha Allah. ehenveema. 🙂 Hope you will understand
Its ok jana we understand.. waiting forthe last part eagerly
Kobaatha mi story ge 46 vana bai
Kobaatha Jana. You should have uploaded half vias iyye or we’d night ga. Ekkoh up kuran hadhaigen Miadhu vess nuvey :/ very disappointed. Mihaaru up kurias kiyaahiy vess kendijje. Ehaa ginain belijje up kurithoa
Waiting..waiting..waiting
Ajaibeh! 9 jahaa boduveeiru vess vaahaka eh nei fennaakah. Thivarunvanyaa Jana nuliyeba vaahaka.
Saabahey adhi thivaru vaakah nuve ehnu. Jana vx ehen faharu thakah hama bunaa dhuvahah up kohdhe. Dhn mifaharu kuda koh las veenu. Eyna ah vx vee varakun liyaane. Up kuryma kiyan vx thibeyny hama aharemen ehen veema keiy kohgen thibyma eveenu. Dhn jana kairy nuliyan kiyaafa amilla ah liyan veenu
Jana mihaaru 9 jahaifi adhives up kuraakah nuveytha?
Sis take your time. And write. So it will be awesome. ?
Jana adhi miadhu 9 nujahanee tha??
Sis meehun kiyaa ehchissah alhaanulaathi take ur time sis❤ehnya ves bunaa gadiah sis up kohdhey mi fhru ingijje hama vrh bxy v kan hehe i dont mind ❤ sis ah time v varakun liyaany eyeun awesome vaaneh❤❤❤
Mi noony jana abadhuves bunaa dhuvahaka update kohffa iny…enekkaa thireega comment koffa ebain wednesdayga nuvyma fridayga kurey tho try kuraana mey…busy kamunnukoh lasvanee… dhen miadhu nuvejjeyyaa dhen ves jana bunaane… gina liyun therin gothah jana nyndhey javaabeh nudhyves..atleast vaanuvaa bunan ves eba buney.eves ahrennah engigen mifaharu ekani….veema ehaa burakoh ulhemun ves jana ekodhdhey kanthakah shukurukoh hihvaru libey kahala baheh bunelun kyh tho.e ves insaaneh .dhiriulhumattaka ehen masakkaiyh thah ves kuraane hama aharemen fadhain dhw. Varubalives vaane..bali ves vedhaane.aharenge hiyaalu hama bunely.echcheh bunelumuge kurin enakaage haalatheh ves balaalun kyh tho.
Saabahey kAlemennah. varah dhigukoh kanneygeyeynun e liyanee. comment ga ebaineynun busy vaahaka liyefa. Kehtherikan nethiyaamun vaahaka nukiyabala. kalemen vaahakaeh liyuneema engeynee kihaa bura massahkathehkan eiy. understand Vebala.
Kobaatha adhivx nunimeytha? Alhe 2 bayakah behi nama dho..inthizaaru kohkoh halaaku
Kobaaa next part….
Pis pis, kudakoh lassvegentha miulhenee ? since Wednesday Jana Kian feshi up kuraanamey but vaathaneh nufeney.
Dear dhaalaa
konmeves keiytherikameh hunnanjeheyne dho.
jana liyevuneema up kuraaney. jana ves e thah vagutheh hus kohfa aharemennah takaa vaahaka liyaairu adhives bavanvee. thi varun vaaahaka nukiyabala. bala busy vedhaane dho hama. kameh vaairah bavanyaa vaahaka nukiyaa. Adu ivigge tha.