ވަޢުދު (ސައުރަޔާޅީސްވަނަ ބައި)

“ސްމައިލް ކުޑަކުރާނެ ކަމެއްނެތް….އަބަދުވެސް ތިގޮތުގަ ހުންނަންވީ…” އަޔާޒް މަލާކްގެ ކޯތާފަތުން ދެއަތް ނަގާލަމުން މަޑުމައިތިރި އަޑަކުން ބުނެލިއެވެ. އެއާއެކު އަނެއްކާވެސް މަލާކްގެ ހިނިތުންވުން ފުންވެގެން ދިޔައެވެ. ހަމަ އެވަގުތު ރޫމުގެ ދޮރުގައި މީހަކު ޓަކި ޖަހާލި އަޑު އިވިފައި މަލާކް ސިއްސައިގެން ދިޔަ ވަގުތު ދެމީހުންނަށް ވެސް އެދިމާލަށް ބަލާލެވުނެވެ. މަލާކް ވަގުތުން އޭނަގެ ބުރުގާ ދޭން އެދުމުން އަޔާޒް މަލާކަށް ބުރުގާ އަޅަން އެހީވެދިނެވެ. އަޔާޒް އާދައިގެ ހިނގުމެއްގައި ދޮރު ހުޅުވަން ދިޔައީ އެއީ ކާކުކަން އެނގޭ ޙާލުގައެވެ. އެހިނދު އޭނަ ހިސާބަކަށް ނުތަނަވަސްވިއެވެ. ބައްޕަ އަންނައިރު މަލާކްގެ ހޭ ހުންނާނެކަމަށް އޭނަ ހިއެއްނުކުރެއެވެ. މިފަދަ ޙާލެއްގައި މަލާކަށް އެހާ އާކަމެއް އެނގުން ރަނގަޅުވާނެތޯ ހިތަށްއެރިއެވެ. އެހެނަސް އެ ވަގުތު ވެސް މަލާކްގެ ޙާލަތު ފުދޭވަރަކަށް ރަނގަޅުވުމުން އަޔާޒް ދޮރު ހުޅުވާލީ ޖެހިލުންވުމެއްނެތިއެވެ. އެވަގުތު އޭނަ އުއްމީދު ކުރި ފަދައިން ދޮރުމަތީގައި ހުރީ މަޒީދު ނޫން ދެވަނަ މީހެއްނޫނެވެ. މަޒީދު އަޔާޒަށް ހިނިތުންވުމެއްދީ އަޔާޒްގެ ނަމުން ގޮވުމަށްފަހު ވޯޑުގެ ތެރެއަށްވަނެވެ. އެހިނދު މަލާކަށް ސީރިއަސްކަމާއެކީ އެ ބީރައްޓެހި މޫނާއި ދިމާލަށް ބަލަން ހުރެވުނެވެ. ނޭނގޭ ސަބަބަކާހުރެ އެއީ އޭނަ ދުށް ސޫރައެއްހެން އޭނައަށް ހީވިއެވެ. މަލާކް ވިސްނުމެއްގައި އިންދާ އެމީހަކު ވާހަކަ ދެއްކިއެވެ.

“ކިހިނެއްތަ؟ މަލޫ؟” އެމީހަކު އޭނައަށް ގޮވާލި ނަމަކުން މަލާކް ހުއްޓުން އަރާ ގޮތްވިއެވެ. އެ ނަމަކީ އޭނަ ގާތުން ދަންނަ އެއްވެސް މީހަކު އޭނައާއި މުޚާތަބުކުރަން ބޭނުންކުރާ ނަމެއްނޫނެވެ. އެހެނަސް ނޭނގޭ ސަބަބަކާހުރެ އޭނައަށް އެހެން ގޮވި މީހެއްގެ ފަނޑު ހަނދާނެއް އާވާން ފެށި ވަގުތު އެ ބީރައްޓެހި މީހާ ހިނިތުންވުމަކާއެކީ އޭނަ ކައިރިއަށް އަންނަން ފެށިއެވެ. އެއީ ބީރައްޓެހިއަކަށްވުމުން ފުރަތަމަ ސިކުންތުގައި ހިތުގައި ނުތަނަވަސްކަމެއް އުފެދުނެއްކަމަކު އެއީ އޭނައަށް ހެޔޮ އެދޭ މީހެއްކަމަށް ސިކުނޑީގެ ކަނަކުން ގޮވަމުން ދިޔައެވެ.

މަލާކް ވިސްނުމެއްގެ ތެރޭގައި އިންދާ މަޒީދު ގޮސް މަލާކްގެ އެނދު ކައިރީގައި ބެހެއްޓިފައިވި ގޮނޑީގައި އިށީންއިރު އަޔާޒް ވެސް އެވަގުތަށް ވަކި އެއްޗެކޭ ނުބުނެ އެނދުގެ ކުރިމައްޗަށް ވާ ގޮތަށް ހުރި ސޯފާގައި އިށީނެވެ. ބައްޕަ މަލާކަށް ގޮވި ނަމުން މަލާކަށް ވަމުން ދިޔަ ގޮތުން ޚުދު އޭނަވެސް ހުރީ މި ވާގޮތެއް ދެނެގަންނަން ބޭނުންވެފައެވެ.

“ހަނދާން އެބަހުރިތަ މިއީ ކާކުކަން މަލޫ؟” މަޒީދަށް އެ ސުވާލުކޮށްލެވުނީ ހިތާމަވެރި ދެލޮލާއެކީ ހިނިތުންވެލަމުންނެވެ. އޭނަގެ ހިތަށް ކިރިޔާވެސް އުފަލެއް ލިބުނީ މަލާކް ކުޑައިރު މަލާކާއިއެކީ ހޭދަކުރަން އޭނައަށް ލިބުނު އެންމެ ދުވަހެއްގެ މަތިން ހަނދާންވެގެން ދިޔުމުންނެވެ. އަދި އޭނަ ހީކުރި ގޮތާއި ޚިލާފަށް މަލާކްވެސް އެދުވަސް ހަނދާން ހުރިހެން ހީވުމުންނެވެ. އެހެނަސް މަލާކް ދެބުމަ ކައިރިކޮށްގެން ދެންވެސް ވިސްނުމެއްގައި އޭނައަށް ބަލަހައްޓައިގެން އިންނަން ފެށުމުން އޭނަގެ ހިނިތުންވުން ފަނޑުވިއެވެ. ދުރުގައި ހުރި އަޔާޒް އެވަގުތު މަލާކްގެ ސިކުނޑިއަށް ބާރުކުރާނެކަން އެނގި އެއްޗެކޭ ބުނަން އުޅުނު ވަގުތު މަޒީދު ވާހަކަ ދެއްކިއެވެ.

“މަލޫ އެދުވަސްފަހުން ދިޔައިންތަ ކޯމަސް ބަލަން؟” މަޒީދު ކަރުނަ ހިލެން ފެށި ލޮލާއެކީ އެ ސުވާލުކޮށްލީ އެއިން މަލާކް އޭނަ މަތިން ހަނދާންވާނެކަމުގެ އުއްމީދުގައެވެ. އޭނަގެ އެ އުއްމީދު ސިކުންތުކޮޅެއްގެ ތެރޭގައި ފުރިހަމަ ވީ އެ ސުވާލު އިވުނުތާ ސިކުންތުކޮޅެއްގެ ތެރޭގައި ކަމެއް ހަނދާންވި ފަދައަކުން މަލާކްގެ މޫނުމަތި އުޖާލާވެގެން ދިޔުމުންނެވެ.

“ކޯމަސް ބޭބެ!” މަލާކް އެހެން ބުނެލި ހިނދު އޭނަގެ ތުންފަތްމައްޗަށް ހިނިތުންވުމެއް ފެތުރުނެވެ. އޭނަގެ ޙަޔާތުގައި ވެސް އައި އެންމެ އުފާވެރި ދުވަސްތަކުގެ ތެރެއިން ދުވަހެއް ހަނދާންވެގެން ދިޔުމުން އޭނައަށް ބޭއިޚްތިޔާރުގައި ލުއި ގޮތަކަށް ހީލަމުން އަނގަމަތީގައި އެއްއަތް އަޅާލެވުނެވެ. އެހިނދު މަޒީދުގެ ވެސް ހިނިތުންވުން ފުންވެގެން ދިޔަ ހިނދު ދުރުގައި އިން އަޔާޒަށް ވާނުވާއެއް ނޭނގި އިނދެވުނެވެ. އެހެނަސް އެވަގުތު މަޒީދާއި މަލާކްގެ ހަނދާނަށް އަންނަން ފެށީ މަލާކަށް 7 އަހަރުގައި އެދެމީހުން ފުރަތަމަ ބައްދަލުވީ ދުވަހެވެ.

އެދުވަހަކީ މަސްޢޫދު ބަލިވުމުގެ ސަބަބުން ސާރިޔާ މަސްޢޫދު ގޮވައިގެން އަނެއް ރަށުގައި ހުންނަ ހޮސްޕިޓަލުގައި ބާއްވައިގެން އުޅުނު ދުވަހެކެވެ. ސާރިޔާ އެދުވަހު ހެނދުނު ރަށުން ދިޔައީ މަލާކް އެގޭގެ ކައިރީގައި އުޅޭ ފަލާޙާގެ ގެއަށް ލާފައެވެ. ދުވަސްވަރަކީ ޗުއްޓީ ދުވަސްވަރަކަށްވުމުން އެގޭގެ ތެރޭގައި އުޅޭ ކުދިން ކުޅެމުން ދިޔަ އެކި ކުޅިވަރުތައް މަލާކަށް ފެންނަމުން ދިޔައެވެ. އެކުދިން ގޭގެ ތެރޭގައާއި ގެއިން ބޭރުގައި ދުވެ ހެމުން ކުޅެމުން ދިޔަ ކުޅިވަރުތައް ބަލަން ގޭގެ ތެރޭގައި ހުރި ފަތްޖެހި ގޮނޑިއެއްގައި މަލާކަށް އިނދެވުނީ ދެރަވެފައިވާ ހިތަކާއި އެކީގައެވެ. އިތުރަށް ދެރަވަމުން ދިޔައީ ޗުއްޓީ ތެރޭގައި އެކުދިން މިހާތަނަށް ކުރި ކަންތަކުގެ ވާހަކަތައް ވެސް އިވެމުން ދިޔަ ވަރަކަށެވެ. އެ ވާހަކަތަކުގެ ތެރެއިން އޭނަ އެންމެ އަޖާއިބު ކުރުވަނިވި ވާހަކައަކަށްވީ އެ ރަށުގައި ތިބެފައި އަނެއް ރަށަށް ދާއިރު ބައެއްފަހަރު ކޯމަސްތައް ފެންނަ ވާހަކަ އިވުމުންނެވެ. އެ ވާހަކަ އިވުމުގެ ކުރިން އޭނަ ހީކުރީ ކޯމަހަކީ ހަމައެކަނި ބޭރު ޤައުމުތަކުން ފެންނަ މަހެއް ކަމަށެވެ. އެ ވާހަކަތައް އިވިފައި އޭނަ ވެސް ހަމަ ލޮލުން އެ މަންޒަރު ދެކިލަން ބޭނުންވިއެވެ.

“ވަރަށް ރީތިދޯ އާމިނާ؟ އެސޮރުމެން އެކީގަ މައްޗަށް ފުންމާފަ ފެނު އަޑިއަށް ދިޔަތަން ފެނުނުއިރު؟ މަށަށް ވެސް ރީއްޗަށް އެ މަންޒަރު ފެނުނީ ފެނުނީ ދޯނީގެ އިށީންނަ ފިލައިގެ މައްޗަށް ކޮޅަށް އެރީމަ…..ހެހެ….ދެން ހިނގާ އަވަހަށް އަތިރިމައްޗަށް. މިހާރު އަނެއް ގޭގެ ކުދިން ގޮއްސަ ތިބޭނެ. މަލާކް…އަށް ނާދެވޭނެދޯ؟” އެގޭގަ އުޅޭ މަލާކާއި އެއްޢުމުރެއްގެ ކުއްޖަކަށްވާ ނަހުލާ އޭނަގެ އެކުވެރިޔާއާއި ވާހަކަ ދައްކަމުން ގޮސް ގޮނޑީގައި އިން މަލާކަށް ބަލާލަމުން ބުނެލިއެވެ. މަލާކް އޭނަ ވަރަށް ދާން ބޭނުން ވާހަކަ ބުނަން އުޅުނު ވަގުތު ފަލާޙާ އެތަނަށްއައެވެ.

“އުނހު މަލާކް ނުގެންދާނެ. އަތިރިމައްޗަށް ގޮއްސަ ސަކަރާތްޖަހަމުން ދަނިކޮށް މަލާކަށް ގޮތެއްވެއްޖެއްޔާޔޯ؟ މަލާކް ހުންނާނީ ގޭގަ ޓީވީ ބަލަންދޯ ދަރިފުޅު؟ ދައްތަ ވެސް މިދަނީ ކައިރީގަ މިހިރަ އައިސައްތަމެން ގެއަށް ރޯނު ވަށަން. ދައްތަ ދިޔުމުގެ ކުރިން މަލާކަށް ހަވީރު ސައި ހަދައިދީފަ ދާނީ. އެންމެ ރަނގަޅެއްނު؟” ފަލާޙާ އައިސް މަލާކްގެ ބޮލުގައި ފިރުމަމުން ބުނެލިއެވެ. މަލާކް އެފަދަ ބަސްތައް އަޑުއަހަން އާދަވެފައިވުމުން ދެރަވެފައިވާ ހިތަކާއި އެކީވެސް ހިނިތުންވެލަމުން ބޯޖަހާލީއެވެ. އޭނަ ކުޑަވުމާއެކު ދޭތެރެދޭތެރެއިން ހޭނެތޭ ގޮތުން އޭނައަކީ ‘ބަލި’ ކުއްޖެއްކަމަށް އޭނައަށް ވެސް ޤަބޫލުކުރެވިފައިވެއެވެ. އަދި އޭގެ ސަބަބުން އެދުވަސްވަރު އޭނަގެ މަންމަވެސް އޭނަ ތަންތަނަށް ގެންގޮސް ނަހަދައެވެ. ފަލާޙާ ދައްތަގެ މަޤާމުގައި އެދުވަހު އޭނަގެ މަންމަ ހުރި ނަމަވެސް އޭނަ ނުގެންދިޔައީސްކަން މަލާކަށް ޔަޤީންކުރެވުނެވެ. އެކަމާމެދު އޭނަ ޝަކުވާ ނުކުރީ އެހެންވެއެވެ. ކޮންމެ ގޮތެއްވިޔަސް އޭނަގެ އެކުވެރިން ނުހަނު އުފަލާއެކީ ގެއިން ނިކުތުމުގެ ކުރިން އެކިއެކި ވާހަކައިގައި ތިބެގެން ފައިވާންތަކަށް އަރަމުން ދިޔަ މަންޒަރު ވެސް ބަލަން މަލާކަށް އިނދެވުނީ ގެނބެމުން ދިޔަ ހިތަކާއިއެކީގައެވެ. އެމީހުންގެ އާ އަދި ރީތި ފައިވާންތަކުގެ ވާހަކަ ދައްކަމުން ދިޔަދިޔަހެން މަލާކަށް ދެރަ ގޮތަކަށް އޭނަގެ ހުސް ފަޔާއި ދިމާލަށް ބަލާލެވުނެވެ. ޙަޔާތުގެ އެހާ ހިސާބަށް ދިޔައިރު އޭނަ ދުވަހަކުވެސް ފައިވާނަކަށް އަރާފައެއް ނުވެއެވެ. އޭނައަށް ނުހިނގޭތީ އެއީ ވަކި ބޭނުންހުރި އެއްޗަކަށް ނުވާތީވެއެވެ. އަދި އަމުދުން އޭނަ ފައިވާނަކަށް އަރަން އުޅުނަސް ފައިގެ އިނގިލިތަކަށް ބާރުވެ ދިމާވާ ތަކުލީފުތަކުގެ ސަބަބުންނެވެ. އެހެނަސް އޭނައާއި އެއްޢުމުރެއްގެ ކުދިން ރީތި ފައިވާންތަކަށް އަރާ މަންޒަރު ފެނިފައި އޭނަވެސް ފައިވާނަކަށް އަރަން ބޭނުންވެއެވެ. ކޮންމެއަކަސް އެފަދަ ކޮންމެ ޙާލަތެކޭ އެއްފަދައިން މަލާކް އެކުދިންނަށް ބަލަން އިނދެފައި އެކުދިން ދިޔުމުން އަމިއްލަ ޙާލަތް ޤަބޫލުކޮށް ޓީވީއަށް ނަޒަރު ހުއްޓާލިއެވެ.

މަލާކަށް ނޭނގުނު ކަމަކީ އެ ހުރިހާ ވަގުތު ގޭގެ ހުޅުވާލެވިފައިވާ ދޮރާއި ދިމާލަށް ވާގޮތަށް ގެއާއި ތަންކޮޅެއް ދުރު ހިސާބެއްގައި އޭނައަށް ބަލަން ފިރިހެނަކު ހުރިކަމެވެ. ގަމީހަކާއި ފަޓުލޫނެއްގައި ހުރި މަޒީދަށް މަލާކާއި ދިމާލަށް ބަލަހައްޓައިގެން ހުރެވުނީ ދެރަވެފައިވާ ހިތަކާއި އެކީގައެވެ. އެއީ އޭނައަށް އޭނަގެ އެ ދަރިފުޅު ފެނުނު ފުރަތަމަ ދުވަހެވެ. ކަކުލުން ތަންކޮޅެއް ތިރިއަށް އޮތް ހުދުކުލައިގެ ހެދުމަކާއި ކަނދުރައާއި ހަމައަށް އޮތް ކުޑަ އިސްތަށިކޮޅާއެކީ އެ ވަށްމޫނު ފެނިފައި އޭނަގެ ހިތް ލޯބިން ފުރިގެން ދިޔައެވެ. އޭނަ އެދުވަހު އެރަށަށް އައީ މީގެ ދުވަސްތަކެއްކުރިން ސާރިޔާ އޭނަގެ ހުރި ހަމައެކަނި ދަރިފުޅާއެކީ މި ރަށުގައި އުޅެމުން ދާ ވާހަކަ އޭނަގެ މުވައްޒަފެއްގެ ފަރާތުން އިވުމުންނެވެ. އެކުއްޖާއަކީ ބަލި އަދި ނުހިނގޭ ކުއްޖެއްކަމަށް އިވުނު ދުވަހުއްސުރެ މަޒީދު ހުރީ އެކުއްޖާ ދެކިލަން ބޭނުންވެފައެވެ. އެންމެ ފަހުން އޭނައަށް މިރަށަށް އާދެވިފައި މިވަނީ ކެތްނުކުރެވުނު ހިތެއްގެ ސަބަބުންނެވެ. ގޭގެ ތެރެއިން ހުރިހާ ކުދިން ދިޔުމަށްފަހު ވެސް މަލާކް ޓީވީ ބަލަން އިނދެއިނދެފައި ދޭތެރެދޭތެރެއިން އޭނަގެ ފަޔަށް ބަލަމުން ދިޔަގޮތުން މަޒީދުގެ ލޮލުން ކަރުނަ ހިލުނެވެ. އޭގެ ދެވަނަ ސިކުންތުގައި އޭނަ ޚިޔާލެއް ލިބުމާއެކު އެތަނުން ދާން ހިނގައިގަތެވެ.

މަޒީދު އަނބުރާ އެތަނަށް އައިއިރު އޭނަގެ އަތުގައި އޮތް ބޭރު ފެންނަ ކޮތަޅު ތެރޭގައި ފިޔާތޮށި ކުލައިގެ ކުޑަ ފައިވާނެއް އޮތެވެ. މަޒީދު އޭނަ ކުރިން ހުރި ތަނަށް އައިސް މަޑުކޮށްލި ވަގުތު ފަލާޙާ މަލާކްގެ ކުރިމަތީގައި ހުރި މޭޒުމަތީގައި ސައިބޯނެ އެއްޗެހި އަތުރަމުން ދިޔައީއެވެ. އެއަށްފަހު ދައްތަ ދޭތެރެދޭތެރެއިން އަންނާނެ ވާހަކަ ބުނަމުން ގެއިން ނިކުތް ވަގުތު މަޒީދު ނޫންކަމަށް ހަދަމުން ދުރުބަލަން ފެށިއެވެ. ރަށަކީ ކުޑަ ރަށަކަށްވެފައި އެދުވަސްވަރު ވަކި ބިރުވެރިކަމެއް ނެތުމުން ފަލާޙާ ގެއިން ނިކުމެގެން ދިޔައީ ދޮރު ހުޅުވާފައި ބަހައްޓާފައެވެ. ފަލާޙާ އެގޭގެ ކައިރީގައި ހުރި ގެއަކަށްވަދެ ލޯމައްޗަށް ގެއްލުމުން މަޒީދު އަނެއްކާވެސް މަލާކަށް ބަލާލަމުން މަލާކާއި ދިމާލަށް ދާންފެށިއެވެ. ގޭގެ ތެރޭގައި އިން މަލާކް ޓީވީ ބަލަން އިންދާ ދޮރުމައްޗަށް މީހަކު އެރިހެން ހީވެފައި އެދިމާލަށް ބަލާލިއެވެ. އެއާއެކު ނޭނގޭ މީހަކު ހުރިތަން ފެނިފައި މަލާކް ސިއްސައިގެން ދިޔައެވެ.

“އޮހޮ! ކަނބުލޮ ބިރުގަތީތަ ނޭނގޭ މީހަކު ފެނުނީމަ؟” މަޒީދު ހިތާމަވެރި ހިނިތުންވުމަކާއެކީ ސުވާލުކުރިއެވެ.

“ފް…ފަލާޙާ ދައްތަ ގޭގަ ނެތް.” ހިސާބަކަށް ބިރުގެންފައިވި ހިތަކާއެކީ މަލާކަށް ބުނެލެވުނެވެ. އެއާއެކު މަލާކްގެ ލޯބި އަޑު އިވުމުން މަޒީދަށް ހީލެވުނެވެ.

“ފަލާޙާ ދައްތައާ ބައްދަލުކުރަން ނޫނޭ މިއައީ. މަލާކްއަށް ހަދިޔާއެއް ދޭންވެގެން މިއައީ…” މަޒީދު އެހެން ބުނެލަމުން އޭނަގެ އަތުގައި އޮތް ކޮތަޅު މަލާކަށް ދައްކާލިއެވެ. އެ ކޮތަޅު ތެރެއިން އޭނައަށް ރީތި ކުލައެއްގެ ފައިވާނެއް ފެނުމުން ކުއްލިއަކަށް އޭނަގެ ހިތުގައި އޮތް ބިރުވެރިކަން ފިލައި އުފާވެރިކަން ވެރިވިއެވެ. އެ ބޭބެ އައިސް އޭނަގެ ކުރިމައްޗަށް ކުރުފައި މައްޗަށް ތިރިވިއިރު މަލާކަށް އިނދެވުނީ ހިނިތުންވުމެއްގައެވެ.

“ހިނގާ އަވަހަށް ފައިވާނަށް އަރަންދޯ؟ ބައްޕައަށް މަލާކްގެ ސައިޒް ނޭނގޭތީ ނޭނގޭ މީތި ހެޔޮވަރު ވާނެކަމެއް. ބައްޕަ މަލާކްއަށް ދޭން ހަމަ ދެންމެ ގަތް އެއްޗެއް މިއީ.” މަޒީދު ނުހަނު އުފަލާއެކީ ކޮތަޅު ފައިވާން ނަގަމުން ވާހަކަ ދެއްކިއެވެ.

“މިއީ ބައްޕަ އެރަށުގަ ހުރެގެން މަލާކަށްދޭން ގަނެފަ ފޮނުވި އެއްޗެއްތަ ބޭބޭ؟ ބައްޕަ ރަނގަޅުތަ މިހާރު؟” މަޒީދު ފައިވާނުގެ އެއްކިބަ ނަގައި މަލާކްގެ އެއްފައިގައި ހިފާލި ވަގުތު މަލާކް ކޮށްލި ސުވާލުތަކުން އޭނަގެ ޙަރަކާތްތަކަށް ހުއްޓުމެއްއައީ ޙަޤީޤީ ދުނިޔެއަށް އަނބުރާ އާދެވުމުންނެވެ. މަލާކްގެ ނަޒަރުން މަލާކްގެ ބައްޕައަކީ އޭނައެއް ނޫންކަން އެނގުންވުމާއެކު މޭގައި ރިހުމެއް ހިނގާލިއެވެ. އެހެނަސް އޭނަ ގަދަކަމުން ހިނިތުންވުމެއް ފަތުރާލަމުން މަލާކަށް ބަލާލިއެވެ.

“އާނ މަލާކް….މިއީ މަލާކްގެ ބައްޕަ މަލާކްއަށް ގަނެދިން އެއްޗެއް…ހިނގާދޯ އަވަހަށް މީތި ލާން؟ އިނގިލިތަކަށް ދޫދީބަލަ ދަރިފުޅު.” މަޒީދު އިތުރަށް މަލާކްގެ ބައްޕަގެ ވާހަކަ ދެއްކުމެއްނެތި ފައިވާން ލައްވަން އަވަސްވިއެވެ.

“އެހެންވީމަ ބައްޕަ ވަރަށް އަވަހަށް ރަށަށް އަންނާނެދޯ ބޭބެ؟” މަލާކް އެ ސުވާލުކޮށްލީ އޭނަގެ އިނގިލިތަކަށް ދޫދޭން އޭނައަށްވީ ވަރަކުން މަސައްކަތް ކުރުމުން ފައިވާނުގެ އެއްކިބަ އޭނަގެ އެއްފަޔަށް ލައްވާލެވުނު ވަގުތެވެ.

“ހުމް….ބައްޕަ އަންނާނެ ވަރަށް އަވަހަށް.” މަޒީދު އެހެންވެސް ބުނެލީ މަލާކަށް ބަލާނެ ހިތްވަރެއް ނެތި މަލާކްގެ އަނެއް ފައިގައި ފައިވާން ލައްވައި ދެމުންނެވެ.

“ރީތިދޯ މީތި، މަލޫ؟ ބަޕް….ބޭބެ މަލާކްއަށް މަލޫ ކިޔުނަސް އެންމެ ރަނގަޅުތަ؟” މަޒީދު އެހިއެވެ. އޭނަ ސާރިޔާއާއިމެދު ކުރި ހުރިހާ ކަންތަކަށްފަހު ވެސް މި ދަރިފުޅަށް ދެވިފައިވަނީ އޭނަ ޚިޔާރުކޮށްފައިވި ނަންކަން އެނގުންވި ދުވަހު ވެސް އޭނަގެ ހިތަށް އަސަރު ކުރިއެވެ. އެހެނަސް ސާރިޔާ ދެންވެސް އޭނައަށް ނުރުހުންވާކަން އެނގުންވީ މަލާކް ދެން ބުނެލި ބަސްތަކުންނެވެ.

“މަލޫ….ހެހެ….ވަރަށް ރީތި ނަމެއް. މަލާކްއަށް އެއްވެސް މީހަކު އެ ނަމުން ނުގޮވާ.” ކުޑަކުޑަ މަލާކް ހިނިތުންވުމަކާއެކީ ބުންޏެވެ.

“އެހެންތަ؟ އެކަމަކު ލޯބިން ގޮވަންވެސް ނަމެއް އޮންނަންވާނެތާ މަލޫއަށް ވެސްދޯ؟ ހެހެ….ހިނގާދޯ އަތިރިމައްޗަށް ދާން؟ މަލޫ ބޭނުންތަ މި ބޭބެއާއެކީ އަތިރިމައްޗަށްދާން؟” މަޒީދު އެހިއެވެ. އެއާއެކު މަލާކް އުޖާލާވެގެން ދިޔަ މޫނަކާއެކީ ބޯޖަހާލިއެވެ. އެހެނަސް އޭގެ ދެވަނަ ސިކުންތުގައި މަލާކްގެ ހިނިތުންވުން ފަނޑުވިއެވެ.

“އެކަމަކު ބޭބޭ….މަލާކްއަށް ނުހިނގޭ…” އިސްޖަހާލަމުން ދެރަވެފައިވާ މޫނަކާއެކީ މަލާކް ބުނެލިއެވެ.

“އެއީ މައްސަލައެއްނޫނޭ މަލޫ! ބޭބެގެ މިހިރީއެއްނު ނުލާހިކު ސްޓްރޯންގް ދެއަތް؟ ބޭބެއަށް ގެންދެވޭނެއޭ އުރާލައިގެން. އާދޭ!” މަޒީދު އޭނަގެ ދެއަތް ދިއްކޮށްލަމުން ޖޯޝުން ފުރިފައިވި އަޑަކުން ބުނެލިއެވެ. އެއާއެކު މަލާކް ވީ އުފަލާއެކީ ވަގުތުން އޭނަގެ ދެއަތް ދިއްކޮށްލިއެވެ. އެ ހިނދު މަޒީދު މަލާކް އުރާލައިގެން ތެދުވެލިއެވެ. އަދި އޭނަ ވަޢުދުވީ ފަދައިން މަލާކް ގޮވައިގެން ދިޔައީ އަތިރިމައްޗަށެވެ. މަޒީދު މަލާކް ގޮވައިގެން އަތިރިމައްޗަށް ފޭބީ ކުދިންނާއި މީހުން ވެސް މަދު ހިސާބަކަށެވެ. މަލާކް ދަންނަ ކުއްޖަކަށް މަލާކް ފެނި ފަލާޙާއާއި ހަމައަށް ޚަބަރު ގޮސް މާ އަވަހަށް މަލާކާއި ވަކިވާން ބޭނުންނުވުމުންނެވެ. އަތިރިމައްޗަށް މަލާކާއި އެކީ ފޭބުމާއެކު ބައްޕައާއި ދަރިފުޅުގެ ހުނުމުގެ އަޑު އެ ހިސާބުގައި ހަރުލިއެވެ. މަޒީދު އެއްކަމަކަށް ރާޅު އަންނަ ހިސާބުގައި މަލާކް ބަހައްޓާފައި ރާޅު އަންނަންވާއިރަށް މަލާކް ހިއްލަމުން ދިޔަ ހިނދު ދެމީހުންގެ މޫނުމަތިން ވެސް ފެންނަމުން ދިޔައީ އުފާވެރިކަމެވެ. އެހެން ހަދަން ފެށިތާ މާ ގިނައިރެއްނުވެ މަލާކް ބަލިވާ ވާހަކަ ބުނުމުން މަޒީދު އެތާހުރި ރުއްބުރިއެއްގެ މަތީގައި މަލާކް ބައިންދައިގެން ދޮންވެލިގަނޑު މަތީގައި އެއްޗެހި ކުރަހައި ދޮންވެލިން އެއްޗެހި ހެދުމުން ވެސް މަލާކް ޖޯޝާއެކީ އަތްތިލަ ބަޑި ޖަހަމުން ދިޔައެވެ. އެ އެއެއްޗެހި ހެދުމުގެ ތެރޭގައި ދެކެވުނު ވާހަކަތަކުގެ ތެރެއިން މޫދާއި ދިމާލަށް ބަލަން އިނދެފައި ކޯމަސް ފެންނާނީ ކިހާ ހިސާބަކުންތޯ މަލާކް ސުވާލުކުރިއެވެ. އެ ސުވާލާއެކު ކުރިއަށް ދިޔަ ވާހަކަތަކުގެ ތެރެއިން ކޯމަސް ފެނުމަކީ މަލާކްގެ ކިހާ ބޮޑު އެދުމެއްކަން މަޒީދަށް އެނގުންވިއެވެ. އެއާއެކު އޭނަ މަލާކް ގޮވައިގެން ހަމަ އެވަގުތު ފުރަން އޮތް ދޯނީގެ ދަތުރު ހިފަން ފާލަމަށް ދިޔައީ ދެވަނަ ވިސްނުމެއްނެތިއެވެ. މީހަކަށް ފެނިދާނެކަމުގެ ބިރަށްވުރެ އަދި ސާރިޔާއަށް އޭނަ އައިކަން އެނގިދާނެކަމުގެ ނުތަނަވަސްކަމަށްވުރެ އޭނައަށް އެވަގުތު އޭނަގެ ދަރިފުޅުގެ އުފާވެރިކަން މުހިއްމުވިއެވެ. އެހެންކަމުން އޭގެ މިނެޓްތަކެއްގެ ތެރޭގައި މަޒީދު އިނީ މަލާކާއި އެކީ ދޯންޏެއްގެ ތެރޭގައި އިށީނދެގެންނެވެ. ދަތުރު ފެށުމާއެކުހެން ކުޑަދޮރުން ބޭރު ބަލަން އިން މަޒީދު ކައިރިން މަލާކް، އެބަފެނޭތޯ ސުވާލުކުރަމުން ދިޔައެވެ. މަޒީދު ނުހަނު އުފަލާއެކީ އަދި ލޯތްބާއެކީ އޭގެއިން ކޮންމެ ފަހަރަކު ނޫނެކޭ ބުނަމުން ދިޔައެވެ. އެންމެ ފަހުން ކޯމަސްތައް ފެންނަން ފެށުމުން މަޒީދު އެހެރީއޭ ބުނެ މަލާކް ކުޑަކޮށް އުރާލަމުން އިށީންނަ ފިލައިގެ މަތީގައި މަލާކް ކޮޅަށް ބޭންދީ ކުޑަދޮރުން ބޭރު މަލާކަށް ފެންނާނެ ގޮތަށެވެ. މޫނުގައި ބީހެން ފެށި ވައިރޯޅިތަކަށް ކެތްނުކުރެވި މަލާކަށް ކުރީކޮޅު ލޯ ނުހުޅުވުނެއްކަމަކު ލޯ ހުޅުވާލުމުން ފެނިގެން ދިޔަ މަންޒަރުން މަލާކްގެ އަނގަ ހުޅުވުނެވެ. އިރުއޮއްސެމުން ދިޔަ ވަގުތު އުޑުމައްޗަށް ވެރިވެފައިވި އޮރެންޖު ކުލައިގެ ތެރެއިން އެތައް ކޯމަހެއް މައްޗަށް ފުންމައި ތިރިވަމުން ދިޔަ މަންޒަރު ފެނިފައި އޭނަގެ ފައިގައި ރިއްސަން ފެށިކަން ވެސް އޭނަ ހަނދާންނެތޭ ގޮތްވިއެވެ. މަލާކް އަޖާއިބުވެފައި އެ މަންޒަރަށް ބަލަން ހުރިއިރު އޭނަ ގައިގައި ހިފަހައްޓައިގެން ހުރި މަޒީދަށް ހިނިތުންވުމަކާއެކީ އެސްފިޔަ ޖަހާލުމެއްނެތި އޭނަގެ މައުސޫމް ދަރިފުޅުގެ މޫނަށް ބަލަން އިނދެވުނެވެ. މަލާކް ވަރަށް ރީތިދޯއޭ ބުނެ އޭނައަށް ބަލަމުން ދިޔައިރު ވަރަށް ރީއްޗޭ މަޒީދު ބުނަމުން ދިޔައީ އޭނައަށް ދެން މިފަދަ ވަގުތުކޮޅެއް މި ދަރިފުޅާއެކީ ހޭދަކުރުމުގެ ފުރުޞަތެއް ލިބޭނެތޯ ހިތާހިތުން ސުވާލުކުރަމުންނެވެ.

ދޯނި ގޮސް އަނެއްރަށުގެ ފާލަމުގެ ކައިރިއަށް މަޑުކުރިއެއްކަމަކު މަޒީދު މަލާކާއެކީ އެ ރަށަށް ނުފައިބައި މަލާކް ހުރި ރަށަށް އަނބުރާ ދިޔަ މަގުމަތީގައި ވެސް ކޯމަސް ބަލަން މަލާކަށް އެހީވެދިނެވެ. ދެމީހުންނަށް ރަށަށް އާދެވުނު ވަގުތު ކަންބޮޑުވެފައި ހުރި ފަލާޙާ ދެމީހުންނަށް ވެސް ފެނުނެވެ. މަޒީދު ފަލާޙާއަށް މަޢާފަށް އެދިފައި މަލާކް ފަލާޙާއާއި ޙަވާލުކުރިއެވެ. ފަލާޙާ ތިއީ ކާކުތޯ ސުވާލުކުރިއެއްކަމަކު މަޒީދު ޖަވާބު ދިނުމެއްނެތި ފުރަން ދިޔުމަށްޓަކައި އަނބުރާ ދޯންޏަށް އެރިއެވެ. ދޯންޏަށް އެރި ވަގުތު ފަލާޙާގެ އުރުގައި ހުރި މަލާކް ބޭބެ އަދި އަންނައްޗޭ ބުނެލި އަޑަށް މަޒީދަށް ފަސްއެނބުރި ބަލާލެވުނީ ކަރުނަ ހިލެން ފެށި ދެލޮލާއި އެކީގައެވެ. އެހެނަސް އޭނަ އެއްޗެކޭ ނުބުނެ ބަލަހައްޓައިގެން ހުއްޓާ އެ ދޯނި ފާލަމާއި ދުރަށްދާން ފެށީއެވެ.

“ހަނދާން އެބަހުރިދޯ މަލާކް؟” ހަނދާންތަކުގެ ފުންކަނޑުން ނެރެވުނު ވަގުތު މަލާކްގެ އެނދުގެ ކައިރީގައި އިން މަޒީދު ސުވާލުކުރިއެވެ.

“އާނ ބޭބޭ….ހަނދާން އެބަހުރި. އަޔާޒް! އެނގޭތަ؟ މި ބޭބެގެ ސަބަބުން މަލާކަށް ފުރަތަމަ ފަހަރަށް ޑޯލްފިންސް ފެނުނީ. ބޭބެ އެއްދުވަހު މަލާކް ދަތުރަކު ގެންގޮސް ދެއްކީ މަލާކްއަށް، ދޯ ބޭބޭ؟ ވަރަށް ހަނދާންވި ބޭބެ މަތިން ބޭބެ ދިޔައިމަ ވެސް. އެކަމަކު އެނގޭތަ ބޭބޭ؟ އެދުވަހު ބޭބެ ދިޔަ ފަހުން މަންމަ ރަށަށް އައިމަ ފަލާޙާ ދައްތަ ބުނީ މަލާކް ގޮވައިގެން ބޭބެ އެގޮތަށް ދިޔަ ވާހަކަ. ފަލާޙާ ދައްތަ ބުނަން ވެސް ބުނި ތިމަންނައަށް ހީވަނީ މިއީ މިވެނި މީހެއް ހެންނޯ. ހަނދާނެއްނެތް ފަލާޙާ ދައްތަ ކިޔުނު ނަމެއް. އެކަމަކު އެ ނަން ކިޔުނީމަ މަންމަ ވަރަށް ރުޅިއައީ. މަންމައަށް ހީވީ ކަންނޭނގެ ބޭބެއަކީ ވަރަށް ގޯސް މީހެއްހެން. މަލާކްގެ ފައިވާން ވެސް ގެނެސްދިނީ ބޭބެއޭ ބުނީމަ މަންމަ އެ ފައިވާން ވެސް ވަގުތުން އުކާލީ.” މަލާކް ކިޔައިދިނެވެ.

“އެހެންތަ؟” ދެރަވެފައިވާ ހިތަކާއެކީ މަޒީދަށް އަހާލެވުނެވެ. އެދުވަހު ސާރިޔާގެ ހިތަށް ކުރާނެ އަސަރާއި މަލާކް ރޯނެ ރުއިން ހިތަށް ގެނެވުމުން މޭގައި ރިހުމެއް އުފެދުނެވެ.

“ހުމް….ފަހުން އެނގުނު އަސްލު ނޭނގޭ މީހުންނާއެކީ އެގޮތަށް ދިޔުމަކީ ކިހާ ނުރައްކާތެރިކަމެއްކަން. އެކަމަކު އެދުވަހު ބޭބެ މަލާކް އަތިރިމައްޗަށް ގެންގޮސް ކޯމަސް ބަލަން ދިޔައީ ގޯސް ނިޔަތަކުއޭ މަލާކް ނުބުނާނަން. ހިތްހެޔޮ މީހުންނާއި ހިތްހެޔޮ ނޫން މީހުން ދެނެގަންނަން މަލާކްއަށް ވެސް އެނގޭ. އެހެންވީމަ އެތައް އަހަރެއް ފަހުން ވެސް ބޭބެ ފެނުނީމަ މިހާ އުފާ މިވަނީ. ބޭބެއަށް ކިހިނެއް އެނގުނީ މަލާކް ހޮސްޕިޓަލުގަ އޮތްކަން؟ އަޔާޒް ދަންނަ މީހަކީތަ ބޭބެއަކީ؟” މަލާކް މަޒީދާއި ވާހަކަ ދައްކަމުން ގޮސް އަޔާޒާއި ވެސް ސުވާލުކުރިއެވެ. އަޔާޒް އެއްޗެކޭ ބުނަން އުޅެފައި ވެސް ބައްޕައަށް ބަލާލީ ބައްޕަ އެއްޗެކޭ ބުނޭތޯ ބެލުމަށެވެ. އެހެނަސް ބައްޕަ އެއްޗެކޭ ނުބުނެ އިސްޖަހާލުމުން އަޔާޒަށް ވާހަކަ ދެކެވުނެވެ.

“އާނ މަލާކް…..މިއީ ކާކުކަން އަހަންނަށް އެނގޭ. މަލާކަށް މިވަގުތު ޙަޤީޤަތް ކިޔައިދިނުން ރަނގަޅުވާނެހެން އަޅުގަނޑަށް ހީވަނީ…ދޯ ބައްޕާ؟” އަޔާޒް އެންމެ ފަހުން ބުނެލި ބަހާއިއެކީ މަލާކްގެ ދެބުމަ ކައިރިވީ ހިނދު މަޒީދުގެ ނަޒަރު ވެސް އޭނައަށް އަމާޒުވިއެވެ. މަޒީދު ޙަޤީޤަތުގައި ހުރީ މަލާކް ބަލިވުމުން ޙަޤީޤަތް އެވަގުތަށް ފާޅު ނުކުރާށެވެ. އެހެނަސް އަޔާޒް އެވަގުތު ޙަޤީޤަތް ފާޅުކުރުވަން ބޭނުންވީ އެވަގުތުވެސް މަލާކްގެ ހިތުގައި އެ ބައްޕައާއިމެދު ޤަދަރެއް ވާތީވެއެވެ. ކަން މިހެން އޮތްއިރު މަލާކްގެ އަސްލު ބައްޕަގެ ގޮތުގައި ބައްޕަ ޤަބޫލުކުރުން މަލާކަށް ދަތިކަމަކަށް ވާނެ ކަމަށް އޭނައަށް ޤަބޫލު ނުކުރެވުނީތީވެއެވެ. އަދި އަމުދުން މަސްޢޫދުބެއަކީ އޭނަގެ އަސްލު ބައްޕަ ނޫންކަން މިހާރުވެސް މަލާކަށް އެނގިފައިވާކަން އެއްދުވަހު މަލާކާއި ދެކެވުނު ވާހަކަތަކުގެ ތެރެއިން އޭނައަށް އެނގިފައިވާތީވެއެވެ.

“ބައްޕައޭ؟ އެކަމަކު އަޔާޒްގެ…..” މަލާކްގެ އެ ވާހަކަ މެދުކެނޑުނެވެ.

“އަހަރެންގެ ބައްޕައެއްނޫން މަލާކް….” އަޔާޒް ބުނެލީ ހަމައެކަނި އެހާވަރަށެވެ. އެއަށްފަހު ތުންފިއްތާލަމުން މަލާކަށް ނަޒަރެއް ދީގެން އިނީ މަލާކަށް ދޭހަކުރެވޭނެ ފަދައަކުންނެވެ. އަޔާޒް އޭނައާއި ދިމާލަށް ބަލަހައްޓައިގެން އިންނަން ފެށުމުން އެނގުންވި އެނގުންވުމާއެކީ މަލާކްގެ މެއަށް ފިނިވެގެން ދިޔަ ހިނދު އޭނައަށް އޭނަގެ އެނދު ކައިރީގައި އިށީނދެގެން އިން ފިރިހެން މީހާއާއި ދިމާލަށް ބަލާލެވުނެވެ. އެ ދެވުނު ނަޒަރާއެކީ މިއީ އޭނަ ދޫކޮށް ގޮސްފައިވާ ބައްޕަކަން އޭނަގެ ސިކުނޑިއަށް ނަގައިގަނެވުނެވެ. އެ ސޫރައަށް ބަލަހައްޓައިގެން އިނދެވުނުހެން އޭނަ މިހާ ދުވަހު ބެލި ބައްޕަގެ ދުލުން މި ބައްޕައާއި ބެހޭގޮތުން އިވުނު ވާހަކަތައް ހަނދާނަށްއައެވެ. އޭނައަކީ ޙަރާމް ދަރިއެއްކަމަކަށް ބުނެ ވާހަކަ ފެތުރި ވާހަކަ ހަނދާންވެގެން ދިޔުމުން މަލާކްގެ ހިތް ރޫރޫއެޅިއެވެ. އޭނަގެ ކުރިމަތީގައި ހުރި މީހަކީ ނުރައްކާތެރި މީހެއްކަމަށް ނިންމަން އުޅުނެއްކަމަކު މިއީ އޭނަގެ ޙަޔާތުގައި އައި އެންމެ އުފާވެރި ދުވަސްތަކުގެ ތެރެއިން ދުވަހެއް ގެނެސްދިން އިންސާނާކަން ވެސް ހަނދާނަށްއައެވެ. އެހިނދު އެތައް ސުވާލެއް އެއްފަހަރާ މަލާކްގެ ސިކުނޑިއަށް ވެރިވުމުން އެއްޗެކޭ ބުނަން ނުކުޅެދިފައި އޭނައަށް އިނދެވުނެވެ.

މަލާކް ހުއްޓުން އަރާފައި އިންނަން ފެށި ހިނދު މަޒީދުގެ މޫނުމައްޗަށް ހިތާމަވެރިކަން ވެރިވާން ފެށިއެވެ. އޭނަ މަލާކްގާތު ބުނަން އެތައް ވާހަކައެއްވިއެވެ. މަސްޢޫދަކީ މަލާކްގެ އަސްލު ބައްޕަ ނޫންކަން މަލާކަށް އެނގޭކަން މަސްޢޫދުގެ ފަރާތުން އޭނައަށްވަނީ އެނގިފައެވެ. އޭނަ ކުރި ކަންތައް ވެސް މަލާކަށް އެނގުމުގެ ފުރުޞަތު އެބައޮތްކަމަށް މަސްޢޫދު ބުނި ދުވަހުއްސުރެ އޭނަ ހުރީ މުޅި ޢުމުރު ދުވަހު އޭނައާއި މަލާކާއި ދެމެދު އޮތް ގުޅުން ފޮރުވަން ނިންމައިގެންނެވެ. މަލާކް އޭނައަށް ނަފްރަތު ކުރުމަށްވުރެ މަލާކާއި ދުރުގައި ހުރުން ވެސް އޭނަގެ ހިތަށް މާ ފަސޭހަވާނެކަމަށް އަމިއްލަ ނަފްސުގާތު ބުނަމުންނެވެ. ކޮންމެ ގޮތެއްވިޔަސް މަލާކަށް މިވަގުތު ޙަޤީޤަތް އެނގި އެ ދަރިފުޅުގެ ކުރިމަތީގައި ހުރެވުމުން މަޒީދަށް ކުށްވެރިއެއްގެ އިޙްސާސް ކުރެވެމުން ދިޔައެވެ. އޭނަ އެތާ އިނީ މަލާކް އޭނަގެ މައްޗަށް ނިންމާ ކޮންމެ ނިންމުމެއް ކުށްވެރިއަކަށް ޙައްޤުވާ އަދަބެއް ފަދައިން ޤަބޫލުކުރަން ނިންމައިގެންނެވެ.

ޖަޒުބާތުތަކުން ފުރިގެން ދިޔަ ހިތްތަކެއްގެ ސަބަބުން އިރުކޮޅެއް ވަންދެން މުޅި ތަނަށް ހިމޭންކަމެއް ވެރިވިއެވެ. އެ ހިމޭންކަމަށް ނިމުމެއް އައީ އެންމެ ފަހުން މަލާކް ވާހަކަ ދެއްކުމުންނެވެ.

“ކޯމަސް ބަލަން ދިޔަ ދުވަހު……އެނގޭތަ މަލާކަކީ ކާކުކަން؟” މަލާކް ޖެހިލުންވުމަކާއެކީ ސުވާލުކުރިއެވެ. މަލާކް ކޮށްލި ސުވާލުން ޙައިރާންކަން ލިބިގެން ދިޔަ ހިތަކާއެކީ މަޒީދަށް މަލާކާއި ދިމާލަށް ބަލާލެވުނެވެ. ހަމަ އެއާއެކު އޭނައަށް އަދިވެސް ނަފްރަތާއި ނުލާ އެ ދަރިފުޅާއި ވާހަކަ ދެއްކުމުގެ ފުރުޞަތު އޮތްހެން ހީވުމުން ހިތަށް އުފަލެއްވެސް ލިބުނެވެ.

“ލައްބަ ދަރިފުޅު. އޭރުވެސް އެނގޭ މަލޫއަކީ ބައްޕަ ދަރިފުޅުކަން. އަސްލު ދަރިފުޅު އެރަށަށް އުފަންވި ދުވަހުވެސް އެ ޚަބަރު ލިބުނު ބައްޕައަށް. ދަރިފުޅުގެ މަންމަ ދަރިފުޅު ވައްޓާނުލާ އުފަންކުރި ވާހަކަ އެނގުނީމަ ވީ އުފަލުން ބައްޕަ މީހަކު ލައްވާ ދަރިފުޅުގެ ފޮޓޯއެއްވެސް ނަގުވައި ފޮޓޯވެސް ހޯދިން ހަމަ އެދުވަހު. އެކަމަކު އޭރު މާ ބޮޑު އަޅައެއްނުލަން. ހިތަށްއެރީ މިކުއްޖާ ބޮޑުވާނެތާއޭ އެރަށުގެ މާޙައުލުގަ ނުހަނު އުފަލުގަ. އޭގެ 7 އަހަރު ފަހުން ބައްޕަގެ މުވައްޒަފަކު ޗުއްޓީއަށް ތި ރަށަށް ގޮއްސަ އައިސް ބައްޕަ ކައިރި ބުނީ އެކުއްޖާއަކީ ނުހިނގޭ ކުއްޖެކޭ. އެހާ ހިސާބުން އަނެއްކާވެސް މަލޫ ދެކިލަން ބޭނުންވެގެން އެދުވަހު އެރަށަށް ދިޔައީ. އެ ހުރިހާ ދުވަހު މަލޫއަށްޓަކައި ކަމެއްކޮށްނުދެވޭތީ މަލޫއަށް ފައިވާނެއް ގަނެދީ މަލޫ ބޭނުންހާ ކަންތައް ކޮށްދިނީ….” މަޒީދު އެ ވާހަކަތައް ކިޔައިދިންއިރު އޭނަގެ ދެލޯ ފެންކަޅިވެގެން ދިޔައެވެ. އެހިނދު މަލާކަށް ނޭނގި މަލާކްގެ ދެލޯވެސް ފެންކަޅިވެގެން ދިޔައެވެ.

“އެހެން…ވެ ދޯ މަންމަ އެހާ ރުޅިއައީ މަލާކް އެ ދަތުރު ދިޔައިމައާ މަލާކް އެ ފައިވާނަށް އެރީމަ؟” މަލާކް އެ ސުވާލު ކޮށްލިއިއިރު އޭނަގެ ލޮލުން ކަރުނައެއް ފައިބައިގެން އައެވެ.

“ހުމް….މަންމަ ރުޅި އަންނަންވީ ބައިވަރު ސަބަބުތައް ދީފަ ދޯ ބައްޕަ ހުރީ؟ މަންމަ ރުޅި އައީތީ ބައްޕަ މަންމަ ކުށްވެރިއެއް ނުކުރާނަން. ބައްޕައަކީ ވަރަށް ގޯސް ބައްޕައަކަށްވީމަ މަންމަ މަލޫ ބައްޕައާއި ދުރުކުރަން ބޭނުންވީ.” މަޒީދު ރޫރޫއަޅާ އަޑަކުން ކިޔައިދިނެވެ.

“ސުވާލުކުރެވިދާނެތަ ކީއްވެގެންކަން މަލާކް ބައްޕަ ގޯސް ބައްޕައަކަށްވީ؟ މަލާކް ދުނިޔެއަށް އައުމުގެ ކުރިން ވެސް މަލާކްއާއި ބެހޭގޮތުން ދޮގު ޚަބަރު ފެތުރީ ކީއްވެކަމާމެދު ސުވާލުކުރެވިދާނެތަ؟” މަލާކް އެ ސުވާލުތައް ކޮށްލިއިރު އޭނަގެ އަޑުގައި ހިތާމަވެރިކަމަކާއި ޝަކުވާއެއްވިއެވެ. އެހިނދު މަލާކްގެ ބާރުކުރެވިފައިވި ދެއަތުގައި ތުރުތުރެއް ހިނގާލި ގޮތުން މަޒީދު ނުތަނަވަސްވާ ގޮތްވިއެވެ.

“މަލޫ….ހިނގާދޯ އެހެން ދުވަހަކުން މި ވާހަކަ ދައްކަން؟ މިވަގުތު މިފަދަ ވާހަކައެއް ދައްކާ ކަހަލަ ޙާލަތެއްގައެއް ނޫނެއްނު ދަރިފުޅު ތިހިރީ؟ އަޔާޒް…..” މަލާކަށްޓަކައި ކަންބޮޑުވެފައިވި ހިތަކާއެކީ މަޒީދަށް މަލާކްގެ އެއްއަތުގައި އަތް އަޅާލަމުން އަޔާޒަށް ބަލާލެވުނީ އަޔާޒް ބުނާ އެއްޗެއް ދެނެގަތުމަށެވެ.

“އަޅުގަނޑަށް ހީވަނީ ޙަޤީޤަތް ކިޔައިދިނުންހެން ރަނގަޅުވާނީ ބައްޕާ…..އެއީ ކިތަންމެ ހިތި ޙަޤީޤަތަކަށް ވިޔަސް….އެއީ މަލާކަށް މިހާރުވެސް އެނގޭ އެއީ ކިހާވަރެއްގެ ވާހަކައެއްކަން. އަޅުގަނޑު ޤަބޫލުކުރާ ގޮތުގަ ބައްޕައަކީ މަލާކަށް ދެރައެއް ދޭވަރަށްވުރެ މަލާކްދެކެ ލޯބިވާ ބައްޕައެއް. ޙަޤީޤަތް ކިޔައިދީފަ މަލާކަށް އެ ލޯބި ހާމަ ކޮށްދިނީމަ މަލާކްގެ ހިތަށްވެސް މާ ފަސޭހަވާނެހެން އަޅުގަނޑަށް ހީވަނީ.” އަޔާޒް މަލާކްގެ ޙާލަތަށާއި މަލާކްގެ މިޒާޖަށް ވެސް ވިސްނާފައި ބުނެލިއެވެ. މަލާކް މި ހުރިހާ ދުވަހުވެސް އޭނަގެ އަސްލު ބައްޕަގެ ވާހަކަ ކިޔައިދިންއިރު ބުނަމުން ދިޔައީ އެންމެ ވާހަކައެކެވެ. އެ ބައްޕަވެސް ބައްޕަގެ ކުށް ޤަބޫލުކޮށް މަޢާފަށް އެދިއްޖެނަމަ މަލާކް އެ ބައްޕައަށް މަޢާފުކޮށް ބައްޕަދެކެ ލޯބިވާނެ ވާހަކައެވެ. މަލާކް އެހެން ބުނާއިރު މަލާކް އޭނަގެ އަސްލު ބައްޕަ ކިހާ ބޭނުންވާކަން ވެސް އަޔާޒަށް ތަޞައްވުރު ކުރެވިފައިވެއެވެ. އަޔާޒް ބޭނުންވީ މި ވަގުތުން ވަގުތަށް ވެސް މަލާކްގެ އެ ހުވަފެން ފުރިހަމަވެ މަލާކްގެ ހިތަށް ހަމަޖެހުމެއް ލިބޭށެވެ.

އަޔާޒް އޭނަގެ ވާހަކަ ދެއްކިތާ މާ ގިނައިރެއްނުވެ މަޒީދު އިސްޖަހާލަމުން ފުން ނޭވައެއް ދޫކޮށްލީ ބަލި ޤަބޫލުކުރާ ފަދައަކުންނެވެ. އެއަށްފަހު ވާހަކަ ދައްކަން ފެށިއެވެ.

“އެންމެ ރަނގަޅު….ބައްޕަ ކިޔައިދޭނަން ހުރިހާ ވާހަކައެއް. މަލޫއަށް ވެސް އަދި އަޔާޒަށް ވެސް. މި ވާހަކަތަކުގެ ތެރޭގަ އަޔާޒްގެ މަންމައާއި ބައްޕައަށްވީ ގޮތްވެސް ހިމެނޭތީ އަޔާޒް ވެސް މި ވާހަކަތައް އަޑުއެހުން މުހިއްމު….” މަޒީދު އެއްފަހަރު މަލާކަށް އަނެއްފަހަރު އަޔާޒަށް ބަލާލަމުން ބުނެލި ވާހަކައިން ދެމީހުން ވެސް އެ ވާހަކަތައް އަޑުއަހަން ޝައުޤުވެރިވީ އެއްވަރަކަށެވެ.

“މީގެ 23 އަހަރު ކުރިން…..ބައްޕައާއި ބައްޕަގެ އަލަތު އަންހެނުން މަހީރާ މަސައްކަތް ކުރަމުން ދިޔައީ މިނިސްޓްރީ އޮފް ހޯމް އެފެއާސްގަ. އަޔާޒްގެ މަންމައާއި ބައްޕަވެސް އެތާނގަ ވަޒީފާ އަދާކުރަން ފެށީ އަހަރުމެން އެތާ ތިބިތާ 3 އަހަރުފަހުން. އޭގެ މަސްތަކެއް ފަހުން މަސްޢޫދު އެ އޮފީހާއި ގުޅުނީ. އެއަށްފަހު…..ސާރިޔާ. ކުރީކޮޅު އަހަރުމެން އެންމެންވެސް މަސައްކަތް ކުރަމުން ދިޔައީ ވަރަށް ހިމޭންކަމާއެކީ އަދި ގާތްކޮށް. މި ކަންތައް ބަދަލުވާން ފެށީ މަހީރާ….ދީނާއި ދެކޮޅުވާންވެގެން އަމިއްލަ ޖަމުޢިއްޔާއެއް ފެށުމުގެ ވާހަކަ ދައްކައި އަހަރުމެން ވެސް އޭގެ ތެރެއަށް ވައްދަން ފެށި ހިސާބުން. އެ ވާހަކައާއި ދެކޮޅަށް އެންމެ ފުރަތަމަ ކެރިގެން އަޑުއުފުލި މީހަކީ އަޔާޒްގެ ބައްޕަ…..ޙަލީމްއާއެކީ މަލީހާވެސް އެކަމާއި ދެކޮޅަށް އަޑުއުފުލި. މަސްޢޫދުބެއާއި މަލާކްގެ މަންމަ ވެސް އެކަމާއި ދެކޮޅަށް އަމިއްލަ އަމިއްލައަށް ވާހަކަ ދެއްކި. ބައްޕަވެސް ބައްޕަގެ އެ އަންހެނުންނަށް ނަޞޭޙަތްތެރިވިން. އެކަމަކު މަހީރާ އަޑެއްނޭހި. އަޑު ނޭހީމަ ބައްޕަ މާ ބޮޑު އަޅައެއްނުލަން. އަޔާޒްގެ ބައްޕަމެންނާއި ޚިލާފަށް ބައްޕައަށް ދީނާއިމެދު އޭރު އެހާ ބޮޑަށް ނޭނގޭ. އެހެންވީމަ އެއީ މާ ބޮޑު ކަމަކަށް ވެދާނެއެކޭ ހިތަށްނާރާ. ބައްޕައަށް އެދުވަސްވަރު އެންމެ ބޮޑު ކަމަކަށްވީ މަހީރާ ގިނަވަގުތު މަސައްކަތުގަ އުޅެމުން ގެއަށް ނާންނާތީ. އޭގެ ސަބަބުން ބައްޕަގެ އަލަތު ދަރިފުޅު މައުވާ ވެސް ގޭގަ އެކަނިވެގެން އުޅޭތީ. މިކަމާމެދު ބައްޕައާއި މަހީރާއާއި ދެމެދު ޒުވާބުތައް ގިނަވާން ފެށި. ބައްޕަގެ ސަމާލުކަން މަލާކްގެ މަންމައަށް ހުއްޓުނީ މި ޒުވާބުތަކުގެ ތެރޭގަ އުޅެމުން ދަނިކޮށް. ސާރިޔާގެ ރަނގަޅުކަން ފާހަގަވެ ބައްޕަގެ ޙަޔާތަށް ގެންނަން ބޭނުންވަނީ އެކަހަލަ އަންހެނެއްކަން އެނގުނު. އެކަމަކު އަމިއްލަ ޢާއިލާއެއް އޮތްވާ އެފަދަ ގޮތަކަށް އެހެން އަންހެނަކާއިމެދު ދެކިގެން ނުވާނެއޭ ވެސް ހިތަށްނާރާ. ވެދާނެ ކަމަކާއިމެދު ވިސްނުމެއްނެތި އެކި ގޮތްގޮތުން ސާރިޔާއާއި ގުޅުން ބަދަހިކުރަން މަސައްކަތް ކުރީ. އަޔާޒްގެ މަންމަގެ ގާތް އެކުވެރިއަކަށްވީމަ މަލާކްގެ މަންމަ ބުނަން ވެސް ބުނި މިއީ ގޯހެކޭ…..” މަޒީދު ކިޔައިދިނެވެ.

**

“މިއީ ގޯހެއް މަޒީދު! ކީއްކުރަން އަހަރެން އެތާ އިންދާ ކޮންމެ ދުވަހަކު މެންދުރު ކާން އެއްޗެއް ގަނެދެނީ؟ ކީއްކުރަން އަހަރެން ގެއަށް ލައިދޭން ކޮންމެ ދުވަހަކު އަހަރެން ނިކުންނައިރު ކާރުގަ އޮފީސް ކުރިމަތީގަ އޮންނަނީ؟ ކީއްކުރަން އަހަރެންގެ މަސައްކަތް ޙިއްސާކޮށް އަހަންނަށް ފަސޭހަކޮށްދޭން ތިއުޅެނީ؟ މިހާރު އޮފީސް ތެރޭގަ މީހުންވެސް އެ ވާހަކަތައް ދައްކަން ފަށައިފި. މަހީރާއަށް އެނގިއްޖެއްޔާ މަހީރާ ބުނާނީ ކީކޭ؟” ސާރިޔާ އެއްދުވަހު ގެއަށް ދިޔަ މަގުމަތީގައި އޮފީހުގެ ރިސެޕްޝަނުން އޭނަ ދަނިކޮށް މަޒީދު ގޮވާލަމުން ނުރުހުންތެރިކަމާއެކީ ބުންޏެވެ.

“ސާރިޔާ އެއީ އެހެން ކޮށްދޭ ކަންތަކެއް ނޫނޭ! އަހަރެން ސާރިޔާއަށް ހެޔޮ އެދޭތީ ކޮށްދޭ ކަންތަކުން މީހުން ނުބައި މާނައެއް ނެގިއްޔާ އަހަރެން ވަކި ކީއްކުރާނީ؟” މަޒީދު އެހެން ބުނެލީ ސަމާސާއެއް ކުރެވޭތޯއެވެ. އެހެނަސް….

“މަޒީދު! މަޒީދަށް ރަނގަޅަށް އެބައިނގޭ މިއީ ކިހާ ބޮޑު މައްސަލައަކަށް ވާނެކަން! އަހަރެން ވަކި ބޭނުމެއްނޫން ދެމަފިރިއެއްގެ ދެމެދަށް ވަންނަ ނުބައި އަންހެނަކަށް ވާކަށް. އެހެންވީމަ އާދޭސްކޮށްފަ މި ބުނަނީ މަޒީދު. އަހަންނަށް އެއްވެސް ކަމެއް ކޮށްނުދިނިއްޔާ ރަނގަޅުވާނީ.” ސާރިޔާ އެހެން ބުނެ މަޒީދަށް ފަސްދީފައި ދާން ހިނގައިގަތީ ހިސާބަކަށް ދެރަވެފައިވި ހިތަކާއި އެކީގައެވެ. މަޒީދު މި ހުރިހާ ދުވަހު ކޮށްފައިވި ކަންތައްތަކެއްގެ ސަބަބުން އޭނަގެ ހިތަށްވެސް އަސަރުކޮށްފައިވާތީވެއެވެ. މަޒީދަކީ އެހެން މީހެއްގެ ޙައްޤަކަށް ނުވިނަމަ ރަނގަޅުވީސްކަމަށް އޭނަގެ ހިތް ބުނި ދުވަސްތައް ވެސް ގޮސްފައިވެއެވެ. އެހެނަސް އެވަގުތު އޭނަ ދުރަށް ހިނގައިގަތީ މުޅިން އެއްކޮށް މަޒީދު މަތިން ހަނދާން ނައްތާލުމަށް ޢަޒުމް ކަނޑައަޅަމުންނެވެ. އަދި އަމުދުން މަޒީދު އޭނައާއި ގާތްވާން މަސައްކަތް ކުރަމުން ދިޔައީ ވެސް ރަނގަޅު ގޮތަކަށް ނޫންކަން އެނގުންވުމުން މަޒީދާއި ދުރުވުމުގެ ޚިޔާލު އޭނައަށް ފަސޭހަވިއެވެ. އެހެނަސް އެދުވަހު އޭނައަށް އޮފީހުން ނިކުމެވުމުގެ ކުރިން މަޒީދު ބުނެލި ވާހަކައިން އޭނަގެ ފިޔަވަޅުތައް މަޑުޖެހުނެވެ.

“އަހަންނާ އިންނަންވީއެއްނު ސާރިޔާ؟” ސާރިޔާ ހުއްޓުން އެރީ މަޒީދު ބުނެލި އެ ބަސްތަކުންނެވެ. އެތައް ޖަޒުބާތެއް އެއްފަހަރާ އޭނަގެ ހިތަށް އަރާ ފައިބައިގެން ދިޔަތަނާހެން އޭނައަށް ފަސްއެނބުރި މަޒީދަށް ބަލާލެވުނެވެ.

“އެއީ ކީއްކުރަން؟ އެއްކައިވެންޏެއްގަ ރަނގަޅަށް ނުއުޅެވުނީމަ ދެވަނަ ކައިވެންޏެއް ކޮށްގެން ރީތި ދިރިއުޅުމެއް އުޅެވޭނެހެން ހީވާތީތަ؟ މަހީރާއާއި މަޒީދުގެ ދަރިފުޅާއިމެދު ވެސް ވިސްނާލަބަލަ. މަހީރާ ވަރިކުރީމަ އެ ދަރިފުޅަށް ކުރާނެ އަސަރާއިމެދު ވިސްނާލަ…..” ސާރިޔާގެ ވާހަކަ މެދުކަނޑާލެވުނެވެ.

“މަހީރާ ދޫކުރާކަށް އަހަރެން ނެތިން…” މަޒީދު ބުނެލީ ހަމައެކަނި އެހާވަރަށެވެ. އޭގެ ދެވަނަ ސިކުންތުގައި އޭނަ ބުނި އެއްޗެއް ދޭހަކުރެވުމާއެކު ސާރިޔާއަށް އަނެއްކާވެސް ވާހަކަ ދެކެވުނެވެ.

“ދެން ކީއްކުރަންތަ ތިއުޅެނީ؟ ދެ އަންބަށް ކައިވެނި ކުރުމަކީ އެއްކައިވެންޏެއްގަ ހުރި މައްސަލަތައް ޙައްލު ނުކުރެވުނީމަ ކުރާ ކަމެއް ނޫނޭ! މިކަން މިގޮތަށް ކުރީމަ ހުރިހާ ކަމެއް ރަނގަޅުވާނެހެންތަ މަޒީދަށް ހީވަނީ؟ މަހީރާ އަދިވެސް ލޯބިވެއޭ މަޒީދުދެކެ. މަހީރާ ބުނަން ވެސް ބުނޭ މިހާރު މަޒީދަށް ވަރަށް ވަގުތު ނުދެވޭ ވާހަކަ….މަހީރާ ކިހާ ދެރަވާނެ މަހީރާއަށް ރަނގަޅުވުމުގެ ފުރުޞަތެއް ނުދީ އަދި ތިހެން ހަދަނީ ކީއްވެކަން ވެސް ބުނެނުދީ މަޒީދު ތިހެން ހެދީމަ؟” މިފަހަރުވެސް ސާރިޔާގެ ވާހަކަ ނިމުނުތަނާހެން މަޒީދު ވާހަކަ ދެއްކިއެވެ.

“މަހީރާއަށް އެނގޭ…..މަހީރާއަށް އެނގޭ އަހަރެން ސާރިޔާއާއި އިންނަން އުޅޭ ވާހަކަ. އޭނަ މި ވާހަކައާއި ޤަބޫލުވެސްމެ.” އެއީ މަޒީދުގެ މުޅި ޙަޔާތުގައި ވެސް އޭނަ ހެދި އެންމެ ބޮޑު ދޮގޭ ބުނުން ގޯހަކަށް ނުވާނެއެވެ. އޭނަ އެހެން ބުނުމާއެކު ސާރިޔާގެ މޫނުމަތީގެ ކުލަވަރާއެކީ އޭނަގެ ޖަޒުބާތުތަކަށް ވެސް ލޮޅުމެއްއައެވެ. މީހަކާއި ދެ އަންބަށް އިންނަން އޭނަ ޤަބޫލުވާނެ ކަމަށް އޭނަ ދުވަހެއްގެ ކޮޅުން ވެސް ހިއެއްނުކުރެއެވެ. އެހެނަސް ދެންމެ އިވުނު ބަސްތަކުންނާއި މަޒީދު މިހުރިހާ ދުވަސްވަންދެން އޭނައާއި މެދު ބަހައްޓާފައިވި ގާތްކަމުން އެ ޚިޔާލު ހިތުތެރޭގައި ޒީނަތްތެރިވާން ފެށިއެވެ. މަޒީދު އޭނަ ކައިރިން ބުނަނީ ކީކޭތޯ ސުވާލުކުރުމުން ޖެހިލުންވުމަކާއެކީ އެކަމާމެދު ވިސްނާނެ ވާހަކަ ބުނެލެވުނީ އެހެންވެއެވެ.

އެދުވަސްފަހުން 3 ވަރަކަށް ހަފްތާ ވަންދެން ސާރިޔާއަށް މަޒީދު ބުނި ވާހަކައާއިމެދު ވިސްނެމުން ދިޔައެވެ. މަޒީދާއެކީ ކައިވެންޏަކުން ގުޅުމުގެ ޚިޔާލުން އޭނައަށް އުފަލެއް ލިބެމުން ދިޔައެއްކަމަކު މަހީރާ އެކަމާމެދު އުފާވާނެކަމާމެދު ޝައްކުވަމުން ދިޔައީތީ ނިންމުމެއް ނިންމަން އޭނައަށް ދަތިވަމުން ދިޔައެވެ. އެންމެ ފަހުން އޭނަ ހަމަ ބޭނުންވަނީ މަޒީދާއެކީ ދިރިއުޅުމެއް ފަށަންކަން އޭނައަށް ޔަޤީންވީ އެއްދުވަހު މަސްޢޫދު އޭނަ ކައިރިން އިނުމަށް އެދުމުން އޭނައަށް ދެވުނު ޖަވާބުންނެވެ.

“އަހަންނަށް އެހެން މީހަކު ކަމުދޭ މަސްޢޫދު….” އެއްދުވަހު ހަވީރު އޮފީހުގެ ސައިކޮޓަރީގެ މޭޒުދޮށުގައި އިން ސާރިޔާއަށް މަސްޢޫދުގާތު ބުނެލެވުނެވެ.

“ކާކު؟ އަހަރެން ކައިރި ނުބުނާތި ސާރިޔާ އަހަރެން ތި ދޫކުރަނީ އެ މަޒީދަށްޓަކައޭ…..ކިތަންމެ ގިނަ ހަދިޔާއެއް ފޮނުވިޔަސް އެއީ އެއްގޮތަކަށް ވެސް ރަނގަޅު މީހެއްނޫން ސާރިޔާ!” މަސްޢޫދަށް ބުނެލެވުނެވެ.

“އޭނަ އަހަރެން ކައިރި ނުބައިކަމެއް ކުރާށޭ ނުބުނެއޭ. ހަމަ މަސްޢޫދު ގޮތަށް އަހަންނާ އިންނަން އޭނަ އެދުނީ. އަހަންނަށް މިހާރު ޔަޤީންވޭ އަހަންނަށް ކަމުދަނީ ހަމަ އޭނަކަން. އަހަރެން އިންނަން ބޭނުންވަނީ އޭނައާ، މަސްޢޫދު.” ސާރިޔާ ބުނެލިއެވެ.

“ސާރިޔާ! އާދޭސްކޮށްފަ މި ބުނަނީ…..އަހަރެން ދޫކޮށްފަ ދިޔަޔަސް އެ މަޒީދާއި ނުއިންނާތި. އޭނަ ސާރިޔާ ސަލާމަތް ކުރިޔަސް އޭނަގެ އަންހެނުން ސާރިޔާއަށް ކޮންމެ ފަދަ ކަމެއްވެސް ކޮށްފާނެ.” ސާރިޔާއަށްޓަކައި ކަންބޮޑުވެ ހިތްދަތިވެފައިވާ ޙާލު މަސްޢޫދު ބުންޏެވެ.

“އަހަރެންގެ ނިންމުން ބަދަލެއް ނުވާނެ މަސްޢޫދު ކޮންމެ ވާހަކައެއް ބުންޏަސް. ވަރަށް ބޮޑަށް މަޢާފަށް އެދެން މަސްޢޫދަށް އިންކާރު ކުރަން ޖެހުނީތީ…” ސާރިޔާ އެހެން ބުނެ އެ މޭޒުދޮށުން ތެދުވެ ދާން އުޅުނު ވަގުތު މަސްޢޫދުވެސް ތެދުވެލަމުން އޭނަގެ ނަމުން ގޮވާލިއެވެ. އެހިނދު އެ ދެމީހުންވެސް ހުއްޓުން އެރީ ސައި ކޮޓަރީގެ ދޮރުމަތީގައި ހުރި މަޒީދު ފެނުމުންނެވެ. މަޒީދު އެހެން ހުރެހުރެފައި ސާރިޔާއާއި ހިނިތުންވެލުމުން ސާރިޔާއަށްވެސް ޖެހިލުންވުމަކާއެކީ ހިނިތުންވުމެއް ދައްކާލެވުނެވެ. އެއާއެކު އޭނަގެ ޙަޔާތުގައި އެ ފެށިގެން ދިޔައީ އޭނަގެ ޙަޔާތުގެ އެންމެ އަނދިރި ބާބުކަން ސާރިޔާއަށް ރޭކާވެސްނުލައެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.