ވަޢުދު (އަށުތިރީސްވަނަ ބައި)

“ކީކޭ؟ ރައުފާ ވަރިވީއޭ؟” މަލާކަށް އެހެން ބުނެލެވުނީ އެދުވަހުގެ ޢަޞްރު ނަމާދަށްފަހު ކިޔަވާ މޭޒުދޮށަށް ދިޔަ މަގުމަތީގައި ކަންފަތުގައި ފޯނު ޖައްސައިގެން އިނދެއެވެ.

“އާނއެކޭ މަލާކް….ވަރަށް ސަކަރާތްވެފަ ރައުފާ ހުރީ. ރަނގަޅަށް ނުވެސް ކާ. ކުރީ ދުވަހު ވަރަށް ބަލިވެގެން ހޮސްޕިޓަލުގަވެސް ބާއްވަން ޖެހުނު. އަހަރެން ވާހަކަ ދައްކަން އުޅެއުޅެ ރަނގަޅެއްނުވޭ. މިހާރު މިވަނީ އެއް ހަފްތާ. އަޅެ މަލާކް ރައުފާއަށް ގުޅާފަ ވާހަކަ ދައްކާލަބަލަ. މަލާކް ވަރަށް މޮޅެއްނު މީހުން ހައްދަން؟ ޓްރައިއެއް ކޮށްލަބަލަ!” ފޯނުގެ އަނެއްކޮޅުން އޭނަގެ އެކުވެރިއަކު އެދުނު އަޑު މަލާކަށް އިވުނެވެ.

“އާނ އޯކޭ….ބަލާލާނަން އިން ޝާ ﷲ!” މަލާކް އޭނަގެ އެކުވެރިޔާއާއިމެދު ހިސާބަކަށް ކަންބޮޑުވެފައި އިނދެ ބުނެލިއެވެ. އެއާއެކު ފޯނުގެ އަނެއްކޮޅުގައި ހުރި އެކުވެރިޔާ އޯކޭއޭ ބުނެލަމުން ފޯނު ކަނޑާލިއެވެ. މަލާކް އިތުރަށް ލަސްކުރުމެއްވެސް ނެތި އޭނަގެ ކިޔަވާ މޭޒު ކައިރީގައި މަޑުކުރަމުން އޭނަގެ އެކުވެރިޔާ ރައުފާއަށް ގުޅަން ފެށިއެވެ. އެހެނަސް އެތައް ރިންގަކަށްފަހު ވެސް ރައުފާ ފޯނު ނުނެގުމުން މަލާކް އިތުރަށް ގުޅަން އުޅުމެއް ނެތި މެސެޖެއް ފޮނުވާލިއެވެ. ވަގުތެއްވުމުން މަލާކަށް ގުޅާލުމަށް އެދިއެވެ. އެއަށްފަހު މަލާކަށް އޭނަގެ ފޯނު ކިޔަވާ މޭޒުމަތީގައި ބޭއްވުމަށްފަހު ވެސް އޭނަގެ އެ އެކުވެރިޔާއާއިމެދު ވިސްނުނެވެ. ދުވަސްކޮޅަކުން އޭނައަށް ވެސް ޖެހެން އޮތީ އެ ޙާލުތާއޭ ހިތަށްއެރިއެވެ. އޭނައާއި އަޔާޒް ވަކިވުމަށް ދެން ބާކީ އޮތީ އެންމެ 2 ހަފްތާއެވެ. އެކަމާމެދު އަޔާޒް ދެކެނީ ކިހިނެއްކަން ޔަޤީން ނުވިއެއްކަމަކު އޭނައަށް އެނގޭހާވެސް ކަމަކީ އެދުވަސް ކައިރިވަމުން ދިޔަ ވަރަކަށް އޭނަގެ ހިތް ގެނބެމުން ދިޔަކަމެވެ. ކައިވެންޏެއް ވަކި މުއްދަތަކަށް ދެމިއޮތުމަށް ޝަރުޠުކޮށްފައިވުމަކީ ރަނގަޅުކަމެއް ނޫންކަން ދެމީހުންނަށް އެނގުނު ދުވަހު އޭނައަށް އަޔާޒްގެ މޫނުމަތިން ފެނުނީ ދޭހަކުރަން އުދަގޫ އަސަރުތަކެވެ. އެއީ ރަނގަޅުކަމެއްނޫންދޯއޭ ބުނެ ޖެހިލުންވުމަކާއެކީ ހީލަމުން އޭނަ ދުރުބެލިއެވެ. މަލާކަށް ނޭނގުނުކަމަކީ އަޔާޒް އޭރުވެސް އެމީހުންގެ ގުޅުން އެގޮތުގައި ދަމަހައްޓަން ނިންމާފައިވިކަމެވެ. އެ އެއްބަސްވުމަކީ ދެމީހުންނަށްވެސް އެއީ ރަނގަޅުކަމެއްކަން ނޭނގި ކުރެވުނު ކަމަކަށްވާތީ ކައިވެނި ޞައްޙަކުރަން ކުރެވެން އޮތްހާވެސް ކަމަކީ ކައިވެންޏާއިގެން ކުރިއަށް ދިޔުން ކަމަށްވާތީވެއެވެ. އަދި އެވަގުތު އެމޫނުމަތިން ފެނުނު އަސަރުގެ ފަހަތުގައިވީ އޭނަގެ ހިތުގެ އިޙްސާސްތައް މަލާކަށް ކިޔައިދޭން ވީ ޖެހިލުންވުންކަމެވެ. އެހެނަސް މަލާކަށް ހީކުރެވުނީ އޭނައާއި ވަކިވުން ރަނގަޅެއް ނޫންކަން އެނގުންވުމުން އަޔާޒަށް އުދަގޫވީ ކަމަށެވެ. އެކަމާމެދު ވީ ހިތްދަތިކަމުގައި ކަން ކޮންމެ ގޮތަކަށް އޮތަސް އަޔާޒް ވަކިވާން އެދިފަ އޮތް ދުވަހު އޭނަ އަމިއްލައަށް ވަކިވާން އެދެން މަލާކް ނިންމާފައިވެއެވެ. އޭނަފަދަ މީހަކާއެކީ އަމިއްލަ ނުރުހުމުގައި އަޔާޒް އުޅެން މަލާކް ބޭނުމެއް ނުވުމުންނެވެ.

ޚިޔާލުތަކެއްގެ ތެރޭގައި އިނދެފައި އޭނަ ހިތާމައިގެ ކަނޑަކަށް ގެނބެން އުޅުނުހެން ހީވުމާއެކު މަލާކް ކުރިމައްޗަށް ނަޒަރު ހުއްޓާލަމުން އޭނަގެ ލެޕްޓޮޕް ހުޅުވާލިއެވެ. މޭގައި ރިހުމެއް ނުއުފެދެނީސް އޭނަ ކުރަން ހުރި މަސައްކަތަށް ސަމާލުކަން ދީ އެ ޚިޔާލުތަކުން ދުރުވުމަށެވެ. ކިޔެވުމުގެ ކޮންމެވެސް މަސައްކަތަކަށް އޭނަ ގެއްލުނުތާ ގަޑިއިރެއްހާއިރު ފަހުން ކޮޓަރީގެ ތަޅު މަޑުމަޑުން އެނބުރެން ފެށި އަޑަށް އޭނައަށް އެދިމާލަށް ބަލާލެވުނެވެ. އަޔާޒް އައިކަން އެނގުންވިތަނާހެން އެ ދޮރު ހުޅުވި އޭނައަށް އެ ދޮރުމަތިން އަޔާޒް ފެނިގެން ދިޔައެވެ. މި ފަހުގެ އާދައިގެ މަތިން އަޔާޒް ފެނުމާއެކު އޭނަގެ ހިތުގެ ތެޅުން އަވަސްވިއެވެ. ޙަޔާތުގައި ވެސް އޭނައަށް ފިރިހެނަކާއިމެދު މިފަދަ ގޮތަކަށް އިޙްސާސް ކުރެވިފައެއް ނުވެއެވެ. ވާނީވެސް އެހެންތާއެވެ. މުޅި ޢުމުރު ދުވަހުވެސް އޭނައަށް ފެނުނު ހުރިހާ ހިލޭ ފިރިހެނުންގެ ތެރެއިން އަމިއްލަ ބޭނުމެއްނެތި އޭނައާއި އަޅާލާ ކަމުގެ އިޙްސާސެއް އޭނައަށް ކުރެވުނީ ހަމައެކަނި އަޔާޒްގެ ފަރާތުންނެވެ. އަޔާޒް އޭނައާއިއެކީ ހޭދަކުރާ ކޮންމެ ވަގުތެއްގައި ވެސް އޭނަގެ ހިތް އުފާވެރިކަމުން ފުރިގެންދެއެވެ. އަދި އަޔާޒް ނުހުންނަ ވަގުތުތަކުގައި ފުން އެކަނިވެރިކަމެއް އިޙްސާސް ކުރެވެއެވެ. އެވަގުތުވެސް އަޔާޒް ފެނުމާއެކު ހިނިތުންވެލެވުނީ އެ ނޭދެވޭ އިޙްސާސުން ދުރުވެވި އޭނަގެ ހިތަށް ހަމަޖެހުމެއް ލިބިގެން ދިޔުމުންނެވެ. ބަދަލުގައި އާދައިގެ މަތިން އަޔާޒްވެސް ދޮރު ލައްޕަމުން ހިނިތުންވެލުމުން އޭނަގެ ހިތް ފުރިގެން ދިޔައެވެ. މަލާކް އެ ސޫރައަށް ބަލަހައްޓައިގެން އިންނަން ބޭނުންވިއެއްކަމަކު ދުރު ބަލާލީ ގަދަކަމުންނެވެ. އޭނަގެ ތަޤްދީރުގައި ނެތްކަމަކަށް އޭނަގެ ހިތް އާދަ ނުކުރުމުގެ ނިޔަތުގައެވެ. އެހެނަސް އަޔާޒް ކޮޓަރިއަށް ވަދެގެން އައި ވަގުތު ލޮލުގެ ކޮޅުން އޭނައަށް އެދިމާލަށް ބެލެމުން ދިޔައީ އަޔާޒް ހިފައިގެން އައި ކަޅުކުލައިގެ ބޮޑު ކަރުދާސް ކޮތަޅު ފެނުމުންނެވެ. އަޔާޒް އޭނައާއި ދާދި ކައިރިން އޭނަ ފަހަނަޅައި ދިޔަ ވަގުތު ކޮތަޅުގެ ތެރެއިން އޭނައަށް ރަތްކުލައިގެ މާތަކެއް ފެނިގެން ދިޔަހެން އޭނައަށް ހީވިއެވެ. އެއާއެކު އޭނަ ހިސާބަކަށް ހުއްޓުން އެރިއެވެ. އޭނައަށް ހީވީ ހަމަ ރަނގަޅަށްތޯ ހިތަށްއެރިއެވެ. އަޔާޒް ރަތްކުލައިގެ މާތައް ގެއަށް ގެންނަންވީ ކީއްވެ ހެއްޔެވެ؟ އެއީ އޭނައަށް ދޭން ގެނައި އެއްޗެއްތޯ ހިތަށްއެރި ވަގުތު އޭނަގެ ހިތް އުފަލުން ނަށައިގަތެވެ. އެކަން އެހެންވުން ނުހަނު ގާތްހެން ހީވީ މިހާތަނަށް އައިއިރު އަޔާޒް އޭނައާއިމެދު ބަހައްޓާފައިވި ގާތްކަން އޭނަގެ ސިކުނޑި ހަނދާން ކޮށްދިނުމުންނެވެ. އެހެނަސް އޭނައަށް ދެންވެސް ޤަބޫލުކުރަން ދަތިވިއެވެ. އަޔާޒަށް އޭނަ ކަހަލަ ނުހިނގޭ، އަތުން ވެސް ރަނގަޅަށް މަސައްކަތް ނުކުރެވޭ އަދި އެތައް ގޮތަކުން ނާޤާބިލު ކުއްޖަކު ކަމުދާނީ ކިހިނެއް ހެއްޔެވެ؟ ހިތަށް ވެރިވި އެ ސުވާލުން ނާއުއްމީދީ އިޙްސާސްތަކުން ހިތް ފުރިގެން ދިޔަ ވަގުތު އެ ހިތަށް ތަދުކުރުވަނިވި ޚިޔާލެއް ސިކުނޑިއަށް ވެރިވިއެވެ. އެއީ އަޔާޒް އެހެން އަންހެން ކުއްޖަކަށްދޭން ގެނައި އެއްޗެއްކަމެވެ. އޭނަ ތަންކޮޅެއް ކުރިން ޚިޔާލު ދިންހެން އަޔާޒް އޭނަގެ މަސައްކަތުގެ މާޙައުލުން އެހެން އަންހެން ކުއްޖަކު ހޯދީތާއޭ ހިތަށްއެރިއެވެ. އެހެނަސް ދީނާއިމެދު ވެސް އުނގެނެން ފަށާފައިވާ އަޔާޒް އޭނައަށް އެފަދަ ގޮތަކަށް ބޭވަފާތެރިވެދާނެކަމަށް ޤަބޫލުކުރަން ވެސް ދަތިވިއެވެ.

މަލާކްގެ ހިތުތެރޭގައި ހައިޖާނެއް އުފެދެން ފެށިތަނާހެން އޭނަ އަނެއްކާވެސް އޭނަގެ މަސައްކަތަށް ސަމާލުކަން ދިނެވެ. އަދި ގަދަކަމުން ވިޔަސް އެހެންކަމަކާމެދު ވިސްނުމެއްނެތި މިނެޓްތަކެއް ވަންދެން އެ މަސައްކަތުގައި އިނެވެ. 10 ވަރަކަށް މިނެޓް ފަހުން އޭނަގެ ސަމާލުކަން އެހެން ދިމާލަކަށް ދިޔައީ މޭޒުމަތީގައި އޮތް އޭނަގެ ފޯނު ރިންގުވާން ފެށުމުންނެވެ. ފޯނުގެ ސްކްރީނުން ‘ރައުފާ’ ގެ ނަން ފެނިފައި އެ އެކުވެރިޔާގެ މަތިން ހަނދާން ކުރަމުން ކޯލު ރިސީވްކޮށް ސްޕީކަރަށްލީ ވާހަކަ ދައްކަމުން ވެސް އޭނަގެ މަސައްކަތް ކުރިއަށް ގެންދިޔުމަށެވެ.

“އައްސަލާމްޢަލައިކުމް ރައު….ދުވަސްކޮޅެއްވެއްޖެދޯ ނުގުޅޭތާ؟ ކިހިނެއްތަ؟” މަލާކް އޭނަގެ އާރޓިކަލް ލިޔަމުން ހިނިތުންވުމަކާއެކީ ސުވާލުކުރިއެވެ.

“ރަނގަޅެއްނޫން….ނިއު ބުނެގެންދޯ މަލާކް ތިގުޅީ؟ އެނގެއޭ އޭނައަށް ނުހުރެވޭނެކަން ނުބުނެ…” ރައުފާ ހިތާމަވެރި އަޑަކުން ބުނެލި އަޑުއިވުނެވެ.

“އާނ….ނިއު ކިޔައިދީފި ހުރިހާ ވާހަކައެއް. ތިހާ ބޮޑުކަމެއް ދިމާވީމަ އެއްވެސް މީހަކާ ޙިއްސާ ނުކޮށް އަމިއްލައަށް ދެރަވުމަށްވުރެ ވާހަކަ ދައްކާލުންދޯ ރަނގަޅީ؟ ގެޓް އޯވާރ އިޓް ރައު……ހީޒް ނޮޓް އިވެން ވޯތް އިޓް. ރައު އަމިއްލައަށްނު މަލާކް ކައިރި ކުރީ ދުވަހުވެސް ބުނީ އޭނަ ރައުއާ ވާހަކަ ދައްކާ ގޮތާއިމެދު؟ އެއީ ރަނގަޅު މީހެއްވެއްޖެއްޔާ ރޮއިރޮއިފަ އޭނަގެ ވާހަކަ ކިޔައިދޭކަށް ނުޖެހޭނެ.” މަލާކް ސާބިތު އަޑަކާއެކީ އެހެން ބުނެލީ ރައުފާ ދޫކުރި އެ ފިރިހެން މީހާއަށް ރުޅިވެފައި ހުރެއެވެ. އަންހެން ކުއްޖެއްގެ އިޙްސާސްތަކުގެ ނާޖާއިޒު ފައިދާ ހިފާ މީހުންނަށް އޭނަ އަންނަނީ އަމަށަކު ރުޅިއެއްނޫނެވެ.

“އާނދޯ މަލާކް؟ އަސްލު އަހަރެން ޖެހެނީ ދެން ހަމަ ހަނދާން ނައްތާލަން. އެކަމަކު އެހާ ގިނަ ދުވަސްވަންދެން އެކީގަ އުޅުނު މީހެއްވީމަ އުދަގޫ ވަނީ އެކަންކުރަން.” ރައުފާ އެހެންވެސް ބުނެލީ ހިތާމަވެރި އަޑަކުންނެވެ.

“ތިހެން ނުވިސްނާ! އޭނަ ހަނދާން ނައްތާލާފަ ދިރިއުޅުމާއިގެން ކުރިއަށްދޭ. ޢިއްދަ ހަމަވާއިރަށް މަންމައާއި ބައްޕައާ ވާހަކަ ދައްކައިގެން ރަނގަޅު މީހަކު ހޯދާ. އޭނައަށްވުރެ މާ ސަޅި މީހަކު ހޯދައިގެން އިންނަން އުޅޭ.” މަލާކް ނުހަނު ޖޯޝާއެކީ ބުނެލިއެވެ.

“ހެހެ….ތިއީ އެހާ ފަސޭހަކަމެއްނަމައޭ ހިތަށްއަރާ.” ރައުފާ ބުނި އަޑުއިވުނެވެ.

“ﷲ ގެ ޙަޟްރަތުގަ އުއްމީދު ކަނޑާލުމެއްނެތި އެދުމުން އެއްވެސް ކަމަކީ ނުވާނެކަމެއް ނޫން. އެކަލާނގެ އަޅުންނަށް އެންމެ ރަނގަޅު ގޮތްތައް އެކަލާނގެ މެދުވެރި ކުރައްވާނެ ދުޢާކުރުން މަތީ ދެމިތިބީމަ. އިންނާނެ މީހަކު ނުލިބުނަސް އަމިއްލަ ނަފްސަށް ތި ލިބުނު ގެއްލުމުގެ ޝިފާ ހޯދަން އެ ލިބެނީ ވަގުތު. ގިނަގިނައިން ﷲ ހަނދުމަކޮށް އެކަލާނގެއަށް ދުޢާކުރޭ. ހުރިހާ ކަމެއް ރަނގަޅުވާނެ އިން ޝާ ﷲ!” މަލާކް ނަޞޭޙަތްދިނެވެ.

“ހޫމް….ހަމަ ރަނގަޅަށް ތިބުނީ. ހެހެ….ތިހެން ބުނީމަ މި ހަނދާންވީ. އެއްކަލަ އަހަރުމެންނާއެކީ ގްރޭޑް 10 ގަ ކިޔެވިއެއްނު އެއްމާބަނޑު ދެމީހުން؟ ހަފީޒްއާ ހިޝާމް؟ އެދެމީހުންކުރެ ހިޝާމް އުޅެނީ މިހާރު ވަރަށް ދީންވެރިވެގެން. މަލާކް އިން ޝާ ﷲ އޭ ބުނީމަ މި ހަނދާންވީ. އެދެމީހުން އުޅުނީ އަހަރުމެން ދެމީހުންނާ ހެދިއެއްނު؟ އަދިވެސް ހިޝާމް ދައްކަޔޯ މަލާކްގެ ވާހަކަ. ދެން ނިއު ބުނަނީ ހަފީޒްވެސް އަދިވެސް ހަނދާން ހުންނާނެޔޯ މަ މަތިން. ރައުހެން މަލާކްވެސް ވަރިވެގެން މިކޮޅަށް އައިމަ ދެ ބެސްޓް ފްރެންޑުންނަށް އެއްގެއަކަށް ދެވޭނެ ނޫންހެއްޔޯ؟” ރައުފާ ހެވިފައިހުރެ ކުރި ސަމާސާއިން މަލާކަށް ވެސް ހެވެން ފެށީ އެމީހުން ސްކޫލް ދުވަސްވަރު ދެއްކި އެ މޮޔަ ވާހަކަތައް ހަނދާންވެފައެވެ. އެ ޚިޔާލުތަކަށް ގެއްލިފައިވުމުން ނުހަނު ލަސްލަހުން އޭނަގެ ފަހަތުން ކޮޓަރީގެ ދޮރެއްގެ ތަޅު އެނބުރުނު އަޑުވެސް އޭނައަށް ފާހަގައެއް ނުވިއެވެ.

“އާނދޯ؟ އެހެންވިއްޔާ މަލާކްވެސް ވަރިވެގެން ރަށަށް ގޮއްސިއްޔާ އިންނާނެ މީހަކު ހުންނާނެތާ!” މަލާކް އެ ސަމާސާގެ ތެރެއަށް ގެއްލިފައިހުރެ ބުނެލި ވާހަކަ އޭނަގެ ފަހަތުން ހުޅުވުނު ދޮރުމައްޗަށް އެރި އަޔާޒަށް އިވުމާއެކު އޭނަގެ ހިނިތުންވުން ފިލައިދިޔައެވެ. އަތުން ހިފައިގެން ހުރި މާ ބޮނޑިއަށް ވެސް ދުލެއް ދެވުނީ ނުބައެއްގެ އިންޒާރު އޭނަގެ ސިކުނޑި ދިނުމުން ހިތަށްއައި ލޮޅުމާއި އެކީގައެވެ. މަލާކް ދެންމެ އެ ބުނެލި ވާހަކަ އޭނައަށް ދޭހަ ކުރެވެން ވެސް އިރުކޮޅެއް ނެގިއެވެ. އޭނަ އިތުރަށް އެވާހަކައާއިމެދު ވިސްނަން އުޅުނު ވަގުތު ފޯނުން އަޑުއައެވެ.

“އާނއެކޭ….ހިޝާމް ލޯބިވާނެ މަލާކް ދެކެ އެހެން އެއްވެސް މީހަކަށްވުރެ ބޮޑަށް. އެއީ މަލާކްގެ ހިޝާމްއެއްނު؟ ހެހެހެ…..” ރައުފާ ދެންވެސް އެމީހުން ސްކޫލް ދުވަސްވަރު ކުރި ސަމާސާތައް ތަކުރާރުކުރުމުން މަލާކަށް އިތުރަށް ހެވުނެވެ. އޭނަގެ އެ ހުނުމުގެ ސަބަބުން އޭނަގެ ފަހަތުގައި ހުރި މީހެއްގެ ހިތަށް ޒަޚަމްތަކެއް ލިބެމުން ދިޔަ ކަމެއް އޭނަ ނުދެނެ ހުރިއެވެ. މަލާކަށް ބަލަން ހުރި އަޔާޒް މޫނުމަތީގެ ކުލަވަރު މުޅިންހެން އޮއްސިގެން ދިޔަ ވަގުތު އޭނަގެ އަތުގައި އޮތް މާ ބޮނޑިވެސް ތިރިކޮށްލެވުނެވެ. މަލާކް އިތުރަށް ދައްކާނެ ވާހަކައެއް އަޑުއެހުމެއްވެސް ނެތި އަޔާޒް ކޮޓަރިއަށްވަދެ ދޮރު ލައްޕާލި ވަގުތު އޭނައަށް ނޭނގުނު ކަމަކީ މަލާކްގެ ވާހަކައިގެ މުހިއްމު ބައެއް އޭނަ ދޫކޮށްލީކަމެވެ.

މާ ބޮނޑިއާއެކީ ކޮޓަރިއަށް ވަދެގެން ގޮސް އަޔާޒް އެނދުމަތީގައި އިށީނީ ވަރެއްނެތިގެން އުޅޭ ފަދައަކުންނެވެ. މާ ބޮނޑި އެނދުމަތީގައި ބޭއްވުމަށްފަހު ދެއަތުން މޫނު ފޮރުވާލި ހިނދު އޭނަގެ ހިތަށް ދުވަހަކުވެސް އުދަގޫ ނުވާވަރަށް އުދަގޫވެފައިވިއެވެ. އެ ހިތް މޭތެރޭގައި ޖެހި ފިތި ބާރުވަމުން ދިޔަކަހަލަ އިޙްސާސެއް ކުރެވުނީ މަލާކް ބުނި ބަސްތައް ސިކުނޑީގައި ގުގުމަން ފެށުމުންނެވެ. މަލާކް އަދިވެސް ނިންމައިގެން ހުރީ އޭނައާއި ވަރިވެގެން ރަށަށް ގޮސް އެހެން މީހަކާއި އިންނަންތޯ ހިތަށްއެރިއެވެ. މަލާކް އެ ބަސްތައް އެ ބުނެލީވެސް ހާދަ ހެވިފައި ހުރެއެވެ. އޭނަ މިހާތަނަށް އައިއިރު އޭނައާއި މަލާކް ވަކިވާން އުޅޭ ވާހަކަ މަލާކް ނޫން އެއްވެސް މީހެއްކައިރީގައި ދައްކާފައެއްނުވެއެވެ. އެހެނަސް އެ ވާހަކައަކީ މަލާކް އޭނަގެ އެކުވެރިންނާއި ޙިއްސާކޮށް އެކަމާމެދު ސަމާސާވެސް ކުރާ ވާހަކައަކީ ހެއްޔެވެ؟ މަލާކަށް އެދެމީހުން ވަކިވާން އުޅޭ ވާހަކަ ދައްކަން އެހާވެސް ފަސޭހައީ ހެއްޔެވެ؟ ފަސޭހަވިއްޔާ އޭގެ މާނައަކީ އޭނަގެ ހިތުގައި އުފެދުނު އިޙްސާސްތައް މަލާކްގެ ހިތުގައި ނުވާކަން ހެއްޔެވެ؟ މި ހުރިހާ ދުވަހު މަލާކް އޭނައަށް ކޮށްދިންހާ ކަންތައްތަކަކީ ލޯބީގެ ބަދަލުގައި ހަމައެކަނި އަންބެއްގެ ޒިންމާ އަދާކުރަން ކުރި ކަންތައް ހެއްޔެވެ؟

ސިކުނޑިއަށް ވެރިވާން ފެށި ޚިޔާލުތަކުން އޭނަގެ މޭގައި ލަސްލަހުން ރިހުމެއް އުފެދެން ފެށިއެވެ. އޭނަ މި ވޭތުވެ ދިޔަ ދުވަސްތަކުގައާއި ދާދި ދެންމެއަކު މަލާކްދެކެ ވާ ލޯބި މަލާކާއި ޙިއްސާ ކުރުމަށްވީހާ ތައްޔާރީތައް ހިތަށް ގެނެވުމުން އަމިއްލަ ނަފްސަށް ޙަމްދަރުދީ ވެވުނެވެ. ފުރަތަމަ ފަހަރަށް އޭނައަށް އެހާ ފުންކޮށް ވެވުނު ލޯތްބެއް ޙާޞިލުކުރުމުގައި ނާކާމިޔާބުވިހެން ހީވި ހީވުމާއެކު އަމިއްލަ ނާޤާބިލިއްޔަތުކަމުގެ އިޙްސާސް ކުރެވުނެވެ.

ބޮކި ނުދިއްލާ ހުރި ކޮޓަރި ތެރެއަށް އަނދިރިވެ މަޣްރިބް ނަމާދަށް ބަންގި ގޮވަން ފެށީ އަޔާޒް އޭނަގެ އެ ޚިޔާލުތަކުގައި ވަނިކޮށެވެ. ބަންގީގެ އަޑު އިވުމާއެކު އަޔާޒް އޭނަގެ ނޭދެވޭ ޚިޔާލުތަކުން ނިކުންނަން މަސައްކަތް ކުރަމުން އެނދުން ތެދުވެލިއެވެ. ފާޚާނާއަށްވަދެ ވުޟޫކޮށްގެން ނިކުތްއިރު އެނދުމަތީގައި އޮތް މާ ބޮނޑި ފެނިފައި އަޔާޒް އޭތި ނަގައިގެން ގޮސް ޑަސްބިނަށް ލާން އުޅުނެވެ. އެހެނަސް އެގޮތަށް ކަންތައް ކުރަން ނުކުޅެދުމުން އޭނަ އޭތި އަރިމަތީ މޭޒުމަތީގައި ހުރި ކަޅުކުލައިގެ ކޮތަޅުގެ ތެރެއަށްލިއެވެ. އެއަށްފަހު މިސްކިތަށް ދިޔުމަށްޓަކައި ކޮޓަރިން ނިކުންނަން ދިޔައެވެ. ހިތަށް ވެރިވެފައިވި ހައިޖާނެއްގެ ބޮޑުކަމުން އޭނައަށް ދޮރު ހުޅުވާލެވުނީވެސް ވަކި ވިސްނުމެއްނެތިއެވެ. އެއާއެކު އަނެއް ކޮޓަރީގައި ފޮށާ އަޅަން ހުރި މަލާކް ސިއްސައިގެން ދިޔަ މަންޒަރު ފެނިފައި އަޔާޒް އޭނަގެ މިލާފައިވާ މޫނާއިއެކީ ހުއްޓުންއެރިއެވެ. އާދައިގެ މަތިން ސޮރީއޭ ބުނެވެން އުޅުނެއްކަމަކު މަލާކާއި ވާހަކަ ދައްކަން އަނގަ ހުޅުވުމާއެކު ހިތަށް ވެރިވެގެން ދިޔަ މާޔޫސްކަމުން އަރުތެރެ ބެދުނެވެ. އެހެންކަމުން އޭނަ ވަކި އެއްޗެކޭ ނުބުނެ ކޮޓަރިން ނިކުމެގެން ދާން ހިނގައިގަތެވެ. އަޔާޒްގެ މޫނުމަތި ހުރި ގޮތް ފާހަގަވެފައި ކަމެއްވެއްޖެކަން އެނގުންވުމުން އަޔާޒް ބޭރު ކޮޓަރީގެ ދޮރާއި ހަމަވި ހިނދު މަލާކަށް އަޔާޒްގެ ނަމުން ގޮވާލެވުނެވެ. އެއަޑަށް މަޑުކުރުމެއްނެތި ދާން އޭނަގެ ސިކުނޑި އެންގިއެއްކަމަކު ފިޔަވަޅުތައް މަޑުޖައްސާލެވުނީ އެއަޑުން އޭނަގެ ހިތަށް ފޯރުވި ބާރުންނެވެ.

“އަޔާޒް ކިހިނެއްވީ؟ ބަލީތަ؟” އޭނައަށް ފަސްދީގެން ހުރި އަޔާޒަށް ބަލަން އިނދެ މަލާކް އެހެން އަހާލިއިރު ވެސް އަޔާޒް ބައްޔެއް ނޫންކަން މަލާކަށް ޔަޤީންވިއެވެ. އަޔާޒް އުޅެނީ ކޮންމެވެސް ކަމަކާމެދު މާޔޫސްވެގެންކަން އޭނައަށް އެނގުންވިއެވެ. އެކަމާމެދު ވީ ކަންބޮޑުވުމުގައި އަޔާޒް އެއްޗެކޭ ނުބުނުމުން މަލާކަށް ތަކުރާރުކޮށް އޭނަގެ ނަމުން ގޮވާލެވުނެވެ.

“ކަމެއްނުވޭ…” ހިތުގެ އުދާސްތައް ކިޔައިދޭން އޭނަ ނުކުޅެދޭނެކަން ޔަޤީންވުމުން އަޔާޒަށް ބުނެލެވުނެވެ. އެއަށްފަހު މަލާކަށް ބަލާލުމެއްނެތި އިތުރު އެއްޗެކޭ ބުނުމުގެ ފުރުޞަތެއްނުދީ ކޮޓަރިން ނިކުމެގެން ދިޔައެވެ. އަޔާޒް ދިޔަ މަންޒަރު ބަލަން މަލާކަށް ދެންވެސް ވިސްނުމެއްގައި އިނދެވުނެވެ.

ގެއިން ނިކުމެ މަލާކާއި ދުރަށް އެޅެމުން ދިޔަ ކޮންމެ ފިޔަވަޅަކާއެކީ އޭނަގެ ހިތުގައި ރިހުމެއް އުފެދެމުން ދިޔައެވެ. މަގުމަތިން އެކަނި ހިނގާފައި ދިޔައިރު އޭނަގެ ސިކުނޑި އަދި އިތުރު ނޭދެވޭ ޚިޔާލުތަކުން ފުރުން ނޫންކަމެއްނުވިއެވެ. މަލާކް އޭނަ ބޭނުންނުވާ ކަމަށް އޭނަގެ ސިކުނޑީ ބުނަމުން ދިޔައީ މަލާކްގެ އެ ހުނުމުގެ އަޑާއި އެކީގައެވެ. އޭނަ މަލާކާއި އެކީ ހޭދަކުރަން ޚިޔާލުކުރި ރީތި ޒަވާޖީ ޙަޔާތް އޭނައަށް ތަޖުރިބާ ނުކުރެވޭނެ ކަމަށް ހިތް ބުނި ބުނުމާއެކީ އޭނަގެ ލޮލުން ކަރުނަ ހިލުނެވެ. އޭނަ ނުހަނު ކައިރި މުސްތަޤްބަލެއްގައި މިގޮތަށް ގެއިން ބޭރަށް އައިސް އަނބުރާ ގެއަށްދާއިރު އޭނައަށް މަރުޙަބާ ކިޔާނެ ހިނިތުންވުމެއް ނުފެންނާނެ ކަމުގެ ޚިޔާލުން އޭނަގެ ހިތް ރޫރޫއެޅިއެވެ. އެހެންކަމުން އެރޭގެ މަޣްރިބް ނަމާދުގައި އޭނައަށް ހިތާހިތުން ﷲ ގެ ޙަޟްރަތުގައި ކުރެވެމުން ދިޔައީ އެ ޝަކުވާތަކެވެ. ހަޝަމް ބަނީއްސުރެ މުޅި ނަމާދު ތެރޭގައި އޭނައަށް ރޮވެމުން ދިޔައީ އޭނައަށް ކެތްނުކުރެވޭނެ ފަދަ ހިތާމަވެރިކަމަކުން އޭނަ ދުރުކޮށްދެއްވުމަށް އެދިއެވެ. އެރޭ މަޣްރިބް ނަމާދަށްފަހު އޭނަ ގެއަށް ދާ ހިތެއްވެސް ނުވިއެވެ. މަލާކް ފެނުމުން އޭނަގެ ޙާލަތު ގޯސްވުން ނޫންކަމެއް ނުވާނެކަން އެނގޭތީވެއެވެ. މަލާކްގެ ޚިޔާލުތަކުން އޭނަގެ މޭގައި އުފެދިފައިވި ރިހުމުގެ ސަބަބުން މަލާކްމަތިން ހަނދާން ނައްތާލަން ވެސް އޭނަގެ ސިކުނޑި އެދެމުން ދިޔައެވެ. އެހެނަސް ޢިޝާ ނަމާދަށްފަހު މިސްކިތުން ފޭބުމަށްފަހު ވެސް އޭނައަށް ފިޔަވަޅުތައް އެޅެން ފެށީ ހަމަ މަލާކަށްޓަކައި ކަމެއް ކޮށްދިނުމަށެވެ. މަލާކް އޭނައާއި ވަރިވުމަށްފަހު އުޅެން ބޭނުންވަނީ މާލޭގައި ކަމަށް ބުނި ވާހަކައިން އޭނަ އޭނަގެ ބައްޕައަށް ނިސްބަތްވާ ޢިމާރާތްތަކުގެ ތެރެއިން އެންމެ ރީތި އަދި އުސްތަންތަންކޮޅު ނުހުންނަ ކޮޓަރިއެއް ހުސްކޮށް ހުރިތޯ ބެލިއެވެ. އަދި އޭނަ ބުނަންދެން އެ ކޮޓަރި ހުސްކޮށް ބެހެއްޓުމަށް ރިސެޕްޝަންގައި އެދެވުނެވެ.

އަޔާޒް ގެއަށް އައިއިރު އެންމެން ރޭގަނޑުގެ ކެއުމަށް ސުފުރާ ދޮށަށް އެއްވެފައި ތިއްބެވެ. އޭނަ ފެނުމާއެކު އޭނަ ދިޔަތަނަކާއި މެދު ދޮންބެ ސުވާލު އުފެއްދިއިރު ބޮޑުމަންމަ އޭނަގާތު ކާންއައުމަށް އެދުނެވެ. އެދެމީހުންނަށް ވަކިވަކިން ބެލުމަށްފަހު ކާމޭޒުދޮށުގައި އިން މަލާކަށް ވެސް އޭނައަށް ނަޒަރު ހުއްޓާލެވުނެވެ. އިރުކޮޅެއް ވަންދެން އޭނައާއި މަލާކްގެ ހަތަރުކަޅި ބައްދަލުވިއެވެ. އެހިނދު މަލާކްވެސް ކުރަން ބޭނުންވެފައި އޮތް ސުވާލެއް އޮތެވެ. އެރޭ އަޔާޒް ދެނަމާދު ދޭތެރޭ ނައީ ކީއްވެތޯއެވެ. އެހެނަސް މަލާކް ހިމޭންކަން ޚިޔާރުކުރީ އަޔާޒް އުޅެނީ ބޮޑުކަމެއް ދިމާވެގެންކަން އެނގުންވުމުންނެވެ. ވަކިން ޚާއްޞަކޮށް އަޔާޒް ގޭގައި ނެތް ވަގުތު އަޔާޒްގެ ކޮޓަރިއަށް ވަނުމުން އަރިމަތީ މޭޒުމަތީގައި ކޮތަޅެއްގެ ތެރޭގައި ހުރި މާ ބޮނޑި ފެނުމުންނެވެ. އޭނަ އެ މާ ބޮނޑި ކޮތަޅު ތެރެއިން ނަގައި އޭގައި ހަރުކުރެވިފައިވި ގަނޑުކޮޅުގައި އޮތް ބަސްތައް ކިޔުނެވެ. ހިތެއްފަދައިން ކެފިފައިވި އެ ގަނޑުކޮޅުގައި ރީތި ލިޔުމަކުން ‘އައި ލަވް ޔޫ’ އޭ ލިޔެވިފައި އޮތް މަންޒަރު ފެނިފައި މަލާކްގެ ހިތް ފުރަތަމަ ސިކުންތުގައި އުފާވިއިރު ދެވަނަ ސިކުންތުގައި ދެރަވިއެވެ. އުފާވީ މިއީ އަޔާޒް އޭނައަށްޓަކައި ގެނެސްފައި އޮތް އެއްޗެއްހެން ހީވުމުންނެވެ. އެހެނަސް ދެރަވެގެން ދިޔައީ އޭނައަށްދޭން ގެނައި އެއްޗެއްނަމަ އަޔާޒް މިހާރު ހުންނަންވާނީ ދީފަނޫންތޯ ހިތަށްއެރުމުންނެވެ. އަޔާޒް މާޔޫސްވެފައިވަނީ އޭނަ މީތި ދޭން އުޅުނު އަންހެން ކުއްޖާގެ ސަބަބުންތޯ ހިތް ބުނި ވަގުތު އެ ހިތް ދެރަވީ ހިނދު އަޔާޒް އުފާކޮށްދިނުމުގެ ރޫޙެއްވެސް ހިތުގައި އުފެދުނެވެ. އެހެނަސް އަޔާޒް އޭނަ ނޫން އަންހެން ކުއްޖަކާއެކީ އޭނައަށް ބޭވަފާތެރިވާކަމުގެ ޚިޔާލުން ވީ ދެރައިގައި އެރޭ އަޔާޒްގާތު އެއްވެސް ވާހަކައެއް ދެއްކުމުގެ ހިތްވަރެއް ނުލިބުނެވެ. ނަތީޖާއެއްގެ ގޮތުން އެރޭ ދެމީހުން ވެސް ދެކޮޓަރީގައި ނިދަން އޮށޯތެއްކަމަކު ދެމީހުންގެ ލޮލަށް ވެސް ނިންޖެއްނައެވެ. އެކީގައިވާން ބޭނުންވާ ދެހިތް ދެ ތަނެއްގައިވުމުން އެ ދެހިތުގެ ހަމަޖެހުން ވެސް ގެއްލިފައިވީއެވެ.

އޭގެ އަނެއްދުވަހު މަލާކް ފަތިސް ނަމާދަށް ހޭލީ އެރޭ ގަޑިއިރެއްހާއިރު ވަންދެން ނިދުމަށްފަހުއެވެ. ހޭލުމަށްފަހު އޭނައަށް އެތައް ފަހަރެއްގެ މަތިން އަޔާޒްގެ ކޮޓަރީގެ ފެންލައިޓާއި ދިމާލަށް ބެލެމުން ދިޔައެވެ. އެ ބެލިބެލުމުން އަޔާޒް އެދުވަހުގެ ފަތިސް ނަމާދު ކޮޓަރީގައި ކުރިކަން އޭނައަށް އެނގުނެވެ. ފަތިސް ނަމާދަށްފަހު މަލާކް އޭނަގެ މިހާރުގެ އާދައިގެ މަތިން އޭނަ ޢާއްމުގޮތެއްގައި ކުރާ ފައިގެ ކަސްރަތުތައް ކުރިއެވެ. ކަސްރަތުތައް ހަދައި ނިމުނުއިރު ހެނދުނުގެ ސައިގަޑި ޖެހުމުން ވެސް މަލާކަށް އަޔާޒްގެ ކޮޓަރީގެ ދޮރާއި ދިމާލަށް ބެލުނެވެ. އަޔާޒްވެސް ޢާއްމުގޮތެއްގައި އެ ގަޑީގައި ކޮޓަރިން ނިކުންނާނެއެވެ. އަޔާޒް ނުނިކުތުމުން މަލާކް 15 ވަރަކަށް މިނެޓް ވަންދެން އެ ކޮޓަރީގެ ދޮރަށް ބަލަހައްޓައިގެން އަޔާޒަށްޓަކައި އިންތިޒާރު ވެސް ކުރިއެވެ. އެހެނަސް އޭނަ ދާން މަޖުބޫރުވީ ބޭރުން ބޮޑުމަންމަ ސައިބޯން އައުމަށް އެދި ގޮވަން ފެށުމުންނެވެ. ބޮޑުމަންމަ ގޮވުމުން ވެސް މަލާކް އަޔާޒަށް ގޮވަން އުޅުނެވެ. އެހެނަސް އަޔާޒް މިވަގުތު އެ ވީ ޙާލުގެ ޒާތުން އަޔާޒް ބޭނުންވާނީ އެކަނި ހުންނަންހެން ހީވުމުން މަލާކް އެ ޚިޔާލު ބަދަލުކުރުމުން ބޭރަށް ދިޔައެވެ.

ހެނދުނުގެ ސަޔަށް ޢާއިލާގެ އެންމެން ސުފުރާ ދޮށަށް އައިސް ސައިބޮއި ނިމެން ގާތްވިއިރުވެސް އަޔާޒް ނުފެނުމުން މަލާކަށް ރަނގަޅަށް ކާއެއްޗެހި ދިރުވަން ވެސް އުދަގޫވިއެވެ. އަޔާޒް ކޮބައިތޯ އަހައި އެކި މީހުން ސުވާލުކުރި ކޮންމެ ފަހަރަކު އަޔާޒް އަދި އަންނާނެކަމަށް އޭނައަށް ބުނެވެމުން ދިޔައެވެ. އޭނަގެ ޙަރަކާތްތަކުން ކޮންމެވެސް ކަމެއް ގޯސްވެއްޖެކަން އެނގުންވި ވަސީމާ ސުފުރާ ދޮށުން އެންމެން ދުރުވުމުން މަލާކްގެ ކައިރީގައި އިށީނެވެ.

“ކިހިނެއްވީތަ މަލާކް؟ އަޔާޒްއާ ދެކުދިން މައްސަލައެއް ޖެހުނީތަ؟ އަޔާޒް ރޭގަވެސް ކެއީ ވަރަށް ދަންވިފަހުން. އަދި އެހާ ކުޑަކޮށް…..ކިހިނެއްވެގެންތަ އުޅެނީ؟” ވަސީމާ ނުހަނު އަޅާލުމާއެކީ މަޑުމައިތިރި އަޑަކުން ސުވާލުކުރިއެވެ. ބޮޑުމަންމަގެ ފަހު ސުވާލާއެކީ މަލާކަށް ޚިޔާލު ކުރެވިގެން ދިޔައީ އަޔާޒް އެހެން އަންހެނަކާއެކީ ހުރި މަންޒަރެވެ. އެ މަންޒަރު ލޮލަށް ސިފަވުމުން އޭނަ އެ ސުވާލަށް ޖަވާބުދޭން ނުކުޅެދުނެވެ.

“މަލާކް…..ވާހަކަ ނުދައްކާ ތިބުމަކުން މައްސަލައެއް ޙައްލެއްނުވާނެ. އެންމެ ރަނގަޅު ބޮޑުމަންމައަށް ކިޔައިނުދިނަސް. އެކަމަކު އަޔާޒް ކައިރިއަށް ގޮއްސަ ވާހަކަ ދައްކާ. ވާހަކަ ނުދައްކާ ތިބިއްޔާ މައްސަލަ އިތުރަށް ބޮޑުވުން ނޫންކަމެއް ނުވާނެ. އޭރުން ތި ދެކުދިންވެސް އިތުރަށް ދެރަވުން ނޫންކަމެއް ނުވާނެ.” ވަސީމާ ނަޞޭޙަތްތެރިވިއެވެ. އެއަށްފަހު މަލާކްގެ ކޮނޑުގައި ހިފާލުމަށްފަހު އެތަނުން ތެދުވެގެން ދިޔައެވެ. ބޮޑުމަންމަގެ ވާހަކައާމެދު ވިސްނަން އިރުކޮޅެއް ވަންދެން އިނުމަށްފަހު މަލާކް އޭނަގެ ގޮނޑި މޭޒުން ދުރުކޮށް ކޮޓަރިއަށް ދާން މިޞްރާބުޖެހީ އޭނަގެ ނާސްތާގެ ބޮޑުބައި ހުރިގޮތަށް ބަހައްޓާފައެވެ.

މަލާކް ގޮސް ކޮޓަރީގެ ދޮރު ހުޅުވާލުމާއެކު އޭނައަށް އަޔާޒް ފެނިގެން ދިޔައީ ސީދާ އޭނަގެ ކުރިމަތިން ފެންނަމުން ދިޔަ ބެލްކަނީގެ ރެއިލިންގްގައި އަތް އަޅުވައިގެން ހުއްޓައެވެ. އޭނައަށް ފަސްދީގެން ހުރި އަޔާޒަށް އިރުކޮޅެއް ވަންދެން ބަލަން ހުރުމަށްފަހު މަލާކް ކޮޓަރިއަށްވަދެ ދޮރު ލައްޕާލިއެވެ. އޭނަ ހީކުރި ގޮތާއި ޚިލާފަށް އަޔާޒް އެ ދޮރުގެ އަޑަށް ވެސް އޭނައަށް ބަލައެއްނުލިއެވެ. އެކަމާމެދު ދެރަވިއެއްކަމަކު އޭނަ ބޮޑުމަންމަ ބުނިގޮތަށް ހަދަން ބޭނުންވިއެވެ. އެހެންކަމުން އަޔާޒްގެ ކައިރިއަށްދާން ނިންމިއެވެ. ދުވަހަކީ އުޑުމަތި ބަނަކޮށް އޮތް ދުވަހަކަށްވުމުން ކޮޓަރިއާއެކީ ބެލްކަންޏަށް ވެސް އަނދިރިކަމެއް ވެރިވެފައިވިއެވެ. މަލާކް ގޮސް ބެލްކަންޏަށް ނިކުމެވޭ ގޮތަށް ކަހާލެވިފައިހުރި ބިއްލޫރި ދޮރާއި ހަމަވީތަނާހެން ވާރޭ ވެހެން ފެށިއެވެ. މަލާކް މިފަހަރުވެސް ހީކުރި ގޮތާއި ޚިލާފަށް ވާރޭ ވެހެން ފެށުމުން ވެސް އަޔާޒް އެ ހުރިގޮތަށް ހުރީއެވެ. ފުރަތަމަ ސިކުންތުގައި އަޔާޒަށް ގޮވާލަން ހިތަށްއެރިއެއްކަމަކު ގޮވިޔަސް އަޔާޒް ނުބަލާނެހެން ހީވުމުން މަލާކް ބެލްކަންޏަށް ނިކުންނަން ނިންމިއެވެ. ލަސްލަހުން ގޮނޑި ދުއްވަމުން ގޮސް ބެލްކަންޏަށް މަލާކް ނިކުންނަން ފެށީ އަޔާޒްގާތު ދައްކާނެ ވާހަކައަކާމެދު ވިސްނަމުންނެވެ. ބެލްކަނީގައި ހިޔާކުރެވިފައިވި ކުޑަ ތަންކޮޅުން ނިކުންނަން މަލާކް އުޅުނު ވަގުތު އަޔާޒް މުޅިން ތެމި ފޯވެފައިވިއެވެ. އަޔާޒަށް ބަލަން ހުއްޓާ ފުރާޅުގައި ޖެހެމުން ދިޔަ ވާރޭ ތިކިތަކުގެ އަޑާއެކީ އޭނައާއި ނުހަނު ކައިރިން ބާލިދީއެއް ފުރެމުން ދިޔަ އަޑު އޭނައަށް އިވުނެވެ. އެއްފަރާތަކަށް ބަލާލިއިރު ފުރާޅުގެ އެއްފަރާތުން އަންނަމުން ދިޔަ ފެންތައް އެކުރަން އެތާ ބާލިދީއެއް ބެހެއްޓިފައިވިއެވެ. އެއާއެކު އަޔާޒް ހެއްވާލެވޭނެ މޮޅު ގޮތެއް ސިކުނޑިއަށް ވެރިވުމުން މަލާކް އެ ކުޑަ ބާލިދީ ނެގިއެވެ. އަދި އޭތި އުނގުމަތީގައި ބަހައްޓައިގެން އެއްއަތުން ގޮނޑި ދުއްވަމުން އަޔާޒާއި ނުހަނު ކައިރިއަށް ގޮސް އޭނަގެ ފަހަތުގައި ކަހަލަ ގޮތަކަށް މަޑުކޮށްލިއެވެ. އެއަށްފަހު ހިސާބެއްގެ އުދަގުލާއެކީ ބާލިދީ ދެއަތުން އުފުއްލައި އަޔާޒާއި ދިމާލަށް ފެންތައް އުކާލިއެވެ. ގިނަ ފެންތައް އައިސް ބުރަކަށީގައި ޖެހުމާއެކު އަޔާޒަށް ފަހަތް ބަލާލެވުނީ ސީރިއަސް ނަޒަރަކާއި އެކީގައެވެ. އެ ނަޒަރު އޭނައަށް ލިބޭނެކަން އެނގިހުރި މަލާކް ވަގުތުން އޭނަގެ ދެލޯ ބޮޑުކޮށް އޭނަގެ އަނގަމަތީގައި އެއްއަތް އެޅިއެވެ.

“ސޮރީ……މި ބާލިދީ ހުސްކުރަންވެގެން ފެން އުކިއިރު ހަމަ ނޭނގުނީ މިތާ މީހަކު ހުރިކަން. އެއްވެސް ވަރަކަށް ހިރިވެސް ނުލާ އެއްޗެއް ހުރިތަން ފެނުނީމަ ސްޓެޗޫއެއްކަމަށް ހީކުރީ ހަމަ އަސްލުވެސް…” މަލާކް ނޫންކަމަށް ހަދައި ސަމާސާގެ ޒާތަށް އެހެން ބުނެލީ އަޔާޒް އިތުރަށް ރުޅި ނުވާނެ ގޮތެއް ހައްދަވައި ދެއްވުމަށް އެދި ދުޢާކުރަމުންނެވެ. އޭނަ އެހެން ބުނުމުން ވެސް އަޔާޒް އިރުކޮޅެއް ވަންދެން އެއް ނަޒަރެއްގައި ހުރިތަން ފެނިފައި މަލާކްގެ ހިތް ދެރަވިއެވެ. އެހެނަސް އޭގެ ދެވަނަ ސިކުންތުގައި އަޔާޒަށް ހީލެވުނު މަންޒަރު ފެނުމުން މަލާކަށް ވެސް ހިނިތުންވެލެވުނެވެ.

“މީ ސްޓެޗޫއެކޭ….އެކަމަކު މޫވްކުރާ ކަހަލަ ފައުންޓެއިން ސްޓެޗޫއެއް. ބަލައްޗޭ!” އަޔާޒަށް އެހެން ބުނެ ކޮޓަރިއާއި ދިމާލުން ފެންނަމުން ދިޔަ އެއްކަލަ ފުރާޅުގެ ދަށުގައި ހުރި އެކަހަލަ އެހެން ބާލިދީއަކަށް ނަޒަރެއް ދެމުންނެވެ. މަލާކް އޭނައާއި ސަމާސާއެއް ކުރުމުން ހިނދުކޮޅަކަށް ނަމަވެސް އޭނަގެ ހިތް އެވަގުތުކޮޅުގައި އުޅެލަން އެދުމުގެ ސަބަބުން އޭނަ ހުރިހާ ނޭދެވޭ ޚިޔާލުތަކުން ދުރުވިއެވެ. ނަތީޖާއެއްގެ ގޮތުން އޭނަ އެ ދިޔަގޮތަށް ގޮސް ފެނުން ފުރެމުން ދިޔަ އެ ބާލިދީ ނަގައިގެން ދިގު ފިޔަވަޅުތަކެއްގައި އައިސް މަލާކްގެ ބޮލަށް އަޅާލިއެވެ. އެއާއެކު ދެމީހުންގެ ދެމެދުގައި އެ ކުޅިވަރު ފެށިގެން ދިޔައެވެ. ދެމީހުންވެސް ބާލިދީތައް ފުރުވަމުން އެކަކު އަނެކަކު ގަޔަށް ފެންޖަހަން ފެށިއެވެ. ހިނދުކޮޅެއްގެ ތެރޭގައި ދެމީހުންގެ ހުނުމުގެ އަޑު މުޅި ބެލްކަނީގައި ގުގުމަން ފެށިއެވެ.

އެވަގުތުކޮޅަށް ހުއްޓުމެއް އައީ މަލާކަށް ކިނބިހިއެއް އެޅުމުންނެވެ. އޭރު އަޔާޒް އޭނަ ފުރުވަން ހުރި ބާލިދީއިން ނަޒަރު ވަކިކޮށް މަލާކަށް ބަލާލިއެވެ. އެއާއެކު މަލާކަށް އަނެއްކާވެސް ކިނބިހިއެއް އެޅުމުން އަޔާޒަށް ވާހަކަ ދެކެވުނެވެ.

“އާނ ދެން ނިމުނީ. ދެން ހިނގާ އެތެރެއަށް. ނިކަން އަވަހަށް ގޮއްސަ ތި ބޯ ހިއްކާތި.” އަޔާޒް މަލާކްގެ ކައިރިއަށް ގޮސް މަލާކްގެ އަތުގައި ހުރި ބާލިދީ ބިންމަތީގައި ބަހައްޓަމުން ބުނެލިއެވެ. އެއާއެކު މަލާކް އަޔާޒް ބުނިގޮތަށް ހެދުމަށްޓަކައި ގޮނޑި ދުއްވަން އުޅުމުން އަތުގައި ރިހުމެއް އުފެދުމުން އޭނައަށް ވޭނީ އާހެއްގެ އަޑު ލައްވާލެވުނެވެ. ފުރޮޅުގައި ހިފެހެއްޓިފައިވި މަލާކްގެ އަތަށް ބަލާލުމުން ދެންމެއަކު އެހާ ގިނައިން ފެން ބާލިދީ އުފުއްލުމުން އެ އަތް ބަލިވެފައިވީކަން އަޔާޒަށް އެނގުންވިއެވެ.

“އަތް ނަގާލާ މަލާކް…..އަހަރެން ގެންދާނަން.” އަޔާޒް ބުނެލިއެވެ. އެއާއެކު މަލާކް އޭނަގެ ދެއަތް އުނގުމަތީގައި ބޭއްވުމުން އަޔާޒް ގޮނޑި ދުއްވަމުން ގޮސް ކޮޓަރި ތެރެއަށް ވެއްދިއެވެ. މަލާކްގެ ގޮނޑީގެ ފަހަތް ފާރާއި ދިމާވާ ގޮތަށް ބެހެއްޓުމަށްފަހު އަޔާޒް އެތާހުރި ހަރުގަނޑުން ތުވާއްޔެއް ނަގައިގެން ގޮސް މަލާކަށް ދިއްކުރީ ވީހާވެސް އަވަހަށް ފެން ހިއްކާށޭ ބުނަމުންނެވެ. އަޔާޒް ވެސް ކޮޓަރި ނުތެންމުމަށްޓަކައި އޭނަގެ ކޮޓަރިއަށް ނުގޮސް މަލާކްގެ ކޮޓަރީގެ ހެދުން އަލަމާރި ކައިރިއަށް ގޮސް އޭގެ ތެރެއިން ފަށްޖަހާފައި އޮތް ތުވާއްޔެއް ނަގައި އޭނަގެ ބޯ ހިއްކަން ފެށިއެވެ. އޭރު މަލާކްވެސް އޭނަގެ ބުރުގާ ނަގާލަމުން ތުވާލިން މޫނު ފޮހެލުމަށްފަހު ތުވާލި ބޮލާއި މޫނަށްވާ ގޮތަށް އަޅާލަމުން ބޯމަތިން ތުވާލި ހިންގޭތޯ ބެލިއެވެ. އިސްތަށިގަނޑުން ފެން ހިއްކުމަކީ އޭނައަށް އަބަދުވެސް ދަތިކަމެކެވެ. އަތް ބޭނުންވާ ގޮތަށް ބޭނުންވާ ވަރަކަށް ނުހިންގޭތީވެއެވެ. އަދި އަމުދުން އެވަގުތު ދެއަތް ވެސް ބަލިވެފައިވުމުން އޭނަ އަތް ހިންގަމުން ދިޔައިރު އިތުރު އައިބު ގޮތެއް ދައްކަމުން ދިޔަދިޔަހެން އަތުގައި ރިއްސަމުން ދިޔައީތީ ލުއި އާހުތަކެއްގެ އަޑުވެސް ލެއްވެމުން ދިޔައެވެ. ދުރުގައި ހުރި އަޔާޒަށް އެ އަޑުތައް އިވުމުން އޭނައަށް މަލާކާއި ދިމާލަށް ބަލާލެވުނެވެ. މަލާކް ނުފަރިތަ ގޮތަކަށް އަތް މަޑުމަޑުން ހިންގަމުން ދިޔަ މަންޒަރު ފެނިފައި އޭނައަށް އެދިމާލަށް ހިނގައިގަނެވުނެވެ.

“ތިހާވަރުން ވިއްޔާ ޤަރުނަކުންނެއްނު ތި ފެން ހިކޭނީ؟ ދައްކަބަލަ!” އަޔާޒް މަލާކްގެ ކުރިމަތީގައި ކުރުފައި މައްޗަށް ތިރިވެ މަލާކްގެ އަތް ތުވާލި މަތިން ނަގައި ތުވާލިން ރަނގަޅަށް މަލާކްގެ އިސްތަށިގަނޑު ހިއްކައިދޭން ފެށިއެވެ. ތުވާލި ހިންގަމުން ދިޔަ ވަރަކަށް އަޔާޒަށް މަލާކްގެ މޫނުވެސް ފެންނަމުން ދިޔައެވެ. އެކަމަށް އޭނައަށް ސަމާލުކަން ދެވޭގޮތްވީ އެ މޫނު މުޅިން ކަޝްފުވެ ތުވާލި ބޯމަތިން ކައްސާލައިގެން ގޮސް ފަހަތަށް ވެއްޓުނެވެ. އެހިނދު ދެމީހުންގެ ހަތަރުކަޅި ބައްދަލުވެގެން ދިޔަ ވަގުތު ދެމީހުންގެ ވެސް ހިތުގެ ތެޅުން އަވަސްވިއެވެ. ވެހެމުން ދިޔަ ވާރޭގެ އަޑާއެކީ މާޙައުލަށް ވެރިވެފައިވި އަނދިރިކަމުން ދެމީހުންގެ ހިތަށްވެސް ވެރިވީ އެއްކަހަލަ ޖަޒުބާތުތަކެވެ. މަލާކްގެ މޫނުމައްޗަށް އިސްތަށިކޮޅެއް ވެއްޓިފައި ވަނިކޮށް އަޔާޒަށް އޭތި ރަނގަޅުކުރަން އަތް އުފުލާލެވުނީ އެއްވެސް އިޚްތިޔާރަކާއި ނުލައެވެ. އިސްތަށިކޮޅު މަލާކްގެ ކަންފަތުގައި އަޅުވާލުމަށްފަހު އަތް ތިރިކުރުމުގެ ބަދަލުގައި އަޔާޒަށް މަލާކްގެ މޫނާއި ކަނދުރައިގައި އެއްއަތުން ހިފަހައްޓާލެވުނެވެ. އެހިނދު މަލާކްގެ މެއަށް ވެރިވި ނުތަނަވަސްކަމާއެކީ ހަތަރެސްފަޔަށް ބާރުވެ ދެލޯ ބޮޑުވެގެން ދިޔައެވެ. އަޔާޒް ހުރީ އެކަމަށް ސަމާލުކަން ދެވޭވަރަށްވުރެ ބޮޑަށް މަލާކްގެ ރީތިކަމަށް ގެއްލިފައެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.